A. IinQunto ZeKhabinethi
1. ISabelo SeeMali Somnyaka wee-2025-2026
1.1. Kubanjwe umHlangano weKhabinethi oKhethekileko ngoMvulo nakama-3 kuNtaka 2025 lapho amalunga weKhabinethi abonisene khona ngeendlela ezingcono ezingakghonakala zokusekela iSabelo seeMali somnyaka wee-2025/26 kunye nesabelo seemali sokukhibelela, ngaphasi kobujamo bomnotho banje. Lokhu kulandela omunye umhlangano weKhabinethi okhethekileko obanjwe ngoMvulo nakama-24 kuMhlolanja 2025, ovumele ukubonisana ngokunabileko ngeenqinteliso zeemali zombuso kunye nesidingo sokuphumelelisa msinyana amaqalontanzi amathathu aqakathekileko wombuso wehlandla lekhomba ngaphasi komBuso weBumbano. Emhlanganweni wangomhla wama-24 kuMhlolanja 2025, uMengameli Cyril Ramaphosa uhlanganise isiqhema saboNgqongqotjhe esidoswa phambili liSekela likaMengameli u-Paul Mashatile kobana basebenzisane noNgqongqotjhe wezeeMali nesiqhema sakhe seZiko leeMali zeliZweloke ukuhlanganisa iimphakamiso zekhabinethi ezingaqalwa ukuya phambili.
1.2. Isiqhemesi, esidoswa phambili liSekela likaMengameli u-Mashatile nesisekelwa liZiko leeMali zeliZweloke sethule iimphakamiso ezihlukahlukileko eziqalwe yiKhabinethi. Ngokukhambisana nemibandela yesigaba sama-27 somThetho wokuLawulwa kweeMali zomBuso (umThetho Nomboro 1 womnyaka we-1999), iKhabinethi igunyaze uNgqongqotjhe wezeeMali ukuthi akhethe hlangana neemphakamiso ekubonisenwe ngazo bese usekela iSabelo seeMali ngendlela eqalelela:
(a) Ukutlhayela kwemali yombuso kilelizwe;
(b) Ukuphungulwa komthwalo ophezu kwamakhaya adosa emhlweni newengeniso ephakathinaphakathi; kunye
(c) nokusekelwa kokuhluma komnotho.
1.3 Njengoba sewuqediwe nje umsebenzi wokuhlanganisa iimphakamiso ezifakwa eSabelweni seeMali, uNgqongqotjhe wezeeMali neZiko leeMali zeliZweloke selalungele ukuqedelela isabelo seemali abe asethule phambi kwepalamende ngeLesithathu,12 kuNtaka 2025.
Imibuzo ingathunyelwa:
kuNom. Sathasivan (Terry) Vandayar – umJaphethe womKhulumeli kaRhulumende
Iselifowuni: 082 444 9092
