A. Ditaba tšeo di amago badudi
1. Dipapadi le Kopano ya Setšhaba
1.1. Sehlopha sa Khrikethe sa Basadi sa Proteas se fihleletše makgaolakgang a Sefoka sa Lefase sa Khrikhete ya Basadi ya ICC
1.1.1. Kabinete e lebogišitše Sehlopha sa Khrikhete sa Setšhaba sa Afrika Borwa ka mošomo wa bona wo mobotse kudu le go dira histori ka go fihlelela makgaolakgang la mathomo go Sefoka sa Lefase sa Khrikhete ya Basadi ya 2025. Mošomo wa bona o be o kgahliša kudu, gomme ba itšhupile go ba baphadišane mo sefaleng sa lefase.
1.1.2. Kabinete e lakaleditše sehlopha tše dibotse ge ba itokišetša makgaolakgang gomme ya ipiletša go Maafrika Borwa ka moka gore ba thekge sehlopha sa rena ge ba leka go dira histori ka go thopa Sefoka sa Lefase sa Khrikhete ya Basadi ya ICC la mathomo. Kabinete e thabetše gore ngwaga wa 2025 e bile wo mobotse kudu go dihlopha tša setšhaba tša khrikhete tša Afrika Borwa ka ge sehlopha sa banna sa setšhaba se fentše Sefoka sa Teko sa ICC sa makgaolakang mola sehlopha sa basadi se fihleletše makgaolakgang a Sefoka sa Lefase sa ODI.
2. Ekonomi
2.1. Afrika Borwa e tlošwa lenaneong la Dinaga tšeo di Nago le Tšhelete yeo Go sa Tsebego gore e Tšwa Kae le Tšhomišo ya yona yeo e Sego Molaong (FAFT)
2.1.1. Kabinete e amogetše go tlošwa semmušo ga Afrika Borwa go tšwa lenaneong la Dinaga tšeo di Nago le Tšhelete yeo Go sa Tsebego gore e Tšwa Kae le Tšhomišo ya yona yeo e Sego Molaong. Sephetho se latela phetho ye e atlegilego ya dilo ka moka tše 22 tša magato ka Phupu 2025 le poelo ye botse go tšwa go tekolo ya ka gare ya FATF ka Mosegamanye, yeo e kgonthišago gore diphetogo tša Afrika Borwa tša go matlafatša mekgwa ya yona ya go lwantšha tšhomišo ye e sego molaong ya tšhelete le mananeo a tšhomišo yeo e sego molaong ya ditšhelete a šoma gabotse gape a a swarelela.
2.1.2. Kabinete e lebogišitše mošomo wo mobotse gape wo rulagantšwego wa sehlopha sa dikgoro tša mmušo sa Ditšhelete tša Setšhaba, Mokgatlo wa Tšhireletšo ya Mmušo, Taolo ya Botšhotšhise bja Setšhaba le Ofisi ya Molaodimogolo wa Dinyakišišo tša Bosenyi bja go Ikgetha, ka magato ao a beilwego mo go lwantšheng bosenyi bja ditšhelete le go otla bao ba dirago bosenyi bjoo.
2.1.3. Kgato ye bohlokwa ya go tloša go tšwa lenaneong la bao ba nago le tšhelete ye e sego molaong le fediša nako ya mengwaga ye mebedi ya go lekolwa go tloga nako ye naga ye e tsentšwego lenaneong ka 2023. Se se bontšha boikgafo bja Afrika Borwa go taolo ya molao, go matlafatša diinstitušene tše bohlokwa, le go kaonafatša ditshepedišo tša phethagatšo le taolo.
2.1.4. Go tlošwa lenaneong go letetšwe go kaonafatša tshepo ya dikgwebo, go matlafatša mananeo a ditšhelete, go fokotša ditshenyegelo tša go adima, go kgatha tema go seriti sa ekonomi ya rena, go oketša kganyogo ya dipeeletšo tše ntši le go hlola mešomo. Go feta moo, go tlošwa lenaneong go tla nolofatša ditiro tša tšhomišo ya ditšhelete tšeo di sego molaong go selaganya mellwane le go tiišetša leina la Afrika Borwa bjalo ka mokgathatema wa go tshepagala le yo a obamelago melao mo mananeong a ditšhelete a boditšhabatšhaba.
2.2. Kaonafatšo ya bokgoni bja tshepedišo go maemakepe a Afrika Borwa
2.2.1. Kabinete e amogetše go phatlalatšwa ga dikreine tše mpsha tša Go tloga Dikepeng go ya go Taolo ya Nageng mo go Theminale ya 2 ya Khontheina ya Durban, yeo e dirago karolo ya Ditheminale tša Maemakepe a Transnet a Lenaneo la Mpshafatšo la ya Dikepe la R4 bilione.
2.2.2. Transnet e laola tshepedišo ya dikepe tša naga ka go šomiša maemakepe, diporo le dikanale tšeo di lego bohlokwa go kgolo ya ekonomi. Mošomo wa yona o akaretša go sepetša merwalo le dikhontheina tše dikgolo, go fa ditirelo tša dinamelwa tše di kopantšwego le tše di šomago gabotse le go netefatša gore infrastraktšha ya yona e šoma gabotse kudu. Ka go fa ditirelo tša dikepe tše šomago gabotse, Transnet e ikemišeditše go godiša phadišano ya Afrika Borwa, go fokotša ditshenyegelo tša go dira kgwebo le go thekga kgolo ya ekonomi ya naga.
2.2.3. Dikreine tše mpsha di tla kgatha tema go go tshepega ga tshepetšo ya thoto, ya kaonafatšo ya bokgoni bja tshepedišo, kaonafatšo ya bokgoni bja go sepetša merwalo le phadišano, go fokotša ditshenyegelo tša bao ba romelago ka ntle le bao ba tlišago ka nageng le go oketša bokgoni bja kgwebo – mafelelong go thekga kgolo ya ekonomi, tlhabollo ya diintasteri le tlholo ya mešomo. Kabinete e tiišetša boikgafo bja mmušo bja go mpshafatša infrastraktšha ya merwalo le maemakepe go netefatša lenaneo la tshepedišo ya merwalo ye e tiilego le ya maemo a godimo lefaseng ka bophara.
3. Tlhabollo ya leago le ya batho
3.1. Ditlhahlobo tša Marematlou
3.1.1. Kabinete e amogela go thoma ka thelelo ga Ditlhahlobo tša Marematlou (NSC) tša 2025, moo baithuti ba go feta 900 000 go ralala le naga ba ngwalago. Mananeo ao a beilwego ke Kgoro ya Thuto ya Motheo a netefatša taolo ya go tshepagala le ye e bolokegilego ya ditlhahlobo.
3.1.2. Kabinete e hlohleletša batswadi le bahlokomedi go tšwela pele go thekga barutwana ka nako ye ka go hlola maemo a go fola, a go hloka lešata gore barutwana ba kgone go bala le go bea letšhogo la bona ka fase ga taolo go fihla dipoelo tša mafelelo di lokollwa le ka Pherekgong 2026. Baswa ba ke bona bokamoso bja setšhaba sa rena, gomme ba swanetše go tseba gore re dula re ikgantšha ka bona.
3.2. Bokgoroto sekolong
3.2.1. Kabinete e lemoga ka go tshwenyega, dipego tša moragorago tša ditiragalo tša bokgoroto tšeo di diragetšego dikolong tša go fapafapana. Bokgoroto mo dikolong ke taba ya go hlobaetša kudu; ebile ke maikarabelo a motho yo mongwe le yo mongwe go netefatša gore dikolo tša rena ke mafelo a go bolokega le a go amogelega a go ithuta.
3.2.2. Kabinete e ipiletša go dikolo ka moka gore di tšeele hlogong mabarebare a bokgoroto, dikgaruru le tlhorišo gomme a a nyakišiše. Barutwana ba hlohleletšwa go bega ditiragalo tša bokgoroto le tlhorišo go dihlogo tša dikolo, barutiši, batswadi le bahlokomedi.
3.2.3. Kabinete e tiišetša gape gore dikolo di swanetše go latela Tlhako ya Bosetšhaba ya Polokego ya Sekolo ya Setšhaba, yeo e fago tlhahlo mo go šoganeng le dikgaruru, go akaretša bokgoroto. Go na le tlhokego gape ya gore dikolo di phethagatše Melawana ya Boitshwaro ya Barutwana yeo e akaretšago ditetelo tše di kwagalago tša boitshwaro le ditlamorago tša bokgoroto.
4. Dikamano tša boditšhabatšhaba
4.1.1. Diketelo tša semmušo le go kgatha tema ga boditšhabatšhaba
4.1.2. Mopresidente Cyril Ramaphosa o phethile ketelo ya mmušo ya katlego ya dinaga tše tharo tša Indonesia, Vietnam, Malaysia; le ye nngwe ka Switzerland. Dikopano tše tša boditšhabatšhaba di ikemišeditše go matlafatša dikamano tša magareng ga dinaga ga Afrika Borwa le dinaga tše di šomišanago le yona; kudu ka go katološa kgwebišano, dipeeletšo le tšhomišano ye e logetšwego maano. Ketelo ya semmušo ya dinaga tše tharo go Asia ke karolo ya maiteko a go hloma ditumelelano tša kgwebišano ya go lokologa yeo e tlago hlohleletša maiteko a Afrika Borwa a go fapafapanya mebaraka ya yona.
4.1.3. Kgwebišano ya Selete sa Asia le Afrika Borwa e sa le fase gomme e gare ga dibilione tša ditolara tše 22 le 25. Nakong ya diketelo, dinaga tše tharo di dumelelane ka nyakego ya go oketša kgwebišano le dipeeletšo magareng ga dinaga.
4.1.4. Afrika Borwa e romela ditšweletšwa tša go swana le malahla, dienywa le ditšweletšwa tše dingwe tša temo go dinaga tše dingwe tša Asia, seo se hlolago sebaka sa go katološa kgwebišano le diromelwantle.
4.1.5. Legato la mafelelo la dikopano tše tša boditšhabatšhaba le phethilwe ka ketelo ya mmušo ye e atlegilego go Switzerland. Ketelo ye e matlafaditse dikgokagano tša sepolotiki, tša ekonomi le tša leago gomme ya tšweletša pele tšhomišano ye e holago bobedi ka dikarolong tša kgwebišano le dipeeletšo, tlhabollo ya bokgoni le saense le tšweletšopele.
5. Dikamano tša Afrika Borwa le Türkiye
5.1.1. Ketelo ya mošomo ya Motlatšamopresidente Paul Mashatile ka Türkiye ka Diphalane 2025 e matlafaditše dikamano magareng ga dinaga tše pedi. Ka nako ya ketelo yeo, e bile modulasetulommogo wa tlhomamišo ya Khomišene ya Dinaga tše Pedi (BNC) ya mathomo magareng ga dinaga tše pedi. BNC e ile ya bitšwa go ya ka tumelano ya 2012 yeo e theilego khomišene yeo, yeo e swanetšego go etwa pele mmogo maemomg a Motlatšamopresidente le Letsogo la Mopresidente, ka go latelana.
5.1.2. Dipoledišano di fedile ka moletlo wa go saena ditumelano tše mmalwa, tšeo di akaretšago Pego ya Kopanelo go go Hlongwa ga Khomišene ya Ekonomi le Kgwebo ya Kopanelo (JETCO) le Dimemorantamo tša Kwešišano ka dikarolong tša thuto ya godimo le tlhahlo, gammogo le tirišano malebana le ekonomi ya go ikgetha le dikarolo tše di lokologilego.
6. G20
6.1.1. Kabinete e thabetše gore ditokišetšo tša Afrika Borwa tša go swara Samiti ye e tlago atlega ya Baetapele ba G20 go tloga ka la 22 go ya go la 23 Dibatsela di fihlile maemong a godimo, gomme e na le tshepo ya gore naga ya rena e tla swara samiti ye e atlegilego.
6.1.2. Samiti e letetšwe gore e tla hlohleletša mediro ye megolo ya ekonomi ka go oketša tlhokego ya dithoto, ditirelo, infrastraktšha le dithoto; go hlola mešomo le go godiša letseno la dikgwebo tša mo gae. Go feta moo, dikete tša baemedi ba boditšhabatšhaba, boraditaba le baeti ba tla bontšha kgoketšo ya Afrika Borwa lefaseng ka bophara, go hlohleletša kgolo ya nako ye telele lekaleng la boeti. Bopresidente bja rena bja G20 bo šetše bo matlafatša lekala la boeti la naga, ka dikopano tše 100 go tšwa go tše 132 tša semmušo, tšeo di šetše di swerwe go ralala naga go tloga ka la 1 Dibatsela 2024.
6.1.3. Pele ga kopano ye, Samiti ya Setšhaba ya G20 ye e beakantšwego go tloga ka la 18 go ya go la 20 Dibatsela 2025, go kopanya mantšu a setšhaba go tshepedišo ya go tšea diphetho ya G20, go godiša kopano ya lefase ka bophara, go tšwetša pele tlhabollo ye e akaretšago le go tliša boikano bjo bo bonagatšago dikeletšo le maitemogelo a nnete a badudi.
6.1.4. Afrika Borwa e šomiša Bopresidente bja yona bja G20 go araba ditlhohlo tše di raraganego tšeo lefase le lebanego natšo le go godiša tumelelano ka ditaba tše di fapafapanego. Dipeakanyo tša rena tša mathomo ke go matlafatša maatla a go lwantšha masetlapelo le karabelo, go netefatša go swarelela ga dikoloto tša dinaga tše di golago, go kgobokanya ditšhelete bakeng sa go fetolela go mohlagase wa letšatši le go šomiša diminerale tša bohlokwa bakeng sa kgolo ye e akaretšago.
6.1.5. Re lebeletše go amogela baeti ba rena ba ho hlomphega Kopanong ya Baetapele ba G20 le go fa Bopresidente bja G20 go Amerika.
B. Diphetho tša Kabinete
1. Tlhako ya Ekonomi ya 2025 le Kakanyo ya Letseno
1.1. Kabinete e dumeletše Tlhako ya Ekonomi ya 2025 le Kakanyo ya Letseno gore di išwe Palamenteng. Tlhako ya ekonomi ke karolo ye bohlokwa ya tekanyetšo ya setšhaba ya ngwaga ke ngwaga. Tlhako ya Ekonomi ke ya ngwaga wo o itšego wa ditšhelete gomme e fa maatla pholisi ya ekonomi ye kgolo ya taolo ya bosetšhaba. E akaretša dilo tše ntši, go swana le dikakanyo tša letseno ka moka (tša tekanyetšo le tekanyetšo ye e itšego ya tlaleletšo ya thokwana) leo go letetšwego go kgoboketšwa nakong ya ngwaga wa ditšhelete le dikakanyo tša go adima tšhelete ngwageng woo wa ditšhelete.
1.2. Tona ya Ditšhelete, Enoch Godongwana, o tla tšweletša MTBPS Palamenteng ka la 12 Dibatsela 2025 ka iri ya bobedi mathapama.
2. Afrika Borwa e tšea boetapele bja nakwana bja SADC
2.1. Kabinete e dumeletše kgopelo go tšwa go Mongwalediphethiši wa Setšhaba sa Tlhabollo ya Borwa bja Afrika (SADC), Morena. Elias Mpedi gore Afrika Borwa e tšee boetapele bja nakwana bja SADC ka lebaka la ditiragalo tša sepolotiki tša morago ka Madagascar. Se se akaretša go swara dikopano ka moka tša SADC tšeo di beetšwego go swarwa go tloga ka Dibatsela 2025 gomme Afrika Borwa e letetšwe go tšea maikarabelo a nakwana go fihla ge Samiti e dira sephetho sa semmušo.
2.2. Kgopelo ye e sepelelana le Diathikele tša 9A(2)(b) le 10(4) tša Tumelelano ya SADC tšeo di bolelago gore ge Modulasetulo yo a dulago a ka se kgone go phethagatša mešomo ya gagwe, Modulasetulo yo a tšwelago pele o swanetše go tšea maikarabelo a nakwana go fihla Samiti e tšea sephetho.
3. Pholisi ya Ditirelo tša Tlhabollo ya Setšhaba go Batho ba go Phela ka Bogolofadi
3.1. Pholisi e rometšwe morago go lekolwa gore Tona ya Tlhabollo ya Setšhaba e boledišane le Tona ya Ditšhelete.
4. Pego ya Tšwelopele ya Ngwaga le Ngwaga ya Boseswai (2023 – 2024) ya go phethagatšwa ga Sengwalwa sa Makgoraditsela sa Ditokelo tša Batho bao ba Phelago ka Bogolofadi (WPRPD)
4.1. Kabinete e dumeletše Pego ya Boseswai ya Tšwelopele ya go phethagatšwa ga WPRPD, le dikeletšo tša yona. Pego e bontšha go kgatha tema go tšwa go dikgoro tša mmušo wa profense le wa bosetšhaba nakong ya pego ya 2023 – 2024. E fa ditsebišo ka magato ao a hlomilwego go fediša mapheko a phihlelelo go batho bao ba phelago ka bogolofadi.
4.2. E hlaloša ditiro tša bohlokwa tše di nepišitšwego go fediša mapheko a phihlelelo go batho ba go phela ka bogolofadi. Tšona di akaretša masolo a temošo ya setšhaba, mpshafatšo ya infrastratšha go kaonafatša phihlelelo, ditharollo tša dinamelwa tše di fihlelelegago le mekgwa ya kgokagano yeo e akaretšago. Bonnyane dikgoro tša mmušo tša bosetšhaba tše 30 le diofisi tše tshela tša Tonakgolo di kgathile tema mo pegong, yeo e dumeletšwego go phatlalatšwa kuranteng ya mmušo le go lokollwa go ya setšhabeng ke Kgoro ya Basadi, Baswa le Batho bao ba Phelago ka Bogolofadi. Pego e hwetšagala go www.dwypd.gov.za.
C. Bao ba Thwetšwego Mešomong
Batho ka moka bao ba thwetšwego mešomong mangwalo a bona a thuto a tlo tiišetletšwa le go netefaletšwa ka tsela ye maleba.
1. Morena Livhuwani Tommy Makhonde bjalo ka Molaodimogolokakaretšo mo go Kgoro ya Merero ya Selegae (katološo ya kontraka).
2. Ngaka Mbulelo Nokwequ bjalo ka Mohlankedimogolophethiši wa Institute ya Metrolotši ya Setšhaba ya Afrika Borwa.
3. Morena Mpumelelo Maseko bjalo Molaodimogolo yoo e sego lelokophethiši mo Botong ya Tirišano ya Peeletšo ya Setšhaba.
4. Boto ya Balaodibagolo ba SASRIA
(i) Ngaka Nolwandle Mgoqi-Mbalo (o thwetšwe leboelela);
(ii) Morena Reginal Haman (o thwetšwe leboelela);
(iii) Mohumagadi Margaret Phiri (o thwetšwe leboelela);
(iv) Morena Shafee Verachia;
(v) Mohumagadi Noxolo Abraham;
(vi) Mohumagadi Nomusa Mufamadi;
(vii) Morena Afika Selemane;
(viii) Morena Nkhumeleni Musekwa;
(ix) Mohumagadi Vuyelwa Matsiliza;
(x) Mohumagadi Mmabatho Sukati; le
(xi) Morena Dirkse Kunz
5. Balaodibagolo go Boto ya Mokgatlo wa Dinamelwa tša Tseleng tša go Tshela Mellwane (C-BRTA) (Bjale ka ge go boletšwe pele)
(i) Morena. Randall Howard (Modulasetulo);
(ii) Mohumagadi Loyiso Kula
(iii) Moatbokata. Adila Chowan (o thwetšwe leboelela);
(iv) Mohumagadi. Keitumetse Mahlangu;
(v) Mohumagadi. Yongama Pamla-Dhludhlu;
(vi) Ngaka. Dineo Penelope Mathibedi;
(vii) Mohumagadi. Zandile Kabini; le
(viii) Morena. Dave Jackson Moswane
6. Maloko a Boto ya Tlhabollo ya Intasteri ya Kago
(a) Morena Khulile Nzo; (Modulasetulo);
(b) Prof. Susanna Bouillon (Motlatšamodulasetulo);
(c) Mohumagadi Yvonne Mbane;
(d) Ngaka Karabo Siyila;
(e) Morena Johan van der Walt;
(f) Ngaka Deenadayalen Konar;
(g) Ngaka Julia Petla;
(h) Mohumagadi Thembisa Jimana; le
(i) Ngaka Elizabeth Makgae
D. Ditsebišo tša Kabinete
1. Maano a go šogana le tlhwekišo le tšhilafatšo ya kelelatšhila
1.1. Kabinete e amogetše tshedimošo go tšwa go Kgoro la Meetse le Kelelatšhila (DWS) ka ga maano a lebaka le letelele a go šogana le ditlhohlo tša tlhwekišo le tšhilafatšo ya kelelatšhila tšeo di lebanego le mebasepala.
1.2. Melawana ya Bosetšhaba ya Kgapeletšo ya Ditirelo tša Meetse le Tlhwekišo ye e mpshafaditšwego yeo e gatišitšwego ke DWS ka la 6 Phupu 2025, e šetše e hlotše tikologo ye e kgontšhago phethagatšo ya mananeo a tlhwekišo a go šoma gabotse nageng ka bophara.
1.3. Melawana ye e thibela dikgokagano tše diswa go imetša mešomo ya hlwekišo ya meetse a ditšhila. Se se ra gore mebasepala e ka se dumelela dikgokagano tša tlaleletšo tše dikgolo go meetse goba hlwekišo ya meetse ao a šetšego a le gona goba mananeo a tlhwekišo ya meetse a ditšhila, ka ntle le ge lenaneo leo le na le bokgoni bja go šogana le morwalo wa tlaleletšo.
1.4. Go feta moo, Molaokakanywa wo o Mpshafaditšwego wa Ditirelo tša Meetse o tla fa Tona ya Meetse le Kelelatšhila maatla a phethagatšo ya ditlwaedi le maemo.
E. Ditiragalo tše di tlago
1. Sekhwama sa Lefase sa go Lwantšha AIDS, Bolwetši bja Mafahla le Malaria – Samiti ya Boseswai ya Mpshafatšo
1.1 Kabinete e dumeletše go swarwa ga Samiti ya Boseswai ya Mpshafatšo yeo e tla swarwago ka la 21 Dibatsela 2025 ka Johannesburg. Samiti yeo e swarwago ke Afrika Borwa le United Kingdom ka tirišano le Sekhwama sa Lefase sa go Lwantšha AIDS, Bolwetši bja Mafahla (TB) le Malaria, e tla diragala ka nako ya Samiti ya Baetapele ba G20. Kopano ye ke sebaka sa bohlokwa sa go beakanya boikgafo bja lefase ka bophara le methopo ya go potlakiša twantšho ya go fediša HIV le AIDS, TB le malaria.
1.2 Samiti e tla kgobokanya Dihlogo tša Mebušo le mmušo, mekgatlo ya setšhaba, setšhaba, badirišani ba ba bantši le ba mahlakore a dinaga tše ka bobedile lekala la praebete, go netefatša dipeeletšo tšeo di hlokagalago go katološa mananeo a phološo ya maphelo. Dipoledišano mo samiting di letetšwe go thuša go matlafatša mananeo a maphelo a maatla gape a go swarelela, ao a lego bohlokwa go ageng bokamoso bja go phela gabotse le go bolokega go batho ka moka.
F. Melaetša
1. Matshidiso
Kabinete e iša matshidiso go bagwera le malapa a:
- Naletšana ya radio, Moruti Abel Sello Phiri, yo lentšu la gagwe le ilego la thuša le go hlohleletša meloko ye mentši ka mananeo a gagwe a mathapama go Motsweding FM.
- Kabinete e išitše matshidiso go bagwera le malapa bao ba lahlegetšwego ke baratiwa ba bona ka morago ga dikotsi tše pedi tša ditseleng tše di fetilego ka maphelo a batho ba 15 beke ye. Go thulana ga thekisi le bene ka Bassonia, Gauteng go fetile ka maphelo a šupa mola go thulana go gongwe ga thekisi le lori tseleng ya lephefo ya N3 magareng ga Leporogo la Van Reenen le Montrose ka Freistata go fetile ka maphelo a seswai.
- Tshiamo le Baleseng Moramaga, batswala ba babedi bao ba bolailwego ga sehlogo ka Bohlabela bja Mamelodi. Mogonelelwa wa mengwaga ye 38 yo a swerwego mabapi le polao ye ya go se hlamatsege o tšweletše Kgorotshekong ya Mmasetrata wa Mamelodi la mathomo maabane (Laboraro).
2. Ditebogišo
Kabinete e lebogiša le go lakaletša tše botse go:
- Qhawekazi Mazaleni ka go thopa Phadišano ya Mohumagatšana wa Afrika Borwa wa 2025; gomme e mo lakaletša tše dibotse go maikarabelo a gagwe a maswa.
- Kabinete e tšwetše pele go lebogiša Mopresidente ka go amogela goba abelwa tikrii ya bongaka ya tlhompho yeo a e Abetšwego ke Yunibesithi ya Malaya.
- Melissa Nayimuli ka go thopa sefoka sa Mohumagatšana wa Lefase wa Afrka Borwa gomme o tla emela Afrika Borwa phadišanong ya lefase ya Mohumagatšana wa Lefase ka Thailand.
- Kabinete e lebogišitše Sekolo sa Bosetšhaba sa Mmušo ka go tšweletša ka katlego Sekolo sa Pušo ya Ekonomi sa baetapele ba ditirelo tša setšhaba, ka Nairobi, Kenya, ka tšhomišano le Institute ya Ghana ya Taolo le Taolo ya Setšhaba (GIMPA) le Sekolo sa Mmušo sa Kenya (KSG), go tloga ka la 27-30 Diphalane 2025. Lenaneo le le tsenetšwe ke maloko a palamente, bolaodi bja setšhaba, dihlogo tša dikgoro le dirutegi go tšwa Afrika Borwa, Ghana le Kenya. Lenaneo la Pušo ya Ekonomi le dumeletšwe ke Kabinete ka Phato 2020 gomme le hlamilwe go matlafatša boetapele, nyakišišo le poledišano ya dipholisi mabapi le ditaba tša pušo ya ekonomi maemong a taolophethiši le a bolaodibogolo ka mmušong.
Dipotšišo:
Morena Sandile Nene – Seboleledi Mmušo sa Motšwaoswere
Selefouno: 083 712 2316
