A. Tsheo dza Khabinethe
1. Mugaganyagwama wa ṅwaha wa 2025-2026
1.1. Ho farwa Muṱangano wa Khabinethe wo Khetheaho nga Musumbuluwo, wa ḽa 03 Ṱhafamuhwe hu tshi itelwa u ambedzana nga ha mihumbulo i bvaho kha miraḓo ya Khabinethe sa dziṅwe dza thandululo dzine dza nga shumiswa kha u kuvhanganya masheleni a Mugaganyagwama wa ṅwaha wa muvhalelano wa 2025/26 na wa tshifhinga tsha vhukati ha ṅwaha zwazwino musi zwithu zwi tshe zwo ima ngaurali. Muṱangano uyu u khou vha hone nga murahu ha muṅwe muṱangano wa Khabinethe wo khetheaho we wa farwa nga Musumbuluwo, wa ḽa 24 Luhuhi 2025, we khawo ha vha na nyambedzano dzo angalalaho nga ha thaidzo dza zwa masheleni dzine shango ḽa khou ṱangana nadzo khathihi na ṱhoḓea ya u thoma u shumiswa ha zwipikwa zwiraru zwa ndeme zwa ndangulo ya muvhuso ya vhu7 i re fhasi ha Muvhuso wa Vhuthihi ha Lushaka nga nḓila ya tshihaḓu. Kha muṱangano wa ḽa 24 Luhuhi 2025, Phresidennde Vho Cyril Ramaphosa vho vhumba tshigwada tsha Dziminisṱa tsho rangwaho phanḓa nga Muthusaphresidennde Vho Paul Mashatile tshine tsha ḓo thusana na Minisṱa wa Gwama khathihi na tshigwada tshavho tshi bvaho kha Muhasho wa Vhufaragwama ha Lushaka uri vha kone u ṱanganyisa mihumbulo ya khabinethe hu tshi itelwa uri na yone i kone u shumiswa.
1.2. Tshigwada itshi tsho rangwaho phanḓa nga Muthusaphresidennde Vho Mashatile tsha dovha hafhu tsha tikedzwa nga Muhasho wa Vhufaragwama ha Lushaka tsho ṋetshedza nḓila dzo fhambanaho dzine dza nga shumiswa dze dza fhedza dzo ṱanganedzwa nga Khabinethe. Musi hu tshi tevhedzwa mbetshelwa dza khethekanyo 27 ya Mulayo wa Ndangulo ya Masheleni a Muvhuso (Mulayo 1 wa 1999), Khabinethe yo ṋea maanḓa Minisṱa wa Gwama a u nanga kha zwi tevhelaho zwe zwa ambiwa nga hazwo u itela uri hu kone u kuvhanganywa masheleni a Mugaganyagwama nga nḓila ine ha ḓo vha na u dzhiela nṱha zwi tevhelaho:
(a) Thaidzo dza zwa masheleni fhano shangoni;
(b) U fhungudza masiandaitwa ane a nga vha hone kha miṱa ya vhashai na avho vha vhukati; na,
(c) U tikedza nyaluwo y aikonomi.
1.3 Nga murahu ha u khunyeledzwa ha mushumo wa u ṋetshedzwa ha mihumbulo ya nga ha Mugaganyagwama kha Khabinethe, Minisṱa wa Gwama na vha Muhasho wa Vhufaragwama ha Lushaka zwazwino vho ḓiimisela u khunyeledza mugaganyagwama lune nga murahu vha ḓo konaha u ya vha u ṋetshedza ngei phalamenndeni nga Ḽavhuraru, ḽa 12 Ṱhafamuhwe 2025.
Mbudziso:
Vho Sathasivan (Terry) Vandayar – Muambeli wa Muvhuso vho tou Farelaho
Luṱingothendeleki: 082 444 9092
