A. Xiyimo xa Khabinete eka Timhakakulu
1. Malawulelo ya timhangu endzhaku ka mikhukhulo
1.1. Khabinete yi hundzise michavelelo eka vanhu hinkwavo lava va lahlekeriweke hi varhandziwa va vona eka mikhukhulo yo onhetela leya ha ku vaka kona leyi yi hlaseleke swiphemu swo tala swa tiko ra ka hina, ngopfungopfu KwaZulu-Natal.
1.2. Xitiviso xa Xiyimo xa Rixaka xa Mhangu na miphalalo ya vanhu na ikhonomi leya ha ku tivisiwaka hi Phuresidente Cyril Ramaphosa, sa yi lava ku tiyisisa leswaku ku va na angulo lowu tirhaka kahle na ku va lowu hlanganisiweke eka swiyenge hinkwaswo swa mfumo, hi ku tirhisa Senthara ya Malawulelo ya Timhangu ya Rixaka.
1.3. R1 ya biliyoni leyi endliweke yi kumeka hi mfumo yi le ku tirhisiweke ku seketela mphalalo na matshalatshala yo hlakarhela, ku vuyisela vukorhokeri bya masungulo na ku nyika mpfuneto wa nhlayiseko wa vanhu hi xivumbeko xa swakudya, mati, vutumbelo, nkululo na swiambalo.
1.4. Phurosese ya ku aka hi vuntshwa tindhawu leti hlaseriweke se yi sungurile tanihiloko vanhu va tiko ra ka hina va ri karhi va vumba vun'we ku pfuneta lava va lahlekeriweke hi makaya ya vona na nhundzu ya vona.
2. Vuxokoxoko byintshwa hi mayelana na Vuvabyi bya Khoronavhayirasi (COVID-19)
2.1. Khabinete yi lemuke hi ku vilerisiwa hi ntlakuko lowa ha ku vaka kona eka mitluletavuvabyi ya COVID-19 eka swiphemu swin'wana swa tiko naswona yi hlohlotele vanhu ku teka magoza yo sirhelela ku tisirhelela ehenhla ka xitsongwatsongwana lexo dlaya, ngopfungopfu hi vuxika.
2.2. Xitsongwatsongwana lexi xa ha ri nxungeto lowu nga cincacinciki naswona nsawutiso wu tshama wa ha ri xitlhavana lexo tirha kahle swinene ku tisirhelela. Khabinete yi tsakisiwa hi leswaku vanhu vo tala va ya emahlweni va hlawula nsawutiso tanihi ntila wa vona wo sungula wa vusirheleri ehenhla ka COVID-19 endzhaku ka tinhlayonhlayo leta ha ku vaka kona leti kombeke leswaku hi fikelerile ndzimakulu ya kutlula wa tiphesente ta misawutiso ya vanhu lavakulu eka ntlhanu wa swifundzakulu.
2.3. Khabinete yi kombela lava va nga si sawutisiwaka ku endla tano ku tisirhelela vona na varhandziwa va vona. Hi fanele ku tlhela hinkwerhu hi ya emahlweni hi landzelela milawu yo sivela ya COVID-19, ku katsa na ku ambala masiki leyi yi funengetaka havumbirhi bya nhompfu na nomu, ku hlamba swandla hi mati na xisibi, kumbe ku tirhisa sanithayizara ya swandla leyi nga na xihoko xa 70%, ku hlayisa mpfhuka exikarhi ka vanhu lowu hlayisekeke wa mpimohansi wa mitara yin'we.
3. Malimpfuneto ya Mphalalo wa Vanhu wa Ntshikelelo (SRD)
3.1. Khabinete yi khutaze vaakatiko lava kumaka Malimpfuneto ya SRD ya R350 SRD ku endla swikombelo hi vuntshwa, endzhaku ka ku tivisiwa ka yswinawana swintshwa leswi fumaka swikombelo na mfikeleleko wa malimpfuneto leyi.
3.2. Swikombelo swi nga nghenisiwa eka webusayiti ya Ejensi ya Nsirhelelo wa vanhu ya Afrika-Dzonga (SASSA): https://srd.sassa.gov.za/. Sisiteme ya swikombelo yi pfurile hi siku ra 23 Dzivamisoko 2022 naswona i phurosese ya xidijitali hi vutalo ku kotisa ku hleriwa ko hatlisa ka swikombelo.
3.3. Malimpfuneto ya mphalalo i ritavala ra vuhlayiseki ra nkoka eka mindyangu leyi dinga leyi nkarhi wun’wana a ti va yi onheteriwile hi mpingu wa vusweti na mpfumaleko wa mitirho. Mfumo wa tiboha ku nyika mpfuneto wa vanhu eka lava nga sirhelelekangi ngopfu ku endlela leswaku va kota ku fikelela swidingo swa vona swa masungulo.
4. Nhlayiseko na nsirhelelo
4.1. Khabinete yi ya emahlweni yi sola ku dlayiwa ko pfumala xivangelo ka vavasati naswona yi amukerile angulo wa xihatla hi vaofisiri va nsindziso wa nawu eka ku khomiwa ka vaehleketeleriwa hi mayelana na rifu ra Mnn Hillary Gardee (28), wa le Kamagugu eMpumalanga. Khabinete yi ye emahlweni yi sola ku dlayiwa ka tsevu wa vanhu eKhayelitsha, Kapa. Ku dlaya loku ko pfumala xivangelo i xitsundzuxo xa leswaku hi boheka ku endla swo tala tanihi rixaka ku herisa madzolonga na madzolonga yo ya hi rimbewu na ku dlayeteriwa ka vaxisati (GBVF).
4.2. Khabinete yi hlohlotele vanhu hinkwavo etikweni ku tirha na mfumo eka lwisana na vugevenga na GBVF. Hi ri swin’we hi nga tiyisisa leswaku miganga ya ka hina na switarata swa ka hina swi hlayisekile eka vanhu hinkwavo, ku katsa na vadyuhari, vavasati na vana.
5. Ikhonomi
5.1. Khabinete yi amukele ku pfuriwa ka ximfumo ka feme yo endla switina ya Kwastina ya Corobrik eDriefontein eGauteng hi Phuresidente Ramaphosa hi Ravunharhu, 4 Mudyaxihi 2022. Feme leya ximanguvalawa yi vumba xiphemu xa vuvekisi bya R800 wa timiliyoni, leswi swi fambisanaka na R200 ya timiliyoni to yisa emahlweni leti vekeriweke ku ndlandlamukisa mitirho ya khonkhele ya Corobrik eKwaZulu-Natal. Corobrik hi rin’wana ra mabindzu ya laha tikweni yo hlayanyana lama ma anguleke eka xikombelo xa Phuresidente Ramaphosa hi mayelana na mabindzu ya le Afrika-Dzonga na ya le matikweni ya misava ku vekisa eka ikhonomi leyi.
5.2. Khabinete yi lemuke leswaku ikhonomi hayidirojeni leya ha riki dyebyana yi nyikiwile matimba hi ku simekiwa ka tiraka leyi tirhisaka matimba ya hayidirojeni hi Anglo American. Tiraka leyi – leyi yi hundzuluxiweke kusuka eka dizele kuya eka hayidirojeni, naswona yi tirhisaka hi xiphemu tibateri ta lithium-ion – i yo sungula emisaveni hinkwayo. Ikhonomi ya hayidirojeni yi kumekile tanihi xirhangana xa xiqhinga xa ikhonomi ya rihlaza ya tiko ra ka hina, na ku lawula ku kula ka ikhonomi na mitirho.
5.3. Khabinete yi tlhele yi amukela vuvekisi byo yisa emahlweni eka ikhonomi ya hina hi khamphani ya swakudya ya le Ireland, Kerry Group, leyi yi pfuleke pulanti ya R650 wa timiliyoni yintshwa eHammarsdale, KwaZulu-Natal leyi kongomisiweke eka ku humesa swakudya leswi yisekaka emahlweni swa tikokulu. Pulanti leyi yi fana yi ri yoxe tanihileswi yi nga na swihlawulekisi swa vuyisekamahlweni swo tala ku katsa na switirhisiwa swo tirhisa eneji ya le hansi, vuendli bya gezi ya dyambu ku hunguta ku tirhisiwa ka giridi ya laha tikweni, ku khomiwa ka rihiso ra thyaka, na ku khomiwa ka mati loku tirhaka kahle, ku tirhisiwa hi vuntshwa na hunguto. Kerry Group yi vile kona eAfrika-Dzonga kusukela hi 2011, naswona vuvekisi bya yona byo yisa emahlweni i mfungho wa leswaku Afrika-Dzonga yi tshama ya ha ri ndhawu ya vuvekisi leyi u nga yi hlawulaka.
5.4. Vuvekisi lebyi byi landzela eka mikondzo ya ku simekiwa ka xibebe xa Isuzu D-Max lexi makiwaka laha tikweni eGqeberha eKapa-Vupeladyambu n’hweti leyi nga hundza. D-MAX ya rixaka lerintshwa yi tatisa vutiboheleri bya Isuzu eAfrika-Dzonga naswona hi yin’wana ya Nongonoko wa Nhluvukiso wa Vuhumesi bya Mimovha (APDP). APDP i xikimi xa nhlohlotelo wa vuhumesi wa indasitiri ya mimovha lexi nga na xikongomelo xa u tlakusa tivholomu ta vuhumesi eka indasitiri ya swipandzamananga leyi vuriweke, ku tlakusa nkoka lowu engeteriweke eka indasitiri ya tiphatsi ta mimovha hikwalaho ka sweswo ku tumbuluxiwa mitirho eka nkhulukelano wa migingiriko hinkwawo. Kwalomu ka R2,8 wa tibiliyoni ti ta endliwa eka nkoka wa vuhumesi bya swilo swa laha tikweni hi ku tirhisa ndzhendzeleko wa vutomi bya APDP. Vuvekisi lebyi byi ta endla kutlula 1 000 ra mitirho yo kongoma eka pulanti leyi naswona yi ta thola hi ku nga kongomi 24 000 ya vanhu, yi ri karhi yi hoxa xandla hi ndlela yo tivikana eka ku antswisiwa ka miganga eka xifundza lexi.
6. Khomferense ya Vucelamigodi
6.1. Khomferense ya ku Vekisa eka Vucelamigodi bya Afrika ya 2022leyi khomeriweke eCape Town International Convention Centre kusuka 9 kufika 12 Mudyaxihi 2022, hi yin’wana ya tipulatifomo letikulukumba eka hinkwato ta mbulavurisano na ntirhisano exikarhi vakhomaxiavek hinkwavo eka indasitiri ya vucelamigodi. Nkongomelo wa xiendleko lexi a ku ri: “Ku Cinca ka Vucelamigodi bya Afrika: Ku Vekisa eka Ncinco wa Eneji, ESG, na Tiikhonomi”.
6.2. Khabinete ya tshemba leswaku Khomferense leya Vucelamgodi yi ta pfuna eka ku kombisa na ku tlakusa Afrika-Dzonga tanihi ndhawu ya vuvekisi leyi ua nga yi hlawulaka.
6.3. Afrika-Dzonga yi amukela vuvekisi etikweni ra ka hina naswona ya tiboha ku tumbuluxa swiyimo swa rhandzeka swa ku kula ko katsa hinkwavo na ncinco eka ikhonomi.
7. Vuxaka bya matiko ya misava na swifundza
7.1. Khabinete yi tlhele yi amukela miangulano leya ha ku vaka kona ya Phuresidente Ramaphosa na Phuresidente Joe Biden wa United States, Phuresidente Emmanuel Macron wa Furwa na Phuresidente Hakainde Hichilema wa Zambia eka tipulatifomo to hambana.
7.2. Mivulavurisano leyi yi pfumelele Phuresidente ku tisa vuxaka bya matiko lamambirhi na ntirhisio exikarhi ka Afrika-Dzonga na mifumo ya vatirhisani hi mayelana na swiphiqokulu swa swifundza na matiko ya misava, ku katsa na ku kuma xitshunxo xa ku rhula xa ntlimbo eUkraine.
B. Swiboho swa Khabinete
1. Tivhoti ta Mpimanyeto
1.1. Khabinete yi kombela vaakatiko hinkwavo ku landzelela Tivhoti ta Mpimanyeto hi tindzawulo ta mfumo wa rixaka na Hofisi ya Phuresidente ku endlela leswaku va kota ku endla mfumo wu tihlamulela.
1.2. Hi nkarhi wa Tivhoti ta Mpimanyeto, tindzawulo hinkwato ti nyika nhlamuselo leyi koxometiweke ya makungu ya tona na swirhangana swa lembe. Tivhoti ta Mpimanyeto ti lava ku tiyisisa leswaku timali ta mfumo ti tirhisiwa hindlela leyi nga ti tlangisiki eka ku fikelela swidingo swa vaaki.
1.3. Ti tlhela ti nyika pulatifomo yo hetiseka eka Vaholobye ku ntlhantlha ku yisa emahlweni ntirho wa mfumo, ku katsa na ku humelela na mitlhontlho.
2. Qhinga ra Vuhangalasi bya Gasi ya Oyilimbisi leyi Endliweke Xihalaki (LPG)
2.1. Khabinete yi pasise Qhinga ra Vuhangalasi bya LPG leswaku ri simekiwa, leri ri kandziyisiweke leswaku vaaki va nyika mavonelo hi Nyenyankulu 2022. Qhinga leri ri ndlandlamukisa indasitiri ya LPG etikweni. LPG yi ta hoxa xandla hi ndlela ya nkoka eka ku hambanisiwa ka swihlovo swa eneji.
2.2. Qhinga leri, exikarhi ka miphalalo yin’wana, ri lawula mavekelo ya mixavo eka nkhulukelano wa migingiriko na nseketelo wa vumaki bya tisilindara ta LPG etikweni. Ri ta tlhela ri dyondzisa vaaki hi mayelana na mivuyelo ya ku tirhisa LPG tanihi muxaka wun’wana wa eneji.
2.3. Ri ta fikeleriwa endzhakukaloko ri kandziyisiwile hi Ndzawulo ya Swipfuno swa Swicelwa na Eneji eka www.dmr.gov.za.
3. Rimba ra Xiqhinga ra Rixaka hi mayelana na Mapfhumba ya ku Tlakusa Vulemukisi bya Timfanelo ta Vutsoniwa ya Vanhu lava nga na Vutsoniwa
3.1. Khabinete yi pasise Rimba ra Xiqhinga ra Rixaka hi mayelana na Mapfhumba ya ku Tlakusa Vulemukisi bya Timfanelo ta Vutsoniwa ya Vanhu lava nga na Vutsoniwa. Rimba leri ri lava ku letela havumbirhi bya tisekitara leti na riki ta mfumo na ta mfumo eka ku tiyisisa leswaku timfanelo ta vanhu lava nga na vutsoniwa ta sirheleriwa, tanihilaha ti hlayisiweke hakona eka Vumbiwa ra Rhiphabuliki ya Afrika-Dzonga ra 1996.
3.2. Rimba leri ri nyika khiti ya switirho leswi swi nga ta pfuneta eka ku susiwa ka swirhalanganyi swa xihlawuhlawu eka ku tekiwa ka swiboho, ngopfungopfu leswi swi fambelanaka na vanhu lava nga na vutsoniwa. Ri tlhela ri lemukisa vanhu lava nga na vutsoniwa ku tiva timfanelo ta vona tanihilaha ti sirheleriweke hakona hi Vumbiwa. Rimba leri ri tlhela ri nyika vuleteri, vuviki bya swihangalasamahungu na ku tlakusiwa ka vulemukisi erixakeni hi mayelana na timfanelo ta vanhu lava nga na vutsoniwa.
3.3. Ri humelerisa Phepha ra Swibumabumelo swa Mfumo hi mayelana na Timfanelo ta Vanhu lava nga na Vutsoniwa. Afrika-Dzonga i musayini eka Ntwanano wa vun’we bya Tinxaka (UN) hi mayelana Timfanelo ta Vanhu lava nga na Vutsoniwa na Nawu ya UN eka Chatara ya Afrika hi mayelana na Timfanelo ta Ximunhu na Timfanelo ta Vanhu hi mayelana na Timfanelo ta Vanhu lava nga na Vutsoniwa (Nawu wa Timfanelo ta Vutsoniwa wa Afrika).
3.4. Rimba leri ri kumile mavonelo eka vakhomaxiave lava faneleke hinkwavo, ku katsa na Khansele ya Nhluvukiso wa Ikhonomi na Vatirhi ya Rixaka.
4. Mafambiselo ya Misava na Mfanelo ya ku Khoma Misava eka Tindhawunhlanganelo
4.1. Khabinete yi pasise ku rhurheriwa ka Mafambiselo ya Misava na Mfanelo ya ku Khoma Misava eka Tindhawunhlanganelo hi Ravuntlhanu, 27 na Mudyaxihi, 28 Mudyaxihi 2022 eGauteng.
4.2. Khabinete yi amukele Phepha ra Xiyimo hi mayelana na Mafambiselo ya Misava na Mfanelo ya ku Khoma Misava eka Tindhawu ta Misava ya Nhlanganelo hi Nyenyankulu 2021. Yi lerise leswaku mikanerisano yo yisa emahlweni yi endliwa na vakhomaxiave lava faneleke hinkwavo.
4.3. Samiti leyi yi ta va mahetelelo ya ntirho lowu wu endliweke n’wexemu, lowu wu kombele mavonelo eka vakhomaxiave vo hambanahambana.
C. Swiendleko leswi Taka
1. Khomferense ya Misava Hinkwayo ya vuntlhanu hi mayelana na ku Herisiwa ka Vatirhi lava ha riki Vana
1.1. Afrika-Dzonga yi ta rhurhela Khomferense ya Misava Hinkwayo ya vuntlhanu hi mayelana na ku Herisiwa ka Vatirhi lava ha riki Vana e Durban Internation Convention Centre e KwaZulu-Natal kusuka hi Sonto, 15 kufika Ravuntlhanu, 20 Mudyaxihi 2022. I rosungula Nhlangano wa Vatirhi wa Matiko ya Misava (ILO) wu rhurhela khomferense leyi eAfrika.
1.2. Varhangeri va tiko, 120 wa vaholobye, vaseketeri va mihlangano yinharhu ya 187 wa matiko lama nga swirho swa ILO, tiejensi ta UN, mihlangano ya dyondzo, mihlangano ya vaaki lava nga na ku tsakela kun’we, mihlangano leyi nga riki ya mfumo, swihangalasamahungu na vaaki lava nga na ku tsakela kun’we va languteriwa ku nghenela khomferense leyi.
1.3. Xiendleko lexi xi ta tlhela xi pfumelela Afrika-Dzonga ku tisa emahlweni Vumbiwa ra tiko tanihileswi ri sirhelelaka timfanelo ta vana. Tiko leri ri ta vulavurisana na matiko yo hambanahambana lama ma nga emahlweni ka hina hi ku herisa vatirhi lava ha riki vana na ku dyondza eka wona.
2. Xivijo xa Puresidente xa Modlolo wa Nhluvukiso wa Swifundzatsongo (DDM)
2.1. Phuresidente Ramaphosa u ta khoma Xivijo xa Phuresidente wa DDM eMpumalanga hi Ravuntlhanu, 20 Mudyaxihi 2022 ehansi ka nkongomelo: “Ku nga syiwimunhu endzhaku”. Tanihi pulatifomo ya vutekaxiave bya vaaki ya nkoka, Xivijo lexi xi pfumelela Phuresidente ku vulavurisana hi ku kongoma na vakhomaxiave vo hambanahambana – ngopfungopfu miganga ya le matiko xikaya – na ku yingisela swiphiqo na mitlhontlho ya vona hi xikongomelo xa ku tirhana na yona.
2.2. Xivijo xa Phuresidente xa DDM xi na xikongomelo xa ku hakunula switsandzisi eka mphakelo wa vukorhokeri lowu pfanganisiweke na ku kondletela vutekaxiave bya vaaki hi ku fambisana na DDM.
2.3. Vanhu va Afrika-Dzonga va nga landzela na ku teka xiave eka mikanelo eka swihangalasamahungu swa vanhu ehansi ka hexithege #PresidentialImbizo.
3. N’hweti ya Afrika
3.1. Ku tsundzukiwa ka N’hweti ya Afrika ya lembe na lembe na Siku ra Afrika hi Ravunharhu, 25 Mudyaxihi ku le ku tlangeriweni ehansi ka nkongomelo: “Lembe ra Mphamelo lowu Akaka Miri: Ku tiyisa nkondzelelo eka mphamelo lowu akaka miri na nsirhelelo wa swakudya eka tikokulu ra Afrika”.
3.2. Tanihi xiphemu xa nkarhi wo leha lexi tumbuluxiweke eka Ajenda ya 2063 (leyi ku nga pulani ya nhluvukiso ya Afrika ku fikele nhluvukiso wa vanhu na ikhonomi lowu katsaka hinkwavo na ku yiseka emahlweni eka 50 wa malembe), nkongomelo lowu wu kongomisa eka vuswikoti bya vanhu va Afrika ku ri na ntshikelelo eka vavasati, vakondlo-a-ndzi-dyi na vana. Leswi i swa nkoka eka nhluvukiso tanihileswi swi yisaka eka vutomi lebyi antswisiweke bya vanhu, timali leti nghenaka ta le henhla na timalinghena leti antswisiweke ta matiko.
3.3. Xikombiso xo vonakala eka mitlangelo ya N’hweti ya Afrika i Vhiki ra Vuhlanganisi ra Afrika, leyi yi nga ta khomeriwa eConstitutional Hill eJoni kusuka 23 kufika 27 Mudyaxihi 2022.
3.4. N’hweti ya Afrika i xivandlanene xa ku kondletela vun’we bya Afrika na na mpfangano wa swifundza wo enta, na ku tiboha hi vuntshwa ka Afrika eka makumu man’we. Khabinete yi tsundzuxa munhu un’wana na un’wana leswaku mitsakelo ya hina ya rixaka yi xakelanisiwile hi ndlela ya ntumbuluko na ntshamiseko, vun’we na ku humelela ka Afrika.
D. Mahungu
1. Michavelelo
Khabinete yi hundzise michavelelo ya yona eka ndyangu na vanghana va:
- Mnn Phindile Xaba (53), loyi a veka na ntirhovutomi wo leha na ku va wo xiximeka swinene eka indasitiri ya swihangalasamahungu, havumbirhi bya le Afrika-Dzonga na le ndzhandzheni. U tirhile a nga karhali eka ku antswisiwa ka tiko ra ka hina.
- Muyimelatiko Silumko Sokupa (74), loyi a korhokeleke Ejensi ya Nsirhelelo wa Tiko eka swiyimo swo hambanahambana hi nkarhi wa ntirhovutomi wa yena wo leha na ku va wo xiximeka swinene eka Vukorhokeri bya Mfumo.
- Phurof Francis Wilson (83), mutivi wa ikhonomi wa loyi a bumabumeriwaka swinene tlhelo musunguri wa Yuniti ya Ndzavisiso wa Vatirhi na Nhluvukiso ya le Dzongeni wa Afrika.
E. Ku thoriwa
Ku thoriwa hinkwako ku fanele ku landzelela vutiyisisi bya mithwaso na mbhasiso lowu faneleke.
1. Dkd Kesavan Naidoo tanihi Xandla xa Mulawuri-Jenerala (DDG): Nhluvukiso wa Mihlangano eka Ndzawulo Mfumontirhisano (DCoG).
2. Ttn Siphosihle Emmanuel Hlomuka tanihi DDG: Malawulelo ya Nseketelo na Miphalalo ya Mfumo wa Miganga eka DCoG.
3. Mr Risimati Patrick Mathye tanihi DDG: Malawulelo ya Vukorhokeri bya Mati na Nkululo eka Ndzawulo ya Mati na Nkululo (DWS).
4. Mr Collin Xolani Zwane tanihi DDG: Vulawuri, Vulandzelelanawu na Nsindziso eka DWS.
5. Mr Melanchton Makobe tanihi DDG: Vutiyisisi bya Mafumelo na Matirhelo bya SOC eka Ndzawulo ya Mabindzu ya Mfumo.
F. Khabinete yi pfumelelanile na Vaholobye hi mayelana na ku thoriwa loku landzelaka:
1. Ttn Bhekuyise Mathews Khenisa tanihi Muofisirinkulu wa Vurhangerinkulu (CEO) wa Ejensi wa Nhluvukiso wa Tindlu (HDA).
2. Mnn Joy Keledi Masemola tanihi hi Muofisirinkulu wa Timali wa HDA.
3. Dkd Cornelius Ruiters tanihi CEO wa Mati ya le N’walungwini wa Lepelle.
4. Swirho swa Khansele ya Chatara ya Sekitara ya Swihlahla:
(a) Mnn Nelly Ndlovu (Mutshamaxitulu);
(b) Mnn Makhosazana Mavimbela;
(c) Ttn Dwayne Marx;
(d) Mnn Tanucia Coopasamy;
(e) Ttn Tyrone Hawkes;
(f) Ttn Penwell Lunga;
(g) Ttn Michael Peter;
(h) Ttn Bruce Breedt;
(i) Ttn Pierre Tullis;
(j) Ttn Roy Southey;
(k) Ttn Lulamile Xate;
(l) Ttn Mlungisi Bushula;
(m) Mnn Thandi Mokoena;
(n) Ttn Darryll Sauer;
(o) Ttn Tshepo Makhene;
(p) Mnn Pumeza Nodada;
(q) Mnn Lindiwe Mavundla; and
(r) Mnn Kwena Komape.
Swivutiso: Phumla Williams – Muvulavuleri wa Khabinete
Selifoni: 083 501 0139
