Vho tewa fhedzi nga u ṱala:
- Arali vha tshi nga sumbedzisa khothe vhuṱanzi ha uri vhone na mufarisi wavho vha nga si tsha kona u dzula vhoṱhe na uri a hu na khonadzeo ya u tandulula phambano dzavho.
- Arali muṅwe kha vhafarisi o thithisea muhumbuloni kana u dzulela u dzidzivhala
A vha tei u wana thendelo kha munna wavho ya u ṱala. Arali mufarisi wavho a sa ṱoḓi ṱhalano, vha nga tendelwa u zwi ita nga nnḓa ha thendelo yawe.
Kha nyimele dzo khetheaho vha nga sumbedzisa uri mbingano yavho a iho mulayoni. U sa vha mulayoni ha mbingano zwo fhambana na ṱhalano ngauri a zwi pfuvhisi mbingano fhedzi i dovha ya phumulwa kha rekhodo.
U fhambana lwa mulayo a zwi shumi Afrika Tshipembe naho vha sa tsha dzula vhoṱhe na munna wavho vha songo ṱalana. U ya nga mulayo vha vha vha tshe vho malana.
Vha nga ṱalana ngei Khothe ya Dzingu ya ha Madzhisiṱiraṱa kana Khothe ya Nṱha musi vho ṋewa maanḓa a mulayo u bva vhuponi ha havho kana kha Khothe Khulwane.
U thoma maitele a ṱhalano vha tea u wana kana u rumela ḽiṅwalo ḽa ndaela u bva khothe. Maṅwalo a ndaela ya khothe a ṱhalano a tea u ḓiswa kha ene muṋe muhwelelwa nga sherifu wa khothe.
Hu na tshaka mbili dza ṱhalano, ya u hanedzana na u sa hanedzana.
Ṱhalano i songo hanedzwaho ndi ya khwinesa na uri a i ḓureli vhoṱhe vha kwameaho. I nga khunyeledzwa hu sa athu fhela vhege nṋa. Arali ṱhalano i tshi khou hanedzwa i a dzhia miṅwaha mivhili u ya kha miraru, fhedzi thalano dzi no hanedziwa dzi ya lugiswa hu sa thu yiwa tsengoni.
Mbingano ya tshikhuwa na ya sialala dzi tea u fhedziwa nga khothe.
A vha dzhiele nṱha hezwi: Ṱhalano ine muṅwe wa vhafarisi a sa swike khothe kana u fhindula ndaela i bvaho khothe nga ha ṱhalano i fana na ṱhalano i songo hanedzwaho. Hezwi zwi shuma musi mufarisi wavho a sa khou fhindula na luthihi kha ṱhalano.
- Mufarisi wavho u ḓo wana ndaela ya u ya khothe i na datumu ine a tea u fhindula ngayo.
- Arali a sa fhindula, vha nga ita khumbelo kha Khothe ya Nṱha, uri i dzheniswe kha mutevhe.
- Khothe i ḓo dzhia maga yo imela vhone ya fhelisa mbingano yavho.
Ṱhalano dza u ḓiitela iwe muṋe
Ṱhalano dza u ḓiitela iwe muṋe dzi khunyeledzwa hu songo vha na thuso u bva kha ramilayo, na uri u swika zwino a kha ḓi vha maitele a sa ḓuriho musi a tshi vhambedzwa na maṅwe. U ṱalana hu si na ramilayo zwi nga swikelelwa nga nḓila mbili:
- Khothe ya madzhisiṱiraṱa yapo i nga vha ṋetshedza fomo na u vha sumbedzisa uri vha khunyeledza hani ṱhalano yavho hu si na vhaimeleli vha mulayo.
Vha nga nanga u ḓiitela ṱhalano yavho vhone vhaṋe arali:
- ṱhalano yavho i songo hanedzwa;
- i si na zwikonḓisi;
- vho vha vho malwa lwa tshifhinga tshiṱuku;
- hu si na ndaka ine ya tea u kovhiwa;
- hu si na dzikhuḓano dzi kwamaho vhana kana
- vho ḓimisela u tshimbidza mafhungo oṱhe nga vhone vhaṋe.
U wana mafhungo nga vhuḓalo kha vha Kwame Muhasho wa Vhulamukanyi na Mveledziso ya Ndayotewa