1. Diphetho tše Bohlokwa tša Kabinete
1.1. Kabinete e dumeletše maano a go hloma Seboka sa Meepo sa Operation Phakisa, leo le tlago tseba mathata a mmalwa ao a bonagalago ao a šitišago seabe sa kgolo le sa tlhabollo sa lefapha le. Seboka sa Meepo se tla hloma gape maano ka tirišano go fenya ditlhohlo tše. Seboka sa Meepo seo se tlago swarwa dibeke tše nne se rulagantšwe go swarwa ka Diphalane 2015.
1.2. Kabinete e dumeletše gore sethalwa sa Leano la Ekonomi ka ga Diphedi tše di fapafapanego se phatlalatšwe go tla go fiwa ditshwaotshwao ke setšhaba. Leano le le akaretša lebaka la nako la mengwaga ye 14 leo le felago ka 2030. Leano le nyaka go oketša seabe sa lefapha la Diphedi tše di fapafapanego go Letseno ka Moka la ka Nageng mola ka go le lengwe le babalela phedišano ya diphedi ka mo nageng. Le tla re gareng ga tše dingwe la lebeledišiša go maatlafatša ekonomi ka go bobedi bophelo bja diphoofolo tša nageng le ka lefapheng la boeti bja mabapi le tlhago.
1.3. Kabinete e dumeletše gore sethalwa sa tlhako le mokgwa wa go hlama Seabe se se tlago Laolwa maemong a Bosetšhaba sa Afrika Borwa se phatlalatšwe go tla go fiwa ditshwaotshwao ke setšhaba ka nepo ya go rerišana le bakgathatema pele ga ge se ka romelwa go Kopanokgothekgothe ya Tlhako ka ga Phetogo ya Klaemete ya Mokgatlo wa Dinagakopano (UNFCC).
Tlhako ye ge e šetše e rerilwe ka botlalo ke bakgathatema e tla opa tumelelano ya semolao ka fase ga UNFCC, yeo e tlago amogelwa ka Paris, France ka Manthole 2015.
2. Melaokakanywa
Kabinete e dumeletše go phatlalatšwa ga Melaokakanywa ye e latelago go tla go fiwa ditshwaotshwao ke setšhaba:
2.1. Molaokakanywa wa Setheo sa Taolo ya Mellwane (BMA), wa 2015, wo o nyakago go hloma BMA ye e tlago lekanyetša maeto a go putla mellwane ya dinaga, go nolofatša kgwebišano le dilo tše bohlokwa tša polokego ya naga, ka gare ga kamano ya ditlamego tša selete sa Afrika Borwa, sa Afrika le sa boditšhabatšhaba.
Taolo ye e tee ya phethagatšo ya molao wa mellwane e fa monyetla wa ditirelo tšeo di sa turego kudu gammogo le polokego ye e maatlafaditšwego le taolo ya tikologo ya mellwane.
2.2. Molaokakanywaphetošwa wa Bafaladi, wa 2015, wo o nyakago go hloma tshepedišo ya tirišo ya phethagatšo ya mošomo ye e nago le bokgoni le ya go šoma gabotse go batho bao ba kgopelago maemo a bofaladi.
Kabinete e tšwetše pele go dumelela go romelwa ga Melaokakanywa ye e latelago Palamenteng:
2.3. Molaokakanywaphetošwa wa Dikgetho tša Mebasepala tša Mmušo wa Selegae wa 2015, wo o fetošago Molao wa 2000 wa Dikgetho tša Mebasepala tša Mmušo wa Selegae (Molao wa 27 wa 2000).
Diphetošo tše di rarolla mathata ka nepo ya go netefatša gore go ba le tokišetšo ye e hlokago mathata le go phethagatša dikgetho tša mebušo ya selegae tša 2016.
2.4. Molaokakanywaphetošwa wa Inšorentshe ya bao ba Lahlegetšwego ke Mešomo wa 2014. Ye ke phetošo ya bobedi ya Molao wa 2001 wa Inšorentshe ya bao ba Lahlegetšwego ke Mešomo (Molao wa 63 wa 2001).
Ge Molaokakanywa o se na go fetišwa, o tla oketša lebaka la nako la ditefelo tša kholego go mošomi yo a bego a lefa tšhelete ye go tloga go dikgwedi tše seswai go ya go tše 12 magareng ga tše dingwe le go oketša lebaka la nako leo mošomi yo a bego a lefa tšhelete yeo a ka dirago kleime go tloga go dikgwedi tše tshela go ya go tše 12.
3. Ditiragalo tše di tlago
3.1. Kabinete e dumeletše morero wa Kgwedi ya Basadi ya 2015 wa: “Basadi, Ba Swaraganetšego Go Tšweletša Pele Afrika Borwa” le khalentara ya ditiragalo tša Kgwedi ya Basadi, tšeo di feletšago ka lenaneo la ngwaga ka moka.
Moletlo wa Letšatši la Basadi ka la 9 Phato 2015 o tla swarelwa Sasolburg, ka Foreisetata, wo ka go ona Mopresidente Jacob Zuma a tlago lokolla Pego ya Mathomo ka ga Maemo a Basadi.
2015 e dira gape segopotšo sa bo 59 go tloga mola Basadi ba Gwantelago Union Buildings kgahlanong le melao ya dipasa, gomme e thomiša ditiragalo go lebilwe segopotšong sa bo 60 ka 2016.
3.2. Tona ya Kgoro ya Saentshe le Theknolotši, Mohumagadi Naledi Pandor, o tla tsebagatša semmušo Beke ya tša Mahlale ya Bosetšhaba (NSW) ye e tlago swarwa go tloga ka la 1 go fihla ka la 8 Phato 2015 ka Yunibesithing ya Leboa Bodikela (NWU) Khamphaseng ya Mafikeng ka la 1 Phato. O tla felegetšwa ke Molekgotlaphethiši wa Kgoro ya Thuto ya ka profenseng ya Leboa Bodikela, Mohumagadi Maphefo Matsemela, le Motlatšamotšhanseliri wa NWU, Moprofesara Dan Kgwadi. Moletlo wo o tla tsenelwa ke diketekete tša baithuti, baithuti ba diyunibesithi, bašomi ba tša mahlale le maloko a setšhaba.
Morero wa NSW 2015 ke “Ngwaga wa Boditšhabatšhaba wa Seetša le Ditheknolotši tšeo di theilwego go Seetša.” Seetša le bohlokwa bja sona bja go kaonafatša maphelo a batho se tla bontšhwa ka mekgwa ye e fapafapanego go swana le ka tirišo ya leisa ka go tša maphelo, ka karong ya lere la mahlo, ka intastering ya botšweletši, ka go fišeletšeng difatanaga le ka mahlaseding a tšhireletšo ka nepo ya go thibela go thubelwa ga malapa.
Kgoro ya Mahlale le Theknolotši, ka go šomiša Lekgotla la Saenstshe le Dinyakišišo tša Diintasteri (CSIR), e beeleditše ka lefapheng la theknolotši ya seetša – e lego mahlale a theknolotši ya seetša a go tšweletša, go laola le go hwetša maphoto a seetša le ditsekana tša seetša. Se se feleditše gareng ga tše dingwe, ka kutollo ya mathomo lefaseng ka bophara ya theknolotši ya leisa ya titšithale. Kutollo ye ka CSIR e emela mokgwa o moswa wa go nagana ka ga theknolotši ya leisa gomme e ka ba sefala seo ditheknolotši tša ka moso di agwago go sona.
4. Bao ba thwetšwego mešomong
Batho ka moka bao ba thwetšwego mešomong mangwalo a bona a dithuto a tla tiišetšwa le go netefatšwa ke makala a maleba.
4.1. Morena Stavros Nicolaou bjalo ka leloko la tšhielano la Lekgotla la Bosetšhaba la Tlhabollo ya Ekonomi le Bašomi go Lekgotlakeletšo la Mafapha ao a Kgethegilego a Ekonomi.
4.2. Panka ya Naga:
a) Morena Bafana Patrick Mathidi – (o thwetšwe leswa bjalo ka Molaodi yo e sego wa Khuduthamaga);
b) Moatbokheite Sandra Julie Hester Coetzee – (Molaodi yo e sego wa Khuduthamaga );
c) Mohumagadi Mathane Eveline Makgatho – (Molaodi yo e sego wa Khuduthamaga); le
d) Morena Bennie van Rooy – (Mohlankedimogolo wa Ditšhelete bjalo ka Molaodi wa Khuduthamaga).
4.3. Lekgotla la Khansele ya Bosetšhaba ya Ngwadišo ya Baagi ba Dintlo:
a) Morena Abbey Chikane (Modulasetulo);
b) Mohumagadi Julieka Bayat;
c) Mohumagadi Xoliswa Eunice Daku;
d) Morena Themba Thomas Cyril Dlamini;
e) Mohumagadi Hlaleleni Kathleen Dlepu;
f) Motseta Segogwane Samuel Kotane;
g) Morena Phetola Nailana Solomon Makgathe;
h) Mohumagadi Mankwana Christinah Mohale;
i) Mohumagadi Busisiwe Nwabisa Nzo;
j) Morena Alvin Phumudzo Rapea;
k) Morena Goolam Hoosen Manack (moemedi wa Kgoro ya Bosetšhaba ya Matlotlo);
l) Morena Obed Lucas Molotsi (moemedi wa Kgoro ya Mešomo ya Setšhaba); le
m) Morena Lulama Andisa Potwana (moemedi wa Kgoro ya Dikgwebišano le Diintasteri).
4.4. Ngaka Muzamani Charles Nwaila bjalo ka Molaodipharephare wa Kgoro ya Merero ya Setšo – (Katološo ya konteraka sebaka sa mengwaga ye meraro.)
4.5. Ngaka Bongani Douglas Ngqulunga bjalo ka Motlatšamolaodipharephare: Kantoro ya Sephiri ya Mopresidente ka Kantorong ya Mopresidente.
Dipotšišo:
Mohumagadi Phumla Williams (Seboleledi sa Kabinete sa Motšwaoswere)
Mogala: 083 501 0139
