A. Xiyimo xa Khabinete eka timhakankulu
1. Ikhonomi
1.1. Ku Kula ka Ikhonomi
1.1.1. Khabinete yi amukerile tinhlayo ta sweswinyana ta GDP, leti kombisaka leswaku ikhonomi yi kurile hi 0.8% eka kotara ya vumbirhi ya 2025, ku antswisiwa ku suka eka ku kula hi 0.1% eka kotara yo sungula.
1.1.2. Ku kula ka GDP hi 0.8% ku kombisa ku vuyelela loku anameke eka tisekithara ta nkoka. Tiindasitiri ta nhungu ti kandziyisile ku kula eka kotara ya vumbirhi, laha tisekitara ta nkoka to fana na vumaki, migodi, na mabindzu titlheleleke eka ndhawu ya ku kula. Ku tlakuka ka matirhiselo ya le makaya swi tlhela swi kombisa ku antswisiwa ka muholo lowu tirhisiwaka naswona leswi swi tiyisisiwa hi ku antswisiwa ka tinhlayo ta ku tlakuka ka minxavo leyi vikiweke.
1.1.3. Khabinete yi tlhele yi amukela xiboho xa Fitch xo tiyisisa swiyimo swa nkarhi wo leha swa Afrika-Dzonga swa swikweleti swa timali ta le handle na swa laha kaya na ku hlayisa langutelo leri tiyeke.
1.1.4. Swiringanyeto swi seketeriwa hi xivumbeko lexinene xa swikweleti swa mfumo lexi ngopfu-ngopfu xi nga na mali ya laha kaya, lexi nga na nkarhi wo leha na mihlangano yo tiya na rimba ra pholisi ya swa timali leri tshembekaka. Hi ku ya hi Fitch, nhluvuko lowu endliwaka ehansi ka ku cinca ka mfumo wa vulindlela wa ntirho wa vulindlela lowu kongomisiweke eka ku lulamisa switirhisiwa swa netiweke (gezi, vukorhokeri, na mati) swi hungute ku khuluka ka ndzhwalo na ku herisa ku hunguteka ka vholumo ya nhundzu leyi fambisiweke, leswi hoxaka xandla eka ku vhumbha ka Fitch ka ku tlakuka loku ringaneleke ka ku kula ka GDP ka xiviri.
1.1.5. Ku tiyisisiwa ka Fitch ku kombisa ku ya emahlweni ka ku tshemba ka vuvekisi eka vufambisi bya swa timali bya tiko na matimba ya nhlangano.
1.2. Kungu ra ku thoriwa ka vantshwa hi Presidente
1.2.1. Khabinete yi amukerile xiviko xa nhluvukiso wa kotara ya sweswinyana xa ku nghenelela ka Presidente eka ku thoriwa ka vantshwa hiDzivamisoko ku ya eka Khotavuxika 2025, lexi kombisaka ku humelela lokukulu ekutumbuluxeni ka tindlela to kuma muholo eka vantshwa va Afrika-Dzonga.
1.2.2. Ku tlula 5.64 wa timiliyoni ta vantshwa va tsarisile eka netiweke ya vulawuri bya tindlela ya rixaka (NPMN), ku tlula xikongomelo xo sungula xa 5 wa mamiliyoni. Ku tlula 1.91 wa mamiliyoni ya vantshwa va fikelerile swivandlanene swo hola swa xinkadyana, leswi kombisaka leswaku matshalatshala ya mfumo lama nga heriki yo lwisana na ku pfumaleka ka mitirho ka vantshwa ya kuma ku koka rinoko.
1.2.3. Eka kotara leyi ntsena, ku tlula 234 000 wa swivandlanene swi fikeleriwile hi vantshwa hi ku tirhisa NPMN. Leswi swi katsa ntokoto wa ntirho, minongonoko ya nhluvukiso wa vuswikoti, na swivandlanene leswi humesaka mali leswi hlomisaka vantshwa ku hundzukela eka makete wa vatirhi. Khabinete yi kombisile ku tlangela eka vatirhisani hinkwavo eka ku hoxa xandla ka vona loku yaka emahlweni na ku tiyisisa ku tinyiketela ka mfumo ku lwisana na ku pfumaleka ka mitirho ka vantshwa hi ku tirhisa ku nghenelela ka vutumbuluxi na ku ringanisiwa.
2. Vuxaka bya Matiko ya Misava
2.1. Nhlengeletano ya vu80 ya Nhlengeletano ya Mani na Mani ya Nhlangano wa Matiko (UNGA 80)
2.1.1. Afrika-Dzonga ri ta nghenelela eka nkarhi wa vu 80 wa nhlengeletano ya nhlangano wa matiko (UNGA-80) yi ta hlangana ehansi ka nhlokomhaka leyi nge “Swa antswa swin’we: 80 wa malembe na ku tlula eka ku rhula, nhluvukiso na timfanelo ta ximunhu” kusukela hi ti 23 - 29 Ndzati 2025 eNew York, USA. Presidente Cyril Ramaphosa u ta rhangela vurhumiwa bya Afrika-Dzonga.
2.1.2. Afrika-Dzonga yi ta tirhisa pulatifomo leyi ku tiyisisa ku tinyiketela ka yona eka vumaki bya matiko yo tala bya misava hinkwayo, timfanelo ta ximunhu eka hinkwavo, nhluvukiso lowu nga heriki tanihi vutihlamuleri bya nhlanganelo, na ku lulamisiwa ka mikwetlembetano hi ku rhula hi ku tshikelela ngopfu eka mikwetlembetano evuxeni bya DRC, Sudans, na Palestina. Ku engetela kwalaho, Afrika-Dzonga yi ta tirhisa UNGA -80 ku tlakusa Ajenda ya VuPresidente bya G20 ya Afrika-Dzonga.
2.1.3. Presidente u ta khoma mihlangano ya matiko mambirhi na vatirhikulobye vo hlayanyana na ku hlangana na tiCEO ta tikhamphani letikulu ta matiko ya misava.
2.1.4. Vaholobye Tau na Lamola va rhangile emahlweni ku ya nghenelela eka mivulavurisano eka ntwanano wa mabindzu wa SA - US na tisexini to hlawuleka ta UN hi ku landzelelana.
2.1.5. Vaholobye van’wana eka vurhumiwa va ta vika ku tiboha ka vona hi nkarhi wa ku tshama ka vona eka UNGA.
3. Vululami na ku sivela vugevenga
3.1. Khomixini ya vulavisisi ya madlanga
3.1.1. Khabinete yi amukerile ku sunguriwa ka ku yingiseriwa ka khomixini ya vuavanyisi ya vulavisisi eka vugevenga, ku nghenelela ka tipolitiki na vukungundzwana eka sisiteme ya vululami bya vugevenga – leyi hi ntolovelo yi tiviwaka tanihi khomixini ya madlanga.
3.1.2. Khabinete yi kombela un’wana na un’wana loyi a nga vaka na mahungu lama nga pfunaka ntirho wa khomixini ku tihlanganisa na vona hi ku tirhisa imeyili ya: madlangacommission@behonest.co.za kumbe eka nomboro ya mahla ya: 0800 111 369.
3.1.3.
3.2 Khomixini ya Khampepe
3.2.1 Khabinete yi amukerile ku sunguriwa ka timhaka ta Khomixini ya Khampepe ya Ntiyiso na Ntwanano na Ndzivalelano (TRC).
3.2.2 Khomixini se yi khomile mihlangano na vamangali na vayimeri va mfumo.
4. Vulawuri
4.1. Nhlangano wa Vulawuri bya Rixaka na Huvonkulu ya Xifundzankulu xa N’walungu-Vupeladyambu
4.1.1. Khabinete yi amukerile mivuyelo ya nhlengeletano exikarhi ka Huvonkulu ya Rixaka na Huvonkulu ya Xifundzankulu ya N’walungu-Vupeladyambu. Loku i ku nghenelela ka vu 7 exikarhi ka tihuvo ta vufambisi bya rixaka na ta vufambisi bya swifundzankulu leswi kongomisiweke eka ku tiyisisa nhlanganiso wa le xikarhi ka mimfumo na ku antswisa mphakelo wa vukorhokeri hi ku fambisana na swilo leswi rhangisiwaka emahlweni swa Vulawuri bya vu 7.
4.1.2. Nhlengeletano leyi yi kandziyisile ku tinyiketela loku pfuxetiweke ku antswisa mphakelo wa vukorhokeri exifundzheninkulu. Yi tiyisisile ntirhisano wa le kusuhi eka swiyenge hinkwaswo swa mfumo ku tisa switirhisiwa swa nkoka swo fana na ku pfuxetiwa ka magondzo, mphakelo wa switirhisiwa swa mati na vukona bya eneji ku nyika matimba eka swikongomelo swa tiindasitiri ta xifundzankulu.
4.1.3. Nhlengeletano yi tinyiketerile ku tirhisana swinene na mfumo wa xifundzankulu xa N’walungu-Vupeladyambu ku tiyisisa ku lulamisiwa ka mitlhontlho leyi karhataka timasipala sweswi exifundzheninkulu.
B. Swiboho swa Khabinete
1. Mpfapfarhuto wa xiphiqo xa mabindzu ya rixaka
1.1. Khabinete yi pasisile ku kandziyisiwa ka mpfampfarhuto wa xiphiqo xa mabindzu ya rixaka (NES) na kungu ro tirhisa ku kuma mavonelo ya vaaki. xiphiqo xi kongomisiw eka ku tlakusa ku nghenelela ka vantshwa na mabindzu lama tshikeleriweke ku ya hi matimu eka ikhonomi hi ku hlohlotela vubindzurisi na ku tiyisisa ku tshamiseka ka Mabindzu Lamatsongo na ya le Xikarhi (MSMEs).
Ku ya emahlweni, NES yi endla swiringanyeto eka ndlela yo tlakusa ndhavuko wa vubindzurisi eAfrika-Dzonga hi ku nyika ndhawu leyi pfunaka eka migingiriko ya vubindzurisi, xikan’we na ku tumbuluxa ndhawu yo seketela eka ti-MSME ku va leti nga ta tshama nkarhi wo leha na ku humelela. Leswi swi ta fikeleriwa hi ku kongomisa eka tiphuphu ta nkoka ta ntlhanu ta nkoka ta swiphiqo ku nga: (i) Ku ndlandlamuxa dyondzo ya vubindzurisi na nhluvukiso wa vuswikoti; (ii) Ku fambisa ku cincana ka thekinoloji na vutumbuluxi; (iii) Ku antswisa mfikelelo wa timali na timakete; (iv) Ku antswisa ndhawu ya vulawuri bya mabindzu; na (v) Ku tlakusa vutivi na vuhlanganisi. Hi ku angarhela, swiphiqo ya kongomisa ku engetela ku nghenelela ka ikhonomi ya ximfumo, ku lulamisa ku pfumaleka ka mitirho ya le henhla ya vantshwa hi ku tlakusa vubindzurisi bya vantshwa na ku nyika nkongomiso wa swiphiqo na mepe wa ndlela lowu hlanganisaka ntirho wa tindzawulo tin’wana ta nkoka na vatirhisani va swiphiqo. Ku engetela kwalaho, swiphiqo ya kongomisa eka ku hlanganisa ikhosisiteme ya nhluvukiso wa vubindzurisi etikweni, ku katsa na switsundzuxo swa vubindzurisi ku nghenisiwa eka tikharikhulamu ta tindzawulo ta Dyondzo ya Masungulo na ya le Henhla tanihi nhlawulo wa ntirho lowu nga kotekaka.
C. Milawumbisi
1. Nawumbisi wa Huvo ya Nhluvukiso wa Ikhonomi ya Rixaka na Vatirhi
1.1. Khabinete yi pasisile ku kuma mavonelo ya vaaki, mpfampfarhuto wa Nnawumbisi wa Huvo ya nhluvukiso wa ikhonomi ya rixaka na vatirhi (Nedlac), 2025.
1.2. Nawumbisi lowu mpfapfarhutiweke wu ta herisa nawu wa NEDLAC wa 1994 naswona wu ringanyeta ku ringanisiwa ka malulamiselelo ya nhlangano wa NEDLAC na ku cinca eka mafambiselo ya nawu ya vumbiwa lama humeleleke kusukela hi 1994.
1.3. Nawumbisi lowu mpfapfarhutiweke wu tlhela wu nyika holobye ku endla milawu ya ku amukeriwa na swipimelo swa vuxirho hi ku tirhisa endleloleri katsaka ku burisana na ku amukeriwa ka vaaki, ku endla leswaku sisiteme yi va erivaleni swinene.
D. Ku thola
Matholelo hinkwawo ma fanele ma kambisisa tidyondzo ni ku basisiwa eka manyala.
1. Mnn Udisha Chathuri tanihi Mutshamaxitulu wa Huvo ya Swikambelo swa Tiphathente.
2. Ku engeteriwa ka Kontiraka ya Mulawurinkulu wa Ndzawulo ya Dyondzo ya Masungulo, Ttn Hubert Mathanzima Mweli ku ringana nkarhi wa ntlhanu wa malembe.
3. Ku tatiwa ka swivandla eka Huvo ya Nhlangano wa Rixaka wa Bayodayivhesiti ya Afrika-Dzonga (SANBI)
3.1 Dkd Mamphaka Tau (Mutshamaxitulu)
3.2 Phrf Edward Nesamvuni
3.3 Ttn Eugene Vincent Jooste
3.4 Mnn Shamala Naidoo
3.5 Mnn Ayanda Ntanda
3.6 Mnn Eva Dorothy Khosa
3.7 Dkd Andrew Kirkwood Muir
3.8 Mnn Gertrude Bulelwa Koyane
3.9 Gqw Candice Kirsty Slum
4. Ku tatiwa ka swivandla eka Huvo ya Tiphaki ta Rixaka ya Afrika-Dzonga
a. Mnn Beryl Ferguson (Mutshamaxitulu wa nkarhinyana)
b. Ttn Livhuwani Matsila
c. Mnn Hulisani Mushiana
d. Dkd Sibongile Lynette Masuku
e. Mnn Nozipho Rachel Nxele
f. Ttn Mokgema Mongane
g. Gqw Catherine Warburton
h. Ttn Thomas Ignatius Bouwer
i. Ttn Raymond Maboe
j. Ttn Ashley Latchu; na
k. Mnn Goitsemang Mathebula
E. Migingiriko leyitaka
1. Ku Xixima Khale ka Vabohiwa va Tipolitiki
1.1 Ndzawulo ya mitlangu, vutshila na ndhavuko, hi ku tirhisana na nhlangano wa khale ka vabohiwa va tipolitiki na muziyamu ya xihlala xa Robben, yi ta khoma nhlengeletano ya khale ka vabohiwa va tipolitiki hi ti 27 Ndzati eXihlaleni xa Robben.
1.2 Nhlengeletano leyi yi xixima vabohiwa va tipolitiki vo tlula 1 700 lava a va khomiwile eXihlaleni xa Robben na le ka switirhisiwa swin’wana etikweni hinkwaro. Ku hlangana nakambe i xiphemu xa ku hlayisa matimu ya ku lwela ntshunxeko na ku tsundzuka leswaku ntshunxeko lowu MaAfrika-Dzonga va tiphinaka ha wona namuntlha a wu nga ri wa mahala. Kuna vavanuna na vavasati lava va nyikeleke hi ntshunxeko wa vona leswaku Afrika-Dzonga ri ntshunxeka.
1.3 Ku hlangana nakambe ku ta katsa khale ka masocha kusuka eNamibia, Lesotho, na Botswana, leswi kombisaka ku hlangana eka nyimpi ya ntshunxeko ya le dzongeni wa Afrika yo lwisana na vukoloni.
2. Nongonoko wo fikelela vaaki wa vululami, ku sivela vugevenga na vuhlayiseki
2.1 Ntlawa wa vululami, ku sivela vugevenga na vuhlayiseki (JCPS) wu le ku khomeni ka nongonoko wo fikelela vaaki hi ti 18 Ndzati 2025 eXitediyamu xa Mthatha xa 2010 eMthatha, Kapa-Vuxa, tanihi xiphemu xa Xiphiqo leri Hlanganisiweke ra ku Sivela Vugevenga na Madzolonga (ICVPS).
2.2 Ku fikelela loku ku kongomisiwile ku tumbuluxa vutirhisani byo tiya na ku fambisa swintshuxo leswi nga heriki, leswi fambiwaka hi vaaki ku tumbuluxa miganga leyi hlayisekeke no tiyisela, hi ku kongomisa ngopfu eka Mthatha, leyi nga hlawuriwa tanihi ndhawu yo hisa ya vugevenga.
3. Tinhlengeletano to lulamiselela samiti ya varhangeri ya G20
3.1 Tinhlengeletano leti landzelaka to lulamisela Samiti ya G20 tikhomiwile eka mavhiki mangarimangani lama hundzeke:
3.1.1 Nhlengeletano ya vunharhu ya ntlawa wa ntirho wa vupfhumba leyi khomiweke hi ti 11 Ndzati 2025 eMpumalanga yi hlanganisile switirhisiwa na swibumabumelo ku lulamisela nhlengeletano ya vaholobye va vupfhumba va G20 hi ti 12 Ndzati 2025.
3.1.2 Nhlengeletano ya vaholobye va vupfhumba va G20 leyi khomeriweke hi ti 12 Ndzati 2025 eMpumalanga yi hlanganisile Vaholobye va Vupfhumba ku hetisisa pulani ya maendlelo leyi lulameleke ku fambisa nhluvukiso wa vupfhumba lowu nga heriki exikarhi ka matiko ya swirho swa G20.
3.1.3 Nhlengeletano ya vunharhu ya ntirhisano wa misava hinkwayo ya nkatsakanyo wa timali yi hlanganile hi ti 11 – 12 Ndzati 2025 eKapa-Vupeladyambu ku tumbuluxa swintshuxo leswi tirhaka, swa vutumbuluxi na ku katsa hinkwavo ku tiyisisa leswaku ku kula ku katsa un’wana na un’wana naswona a ku siyi munhu endzhaku.
3.1.4 Madoroba ya Joni na Tshwane ya khomile swin’we samiti ya meyara ya Urban 20 (U20) kusukela hi ti 12–14 Ndzati 2025 eJoni. Yi hlanganisile vameyara kusuka emadorobeni ya G20 ku lulamisa hi ku hlangana mitlhontlho ya le madorobeni leyi tshikilelaka loko yi ri karhi yi tiyisisa leswaku swilo swa nkoka swa madoroba swi tlakusiwa endzeni ka ajenda ya G20.
3.1.5 Foramu ya Timali ya SME ya Misava Hinkwayo leyi nga va kona kusukela hi ti15 - 17 Ndzati 2025 eGauteng yi hlanganisile 1 200 wa vatekaxiave kusuka eka matiko yo tlula 60 na 240 wa swivandla swa timali. Tanihi xiendlakalo xa le tlhelo xa ximfumo xa Presidente wa Afrika-Dzonga wa G20, foramu yi lavisisile tindlela ta vutumbuluxi bya timali, ku katsa na swivumbeko swa timali leswi pfanganisiweke na minongonoko ya xitiyisekiso leyi nga pfulaka khapitali leyi khale a yi nga fikeleleki eka mabindzu ya laha kaya.
- E. Mahungu
1. Xirhambo xo endla swikombelo
a. Swichudeni eka sekithara ya dyondzo ya le henhla na lava nga eka matiriki va rhambiwa ku endla swikombelo swa nseketelo wa xikimi xa mpfuneto wa timali wa swichudeni swa rixaka eka lembe ra dyondzo ra 2026 lexi pfuriweke hi Musumbhunuku, ti 15 Ndzati kutani xi ta pfala hi ti 15 Hukuri 2025.
b. Vatswari, vadyondzisi, vaakelani na miganga ku seketela vadyondzi ku endla swikombelo swa nseketelo wa NSFAS.
2. Michavelelo
Khabinete yi kombisile ku chavelela eka vanghana na ndyangu wa - Vanhu na mfumo wa Qatar eka ku lahlekeriwa hi vutomi endzhaku ka nhlaselo wo pfumala nhlamuselo lowu endliweke hi vuthu ra vusirheleri ra Israel eDoha eka muako wa vaaki eka ndhawu ya vutshamo.
- Khale ka mudzaberi wa xipano xa Springboks Bevin Fortuin loyi a tlangeke swikambelo swimbirhi eka Springboks, loko va hlangana na Ireland eDublin hi 2006, na loko va hlangana na Australia eSydney hi 2007.
- Khale ka mutlangi wa muhaseri wa Springboks Jan Boland Coetzee loyi anga tlangela Springboks exikarhi ka 1974 na 1976. U tlhele a tiveka hi ku va ari muendli wa wayeni wa ndhuma eka ndzhawu ya Stellenbosch laha anga hundzula Vriesenhof Vineyard kuva ndzhawu ya wayeni ya xiyimo xa misava.
- Vacinci va mune kusuka eka ntlawa wa mutshila wa maskandi wa ndhuma Sibonelo Hlongwane lava nga lova eka mhangu ya movha loko va ri karhi va suka eka ntlangu eBergville va ya eJoni.
3. Ku hoyozela
Khabinete yi hundzisile mahungu ya yona yo hoyozela ni ku navelela mikateko eka:
- Springboks eka rhekhodo ya yona yo hlula hi 43-10 eka New Zealand ku hlayisa Khapu ya Ntshunxeko hi nkarhi wa Vunghwazi bya Rhabi bya Castle Lager.
- Alan Hatherly hi ku hlula eka vunghwazi bya misava bya swikanyakanya swa le ntshaveni eValais, eSwitzerland, na ku hlayisa xidlodlo lembe ra vumbirhi hi ku landzelelana.
- Retief Goosen eka ku hlula eka Sanford International hi tixoto timbirhi eMinnehaha Country Club eSioux Falls, South Dakota. Ku hlula loku ku tiyisisile Retief Goosen eka Vunghwazi bya yena bya vumune eka ntirho wa yena wa PGA Tour.
- Xipano xa Afrika-Dzonga xi endlile matimu eka Vunghwazi bya Misava bya N’wamatsambu bya 2025 eTokyo hi ku va na vatsutsumi vambirhi ekuheteleleni ka 100m ya vavanuna ro sungula, laha Gift Leotlela a nga heta eka xiyimo xa vuntlhanu hi 9.95s na Akani Simbine eka xiyimo xa vukombo hi 10.04s.
- Muyimbeleri wa Afrika-Dzonga Tyla Laura Seethal, loyi a tivekaka ngopfu hi vito ra Tyla loyi a nga wina sagwadi ra Best Afrobeats eka masagwadi ya 2025 ya MTV Video Music Awards eka risimu ra yena leri dumeke ra “Push 2 Start”.
- Onalerona Tsiane na Mosa Letsoela, lava tivekaka tanihi Tee Sisters, hi ku yimela tiko eka khapu ya misava ya vubindzurisi bya vantshwa ya 2025 laha va nga kuma masagwadi mambirhi yo yisa emahlweni Tipakani ta Nhluvukiso lowu Yaka emahlweni wa nhlangano wa matiko (SDG): SDG 1 "Ku herisa vusweti hi swivumbeko hinkwaswo hinkwako" na SDG 10 “Ku Hungutiwa ka ku nga ringani.”
- Xipano xa komiti ya rixaka ya Afrika-Dzonga ya ku Cheleta na ku Phyisa (SANCID), lexi mutshamaxitulu ku nga Phrf Sylvester Mpandeli, hi ku va xi nyikiwile masagwadi ya mune ya Masagwadi ya Swivumbeko swa Ndzhaka ya Misava (WHIS) eka Foramu ya vu4 ya Misava ya ku Ncheleto. Nkhuvo lowu wa Masagwadi wu ve kona hi ti 07 Ndzati 2025 eKuala Lum-pur, Malaysia. Phrf Mpandeli i aluminasi ya Yunivhesiti ya Venda na Phurofesa wa Nkarhinyana eYunivhesiti.
- Vaamukeri eka swiyenge swo hambana swa Masagwadi ya Vavasati va Afrika-Dzonga eka Sayense ya 2025 (SAWISA):
o Vaphurofesa Brenda Morrow, Lucy Moleleki na Alison September eka xiyenge xa Sayense ya Ntumbuluko na Vuinjhiniyere.
o Vaphurofesa Jill Hanass-Hancock, Sarojini Nadar na Shanaaz Mathews eka xiyenge xa vutivi bya vanhu na sayense ya vaaki.
o Vaphurofesa Carolyn McKinney na Zilungile Mkhize-Kwitshana eka ku humelela ka vona eku tlakuseni ka ku nghenelela ka vaaki eka ndzavisiso. - Phurofesa Jill Farrant loyi a amukeleke sagwadi ra vutomi hinkwabyo bya ku humelela eka ntirho wa yena wa vuphayona eka swibyariwa leswi tiyiselaka dyandza eka masagwadi ya nhlangano wa vulavisisi bya rixaka (NRF).
- Phurofesa Liza Korsten loyi a amukeleke Sagwadi ra ku Humelela ka Vutomi Hinkwabyo eka masagwadi ya foramu ya sayense na thekinoloji ya rixaka (NSTF)-South32 eka ntirho wa yena eka rihanyo ra swimilani na vuhlayiseki bya swakudya.
Yi rhumeriwile hi: Sisiteme ya Vuxokoxoko bya Vuhlanganisi bya swa Mfumo (GCIS)
swivutiso: Mnn Nomonde Mnukwa – Muvulavuleri wa Mfumo wo Khomela
Riqingho: 083 653 7485
