Somlomo Lohloniphekile,
Lisekela Lasomlomo Lelihloniphekile,
Lisekela LaMengameli Lelihloniphekile,
Malunga Lahloniphekile,
Bantfu bakitsi baseNingizimu Afrika,
Kuleliviki lelengcile sibone tehlakalo tebudlova letitfusako kanye naletingakamukeleki leticondziswe kubantfu basemaveni angaphandle kuletinye tigodzi taKwaZulu-Natal, lekutsi seyisakatekekuletinye tigodzi taseGauteng. Tehlakalo letifana naleti tenteke eSoweto ngaBhimbidvwane.
Kute kunyanya nobe kutfukutsela lokunokusetjentiswa njengenchazelo yokuhlaselwa kwebantfu basemaveni angaphandle kanye nekugebenga titolo tabo.
Asivumelani nakancane nebudlova. Lokuhlaselwa kwephula kubaluleka loku iNingizimu Afrika inguko, ikakhulu lokuhlonipha timphilo tebantfu, emalungelo eluntfu, titfunti tebantfu kanye nebuntu.
Silive asivumelani nakancane nekungavumelani lokufana nelubandlulo ngebuhlanga, lubandlulo lwemave angaphandle, lubandlulo lwebantfu labatsandzanako bebulili bunye kanye nelubandlululo lwebulili.
Sindlulisela emavi endudvuto kulemindeni yabo bonkhe labashonile siphindze sifisele labo labalimele kutsi balulame masinyane.
Sicela kuthula, kuphela kwalobudlova kanye nekulawuleka. Tigebengu akumele tivunyelwe kusebentisa bantfu kubanga ludlame nebugebengu.
Tinkinga noma ngabe ngutiphi nobe tindzaba tekukhatsata takhamuti taseNingizimu Afrika kumele ticacululwe ngekuthula nangenkhulumiswano.
Emaphoyisa atjelwe kutsi asebente ngekutikhandla kute avikele bantfu labachamuka emaveni angaphandle kanye netakhamuti takuleli live nekubopha labo labagebenga titolo tebantfu labachamuka emaveni angaphandle kanye nalabo labenta tento tebudlova.
Sidzinga takhamuti kutsi tisite emaphoyisa ngekuwaniketa lwatiso ngetehlakalo tebudlova lobucondziswe kubantfu labachamuka emaveni angaphandle letenteka eGauteng naKwaZulu-Natal kute kutsi letigebengu tibanjwe.
Sibonga baholi betenkholo, tinhlangano lekungasito tahulumende kanye nalabatsintsekako labaletsa lusito lwenhlalakahle kulabantfu labatsintsekile kulobudlova.
Njengoba singavumelani nalokuhlaselwa, sikucaphele, futsi siyativisisa letinye tato letindzaba letiphakanyiswe takhamuti letitsintsekako taseNingizimu Afrika.
Siyaphindza futsi kusho kutsi bantfu baseNingizimu Afrika asibo bantfu lababandlulula ngekwemave. Nangabe bebangubo, besingeke sibe neebantfu labanyeti labachamuka emaveni angaphandle labatibandzakanye ngemphumelelo emimangweni kulo lonkhe lelive letfu, emadolobheni, emadolobha lamakhulu kanye nasetigodzini.
Leti tindzaba temnotfo nenhlalo letiphakanyisiwe letitawubukwa.
Loku kufaka ekhatsi tikhalo mayelana nalabo labahlala kulelive bangenamadokhumenti langekho emtsetfweni, kungeteka kwenombolo yetitolo nobe emabhizinisi lamancane lawo lekatsetfwe bantfu labachamuka emaveni angaphandle lapho benteka khona bugebengu.
Sifisa kugcizelela kutsi njengobe labanye bantfu labachamuka emaveni angaphandle baboshelwe tinhlobonhlobo tebugebengu, kuyadukisa futsi akukalungi kucabanga kutsi bonkhe bantfu labachamuka emaveni angaphandle kutsi bafaka sandla kubugebengu balelive.
Kwengeta, akusibo bonkhe bantfu labachamuka emaveni angaphandle labahlala eveni letfu ngalokungekho emtsetfweni.
Labanyenti balapha eveni ngalokusemtsetfweni kanye nekufaka sandla kumnotfo nekutfutfukiswa kwetenhlalakahle kwalelive. Labanyeti baletsa emakhono langatfolakali lasisita kutfutfukisa umnotfo, bemumelekile kuhlala eveni letfu.
Labanye bete eNingizimu Afrika njengemakhoseli labalekele tingcabano nobe timphi kulamave labachamuka kuwo, njengalendlela bantfu labanyenti baseNingizimu Afrika bahamba kulelive bahlala kulamanye mave kulelivekati nangesheya.
Bebasiphetse ngemusa, ngesitfunti nangenhlonipho ngubobhuti nabosesi betfu bakulelivekati. Ngeke sawukhohlwa lomusa nekubambisana.
Lusito lesalutfola kumave lase-Afrika leseNingizimu lasite kumzabalazo wenkhululeko kanye nelusito Lwenhlangano Yebunye be-Afrika bekubalulekile kulemphumelelo yenkhululeko kanye nelulawulo lwentsandvolinyenti lesilijabulelako namuhla.
Kuloku, Hulumende utawuchubeka nekudlala indzima yakhe kanye nekugcwalisa tibophetelo tetfu netibopho njengemalunga eNyonyane yase-Afrika kanye neMhlabuhlangene.
Emakhoseli kanye nalobo labafuna kuvikelwa batawusekelwa ngemtsetfo nemaphrothokholi emave emhlaba , ngekwesekelwa Luphiko LeMakhoseli Lamhlabuhlangene.
Sicela kubantfu bakitsi kutsi basekele baphindza bavikele makhoseli kanye nalabo labafuna kuvikelwa.
Kulemphelasontfo, ngiletse Iindvuna Yemaphoyisa, Indvuna Yetekuvikeleka Kwembuso kanye Nendvuna Yetasekhaya kutsi tisebente nahulumende Wetifundza waKwaZulu-Natal kucedza lobudlova nekwenta lesimo sibengulesetayelekile. Bente kahle kakhulu kodvwa lenkinga idzinga kutibandzakanya ngalokugcwele nangalokusimeme kwesikhatsi lesidze.
Nginikete yonkhe Inhlanganisela Yetebulungiswa, Kulwa Nebugebengu kanye Netekuphepha kutsi isebente ngalendzaba kahle, ihlanganyelwa Yindvuna Yetekutfutfukiswa Kwetenhlalakahle, Yetekuhwebelana Netetimboni kanye Neyekutfutfukiswa Kwemabhizinisi Lamancane.
Lenhlanganisela yetekuphepha kanye nematiko etemnotfo acalile ngekusebenta ngalendzaba, kulandzela sehlakalo sebudlova saseSoweto ngaBhimbidvwane.
Ngibatjele kutsi basebente masinyane kanye nekubandzakanya imimimango letsintsekako, tinhlangano letimele bantfu labachamuka emaveni angaphandle, emabhizinisi, tinhlangano lekungasito tahulumende kanye nalabanye labatsintsekako kutsi babukane nalokukhatsateka lokuphakanyiswe tinhlangotsi totimbili.
Umgomo kugwema tehlakalo telikusasa ngekwenta ncono budlelwano kanye nekukhuphula kuhlalisana ngekuthula emkhatsini kwetakhamuti kanye nabobhuti nabosesi betfu kulelivekati, kanye nalabanye bantfu labachamuka emaveni angaphandle.
Sitawube sifuna kusebentisana kanye nekwesekelwa lokuchamuka emahhovisi emancusa latfolakala eNingizimu Afrika. Indvuna Yetasekhaya ihlangene Nemancusa Akulamanye Mave kuleliviki lelengcile.
Indvuna Yetebudlelwano Nekubambisana Kwemave Emhlaba itohambisa letingcoco embili kimihlangano yayo Nemancusa Akulamanye Mave kusasa, ngeti-17 Mabasa.
Sicela Malunga ePhalamende kutsi asebente natsi, emimangweni yabo, kwenta ncono budlelwano kanye nekukhuphula kuhlalisana ngekuthula emkhatsini kwebantfu betfu kanye nebantfu labachamuka emaveni angaphandle.
Tinyatselo tiyentiwa kuphucula tindlela tekulawula kancono iminyele kanye nemitsetfo lelawula labatfutsela kelelive.
Kuloku, Hulumende wenta inchubekelembili ngekucala Luphiko Lwekulawula Umnyele, letawulawula simondzawo semnyele kanye nayo yonkhe iminyele yekungena.
Litiko Letasekhaya litakuhlonyiswa ngemakhono kute likhone kuphatsa ncono tindzaba tebantfu labachamuka emaveni angaphandle ikakhulu eminyeleni.
Kuloku, Umbutfo Wetekuvikeleka waseNingizimu Afrika (i-SANDF) itawuletsa emasotja lange-350 Kulitiko Letasekhaya, kusebenta njengetisebenti tebantfu labachamuka emaveni angaphandle eminyeleni.
Kwengeta, i-SANDF iletse emasotja kutsi atawusebentela eminyeleni etifundzeni letisikhombisa kuvimba tento tebugebengu baseminyeleni kanye nekuwela iminyele ngalokungekho emtsetfweni.
Bantfu bakitsi baseNingizimu Afrika,
Sicela nonkhe kutsi nibe nekuthula nekulawuleka.
Sicela futsi labo labasebentisa tindzaba tekuchumana nge-inthanethi, bayekele kugcugcutela budlova ku-Facebook, ku-twitter naletinye tindlela.
Sonkhe sinesibophelelo sekukhuphula kubumbana kutenhlalakahle, kuhlalisana ngekuthula, nebudlelwano lobuhle kulelive.
Bantfu labachamuka emaveni angaphandle basisita sibukeke njengesibonelo lesihle selive lelinebantfu labahlukene futsi siyakutsandza kuba khona kwabo kulelive. Sifuna kubona kungeteka kwetivakashi letichamuka emaveni akulelivekati nekwabelana lokunyenti ngematfuba emabhizinisi njengencenye yekukhuphula kutfutfukiswa kwemnotfo ngalokusimeme kulelivekati.
Lemikhosi letako Yenyanga ye-Afrika ngeNkhwekhweti isiletsela ematfuba kutsi sikhuphulele bungibo be-Afrika embili kanye nebudlelwano lobuhle nabhuti nabosesi betfu bakulelinye livekati.
Siyibukelele lemikhosi Yelusuku lwe-Afrika kuto tonkhe tifundza mhla ti-25 Inkhwekhweti.
Bantfu bakitsi, sicela bonkhe bantfu kutsi behlise imimoya.
Lokuhlaselwa kwebantfu basemaveni angaphandle akukamukeleki kulelive letfu.
Ngesikhatsi silwela inkhululeko satfola lusito emaveni lahlukahlukene. Labantfu balawomave abazange basicosha nobe basiphatse kabi.
Sitfole tikhalo tekutsi labanye bantfu labachamuka emaveni angaphandle abanamaphepha ladzingekako kutsi babe seNingizimu Afrika.
Kwengeta kuletikhalo, takhamuti takitsi tiyakhala ngetento letentiwa ngulabanye bantfu labachamuka emaveni angaphandle futsi bababeka licala lekubatsatsela emabhizinisi nematfuba emisebenti.
Hulumende ulalele tonkhe tikhalo tenu futsi utawutilungisa. Kepha kumele sicinise sincumo setfu sekutsi kute inchazelo yekuchaza loludlame. Asivumelani nalenhlobo yekutiphatsa.
NjengaHulumende, sitsatsa tinyatselo letifanele tekwenta ncono kuvikeleka kanye nekungena eminyeleni yonkhe yalelive kute siciniseke kutsi kute umuntfu waseveni langaphandle lota eveni letfu ngalokungekho emtsetfweni. Siletse letinye tikhulu te-SANDF eminyeleni yetfu kute kutsi basite Litiko Letasekhaya ngekucaculula lendzaba.
Malunga Lahloniphekile,,
Asisebentisaneni sonkhe kute sisekele bonkhe bantfu labachamuka emaveni angaphandle labatsintsekile kulobudlova.
Umculu Wenkhululeko utsi kumele kube nekuthula kanye nebungani. Sibopho setfu kukhuphula lelifa lekuphila ngekuthula siphindze silichubekisele embili.
Siphindze futsi sicinise sibophelelo setfu sekufaka sandla ku-Afrika lencono nemhlaba loncono
Asisebenteni sonkhe kute sente live letfu libe indzawo lencono lelibantfu bangahlala kulo.
Ngiyabonga.
