Loko u ri mutirhi loyi a nga na nkwetlembetano na muthori wa wena, kumbe muthori a ri na nkwetlemebtano na wena, eka timhaka to tanihi leti:
- ku hlongoriwa
- tihakelo na swiyimo swa matirhelo
- ku cincacinca emitirhweni, kumbe
- xihlawuhlawu.
u nga kombela Khomixini ya Vulamuri (CCMA) ku va yi lamula, kumbe yi ahlula nkwentlembetano wa wena. Yuniyoni kumbe nhlangano wa muthori na wona wu nga sungula goza leri. A wu lavi mpfumelelo wa loyi un'wana loko u nga se yisa mhaka leyi eka CCMA.
Mikwetlembetano leyi yi landzelaka a yi lavi ku yisiwa eka CCMA:
- loko kontiranka yo tiyimela hi yoxe yi khumbheka.
- loko mhaka ya kona yi nga fambelani na ta Nawu wa Vuxaka Emitirhweni kumbe Nawu Ndzingano eMitirhweni (EEA). Timhaka ta Nawu wa Swiyimo swa Masungulo eMitirhweni (BCEA) ti nga fambisaniwa na nkwetlembetano wa ku hlongoriwa swi nga ri nawini na mikwetlembetano ya ku hungutiwa entirhweni eka CCMA.
- laha khansele ya mpopelo kumbe khansele ya xinawu yi nga kona eka sekitara yaleyo.
- laha ku twanana ka le xihundleni ko ahlula nkwetlembetano ku nga kona (xikombiso: vulamuri bya le xihundleni).
Kumisisa swo tala hi ta ku yisa nkwetlembetano eka CCMA kumbe u tihlanganisa na CCMA.
