Mabapi
Se o tshwanetseng go se dira
Go tsaya nako e e kana kang
Go ja bokae
Diforomo tse o tshwanetse go di tlatsa
Lefelo la bodirelo, diaterese le megala
Mabapi le go dira kopo ya go neelwa ditshwanelo tsa go lekola dimenerale tsa naga
Fa e le gore o batla go dira kopo ya go neelwa ditshwanelo tsa go lekola dimenerale tsa naga, o tshwanetse go tsenya kopo ka inthanete ka go etela webesaete ya Lefapha la Metswedi ya Dimenerale: http://portal.samradonline.co.za.
Ditshwanelo tsa go lekola dimenerale tsa naga ke lekwalotetla le le go dumelelang kgotsa leo le dumelelang setlamo sa gago go lekola karolo e e rileng ya naga maitlhomo e le go bona menerale kgotsa seo se ka tswang e le menerale.
Lekwalo la ditshwanelo tsa go lekola dimenerale le ka dirisiwa mo pakeng ya dingwaga di le tlhano, fa le feletswe ke nako mo morago ga dingwaga di le tlhano o ka tsenya kopo ya gore paka ya lona e atolosiwe ka paka e e sa feteng dingwaga di le tharo.
Ditshwanelo tsa go lekola dimenerale tsa naga o tla di neelwa fa fela ditlhokwa tse di latelang di kgotsofaditswe:
- Fa o:
- na le madi le kitso ya go diragatsa tiro e e tshitsintsweng ya go lekola dimenerale tsa naga ka botlalo
- na le leano la matlole le le tsamaisanang le maikaelelo a tiro ya go lekola dimenerale tsa naga mmogo le le nako e e beilweng
- kgona go obamela Molao wa Boitekanelo le Pabalesego ya kwa Meepong wa 1996 (Molao wa 29 wa 1996)
- o sa tlole Molao wa Tlhabololo ya Didirisiwa tsa Peteroleamo le Dimenerale wa 2002 (Molao wa bo 28 wa 2002) (MPRDA)
- ga go motho a le esi yo a tla tsholang ditshwanelo tsa go lekola dimenerale tsa naga, ditshwanelo tsa go dira moepo, lekwalotetla la go dira moepo kgotsa lekwalotetla la go tsetsepela menerale kgotsa naga e le nngwe
- ga go tshilafatso kgotsa tshenyo ya mothale ope e e tla diragalelang tikologo ka ntlha ya tiro ya ditshwanelo tsa go lekola.
Dikgato tse di latelwang
- Dira kopo ka inthanete.
- Duelela ka inthanete madi a a tlhokegang, a a sa busediweng a go dira kopo.
- Fa khomphiuthara e ka amogela kopo ya gago, o tla kopiwa gore o tlise lenaane la taolo ya tikologo go tlhatlhobiwa mmogo le go kopana le beng ba naga le maloko otlhe a a amegang a a nang le ditshwanelo tsotlhe tsa semolao.
- Isa ditlamorago tse di kwadilweng fa fatshe tse di ka ga dikopano tse di tshwerweng mmogo le maloko kwa go molaodi wa tikologo mo matsatsing a a sa feteng a le 30.
- Fa ditlhokwa tsotlhe di kgotsofaditswe, molaodi wa tikologo o tla isa kopo kwa go Tona gore e tsibogelwe.
Go tsaya nako e e kana kang
- Fa Khomphiuthara ya Botsamaisi jwa Didirisiwa tsa Dimenerale tsa Aforika Borwa:
- e sa amogele kopo ya gago, o tla itsisiwe ka yona nako eo mo inthaneteng
- e amogetse kopo ya gago, o tla itsisiwe pele ga matsatsi a le 14 gore o tlise lenaane la taolo ya tikologo mmogo le go kopana le beng ba naga le maloko otlhe a a amegang a a nang le ditshwanelo tsotlhe tsa semolao.
- O tshwanetse go isa ditlamorago tse di kwadilweng fa fatshe tsa dikopano le maloko kwa ga molaodi wa tikologo mo matsatsing a a sa feteng a le 30.
- Fa ditlhokwa tsotlhe di kgotsofaditswe, molaodi wa tikologo o tla isa kopo kwa go Tona gore e tsibogelwe.
Diforomo tse o tshwanetse go di tlatsa
Dikopo di tshwanetse go tsenngwa ka inthanete.