Komiti yo Hoxa Tihlo ya Huvo ya Rixaka ya Swifundzankulu ya swa Mabindzu na Vumaki, Nhluvukiso wa Ikhonomi, Nhluvukiso wa Mabindzu Lamatsongo, Vupfhumba, Matholelo na Timhaka ta Vatirhi yi rhamba vatekaxiave na mihlangano leyi nga na ku tsakela ku yisa swibumabumelo leswi tsariweke hi mayelana na Nawumbisi wo Cinca Mabindzu Lamatsongo wa Rixaka wa [B16B – 2023] (xiyenge xa 76).
Nawumbisi wo Cinca Mabindzu Lamatsongo wa [B16B – 2023] (xiyenge xa 76) wu lava:
• Ku cinca Nawu wa Mabindzu Lamatsongo, 1996, ku endlela ku cinca, ku susa, ku nghenisa na ku siva tinhlamuselo to karhi;
• Ku lulamisela xiviko xa Huvo yo Tsundzuxa;
• Ku lulamisela ku tumbuluxiwa ka Ejensi ya Timali ta Nhluvuiso wa Mabindzu Lamatsongo;
• Ku lulamisela mitirho ya Ejensi; ku tiyisisa ku nyikiwa ka vukorhokeri bya nseketelo wa timali na wo ka wu nga ri wa timali eka mabindzu lamatsongo;
• Ku tlakusa nhluvukiso wa mabangelo ya ntirhisano lama nga ta va kona nkarhi wo leha no va na vutihlamuleri;
Ku lulamisela ku tumbuluxiwa ka Hofisi ya Vukorhokeri bya Mulamuri wa Mabindzu Lamatsongo;
• Ku endla leswaku ku va na mbango wo xaviselana lowu nga na ku ringana eka mabindzu lamatsongo hi ku tirhisa ku nyikiwa ka ku fikeleleriwa ka vululami lo ku nga durhiki no tirha hi ku hetiseka;
• Ku nyika Holobye matimba yo tivisa maendlelo yan’wana hi mayelana na mabindzu lamatsongo leswaku ya yirisiwa tanihi maendlelo ya mabindzu yo ka yi nga ri kahle;
• Ku lulamisela malulamiselo ya nkarhi wo cinca lama lavekaka hikwalaho ka ku tumbuluxiwa ka Ejensi;
• Ku endla ku cinca loku nga ta va kona kumbe loku lavekaka eka Nawu wa Tibangi ta Mabindzu Lamatsongo, 2007, na Nawu wa Mabindzu Lamatsongo, 2005; na
• Ku lulamisela timhaka leti fambelanaka na tona.
Vanhu lava nga na ku tsakela na vatekaxiave lava tsakelaka ku nyika mavonelo ya vona va komberiwa ku yisa swibumabumelo leswi tsariweke eka Komiti ku nga si hundza 12:00 ninhlikanhi hi Ravuntlhanu, 16 Nyenyanyana 2024. Lava va lavaka ku endla swibumabumelo eka tinhlengeletano to yingisela mavonelo ya vaaki va fanele va kombela ku endla tano, kambe swi fanele ku tekeriwa enhlokweni leswaku ku nyikiwa ka swikombelo swoleswo swa ku hlamusela hi nomo swi le mavokweni ya Komiti.
Tikhopi ta Nawumbisi ta kumeka eka www.parliament.gov.za
Ku tsalelana hinkwako ku nga kongomisiwa eka Tatana M Rayi, Mutshamaxitulu: Komiti yo Hoxa Tihlo ya Huvo ya Rixaka ya Swifundzankulu ya swa Mabindzu na Vumaki, Nhluvukiso wa Ikhonomi, Nhluvukiso wa Mabindzu Lamatsongo, Vupfhumba, Matholelo na Timhaka ta Vatirhi. Swibumabumelo swi fanele swi kongomisiwa eka tiadirese ta imeyili leti landzelaka: mkoff@parliament.gov.za na ndinizulu@parliament.gov.za.
Swivutiso swi nga kongomisiwa eka Manana M Koff eka 083 709 8527, kumbe hi imeyili: mkoff@parliament.gov.za kumbe Manana N Dinizulu eka 083 709 8393 kumbe hi imeyili eka ndinizulu@parliament.gov.za .
Xi humesiwile hi: Tatana M Rayi, Mutshamaxitulu: Komiti yo Hoxa Tihlo ya Huvo ya Rixaka ya Swifundzankulu ya swa Mabindzu na Vumaki, Nhluvukiso wa Ikhonomi, Nhluvukiso wa Mabindzu Lamatsongo, Vupfhumba, Matholelo na Timhaka ta Vatirhi
