Mulaedza nga Phresidennde vho Cyril Ramaphosa nga ḓuvha ḽa vhuṱambo ha u rwelwa ṱari havho SA phresidennde; 19 fulwi 2024; Union Buildings, Tshwane
Vhaṋe vha mavu, Mahosi na Dzikhosikadzi,
Vhahulisei, Vharangaphanḓa vha Mashango na Mivhuso,
Phresidennde wa kale Vho Thabo Mbeki na Vhomme Mbeki,
Phresidennde wa kale Vho Kgalema Motlanthe na Vhomme Motlanthe,
Vharangaphanḓa vhoṱhe vha kale vha Mashango na Mivhuso,
Vhaimeli vhaḓivhalea vha mashango o fha,
Muhaṱuli Muhulwane wa Riphabuḽiki,
Vhalangamavunḓu, Miraḓo ya Khorotshitumbe na Vhoṋeḓorobo,
Miraḓo ya Phalamennde,
Vharangaphanḓa vha mahoro a polotiki,
Vharangaphanḓa vha zwa vhurereli na sialala,
Vhaambasada na Vhakhomishinari Vhahulwane,
Vhahali vha nndwa yashu ya mbofholowo,
Vhaeni vha ṱhonifheaho,
Vha hashu,
Ṋamusi, ro kuvhangana nga fhasi ha holwu lutombo lwa Mavheleni lwo angalalaho ngaurali fhano Union Buildings, hune ha vha musanda wa shango ḽashu uri ri vhe ṱhanzi dza therelo ya ndeme ya demokirasi yashu phanḓa ha vhadzulapo vhoṱhe vha ḽa Afrika Tshipembe khathihi na vhaeni vhashu vha ṱhonifheaho vha bvaho mashangoni o fhambanaho fhano kha dzhango ḽashu ḽa Afrika ḽi funeaho khathihi na avho vha bvaho mashangoni a kule.
Ro kuvhangana fhano nga u fhambana hashu u ya nga mvelele ri tshi itela u khwaṱhisedza lutendo lwashu lu ṱhonifheaho lwa uri heḽi shango ndi ḽa vhathu vhoṱhe vhane vha dzula khaḽo, sa zwe zwa sumbedziswa kha Thendelanomviswa ya Mbofholowo miṅwahani i swikaho fusumbe yo fhiraho.
Ro kuvhangana fhano sa vhathu vhe vha bebwa kha mavu mathihi u bva kha mavunḓu ashu a ṱahe ane a vha one a vhumbaho mbumbano ya shango ḽa Afrika Tshipembe, ri tshi khou ḓiimisela uri nga mishumo yashu, ri ḓo kona u fhodza dzintho dza khethululo ye ya vha i hone vhukati hashu tshifhingani tsha kale hu tshi katelwa na u fhelisa tshayandingano ine ya khou bvela phanḓa khathihi na thambulo ine ya vha hone zwazwino.
Ro zwi bvisela khagala kha vhathu vhoṱhe uri khanedzano kana u fhambana nga mihumbulo a si zwithu zwine zwa nga ita uri ri thudzele thungo izwo zwine zwa vha zwone zwi ri ṱuṱuwedzaho u fhaṱa lushaka lwo faranaho, lwo vhofholowaho, lu linganaho nahone lune lwa vha na mvelaphanḓa.
Ṋamusi, ri khou khwaṱhisa lutamo lwa vhathu vha ḽino shango nga u ita muano wa u fulufhedzea.
Ri khou ombedzela vhuluvha hashu vhu sa thengathengi kha Ndayotewa ya Riphabuḽiki ya Afrika Tshipembe, vhune ho ḓitika kha bono ḽi sa gumi khathihi na maitele ane a vha kha Thendelanomviswa ya Mbofholowo.
Sa vhurangaphanḓa ha holwu lushaka lwa vhathu vho fhambanaho ngaurali u ya nga mvelele dzavho, ri na vhuḓifhinduleli ho khetheaho ha u ṱanganya havha vhathu vha ḽa Afrika Tshipembe.
Ri khou khwaṱhisedza fhungo ḽa uri ḓivhazwakale yo ri hwesa vhuḓifhinduleli ha u shandukisa shango ḽashu uri ḽi vhe lushaka lu sa sedzi muvhala na mbeu.
Ri khou khwaṱhisedza vhuḓiimiseli hashu ha u fhaṱa lushaka lu linganaho nahone lu re na ṱhogomelo.
Ri khou khwaṱhisedza tsheo yashu yo khwaṱhaho ya u lingedza u bveledza ikonomi i re na nyaluwo, i katelaho vhathu vhoṱhe nahone ine ya ṋetshedza zwikhala khathihi na mishumo kha vhathu vhoṱhe.
Ro ḓiimisela tshoṱhe kha mushumo wa u vusuludza demokirasi yashu nga huswa khathihi na tshandukiso ya zwa matshilisano na ikonomi u itela uri hu sa vhe na ane a salela murahu.
Ngauralo, musi ri tshi khou dzhena kha luṅwe luṱa lwa vhutshilo ha lushaka lwashu, u khwaṱha ha demokirasi yashu ho dovha hafhu ha lingwa nahone vhathu vho amba zwi khagala uri vha khou nanga mulalo na demokirasi madzuloni a dzikhakhathi, maitele ane a si vhe a demokirasi khathihi na ayo ane a si tevhedze ndayotewa.
Vhathu vha shango ḽa Afrika Tshipembe vho voutha nga vhunzhi, vha zwi bvisela khagala nga maipfi avho o fhambanaho nahone nga vhunzhi vha tshi sumbedzisa lutamo lwavho, mbilaelo dzine vha vha nadzo khathihi na ndavhelelo dzavho.
Ro ṱanganedza na u ṱhonifha mvelelo dza khetho nahone ri khou dovha hafhu ra ri vhathu vho amba. Hu ḓo bveledzwa lutamo lwavho hu si na mbudziso kana u timatima.
Vhakhethi vha ḽa Afrika Tshipembe a vho ngo ṋea ḽihoro na ḽithihi vhuḓifhinduleli ho fhelelaho ha u vhusa shango ḽashu ḽi ḽoṱhe.
Vho ri ṋea ndaela ya uri ri shumisane u itela u tandulula thaidzo dzavho khathihi na u swikela ndavhelelo dzavho.
Vho sumbedza u takalela havho mvelaphanḓa yo swikelwaho kha masia manzhi a matshilo avho kha tshifhinga tsha miṅwaha ya 30 yo fhelaho ya muvhuso wa demokirasi.
Vho dovha hafhu vha zwi sumbedzisa zwi khagala u sa fushea havho na u sa takalela mashumele ashu kha maṅwe masia e khao nangoho ra sumbedza u kundelwa.
Vha khou ṱoḓa ikonomi yo shandukiswaho, i re na nyaluwo nahone i katelaho vhathu vhoṱhe ya dovha hafhu ya sika mishumo hu tshi itelwa dzimilioni dza vhaṱoḓi vha mishumo khathihi na u ṋetshedza zwikhala zwa mabindu kha vhoramabindu vhoṱhe vha shango ḽashu, vhanna na vhafumakadzi, vhaṱuku na vhahulwane.
Vhathu vho zwi bvisela khagala vhukuma uri ndi zwifhio zwine vha ṱoḓa.
Vha khou ṱoḓa shango ḽa Afrika Tshipembe ḽine khaḽo vhathu vhoṱhe vha nga kona u wana vhudzulo nga fhasi ha Ndayotewa yashu ya demokirasi khathihi na u tsireledzwa nga dzikhothe dzashu.
Vho ṱalutshedza nga ha shango ḽine khaḽo vhathu vhoṱhe vha nga kona u tshila matshilo a khwine hu sa sedzwi miṱa ine vha bva khayo, hune vha aluswa kha miṱa yo ḓalaho lufuno, nga thuso i bvaho kha muvhuso une wa vha na vhulondo khathihi na u maanḓafhadzwa nga maga a u kona u thoma zwithu, dzangalelo na u shuma nga nungo dzoṱhe.
Nga kha vouthu dzavho, vho zwi sumbedzisa zwi khagala uri vha lavhelela u wana ṱhoḓea dza ndeme dzine dza nga ita uri matshilo avho a vhe o leluwaho, vha dzule vho takala, vhe na mutakalo wavhuḓi nahone vho tsireledzea.
Nga kha vouthu dzavho, vho zwi ombedzela uri vha khou tama u ḓiwana vhe na zwiḽiwa zwo eḓanaho khathihi na maḓi o kunaho. Vha khou ṱoḓa u vha na muḓagasi u sa ḓuri nahone une wa wanala misi yoṱhe.
Vha khou ṱoḓa u vha na mahaya a khwine ane a ḓo vha tsireledza kha maḓumbu, mvula na phepho.
Vha khou ṱoḓa bada dzine dza ṱhogomelwa zwavhuḓi khathihi na mavhone a zwiṱaraṱani ane a shuma.
Vhathu vha shango ḽa Afrika Tshipembe a hu tou vha na zwinzhi zwe vha humbela nga nnḓani ha u ṱhogomelwa nga nḓila yavhuḓi musi vha tshi lwala, vha khou ṱoḓa uri vhana vhavho vha ṋetshedzwe
pfunzo yavhuḓi, vhalala vha ṱhogomelwe khathihi na uri avho vha sa shumi vha wane mishumo.
Vhathu vha shango ḽa Afrika Tshipembe vho amba nga ha mavu ane vha khou a ṱoḓa u itela zwa vhulimivhufuwi, nga ha mabindu ane vha khou tama u a thoma, nga ha zwithu na zwibveledzwa zwine vha tama u zwi ita na nga ha zwikili zwine vha tama u zwi guda.
Vho amba nga ha lutamo lwavho lwa u tsireledzea miḓini yavho, zwiṱaraṱani, dziḓoroboni dzavho, miḓanani yavho na mabulasini avho.
Vhathu vha khou ṱoḓa hu tshi vha na u fheliswa ha zwiito zwa u tswa masheleni a muvhuso khathihi na zwa u dzhenelela ha vhathu vha nnḓa kha matshimbidzele a muvhuso.
Nga nṱha ha hezwi zwoṱhe, vhathu vha shango ḽa Afrika Tshipembe vho ombedzela zwauri a vha tsha kona u konḓelela zwiito zwa dzinndwa dza zwa polotiki khathihi na zwiito zwa u dzulela u sokou sumbana nga minwe vhukati ha vhorapolotiki na mahoro a zwa polotiki.
Vha khou lavhelela uri ri vhee ṱhoḓea na ndavhelelo dzavho phanḓa nahone vha dovha hafhu vha lavhelela uri ri shumisane ri tshi itela shango ḽashu.
Ṋamusi ndo ima hafha phanḓa havho sa mushumeli wavho a ḓiṱukufhadzaho ndi tshi amba uri ro vha pfa.
Sa Phresidennde wa Riphabuḽiki, ndi ḓo shuma na muthu muṅwe na muṅwe nda dovha hafhu nda kwamana khathihi na u shumisana na ḽihoro ḽiṅwe na ḽiṅwe ḽa zwa polotiki hu tshi katelwa na sekhithara dzine dzo ḓiimiselaho u shela mulenzhe kha u wana thandululo dza khaedu dzine shango ḽashu ḽa khou ṱangana nadzo zwenezwo musi ri tshi khou pfukela kha miṅwe miṅwaha miswa ya fumi u bva tshe ra wana mbofholowo.
Ho no fhela miṅwaha ya furaru u tou bva tshe ra furalela muvhuso wa tshiṱuhu we wa vha u tshi kandeledza vhathu u ya nga muvhala wavho ra fhedza nga u ṱanganedza muvhuso wa tshitshavha tsho vhofholowaho nahone tsha demokirasi.
Ro vha na zwinzhi zwe ra zwi swikelela kha ndingedzo dzashu dza u bveledza tshitshavha tshiswa tsho ḓitikaho kha zwiimiswa zwo khwaṱhaho zwa demokirasi na mbofholowo ya vhoṱhe.
Ro bveledza tshumelo ya muvhuso yo shandukiswaho, vhulamukanyi ho ḓiimisaho nga hoṱhe, sisṱeme ya zwa khetho i shumaho zwavhuḓi, ikonomi ya maimo a nṱha, nyanḓadzamafhungo dzi shumaho zwavhuḓi nahone dzo vhofholowaho khathihi na tshitshavha tsho khwaṱhaho tsha vhadzulapo.
Fhedzi, naho hu na mvelaphanḓa yo raloho, hu kha ḓi vha na tshayandingano khulwane vhukuma vhukati ha zwitshavha zwashu nahone zwi kha ḓi wanala zwo khethekana. Hu kha ḓi vha na u fhandekana hu vhavhaho vhukuma khathihi na u tshinyadzwa ha maitele a zwa matshilisano hune ha khou thoma u bvelela vhukati ha zwitshavha, lune magumoni azwo, zwi nga fhedza nga u ita uri hu si tsha vha na vhudziki.
Phambano ye ya vha i hone tshifhingani tsha kale ya vhukati ha vharema na vhatshena, vhukati ha vhanna na vhafumakadzi, ya vhuponi ha nyingaḓorobo na ha zwikolobulasi, ha dziḓoroboni na ha mahayani, na ya vhukati ha vhapfumi na vhashai i kha ḓi vha hone fhano kha shango ḽashu.
Kha vhuṅwe vhupo, phambano hedzi dzi nga ḓi vha dzo no thoma u fhungudzea, fhedzi a dzi athu tou fhela tshoṱhe.
Roṱhe ri vhadzulapo vha shango ḽithihi, fhedzi ri wanala kha ḽifhasi ḽo fhambanaho, ro khethekanywa nga mbondo ndapfu na zwikhala zwihulwane zwi re vhukati hashu.
Ro khethekanywa u ya nga avho vhane vha shuma na avho vhane vha sa shume; avho vhane vha vha na nḓila dza u kona u ḓithomela vhutshilo vhu leluwaho khathihi na u ḓiphiṋa ngaho na avho vhane vha sa kone u ita zwenezwo.
Ngauralo, ḓuvha ḽa ṋamusi a ḽi sokou tou vha ḓuvha zwaḽo.
Ndi tshifhinga tsha tshanduko khulwane kha ḓivhazwakale ya lushaka lwashu.
Ndi tshifhinga tshine ngatsho ra tea u nanga arali ri tshi khou tama u bvela phanḓa roṱhe kana ra ḓivhea kha khombo ya u nga xelelwa nga zwoṱhe zwe ra zwi swikelela u swika zwino.
Nga tshino tshifhinga, ri khou tea u nanga u bvela phanḓa; u vala zwikhala zwi re hone vhukati ha vhadzulapo vha ḽa Afrika Tshipembe khathihi na u bveledza tshitshavha tshi linganaho; u shandukisa pfulufhedziso dza Ndayotewa yashu khathihi na bono ḽa Thendelanomviswa ya Mbofholowo uri dzi vhe zwithu zwa vhukuma nahone zwi vhonalaho kha vhathu vhoṱhe.
Hetshi ndi tshifhinga tshine tsha ṱoḓa ri tshi shuma nga vhuhali khathihi na u sumbedza vhurangaphanḓa vhu songo ḓoweleaho.
Tshi ṱoḓa hu tshi vha na tshipikwa tshithihi tshine tsha vha u tsireledza vhuthihi ha lushaka, mulalo, vhudziki, nyaluwo ya ikonomi i katelaho vhoṱhe, u sa vha na zwiito zwa khethululo nga lukanda na u sa sedza vhathu u ya nga mbeu.
Nga kha mabammbiri a u khethela e vha a shumisa musi vha tshi voutha, vhathu vha shango ḽa Afrika Tshipembe vho tou zwi sumbedza zwi khagala uri ndavhelelo dzavho ndi dza uri vharangaphanḓa vha shango ḽashu vha shumisane.
Vho laedza vhaimeli vhavho uri vha tea u thudzela thungo thaidzo dzine vha vha nadzo, u sa anḓana, khathihi na uri vha ṱutshele u sedza kha madzangalelo avho a si na sia vha sedzese kha izwo zwine zwa vhuedza lushaka fhedzi nga u vha na tshumisano.
Hu khou itwa khuwelelo ya uri ri vhe na vhushaka ha u shumisana sa vharangaphanḓa na mahoro a zwa polotiki u itela u alusa ikonomi, u sika mishumo ya khwiṋe, zwitshavha zwo tsireledzeaho khathihi na muvhuso une wa shumela vhathu vhawo.
U bva kha mahoro oṱhe a zwa polotiki nga u fhambana hao, ho vha na u tendelana na khuwelelo yeneyo.
Nga mulandu wa uri a hu na ḽihoro ḽine ḽa nga vhusa na u ita milayo ḽi ḽoṱhe, haya mahoro oṱhe o swika he a tendelana uri a ḓo vhumba vhushaka ha u shumisana, u itela u shumisa vhukoni vhune a vha naho hu tshi itelwa u vhuedza shango khathihi na mvelaphanḓa ya vhadzulapo vhaḽo.
Nga tshumisano, mahoro haya o dzhia tsheo ya u vhumba muvhuso wa vhuthihi ha lushaka u itela u tshimbidza mbekanyamushumo dzi fanaho dza tshanduko khulwane nahone dza tshifhinga tshilapfu.
Zwa u vhumbwa ha muvhuso wa vhuthihi ha lushaka ndi ḽiga ḽa ndeme vhukuma. Ndi mathomo a zwifhinga zwiswa.
Musi vharangaphanḓa vha ḽino shango vho ṱangana vha vhumba muvhuso wa vhuthihi ha lushaka miṅwaha ya 30 yo fhelaho vha tshi itela u bveledza vhumatshelo vhu fanaho khathihi na u fhaṱa lushaka lwo faranaho, mahoro a zwa polotiki ane a khou vhumba muvhuso wa vhuthihi ha lushaka zwazwino, o swika he a tendelana kha u shumisana u itela u tandulula khaedu khulwanesa vhukuma dzine lushaka lwashu lwa khou ṱangana nadzo.
Mahoro o ṱanganedza Tshitatamennde tsha Vhuḓiimiseli, tshine ngatsho a khou ḓiimisela u tevhedza maitele a nyaluwo ya ikonomi ya tshihaḓu, ine ya katela vhoṱhe nahone ya tshifhinga tshilapfu; u bveledza tshitshavha tshine tsha lingana nga u fhelisa vhushai u itela u tsireledza pfanelo dza vhashumi; u ḓisa vhudziki kha muvhuso khathihi na u engedza vhukoni ha mashumele a muvhuso.
Mahoro o ḓikumedzela uri a ḓo shumela vhathu vha Afrika Tshipembe nga u vha ṋetshedza pfunzo na ndondolamutakalo yavhuḓi; u tandulula thaidzo ya vhugevhenga na zwiito zwa vhuaḓa; u khwaṱhisa maitele a vhuthihi na u fhaṱa lushaka lwo faranaho; khathihi na u tevhedza mbekanyamaitele ya mafhungo a nnḓa yo ḓitikaho nga pfanelo dza vhuthu, vhuthihi na mulalo.
Sa vhadzulapo vha ḽa Afrika Tshipembe, ri tea uri roṱhe nga muthihi, ri ite zwine ra nga kona u itela u swikelela tshipikwa itshi.
Ri ḓo ramba mahoro oṱhe, vhadzulapo, vhashumi, mabindu na zwiṅwe zwiimiswa kha Nyambedzano dza Lushaka dza nga ha khaedu khulwane dzine lushaka lwashu lwa khou ṱangana nadzo.
Ri ḓo lingedza, sa zwe ra zwi ita kha zwifhinga zwinzhi zwa ndeme kha ḓivhazwakale yashu, u bveledza thendelano dza zwa matshilisano u itela u swikelela ndavhelelo dza Pulane ya Mveledziso ya Lushaka.
Nga muthihi nga muthihi, sa miṱa, sa zwitshavha na kha zwiimiswa zwashu zwinzhi, kha ri ite nga nungo dzashu dzoṱhe u shandukisa muḽoro washu wa u bveledza shango ḽa Afrika Tshipembe ḽa khwiṋe uri u kone u bvelela.
Zwenezwo musi ri tshi khou ralo u farana ra vha tshithu tshithihi naho ro fhambana u ya nga mvelele dzashu, ri vhathu vha lutendo luhulu nahone lwo fhelelaho.
Ri khou rabelela lushaka lwashu, ri rabelela mimuya yashu uri i vhe kha maimo avhuḓi khathihi na uri lupfumo lwashu lu vhuyelele ngonani.
Ri khou tea u shuma nga vhuhali u itela u swikela hezwi zwipikwa zwa ndeme.
Ri khou tea u vha na vhuhali ra dovha hafhu ra khwaṱha.
Hetshi ndi tshifhinga tshiswa tshine tsha ḓisa mvelaphanḓa, tshandukiso na tshanduko khulwane dza ndeme.
Ro lavhelesa kha hetshi tshifhinga tshine tsha khou bvelela nga tshihaḓu nga ndavhelelo yavhuḓi na fulufhelo.
Ri tea u hanedzana na ndingedzo dziṅwe na dziṅwe dza u ri fhandekanya kana u ri kanganyisa, dza u shela muya wa u timatima kana u sa vha na fulufhelo, kana u ri luṱanya.
Avho vhane vha khou lingedza u ri ima phanḓa na avho vhane vha khou lingedza u ṱuṱuwedza khuḓano, a vha nga ḓo zwi kona ngauri vhadzulapo vha Afrika Tshipembe vho dzhia tsheo dzo khwaṱhaho.
Avho vhane vha khou lingedza u dzhiela fhasi zwiimiswa zwashu, zwi ḓo vha balela ngauri demokirasi i khou tshila ngomu mbiluni dza vhathu vhashu nahone vha nga si vhuye ya bva vho kona u i bvisa.
A hu na tshithu tshine tsha nga ri kanganyisa kha u shumela vhathu khathihi na u bveledza madzangalelo avho.
Zwazwino ndi tshifhinga tsha uri ri bvele phanḓa. Ri roṱhe, ri ḓo ita zwinzhi nahone zwa khwiṋe.
Zwazwino ndi tshifhinga tsha u kuvhanganya vhukoni hashu hoṱhe khathihi na u livhisa nungo dzashu dzoṱhe kha u fhindula khuwelelo dza vhathu vha Afrika Tshipembe.
A ri khou tea u sokou monamona nahone a ri tei u awela, u vhuya u swikela ri tshi nga sika mishumo ri tshi itela avho vhane vha i ṱoḓa; u vhuya u swikela hu tshi vha na zwiḽiwa zwo eḓanaho kha ṱafula iṅwe na iṅwe; u vhuya u swikela muthu muṅwe na muṅwe kha ḓorobo ṱhukhu iṅwe na iṅwe, kha ḓorobo khulu iṅwe na iṅwe, miḓanani na bulasini iṅwe na iṅwe a tshi nga wana tshumelo dza ndeme dzine a tea u dzi wana u itela uri a vhe na vhutshilo ha khwiṋe.
A ri tei u awela u vhuya u swikela vhafumakadzi vha ḽa Afrika Tshipembe vha tshi vhofholowa u bva kha vhuleme ha zwa matshilisano, mvelele na ikonomi vhune ha vha hone vhu vha humiselaho murahu.
A ri nga ḓo awela u vhuya u swikela zwigevhenga zwoṱhe zwi tshi bviswa zwiṱaraṱani zwashu khathihi na u bvisa zwidzidzivhadzi kha zwitshavha zwashu; u vhuya u swikela vhanna vha si tsha itela vhafumakadzi na vhana dzikhakhathi; u vhuya u swikela avho vhane vha tswela vhathu vha shango ḽashu vha tshi farwa vha sengiswa.
Ari nga ḓo awela musi zwitshavha zwashu zwi tshi khou tshinyadzwa nga miḓalo, mililo na gomelelo.
Ri roṱhe, ri ḓo lwa na mishushedzo i ḓiswaho nga tshanduko ya mutsho ine ya khou ḓisa mufhiso muhulwane kha dzhango.
Ri ḓo ṱanganedza vhuḓifhinduleli hashu ha u lwa na tshanduko ya kilima nga nḓila yo angalalaho, i pfalaho nahone i katelaho vhoṱhe.
Hezwi ri khou zwi itela uno murafho khathihi na miṅwe mirafho yoṱhe i ḓaho.
Ri ḓo vhumba muvhuso u shumaho zwavhuḓi nahone u fulufhedzeaho.
Ri roṱhe, ri ḓo shuma ri tshi ṱuṱuwedza zwa tshaka nnzhi ri tshi itela uri hu vhe na ḽifhasi ḽavhuḓi, ḽi re na ndinganelo, ḽi pfadzaho nahone ḽine ḽa vha na mbavhalelo, ḽo ḓitikaho kha zwa vhuthihi na pfanelo dza vhuthu ḽifhasini nga u angaredza.
Ri ḓo shuma na vharathu na vhakomana khathihi na dzikhaladzi dzashu u bva kha dzhango ḽashu ḽa Afrika u itela u ḓisa mulalo, u swikela vhudziki ri tshi itela u engedza mveledziso.
Nga kha Vhupo ha Mbambadzo yo Vhofholowaho ya Dzhango ḽa Afrika, nga kha u fhaṱwa ha dzibada na zwiporo zwa zwidimela, mamaga na zwiṱitshi zwa muḓagasi, dzhango ḽa Afrika ḽi ḓo thoma u dzhena kha vhuimo vhuswa ha mveledziso na makwevho.
Ṋamusi, ndi khou ḓikumedzela nga u fulufhedzea uri ndi ḓo vha Phresidennde wa vhadzulapo vhoṱhe vha ḽa Afrika Tshipembe;
ndi ḓo tikedza Ndayotewa yashu khathihi na u tsireledza demokirasi yashu; ndi ḓo shuma na avho vhoṱhe vhane na vhone vha vha na muḽoro wa u swikelela vhutshilo ha khwiṋe kha vhathu vhoṱhe; u ṱhogomela vhashai na avho vha songo tsireledzeaho khathihi na u tikedza avho vhoṱhe vhane vha vha na ṱhoḓea hu tshi katelwa na u ita uri shango ḽashu ḽi vhe ḽo khwaṱhaho, ḽi re na ndinganelo khathihi na vhuthihi.
Hoyu ndi muḽoro we murendi Vho Sandile Dikeni vha u ṱalutshedza kha tshirendo tshavho ‘Love Poem for my Country’:
My country is for health and wealth
See the blue of the sea
And beneath the jewels of fish
Deep under the bowels of soil
Hear the golden voice of a miner’s praise for my country
My country is for unity
Feel the millions
See their passion
Their hands are joined together
And there is hope in their eyes.
Ṋamusi, ro farana nga zwanḓa. Ri tshithu tshithihi. Ro ḓala fulufhelo.
May God bless South Africa and protect its people.
Nkosi Sikelel’ iAfrika.
Morena boloka setjhaba sa heso.
God seën Suid-Afrika.
Mudzimu fhaṱutshedza Afrika.
Hosi katekisa Afrika.
Ndi a livhuwa.
