Afrika Borwa e Wele ka Mahlong ka go Hlokofola ga Motlatšamopresidente wa Maloba David Mabuza
• Motlatšamopresidente wa maloba David Mabuza o hlokofetše a na le mengwaga ye 64, ka Labone 3 Mosegamanye 2025, ka morago ga bolwetši bjo bokopana.
• Mmušo o romela mantšu a tlhobošo go ba lapa le bagwera ba Motlatšamopresidente wa maloba David Mabuza.
• David Mabuza o šomile bjalo ka Motlatšamopresidente wa Afrika Borwa go tloga ka 2018 – 2023.
• David Mabuza o tla gopolwa ka tema ye kgolo yeo a e kgathilego go lwantšha mmušo wa kgatelelo, le go ba mohlala mo boetapeleng bja gagwe le botshepegi bja gagwe.
• O gafile bophelo bja gagwe go šomela naga gomme o tlogela bohwa bja botho, bja go šomela setšhaba, le boikgafo bja gagwe go dikgopolo tša temokrasi ya molaotheo wa rena.
• Mo mošomong wa gagwe wa dipolotiki, o šomile ka maatla go dira khuetšo ye kgolo go bophelo bja nnete bja batho.
Mopresidente Cyril Ramaphosa o Tsebagaditše Poloko ya Semmušo ya Legoro la Bobedi go Hlompha Motlatšamopresidente wa Maloba wa Repabliki.
• Tirelo ya Maphodisa a Afrika Borwa e tla dira tiragalo ya meragelo nakong ya tirelo ya poloko ya Motlatšamopresidente, yeo e tla swarwago Mpumalanga.
• Mopresidente Ramaphosa o tsebagaditše gore go be le Matšatši a Go Khunama a Setšhaba go tloga ka Mošupologo wa la 07 Mosegamanye 2025, le gore difolaga di theošetšwe fase go phatlalala le naga go fihla bošego bja Mokibelo, 12 Mosegamanye 2025.
• Motlatšamopresidente Mabuza o šometše batho ba Mpumalanga bjalo ka Tonakgolo go tloga ka 2009 go fihla ka 2018, gomme pele ga moo bjalo ka Molekgotlaphethiši go dipotfolio tša go fapafapana.
• O šomišitše boetapele bja gagwe le bokgoni bja gagwe bja go kalatša bjalo ka Moetapele wa Kgwebo ya Mmušo ka Palamenteng, gammogo le go eta pele Khansele ya Aids ya Setšhaba ya Afrika Borwa.
• Motlatšamopresidente Mabuza o emetše Afrika Borwa makga a mmalwa difaleng tša lefase gomme a kopanya dikamano gare ga Afrika Borwa le balekane ba yona ba kgauswi.
David Mabuza o Šometše Naga ya Rena ka Bokgoni
• E be e le moetapele yo a ikgafilego go lwela tokologo nakong ya mathomo ya mošomo wa gagwe wa dipolotiki, gape yoo a tlilego a eta pele naga ya rena a e aga dipoledišanong tša Afrika Borwa le badirišani ba rena mo kontinenteng ya rena le setšhaba sa boditšhabatšhaba ka mošomo wa gagwe bjalo ka Motlatšamopresidente
• O emetše naga ya rena ka lerato gomme o be a na le mohola kudu mo go tšwetšeng pele naga ya Afrika Borwa mo lefaseng.
• Re leboga boikgafo bja gagwe bjo bogolo mo go ntwa ya tokologo le go tlhabollo ya mmušo wa go akaretša bohle, wa go huma, gape wa temokrasi.
• Motlatšamopresidente wa maloba o be a ratwa kudu gomme o bontšhitše tlhokomelo le lerato go batho ka moka bao a bego a dirišana le bona.
David Mabuza o Kgathile Tema ye Kgolo Kudu go Netefatša Tokologo ya Rena le Temokrasi ya Rena ya Molaotheo.
• David Mabuza o belegwe ka 1960 mo Phola kgauswi le Hazyview Mpumalana gomme e be e le morwa wa boraro go ba bahlano.
• E be e le morutiši wa mmetse yo a thomilego lesolo la gagwe la go ba kgahlanong le kgethologanyo ka go Azanian Student Organisation (Azaso) mo bosweng bja gagwe ka bo 1980, ke moka ka morago a tsenela Congress Movement, wo o bego o etilwe pele ke ANC.
• Mabuza ke yo mongwe wa baetapele ba mathomo ba temokrasi ya rena gomme e be e le karolo ye bohlokwa ya tshepetšo ya go aga boitshepo ka morago ga mmušo wa kgethologanyo.
• Ka morago ga dikgetho tša mathomo tša temokrasi ka 1994, o ile a romelwa mmušong go thuša go gopola tshepišo ya Lengwalo la Tokologo, leo re ketekago matswalo a lona a 70 ngwaga wo.
• E be e le moetapele yo bohlokwa yo a tlišitšego maitemogelo a magolo kudu go mošomo wa gagwe ka mmušong.
• O kgathile tema ye bohlokwa bjalo ka mokopanyi mo gae le kontinenteng.
• Mo mošomong wa gagwe bjalo ka Moemedi wa go Ikgetha wa Afrika Borwa ka Borwa bja Sudan, o gapeleditše mekgatlo ya ka Sudan go dumelelana ka Mmušo wa Nakwana o Moswa wa Tumelelano ya Kopano ya Setšhaba.
• O kgathile tema ye bohlokwa ka go kgontšha baetapele ba setšo go godiša tlhabollo ka Profenseng ya Mpumalanga.
A re Ketekeng Bophelo bja David Mabuza Gomme re Ikgafe Gape go Phela Bohwa bja Gagwe.
• David Mabuza e be e le modudi wa gabo rena le molwela tokologo yo a gafetšego bophelo bja gagwe go šomela Maafrika Borwa.
• David Mabuza o wela go moloko wo o hlotlilego maemo a go hloka toka nakong ya mmušo wa kgethologanyo gomme Maafrika Borwa ka moka a leboga tema ye a e kgathilego go lokolleng naga ya rena.
• Go hlokofala ga gagwe ke boipiletšo go moloko o moswa go tšwetša pele mošomo wo o sa tšwelago pele wa go godiša ekonomi, yeo e tla holago batho ka moka.
• O kgethile mafelo ao a se a hlabologago a Afrika Borwa ao go bego go le bothata go a fihlelela, seo e be e le tiro ya ka boomo ka ge tše e be e le ditšhaba tšeo di bego di hloka thušo kudu.
• O šomišitše mabokgoni a go aga segwera go thakgola semmušo ga Foramo ya Lekala la Praebete ya Khansele ya AIDS ya Afrika Borwa, yeo e bontšhitšego dipoelo go tema yeo e kgathago ke kgwebo go karabelo ya naga go HIV le TB.
• Ka ditiro tša rena, re ka tšwetša pele bohwa bjo maatla bjoo David Mabuza le ba bangwe ba bantši ba re filego bjona ka go netefatša gore go ba le setšhaba sa toka sa go swara batho ka moka go swana.
• Ge re šoma mmogo, re ka godiša Afrika Borwa go fenya ditlhohlo tše tharo tša go hloka mošomo, bohloki, le go se lekalekane.
• Re swanetše go tšwela pele go lwela naga ye e šomelago batho ka moka, re age go dikgopolo tša temokrasi, tokologo, le tekatekano, ge re tšwetša pele Afrika Borwa ye kaone le lefase le lekaone.
