Nothisi ya ku cinca vun’winyi kumbe ku xavisa movha

Hi ta ku cinca n'winyi kumbe vun'winyi bya vuxokoxoko bya movha

Ku cinca kun'wana na kun'wana ka vuxokoxoko bya n'winyi kumbe vun'winyi ku fanele ku yisiwa eka vulawuri bya ntsariso lebyi faneleke ku nga se hela masiku ya 21 endzhaku ka ku cinca.  Tirhisa xitiviso xa ku cinca adirese kumbe vuxokoxoko bya munhu, kumbe fomo ya nhlangano (NCP).

Loko u xavisa movha wa wena, u fanele ku tivisa vulawuri bya ntsariso hi ku tirhisa fomo ya Xitiviso xa ku cinca vun'winyi/Ku xavisa movha (NCO). N'winyi lontshwa wa movha u fanele ku tsarisa movha hi mavito ya yena.

Leswi u faneleke ku swi endla

1. Yana eka vulawuri bya ntsariso bya le kusuhi.
2. Loko u lava ku cinca adirese ya wena, u fanele ku famba na leswi swi landzelaka:
   • Khopi ya pasi (ID) loko u ri muaki wa Afrika-Dzonga. Loko u ri muhlampfa, u fanele ku yisa pasi (ID) xikan'we na khopi leyi yi nga tiyisisiwa leyi yi humaka etikweni leri u humaka eka rona na mpfumelelo wa nkarhinyana wo tshama etikweni.
   • Papila ra ku tiyisisa laha u tshamaka kona kumbe ra poso xik. papila akhawunti ya ka masipala. Loko akhawunti ya ka masipala yi nga ri hi vito ra wena, n’winyi wa akhawunti u fanele a endla afidavhiti a kombisa leswaku u tshama eka kherefu leyi naswona akhawunti yi fanele yi khomanisiwa na afidavhiti.
3. Loko u ri muaki wa Afrika-Dzonga, u fanele ku tata fomo ya NCP ntsena kutani u yi rhumela. Loko u ri muhlampfa, u fanele ku tata fomo ya NCP na fomo ya Xitiviso xa nomboro ya ntsariso wa swifambo (ANR).
4. Loko u ri ku xaviseni ka movha:
   • Muxavisi u fanele ku tata fomo ya NCO, kutani a yi yisa eka vulawuri bya ntsariso.
   • Muxavisi u fanele ku nyika muxavi xitifikheti xa ntsariso.
   • Muxavi u fanele ku tata fomo ya Xikombelo xa ntsariso na ku nyika layisense ya movha (RLV) ku va a yi rhumela.
   • Muxavi u fanele ku rhumela xitifikheti xa ntsariso wa movha, loko ku ri leswaku movha wu tsarisiwile eAfika-Dzonga.
   • A humesa xitifikheti xa mpimo wa ntiko loko ku ri leswaku ntiko wa movha wu cinciwile.
5. Muxavi wa movha u fanele ku yisa tifomo eka vulawuri bya ntsariso ku nga se hela masiku ya 21 endzhaku kaloko a xavile movha, xikan'we na fomo ya ntsariso leyi a nga yi kuma eka muxavisi, naswona movha wu fanele ku ya kamberiwa nakambe loko wu lulamerile ku famba epatwini (i ntirho wa muxavi ku tiyisisa leswaku movha walowo wu lulamerile ku famba epatwini). l
6. Loko movha wu tsarisiwile eka khamphani, u fanele ku tlhela u rhumela xitifikheti xa khamphani kumbe ku cinciwa ka vito tanihi leswi swi nga humisa swona hi ku landza Nawu wa Tikhampani kumbe hi xitatimende xo sungula.
7. Vulawuri bya ntsariso byi ta hlela xikombelo xa wena kutani u fanele ku hakela tihakelo leti ti vekiweke hi xifundzankulu. 
8. Loko swi laviwa hi vulawuri bya ntsariso u ta fanela ku humesa vumbhoni bya mfanelo ya ku va yi tsarisiwa tanihi loyi a nga na vun'winyi bya movha wa kona, xik. inivhoyisi kumbe ntwanano wa ku xaviselana. Loko u nga ri na byona, foyinela senthara ya tiqingho ya le kusuhi kumbe vulawuri bya ntsariso ku kumisisa loko va pfumela kumbe va lava matsalwa yan'wana ya vumbhoni.

Leswi u faneleke ku swi endla

Swikombelo swi hleriwa hi siku rero.

Xana swi durha mali muni

Tihlanganisi na hofisi yo nyika tilayisense ya le kusuhi ku va u kuma tihakelo.

Tifomo leti tatiwaka

• Xitiviso xa ku cinca vuxokoxoko (NCP)
• Xikombelo xa ku endla ntsariso na ku kuma layisense (RLV)
• Xitiviso xa ku cinca vun'winyi/Ku xavisa movha (NCO)
• Xitiviso xa nomboro ya ntsariso wa swifambo (ANR)

Tifomo ti kumeka eka vufambisi bya ntsariso kumbe u nga ti kuma eka webusayiti ya eNaTIS.

Vuxokoxoko bya vutihlanganisi