Kopo ya laesense ya ho kganna

Dintlha ka tsa ho etsa kopo ya laesense ya ho kganna

O hloka laesense ya ho kganna ka molao mebileng ya Aforika Borwa. Dilaesense tse fapaneng di ntshwa bakeng sa mekgahlelo e fapafapaneng ya makoloi:

Khoutu ya A1: Ena ke ya sethuthuthu se nang le koloitsana kapa se hlokang koloitsana, sa enjine e sa feteng 125 cc.

Bonyane o tlameha ho ba le dilemo tse 17 ka letsatsi la tlhahlobo.

Khoutu ya A: Ena ke ya sethuthuthu se nang le koloitsana kapa se hlokang koloitsana, sa enjine e fetang 125 cc. O tlameha ho ba le dilemo tse 18 kapa ho feta ho etsa kopo.

Khoutu ya B: Ena ke ya koloi, ho kenyeletsa bese e nyane, bese le koloi ya thepa ya boima bo sa feteng 3 500 kg. O tlameha ho ba le dilemo tse 18 kapa ho feta ho etsa kopo.

Khoutu ya C1: Ena ke ya koloi, bese, bese e nyane kapa koloi ya thepa ya boima bo pakeng tsa 3 500kg le 16 000kg. O tlameha ho ba le dilemo tse 18 kapa ho feta ho etsa kopo.

Khoutu ya C: Ena ke ya koloi, bese, kapa koloi ya thepa ya boima bo fetang 16 000kg.

Khoutu ya EB: Ena ke ya:

• koloi e bobebe e nang le dikarolo tse fetang bobedi tse kopantsweng (koloi e bobebe e hulang tereilara) ya boima bo kopaneng bo sa feteng 3 500kg. O tlameha ho ba le dilemo tse 18 kapa ho feta ho etsa kopo.
• kapa koloi ya boima bo sa feteng 3 500kg e kopaneng le bese e nyane, bese kapa koloi ya thepa ya boima bo sa feteng 3 500kg. O tlameha ho ba le dilemo tse 18 kapa ho feta ho etsa kopo.

Khoutu ya EC1: Ena ke ya:

• koloi e boima e nang le dikarolo tse fetang bobedi tse kopantsweng (koloi e boima e hulang [di]tereilara) ya boima bo kopaneng bo pakeng tsa 3 500kg le 16 000kg. O tlameha ho ba le dilemo tse 18 kapa ho feta ho etsa kopo.
• kapa koloi ya boima bo pakeng tsa 3 500kg le 16 500kg e kopaneng le bese e nyane, bese ya boholo bo bohareng, bese kapa koloi ya thepa ya boima bo pakeng tsa 3 500kg le 16 000kg. O tlameha ho ba le dilemo tse 18 kapa ho feta ho etsa kopo.

Khoutu ya EC: Ena ke ya koloi e boima e nang le dikarolo tse fetang bobedi tse kopantsweng (koloi e boima e hulang [di]tereilara) ya boima bo kopaneng bo sa feteng 16 000kg kapa e kopantsweng le bese kapa koloi ya thepa ya boima bo fetang 16 000kg. O tlameha ho ba le dilemo tse 18 kapa ho feta ho etsa kopo.

O lokela ho etsang

1. Leba setsing seo ho etsetswang diteko tsa laesense ya ho kganna teng (DLTC) se haufi ho ya beeletsa letsatsi le ho etswa teko. Nka dintho tse latelang:
   • laksense ya hao ya ho kganna ya bomaithutwane.
   • tokomane ya hao ya boitsebiso (ID).
   • Dinepe tse nne tse tshwanang tse tlwaelehileng. O tlameha ho netefaletswa pele ke DLTC hore na ba tla batla dinepe tse kae pele o ka etsa dinepe tseo.
   • Bopaki ba aterese ya poso le ya moo o dulang, mohlala, Lengolo la akhaonte ya tshebeletso efe kapa efe. Haeba lengolo la tshebeletso le se lebitsong la hao, monga lengolo o tlameha ho etsa lengolo le hlapanyeditsweng le hlalosang hore wena o dula atereseng eo, mme lengolo la akhaonte ya tshebeletso le tlameha ho qhwaellwa lengolong leo le hlapanyeditsweng.
   • Haeba o dula sebakeng sa baipei, o tlameha ho tla le lengolo le nang le setempe sa semmuso le tswang ho molekgotla wa tikoloho, le netefatsang aterese ya hao ya poso le ya moo o dulang teng
   • tjhelete ya peeletso.
2. Tlatsa foromo ya Kopo ya laesense ya ho kganna (DL1)  ho la DLTC.
3. Boloka rasiti e le bopaki ba tefo le netefaletso ya letsatsi la teko esita le nako.
4. Mohla letsatsi la teko, o tlameha ho ba DLTC ka nako e totobaditsweng ya teko. Raisiti ya hao le laesense ya hao ya ho kganna ya bomaithutwane di tla netefatswa pele o ya tekong.
5. O tla etswa teko ke mohlahlobi ya nang le mangolo.
6. Haeba o atleha ditekong, dikgatiso tsa hao tsa menwana di tla nkuwa mme o tla fetisetswa tekong ya mahlo hona moo DLTC. Ho seng jwalo, o ka nna wa etswa diteko tsa mahlo ke ngaka ya mahlo e nang le mangolo ebe o isa foromo DLTC.
7. Haeba o atleha tekong ya ho kganna, o tlameha ho lefa tjhelete ya ho ntshuwa ha laesense ya ho kganna, hore o fumane laesense ya ho kganna ya nakwana, eo o tla e sebedisa ha o ntse o emetse karete e otarilweng ya laesense ya ho kganna.
8. O tla tsebiswa ha karete ya laesense ya hao ya ho kganna e se e le teng hore o ilo e lata. O tlameha ho lata laesense ya hao ya ho kganna DLTC moo o entseng kopo teng.

Nako ya tshebetso

Kopo e sebetswa ka lona letsatsi leo.

Ditjeo ke bokae

Iteanye le ofisi ya heno ya dilaesense bakeng sa ditjeho.

Diforomo tse tlatswang

Kopo ya laesense ya ho kganna DL1, e fumaneha setsing se haufi le wena sa hlahlobo.

Dintlha tsa ho iteanya