Komiti ye e Hlaotšwego ya tša Dikgwebo le Intasteri, Tlhabollo ya Ekonomi, Tlhabollo ya Dikgwebopotlana, tša Boeti, tša Thwalo le Mešomo e laletša bengditseka le bao ba nago le kgahlego go romela ditšhišinyo tša go ngwalwa ka ga Molaokakanywaphetošo wa Dikgwebopotlana wa Bosetšhaba [B16B – 2023] (kar ya 76).
Molaokakanywaphetošo wa Dikgwebopotlana wa Bosetšhaba [B16B – 2023] (kar ya 76) o nyaka go:
• Fetoša Molao wa Dikgwebopotlana wa Bosetšhaba, 1996, gore go fetošwe, go phumulwe, go tsenywe le go emela ditlhalošo tše itšego;
• Neelana ka pego ya Lekgotla la Dikeletšo;
• Neelana ka tlhamo ya Eitšensi ya Ditšhelete ya Tlhabollo ya Dikgwebopotlana;
• Neelana ka mešomo ya eitšensi; go kgonthiša neelano ya ditirelo tša thekgo ya ditšhelete le ye e sego ya ditšhelete go dikgwebopotlana;
• Godiša tlhabollo ya go panka ka tirišano ya maikarabelo go ya go ile;
Neelana ka tlhamo ya Ofisi ya Tirelo ya Monamodi wa Dikgwebopotlana;
• Kgontšha tikologo ya kgwebo ya go lekalekana ya dikgwebopotlana ka neelano ya kgonagalo ya phihlelelo ya go phethagala ya toka;
• Matlafatša Tona go laela gore ditlwaelo tše itšego mabapi le dikgwebopotlana di thibelwe bjalo ka ditlwaelo tša kgwebo tše di sego tša loka;
• Neelana ka dipeakanyo tša phetošo tša go hlolwa ke tlhamo ya Eitšensi;
• Dira diphetošo tše di hlokegago goba tša ditlamorago go Molao wa Dipanka tša Dikgwebo, 2007, le Molao wa Dikgwebo, 2005; le go
• Neelana ka merero ye e amegago.
Bao ba nago le kgahlego le bengditseka bao ba ratago go swayaswaya ba kgopelwa go romela Komiti ditšhišinyo tša go ngwalwa go fihla ka 12:00 mosegare ka Labohlano, 16 Febereware 2024. Bao ba ratago go dira ditšhišinyo ditheeletšong tša setšhaba ba ka dira kgopelo ya seo, efela ba lemošwa gore Komiti ke yona e dumelelago dikgopelo tšeo.
Dikhophi tša Molaokakanywa di hwetšwa go www.parliament.gov.za
Ditšhišinyo di lebišwe go Mna M Rayi, Modulasetulo: Komiti ye e Hlaotšwego ya tša Dikgwebo le Intasteri, Tlhabollo ya Ekonomi, Tlhabollo ya Dikgwebopotlana, tša Boeti, tša Thwalo le Mešomo. Ditšhišinyo di romelwe atereseng ya imeile ye e latelago: mkoff@parliament.gov.za le ndinizulu@parliament.gov.za.
Dipotšišo di lebišwe go Mdi M Koff go 083 709 8527, goba ka imeile go: mkoff@parliament.gov.za goba go Mdi N Dinizulu go 083 709 8393 goba ka imeile go ndinizulu@parliament.gov.za.
Taletšo ka: Mna M Rayi, Modulasetulo: Komiti ye e Hlaotšwego ya tša Dikgwebo le Intasteri, Tlhabollo ya Ekonomi, Tlhabollo ya Dikgwebopotlana, tša Boeti, tša Thwalo le Mešomo
