A. Tincumo teKhabhinethi
1. Sabelomali 2025-2026
1.1. Umhlangano Lokhetsekile weKhabhinethi wabitwa ngeMsombuluko, mhla ti-03 Indlovulenkhulu 2025 kute kucutjungulwe imibono yemalunga eKhabhinethi ngetindlela letinhle kakhulu, ngaphasi kwetimo, tekusekela ngetimali Sabelomali semnyaka wetimali wanga-2025/26 kanye nethemu lesemkhatsini. Lomhlangano ulandzela lomunye lokhetsekile weKhabhinethi wangeMsombuluko, mhla tinge-24 Indlovulencane 2025, lowavumela tingcogco letibanti mayelana nekucindzeteleka kwetimali talelive kanye nesidzingo sekucala kusebenta ngekushesha kwetintfo letintsatfu letibalulekile telulawulo lwe-7 ngaphasi kwaHulumende Wavelonkhe Welubumbano. Emhlanganweni wamhla tinge-24 Indlovulencane 2025, Mengameli Cyril Ramaphosa wasungula licembu leTindvuna leliholwa Lisekelamengameli Paul Mashatile kutsi lisebente neNdvuna Yetetimali kanye nelicembu lakhe leMgcinimafa Wavelonkhe kuhlanganiswe imibono yeKhabhinethi kute kutsi kuchutjekwe kucutjungulwe.
1.2. Lelicembu lebeliholwa Lisekelamengameli Mashatile futsi lisekelwe nguMgcinimafa Wavelonkhe letfule tindlela letehlukahlukene letabukwa yiKhabhinethi. Ngekulandzela imigomo yesigaba se-27 seMtsetfo Wekulawula Timali taHulumende (1 wa-1999), Ikhabhinethi inikete Indvuna Yetetimali ligunya lekutsi ikhetse kuletindlela lekukhulunywe ngato bese isekela ngetimali Sabelomali ngendlela lecbangela:
(a) Tinkinga tetimali talelive;
(b) Kunciphisa umtselela emakhaya lahluphekile nalahola imali lesezingeni lelisemkhatsini; kanye,
(c) neKwesekela kukhula kwemnotfo.
1.3 Ngekuphetsa kwenchubo yekufaka imibono yeKhabhinethi kuSabelomali, Indvuna Yetetimali neMgcinimafa Wavelonkhe nyalo sebatawucedzela lesabelomali bese basibeka ephalamende ngaLesitsatfu, mhla ti-12 Indlovulenkhulu 2025.
Imibuto:
Mnu. Sathasivan (Terry) Vandayar – Libambelasikhulumi saHulumende
Makhalekhikhini: 082 444 9092
