Tincwadzi tekushayela

Ngesi nekufaka sicelo setincwadzi tekushayela

Udzinga tincwadzi tekushayela kute ushayele imoto ngekwemtsetfo emigwacweni yaseNingizimu Afrika. Ngembikwekutsi ufake sicelo setincwadzi tekushayela, kufanele kutsi ube nencwadzi yekufundza kushayela.

Tincwadzi letehlukene tekushayela tikhishelwa imikhakha leyehlukene yetimoto:

• Khodi A1: Lena yesidudu lesinesitfutsi lesinelisondvo linye eceleni nome lesite lesinenjini lengengci ku-125 cc. Kufanele kutsi ube neminyaka leli-17 ngelilanga lekubhala sivivinyo.
• Khodi  A: Lena yesidudu lesinesitfutsi lesinelisondvo linye eceleni nome lesite lesinenjini  leyengca ku-125 cc. Kufanele kutsi ube neminyaka leli-18 nome ngetulu ngebudzala kute ufake sicelo.
• Khodi  B: Lena yemoto, lokufaka ekhatsi ikhumbi, ibhasi kanye nesitfutsi setimphahla, lenesisindvo sesitfutsi lesingengci ku- 3 500kg. Kufanele kutsi ube neminyaka leli-18 nome ngetulu ngebudzala kute ufake sicelo.
• Khodi  C1: Lena yemoto, yebhasi, yekhumbi nome yesitfutsi setimphahla lesinesisindvo lesisemkhatsini wa-3 500 kg ne-16 000 kg. Kufanele kutsi ube neminyaka leli-18 nome ngetulu ngebudzala kute ufake sicelo.
• Khodi  C: Lena yemoto, ibhasi nome sitfutsi setimphahla lesinesisindvo lesengca ku-16 000 kg. 
• Khodi  EB: Lena:
  • yesitfutsi lesilula lesinetincenye letilungelelwe (sitfutsi lesilula lesidvonsa incola) lesinesisindvo lesihlangene lesingengci ku-3 500 kg. Kufanele kutsi ube neminyaka leli-18 nome ngetulu ngebudzala kute ufake sicelo.
  • yesitfutsi lesihlangene nesisindvo semtfwalo lokungengci ku-3 500 kg kanye nekhumbi, ibhasi nome sitfutsi setimphahla lesinesisindvo lesingengci ku-3 500 kg. Kufanele kutsi ube neminyaka leli-18 nome ngetulu ngebudzala kute ufake sicelo. 
• Khodi  EC1: Lena:
  • yesitfutsi lesisindzako lesinetincenye letilungelewe (sitfutsi lesisindzako lesidvonsa i/tincola) lesinesisindvo lesihlangene lesisemkhatsini wa-3 500 kg ne-16 000 kg. Kufanele kutsi ube neminyaka leli-18 nome ngetulu ngebudzala kute ufake sicelo.
  • yesitfutsia lesinenhlanganisela nesisindvo semtfwalo lesisemkhatsini wa-3 500 kg  ne-16 500 kg kanye nekhumbi, nesibhasana, ibhasi nome sitfutsi setimphahla lesinesisindvo lesisemkhatsini wa-3 500 kg ne-16 000 kg. Kufanele kutsi ube neminyaka leli-18 nome ngetulu ngebudzala kute ufake sicelo.
• Khodi EC: Lena yesitfutsi lesisindzako lesinetincenye letilungelelwe (sitfutsi lesisindzako lesidvonsa i/tincola) lesinesisindvo lesihlangene lesengca ku-16 000 kg nome inhlanganisela yebhasi nome sitfutsi setimphahla lesinesisindvo lesengca ku-16 000 kg. Kufanele kutsi ube neminyaka leli-18 nome ngetulu ngebudzala kute ufake sicelo.

Yini lekumele uyente

1. Yani esikhungweni lesidvute nawe sekuvivinyelwa kutfola ilayisensi yekushayela (i-DLTC) ubhuke lusuku lwekuvivinywa. Hamba nanaku lokulandzelako:
   • ilayisensi yakho yekufundzela kushayela.
   • matisi wakho (i-ID).
   • titfombe te-ID letine letite mbala. Ngembi kwekutsi ushuthe titfombe ufanele kutsi ucinisekise ne-DLTC kutsi badzinga titfombe letingaki.
   • Bufakazi belikheli leliposi nelendzawo lohlala kuyo sib. i-akhawunti yakamasipala. Uma ngabe ibhili yamasipala ayikho egameni lakho, umnikati walebhili ufanele kutsi ente i-afidavithi lefakazela kutsi uhlala kulelikheli bese kutsi lebhili ifaselwa kule-afidavithi. 
   • nangabe uhlala emkhukhwini, ufanele kutsi ute nencwadzi lenesitembu lesisemtsetfweni levela kulikhansela leliwadi lecinisekisa likheli lakho leliposi nelendzawo lohlala kuyo
   • imali yekubhuka. 
2. Gcwalisa lifomu Lekufaka Sicelo selayisensi yekushayela (i-DL1) e-DLTC.
3. Gcina ilisidi njengebufakazi bekukhokhela nanjengesicinisekiso selusuku nesikhatsi sekuvivinywa.
4. Ngelusuku lwekuvivinywa, ufanele kutsi ube se-DLTC ngesikhatsi lesibekiwe. ilisidi yakho nelayisensi yekufundzela kushayela itawucinisekiswa ngembi kwekutsi uvivinywe.
5. Utawuhlolwa ngumhloli loneticu.
6. Nangabe uyasiphasa lesivivinyo, kutawutsatfwa tinyatseliso teminwe yakho bese uhlolwa nemehlo khona e-DLTC. Nomake ungahlolwa emehlo ngudokotela wemehlo loneticu bese ungenisa lifomu e-DLTC. 
7. Nangabe uyasiphasa sivivinyo sekushaye, utawukhokha imali yelayisensi yekushayela yesikhashana, lotawube uyisebentisa ngesikhatsi usalindzele ilayisensi yekushayela lelikhadi le-odiwe.
8. Utawatiswa nangabe likhadi lakho lekushayela selilungele kutsi ulilandze. Ufanele kutsi ulandze ilayisensi yakho yekushayela e-DLTC lapho wafaka khona sicelo.

Sikhatsi semsebenti

• Tincwadzi takho tekushayela kufanele kutsi tibe setilungile kusukela emavikini lamane kuya kulasitfupha.
• Tincwadzi tekushayela tesikhashana tikhishwa ngaleso sikhatsi.

Ngabe kubita malini

Tsintsa lihhovisi lendzawo leliniketa imvume  kute utfole kutsi malini.

Emafomu lagcwaliswako

Lifomu (i-DL1) lesicelo semvume yekushayela litfolakala nome ngabe ngukusiphi sikhungo sekuvivinyela tincwadzi tekushayela.

Ngubani longamutsintsa