A. Merero ye Bohlokwa Seemong sa Bjale
1. Ekonomi
1.1 Dipeeletšo
1.1.1 Kabinete e bontšhitše boitshepo go kgotlelelo ya ekonomi ge naga e tšwela pele go hloma ditšhomišano go aga makala a bohlokwa le go gokagoketša dipeeletšo tše diswa.
1.1.2 Kabinete e amogetše gape le go tsebagatšwa ga lekala la Google South Africa la tlelaote ka Johannesburg, leo le tsenywago ka netwekeng ya lefase ya Google. Protšeke ye ke ya mathomo ya Google ka Afrika gomme ke seka sa peeletšo ye bohlokwa ka mananeongkgoparara a theknolotši ka Afrika Borwa. .
1.1.3 Kabinete e ipiletša go makala ka moka go potlakiša tsela ya naga ya rena ya go leba kgolong ya ekonomi yeo e akaretšago bohle mmogo le tlholo ya mešomo ka dipeeletšo tšeo di oketšegilego gape le ka go laetša tše dibotse ka naga ya rena.
1.2 Kgathotema ya Lekala la Praebete ka Diprotšekeng tša Thwalo ya Merwalo ka Ditimela le Dikepe
1.2.1 Kabinete e amogetše go tsebagatšwa ga Kgopelo ya Tshedimošo ka ga Kgathotema ya Lekala la Praebete ka Diprotšekeng tša Thwalo ya Merwalo ka Ditimela le Dikepe, bjale ka ge se e le karolo ya diphetošo tše bohlokwa tša go kaonafatša lekala la thwalo ya merwalo, gomme ka go realo e le go kaonafatša kgolo ya ekonomi ka diromelwakanageng tšeo di kaonefetšego.
1.2.2 Leano la Tshepedišo ya Thwalo ya Merwalo ka Difofane ka Afrika Borwa le tšweletšapele phenkgišano e kgolo ka mešomong ya diporo le maemakepe, yeo e tlo gokagoketšago peeletšo ka lekala la praebete, efela mananeokgoparara a bohlokwa a bjalo ka diporo le maemakepe e tla dula e le a setšhaba.
1.3 Enetši
1.3.1 Kabinete e amogetše dimekawate tša tlaleletšo tše 800 tša maatla a maswa a mohlagase mararankodingmagolo a mohlagase a bosetšhaba morago ga ge Eskom e kgonne go tsoša yuniti ya mafelelo ya go fehla mohlagase ya ka Setišing sa Mohlagase sa Kusile ka katlego. Se se tla thuša mararankodimagolo gore a eme a tie gomme sa ba sa matlafatša tšhireletšo ya ka moso ya enetši ya naga ye.
1.4 Dipalopalo tša Mešomo tša Kotara ka Kotara
1.4.1 Kabinete e amogetše koketšego ya mešomo ka mešomo ye 120 000 yeo e okeditšego palo ya mešomo go ya go 10.64 milione ka lekaleng la semmušo leo e sego la temo ka kotareng ya bone ya 2024. Dipalopalo tša Mešomo tša Kotara ka Kotara tša Stats SA di bonagaditše koketšego ya mešomo ka lekaleng la kgwebišano, la ditirelo tša kgwebo, la dinamelwa le la mohlagase.
1.4.2 Le ge go bile le kaonafalo ye nnyane, mešomo ya go šoma tšatši ka tšatši e sa dutše e le tlase ka palo go feta ngwageng wa go feta. Kabinete e ikgafile go tla ka diphetošo, le go phethagatša mananeo ao a nepilego thwii go kgolo ya ekonomi gore e kgone go hlama tikologo yeo e tlo kgontšhago tlholo ya mešomo.
2. Tsebišosemmušo ya Molao wa Phetogo ya Klaemete, e lego Molao wa bo-22 wa 2024
2.1 Kabinete e amogetše tsebišosemmušo ya Molao wa Phetogo ya Klaemete wa 2024 (Molao wa bo-22 wa 2024) ka Mopresidente Cyril Ramaphosa ka Mošupologo wa la 17 Hlakola 2025, woo o kgontšhago go hlangwa ga dipholisi tša phetogo ya klaemete tšeo di šomago gabotse, gape le leano la nako ye telele bakeng sa ekonomi le setšhaba seo se tupišago khapone ye nnyane.
2.2 Kabinete e amogetše gape le Sehlopha sa Bašomišani ba Boditšhabatšhaba (IPG), seo e lego tšhomišano ya dinaga tša go swana le United Kingdom, Germany, France le EU, gore se tlatše sekgoba sa thekgo ya mašeleng seo se tlogetšwego ke US morago ga ge e se no tšwa go Tšhomišano ya Phetogo ya Enetši ye Botse.
2.3 Palomoka ya ditshepišo tša boditšhabatšhaba go Afrika Borwa bjale e fihla go US$12.8 billione, yeo e akaretšago US$9 billione go tšwa go IPG mmogo le go tsenya letsogo ga Spain, Switzerland le Canada.
3. Dikamano tša Boditšhabatšhaba
3.1 Dikamano tša Afrika Borwa le Japan
3.1.1 Kabinete e amogetše dikamano tše tiilego magareng ga Afrika Borwa le Japan go latela ketelo ya semmušo ya mošomo ya Motlatšapresidente Paul Mashatile nageng ya Japan go tloga ka la 17 go fihla ka la 19 Hlakola 2025, yeo e nepilego go matlafatša tšhomišano yeo e šetšego e le gona magareng ga Afrika Borwa le Japan ka makaleng ao bobedi dinaga tše di nago le kgahlego go ona.
3.1.2 Dipoledišano di ile tša swarwa gape le ba Lekala la Tšhomišano ya Boditšhabatšhaba ya Japan go lekola dikarolo tša tšhomišano ka tša ekonomi, Mokgatlo wa Tlhabollo ya Ekonomi ya Afrika wa Japan go sekaseka menyetla ya kgwebišano le peeletšo, le Mokgatlo wa Tšhireletšo ya Dimetale le Enetši wa Japan go bonagatša menyetla ya dipeeletšo ka lekaleng la meepo.
4. Maphelo
4.1 Go bušetšwa morago ga Melawana ya Ditšweletšwa tša Dijo tša go tswakwa ka Patše
4.1.1 Kabinete e amogetše go bušetšwa morago ga Melawana ya go iletša go rekišwa ga dijo tša go tswakwa ka patše ke Kgoro ya Maphelo.
4.1.2 Le ge e lemoga seabe se sebe sa thekišo yeo e sa beelwago melao ya ditšweletšwa tša dijo tša go tswakwa ka patše go kgonagalo ya gore di ka lewa ke bana, Melawana ye bjalo go swanetše go rerišanwe ka yona ka mo go tletšego, ga se ya swanela go thulana le Kahlolo ya Kgorotsheko ya Molaotheo gomme ga se ya swanela gape go thulana le Molao wa Tšhomišo ya Patše Mabakeng a Praebete.
4.1.3 Kgoro ya Toka le Tlhabollo ya Molaotheo e kgokaganya Melawana yeo e sa Thadilwego ya gareng ga dikgoro bakeng sa phethagatšo ya Molao wa Thomišo ya Patše Mabakeng a Praebete.
4.2 Bolwetši bja Tlhako le Molomo (FMD)
4.2.1 Kabinete e ile ya begelwa ka go katološwa ga mellwane ya Karolo ya Taolo ya Malwetši (DMA) ya KwaZulu-Natal go thibela go phulega ga Bolwetši bja Tlhako le Molomo (FMD).
4.2.2 DMA e okeditšwe go akaretša mebasepala ye latelago: Big Five Hlabisa, Mtubatuba, Nongoma, Ulundi, Umhlabuyalingana, Jozini, Pongola, Abaqulusi, Mfolozi, uMhlathuze, Mthonjaneni, Nqutu, Nkandla, uMlalazi le Mandeni.
4.2.3 Ga gona diphoofolo tša ditlhako tša go pharoga (dikgomo, dinku goba dipudi), ditšweletšwa tša tšona goba madi goba ditho tša tšona di ka rwalwago go tšwa ka mellwaneng ya DMA ntle le ge di filwe tumelelo ke ngaka ya diphoofolo ya bosetšhaba.
5. Toka, Thibelo ya Bosenyi le Tšhireletšo
5.1 Thibelo ya Bosenyi
5.1.1 Kabinete e amogetše go golegwa ga bagononelwa ba 12 892 magareng ga la 17 le 23 Hlakola 2025 ke ba Tirelo ya Maphodisa a Afrika Borwa (SAPS) bjalo ka karolo ya lesolo la Operation Shanela .
5.1.2 Bona ba akaretša bagononelwa ba 1 753 bao ba bego ba nyakwa mabapi le bosenyi bjo bogolo ebile bja dikgaruru bjo bjalo ka polao, maitekelo a polao, go kata, le go hula ka dintlong le ka dikgwebong. Go tlaleletša fao, bagononelwa ba 1 794 ba ile ba golegwa mabapi le go betha ka maikemišetšo a go kweša bohloko, gomme bagwebakadiokobatši ba 203 le bona ba ile ba golegwa. Bagononelwa ba bangwe ba 1 507 ba ile ba golegelwa go ba le diokobatši, mola ba 115 ba golegetšwe go ba le dithunya tšeo di sego molaong.
5.2 Masolo ao a Tšwelago Pele a Tshedimošo yeo e sego ya Nnete le Phatlalatšo ya Tshedimošo ya Maaka ka Boomo
5.2.1 Kabinete e lemogile ka pelaelo masolo a phatlalatšo ya tshedimošo ya maaka ka boomo ka ba Solidaritiet le AfriForum mmogo le bao ba amanago nabo, gomme makala a phethagatšo ya molao a nyakišiša go tshelwa ga melao ya Afrika Borwa.
5.2.2 Gore go thibelwe tshedimošo yeo e sego ya nnete go tšwela pele, Tirelo ya Maphodisa a Afrika Borwa e kopane le AfriForum gore e hlalošiše mabarebare a gore go na le dipolao tša molokwanarite tša bathobašweu go lebeletšwe dipolao tša ka dipolaseng.
5.2.3 Kopanong yeo, AfriForum e dumetše gore dipalopalo tša bosenyi tšeo di lokolotšwego ke Tona ya Maphodisa ke tša maleba, go balwa le dipolao tša ka dipolaseng.
5.2.4 Go a tsebega gore tše dingwe tša dipolao tša ka dipolaseng di dirwa ke batho bao balemi ba ba tsebago, go balwa le maloko a malapa a bona.
5.2.5 Kabinete e a tseba gape le ka mabarebare ao a rego go na le balemi ba bathobašweu bao ba ka bago 72 000 bao ba saennego gore ba hudugela ka USA e le ge ba arabela memo ka Mopresidente wa US.
5.2.6 Go ya ka tshedimošo go tšwa go AgriSA le Kgoro ya Temo, le Stats SA, Afrika Borwa e na le balemi ba kgwebo ba 41 000 fela.
5.3 Ntwa Kgahlanong le Bomenetša
5.3.1 Kabinete a amogetše go tsebagatšwa ga Foramo ya Kgahlanong le Bomenetša bja Taolo ya Mellwane le Bofaladi ka la 25 Hlakola 2025 bjale ka karolo ya maitekelo a go fediša bomenetša ka taolong ya mellwane le bofaladi.
B. Ditsebišo tša Moragorago go Kabinete
1.1. DIKOPANO TŠA GO ITOKIŠETŠA SAMITI TŠA Sehlopha sa 20 (G20)
1.1.1. Afrika Borwa e tšwela pele go swara dikopano tša maemo a godimo tša G20 e le ge go itokišetšwa Samiti ya G20 ka Dibatsela 2025. Dikopano tša nako ye e sa tšwago go feta di be di swerwe ka mokgwa wo o latelago:
1.1.2. Kopano ya Mathomo ya G20 ya Sehlophatšhomo sa tša Dipeeletšo e swerwe ka bidio go tloga ka la 18 go fihla ka la 20 Hlakola 2025, gomme yona e sekasekile go agwa ga diekonomi tše akaretšago bohle, dikatlego le go šitwa ga mokgwa wa kgwebišano ya dinaga mo mengwageng ye 30 ye e fetilego. E sekasekile gape le kgolo ya kgwebišano le kakaretšo ya bohle, lenaneo la kgwebišano leo le arabelago, mpshafatšo ya diintaseteri go ba tšeo di šomišago maatla a dilo tša tlhago, gape le phetošo ya Mokgatlo wa Lefase wa Kgwebišano.
1.1.3. Ditherišano tša Bosetšhaba tša Poledišano ya Sehlophatšhomo sa tša Temo mmogo le Kopano ya G20 ya Borasaensebagolo ba tša Temo yeo e swerwego ka la 18 Hlakola (ka bidio) gomme di sekasekile taba ya boswareledi bja nako ye telele, bohlami le kgotlelelo.
1.1.4. Sehlophatšhomo sa Boditšhabatšhaba sa Boakhitekte bja Ditšhelete se kopane go la Pretoria ka la 18 Hlakola go boledišana ka mathata a sekoloto a Afrika.
1.1.5. Afrika Borwa e swere kopano ya boitokišetšo ka la 20 Hlakola 2025 bakeng sa Samiti ya Lenaneo la Dipeeletšo go tša Meetse la Kopano ya Afrika le Afrika go lokišetša yeo e tlo swarwago ka Phato 2025.
1.1.6. Sehlophatšhomo sa G20 sa Boswareledi bja nako ye Telele bja Tikologo le Klaemete se kopane ka la 25 Hlakola 2025, gomme sa bea šedi ya sona go ditlapele tše bohlokwa tša tikologo le klaemete.
1.1.7. Kopano ya bobedi ya Sehlophatšhomo sa Maphelo sa G20 e gare e tšwela pele go fihla ka la 28 Hlakola 2025. Kopano ye e sekaseka go matlafatša le go tšweletšapele phihlelelo yeo e lekalekanago ya ditirelo tša maphelo.
1.1.8. Kopano ya Sehlophatšhomo sa G20 sa Ekonomi ya Titšithale go Mahlale a Maitirelo e tla swarelwa Gqeberha go tloga ka la 7 go fihla ka la 11 Moranang 2025 mo e tlo beago šedi go phetošo ya titšithale, le kgolo ya leago le ekonomi ye e akaretšago bohle.
1.1.9. Kabinete e amogetše gape le pego ya tekolo mabapi le maemo le go lotwa ga mafelo a Bohwa a Lefase a ka Afrika Borwa go ya le ka Dikokwane tša Motheo tša G20 bakeng sa boitokišetšo le go swara kopanokgolo ya G20. Kabinete e lemogile gore mafelo a šupa go tšwa go a lesomepedi (12) a Bohwa a Lefase a ka Afrika Borwa a itokišeditše go amogela baeng ba G20, efela dimpshafatšo tša ona di a hlokega gore baeng ba tle ba ipshine ka ona.
1.2. Samiti ya boseswai ya Afrika Borwa le Kopano ya Yuropa (EU)
1.2.1. Kabinete e amogetše go matlafatšwa ga Tšhomišano ya Togamaano magareng ga Afrika Borwa le EU Samiting ya boseswai ya Afrika Borwa le EU yeo e bego e swerwe ka la 13 Hlakola 2025 ka Afrika Borwa.
1.2.2. EU e gateletše thekgo ya yona go Bopresidente bja Afrika Borwa go G20 mmogo le bohlokwa bja G20 bjale ka foramo ya lefase ka bophara bakeng sa tšhomišano ya boditšhabatšhaba ka tša ekonomi.
1.2.3. EU e tsebišitše gape Sekhwama sa Lefase sa Peeletšo sa Matsentšhagae go thekga diprotšeke tša togamaano ya dipeeletšo ka phetogong ya enetši yeo e hlwekilego ebile ye botse, ka go mananeokgoparara a titšithale le kgokagano, le ka go intaseteri ya tša bokhemese.
2. Pego ya kgatelopele mabapi le go ngwadišwa ga mabenkele a disephasa le mafelo a mangwe a go rekiša dijo mmogo le dikimollo tša go fediša malwetši a go hlolwa ke dijo
2.1. Kabinete e amogetše pego ya kgatelopele mabapi le go ngwadišwa ga mabenkele a disephasa le mafelo a mangwe a go rekiša dijo gape le tsebišo ka ga mošomo wo o lego gare o dirwa go fetšiša malwetši a go hlolwa ke dijo.
2.2. Tshepedišo ya boingwadišo e phethilwe, ntle le ge motho a duma go bula lebenkele la sephasa le leswa.
3. Go išwa ga batho ba go hwetša mphiwafela wa Lekala la Tšhireletšo ya Leago la Afrika Borwa (SASSA) go karata e mpsha ya Postbank
3.1. Kabinete e amogetše tsebišo ya gabjale mabapi le go išwa ga batho ba go hwetša mphiwafela wa SASSA go ya go karata ye mpsha ebile yeo e bolokegilego ya Postbank.
3.2. Letšatši la mafelelo leo batho ba go hwetša mphiwafela wa SASSA ba ka hwetšago Karata ye Ntsho ya Postbank legatong la ya kgale ya Gaute le katološitšwe go fihla ka la 30 Moranang 2025 go dumelela SASSA le Kgoro ya Tlhabollo ya Leago go phetha taba ya go fetišetša bao ba sa šaletšego.
C. Diphetho tša Kabinete
1. Legato la Bobedi la Operation Vulindlela
1.1. Kabinete e fetišitše dikarolo tšeo di beilwego šedi tša Operation Vulindlela, yeo e lego lesolo la Ofisi ya Mopresidente le Kgoro ya Matlotlo ya Bosetšhaba go phethagatša diphetošo.
1.2. Dikarolo tšeo go beilwego šedi go tšona di akaretša go fetšwa ga mošomo wo o sa šaletšego go Legato la Mathomo ka dikarolong tša Diphetošo tša Enetši, Meetse, Visa le Thwalo ya Merwalo, le dikarolo tše diswa tšeo go beilwego šedi go tšona tša Mmušo wa Selegae, go se lekalekane ga batho ka tša madulo le menyetla, le phetogo ya titšithale.
1.3. Kabinete e ile ya laela OV, ka therišano le dikgoro tša maleba, go ela hloko diphetošo tša dikarolo tšeo di beilwego šedi tša tlaleletšo go lebeletšwe mpshafatšo ya diintaseteri le phetošo ya dilo go ba tšeo di tlwaelegilego, go thakgola taba ya go agwa ga mananeokgoparara, le lekala la oli le kgase mmogo le tlhotlhomišo
1.4. Kabinete e lemogile gore Afrika Borwa e sa dutše e le naga ya boseswai ya go ba le kgase ye ntši, gape le phokotšego ya kgase yeo e letetšwego go diragala yeo e nyakago gore naga e age mafelo a go kgona go itirela kgase.
1.5. Kabinete e tla swara gape le kopano ye ikgethilego go bea šedi go Leano la Kgolo ya Ekonomi mo dibekeng tše nne (4) tše tlago.
2. Pholisi yeo e Kopantšwego ya Bosetšhaba ya Taolo ya Boleng bja Meetse
2.1. Kabinete e dumeletše phethagatšo ya Pholisi yeo e Kopantšwego ya Bosetšhaba ya Taolo ya Boleng bja Meetse. Pholisi ye e nyaka go šogana le ditlhohlo tša boleng bja meetse bjale ka ge go ngwadilwe ka go Sengwalwa sa Tshedimošo mabapi le Pholisi ya Bosetšhaba ya Meetse bakeng sa Afrika Borwa sa 1997 mmogo le Molao wa Meetse wa Bosetšhaba.
2.2. Pholisi ye e hlaloša dikokwane tšeo di hlamago motheo wa taolo ya boleng bja meetse. Yona e tla ka tshepelelano le melao ka moka ya maleba ya go amana le meetse, mmogo le maitlamo a lefase a naga ye go tumelelo yeo e beilwego gape le go lotwa ga meetse bjalo ka sedirišwa seo se hlaelago.
3. Leanolegolo la Afrika Borwa la Enetši ya Go Tšweletšwa ka Dilo tša Tlhago (SAREM)
3.1. Kabinete e dumeletše Leanolegolo la Afrika Borwa la Enetši ya Go Tšweletšwa ka Dilo tša Tlhago (SAREM) gore le phethagatšwe.
3.2. SAREM e nyaka go šomiša ka botlalo tlhokego yeo e golago ya enetši ya go tšweletšwa ka dilo tša tlhago le ditheknolotši tša bobolokelo go tšweletšapele kago ya diintaseteri le phetošo ya dilo go ba tšeo di tlwaelegilego.
3.3. Leanolegolo le beile šedi go enetši ya sola le phefo, dipetiri tša lithiamo, ditheknolotši tša bobolokelo tšeo di theilwego go petiri le banatiamo, gomme lona le hlamilwe gore e be tokomane yeo e šomago.
3.4. Kabinete e laetše gore mošomo wa tlaleletšo o dirwe go Leanolegolo go:
3.4.1. Hlohleletša babeeletši go tsenya mašeleng go tlhabollo ya baabi,
3.4.2. Go akaretša tlhabollo ya makhura a haetrotšene gore go fihlelelwe boitlamo bja boditšhabatšhaba bja 5% tša makhura ao a tswakilwego ka Makaleng a difofane le dikepe, pele ngwaga wa 2030 o fela.
4. Phetogo ya Titšithale ya Leano la Tshepedišo la Mmušo
4.1. Kabinete e dumeletše Phetogo ya Titšithale ya Leano la Tshepedišo la Mmušo leo le nepilego go šomiša ka botlalo theknolotši go kaonafatša kabo ya ditirelo ya setšhaba le go šoma gabotse ga mmušo. Mathata ao go šoganwago le ona a akaretša: kgokagano ya dikgoro, mananeo a kgale ao a fetilwego ke nako, ditaelo tšeo di thulanago, le mabokgoni goba bokgoni bjo bo hlaelago.
4.2. Lona le hlamilwe go tliša mmušo wo o theilwego bathong wo o kwešišago dihlokwa tša batho, kudu bao ba sa bolokegago, ka go netefatša gore go ba le kabo ya ditirelo yeo e phethagetšego ebile e šomago gabotse.
D. Melaokakanywa
1. Molaokakanywaphetošwa wo o sa Thadilwego wa Lekala la Bosetšhaba la Mananeokgoparara a Methopo ya Meetse wa Afrika Borwa (NWRIA)
1.1. Kabinete e dumeletše go išwa ga Molaokakanywaphetošwa wo o sa thadilwego wa NWRIA Palamenteng. Diphetošo tša wona di amana le go ngwadišwa ga NWRIA bjalo ka khamphani ya mmušo ya go wela ka tlase ga Šetulu ya 2.
E. Bao ba thwetšwego mešomomong
Batho ka moka bao ba thwetšwego mešomong mangwalo a bona a thuto a tla kgonthišišwa le go tiišeletšwa ka mekgwa ya maleba.
1. Morena Fhululani Peter Netshipale bjalo ka Molaodipharephare ka Kgorong ya Tlhabollo ya Leago.
2. Maloko a Lekgotla la Phokotšo ya Dibetša tša go Hlola Tshenyo ye Kgolo la Afrika Borwa:
(a) Mme Ditebogo Kgomo (Modulasetulo);
(b) Ngk. Kelvin Kemm;
(c) Ngk. Alison Lubisi;
(d) Morena Gian Marcon ;
(e) Mme Kgaugelo Mogashoa;
(f) Mme Elsie Monale;
(g) Morena Sandile Ndlovu;
(h) Mme Deidre Penfold;
(i) Mme Lizell Reinecke;
(j) Profesa Bismark M Tyobeka; le
(k) Ngk. Jaqueline Weyer.
3. Maloko a Khamphani ya Dithokgwa ya Afrika Borwa:
(a) Profesa Edward Nesamvuni (Modulasetulo)
(b) Morena Neeshan Balton (o thwetšwe leswa)
(c) Mme Lahlane Malema (o thwetšwe leswa)
(d) Morena Norman Baloyi;
(e) Morena Leo Long;
(f) Morena Ndyebo Grootboom;
(g) Moadfokeiti Nomazotsho Yvonne Memani;
(h) Morena Zwintayo Madula;
(i) Mme Sharon Mkhize; le
(j) Mme Ntombifuthi Nkosi.
F. Ditiragalo tšeo di sa tlago
1.1. Letšatši la Lefase la Bolwetši bja Mafahla (TB)
1.1.1. Afrika Borwa e ketekile Letšatši la Lefase la Bolwetši bja Mafahla ka la 24 Hlakola 2025 ka tlase ga moeno wo: “Ee! Nna le Wena Re Ka Fediša TB: Ikgafe, Beeletša, Fihliša” (“Yes! You and I Can End TB: Commit, Invest, Deliver”).
1.1.2. Kabinete e thabile gore Afrika Borwa e fokoditše palo ya mathata a TB ka 57% ka 2023 go fihlelela nepo ya Mokgatlo wa Lefase wa Maphelo ya go fokotša bolwetši bja TB ka 50% go tloga ka 2015 go fihla ka 2025. Lenaneo la rena le legolo la di-antiretroviral le kgathile tema kaonafatšong ya dipoelo tša TB, go balwa le kalafo yeo e atlegilego le phokotšo ya mahu.
1.1.3. Kabinete e ipiletša go MaAfrika Borwa ka moka go etela kliniki goba bookelo bja kgauswi go yo phekolwa maemo a bona mabapi le TB.
2. Indaba ya Meetse le Kelelatšhila (27-28 Hlakola 2025)
2.1. Indaba ya Meetse le Kelelatšhila ya 2025 e tla swarwa ka la 27 le la 28 Hlakola 2025 go la Gallagher Estate ka tlase ga moeno wo: “Tšhireletšo le Kabo ya Meetse” (“Water Security and Provision”).
2.2. Indaba ye e tla tšweletšapele maitlamo ao a dirilwego ka go Leano la Tlhabollo la Gare ga Ngwaga (MTDP) le Operation Vulindlela 2.0 bjale ka karolo ya leanophetogo la Pušo ya Bošupa bakeng sa lekala la tša meetse.
2.3. Indaba ye e tlo lekola gape le kgatelopele ye e dirilwego ka Leanongtiro la Samiti ya Meetse la 2024 gomme ya ba ya lebelela le dipego tša Blue, Green le No Drop tša Manthole 2023.
3. Seboka sa Basadi sa tša Ekonomi (WECONA)
3.1. WECONA, yeo e lwelago tekatekano ya kgathotema ya basadi ka ekonoming ye kgolo go fediša go keka ga dikgaruru tša bong le polao ya basadi, e tla swarwa ka la 28 Hlakola 2025.
3.2. Leano le la bosetšhaba le tlo kopantšha dikhamphani, dikgoro tša mmušo, mekgatlo le batho go tla ka ditsela tšeo ka tšona dikhamphani tšeo beng ba tšona e lego basadi di ka kgathago tema ka ekonoming.
4. Kgwedi ya Tokologo
4.1. Afrika Borwa e tla keteka Kgwedi ya Tokologo ka kgwedi ya Moranang, le Letšatši la rena la Tokologo ka la 27 Moranang 2025.
4.2. Letšatši la Tokologo le Kgwedi ya Tokologo ke dinako tše bohlokwa kudu tša go ketekwa re le setšhaba se tee, ka ge naga ya rena e tla be e keteka go thoma ga Afrika Borwa ye e kopanego, ya go se kgetholle go ya ka morafe, ya go se kgetholle go ya ka bong ebile ya temokrasi, yeo e ikgafilego go dikokwane tša seriti sa motho, go se kgetholle ka morafe le go se kgetholle ka bong, gape le tlhompho ya molao bjale ka ge go ngwadilwe ka gare ga Molaotheo.
4.3. Meketeko ya ngwaga wo ya Letšatši la Tokologo e tla swarelwa Mpumalanga, gomme e tla ba e le seka sa go phetha meketeko ya ngwaga ka moka ya Mengwaga ye 30 ya Tokologo le Temokrasi.
5. Samiti ya Bana ya Afrika (3-7 Moranang 2025)
5.1. Afrika Borwa e tla swara Samiti ya Bana ya Afrika (ACS) ka Johannesburg go tloga ka la 3 go fihla ka la 7 Moranang 2025.
5.2. Afrika Borwa e kgethilwe bjalo ka lefelo la go tlo swarela Samiti ye, gomme Sekhwama sa Bana sa Nelson Mandela e tla ba mokgatlo wa setšhaba wo o di etilego pele.
5.3. Bakgathatema go tšwa kontinenteng ka bophara ba tla kopana mo khonferenseng ye ya go etwa pele ke bana go nolofatša dipoledišano gareng ga bahlami ba dipholisi le bana.
6. Khonferense ya bo-17 ya Go Swarwa Mengwageng ye Mengwe le ye Mengwe ye Mebedi ya Mokgatlo wa Basadi ba Baahlodi (IAWJ)
6.1. Afrika Borwa e tla swara Khonferense ya bo-17 ya Go Swarwa Mengwageng ye Mengwe le ye Mengwe ye Mebedi ya IAWJ go la Cape Town go tloga ka la 9 go fihla ka la 12 Moranang 2025 ka tlase ga moeno wo: “Kgotlelelo: Basadi ka Boetapeleng go Fediša GBVF” (“Resilience: Women in Leadership to End GBVF”).
6.2. Khonferense ye, yeo e swarwago ke Lekala la IAWJ la Afrika Borwa, e kopantšha baahlodi le diprofešenale tša molao go tšwa lefaseng ka bophara. Yona e tla lebelela ditsela tša go fediša GBVF ka go tšwetšapele ditokelo tša basadi le boetapele. Khonferense ye e tla akaretša le batsebalegi ba tša molao bjalo ka Moahlodimogolo Mandisa Maya.
7. Ketelo ya Peoleihlo ka Mopresidente ka Mmasepaleng wa Setoropo wa Nelson Mandela
7.1. Mopresidente Ramaphosa o tla tšea Leeto la Semmušo la Bopresidente go ya Gqeberha ka la 15 le 16 Moranang 2025 go lekola kgatelopele ka kabo ya ditirelo, ditlhohlo le menyetla ya kgolo ya ekonomi ya go akaretša bohle.
7.2. Ketelo ya Mopresidente ya Peoleihlo e tlo tsenelwa ke baetapele go tšwa ka magorong ka moka a mararo a mmušo gomme e fa mmušo monyetla wa go boledišana le badudi.
4. Samiti ya Afrika ya Haetrotšene ya Go Hlweka (12 -13 Phupu 2025)
4.1. Afrika Borwa e tlo swara Samiti ya mathomo ya Afrika ya Haetrotšene ya Go Hlweka go tloga ka la 12 go fihla ka la 13 Phupu 2025.
4.2. Samiti ya Afrika ya Haetrotšene ya Go Hlweka e nepile go tšweletšapele tšhomišano ya selete, go nolofatša kabelano ya theknolotši, go aga bokgoni le go kgontšha phihlelelo ya mebaraka ka lekaleng la haetrotšene ya go hlweka.
G. Melaetša
1. Ditebogišo
Kabinete e lebišitše ditebogišo tša yona le go lakaletša mahlatse le mahlogonolo go:
1.1. Mohlomphegi Mopresidente Netumbo Nandi-Ndaitwah mabapi le go bewa setulong ga gagwe bjalo ka Mopresidente wa Namibia, gomme ebile gape ke Mopresidente wa mathomo wa mosadi ka nageng ya gabo, yoo ebile a beilego le Motlatšapresidente wa mathomo wa mosadi, Mohlomphegi Lucia Witbooi mmogo le go kgetha Kabinete yeo e tletšego ka basadi.
1.2. Sehlopha sa Afrika Borwa ge se tšweletše ka magetla Dipapading tša Diolimpiki tše Ikgethilego tša Marega tša Lefase go la Italy, gape le Dipapadi tša Mabelo tša Lefase tša go Bapalela ka Gare ga Moago ka China.
1.2.1. Dipapading tša Diolimpiki tše Ikgethilego tša Marega tša Lefase, Afrika Borwa e thopile metale o tee wa gauta, ye meraro ya silibere, le ye mebedi ya poronse:
a) Naledi Hlalele o thopile wa gauta ka papadi ya go sesa godimo ga aese ya Figure Skating;
b) Bianca Basson le Kenneth Mokabo ba thopile wa silibere ka papadi ya go sesa godimo ga aese ya Figure Skating;
c) Shane Bentley o thopile wa silibera ka papadi ya go kitima ka go sesa godimo ga aese ya Short Track Speed Skating;
d) Tyrell Sykes o thopile wa poronse ka papadi ya go sesa godimo ga aese ya Figure Skating; gomme
e) Shirnel Swarts o thopile wa poronse ka papadi ya go kitima ka go sesa godimo ga aese ya Short Track Speed Skating.
1.2.2. Sehlopha sa Afrika Borwa Dipapading tša Mabelo tša Lefase tša go Bapalela ka Gare ga Moago ka China se thopile ka mo go latelago:
a) Prudence Sekgodiso o dirile histori ka go ba mosadi wa mathomo wa MoAfrika Borwa go thopa metale wa gauta Dipapading tša Mabelo tša Lefase tša go Bapalela ka Gare ga Moago ka lebelong la dimitara tše 800.
b) Akani Simbine o thopile metale wa poronse ka lebelong la dimitara tše 60 Dipapading tša Mabelo tša Lefase tša go Bapalelela ka Gare ga Moago.
c) Maitekelo a go retega a fihleletšwe ke Cheswill Johnson ka papading ya go tabogela godimo, le Chris van Niekerk ka papadi ya go foša kgwele ya tšhipi.
1.3. Ramabelo wa moswa, Bayanda Walaza, yo a feditšego lebelo ka metsotswana ya ka tlase ga ye lesome, gomme a ba moswa wa bohlano ka lebelo lefaseng wa go thopa lebelo la dimitara tše 100, le go roba rekote ya ba Mengwaga ya ka Tlase ga ye 20 ya Afrika Borwa ka metsotswana ye 9.99 go thopa Gauta Diphadišanong tša Mabelo tša Gauteng Leboa.
1.4. Rassie Erasmus ge a bile Mohlahli wa Ngwaga wa 2024 Difokeng tša Rugby tša Afrika Borwa.
1.5. Sebapadi sa di-Springbok, Cheslin Kolbe go ba sebapadi sa go bapalela morago lebaleng sa go thopa sefoka sa Sebapadi sa Ngwaga sa Rugby ya Banna sa 2024 la mathomo e sa le go tloga ka 2013.
1.6. Nadine Roos ge a thopile sefoka sa Sebapadi sa Ngwaga sa Rugby ya Basadi sa 2024, lekga la bobedi mo mengwageng ye meraro.
1.7. Bafana Bafana ge ba eme nhloreng ka Sehlopheng sa C dipapading tša go lwela go yo tsena Dipapading tša Sefoka sa Lefase tša FIFA ka go fenya Lesotho ka dino tše pedi go lefeela Lepatlelong la Peter Mokaba leo le bego le tletše go fihla ka maribana.
1.8. Seopedi sa Afrika Borwa, Tyla Laura Seethal yoo a tsebegago ka la Tyla, ge a hweditše sefoka sa go ba Modiragatši wa Ngwaga Difokeng tša Mmino tša iHeartRadio.
2. Matshedišo
Kabinete e lebišitše matshedišo a yona go bagwera le ba lapa la:
2.1. Mme Yolanda Nyembezi, yo a tsebegago ka la Yallunder, yo e bego e le rammino wa ditalente tše ntši yoo a tantšego kgahlego ya batheeletši ka lentšu la gagwe le lebotse le bodiragatši bja botswerere.
2.2. Morena Ashwin Trikamjee, Mopresidente wa Hindu Maha Sabha ya Afrika Borwa ebile e le gape Modulasetulo wa Foramo ya Bosetšhaba ya Baetapele ba Ditumelo. Ramolao wa Ditokelo tša Botho. O kgathile le tema ye bohlokwa tlhabollong ya kgwele ya maoto ka Afrika Borwa. Bjalo ka Molwelatokologo kgahlanong le mmušo wa kgethollo, o be a etile pele karolo ya Bogare bja Durban ya mokgatlo wa Natal Indian Congress.
2.3. Bahlapetši ba setšhaba ba tshela (6) bao ba bolailwego, gape le go romela mantšu a gore ba bangwe ba tshela (6) bao ba gobetšego ba fole ka pela, lefelong la mekhukhu la Marry Me ka Soshanguve. Bao ba hlokofetšego ke Mpho Johannes Koko, Phelemon Seshoka, Katlego Motloutsi, Andries Moreteledi Tlhabane, Siliky Ngoeng, le motho yo mongwe yo leina la gagwe le sa tsebjego le bjale. Batho ba babedi bao ba amanywago le bosenyi bjo ba golegilwe gomme ba tšweletše pele ga kgorotsheko ka Laboraro la 26 Hlakola 2025.
2.4. Morena James O'Connell, mofofiši wa difofane yo a hlokofetšego nakong ya ge sefofane sa gagwe sa Impala Mark 1 se ewa sa pshatlagana ge a be a diragatša Pontšhong ya West Coast Air go la Saldanha Airfield ka Kapa Bodikela.
E lokolotšwe ke: Tshepetšo ya Dikgokagano le Tshedimošo ya Mmušo (GCIS)
Dinyakišišo: Mme Nomonde Mnukwa – Seboleledi sa Mmušo sa Motšwaoswere
Mogala: 083 653 7485
