Shango ḽa Afrika Tshipembe ḽi khou lila nga murahu ha u lovha ha Muthusaphresidennde vha kale Vho David Mabuza.
• Muthusaphresidennde vha kale Vho David Mabuza vho lovha vhe na miṅwaha ya 64, nga Ḽavhuṋa, ḽa 3 Fulwana 2025, nga murahu ha vhulwadze ha tshifhinga tshipfufhi.
• Muvhuso u khou livhisa ndiliso yawo kha vha muṱa na dzikhonani dza Muthusaphresidenndev ha kale Vho David Mabuza.
• Vho David Mabuza vho shuma sa Muthusaphresidennde wa shango ḽa Afrika Tshipembe u bva nga ṅwaha wa 2018 u swika 2023.
• Vho David Mabuza vha ḓo humbulwa nga u shela havho mulenzhe kha nndwa ya u lwa na zwiito zwa khethululo nga muvhala khathihi na nga tsumbo ya vhurangaphanḓa havhuḓi he vha vhu sumbedza hu tshi katelwa na muya wa vhufunashango.
• Vho kumedzela vhutshilo havho kha zwa u shumela lushaka nahone vha khou sia murahu vhufa ha u ḓiṱukufhadza, u shumela vhathu khathihi na vhuḓiimiseli kha zwipikwa zwa demokirasi yashu yo ḓitikaho nga ndayotewa.
• Kha mushumo wavho wa zwa polotiki, vho shuma vha sa neti vha tshi itela uri hu vhe na tshanduko dza tshifhinga tshilapfu kha matshilele a vhathu.
Phresidennde Vho Cyril Ramaphosa vho ḓivhadza uri hu ḓo vha na Mbulungo ya Muvhuso ya Khethekanyo ya 2 hu tshi itelwa u hulisa Muthusaphresidennde wa kale wa Riphabuḽiki.
• Vha Tshumelo ya Mapholisa a Afrika Tshipembe vha ḓo ṋetshedza zwiteṅwa zwa khuliso nga tshifhinga tsha tshumelo ya mbulungo ya Muthusaphresidennde wa kale ine ya ḓo farelwa fhaḽa Mpumalanga.
• Phresidennde Vho Ramaphosa vho ḓivhadza uri hu tea u dzhielwa nṱha Maḓuvha a u Lila a Lushaka u bva nga Musumbuluwo, wa ḽa 07 Fulwana 2025, khathihi na uri fuḽaha dzi tea u fhufhiswa dzo tsela fhasi u mona na shango u vhuya u swika nga Mugivhela, wa ḽa 12 Fulwana 2025.
• Muthusaphresidennde Vho Mabuza vho shumela vhathu vha Mpumalanga sa Mulangavunḓu u bva nga ṅwaha wa 2009 u swika 2018, nahone mathomoni, vho vhuya vha vha Muraḓo wa Khorotshitumbe ya Mpumalanga he vha fara mihasho yo fhambanaho.
• Vho sumbedza vhukoni havho kha zwa vhurangaphanḓa na u kuvhanganya vhathu sa Murangaphanḓa wa Mafhungo a Muvhuso ndei Phalamenndeni hu tshi katelwa na u ranga phanḓa Khoro ya Lushaka ya Afrika Tshipembe ya nga ha Aids.
• Muthusaphresidennde Vho Mabuza vho dzulela u imela shango ḽa Afrika Tshipembe kha nyimele dzo fhambanaho dza ḽifhasi khathihi na u khwaṱhisa vhushaka vhukati ha shango ḽa Afrika Tshipembe na vhashumisani vhaḽo vha tsinisa.
Vho David Mabuza vho shumela lushaka nga nḓila yavhuḓi.
• Vho vha vhe murangaphanḓa we a vha o ḓiimisela kha zwa u lwela pfanelo dza vhathu u tou bva mathomoni a mushumo wavho sa rapolotiki nahone we a fhedza nga u ranga phanḓa lushaka lwashu khathihi na u ṱuṱuwedza vhudavhidzani ha vhukati ha shango ḽa Afrika Tshipembe na maṅwe mashango a re kha dzhango ḽa Afrika hu tshi katelwa na maṅwe mashango a ḽifhasi musi vhe kha vhuimo havho sa Muthusaphresidennde.
• Vho imela shango ḽashu nga vhuḓiimiseli vhuhulwane nahone vho shuma vhukuma kha u bveledza vhuimo ha shango ḽa Afrika Tshipembe ḽifhasini.
• Ri khou livhuwa vhuḓiimiseli havho vhuhulwane kha nndwa ya u lwela mbofholowo khathihi na u bveledzwa shango ḽa demokirasi ḽi katelaho vhoṱhe, ḽi bvelaho phanḓa nahone ḽa demokirasi.
• Muthusaphresidennde vha kale vho vha vha tshi funwa vhukuma nahone vha tshi sumbedza ṱhogomelo yo fhelelaho khathihi na lufuno kha vhoṱhe vhe vha vhuya vha ṱangana navho.
Vho David Mabuza vha shela mulenzhe muhulwane vhukuma kha u ḓisa mbofholowo yashu khathihi na demokirasi yo ḓitikaho nga ndayotewa.
• Vho David Mabuza vho bebwa nga ṅwaha wa 1960 ngei Phola tsini na Hazyview kha ḽa Mpumalanga nahone vho vha vhe ṅwana wa vhuraru wa mutukana kha vhana vhaṱanu.
• Vho vha vhe mudededzi wa thero ya mathematiki nahone vha thoma nndwa yavho ya u lwa na zwiito zwa khethululo nga muvhala kha dzangano ḽa Azanian Students Organisation (Azaso) musi vha tshe muswa nga miṅwaha ya 1980 he nga murahu vha vha muraḓo wa Congress Movement, ye ya vha yo rangwa phanḓa nga ANC.
• Vho Mabuza vho vha muṅwe wa mazhakanḓila a u thoma kha demokirasi yashu nahone vho shela mulenzhe muhulwane kha maitele a u bveledza fulufhelo nga murahu ha u fheliswa ha muvhuso wa tshiṱalula.
• Nga murahu ha khetho dza u thoma dza demokirasi nga ṅwaha wa 1994, vho swika he vha rumelwa muvhusoni u thusa kha u ndingedzo dza u swikela pfulufhedziso dzi re kha Thendelanomviswa ya Mbofholowo, ine ra khou fhululedza u fhedza hayo miṅwaha ya 70 uno ṅwaha.
• Vho vha vhe murangaphanḓa a ḓivheaho we a vha e na tshenzhemo khulwane vhukuma kha mushumo wavho wa muvhuso.
• Vho shela mulenzhe muhulwane vhukuma sa mukonanyi fhano hayani na kha dzhango ḽa Afrika.
• Kha vhuḓifhinduleli havho sa Murumelwa wa shango ḽa Afrika Tshipembe o Khetheaho fhaḽa kha shango ḽa South Sudan, vho ṱuṱuwedza uri mahoro oṱhe a kwameaho kha ḽa Sudan a tendelane kha u vhumba Muvhuso wa Phirisela wa Vhuthihi ha Lushaka wo Vusuluswaho.
• Vho shela mulenzhe muhulwane kha u maanḓafhadza vharangaphanḓa vha zwa sialala kha zwa mveledziso khulwane fhaḽa kha Vunḓu ḽa Mpumalanga.
Kha ri pembelele vhutshilo ha Vho David Mabuza khathihi na u ḓikumedzela hafhu u tshila ri tshi vha edza.
• Vho David Mabuza vho vha vhe mufunashango na mulwelambofholowo we a kumedzela vhutshilo hawe kha zwa u shumela vhadzulapo vha shango ḽa Afrika Tshipembe.
• Vho David Mabuza ndi muṅwe wa avho vha murafho we wa itela khaedu nyimele dzi sa pfali nahone dzi sa shanduki dza muvhuso wa khethululo nga muvhala nahone vhadzulapo vhoṱhe vha shango ḽa Afrika Tshipembe vha tea u livhuwa mushumo we vha u ita kha u vhofholola shango ḽashu.
• Lufu lwavho lu tou vha tshihumbudzi kha mirafho ya vhaswa tsha uri vha bvele phanḓa na mushumo u songo fhelelaho wa murafho wavho vha tshi itela u alusa ikonomi, zwiṋe hezwi zwa ḓo vhuedza vhathu vhoṱhe.
• Vho nanga vhupo ha kule vhukuma ha shango ḽa Afrika Tshipembe he ha vha hu tshi konḓa vhukuma u swikelea, hezwo zwo vha zwithu zwe vha tou zwi ita nga khole sa izwi zwo vha zwi zwitshavha zwe zwa vha zwi tshi ṱoḓa thuso vhukuma.
• Vho shumisa vhukoni havho kha u bveledza vhushaka ha tshumisano vha tshi itela u thusa kha zwa u rwelwa ṱari lwa tshiofisi ha Foramu ya Sekhithara ya Phuraivethe ya nga ha Khoro ya Lushaka ya AIDS ya Afrika Tshipembe, zwe hezwi zwa ḓisa tshanduko khulwane vhukuma kha vhuḓifhinduleli ha mabindu ha nga ha nḓila ine shango ḽashu ḽa khou ita kha u lwa na madwadze a HIV na TB.
• Nga kha nyito yashu, ri nga kona u bvela phanḓa na vhufa ha ndeme he Vho David Mabuza na vhaṅwe vhanzhi vha vhu sia na riṋe nga u vhona uri hu khou vha na tshitshavha tshavhuḓi nahone tshi shumelaho vhoṱhe.
• Nga tshumisano, ri nga kona u bveledza shango ḽashu ḽa Afrika Thsipembe uri ḽi kone u kunda khaedu tharu dza u shayea ha mishumo, vhushai na tshayandingano.
• Ri tea u bvela phanḓa na u lwela u fhaṱa lushaka lune lwa shumela vhathu vhoṱhe, lwo fhaṱwaho kha demokirasi, mbofholowo na ndinganelo zwenezwo musi ri tshi khou ṱoḓa u bveledza shango ḽa Afrika Tshipembe na ḽifhasi ḽa khwine.
