Pego ya Kopano ya Kabinete yeo e Swerwego ka Laboraro la 3 Hlakola 2026, le Kopano ya go Ikgetha ya Kabinete ya Laboraro la 1 Moranang 2026

A. Ditaba tšeo di amago badudi

1. Ekonomi

1.1. SARS e kgoboketša motšhelo wa R2 trilione historing ya yona
1.1.1. Kabinete e retile SARS ka fase ga boetapele bja Mokhomišinare Edward Kieswetter ge e kgonne go kgoboketša motšhelo wa go feta R2 trilione, e lego kgatelopele ye kgolo yeo e fihleletšwego mo nakong ye nnyane e sa le go tloga mola go ilego gwa kgoboketšwa R1 trilione ya motšhelo.
1.1.2. Kgoboketšo ye ya motšhelo yeo e kaonafetšego e thuša bokgoni le go tielela ga ditšhelete ka go fokotša go itshepela ga mmušo go sekoloto gape le go oketša maatla a ditšhelete gore di kgone go thekga tekanyetšo.
1.1.3. Naga ye e buna dienywa tša dikaonafatšo tša kobamelo ya tefelo ya motšhelo le tša mafokodi a tša tshepedišo ka SARS ao a hlotšwego ke go šoma ka thata le go ikgafa, mmogo le kgatelopele yeo e bilego gona ka phethagatšong ya ditšhišinyo tša Khomišene ya Nugent.
1.1.4. Kgoboketšo ya motšhelo wa R2 trilione ke taetšo gape ya kgolo ya ekonomi, yeo ka mokgwa wo e thekgilwego ke mokgwatšhomo wa ekonomi ya lekala la meepo, leo e dutšego e le motheo wa ekonomi ya Afrika Borwa.
1.1.5. Kgatelopele ye e emela kgolo ya ekonomi ye bohlokwa ge e bapetšwa le kgoboketšo ya motšhelo ya R114 bilione ka 1994/1995 le nako yeo SARS e e tšerego go fihlelela kgoboketšo ya motšhelo ya R1 trilione (2018), le mengwaga ye seswai fela ya go kgona go kgoboketša motšhelo wa R2 trilione.

1.2. Khonferense ya Boselela ya Dipeeletšo ya Afrika Borwa e kgonthišiša naga ye bjalo ka lefelo leo le ratwago la go dira dipeeletšo
1.2.1. Naga ye e ile ya swara Khonferense ya Boselela ya Dipeeletšo ya Afrika Borwa (SAIC) ka la 31 Hlakola 2026 ka Johannesburg moo go bilego le dikemedi tša go feta 1000 go tšwa dinageng tše 50 tšeo di tsenetšego Samiti yeo.
1.2.2. Khonferense ya Boselela ya Dipeeletšo ya Afrika Borwa ke seka sa lebaka la bobedi la lesolo la dipeeletšo leo go lona mmušo o nyakago go goketša dipeeletšo tša go feta R2 trilione mo mengwageng ye mehlano yeo e tlago.
1.2.3. Ditshepišo tša dipeeletšo tša go feta R898 bilione tšeo di nago le diprotšeke tše 81 go phatlalala le diprofense ka moka tše senyane (9) di bile taetšo ya ka fao Afrika Borwa e tshepšago ka gona bjalo ka lefelo la dipeeletšo.
1.2.4. Ditshepišo tše tša dipeeletšo di letetšwe go hlola mešomo ya go ya go ile ya go feta 230,000, yeo e thekgago boikgafo bja mmušo bja kgolo ya ekonomi yeo e akaretšago bohle le tlholo ya mešomo.
1.2.5. E sa le go tloga mola e thomago ka 2018, SAIC e atlegile go goketša ditshepišo tša dipeeletšo tša go fihla go R1.56 trilione, tšeo di fetago nepo ya mathomo ya Kantoro ya Mopresidente ka R628 bilione. Go tšwa go ditshepišo tša dipeeletšo tša go fihla go R1.56 trilione, diprotšeke tše 137 tšeo di ka bago R400 bilione di phethilwe, mola diprotšeke tše 84 tšeo di jago R417 bilione di lego gare di agwa.

1.3 Kgolo yeo e tšwelago pele ya GDP e laetša ekonomi yeo e golago
1.3.1 Kabinete e amogetše kgolo ya ekonomi yeo e sa šitišwego ya dikotara tše hlano tša go latelana, yeo e hlotšego gore go be le koketšego ya GDP ka 1.1% bakeng sa 2025, bjale ka ge di lokolotšwe ke StatsSA. Kgolo ye e be e thekgwa gape ke koketšego ya GDP ka 0.4% ka kotareng ya mafelelo ya 2025.
1.3.2 Kgolo ye ya ekonomi ya go kgahliša kudu e sa le go tloga ka 2022, e ile ya hlohleletšwa ke makala a bohlokwa a ditirelo a ditšhelete, borekišadintlo le ditirelo tša kgwebo, kgwebišano, kheitharing, boamogelabaeng le ditirelo tša bomotho tšeo di thekgilwego go ya pele ke dikgathotema tše botse go tšwa go temo le ditirelokakaretšo tša mmušo.

1.4 Sedirišwa sa dikoloto sa Panka ya Boditšhabatšhaba ya Kagoleswa le Tlhabollo se thekga tlhabollo ya infrastraktšha ya bohlokwa
1.4.1 Kabinete e amogetše go hlongwa ga Sedirišwa sa Netefaletšo ya Sekoloto (CGV) sa Panka ya Boditšhabatšhaba ya Kagoleswa le Tlhabollo sa go ja $350 milione (yeo e ka bago R5.6 bilione).
1.4.2 Sedirišwa sa Netefaletšo ya Sekoloto se tla re mathomong sa šetšana le go oketša infrastraktšha ya mohlagase gomme sa re ka moso sa nabišwa gore se aakaretše le diprotšeke tša infrastraktšha ya meetse, borwalathoto ka dinamelwa, ditimela, difofane le dikepe, thuto le maphelo.

1.5 Afrika Borwa e swara LIV Golf ka katlego mmung wa Afrika
1.5.1 Kabinete e thabile gore Afrika Borwa e kgonne gape go laetša bokgoni bja yona bjalo ka lefelo la mmakgonthe la go swara ditiragalo ka go swara LIV Golf, yeo e bilego la mathomo e swarelwa ka Afrika ka Johannesburg, yeo go yona go bego go na le dibapadi tša boditšhabatšhaba tša maemo a godimo mmogo le dibapadi tša ka Afrika Borwa tša ditswerere.
1.5.2 Batho ba go feta 100 000 ba ile ba tsenela tiragalo ye ya maemo a godimo, yeo e tlišitšego dikholego tše kgolo go ekonomi le leago, go balwa le go oketšega ga tša boeti. Go fa mohlala, ba bangwe ba baeti bao ba bego ba tsenetše tiragalo ye ba ile ba oketša nako ya bona ya go eta gore ba kgone go bona tšeo naga ye e nago le tšona ge go etla go tša boeti, go balwa le go ya mašokeng a diphoofolo, mafelong a mabopong, mafelong a go tšweletša beine, le ditoropongkgolo.
1.5.3 Ditiragalo tše dingwe tša LIV Golf di beetšwe go tlo diragala ka 2027 le 2028, le kgonagalo ya go fetela go 2029 le 2030. Dithekethe tša LIV Golf ya ka Afrika Borwa ya 2027 di šetše di thomile go rekišwa.

1.6 Go okobatšwa ga ditlamorago tša Ntwa ya Amerika – Israele – Iran go Afrika Borwa
1.6.1 Kabinete, mmogo le Mopresidente Cyril Ramaphosa ba ile ba ipiletša gore go be le peomarumofase ka Ntweng ya Amerika – Israele – Iran yeo e amago selete sa Bohlabela bja Gare le lefase gampe.
1.6.2 Kabinete e gare e tsebišwa kgafetšakgafetša ka ga kabo ya makhura a dinamelwa ka mo nageng yeo e amilwego ke ntwa yeo e tšwelago pele, gomme e ile ya netefaletšwa gore kabo ya makhura e sa dutše e lekane mo nakong ya gonabjale. Kabinete e ile ya tsebišwa gore Afrika Borwa e itshepetše go Bohlabela bja Gare ka fela ditšweletšwa tšeo di šetšego di hlwekišitšwe.
1.6.3 Mopresidente o hlomile Sehlophatšhomo sa Ditona seo se nago le Tona ya Diminerale le Didirišwa tša Petroliamo (modulasetulo), ya Ditšhelete, ya Dinamelwa, ya Kgwebišano, Intaseteri le Phadišano, ya Dikamano tša Boditšhabatšhaba le Tšhomišano, ya Mohlagase le Enetši, ya Dithokgwa, Boreahlapi le Tikologo, le Kantoro ya Mopresidente go kgokaganya karabelo ya mmušo ka mokgwa wo o tletšego go fokotša seabe go ditheko, makhura le tšhireletšo ya dijo.
1.6.4 Bjalo ka karabelo ya ka pela, Sehlophatšhomo se uile sa eletša gore go fokotšwe motšhelo wa makhura bakeng sa nako ya gabjale go fediša seabe go dikoketšo tša ditheko tša makhura tšeo di dirilwego ka la 1 Moranang 2026.
1.6.5 Re rata go netefaletša Maafrika Borwa gore kabo ya makhura ka mo nageng e sa dutše e itekanetše gomme ditiši tša go tšhela makhura tšeo di se nago makhura gonabjale di dirwa ke mabaka a tshepetšo ya makhura yeo e imelwago ka baka la go rekwa kudu ga makhura ka baka la letšhogo. Maafrika Borwa a eletšwa gore a tlogele go reka makhura ka bontši ka baka la letšhogo.

1.7 Go fiwa laesense ga Postbank go netefatša gore ditirelo tša ditšhelete di fihlelelwa ke ditšhaba
1.7.1 Kabinete e amogela go fiwa laesense ya semmušo ga Postbank bjalo ka Moabi wa Ditirelo tša Ditšhelete (FSP) ke Mokgatlo wa Taolo ya Lekala la Ditšhelete gore e be panka ya mmušo yeo e swarelelago.
1.7.2 Ka laesense ye, Postbank e tlo kgona go katološa ditirelo tša yona tša ditšhelete go tšwetšapele kakaretšo ya bohle ka go tša ditšhelete le go fana ka ditirelo tša ditšhelete tšeo di sa bitšego bakeng sa ditšhaba tšeo di sa akaretšwago ge go etla go tša ditšhelete.
1.7.3 Kabinete e retile kgatelopele yeo e bilego gona ka matlafatšong a bokgoni bja Postbank bjale ka panka ya mmušo.

1.8 Mošomo wa go hwetša ka Moepong wa Diminerale wa Ekapa
1.8.1 Kabinete e filwe tshedimošo mabapi le mošomo wa go hwetša le go ntšha ditopo tša bašomi ba moepo ba bahlano bao e sa lego ba kgakgelwa ka fase ga moepo e sa le go tloga mola go bago le go kgerega ga leraga ka Moepong wa Diminerale wa Ekapa ka Kimberley.
1.8.2 Ditopo ka moka tše hlano di ntšhitšwe ka moepong gomme Kabinete e romela matshediso a yona go malapa, bašomimmogo le baratiwa ba bahu.
1.8.3 Kgoro ya Diminerale le Didirišwa tša Petroliamo e thomile ka dinyakišišo tše di nabilego mabapi le tiragalo ye gore bao ba hlokilego maikarabelo a go hlokomela gore se se direge ba otlwe.

2. Dikaonafatšo tša Ditirelo tša Setšhaba

2.1 Phetošo ya Ditirelo tša Kgwebišano ya Mebasepala ya Setoropo e tlo kaonafatša ditirelo tše bohlokwa ka Mebasepaleng ye megolo ye seswai ya Setoropong
2.1.1 Kabinete e amogetše go tsebagatšwa ga Phetošo ya Ditirelo tša Kgwebišano ya Mebasepala ye megolo ya Setoropong, e lego lesolo la Operation Vulindlela leo le hlamilwego go thuša mebasepala ye seswai ya setoropong ka mo nageng go tsošološa le go matlafatša kabo ya ditirelo tša mohlagase, meetse le kelelatšhila.
2.1.2 Bjalo ka karolo ya lenaneo le, Kgoro ya Matlotlo ya Bosetšhaba e tlo aba R54 bilione ya diputseletšo tšeo di tlo dirwago ge go šongwa ka tshwanelo mo mengwageng ye tshela yeo e tlago, gomme e tla abela mebasepala ya setoropo yeo e laetšago dikaonafalo tše kgolo ge go etla kabong ya ditirelo tše bohlokwa tšhelete.
2.1.3 Go ba le maloka a go hwetša diputseletšo, mebasepala ya setoropo e swanetše e fihlelele dinepo tša mokgwatšhomo tšeo di beilwego ka Maanong a yona a Magato a Kaonafatšo ya Mokgwatšhomo ka ditirelo tše bohlokwa e lego meetse, mohlagase le kelelatšhila.

2.2 Dipoelo tša tlhakišo tša 2024–2025 tša Molao wa Ditšhelete tša Setšhaba (PFMA)
2.2.1 Kabinete e ile ya sekaseka Pegokakaretšo ya Dikgoro tša Bosetšhaba le tša Diprofense, Ditheo tša Setšhaba le Makgotlatheramolao ya Mohlakišipharephare wa Afrika Borwa bakeng sa Dipoelo tša Tlhakišo tša PFMA tša 2024–2025.
2.2.2 Pego ye e bontšha kaonafalo ye nnyane ya dipego tšeo di hlwekilego gomme di se na bosodi tšeo di oketšegilego go tloga go 142 ka 2023–2024 go ya go 151 ka 2024–2025, mola tšhomišo ya mašeleng ka mokgwa wo o sa beelwago goba tshenyo ya mašeleng e fokotšegile kudu go tloga go R3.54 bilione ka 2023–2024 go ya go R1.42 bilione ka 2024–2025.
2.2.3 Kabinete e na le pelaelo mabapi le palo ya ditheo le dikgoro tšeo di palelwago ke go tšwa ka legorong la Dipego tšeo di sa Hlwekago gomme di nago le bosodi gomme di sa phethagatše Maanotiro a go phošolla bosodi. Go fa mohlala, e sa le go tloga ka pego ya 2023-2024, ke fela ditshelomolao tše 38 tšeo di rarolotšwego gomme go ile gwa thibelwa goba gwa bušwa tšhelete yeo e lobilwego ya go fihla go R1.38 bilione.
2.2.4 Maloko a Kabinete a bea leihlo la ntšhotšhonono go phethagatšo ya maanotiro go šogana le ditsholo tša tlhakišo, gomme a thekga magato a Mohlakišipharephare a go dira gore go rwalwe maikarabelo, go be le taolo ya ka gare ya go tšea botse gape le magato a thibelo ao a lego bohlokwa go pušo ye botse le kaonafatšo ya ditirelo.

3 Ntwa Kgahlanong le Bosenyi

3.1 Ntwa kgahlanong le bosenyi e matlafatšwa ke go romelwa ga SANDF go yo thekga SAPS
3.1.1 Kabinete e amogetše go romelwa ga mašole a SANDF a 2 200 ao a tlo šomišanago le SAPS ntweng kgahlanong le meepo yeo e sego molaong le digongwana ka Kapa Bohlabela, Freistata, Gauteng, Leboa Bodikela le ka Kapa Bodikela.
3.1.2 SANDF e tla raloka karolo ya go oketša phethagatšo gomme ya šoma go ya ka melao yeo e hlakilego ya tšhomišano. Go romelwa ga mašole a SANDF go kgauswi le go phethwa.

3.2 Bohwa le ditlwaelo tša rena tša setšo di swanetše di hlompšhe ke bohle, kudu baeti ba rena

3.3 Kabinete e laeditše go se thabišwe ke go bewa setulong ga go se tsebalege ga modudi wa Nigeria bjalo ka kgoši ya Toropokgolo ya KuGompo ka Kapa Bohlabela, gomme e boletše gore se ke dipapadišane tša bana gomme ga di na seabe go tša semolao.

3.4 Kabinete e netefaditše gore go hlongwa, go tsebagatšwa le go šoma ga lekala lefe goba lefe la boetapele bja setšo go laolwa ke Molao wa Boetapele bja Setšo le bja MaKhoi-San, woo o bolelago ka ditshepedišo tšeo di hlakilego ebile di sa hlokego go ngangišwa tša maswanedi a boetapele le go tsebagatšwa.

3.5 Kabinete e amogetše go kgopela tshwarelo ga Khomišenekgolo ya Botseta ya Nigeria mabapi le taba ye gomme ya laela DIRCO go tšwela pele go boledišana le Khomišenekgolo ye mabapi le maitshwaro a go se amogelege a badudi ba go tšwa Nigeria ka Afrika Borwa ao a sa laetšego gore ke baeti.

3.6 Go tloga go belaetša gore dingongorego mabapi le taba ye di hlotše dikgaruru le bosenyi. Kabinete e gopotša badudi gore tokelo ya go gwanta e tla le maikarabelo, le gore e swanetše go phethagatšwa ka khutšo le go latela molao.

4 Tšwetšopele ya Ditokelo tša Botho

4.1 Pušo ya seriti ka pušetšo ya naga
4.1.1 Bjalo ka karolo ya go buša seriti sa batho, Mopresidente Cyril Ramaphosa o ile a bušetša naga ya dihekthara tše 17 000 yeo e tlo holago baholegi bao ba ka bago 2 000 go ditšhaba tša St Paul, Ngunjini, Ndzimankulu/Vierkant le lapa la ga Lawrence ka KwaZulu-Natal.
4.1.2 Motlatšapresidente Paul Mashatile o ile a bušetša naga ya dihekthara tše 627 le mangwalo a bongnaga go Schulk Marhiqa Communal Property Association moo go tlo holegago malapa a 18 le baholegi ba 86 ka Mmasepaleng wa Selegae wa Govan Mbeki ka Mpumalanga.
4.1.3 Go tloga ka 1995 go fihla ka Hlakola 2025, go bile le dikgopelo tša pušetšo ya naga tše 83,205 tšeo di rarolotšwego, gomme se se dirile gore go be le pušetšo ya naga ya dihekthara tše dimilione tše 3.9 go ya ditšhabeng le bathong. Mmušo o beeleditše R58 bilione ya go reka naga, ya thušo mmogo le phumolameokgo yeo thekgilego baholegi ba 376,976 nageng ka bophara. Godimo ga moo, naga ya dihekthara tše dimilione tše 5.3 e šetše e bušeditšwe go beng e sa le go tloga ka 1995, gomme mmušo o matlafaditše thekgo ya ka morago ga pušetšo, tshwarelelo ya temo yeo e kaonafetšego mmogo le phihlelelo ya mebaraka yeo e oketšegilego.

4.2 Seriti le ditokelo tša MaKhoi-San di tiišeleditšwe leswa
4.2.1 Kabinete e amogetše go bolokwa leswa ga mašaledi a 63 a batho ba MaKhoiSan go la Kinderlê Monument, Steinkopf, ka Profenseng ya Kapa Leboa. Mašaledi a ke sehlopha se sennyane sa diketekete tša mašaledi ao a tlošitšwego e se ka molao a batho ba mathomo ba ka mo nageng go ya mafelelong a bo-1800 le mathomong a bo-1900 go ya dimusiamong ka Yuropa.
4.2.2 Polokoleswa ye ke karolo ya pušetšo ya ditokelo le seriti sa batho ba MaKhoi-San le segopotšo sa bošoro bja pušo ya bokoloneale le ya kgethologanyo tšeo di bego di swara Maafrika o kare ga se batho gape le go ba dira diphoofolo tša dibapadišwa le go thabiša. Dipolokoleswa tše ke boikgafo bja mmušo bja go hlompha bao ba neetšego ka maphelo a bona e le ge ba lwela seriti le tokologo.
4.2.3 Dipolokoleswa tše di direga ka nako ye tee le phihlelelo ye nngwe gape ya go akaretšwa ga maina a setšo a MaKhoi-San ka lenaneong la mongwalo la Kgoro ya Merero ya Selegae, e lego kgato ye bohlokwa ya go tsošološa seriti sa batho. La mathomothomo historing ya Afrika Borwa, disetifikeiti tša matswalo, Dikarata tša Boitsebišo le diphasepote bjale di tlo lemoga semmušo le ngwala maina a setšo a MaKhoi-San go latela go kaonafatšwa ga mananeo a IT ka Kgorong ya Merero ya Selegae.

B. Diphetho tša Kabinete

1. Pholisi ye e Mpshafaditšwego ya Tshedimošo ya mabapi le Tšhireletšo ya Badudi, Bafaladi le Bafaladi bao ba Tšhabilego Dintwa Gabobona (CIPR)
1.1 Kabinete e dumeletše Pholisi ye e Mpshafaditšwego ya Tshedimošo ya mabapi le CIPR gore e phethagatšwe. Pholisi ye e tsebagatša phetošo ka botlalo ye bohlokwa ya tlhako ya Afrika Borwa ya mabapi le bofaladi le bodudi. Go latela tumelelo ka Kabinete ka Moranang 2024, Kgoro ya Merero ya Selegae e phatlaladitše Sethalwa sa Pholisi ye e Mpshafaditšwego ka la 12 Manthole 2025 go akaretša ditlapele tša Mmušo wa Botee bja Bosetšhaba.
1.2 Pholisi ye e nyaka go kopanya Molao wa Bodudi wa Afrika Borwa, Molao wa Bofaladi le Molao wa Bafaladi bao ba Tšhabilego Dintwa Dinageng tša Bobona gore e be molao o tee go tloša dithulano tša semolao tšeo di lego gona. Dikaonafatšo tše bohlokwa di akaretša go kopanywa ga dikeletšo go tšwa pegong ya Operation Vulindlela mabapi le diphetošo tša pholisi ya divisa; tlhakišo ya tlaleletšo le tlhalošo ka botlalo go matlafatša phethagatšo ya dipholisi tša bofaladi le bodudi, le tsinkelo ye kgolo go phetošo ya titšithale.
1.3 Pholisi yeo e Mpshafaditšwego ye e nepile go netefatša gore go ba le tsela ya sebjalebjale ya go tšea gabotse ge go etla go bodudi, bofaladi le tšhireletšo ya bafaladi bao ba tšhabilego dintwa gabobona. E thekga dinepo tša tlhabollo ya bosetšhaba le tšhireletšo ya naga go balwa le kokwane ya Naga ya Mathomo yeo e Bolokegilego, yeo e hlohleletšago bafaladi bao ba tšhabilego dintwa gabobona go nyaka tšhireletšo ka nageng ya mathomo yeo ba fihlago go yona yeo e tšewago go ba yeo e bolokegilego.
1.4 Pholisi ye e dumelela dikgoro tša mmušo tša maleba go kgetha mešomo ya matsogo le ya seprofešene yeo e beetšwego Maafrika Borwa fela gore go phethagatšwe karolo ya 22 ya molaotheo. Go kgethwa mo, moo go dirwago ke dikgoro tša maleba, go swanetše go ele hloko tokelo ya bafaladi bao ba tšhabilego gabobona ka baka la dithulano go nyaka mošomo gore ba kgone go iphediša go šireletša seriti sa bona.

2. Pego ya diphatišišo ya mabapi le phetogo ya klaemete go batho bao ba phelago ka bogolofadi
2.1 Kabinete e dumeletše Pego ya Diphatišišo mabapi le Seabe sa Phetogo ya Klaemete go Batho bao ba Phelago ka Bogolofadi le go phatlalatšwa ga yona.
2.2 Nepo ya Pego ye ke go netefatša gore magato ka moka a klaemete, go fokotšwa ga seabe le maano a go kgona go sepela le mabaka di akaretša le batho ba go phela ka bogolofadi.
2.3 Nyakišišo ye e laetša tlhaelelo ye kgolo ka magatong a go šireletša batho ba go phela ka bogolofadi nakong ya ditiragalo tša masetlapelo.
2.4 Ditšhišinyo tše bohlokwa di akaretša go sepelelantšha dikarabelo tša phetogo ya klaemete le taolo ya masetlapelo go batho ka moka ba go phela ka bogolofadi; go aba kgokagano yeo e fihlelelegago ebile e lego maleba go karabelo ya masetlapelo; go bea pele basadi le basetsana bao ba phelago ka bogolofadi mmogo le batšofadi bao ba phelago ka bogolofadi ka peakanyetšong ya phetogo ya klaemete; go oketša kgathotema ya batho ba go phela ka bogolofadi ka tlhabollong ya dipholisi tša phetogo ya klaemete le ka ditshepedišong tša phethagatšo; le go matlafatša go akaretšwa ga batho ba go phela ka bogolofadi ka tlhamong le tlhabollong ya dipholisi tša phetogo ya klaemete ka mo nageng.

3. Pego mabapi le go bitšwa ga mmušo wa bosetšhaba go tlo rarolla mathata ka Mmasepaleng wa Selegae wa Ditsobotla
3.1 Kabinete e ile ya tsebišwa ka kgatelopele yeo e lego gona ge go etla phethagatšong ya tharollo ka mmušo wa bosetšhaba Mmasepaleng wa Selegae wa Ditsobotla. Kabinete e netefaditše go thwalwa ga baemedi ba Kabinete, le Mabakatšhupetšo ao a dumeletšwego bakeng sa tharolo ka mmušo wa bosetšhaba.
3.2 Kgatelopele yeo e lego gona ka tharollong e akaretša:
3.2.1 Tatelomolao ya go thwalwa ga Mmeyara, Sepikara, le tatelomolao ya dikomiti tša Karolo ya 79/80 e phethilwe, mola tekolo ya semolao e le gare e dirwa go tatelomolao ya go thwalwa ga Molaodi wa Mmasepala.
3.2.2 Tumelelo ya Leano la Tsošološo ya Ditšhelete ka Tona ya Ditšhelete e gare e šogwa ke Lekgotla.
3.2.3 Go tlaleletša moo, go netefatša gore go ba le tšwelopele ya ditirelo tša motheo, tumelelano ya ditirelo tša meetse le kelelatšhila e phethilwe le Mmasepala wa Selete wa Ngaka Modiri Molema, gomme le maano a kgwebo ao a amanago le yona ašetše a phethilwe. Bjalo ka karolo ya tharollo ya taolo ya masetlapelo go latela masetlapelo ao a bilego gona magareng ga Dibatsela 2024 le Dibokwane 2025, dintlo tše 95 go tše 239 tša nakwana tšeo di bego di beakantšwe go tlo agwa di agilwe.
3.2.4 COGTA ya bosetšhaba e phethile tebeleleswa ya infrastraktšha ya ICT mmasepala wo go thekga tsošološo ya kabo ya infrastraktšha le ditirelo. Kgoro ya Dithokgwa, Boreahlapi le Tikologo e thwetše moabaditirelo go thuša ka go hlama Leano leo le Kopantšwego la Taolo ya Ditlakala, mola Kgoro ya Mešomo ya Setšhaba ya profense e tlišitše dilori tše pedi go thekga go rwalwa ga ditlakala mafelong a go tšhollela ditlakala ao a sego molaong ao a hlaotšwego.
3.3 Dipoledišano magareng ga mmasepala le Eskom di šetše di gatetše pele go phetha tumelelano yeo e nepilego go šogana le ditlhohlo tša kabo ya mohlagase. Dikgoro tša legoro la JCPS di tšwela pele go thekga ka tša bohlodi, thibelo ya bosenyi, go sekišwa ga basenyi le ditharollo tša taolo ya tšhireletšo. Tona ya Pušotirišano le Merero ya Setšo le ya Ditšhelete ba tšwela pele go tla ka thekgo ya togamaano le tshepedišo ka ditharollong.

4. Leano leo le sa Thadilwego la Bosetšhaba la Tlhabollo ya Maemafofane (NADP)
4.1 Kabinete e dumeletše go phatlalatšwa ga NADP yeo e sa thadilwego gore setšhaba se fane ka ditshwayatshwayo go yona. NADP ke tlhako ya peakanyo ya bosetšhaba yeo e hlamilwego ke Kgoro ya Dinamelwa go hlahla tlhabollo yeo e kgokagantšwego, go oketšwa gape le tshwarelelo ya nako ye telele ya mararankodi a maemafofane a a ka Afrika Borwa. Yona e tla ka tsela ya togamaano, ya go phatlalala le lekala ge go etla peakanyong ya infrastraktšha ya maemafofane, e netefatša tshepelelano le Kgoro ya Dinamelwa ya bosetšhaba, ekonomi le ditlapele tša tlhabollo ya mafelo a go amana le maemafofane.
4.2 NADP e tla netefatša gore tlhabollo ya maemafofane e a beakanywa, e laolwa ke nyakego ebile e kopantšwe, go thibela koketšo yeo e sa kgokaganago, mola e le gare e šomiša ka botlalo letseno la leago le ekonomi go tšwa go infrastraktšha ya difofane.
4.3 Morago ga moo, NADP e tla hlama mararankodi a togamanno ao a kopantšwego a maemafofane go thekga kgolo ya ekonomi, thwalo ya merwalo, boeti le tlholo ya mešomo. Yona e tla hlahla le go thekga peakanyokakaretšo ya mararankodi le tlhabollo ya maemafofane ka bjo tee ka bjo tee ao a kopantšwego ka gare ga tšhomišo ya lefelo la boemafofane ka bophara. Maloko a setšhaba a hlohleletšwa go romela ditshwayatshwayo tša ona tšeo di ngwadilwego mabapi le leano leo le phatlaladitšwego go www.transport.gov.za.

5. Leanolegolo leo le sa Thadilwego la Ditimela la Bosetšhaba (NRMP)
5.1 Kabinete e dumeletše go phatlalatšwa ga NRMP yeo e sa thadilwego gore setšhaba se fane ka ditshwayatshwayo go yona. NRMP ke leano la togamaano la nako ye telele leo le hlametšwego go hlahla mpshafatšo, koketšo le go fetolela sebjalebjaleng ga mananeo a ditimela a Afrika Borwa.
5.2 Leanolegolo le le nepile go fetolela Pholisi ya Bosetšhaba ya Ditimela, yeo e dumeletšwego ke Kabinete ka 2022, go ba peeletšo yeo e dirwago legato ka legato ebile e le leano la phethagatšo bakeng sa ditimela tša merwalo le tša batho mo mengwageng ye mentši yeo e tlago. Yona e nepile go hlama lenaneo leo le fihlelegago ka ditheko, leo le kgonago go phadišana ka go kopantšha ditimela tša batho, tša merwalo le tša lebelo la godimo, mola e le gare e hlohleletša kgathotema ka lekala la praebete.
5.3 Lenaneo la ditimela la Afrika Borwa le itemogetše mengwaga ya go hloka dipeeletšo, go theoga ga mokgwatšhomo wa lona, bohodu, go senywa le mafokodi a tshepedišo, gomme tšeo ka moka di dirile gore go be le pitlagano ya sephethephethe ditseleng, ditshenyagalelo tša godimo tša thwalo ya merwalo, le go phadišano yeo e fokotšegilego ka ekonoming. NRMP e arabela go ditlhohlo tše ka go bea ditimela maemong a go ba motheo wa lenaneo la bosetšhaba la dinamelwa, e thekga kgolo ya ekonomi, tlholo ya mešomo le dinepo tša klaemete.

6. Pholisi yeo e sa Thadilwego ya Tlhabollo le Mpshafatšo ya Ekonomi ya Makeišene le Metsemagae
6.1 Kabinete e dumeletše go phatlalatšwa ga Pholisi yeo e sa Thadilwego ya Tlhabollo le Mpshafatšo ya Ekonomi ya Makeišene le Metsemagae gore setšhaba se swayeswaye ka yona. Pholisi ye e hlametšwe go fetoša diekonomi tša selegae go tloga go ba bareki fela go ya go tša go tsweletša ebile tša mafolofolo ka go di tsenya ka ekonoming ye kgolo. Yona e nepile go tšwetšapele boipereki bjo bo swarelelago, go hlola mešomo le go fokotša bohloki ka thekgo yeo e lebanego thwii ebile e kgokagantšwego.
6.2 Pholisi ye e itheile go dikarolo tše ntši tše bohlokwa, e lego (i) tlhabollo ya baipereki ba nako ye telele ba makeišeneng le dinagamagaeng; (ii) go hlahla tlhabollo ya tsela ya dilo tša tlhago yeo e kgokagantšwego ka maleba ebile e kopanego; (iii) go oketša phihlelelo ya menyetla ya ekonomi le mebaraka; le (iv) go fokotša mapheko a peomolao ao a šitišago kgolo ya ekonomi ya makeišene le dinagamagae.

7. Pholisi yeo e sa Thadilwego ya Mahlale a Sekhomphutha (AI)
7.1 Kabinete e dumeletše go phatlalatšwa ga Pholisi yeo e sa thadilwego ya AI ya Afrika Borwa gore setšhaba se e swayaswaye. Nepo ya pholisi ya AI ke go netefatša gore dikholego le dikotsi tšeo di tlišwago ke AI di phatlalatšwa ka go lekana setšhabeng le melokong ya go fapafapana. Pholisi ya AI e nepile go matlafatša bokgoni bja mmušo bja go laola le go šomiša AI ka maikarabelo mola e le gare e hlohleletša bohlami ka nageng, e thekga tlholo ya mešomo ebile e kaonafatša phihlelelo ya mabokgoni a AI.
7.2 Pholisi ye e bopilwe ka dikokwane tše tshela tšeo di nepilego go tšwetšapele tlhabollo ka maikarabelo le tšhomišo ka tshwanelo. Dikokwanekgolo tše ke (i) tlhabollo ya bokgoni le talente, (ii) AI bakeng sa kgolo yeo e akaretšago bohle le tlholo ya mešomo, (iii) pušo ya maikarabelo, (iv) AI ya go šoma ka mekgwa ye mebotse ebile yeo e akaretšago, (v) go lotwa ga setšo le kopantšho ka go tša boditšhabatšhaba, le (vi) tšhomišo yeo e nepilego go batho. Pholisi ye e lemoga gore mokgwa wo o phethagatšwago ka magato o swanetše o šomišwe, ka ge tšhomišo ya AI le dikotsi tša yona di fapana go kgabaganya makala.

8. Leano la Bosetšhaba la Boipereki (NES) le Leano la Phethagatšo
8.1 Kabinete e dumeletše NES le Leano la yona la Phethagatšo. Leano le lenepile go matlafatša Dikgwebo tše Nnyane le tša Magareng (di-MSME) le go šogana le tlhokego ya mešomo go baswa. Yona e itheile ka dikokwane tše hlano: (i) Go kaonafatša thuto ka boipereki le tlhabollo ya mabokgoni, (ii) Go nolofatša kabelano ya theknolotši le bohlami, (iii) Go kaonafatša phihlelelo ya ditšhelete le mebaraka, (iv) kaonafatšo ya peomelao, le (v) Go tšwetšapele temogo le go kopana. Go latela tshepedišo ye e tseneletšego ya ditherišano le setšhaba, NES e hlaloša magato a go tšwetšapele setlwaedi sa boipereki ka Afrika Borwa ka go hlola tikologo yeo e kgontšhago ditiro tša boipereki, le mekgwa ya thekgo yeo ka yona di-MSME di ka swarelelago ka katlego ka gona.
8.2 NES e tlo ba senotlelo sa go notlolla bokgoni bja di-MSME, go hlohleletša kgolo ya GDP, go hlola mešomo le go netefatša gore go ba le tlhabollo ya ekonomi yeo e akaretšago bohle. Go tlaleletša seo, leano le le nepile go kgokaganya tikologo ya tlhabollo ya boipereki ka mo nageng, go balwa le dikeletšo bakeng sa boipereki gore di akaretšwe ka mananeongthuto a dikgoro tša Thuto ya Motheo le ya Godimo bjalo ka kgetho ya mošomo yeo e swarelelago.

9. Tlhako ya Pholisi ya Ditirelo tša Tlhabollo ya Kgakollo le Dikgwebo (IBDS)
9.1 Kabinete e dumeletše Tlhako ya Pholisi ya IBDS gore e phethagatšwe. Tlhako ye ya pholisi e dumelela phetošo ya melao bakeng sa tikologo ya dikgwebo tše nnyane ka go hlakiša dikarolo tšeo di bapalwago ke batšeakarolo ba go fapafapana le go tšwetšapele thekgo yeo e kgokaganego ebile e kopantšwego.
9.2 Tlhako ya Pholisi ya IBDS ke karolo ye bohlokwa ya Leanolegolo leo le Kopantšwego la Bosetšhaba la Tlhabollo ya Dikgwebo tše Nnyane, leo le šomago bjalo ka tlhako yeo e hlahlago bakeng sa batšeakarolo ka moka bao ba kgathago tema ka potlakišong ya kgolo ya di-MSME ka mananeo, ditšweletšwa le ditirelo tšeo di kalegago.
9.3 Dinepo tše bohlokwa di karetša kaonafatšo ya boleng le melao ya ditirelo tša tlhabollo ya dikgwebo, go netefatša gore go ba le phihlelelo ye kaone ya thekgo bakeng sa di-MSME, kudu ka makeišeneng le dinagamagaeng, le go tšwetšapele bohlami le boipereki bjalo ka dilo tša motheo tšeo di sepetšago tlholo ya mešomo le kgolo yeo e akaretšago bohle, go ya le ka Leano la Bosetšhaba la Tlhabollo.

C. Melaokakanywa

1. Molaokakanywaphetošwa wa Thibelo ya Go Rakwa Lefelong la Bodulo e se ka Semolao le Go Ikgethela Madulo e se ka Semolao (PIE)
1.1 Kabinete e dumeletše go phatlalatšwa ga Molaokakanywaphetošwa wa PIE ka Kuranteng ya Mmušo gore setšhaba se swayeswaye ka wona.
1.2 Molaokakanywa wo o nepile go fetoša Molao wa PIE wa 1998 go thibela go šwahlelwa ga naga, go šireletša bengmafelo a bodulo, le go fokotša ditiro tšeo di beakantšwego tša digongwana tša go šwahlela naga.
1.3 Ditšhišinyo tše bohlokwa di akaretša go dira tlhohleletšo ya go šwahlela naga gore e tšewe bjalo ka bosenyi, gomme se se oketša dinyakwa tšeo di elwago hloko ke dikgorotsheko ge di ntšha ditaelo, le go matlafatša melawana ya mabapi le go hwetša madulo a mangwe. Diphetošo tše di tšwela pele di nyaka go šogana le ditlhalošo tša go thulana ka Molaong wa gonabjale, tšeo di dirago gore go se be le bonnete ge go etla ditlhalošong le dinyakweng tšeo di swanetšego di latelwe ge go rakwa motho ka semolao le ge go na le mabaka a batho bao ba dulago e se ka semolao.

2. Molaokakanywa wa Lekgotla la Bosetšhaba la Tlhabollo ya Ekonomi (NEDLAC)
2.1 Kabinete e dumeletše go romelwa ga Molaokakanywa wa NEDLAC palamenteng gore o yo šogwa go ya pele. Molaokakanywa wo, woo o sa thadilwego, o tlo phumola Molao wa NEDLAC (Molao wa bo-35) wa 1994 gomme o šišinya tshepelelano ya dithulaganyo tša lekala tša NEDLAC go diphetogo ka tshepedišong ya semolao le semolaotheo tšeo di bilego gona e sa le go tloga ka 1994.
2.2 Molaokakanywa wo o sa thadilwego wo o fa gape tumelelo go Tona go tla ka melawana ya magomo a tumelelo le boleloko ka tshepedišo yeo e akaretšago ditherišano le dikakanyo tša setšhaba, gomme se se dira gore lenaneo le le šome phatlalatša. Molaokakanywa wo o matlafatša kgathotema ya setšhaba ka NEDLAC le go phethagatša bjalo ka lekala la poledišano ye bohlokwa ya leago seo se nepilego go tšwetšapele kgolo ya ekonomi, tlholo ya mešomo, kakaretšo ka go tša leago le tekatekano ya leago.

3. Molaokakanywaphetošwa wa Melao ya Kakaretšo (Wa Kgahlanong le go Sepetša Tšhelete ka Bofora le go Lwa le Thekgo ya Mašeleng go tša Botšhošetši) wa 2026
3.1 Kabinete e dumeletše go tsebagatšwa ga Molaokakanywa wo Palamenteng. Molaokakanywa wo o sa thadilwego wa 2026 o itheile go dikgatišo tša peleng tša Molaokakanywaphetošwa wa Melao ya Kakaretšo (Wa Kgahlanong le go Sepetša Tšhelete ka Bofora le go Lwa le Thekgo ya Mašeleng go tša Botšhošetši) gomme e sa le go tloga ka yona nako yeo, Kgoro ya Matlotlo ya Bosetšhaba e okeditše ditšhišinyo go akaretša magato a tlaleletšo a go amana le go matlafatša tlhako ya semolao go lwa le tshepetšo ya tšhelete ka bofora le go thekga tša botšhošetši ka mašeleng.
3.2 Molaokakanywa wo o fetoša Melao yeo e lego gona gonabjale e lego (i) Molao wa Senthara wa tša Mahlale go tša Ditšhelete wa 2001 (Molao wa bo-38 wa 2001); (ii) Molao wa Mekgatlo yeo e sa Šomelego Letseno wa 1997 (Molao wa bo-71 wa 1997); (iii) Molao wa Taolo ya Thoto ya Theresete wa 1988 (Molao wa bo-57 wa 1998); (iv) Molao wa Dikhamphani wa 2008 (Molao wa bo-71 wa 2008) le (v) Molao wa Taolo ya Lekala la Ditšhelete wa 2017 (Molao wa bosenyane wa 2017).
3.3 Diphetošo tše di nepile go matlafatša lenaneo la Kgahlanong le Tshepetšo ya Tšhelete ka Bofora le go Fenya Thekgo ya tša Botšhošetši ka Ditšhelete go lebeletšwe Tekolo ya Tumelelano ya Sehlophatšhomo sa Ditšhelete yeo e beetšwego go tlo thoma gare ga 2026 gomme ya phethwa ka Dipjhalane 2027.

4. Molaokakanywa wo o Šireleditšwego wa Kutollo wa 2026
4.1 Kabinete e dumeletše go phatlalatšwa ga Molaokakanywa wo o sa thadilwego wo o Šireleditšwego wa Kutollo (Molaokakanywa wa Tšhireletšo ya Bahlabamokgoši) gore setšhaba se swayeswaye ka wona. Molaokakanywa wo ke karolo ya diphetošo tša melao yeo e nepilego go matlafatša tšhireletšo ya bahlabamokgoši ka diphetošo go Molao wa gonabjale wo o Šireleditšwego wa Kutollo wa 9 Molao wa 26 wa 2000). O arabela gape le go dikeletšo go tšwa go Pego ya Khomišene ya go Gogwa ga Mmušo ka Nko yeo e ipileditšego gore go šireletšwe bahlami ba dipholisi le bahlabamokgoši.
4.2 Molaokakanywa wo o na le ditšhišinyo tša go dira gore go itefeletša go bahlabamokgoši go tšewe bjalo ka bosenyi gape le go fa bahlabamokgoši thekgo ya thobamatswalo, semolao le ditšhelete. Molaokakanywa o tla katološa tlhalošo ya “mohlabamokgoši” go akaretša borakontraka, barerišani, le maloko a setšhaba gomme e tla tla ka ditshepedišo tše di hlakilego tša go kgona go bega ka sephiring.

5. Molaokakanywaphetošwa wa Dikgokagano tša Elektroniki (ECA) wa 2026
5.1 Kabinete e dumeletše go romelwa ga Molaokakanywa wa ECA Palamenteng. Nepo ya Molaokakanywa wo ke go fetoša Molao wa Dikgokagano tša Elektroniki wa 2005. Maikemišetšo a diphetošo tšeo di šišintšwego ke go oketša maemo a phenkgišano ka lekaleng la dikgokagano tša kgole le go fokotša ditheko. Diphetošo ka Molaong wa Dikgokagano tša Elektroniki di nepile gape go hlola tikologo yeo e kgontšhago dipeeletšo ka šedi ye kgolo go taba ya go fokotša mapheko a melao ya go tsena go kaonafatša phenkgišano gape le go dumelela Taolo ya Dikgokagano yeo e Ikemego ya Afrika Borwa gore e be le sebaka sa go laola lekala le.

6. Molaokakanywa wa Maitshwaro a Makala a Ditšhelete (COFI)
6.1 Kabinete e dumeletše go romelwa ga Molaokakanywa wa COFI wa 2025 Palamenteng. Maikemišetšo a Molaokakanywa wo ke go hlola tlhako yeo e tletšego ye tee ya go laola maitshwaro a makala ka moka a ditšhelete ka mmarakeng. Se ke karolo ya nepo yeo e nabilego ya mmušo ya go fetoša taolo ya ditšhelete go ya mmotlolong wa Twin Peaks. Mmotlolo wa Twin Peaks ke lenaneo la taolo leo le aroganyago kokamelo ya ditšhelete go ba makala a mabedi ao a sa swanego: Lekala la Taolo la Tlhokomelo bakeng sa polokego le go phethagala, le Lekala la Taolo la Maitshwaro a Lekala la Ditšhelete bakeng sa maitshwaro ka mmarakeng le tšhireletšo ya badiriši. Lenaneo le le hlola lekala leo le “bolokegilego” leo le šomago ka dikgahlegelong tša badiriši ka moka.
6.2 Molaokakanywa wo o tlo netefatša gore go ba le tshwaro ye botse ya badiriši, o tlo kaonafatša phetošo, le go tšwetšapele tielelo. Wona o tšwela pele go thekga phetošo ya lekala la ditšhelete gomme o nyaka gore ditheo tša ditšhelete di be le dipholisi gore di latele Molao wa Maitshwaro wa Lekala la Ditšhelete. Se sengwe gape, Molaokakanywa wo o thekga tlhabollo ya mebaraka le phenkgišano ka go kgontšha tsela yeo e fapanego ya go aba dilaesense tša go šoma go hlohleletša go tsena lekaleng ga batšeakarolo ba baswa bjalo ka theknolotši ya ditšhelete.

D. Bao ba thwetšwego mešomong
Batho ka moka bao ba thwetšwego mešomong mangwalo a bona a thuto a tla kgonthišišwa le go tiišeletšwa ka mekgwa ya maleba.

1. Morena Bareng B. Mthimkulu bjalo ka Mongwaledi wa Sešole ka Kgorong ya Sešole.

2. Mohumagadi Nomfundo Clementine Tshabalala bjalo ka Molaodipharephare ka Kgorong ya Dithokgwa, Boreahlapi le Tikologo (go oketšwa ga kontraka).

3. Morena Xolile Adviser Brukwe bjalo ka Motlatšamolaodipharephare wa Ditirelo tša Thekgo ya Kgwebo ka Kgorong ya Tlhabollo ya Leago.

4. Morena Sibusiso Attwell Makhanya bjalo ka Mohlankedimogolophethiši wa Mokgatlo wa Meetse wa Phongola-Umzimkulu.

5. Mohumagadi Lucia Lungelwa Sigasana bjalo ka Molaodiphethiši wa Selete ka Seleteng sa Kapa Bodikela ka go Mokgatlo wa Tšhireletšo ya Leago ya Afrika Borwa (SASSA).

6. Go thwalwa ga Balaodi botong ya Khamphani ya Maemafofane ya Afrika Borwa
i. Morena Irvin Phenyane (Modulasetulo);
ii. Mohumagadi Eunice Xoliswa Daku (Motlatšamodulasetulo);
iii. Mohumagadi Keitumetse Stella Mahlangu;
iv. Morena Surendra Sooklal;
v. Morena Kurt Frayne Parker;
vi. Mohumagadi Ulandi Exner;
vii. Morena Patric Roy Mnisi; le
viii. Morena Theunis Chamberlain

7. Maloko a Lekala la Taolo la iSimangaliso Wetland Park
i. Mohumagadi Memory Thulile Sosibo (Modulasetulo le go thwalwa leswa);
ii. Morena Bongani Mzwakhe Mhlongo (o thwetšwe leswa);
iii. Mohumagadi Nombuso Mlambo (o thwetšwe leswa);
iv. Morena Sifiso Mdluli;
v. Ngaka Kailen Padayachee;
vi. Mohumagadi Jacolette Adam;
vii. Mohumagadi Hazel Thulisile Xulu;
viii. Mohumagadi Zamekile Coreen Zama; le
ix. Morena Boy Daniel Ngobeni (o thwetšwe leswa).

E. Ditiragalo tšeo di sa tlago

1. Kgwedi ya Tokologo
1.1 Afrika Borwa e keteka Kgwedi ya Tokologo ka Moranang 2026 ka boikgantšho bja bosetšhaba bjo bo mpshafaditšwego, gomme e le seka sa mengwaga ye 32 e sa le go tloga mola mmušo wa kgethollo o felago gomme gwa tsenwa mmušong wa temokrasi wo o ikemetšego.
1.2 Meketeko ya ngwaga wo e bohlokwa kudu ka ge re keteka Mengwaga ye 30 ya Molaotheo wa Repabliki ya Afrika Borwa, e lego tokumente ya diphetošo yeo e re hlahlilego leetong la rena la temokrasi go aga setšhaba seo se itheilego go toka le taketekano.
1.3 Kgwedi ya Tokologo e fa sebaka go modudi yo mongwe le yo mongwe go tšwetšapele ditokelo le maikarabelo ao a ngwadilwego ka gare ga Molaotheo wa rena ka go tšwetšapele kopano ye kgolo ya batho le phetošo yeo e tšwelago pele ya setšhaba sa gaborena.

2. Raloka karolo ya gago gomme o ingwadišetše go kgetha: Ingwadišetše go Kgetha
2.1.1 Khomišene yeo e Ikemetšego ya Dikgetho e beile Mokibelo wa la 20 le Lamorena la 21 Phupu 2026 bjalo ka mafelelo a beke a boingwadišo bja bakgethi.
2.1.2 Kabinete e hlohleletša Maafrika Borwa ao a nago le maloka a go kgetha go ingwadišetša go kgetha ka dikgethong tšeo di tlago tša mmušo wa selegae.
2.1.3 O na le maloka a go kgetha ge eba o le Modudi wa Afrika Borwa wa mengwaga ye 18 go ya godimo gomme ebile o na le pukwana ya boitsebišo, karata ya boitsebišo goba setifikeiti sa boitsebišo sa nakwana.
2.1.4 Bakgethi bao ba nago le maloka ba ka ingwadiša goba ba mpshafatša tshedimošo ya bona phothaleng ya semmušo ya IEC go https://registertovote.elections.org.za yeo e lego gona bošego le mosegare.
2.1.5 Badudi ba eletšwa go tšwela pele ba ntšhitše mahlo dinameng le go efoga go kgotla dilinki tša go belaetša goba go etela diwepsaete tša bofora tšeo di itirago o kare ke ya Khomišene ye Ikemetšego ya Dikgetho ya Afrika Borwa.

3. Samiti ya Bosetšhaba ya Tlhabollo ya Ekonomi ya Selegae (LED)
3.1 Kgoro ya Tlhabollo ya Dikgwebopotlana, ka tšhomišano le SALGA le Kgoro ya Pušotirišano le Merero ya Setšo (CoGTA), e tla be e swara Samiti ya Bosetšhaba ya LED Hoteleng le Senthareng ya Dikhonferense ya Birchwood ka Johannesburg ka la 15 le la 16 Moranang 2026. Samiti ya Bosetšhaba ya LED e tla ba bjalo ka sefala sa ditharollo yeo e tlo fago morero wo moswa go Tlhabollo ya ya Ekonomi ya Selegae go ya le ka Pholisi ye Mpsha yeo e sa Thadilwego ya Tshedimošo mabapi le Mmušo wa Selegae ka fase ga morero wo o rego “Tokišoleswa ya Diekonomi tša Selegae: Togamaano ya Tšhomišano bakeng sa Kgolo ya Dikgwebopotlana le Bonolo bja go Dira tša Kgwebo”.
3.2 Samiting ye seboledisegolo e tlo ba Mopresidente Cyril Ramaphosa gomme e tlo tsenelwa ke boetapele go phatlalala le magoro a mararo a mmušo, SALGA, dikgwebo tša mmušo le ditheo tša tlhabollo ya merero ya ditšhelete (di-DFI), le lekala la praebete, baetapele ba setšo, le batšeakarolo ba bangwe ba tša tlhabollo ya ekonomi ya selegae ba go fapafapana.
3.3 Samiti ye e tla re ka tshwanelo ya šutiša tlhabollo ya ekonomi ya selegae go tloga go nepo ya pholisi go ya go magato a go šoma a go bonala ao a matlafatšago bokgoni bja ditheo tša selegae, go šogana le go se lekalekane ge go etla tšhomišong ya naga, go swara lekala la setšhaba le la praebete bjalo ka ngata e tee ge go etla go dilo tšeo di tlišago kgolo, le go hlola tikologo ya taolo yeo e kgonagatšago bakeng sa dipeeletšo le tlhabollo ya di-MSME.

F. Melaetša

1. Matshediso
Kabinete e iša matshidiso go bagwera le ba lapa la:
• Molwelatokologo ebile e le Tonakgolo le Tona ya Peleng ya Sešole Mosiuoa Lekota yo a gafilego bophelo bja gagwe ntweng ya go lwela go ba le Afrika Borwa ya go hloka semorafe, ya go se kgetholle go ya ka bong ebile ya temokrasi.
• Nicholas “Fink” Haysom, ramolao wa go tuma wa ditokelo tša botho yo a kilego a šoma bjalo ka Moeletšimogolo wa tša Semolao wa Mopresidente Nelson Mandela gomme ka morago ga fao a ba Moemedi yo a Ikgethilego wa Mongwaledipharephare wa Ditšhabakopano ka maemong a go fapafapana.
• Raditaba wa mahlwaadibona, mongwadi wa go hlomphega ebile gape e le molwelatokologo yo a bego a ikgafile, Terry Bell yo a ralokilego karolo ya go hlomphega ebile ye e phethagetšego ka ntweng kgahlanong le kgethollo, a šomiša bobedi lentšu la gagwe le bongwadi bja gagwe go bea pepeneneng go se lekalekane gape le go tšwetšapele phetogo ya temokrasi ka Afrika Borwa.

2. Ditebogišo
Kabinete e lebogiša le go lakaletša tše botse go:
• Profesa Nyaweleni Tshifularo le sehlopha sa gagwe sa ditsebi tša maphelo ge ba kgonne go kgaoganya bana ba mafahla bao ba bego ba kgomagane ka karolong ya tlholompsha Bookelong bja Mankweng bjo bo lego ka metsemagaeng a Limpopo. Karo ye, yeo e bego e hloka tsebo ye kgolo, e netefatša leswa kgonagalo ya maokelo a ka Afrika Borwa, go balwa le ao a lego ka metsemagaeng, ya go kgona go dira dikaro tšeo di raraganego e le ge naga ye e itokišetša go tlo aba Inšorense ya Maphelo ya Bosetšhaba.
• Ngaka Keamogetswe Ramonaheng, Hlogo ya Fisiksi ya Maphelo le Radiolotši ka Setheong sa Diphatišišo tša Maphelo ka Nukliere (NuMeRI), ge a hwediše Sefoka sa maemo a godimo sa Saul Hertz Khonkereseng ya Lefase ya Ditheranostiksi bakeng sa go kgatha tema ka go tša ditheranostiksi, e lego lekala leo le sa golago leo le kopanyago go kgona go fota bokagare bja mmele wa motho le therapi yeo e nepilego go radionuklaete go kaonafatša dipoelo tša kalafo ya kankere.
• Profesa Prinola Govenden go tšwa Yunibesithing ya Johannesburg yo a hweditšego sefoka sa maemo a godimo sa Bodulasetulo bja UNESCO ka go tša Kakaretšo ya Bohle le Tekatekano ka go Bobegaditaba bja Titšithale ka Afrika (2026-2030), morago ga tshepedišo ya phenkgišano ye kgolo ya badiradikgopelo ba 135 go tšwa lefaseng ka bophara bao ba rometšego maina a bona motsemošate wa UNESCO ka Paris nageng ya Fora.
• Kutlwano Peta, moithuti wa Diploma ya Sealogasegolwane ya Disaense tša Akhaonthing yo a ilego a kgethwa ka 2025 bjalo ka yo mongwe wa bakgathatema ba 16 go tšwa go badiradikgopelo ba go feta 1 800 go tšwa lefaseng ka bophara bakeng sa Lenaneo la Lefase la Talente (GTP) la Lekala la Diakhaonthente tša Ditswerere la Singapore (ISCA). Kutlwano, yo e sego kgale a tlo bago a šoma kantorong ya Mohlakišipharephare, e be e le yena mokgathatema a le tee yo a bego a emetše Afrika.
• Ramabelo wa mabelo a matelele wa Moafrika Borwa, Adriaan Wildschutt, yo a dirilego histori e le ge a thopa New York City Half-Marathon, gomme a eba Moafrika Borwa wa mathomo wa go thopa lebelo le la seripagare la maemo lefaseng.
• Majoro-Generale Carl Moatshe yo a thwetšwego go tlo tšea mošomo wa go ba mokomantante wa Sešole sa Lefaufaung sa Afrika Borwa go tloga ka la 01 Moranang 2026, gomme o tla hlatlošetšwa maemong a go ba Moleftenente-Generale. Yena o tsena maemong ao a tlogetšwego ke Hlogo ya Sešole sa Lefaufaung, Moleftenente-Generale Wiseman Simo Mbambo yo nako ya gagwe maemong ao e bilego ya boetapele bja potego le go hlankela setšhaba.
• Mohumagadi Lytania Johnson ge a thwetšwe bjalo ka Mohlankedimogolophethiši wa First National Bank morago ga mengwaga ye 25 a šomela panka yeo, gomme ebile o tlo eta pele yuniti ye mpsha ya ritheili le kgwebo.
• Mohumagadi Valdene Reddy ge a thwetšwe bjalo ka Mohlankedimogolophethiši wa Johannesburg Stock Exchange, gomme e le mosadi wa mathomo wa mmala go swara maemo ao.
• Springbok Sevens – e lego Blitzbokke ya rena yeo re e ratago – ge ebile dinkgwete go World Sevens Series ya 2025/26 gape le go thopa sefoka sa New York Sevens.
• Mmasepala wa Greater Tzaneen ka Mopani, Limpopo, ge o thopile sefoka sa go ba mmasepala wo o hlwekilego kudu ka Afrika Borwa Difokeng tša Bosetšhaba tša Taolo ya Ditlakala tšeo di bego di swerwe ke Kgoro ya Dithokgwa, Boreahlapi le Tikologo.
• Boemafofane bja Boditšhabatšhaba bja Motsekapa ge bo filwe sefoka sa go ba Boemafofane bjo Bokaonekaone ka Afrika mengwaga ye 11 ka go latelana Difokeng tša Lefase tša Maemafofane tšeo di bego di swaretšwe ka London, United Kingdom. Boemafofane bja Boditšhabatšhaba bja O.R. Tambo bo tšwele maemo a bobedi, mola Boemafofane bja Boditšhabatšhaba bja King Shaka ka Durban bo tšwele maemo a bone bja ba bja akaretšwa ka maemafofaneng a maemo a godimo a selete ka Afrika Borwa.
• Go kgethwa ga Afrika Borwa go tsena ka go Sehlophatšhomo sa Dikgokagano sa Kopano ya bo-70 sa Khomišene ya mabapi le Maemo a Basadi yeo e bego e swerwe ka fase ga Ditšhabakopano. Go kgethwa mo go netefatša leswa boetapele bja Afrika Borwa tšwetšopeleng ya kgokagano ya togamaano bakeng sa tekatekano ya bong le matlafatšo ya basadi.
• Rammino wa Mahlwaadibona Ngaka Abdul İbrahim ge a rola mošomo wa go ba rammino a na le mangwaga ye 91. Mogale wa ntwa ya go lwela tokologo yo a šomišitšego mmino go anega kanegelo ya mmušo wa peleng wa kgethollo wa Afrika Borwa. Maafrika Borwa a tloga a go leboga kudu.

3. Maitshwaro a go ba le maikarabelo Mafelelong a Beke ya Paseka
3.1 Kabinete e lakaleditše Maafrika Borwa ka moka gore ba be le mafelelo a beke a matelele a Paseka a go bolokega ebile a lethabo. Ye ke nako yeo Maafrika Borwa a mantši a tšeago maeto go kgabaganya le naga go etela malapa a bobona, bagwera goba ka mabaka a ditumelo. Se gantši se tla le go oketšega ga sephethephethe ditseleng tša rena.
3.2 Kabinete e ipiletša go batho ka moka go ba le maikarabelo ge ba otlela – netefatša gore sefatanaga sa gago se loketše tsela pele o ka otlela, gomme bohle bao ba lego ka sefatanageng, go balwa le bana, ba swanetše ba bofe mapanta a bona a polokego.
3.3 Re amogela baeti ka nageng ya rena gomme re netefaletša Maafrika Borwa le baeti mmogo gore go lwa le bosenyi go tšwela pele go ba ye nngwe ya tšeo di tlago pele tša mmušo wa Afrika Borwa, gomme ka mošomo wa Tirelo ya Maphodisa a Afrika Borwa re ba le kgatelopele ye botse ntweng kgahlanong le bosenyi. Naga ya rena e tšwela pele go dira ka mo e kgonago go netefatša gore bohle bao ba e etelago ba a bolokega.
3.4 Mafelo a go goketša baeti a go tuma a tlo ba le tšhireletšo ya tlaleletšo. Ge Mafelelo a Beke a Paseka a batamela, Mokgatlo wa Taolo ya Mellwane (BMA) o itokišeditše go tlo netefatša gore mesepelo ya batho le dithoto tšeo di fetago mellwaneng ye 71 ya Afrika Borwa nakong ye e ba yeo e phethagetšego, e bolokegilego ebile e se nago ditšhitišo.
3.5 Ka baka la seemo sa bolwetši bja tlhako le molomo, Kabinete e ipiletša gore go be le tshepetšo ya diphoofolo ya maikarabelo go thibela go keka ga bolwetši. Re kwešiša koketšego ya bohlokwa bja go sepetšwa ga diphoofolo e le ge re hloka nama, efela re swanetše re latela melao ya go amana le bolwetši bja tlhako le molomo.

E lokolotšwe legatong la Kabinete ke:
Tona ka Kantorong ya Mopresidente Mohumagadi Khumbudzo Ntshavheni

Dipotšišo:
Dikgokagano tša Mmušo le Lenaneo la Tshedimošo (GCIS)
Kgokagano: Mohumagadi Nomonde Mnukwa, Molaodipharephare wa Motšwaoswere
Selefouno: 083 653 7485