Polelo ka Mopresidente Cyril Ramaphosa mabapi le bafaladi bao ba sego molaong le ditšhupetšo tša batšwantle
Maafrika Borwa ao rategago,
Ke nyaka go bolela le lena bošegong bjo ka taba ye e tshwenyago Maafrika Borwa a mantši.
Mo dikgweding tše di fetilego, Maafrika Borwa go tšwa dikarolong ka moka tša bophelo a tšweleditše matshwenyego ka bofaladi le bafaladi bao ba sego molaong.
Matshwenyego a tšweleditšwe ditšhabeng tša rena, mešomong ya rena, dikolong tša rena, dikliniking tša rena le go ralala le difala tša dikgokagano tša leago.
Maafrika Borwa a mantši a botšiša dipotšišo tše thata eupša tša maleba.
Ba botšiša ge e le gore mellwane ya rena e bolokegile.
Ba tshwenyegile ka mešomo.
Maafrika Borwa ba tšweletša ditaba tše ka gobane ba tshwenyegile ka imetšwa ga ditirelo tša setšhaba.
Ba tshwenyegile ka polokego, tšhireletšego le taolo ya molao.
Matshwenyego a ke a makgonthe. A swanetšwe go kwewa. A swanetšwe ke go rarollwa.
Maafrika Borwa a botšiša ge e le gore mmušo o tšea magato a maleba go šogana le ditlhohlo tše.
Bošegong bjo, ke rata go bolela ka matshwenyego a.
Ke rata go hlaloša seo mmušo o se dirago go di rarolla.
Gomme ke rata go hlatholla melao yeo e swanetšego go re hlahla ge re lebana le ditlhohlo tše mmogo.
Re swanetše go ba le nnete ka ga mokgwa wo matshwenyego a a tšwelelago ka gona.
Afrika Borwa e lebana le magato a godimo a tlhokego ya mešomo, kudu gare ga baswa.
Malapa a mantši a palelwa ke go iphediša.
Batho ba bantši setšhabeng ba itemogela bohloki le go se fihlelele dibaka tše di lekanego.
Maemong a bjalo, go ka ba bonolo gore tlalelo e ntšhetšwe go bao ba bonwago bjalo ka bao ba phadišanago go hwetša mešomo le didirišwa.
Le ge go le bjalo, re swanetše go lemoga gore bafaladi bao ba sego molaong ga se bona fela bao ba hlolago ditlhohlo tša rena tša ekonomi.
Tharollo e swanetše go ba go kgolo ya lebelo ya ekonomi ka lebelo, dipeeletšo tše kgolo, go godišwa ga diintasteri, tlhabollo ya mananeokgoparara le go hlolwa ga mešomo ye meswa ya dimilionelione.
Re a tseba gore bofaladi ke bothata bja lefase ka moka. Bo ama dinaga ka moka.
Naga ya rena – bjalo ka tše dingwe tše dintši go ya ka histori – ke ditlamorago tša bofaladi.
Ke lona lebaka la go fapafapana ga rena ebile e nale seabe sa fao re kgonago go dira dilo ka mafolofolo.
Bjalo ka temokrasi, re amogetše baeti nageng ya rena.
Go ya ka maikarabelo a rena a boditšhabatšhaba le maemo a rena a molaotheo, re amogela batho go tšwa dinageng tše dingwe bao ba hlokago tšhireletšo kgahlanong le dintwa, dithulanong, go kgethollwa le dikgaruru.
Bjalo ka naga ye nngwe le ye nngwe lefaseng, re na le melao ye e laolago gore ke mang yo a ka tlago nageng ya rena, se ba ka se dirago mo le gore ba ka dula nako ye kaakang.
Motheo wo mogolo, woo re dumelana le wona ka moka, ke gore motho yo mongwe le yo mongwe ka gare ga mellwane ya Afrika Borwa o swanetše go ba gona ka mokgwa wo o lego molaong.
Motho yo mongwe le yo mongwe yo a šomago nageng ya rena o swanetše go dumelelwa ke molao go šoma.
Motho yo mongwe le yo mongwe yo a sepetšago kgwebo mo o swanetše go dumelelwa ka molao go sepetša kgwebo.
Tlhohlo ye re nago le yona ke gore batho ba bangwe ba falaletše nageng ya rena moo go sa tlwaelegago gomme ba mo ntle le molao.
Afrika Borwa e na le tokelo ya go phethagatša dipholisi le magato ao a thibelago bofaladi bjo bo sa tlwaelegago.
Afrika Borwa e ikemišeditše go šireletša, go thekga le go godiša ditokelo tša batho ka moka ka nageng, e ka ba badudi ba naga ye goba badudi ba dinaga tše dingwe.
Re ikemišeditše go hlompha maikarabelo a rena a boditšhabatšhaba.
Maikarabelo a go phethagatša melao ya bofaladi a matsogong a mmušo le gona mmušo o le tee.
Go bile le mafokodi ka fao bofaladi bo sepeditšwego ka gona.
Go bile le mafokodi go phethagatšo a molao yeo e tiišeleditšwego letsogo le yeo e šetšanego le seo fela.
Go bile le ditiragalo tša bomenetša.
Go bile le mafokodi go mananeo a rena ao a nyatšiišago boitshepo bja setšhaba.
Maafrika Borwa a na le tokelo ya go emela tše dikaone
Re amogela maikarabelo ao gomme re tšea dikgato tša maleba go lokiša mafokodi a.
Maafrika Borwa ba na le tokelo ya go letela mmušo wa go šoma gabotse, wa profešene le bokgoni bja go phethagatša melao ya wona.
Mmušo o tla tšea magato go araba ditetelo tša batho ba rena ka go šogana le ditlhohlo tša go tshelwa ga molao wa bofaladi.
Ke swanetše go gatelela gore ke fela bahlankedi ba mmušo bao ba ka tšeago magato a kgahlanong le go tshela melao, go akaretšwa le go tshela melao ya bofaladi.
Ga go na motho yo a dumeletšwego, mohlala, go lwantšha motho yo mongwe mo mokgotheng go nyaka bohlatse bja go ba modudi wa ka mo nageng.
Re a tseba gore Maafrika Borwa ga se batho ba go ba le lehloyo la bafaladi ka ge go se na sekgoba sa lehloyo la bafaladi, semorafe, kgatelelo ya basadi ka banna, lehloyo la Maafrika goba mohuta ofe goba ofe wa go se kgotlelelane ka Afrika Borwa.
Bjalo ka badudi setšhabeng le bjalo ka setšhaba, re se ke ra goketšwa ke go ekiša bao ba nyakago gore re be kgahlanong le batho bao ba sa belegelwago ka Afrika Borwa le bao ba lego gare ga rena.
Re tla ebile re ka se dumelele dihlopha go šomiša matshwenyego a nnete a Maafrika Borwa go senya naga ya rena ka go dira gore go se be le molao le ka dikgaruru.
Re tla lwantšha magato a go senya matshwenyego a batho ba rena ka bofaladi bjo bo sego molaong, go tšwetša pele maikemišetšo a bona a sepolotiki, a motho ka o tee goba a mananeo a bosenyi.
Re ka se tlaetšwe goba go huetšwa ke masolo a dikgokagano tša leago ao a phatlalatšago tshedimošo ya maaka, ditaba tša bofora le maaka ka bafaladi.
Re swanetše go tshwenyega gore maikutlo a go lwantšhana le bafaladi ka dinako tše dingwe a latelwa ke dithogako tša semorafe le mehlobo, mahlapa goba ditlhaselo tšeo di lebišitšwego go Maafrika Borwa a mangwe.
Re lebeletše gore bafaladi ba swanetše go hlompha melao ya rena. Ka gona re hloka go e hlompha le rena.
Maafrika Borwa a mantši a lemoga gore bofaladi bjo bo sego molaong ke tlhohlo ye kgolo.
Bofaladi bjo bo sego molaong, ge bo sa lekolwe, bo tliša kotsi go tšhireletšego ya Afrika Borwa, go kgotlelela ga yona ka gare ga mathata le tšwelopele ya ekonomi.
Re a tseba gore bofaladi bjo sego molaong bo ama kabo ya ditirelo le go oketša mathata go ditirelo tše bohlokwa tša go swana le tlhokomelo ya maphelo le thuto.
Ditsela tša bofaladi bjo bo sego molaong bo oketšega go sepelelana le bosenyi.
Dihlopha tša bosenyi tše di amegago go go gweba ka batho, matšhošetši, go epa mo go sego molaong, diokobatši le go timeletša mohlala wa tšhelete gantši di šomiša bafaladi ba go hloka mangwalo a maleba go kalatša le go khutiša dithoto.
Re a tseba gore bofaladi bjo bo sego molaong bo nyatša maitapišo a rena go hlola mešomo ye seriti go batho ba rena.
Go na le dikgwebo mo nageng ya rena tše di thwalago bafaladi ba go se be le mangwalo ka gobane maemo a bona a semolao a ra gore ba ka se emele ditokelo tša bona.
Bengmošomo ba bangwe ba thwala bafaladi ba go se be le mangwalo ka gobane ba ba lefa meputso ya ka fase ga yeo e dumeletšwego gomme ba ba šomiša diiri tše dintši ntle le tefelo ye e swanetšego.
Re hweditše mafelo a mošomo a mmalwa moo bafaladi bao ba sego molaong ba šomago ka fase ga maemo a mabe kudu.
Bengmešomo bao ba thwalago bafaladi ba go hloka mangwalo ka boomo gomme
ba ba šomiša bošaedi ba tshela molao.
Ba nyatša maemo a mošomo. Ba nyatša phadišano ya toka.
Gomme ba fokotša dibaka tša Maafrika Borwa.
Maitshwaro a bjalo a tla otlwa ka dikotlo tše maatla le phethagatšo ye e tiišeleditšwego letsogo kudu.
Batho ba bantši setšhabeng ba tšweleditše pefelo ka bafaladi ba go dira dikgwebo tša dispaza, mabenkele a go rekiša dithoto le dikgwebo tše dingwe tšeo e sego tša semmušo.
Ba širela ka gore dikgwebo tša bafaladi di dira gore Maafrika Borwa a palelwe ke go šomma ka mebarakeng yeo.
Matshwenyego a a ga se swanela go phaelwa thoko.
Maafrika Borwa ba ba ntši ba ikwa ba tlogetšwe ka ntle go dibaka mo mafelong ao ba dulago go ona.
Mmušo o na le maikarabelo a go thuša dikgwebo tša ka mo nageng, go hlohleletša phadišano ya toka le go hlola maemo ao Maafrika Borwa ba ka kgathago tema ka mohola go ekonomi.
Bjalo ka naga, bjalo ka badudi setšhabeng le bjalo ka kontinente, re hloka go šomišana – go ya ka Molaotheo wa rena, melao ya rena le maikarabelo a rena a boditšhabatšhaba – go lwantšha bofaladi bjo bo sego molaong.
Re swanetše go dira se ntle le go dira dikgaruru, matšhošetši, kgatelelo goba lehloyo la batšwantle.
Ka morago ga ditsebišo tšeo di dirilwego Polelong ya Maemo Setšhaba ka Dibokwane, mmušo o gare o tšea magato a mangwe go lwantšha bofaladi bjo bo sego molaong.
Beke ye fetilego, Kabinete e amogetše Mokgwa wa Go Akaretša wa Taolo ya Bafaladi bao ba sego Molaong.
Mokgwa wo o dumeletšwe ke Khansele ya Kgokagano ya Mopresidente, wo o akaretšago Ditonakgolo le diMEC, baemedi ba mmušo wa selegae le baemedi ba Lekgotla la Bosetšhaba ya Baetapele ba Setšo le Baetapele ba Khoi-San.
Bošegong bjo, ke nyaka go abelana le lena magato a bohlokwa ao re a tšeago.
Re le Mmušo, maikemišetšo a rena a molaleng.
Re nyaka Afrika Borwa yeo motho yo mongwe le yo mongwe yo a tsenago ka nageng a dira bjalo ka go latela molao.
Afrika Borwa yeo melao ya bofaladi e hlomphiwago le go phethagatšwa.
Afrika Borwa yeo dikgwebo di phadišanago ka toka.
Afrika Borwa yeo ditšhaba di kwago di bolokegile le go šireletšega.
Le Afrika Borwa ye e dulago e botegetše maemo a yona a molaotheo le boikgafo bja yona bja seriti sa botho.
Re ikemišeditše go fihlelela maikemišetšo ka go phethagatša magato a a latelago, gare ga a mangwe:
Pele, re gape re tla tšwela pele go fediša go tshelwa melao ya bofaladi, ya bašomi le melao ye mengwe.
Sa bobedi, re tla tšwelapele go thibela batho go tsena nageng ka tsela ye e sego ya semolao le ka tsela ya go se tlwaelege.
Sa boraro, re gare ebile re tla tšwela pele go lwantšha bomenetša go peakanyo ya rena ya bofaladi.
Sa bone, re tla matlafatša melao ya rena le dipholisi tša bofaladi.
Sa mafelelo, re tla tšwela pele go boledišana le dinaga tše dingwe, go akaretšwa dinaga tše re šomišanago le rena mo kontinenteng ya Afrika, go tla ka tharollo ye e nabilego go ditlhohlo tša bofaladi go ralala le selete sa rena le kontinente.
Karolo ya mathomo ya tharollo ya rena ke twantšho ya mohlakanelwa ya go tshelwa ga melao ya bofaladi ye e lego gona, ya bašomi le melao ye mengwe.
Kgoro ya Merero ya Selegae, Bolaodi bja Taolo ya Mellwane, Tirelo ya Maphodisa a Afrika Borwa le mekgatlo ye mengwe ya phethagatšo ya molao e dutše e gape e tla matlafatša tshepedišo ya go hlaola le go bušetša morago bafaladi bao ba se nago mangwalo bao ba dulago ka Afrika Borwa ntle le molao.
Ngwageng wa go feta fela, Bolaodi bja Taolo ya Mellwane bo kgonne go emiša le go thibela batho ba go feta 450,000 bao ba bego ba leka go tsena ka Afrika Borwa ntle le molao.
Re tla hloma dikgorotsheko tšeo di ikgafetšego fela go šogana le bofaladi go thekga ka lebelo go bušetša bafaladi bao ba sego molaong.
Tirelo ya Maphodisa a Afrika Borwa, Kgoro ya Merero ya Selegae le Kgoro ya Mešomo le Bašomi di oketša ditekolo tšeo di lebantšego dikhamphani tšeo di thwalago bafaladi bao ba se nago mangwalo.
Bjalo ka karolo ya go aga leswa bokgoni bja phethagatšo ya mošomo, Kgoro ya Mešomo le ya Bašomi e thomile go kgoketšo ya dikgaokgao ya belekodi ba 10,000 mo ngwageng wo wa ditšhelete.
Re tla oketša dikotlo, go akaretšwa le go golegwa, go bengmošomo bao ba tshelago Molao wa Bofaladi.
Re ka se amogele seemo seo bengmošomo, bao ka morago ga go latofatšwa le go bonwa molato wa go tshela melao ya bofaladi, ba lefago kotlo fela gomme ba tšwela pele ka go thwala bafaladi bao ba se nago mangwalo bao ba ba šomišago bošaedi.
Go šogana le go tshela melao ya bofaladi le ya bašomi ka lekaleng la dinamelwa, re phethagatša leano leo le hlagišitšwego le intaseteri ya dinamelwa le ya thwalo ya merwalo le mekgatlo ya bašomi.
Karolo ya bobedi ya tharollo ya rena ke go šireletša mellwane ya rena.
Naga ye nngwe le ye nngwe ye e ikemego ka noši e na le maikarabelo a go tseba gore ke bo mang bao ba tsenago ka nageng, ke ka lebaka la eng ba tsena, le gore ba dumelelwa go dula lebaka le le kaakang.
Mellwane ye šireletšegilego ga se boganka go dinaga tše dingwe.
Ke senyakwa sa motheo wa naga ya go ikema ka noši le mmušo wo o bušwago ka tsela ye maleba.
Ka gona, re tšea magato a mangwe gore mellwane ya rena e šireletšege.
Ka lebaka leo, re tla tšwelapele go beeletša ka theknolotši ya sebjalebjale, mananeokgoparara le bašomi go go netefatša gore mellwane ya rena e šireletšegile mola re dira kgwebo ye e lego molaong, go tšea maeto le mešomo ya ekonomi.
Re tla dira gore disenthara tša go amogela bafaladi di hudušwe ka dikgato go ya mellwaneng, gomme re tla thoma ka senthara ya Tshwane ngwaga wo.
Dinaga tše dingwe tše dintši di na le disenthara tša go amogela bafaladi kgauswi le moo bafaladi ba tsenago nageng ba tšhabela dintwa goba ba nyaka tšhireletšo.
Go iša disenthara tša go amogela bafadi kgauswi le mellwane go ikemišeditše go netefatša gore dikgopelo tša botšhabelo di sekegelwa ka bokgoni bjo bogolo, ka polokego ye kaonafetšego le ka toka.
Se se tla kgontšha mmušo go laola dinyakwa tša tšhireletšo ka moo go tsenwago gona go netefatša gore bao ba nyakago tšhireletšo ya nnete ba hwetša thušo ka pela ka mo go kgonagalago.
Karolo ya boraro ya tharollo ya rena e tla ba go tšwelapele go matlafatša lenaneo la rena la bofaladi ka go lwantšha bomenetša le go diriša theknolotši ya maemo a godimo.
Re tšwela pele go lwantšha bomenetša le go se šome gabotse ga Kgoro ya Merero ya Selegae.
Re swanetše go lemoga gore nakong tše ntši bofaladi bjo bo sego bo kgonagala ka baka la bomenetša.
Bahlankedi bao ba rekišago ditokumente, ba thuša go tsena ga go se be molaong goba go šomiša bošaedi dikantoro tša mmušo go ikhola ba eka tshepo ya batho ba Afrika Borwa.
Re tla latišiša melato ye ntle le go lapa.
Bao ba nago le maikarabelo ba lebana le go rakwa, go sekišwa le ditlamorago ka moka tša molao.
Re thoma Rejistara ya Badudi ya Bohlale yeo e nago le data ya payometriki go motho yo mongwe le yo mongwe yo a lego ka nageng, go thoma motheo wa ID ya Titšitale.
Ka nako ye e swanago, re tla emiša ka pukwana ya boitsebišo ye talamorogo, yeo e dumeleletšego go utswa boitsebišo ke bafaladi bao ba sego molaong le dihlopha tša basenyi.
Kgoro ya Merero ya Selegae e tla bea letšatši leo ka morago ga lona dipukwana tša ID tše talamorogo di ka se sa amogelwago.
Re tla fediša go šomiša ka tsela ye mpe ya Nomoro ya Ngwadišo ya Difatanaga yeo bafaladi ba e šomišago go reka difatanaga, eupša e šomišwa bjalo ka mokgwa wa boitsebišo.
Kgoro ya Dinanelwa e tla ntšha melawana ye meswa go sepelelana le melao ya boitsebišo bja naga ya rena mo dikgweding tše tharo.
Karolo ya bone ya tharollo ya rena ke go tswalela dikgoba tše di lego mo melaong le dipholising tša rena.
Melao yeo e laolago bofaladi mo Afrika Borwa ke diriparipa ebile ka nako tše dingwe e ya thulana. E dumelela mafokodi a molao a o a šomišwago bošaedi ke bafaladi bao ba sego molaong.
Re šogašogana le mafokodi a.
Mmušo o phethile Pholisi ya Bosetšhaba ya Bašomi ba Bafaladi , yeo e akanyago melao ya palo ya godimo ya go thwala bafaladi ba go ba le mangwalo, le go šogana le go sekiša bengmošomo bao ba thwalago bašomi ba go hloka mangwalo.
Molaokakanywa wo o Mpshafaditšwego wa Ditirelo tša Mošomo o dumeletšwe ke Kabinete go tsebišwa ka Palamenteng. Se se fa Tona maatla a go bea molao mabapi le go thwala bafaladi lekaleng le lengwe le lengwe la ekonomi goba legoro la mošomo.
Kgoro ya Tlhabollo ya Dikgwebo tše Nnyane, e šoma le Mokgatlo wa Mmušo wa Selegae wa Afrika Borwa, e tla phetha tshepedišo ya go netefatša gore dikgwebo tše nnyane le tšeo e sego tša semmušo di ngwadišitšwe gabotse. E tla fa gape thekgo ya dikgwebo tšeo e sego tša semmušo tša Afrika Borwa ka Sekhwama sa Mabenkele a Spaza.
Karolo ya mafelelo ya ditharollo tša rena ke go šoma le dinaga tše dingwe mo seleteng sa rena le go ralala le kontinente go šogana le tlhohlo ye e nabilego ya bofaladi.
Re swanetše go lokiša mabaka ao a hlolago bofaladi mo kontinenteng ya rena le mafelong a mangwe.
Afrika Borwa e ka se kgone go lokiša ditlhohlo tša bofaladi e le tee.
Bofaladi ke tiragalo ya kontinente le ya lefase ka bophara.
Bokamoso bja Afrika Borwa bo ka se kgaoganywe le bokamoso bja kontinente ya Afrika.
Kgatelelo ya bofaladi e ka se rarolle ka magato a phethagatšo fela.
Ba nyaka khutšo moo go na le thulano, kgolo ya ekonomi moo go se nago kgatelopele le dibaka moo go nago le bohloki.
Bjalo ka Afrika Borwa, re tla tšwela pele go šoma le dinaga tša kgauswi le go aga Afrika yeo batho ba sepelago ka kgetho e sego ka go tshwenyega.
Ka SADC, Kopano ya Afrika le ka dikamano tša rena tša bobedi le dinaga tše dingwe, re tla nyaka go hwetša ditharollo tša go swarelela go rarolla ditlhohlo tše.
Bjalo ka karolo ya maitapišo a, ke tla romela baemedi go dinaga tša Afrika tše mmalwa go hlaloša magato ao re a tsebišago bošegong bjo.
Kabinete e tla dula e swere taba ye gomme nako le nako e tla lebelela tšwelopele go phethagatša magato a.
Komiti ya Magareng ga Ditona ka Bofaladi e tla sepediša magato a mmušo go ralala le dikgoro le dikarolo tša mmušo.
Dihlongwa tša NATJOINTS le tša Porofense tša NATJOINTS di laetšwe go matlafatša tirišano magareng ga ditheo tša phethagatšo ya molao, mekgatlo ya bohlodi le ya tšhireletšego go netefatša phethagatšo ye nago le mohola..
Ge re šoma go rarolla bothata bja bofaladi bjo bo sego molaong, re ikemišeditše gore re ka se dumelele motho o mongwe le o mongwe go šomiša bothata bjo gore naga e se laolege.
Mekgatlo ya rena ya phethagatšo ya molao le ditirelo tša tšhireletšego – ka go šoma le makala a mangwe a mmušo le bakgathatema ba bohlokwa – ba letile go tšea magato go šireletša tšhireletšo ya naga, go phethagatša molao le taolo, le go šireletša mananeokgoparara a bohlokwa.
Diphetogo tše re di tsebagaditšego malobanyana mo go melao ya rena ya bofaladi le melawana e tla re thuša go goketša boeti, talente ya bokgoni bjo bogolo le dipeeletšo ka mekgwa ye e lego molaong.
Re swanetše gape go gopola gore batho ba bantši ba rena ba sepela go ya dinageng tše dingwe go ithuta, go šoma le go hwetša maitemogelo.
Bontši bja bona ba boa gae le mabokgoni a bohlokwa le bokgoni, ka kgopolo ye e nabilego ya lefase, le maemo a makaone go kaonafatša maphelo a bona le a malapa a bona.
Bofaladi ke tsela ya lefase gomme re swanetše go ikemišetša go bo thabela.
Afrika Borwa ke naga ye botse ya bofaladi gomme re ka ba ba bakaone le ge go le bjalo.
Eupša go ra gore melao ya rena e swanetše go matlafatšwa le go phethagatšwa gabotse.
Go ra gore re swanetše go fediša bofaladi bjo bo sego molaong le go šogana le ditlhohlo tša leago, ekonomi le tša tšhireletšego tšeo bo kgathago tema go tšona.
Re se ke ra dumela go ba kgahlanong le bafaladi goba kgahlanong le rena ka borena.
Re swanetše go hlompha Molaotheo ka moka, go šireletša ditokelo tša batho tša motheo tša botho tša batho ka moka le go swarelela maatla a molao wa naga.
Re gana kgopolo ya gore re swanetše go kgotlelela bofaladi bjo bo sego molaong.
Re ka šireletša mellwane ya rena mola re šireletša seriti sa batho.
Re ka phethagatša melao ya rena mola re boloka Molaotheo wa rena.
Re ka kgona go šireletša ditšhaba tša rena mola re šireletša maitshwaro a Ubuntu ao a re hlalošago bjalo ka batho.
Bjalo ka ditlhohlo tše dingwe tšeo re lebanego le tšona pele, re ka fenya bothata bja bofaladi bjo bo sego molaong.
Afrika Borwa e fentše mathata a magolo go feta a.
Re fentše karogano. Re fentše thulano. Re fentše go hloka toka.
Re tla fenya le tlhohlo ye.
A re dire bjalo e sego ka letšhogo, pefelo, lehloyo goba dikgaruru, eupša ka kopano, boikgafo le pušo ya molao.
A re ageng Afrika Borwa yeo e nago le tšhireletšo, molao, lerato le katlego.
Afrika Borwa yeo re katološago dibaka, go šireletša seriti sa batho le go phethagatša tshepišo ya temokrasi go batho ka moka.
Ke a leboga!
