Sepikara se se Hlomphegago,
Motlatša sepikara yo a Hlomphegago,
Motlatšamopresidente yo a Hlomphegago,
Maloko ao a Hlomphegago,
MaAfrika Borwa ao a rategago,
Mo bekeng ye e fetilego re bone ditiragalo tše di makatšago kudu le tšeo di sa amogelegego tša dikgaruru tše di lebišitšwego go batšwantle ka dikarolong tše dingwe tša KwaZulu-Natal, tšeo mo lebakeng le di phatlaletšego ka dikarolong tše dingwe tša Gauteng. Ditiragalo tša go swana le tše di diregile ka Soweto ka Pherekgong.
Ga go gakanego goba šorofalo yeo e ka hlatselago go hlaselwa ga batšwantle le go ba hula dithoto ka mabenkeleng a bona.
Re kgalema dikgaruru tše ka mantšu a bogale ka fao go kgonagalago. Ditlhaselo tše di tshela maitshwaro ao Afrika Borwa e a tšwetšago pele, kudukudu tlhompho ya maphelo a batho, ditokelo tša botho, seriti sa botho le Botho.
Naga ya rena e tloga e tiišitše kgahlanong le go se kgotlelele semorafe, lehloyo la batšwantle, lehloyo la batho bao ba ratago ba bong bja bona le lehloyo la bong bjo bongwe.
Re lebiša mahloko a rena go ba malapa a bao ba lahlegetšwego ke maphelo a bona ebile re lakaletša bao ba gobetšego gore ba fole ka pela.
Re ipiletša go batho go goba maswafo ba fediše dikgaruru le go tlogela go šorofala. Ditiri tša bosenyi ga se tša swanela go dumelelwa go šomiša bošaedi ditlhologelo tša badudi go tliša dikgaruru le go senya.
Mathata goba dingongorego dife goba dife tše di lego tlhobaboroko go maAfrika Borwa di swanetše go rarollwa ka khutšo le ka poledišano.
Maphodisa a laetšwe go šoma bošego le mosegare go šireletša bobedi batšwantle le badudi ba ka nageng le go golega bao ba hulago dithoto tša batho le bao ba dirago ditiro tša dikgaruru.
Re ipiletša go ditšhaba go thuša maphodisa ka go ba fa tshedimošo ka ga ditiragalo tše di hlagilego ka Gauteng le KwaZulu-Natal gore bao ba dirilego bosenyi ba tlišiwe pele ga molao.
Re leboga baetapele ba setšo, mekgatlo ye e sego ya mmušo le bakgathatema ba bangwe bao ba fago thušo ka tša masetlapelo go batho bao ba tšhabilego fao ba dulago gona.
Le ge e le gore re kgalema ditlhaselo tše, re a tseba, ebile re tloga re kwešiša mathata a mangwe ao a tšweleditšwego ke maAfrika Borwa ao a amegago.
Re bušeletša maikutlo a rena a gore maAfrika Borwa ka bontši ga ba na lehloyo la batšwantle. Ge nkabe ba na le lehloyo le, nkabe re se na le batšwantle ba bantši ka tsela ye bao ba dutšego ka mo nageng ka bophara ka katlego, ka ditoropong, ka ditoropokgolong le ka metseng.
Go na le mathata a ekonomi ya leago ao a tšweleditšwego ao a šetšwego morago.
Tšona di akaretša dingongorego ka ga batšwantle bao ba sego molaong le bao ba sego ba ngwadišwa ka nageng, koketšego ka go palo ya mabenkele goba ya dikgwebopotlana tše di tšerwego ke batšwantle le gape maikutlo a gore batšwantle ba dira le go hlohleletša bosenyi.
Re rata go gatelela gore le ge batšwantle ba bangwe ba golegilwe ka lebaka la dikgaruru tše di fapafapanego, se se tloga se timetša ebile ke phošo go bona batšwantle ka moka bjalo ka batho bao ba dirago bosenyi ka nageng.
Godimo ga fao, ga se batšwantle ka moka bao ba dulago ka nageng ya rena bao ba tlilego ka tsela yeo e sego molaong.
Bontši bja bona ba ka nageng ka ntle le molao gomme ba na le seabe go ekonomi le tlhabollo ya setšhaba ka nageng. Bontši bja bona ba tliša bokgoni bjo bo sa hwetšagalego bjo bo re thušago go hlabolla ekonomi ebile ba amogetšwe kudu go dula ka nageng ya rena.
Ba bangwe ba tla ka Afrika Borwa bjalo ka bafaladi bao ba tšhabilego dithulano goba dintwa ka dinageng tša gabobona, ka tsela ye e swanago le ge maAfrika Borwa a tlogile ka mo nageng ka nakong ye nngwe gomme ba dula ka dinageng tše dingwe ka khonthinenteng le tše ka ntle ga yona.
Re ile ra swarwa gabotse, ka seriti le ka tlhompho ke bana ba bo rena go tšwa ka khonthinenteng. Re ka se tsoge re lebetše kamogelo le lerato leo ba re filego lona.
Thekgo ya dinaga tše di etilego pele tša ka Borwa bja Afrika le tša Mokgatlo wa Selekano sa Afrika e bile bohlokwa go fihleleleng tokologo le temokrasi yeo re ipshinago ka yona lehono.
Mabapi le se, Mmušo o tla tšwela pele go raloka tema ya ona le go phethagatša maikarabelo le ditlamego tša ona bjalo ka maloko a Mokgatlo wa Selekane sa Afrika le wa Dinagakopano.
Bafaladi le bakgopedi ba bofaladi ba tla fiwa thekgo go sepelelana le molao wa boditšhabatšhaba le ditshepedišo, ka thekgo ya Mokhomišenare wo Mogolo wa Bafaladi wa Mokgatlo wa Dinagakopano.
Re ipiletša go batho ba rena go thekga le go šireletša bafaladi le bakgopedi ba bofaladi.
Mafelelong a beke, ke rometše Ditona e lego ya Kgoro ya Maphodisa, ya Setheo sa Tšhireletšo ya Naga le ya Kgoro ya Merero ya Selegae go šoma le mmušong wa Profense ya KwaZulu-Natal go fediša dikgaruru le go bušetša seemo sekeng. Ba šomile gabotse eupša bothata bjo bo nyaka tsenogare ya kakaretšo ya go ya go ile ya lebaka le letelele.
Ka fao ke rometše Seboka ka moka sa Toka, Thibelo ya Bosenyi le Tšhireletšo go šoma ka bothata bjo ka mo go tseneletšego, ba šoma mmogole Tona ya Tlhabollo ya Leago, ya Kgwebišano le Diintasteri le le ya Kgoro ya Tlhabollo ya Dikgwebopotlana.
Dikgoro tša seboka sa tšhireletšo le ekonomi di šetše di thomile go šoma ka taba ye, go latela ditiragalo tša Soweto ka Pherekgong.
Ke ba laetše gore ba šome ka lebelo le go rerišana le ditšhaba tše di amegilego, le mekgatlo ye e emetšego batšwantle, dikgwebo, mekgatlo ye e sego ya mmušo le bakgathatema ba bangwe go rarolla dipelaelo tše di tlišitšwego ka mahlakoreng ka bobedi.
Maikemišetšo a se ke go efoga ditiragalo tše ka go kaonafatša dikamano le go tšwetša pele go phela mmogo ka khutšo gareng ga badudi le bobuti le dikgaetšedi tša rena ka khonthinenteng, gammogo le batšwantle ba bangwe.
Gape re tla nyaka le tirišano le thekgo go tšwa go batseta ba dinaga tša ka ntle bao ba lego ka Afrika Borwa. Tona ya Kgoro ya Merero ya Selegae o kopane le Dihlogo tša Botseta tša Afrika bekeng ye e fetilego.
Tona ya Dikamano tša Tirišano ya Boditšhatšhaba e tla tšwetša pele dipoledišano tše gammogo le go rerišana ga gagwe le Dihlogo tša Botseta tša Afrika gape ka moswana, ka la 17 Moranang.
Re kgopela Maloko a Palamente go šoma le rena gape, ka metseng ya gabobona, go kaonafatša dikamano le go tšwetša pele go phela mmogo le ka khutšo magareng ga batho ba rena le batšwantle.
Magato le ona a a dirwa go kaonafatša ditaolo le go laola bokaone go tsena ga batšwantle ka nageng ya rena.
Mabapi le se, Mmušo o gatela pele ka go hloma Setheo sa Taolo ya Mellwane, seo se tlago laola tikologo ya mellwane le mafelo ka moka a go tsena ka nageng.
Bokgoni bja Kgoro ya Merero ya Selegae bo a kaonafatšwa go e kgontšha gore e kgone go šoma bokaone ka mathata a bofaladi kudukudu ka mafelong a mellwaneng.
Mabapi le se, Lebotho la Mašole a Tšhireletšo a Afrika Borwa (SANDF) le tla fetišetša mašole a 350 ka Kgorong ya Merero ya Selegae, go šoma bjalo ka bahlankedi ba tša bofaladi ka mafelong a go tsena ka nageng.
Godimo ga fao, SANDF e rometše bahlankedi ba mašole mollwaneng ka diprofenseng tše šupa go thibela ditiragalo tše di hlagago mo mellwaneng le go tshela mellwane ka mo go sego molaong.
MaAfrika Borwa ao a rategago,
Re ipiletša go lena go goba maswafo le go tlogela dikgaruru.
Re ipiletša gape go bao ba šomišago kgašo ya setšhaba, go tlogela go hlohleletša mollo wa dikgaruru go Facebook, Twitter le difaleng tše dingwe.
Ka moka ga rena re rwele maikarabelo a go tšwetša pele tirišano ya setšhaba, go phela mmogo ka khutšo le dikamano tše kaone ka nageng.
Batšwantle ba re thuša go hloma tikologo yeo go phelago batšwantle ba dinaga tše di fapafapanego gomme re amogela go ba gona ga bona. Re nyaka go bona gape koketšego ya dipalopalo tša boeti go tšwa dinageng tša ka khonthinenteng le go abelana dibaka tše ntši tša kgwebo bjalo ka karolo ya tlhabollo ya ekonomi ya go ya go ile ka khonthinenteng.
Meketeko ye e tlago ya mabapi le Kgwedi ya Afrika ka Mopitlo e fa sebaka sa gore re tšwele pele go tšwetša pele boitšhupu bja rena bja Seafrika le dikamano tše kaone le bana ba bo rena go tšwa ka khonthinenteng.
Re letile meketeko ya Letšatši la Afrika ka profenseng ye nngwe le ye nngwe ka la 25 Mopitlo.
Magagešong, re kgopela yo mongwe le yo mongwe ka boikokobetšo go goba maswafo.
Ditlhaselo tša batšwantle di ganetšwa kudu ka nageng ya rena.
Nakong ya ntwa ya go lwela tokologo re hweditše thušo go tšwa dinageng tše ntši tše di fapafapanego. Batho ba dinaga tšeo ga se ba re raka goba ba re swara gampe.
Re amogetše dingongrego tša gore batšwantle ga ba na mangwalo a maleba ao a ba dumelelago go ba ka Afrika Borwa.
Godimo ga ngongorego ye, badudi ba ka nageng ya rena ba ngongorega gape ka ga ditiro tša bosenyi tše di dirwago ke batšwantle ba bangwe ebile ba ba phara gape ka molato wa go ba tšeela dikgwebo le dibaka tša mešomo.
Mmušo o theeleditše dipelaelo tše ka moka gomme re na le bonnete bja gore o tla di rarolla. Eupša re bušeletša maemo a rena a gore ga go lebaka lefe goba lefe leo le ka dirago gore dikgaruru tše di amogelege. Re ganetša maitshwaro a mohuta wo ka mekgwa ya ona ka moka.
Bjalo ka Mmušo, re tšea dikgato tše di hlokagalago go kaonafatša tšhireletšo le go tsena ka mellwaneng ka moka ya naga ya rena go netefatša gore ga go motšwantle yo a tsenago ka nageng ya rena ka ntle ga molao. Re rometše gape bahlankedi ba bangwe ba SANDF ka mellwaneng ya rena ka nepo ya go thuša Kgoro ya Merero ya Selegae go rarolla bothata bjo.
Maloko ao a Hlomphegago,
A re šomeng mmogo go aba thekgo go batšwantle ka moka bao ba amilwego ke dikgaruru tše.
Lengwalo la Tokologo le bolela gore go tla ba le khutšo le segwera. Maikarabelo a rena ke go tšwetša pele bohwa bjo bja go phela mmogo le go bo tšwetša pele.
Re tiišetša gape leswa maikarabelo a rena a go tsenya letsogo ka go Afrika ye kaone le ka lefaseng le lekaone.
A re šomeng mmogo go dira gore naga ya rena e be lefelo le lekaone go bao re phelago ka gare ga lona ka moka.
Ke a leboga.
