1. Ditshwetso tse di botlhokwa tsa Kabinete
1.1. Kabinete e letleletse maano a go tlhoma Khonferense e e Itlhophileng e e ka ga Meepo ya Operation Phakisa, e e tla nopolang setlhopha sa mathata a a popota a a kgoreletsang serodumo sa kgolo le tlhabololo ya lekala leno. Khonferense e e Itlhophileng e e ka ga Meepo e tla dirisana mmogo mo go tlhagiseng maano a go samagana le dikgwetlho tseno. Khonferense e e Itlhophileng e e ka ga Meepo e rulaganyeditswe go tshwarwa dibeke di le nne ka Diphalane 2015.
1.2. Kabinete e letleletse go phasaladiwa ga pampiritlhomo ya Togamaano ya Ikonomi ya Tlhago gore setšhaba se dire ditshwaelo ka ga yone. Togamaano eno e akaretsa dingwaga di le 14 mme e tla konosediwa ka ngwaga wa 2030. Togamaano eno e senka go oketsa go nneng le seabe ga tlhago mo Seelosotlheng sa Ditlhagisiwa tsa Naga mo Ngwageng (GDP) mme e ntse e tsweletse go somarela thulaganyo ya tlhago.
Mogareng gat se dingwe, e tla tsepamisa mogopolo mo go thuthuseng kgolo mo maphateng ka bobedi e leng la ditshedi tse di tlhaga le la ikonomi ya bojanala.
1.3. Kabinete e letleletse go phasaladiwa ga pampiritlhomo ya letlhomeso le tshamagano ya go tlhama Tseokarolo e e Tobaneng le Maikaelelo a Bosetšhaba a Aforika Borwa gore setšhaba se dire ditshwaelo ka ga yone le go e buisanela le bannaleseabe pele e ka isiwa kwa Lekgotleng la Matlhomeso a Dinagakopano ka ga Phetogo ya Maemo a loapi (UNFCC).
Letlhomeso leno fa go konoseditswe go dira ditshwaelo ka botlalo e tla nna karolo ya ditumelano tsa semolao tse di ka fat lase ga UNFCC, mme e tla tsenngwa tirisong kwa Paris, France ka Sedimonthole 2015.
2. Melaotlhomo
Kabinete e letleletse melaotlhomo e e latelang gore setšhaba se dire ditshwaelo ka ga yone:
2.1. Molaotlhomo wa Setheo sa Botsamaisi jwa Melelwane (BMA) wa 2015, o maitlhomo a one e leng go tlhoma BMA e e tla tshegetsang tshireletsego mo go kgabaganyeng melelwane fa go tsewa maeto; o diragatsa ditlhokwa tsa tlhokomelo le tshireletsego ya bosetšhaba, go ya ka maikano a naga ya Aforika Borwa, a Aforika le a boditšhabatšhaba.
Bolaodi jono bo le esi jwa go kgobelela go tsenyeng tirisong ga melao ya kwa melelwaneng bo tlhagisa bokgoni jwa ditirelo tse di somarelang ditshenyegelo mmogo le tshireletsego le bolaodi jo bo thathabologetsweng jwa ditikologo tsa melelwane.
2.2. Molaotlhomotlhabololo wa Bafaladi wa 2015, o o senkang go tlhola thulaganyo e e mosola e e dirang sentle tebang le bafaladi ba ba senkang botshabelo.
Kabinete gape e letleletse go tlisiwa kwa ga melaotlhomo e e latelang kwa Palamenteng:
2.3. Pusoselegae: Molaotlhomotlhabololo wa Ditlhopho tsa Mebasepala wa 2015, e leng o o tlhabololang Pusoselegae: Molao wa Ditlhopho wa Ditlhopho tsa Mebasepala wa 2000 (Molao wa bo 27 wa 2000).
Ditlhabololo di rarabolola mathata ka maikaelelo a go netefatsa fa go na le dipaakanyo tse di tsamayang sentle le go konosetsa ditlhopho tsa 2016 tsa dipusoselegae.
2.4. Molaotlhomotlhabololo wa Letlole la go go Tlhokomela fa o Latlhegetswe ke Tiro ka 2014. Tseno ke ditlhabololo tsa bobedi mo Molaong wa Letlole la go go Tlhokomela fa o Latlhegetswe ke Tiro wa 2001 (Molao wa bo 63 wa 2001).
Gang fela fa go sena go atlenegisiwa Molaotlhomo ono, gareng ga tse dingwe, o tla atolosa pakatuelelo ya dikungwelo mo banning le seabe go tloga mo dikgweding di le robedi go fitlheng mo dingweding di le 12 mmogo le go atolosa paka eo monnileseabe a ka tsenyang topotuelo go tloga mo dikgweding di le thataro go fitlheng mo dikgweding di le 12.
3. Ditiragalo tse di Tlang
3.1. Kabinete e letleletse moano wa 2015 wa Kgwedi ya Basadi: “Basadi, ba Tshwaragane mo go Tsweletseng Pele Aforika Borwa” le khalentara ya ditiragalo tsa Kgwedi ya Basadi, e leng se se lebisang kwa lenaaneng la ngwaga otlhe.
Mokete wa Letsatsi la Basadi ka la bo 09 Phatwe 2015 o tla tshwarelwa kwa Sasolburg, Foreisetata, e leng seo gape se tla tshwaiwang ke thebolo ya Pegelo ya Maemo a Basadi ka Moporesitente Jacob Zuma.
2015 gape e tshwaya segopotso sa bo 59 sa mogwanto wa basadi kwa Union Buildings kgatlhanong le molao wa dipasa, e leng se se baakanyetsang segopotso sa bo 60 ka 2016.
3.2. Tona ya Lefapha la Saense le Thekenoloji, Mme Naledi Pandor, o tla rebola Beke ya Bosetšhaba e e ka ga Saense (NSW) e e tla diragadiwang go simolola ka la bo 01 go fitlha ka la bo 8 Phatwe 2015 kwa Khamphaseng e e kwa Mafikeng ya Yunibesiti ya Bokone Bophirima ka la bo 01 Phatwe. O tla bo a tsamaya le Mokhuduthamaga wa Thuto kwa Bokone Bophirima, Mme Maphefo Matsemela, le Motlatsa Mokhanselara wa Khamphaseng e e kwa Mafikeng ya Yunibesiti ya Bokone Bophirima, Moporofesara Dan Kgwadi. Mokete oo o tla tsenelwa ke barutwana ba le diketekete, baithuti ba kwa diyunibesiti, borasaense le ditokololo tsa setšhaba.
Moano wa NSW 2015 ke “Ngwaga wa Boditšhabatšhaba wa Mabone mmogo le Mabone a a ikaegileng ka Thekenoloji.” Mabone mmogo le botlhokwa jwa one mo go tokafatseng matshelo a tla tlhagisiwa ka mefuta e e farologaneng jaaka go dirisa lebone la leisara kwa mafelong a boitekanelo, mo bookelong jwa matlho, mo diintasetering tsa botlhagisi, mo go fiseletseng dikoloi le mo maboneng a tshireletsego kgatlhanong le bogodu.
Lefapha la Saense le Thekenoloji, ka tirisano le Lekgotla la Saense le Dipatlisiso tsa Intaseteri (CSIR), le beeleditse mo thekenolojing ya letsatsi – e leng saense ya matlhasedi a letsatsi e e tlhagisang, e e laola le go tsibogela matlhasedi a letsatsi le ditlhase tsa letsatsi. Seno, gareng ga tse dingwe, se dirile gore lefatshe le itemogele thekenoloji ya lebone la leisara ya dijithale. Phitlhelelo eno kwa CSIR e tlhagisa tsela e ntšhwa ka ga go tsibogela thekenoloji ya lebone la leisara mme e ka nna legato leo dithekenoloji tsa bokamoso di tla tlhamiwang go tswa mo go lone.
4. Go Thapiwa
Go thapiwa gotlhe go tla diragadiwa fa makwalothuto otlhe a netefaditswe mme go amogetswe tetlelelo e e matshwanedi.
4.1. Rre Stavros Nicolaou jaaka tokololo e e refosanang ya Lekgotla la Bosetšhaba la Tlhabololo ya Ikonomi le Ditiro mo Botong ya Dikeletso mo Mafelo a a Itlhophileng a Ikonomi.
4.2. Banka ya Naga:
a) Rre Bafana Patrick Mathidi – (o thapilwe gape jaaka Mokaedi yo e seng wa Khuduthamaga);
b) Advocate Sandra Julie Hester Coetzee – (Mokaedi yo e seng wa Khuduthamaga);
c) Mme Mathane Eveline Makgatho – (Mokaedi yo e seng wa Khuduthamaga); and
d) Rre Bennie van Rooy – (Motlhankedimogolo wa Matlole jaaka Mokaedikhuduthamaga).
4.3. Lekgotla la Lekgotla la Kwadiso ya Baagi ba Dintlo la Bosetšhaba:
a) Rre Abbey Chikane (Modulasetilo);
b) Mme Julieka Bayat;
c) Mme Xoliswa Eunice Daku;
d) Rre Themba Thomas Cyril Dlamini;
e) Mme Hlaleleni Kathleen Dlepu;
f) Ambassador Segogwane Samuel Kotane;
g) Rre Phetola Nailana Solomon Makgathe;
h) Mme Mankwana Christinah Mohale;
i) Mme Busisiwe Nwabisa Nzo;
j) Rre Alvin Phumudzo Rapea;
k) Rre Goolam Hoosen Manack (Moemedi wa Lefapha la Matlotlo a Bosetšhaba);
l) Rre Obed Lucas Molotsi (Moemedi wa Lefapha la Ditiro tsa Puso); le
m) Rre Lulama Andisa Potwana (Moemedi wa Lefapha la Kgwebisano le Intaseteri).
4.4. Ngaka Muzamani Charles Nwaila jaaka Mokaedikakaretso mo Lefapheng la Merero ya Magosi – (Konteraka e atolositswe ka dingwaga di le tharo.)
4.5. Ngaka Bongani Douglas Ngqulunga jaaka Motlatsamokaedikakaretso: Kantoro ya Merero ya Moporesitente mo kantorong ya Moporesitente.
Dipotsiso: Phumla Williams (Sebueledi sa Kabinete sa namaotshwere)
Mogala: 083 501 0139
