A. Diqeto tsa Kabinete
1. Kabo ya Matlotlo ya 2025-2026
1.1. Ho bile le Kopano e Ikgethileng ya Kabinete ka Mantaha wa la 03 Tlhakubele 2025 ho tla sekaseka diphehiso tsa ditho tse ding tsa Kabinete mabapi le mekgwa e ka sebediswang ho tshehetsa Kabo ya Matlotlo ya Selemo sa Ditjhelete sa 2025/26, ha mmoho le ya bohareng. Kopano ena e latela e bileng teng pejana ka Montaha wa la 24 Hlakola 2025 moo ho ileng ha sekasekwa mathata le ditshita tse tobaneng le matlotlo a naha le ho kenya tshebetsong dintlhakemo tse tharo tse ka sehloohong tsa Palamente ena ya bosupa tlasa Mmuso wa Kopanelo. Kopanong eo ya la 24 Hlakola 2025, Mopresidente Cyril Ramaphosa o ile a theha sehlopha sa Matona se etelletsweng pele ke Motlatsa Mopresidente Paul Mashatile se tlo sebetsa mmoho le Letona la Matlotlo ha mmoho le Lefapha la Matlotlo le sehlopha sa lona ho kopanya maikutlo ohle a hlahisitsweng ke Kabinete.
1.2. Sehlopha sena se etelletseng pele ke Motlatsa Mopresidente Mashatile, se tsheheditswe ke Lefapha la Matlotlo, se ile sa hlahisa mekgwa e mengata e ileng ya ananelwa ke Kabinete. Ho ka ikamahanya le karolo ya bo 27 ya Molao wa Taolo ya Ditjhelete tsa Mmuso (Molao wa 1 wa 1999), Kabinete e ile ya laela Letona la Matlotlo ho kgetha ho dintlha tse ileng tsa tshohlwa mme a rale puo ya hae ya kabo ya matlotlo ho tsona a ntse a etse hloko tse latelang:
(a) Mathata a naha a ditjhelete;
(b) Ho thusa malapa a itlhophereng le a nang le lekeno le seng le kae,
(c) Ho tshehetsa kgolo ya moruo.
1.3 Ka ho phethela le ho kopanya dintlha tsohle tse hlahisitsweng ke Kabinete mabapi le kabo ya matlotlo, Letona la Matlotlo le Lefapha la matlotlo jwale ba tla qetela tsohle mme ba be malala-a-laotswe ho tshetlehela Palamente kabo ya matlotlo ka Laboraro la la 12 Tlhakubele 2025.
Ditlhakisetso:
Ntate Sathasivan (Terry) Vandayar – Sebuelli sa Kabinete se Tshwereng Mokobobo
Mohala: 082 444 9092
