Afrika-Dzonga ri rila ku hundza emisaveni ka khale ka Xandla xa Presidente David Mabuza.
• Khale ka Xandla xa Presidente David Mabuza u hundzile emisaveni a ri na malembe ya 64, hi Ravumune, 3 Mawuwani 2025, endzhaku ka ku vabya nkarhinyana.
• Mfumo wu hundzisela marito yo chavelela eka ndyangu na vanghana va khale ka Xandla xa Presidente David Mabuza.
• David Mabuza u tirhile tanihi Xandla xa Presidente wa Afrika-Dzonga kusukela hi 2018–2023.
• David Mabuza u ta tsundzukiwa hi ku hoxa xandla lokukulu eka ku lwisana na xihlawuhlawu, na hi vurhangeri bya xikombiso na ku rhandza tiko.
• U nyikerile vutomi bya yena eka ku tirhela rixaka naswona u siya ndzhaka ya ku titsongahata, vutirheli, na ku tinyiketela eka miehleketo ya xidemokirasi xa hina xa vumbiwa.
• Eka ntirho wa yena hinkwawo wa tipolitiki, u tirhile hi matimba ku endla nkucetelo lowu nga heriki eka ntiyiso lowu hanyaka wa vanhu.
Presidente Cyril Ramaphosa u tivise Nkosi wa Mfumo wa Xiyenge xa 2 ku xixima khale ka Xandla xa Presidente wa Riphabliki.
• Vukorhokeri bya Maphorisa ya Afrika-Dzonga byi ta nyika swiphemu swa nkhuvo hi nkarhi wa ntirho wo lahla khale ka Xandla xa Presidente, lowu nga ta va kona eMpumalanga.
• Presidente Ramaphosa u tivise leswaku Masiku ya ku Rila ka Rixaka ya ta tlangeriwa kusukela hi Musumbhunuku wa ti07 Mawuwani 2025, na leswaku mijeko yi hahela ehansi etikweni hinkwaro kufikela nimadyambu hi Mugqivela, 12 Mawuwani 2025.
• Xandla xa Presidente Mabuza u tirhele vanhu va Mpumalanga tanihi Holobye wa Xifundzakulu kusukela hi 2009 kufikela hi 2018, naswona ekusunguleni a ri tanihi Xirho xa Huvonkulu ya Mpumalanga eka tiphotifoliyo to hambana.
• U tirhisile vuswikoti bya yena bya vurhangeri na ku hlohlotela tanihi Murhangeri wa Mabindzu ya Mfumo ePalamende, kun’we na ku rhangela Huvo ya Rixaka ya Aids ya Afrika-Dzonga.
• Xandla xa Presidente Mabuza a a tshamela ku yimela Afrika-Dzonga eka tipulatifomo ta misava hinkwayo na ku hlanganisa vuxaka exikarhi ka Afrika-Dzonga na vatirhisani va yona va le kusuhi.
David Mabuza u tirhele rixaka ra hina hi ku hlawuleka.
• A a ri murhangeri loyi a nga simekiwa eka vutirheli eka swiyimo swo sungula swa ntirho wa yena wa tipolitiki, naswona loyi a nga ta ku ta rhangela rixaka ra hina na ku vumba ku tihlanganisa ka Afrika-Dzonga na vamakwavo va hina va tikonkulu na vaaki va matiko ya misava eka xiave xa yena tanihi Xandla xa Presidente.
• U yimerile tiko ra hina hi ku hiseka naswona u hoxe xandla swinene ekuyiseni emahlweni ndhawu ya Afrika-Dzonga emisaveni.
• Hi tlangela ku tinyiketela ka yena lokukulu eka nyimpi ya ntshuxeko na ku hluvukisa mfumo lowu katsaka hinkwavo, lowu humelelaka, na wa xidemokirasi.
• Khale ka Xandla xa Presidente a a tsakeriwa swinene naswona u kombisile nhlayiseko wa xiviri na rirhandzu eka hinkwavo lava a tirhisaneke na vona.
David Mabuza u tlangile xiphemu lexikulu ekutiyisiseni ka ntshunxeko wa hina na xidemokirasi xa hina xa vumbiwa
• David Mabuza u velekiwile hi 1960 ePhola ekusuhi na Hazyview Mpumalanga naswona a ri n’wana wa vunharhu eka ntlhanu.
• A a ri mudyondzisi wa metse loyi a tsemeke ntirho wa yena wo lwisana na xihlawuhlawu eka Nhlangano wa Swichudeni wa Azanian (Azaso) evuntshweni bya yena hi malembe ya va1980, kutani endzhaku a joyina Congress Movement, lowu a wu rhangela hi vandla ra ANC.
• Mabuza a ri un’wana wa vamabulandlela vo sungula va ndlela ya xidemokirasi xa hina naswona a ri xiphemu xa nkoka eka endlelo ro aka ku tshembana endzhaku ka xihlawuhlawu.
• Endzhaku ka nhlawulo wo sungula wa xidemokirasi hi 1994, u rhumeriwile eka mfumo ku pfuneta ku hetisisa xitshembiso xa Tsalwa ra Ntshunxeko, leri hi tlangelaka malembe ya 70 ya rona lembe leri.
• A a ri murhangeri wa ndhuma loyi a tiseke ntokoto wo tala eka ntirho wa yena eka mfumo.
• U tlangile xiphemu xa nkoka tanihi muhlanganisi ekaya na le tikweninkulu.
• Eka ntirho wa yena tanihi Murhumiwa wo Hlawuleka wa Afrika-Dzonga eSudan Dzonga, u susumetele leswaku mavandla ya le Sudan ya pfumelelana eka Ntwanano wa Mfumo wa Nkarhinyana lowu Pfuxetiweke wa Vun’we bya Rixaka.
• U tlangile xiphemu xa nkoka eka ku nyika vuswikoti eka varhangeri va ndhavuko ku yisa emahlweni nhluvukiso eXifundzheninkulu xa Mpumalanga.
A hi tlangeleni vutomi bya David Mabuza hi tlhela hi tinyiketela ku hlayisa ndzhaka ya yena.
• David Mabuza a ri murhandzi wa tiko na mulwelantshuxeko loyi a tinyiketeleke vutomi bya yena ku tirhela vanhu va Afrika-Dzonga.
• David Mabuza i wa rixaka leri nga tlhontlha xiyimo lexi nga lulamangiki ehansi ka xihlawuhlawu naswona vanhu va Afrika-Dzonga hinkwavo va kolota xiphemu lexi a xi tlangeke ekuntshunxeni ka tiko ra hina.
• Ku hundza emisaveni ka yena i xirhambo xa rixaka ra hina lerintshwa ku teka ntirho lowu nga hetiwangiki wa rixaka ra yena ku kurisa ikhonomi, leswi nga ta vuyerisa un’wana na un’wana
• U hlawurile tindhawu ta le kule ta Afrika-Dzonga leti a swi tika ku tifikelela, sweswo a ku ri xiendlo xa xikongomelo tanihileswi a ku ri miganga leyi a yi lava mpfuneto ngopfu.
• U tirhisile vuswikoti bya yena ekuakeni ka vutirhisani ku pfuneta eka ku simekiwa ka ximfumo ka Foramu ya Sekithara ya Phurayivhete ya Huvo ya Rixaka ya AIDS ya Afrika-Dzonga, leyi nga fungha ku cinca eka xiphemu xa mabindzu eka ku hlamula ka tiko eka HIV na TB.
• Hi ku tirhisa swiendlo swa hina, hi nga yisa emahlweni ndzhaka ya matimba leyi David Mabuza na van’wana vo tala va hi tshembiseke yona hi ku tiyisisa rixaka leri lulameke na ku lulama eka hinkwavo.
• Hi ku tirhisana, hi nga kurisa Afrika-Dzonga ku hlula mitlhontlho yinharhu ya ku pfumaleka ka mitirho, vusweti, na ku pfumaleka ka ndzingano.
• Hi fanele ku ya emahlweni hi lwela rixaka leri tirhelaka hinkwavo, leri akiweke eka mipimanyeto ya xidemokirasi, ntshunxeko, na ndzingano, loko hi ri karhi hi hlongorisa Afrika-Dzonga ro antswa na misava yo antswa.
