INingizimu Afrika izilele ukudlula emhlabeni kowayeyiPhini likaMongameli u-David Mabuza.
• OwayeyiPhini likaMongameli u-David Mabuza udlule emhlabeni eneminyaka engama-64, ngoLwesine, mhla wesi-3 kuNtulikazi 2025, kulandela ukugula isikhashana.
• Uhulumeni udlulisa amazwi enduduzo emndenini nakubangani balowo owayeyiPhini likaMongameli u-David Mabuza.
• U-David Mabuza usebenze njengePhini likaMongameli waseNingizimu Afrika kusukela ngowezi-2018 kuya kowezi-2023.
• U-David Mabuza uzokhunjulwa ngegalelo lakhe elihle ekulweni nobandlululo, nangobuholi bakhe obuyisibonelo nokubonisa intshisekelo ngezwe lakhe.
• Unikele impilo yakhe ekusebenzeleni isizwe futhi ushiya ngemuva imfundiso yokuzithoba, ukusebenza, nokuzinikela emigomweni yentando yethu yeningi labantu yomthethosisekelo.
• Kuwo wonke umsebenzi wakhe wezombusazwe, usebenze ngokuzikhandla ukuletha umphumela wangunaphakade empilweni yabantu.
UMongameli u-Cyril Ramaphosa usememezele uMngcwabo Wombuso weSigaba sesi-2 ukuhlonipha lowo owayeyiPhini Likamongameli WeRiphabhulikhi.
• UPhiko Lwamaphoyisa aseNingizimu Afrika luzomasha ngesikhathi senkonzo yomngcwabo wowayeyiPhini likaMongameli, ozoba seMpumalanga.
• UMongameli Ramaphosa umemezele ukuthi Izinsuku Zokuzila Zikazwelonke zizogcinwa kusukela ngoMsombuluko mhla ziyisi-7 kuNtulikazi 2025, nokuthi amafulegi aphephezeliswe kuhhafu ezweni lonkana kuze kube kusihlwa ngoMgqibelo, mhla ziyi-12 kuNtulikazi 2025.
• IPhini likaMongameli uMabuza usebenzele abantu baseMpumalanga njengoNdunankulu kusukela ngowezi-2009 kuya kowezi-2018, nangaphambilini njengeLungu loMkhandlu Ophethe waseMpumalanga emikhakheni eyahlukahlukene.
• Wasebenzisa amakhono akhe obuholi nokugqugquzela esikhundleni sakhe sokuba uMholi Wezamabhizinisi Kahulumeni ePhalamende, kanjalo nokuba ngumholi woMkhandlu Kazwelonke Wengculazi eNingizimu Afrika.
• IPhini likaMongameli uMabuza ubevame ukumela iNingizimu Afrika ezinkundleni zomhlaba wonke futhi waqinisa ubudlelwano phakathi kweNingizimu Afrika nabalingane bayo abasondelene nayo.
U-David Mabuza wasebenzela isizwe sakithi ngamalengiso.
• Ubengumholi obeyisishoshovu ngesikhathi eqala umsebenzi wakhe kwezombusazwe, futhi wafika wahola isizwe sakithi waphinde wasiza iNingizimu Afrika ukuthi ikwazi ukuxoxisana nozakwethu ezwenikazini kanye nomhlaba jikelele ngokwesikhundla sakhe njengePhini likaMongameli.
• Wamela izwe lethu ngentshisekelo futhi waba neqhaza elikhulu ekuthuthukiseni indawo yeNingizimu Afrika emhlabeni.
• Siyakubonga ukuzibophezela kwakhe okujulile emzabalazweni wenkululeko nasekuthuthukiseni umbuso obandakanya wonke umuntu, ophumelelayo, nowentando yeningi labantu.
• Lowo owayeyiPhini likaMongameli wayethandwa kakhulu futhi ebonisa ukunakekela nothando lweqiniso kuwo wonke umuntu ayexhumana naye.
U-David Mabuza wadlala indima enkulu ekuqinisekiseni inkululeko yethu kanye nentando yethu yeningi Labantu yomthethosisekelo.
• U-David Mabuza wazalwa ngowe-1960 ePhola ngase-Hazyview eMpumalanga futhi uyindodana yesithathu kwabahlanu.
• Wayenguthisha wezibalo owabonisa ubushoshovu bakhe bokulwa nobandlululo ku-Azanian Students Organisation (i-Azaso) ebusheni bakhe ngeminyaka yowe-1980, kamuva wajoyina i-Congress Movement, eyayiholwa yi-ANC.
• UMabuza wayengomunye wabasunguli bokuqala bentando yeningi labantu futhi waba yingxenye ebalulekile yenqubo yokwakha ukuzethemba ngemva kobandlululo.
• Ngemva kokhetho lokuqala lwentando yeningi labantu ngowe-1994, wajutshwa kuhulumeni ukusiza ukufeza isithembiso soMqulu Wenkululeko, esigubha iminyaka engama-70 yawo kulo nyaka.
• Ubengumholi ovelele owaletha ingcebo yolwazi ngomsebenzi wakhe kuhulumeni.
• Udlale indima ebalulekile ekuletheni ubumbano kuleli lizwe nasezwenikazini lonkana.
• Esikhundleni sakhe njengeSithunywa esiKhethekile saseNingizimu Afrika e-South Sudan, wagqugquzela ukuthi amaqembu ase-Sudan avumelane neSivumelwano Sesikhashana Esivuselelwe Sikahulumeni Wobumbano Lukazwelonke.
• Wabamba iqhaza elikhulu ekuhlomiseni abaholi bendabuko ukuze baqhubekisele phambili intuthuko eSifundazweni saseMpumalanga.
Masibungaze impilo ka-David Mabuza futhi sizibophezele kabusha ekuphileni ngezimfundiso zakhe.
• U-David Mabuza wayengumlweli wezwe nenkululeko owanikela impilo yakhe ekusebenzeleni abantu baseNingizimu Afrika.
• U-David Mabuza ungowesizukulwane esaphonsela inselele isimo esingenabulungiswa ngesikhathi sobandlululo futhi bonke abantu baseNingizimu Afrika bayalibonga iqhaza alibamba ekukhululweni kwezwe lethu.
• Ukudlula kwakhe emhlabeni kuyikhwelo kubantu abasha lokuthi bathathe umsebenzi ongakaqedwa wesizukulwane sakhe wokukhulisa umnotho, okuzohlomulisa wonke umuntu.
• Wakhetha izindawo ezikude eNingizimu Afrika okwakunzima ukufinyelela kuzo, lokho kwakuyisenzo samabomu njengoba lezi zindawo kwakuyimiphakathi eyayidinga usizo kakhulu.
• Wasebenzisa amakhono akhe ekwakheni ukubambisana ukuze asize ekwethulweni ngokusemthethweni kwe-South African National AIDS Council Private Sector Forum, okwabonisa ukubaluleka kweqhaza elibanjwa amabhizinisi ezindleleni zezwe zokubhekana ne-HIV ne-TB.
• Ngezinyathelo esizithathayo, singaqhubeka ezinyathelweni zemfundiso enamandla ka-David Mabuza nabanye abaningi ezibekwe ezandleni zethu ngokuqinisekisa ukuthi sinomphakathi wabantu bonke onobulungiswa nongenzeleli.
• Ngokusebenzisa ngokubambisana, singakhulisa iNingizimu Afrika ukuze inqobe izinselelo ezintathu zokuntuleka kwemisebenzi, ububha, nokungalingani.
• Kufanele siqhubeke nokulwela ukuthi sibe isizwe esisebenzela wonke umuntu, esakhelwe phezu kwamagugu entando yeningi labantu, inkululeko, nokulingana, njengoba siphokophelele iNingizimu Afrika engcono kanye nomhlaba ongcono.
