A. Diphetho tša Kabinete
1. Tekanetšo ya 2025-2026
1.1. Kopano ya go Ikgetha ya Kabinete e swerwe ka Mošupologo, 3 Hlakola 2025 go lebelela dikgopolo tšeo maloko a Kabinete a di tšweleditšego, go lebeletšwe gore ke dikgetho dife tše dikaone tšeo di kgonagalago, go lebeletšwe mathata ao naga e lego ka fase ga wona, go thekga ka ditšhelete Tekanetšo ya 2025/26 ya ngwaga wa ditšhelete le kotara ya gare. Se se latela kopano ye nngwe ya Kabinete ya go ikgetha ka Mošupologo, 24 Dibokwane 2025, yeo e dumeletšego gore go bolelwe ka botlalo ka mathata a ditšhelete tša naga le gore go swanetšwe go phethagatšo ka bjako dilo tše bohlokwa tša motheo tše tharo tša taolo ya bošupa ka fase ga Mmušo wa Kopano ya Setšhaba. Mo kopanong ya 24 Dibokwane 2025, Mopresidente Cyril Ramaphosa o kgethile sehlopha sa Ditona seo se etilwego pele ke Motlatša Mopresidente Paul Mashatile go šoma le Tona ya Ditšhelete le sehlopha sa gagwe sa Kgoro ya Matlotlo a Setšhaba go kopanya dikgopolo tša kabinete gore di lebelelwe gape.
1.2. Sehlopha seo se etilwego pele ke Motlatša Mopresidente gomme se thekgwa ke Kgoro ya Matlotlo a Setšhaba se tšweleditše dikgetho tša go fapafapana tšeo di lebeletšwego ke Kabinete. Go sepelelana le dinyakwa tša karolo ya 27 ya Molao wa Taolo ya Ditšhelete tša Setšhaba (1 wa 1999), Kabinete e laetše Tona ya Ditšhelete go kgetha go tšwa go dikgetho tše go boletšwego ka tšona gomme a thekge Tekanetšo ka mokgwa wo o tla lebelelago:
(a) Mathata a ditšhelete tša naga;
(b) Go fokotša khuetšo go bahloki le malapa a letseno la magareng; le,
(c) Go thekga kgolo ya ekonomi.
1.3 Ge tshepetšo ya dikgopolo tša Kabinete go Tekanetšo di phethilwe, Tona ya Ditšhelete le Kgoro ya Matlotlo a Setšhaba ba tla phetha tekanetšo gomme ba e ala pele ga palamente ka Laboraro, 12 Hlakola 2025.
Dipotšišo:
Morena Sathasivan (Terry) Vandayar – Seboleledi Mmušo sa Motšwaoswere
Selefouno: 082 444 9092
