Madi a loago a tlhokomelo ya dikhutsana

Ka ga

Se o tshwanetseng go se dira

Nako ya tiragatso

Tuelo ke bokae

Diforomo tse di tladiwang

O ka golagana le mang

Ka ga madi a loago a tlhokomelo ya dikhutsana

Bona madi a loago a go tlhokomela khutsana. Khutsana ke ngwana yoo o beilweng ka fa tlase ga tlhokomelo ya gago ke kgotlatshekelo e le ka ntlha ya:

• go tlhoka batsadi
• go latlhilwa
• go nna mo kotsing 
• go bogisiwa
• go sa tlhokomelwe.

O itse jang gore o na le tumelelo?

Go bona tetla:

• O tshwanetse go nna moagi wa Aforika Borwa, moagi wa leruri kgotsa mofaladi
• Wena le ngwana lo tshwanetse lo bo lo nna mo Aforika Borwa
• Ngwana wa khutsana o tshwanetse go bewa ka semolao ka fa tlase ga tlhokomelo ya gago mme ngwana o tshwanetse go nna a le mo tlhokomelong ya gago
• Ngwana o tshwanetse go nna le dingwaga tse di ka fa tlase ga di le 18.

O tla amogela bokae?

O tla amogela R1 180 ka kgwedi ngwana mongwe le mongwe.

O tla duelwa jang?

Setheo sa Tshireletso ya Loago sa Aforika Borwa (SASSA) se tla go duela madi a loago ka nngwe ya mefuta e e latelang:

• Madi a seatleng kwa lefeloborekisetsong le le tlhophilweng mo letsating le le rileng
• Ka go tsenngwa mo akhaontong ya gago ya banka kgotsa ya Postbank (banka e ka go duedisa tirelo eno)
• Setheo se se dirang jaaka motsamaisi wa madi a loago (sk. Mekgatlho ya katlaatlelo loago).

Ela tlhoko: Fa o sa kgone go tsaya madi ka bowena, o ka tlhopha moemedi kwa kantorong ya SASSA, kgotsa wa neela mongwe dithata tsa mmueledi go go tseela madi ano a loago mo boemeng jwa gago.

Madi ano a loago a tla sekwasekwa leng?

Madi a loago a tla sekwasekwa kwa bokhutlong jwa taelo ya kgotlatshekelo. Ga jaana seno se dirwa dingwaga dingwe le dingwe di le pedi. O tla itsisiwe dikgwedi di le tharo pele go ka nna le tlhokego ya go sekaseka madi a loago.

Fa o amogela madi a gago kwa bankeng, setheong kgotsa moemeding, o tlhoka go tlatsa setifikeiti sa botshelo (tokomane e e supang fa o santse o tshela.) kwa dikantorong tsa SASSA ngwaga le ngwaga.
 
Madi a loago a ngwana a ka kgaotswa fa go diragetse eng?

Tse di latelang di ka baka go beelwa thoko nakwana ga madi a loago a ngwana:

• phetogo ya maemo a gago
• dipholo tsa tshekatsheko
• fa o retelelwa ke go dirisanammogo ka nako e madi a loago a ngwana a sekasekiwang.
• fa o dira bonweenwee kgotsa o tlhagisitse dintlha tse di seng tsa boammaruri ka ga wena

• fa go ne go na le phoso fa madi a loago a tlhokomelo ya dikhutsana a ne a dumelelwa.

Madi ano a loago a tla emisiwa leng?

Madi a loago a tla emisiwa fa:

• fa ngwana a ka tlhokafala kgotsa batsadi ba bofelo bao ba neng ba mo tlhokometse ba ka tlhokafala
• ngwana a ka amogelwa kwa setheong sa puso
• madi a loago a sa tsewa dikgwedi di le tharo tse di latelanang
• o seo mo nageng
• ngwana a sa tlhole a le mo tlhokomelo ya botsadi jwa gago jwa tlhokomelo ya dikhutsana
• fa o sa tlhole o le mofaladi.

Se o tshwanetseng go se dira

1. Etela kantoro ya Setheo sa Tshireletso ya Loago sa Aforika Borwa (SASSA) e e gaufi le wena mme o tle ka tse di latelang:
   • Bukanaitshupo ya gago ya dinomoro di le 13 tsa baakhouto le setifikeiti sa matsalo sa ngwana.
   • Fa o le mofaladi, maemo a gago a tetlelelo le ID ya bofaladi.
   • Fa o sena ID kgotsa setifikeiti sa ngwana sa matsalo:
     • tlatsa afidafiti ka thulaganyo e e tlwaelegileng ya SASSA fa pele ga Mokhomišenara wa Maikano yoo eseng modiredi wa SASSA.
     • Tla ka setatemente sa maikano se se saenilweng ke motho yo o nang le boemo (mokhanselara, moeteledipele wa setso, modirediloago, moruti kgotsa mogokgo wa sekolo) yo o go itseng ebile a itse le ngwana.
     • Modiredi wa SASSA o tla tsaya kgatiso ya menwana ya gago. O tla romelwa kwa Lefapheng la Merero ya Selegae go dira kopo ya ID le fa go santse go mekamekanngwa le kopo ya gago. Fa o sa bone ID madi a loago a gago a tla beelwa thoko.
     • Romela bopaki jwa gore o dirile kopo ya ID le/kgotsa setifikeiti sa matsalo sa ngwana kwa Lefapheng la Merero ya Selegae.
     • Romela ID ya nakwana e e rebotsweng ke Lefapha la Merero ya Selegae (fa go tlhokagala).
     • Tlhagisa setifikeiti sa kolobetso fa se le teng.
     • Romela karata ya kliniki fa e le teng
     • Fa ngwana a le kwa sekolong, pegelo ya dipholo tsa kwa sekolong.
   • Disetifikeiti tsa matsalo\tsa ngwana\bana, kgotsa ditokomane tsa bona tsa boitshupo go tswa kwa dinageng tsa bona tsa tsalo
   • Taelo ya kgotlatshekelo e e bayang ngwana ka fa tlase ga tlhokomelo ya gago
   • Bopaki jwa seemo sa gago sa lenyalo.
2. Tlatsa foromo ya kopo fa pele ga modiredi wa SASSA (ela tlhoko gore wena jaaka modirakopo kgotsa modiredi wa SASSA ke lona fela le ka tlatsang foromo ya kopo).
3. O tla neelwa tshupatefo. E tshole jaaka bopaki jwa gore o dirile kopo.

Fa e le gore kopo ya gago ga e a atlege?

Fa kopo ya gago e sa atlega, SASSA e tla go itsise ka lekwalo gore goreng kopo ya gago e sa atlega.

Fa o sa dumelane le tshwetso, o ka dira boikuelo go Tona ya Tlhabololo ya Loago kwa kantorong ya bosetšhaba ya Lefapha la Tlhabololo ya Loago, o tlhalosa gore goreng o sa dumelane. O tshwanetse go dira boikuelo mo sebakeng sa matsatsi a le 90 morago ga go itsisiwe gore kopo ya gago ga e a atlega.

Go tsaya nako e e kana kang

• Go ka tsaya lobaka lwa dikgwedi di le tharo go mekamekana le kopo ya gago.
• Fa kopo ya gago e atlegile, o tla duelwa go tloga ka letlha leo kgotlatshekelo e beileng ngwana ka fa tlase ga tlhokomelo ya gago.

Go ja bokae

Diforomo tse o tshwanetseng go di tlatsa

Diforomo tsa kopo ga di teng mo inthaneteng, fela o ka di bona kwa kantorong e e gaufi le wena ya SASSA.

Ke mang yo o ka ikgolaganyang le ena

Setheo sa Tshireletso ya Loago sa Aforika Borwa (SASSA)