A. Ditaba tšeo di amago badudi
1. DIPAPADI
1.1. Afrika Borwa e hwetša sebaaka sa go ya dipapading tša Sebjana sa Lefase tša 2026
1.1.1. Kabinete e lebogiša sehlopha sa bosetšhaba sa kgwele ya maoto, Bafana Bafana, ge se kgonne go hwetša sebaka sa go ya phadišanong ya Sebjana sa Lefase sa FIFA ka 2026, e lego sebaka seo e sa lego ba se hwetša ka 2002 (ka dipapadi tša mantšhanakgang) le ka 2010 (ka sebaka sa go ba benggae ge Afrika Borwa e be e swere thonamente ya Dipapadi tša Sebjana sa Lefase sa Kgwele ya Maoto tša mathomothomo kontinenteng ya Afrika).
1.1.2. Tsela ya Bafana Bafana ya go fihlelela go ya dipapading tša Sebjana sa Lefase e bile taetšo ya moya wa kgotlelelo, lerato le botswerere bja Afrika Borwa. Ga go hlokege DNA, Ke Afrika Borwa ye..
2. EKONOMI
2.1. Eskom e hwetša letseno la R16 bilione
2.1.1. Kabinete e amogetše go boela ga Eskom maemong a go tsenya letseno morago ga ge lekala le le begile gore le hweditše letseno la R16 bilione morago ga go lefa lekgetho mo ngwageng wa ditšhelete woo o fedilego mafelelong a Hlakola 2025, gomme se ke bohlatse bja go fetoša dilo ga Eskom.
2.1.2. Go fetoša dilo ga Eskom go bontšha seabe sa lenaneo la diphetošo la Operation Vulindlela mmogo le boetapele bjo bo tiilego bja Boto yeo e etilwego pele ke Modulasetulo wa Eskom, Ngaka Mteto Nyathi, le sehlopha sa bokgoni sa bolaodiphethiši seo se etilwego pele ke Morena Dan Marokane, gape le taolo ya boetapele bja sepolotiki ka Tona ya Mohlagase le Enetši, Ngaka Kgosientsho Ramokgopa.
2.1.3. Phihlelelo ye ye kgolo ye e tla ka nako yeo naga e itemogelago nako ye e okeditšwego ya go se be gona ga kgaotšo ya mohlagase, e lego taetšo ye botse ya gore kabo ya mohlagase ya Afrika Borwa e gare e boela sekeng. Eskom bjale e bea pele go fediša phokotšo ya mohlagase mo dikgweding tše 12 go ya go tše 18 tše di tlago. Phokotšo ya mohlagase gonabjale e phethagatšwa go bea leihlo mananeokgoparara a bohlokwa ka mafelong ao a amilwego ke tobo ye kgolo ya mohlagase le go kgokaganywa ga mohlagase ka moo go sego molaong.
2.1.4. Kabinete e hlohleletša ditšhaba go bega tšhomišo ya mohlagase yeo e sego molaong, bohodu bja mohlagase le go senywa ga infrastraktšha ya mohlagase go Eskom ka nomoro ya go se lefelwe ya 0800 112 722 goba ba ye setišing sa maphodisa sa kgauswi.
2.2. Kotsi ya pase ka Leboa la Tsela ya Lephefo ya N1 ka thokong ya Makhado ka Limpopo
2.2.1. Kabinete e rometše matshediso a yona go mebušo le batho ba Zimbabwe le Malawi ka tahlegelo ya maphelo a 43 a batho ba bobona bao ba hlokofetšego kotsing ya pese tseleng ya N1 ka Makhado, Limpopo, ka Lamorena la 12 Diphalane 2025. Kabinete e tšwetše pele ya romela mantšu a kwelobohloko go batho ba 48 bao ba lego maokelong go phatlalala le Selete sa Vhembe ka Profenseng ya Limpopo gore ba fole ka pela.
2.2.2. Kabinete e nyamišitšwe ke go lemoga gore kotsi ye go be go sa hlokege gore e diragale gomme ebile e be e ka thibelwa ge melao ya tsela e be e latetšwe le go phethagatšwa, gomme ya ipiletša go badiriši ba tsela ka moka, kudu ba dinamelwa tša bohle, go obamela molao ka go šomiša dinamelwa tšeo di loketšego tsela, ba se rwale merwalo ya go feta tekano goba palo ya batho ya go feta tekano, ba be ba otlele ka polokego.
2.2.3. Godimo ga moo, Kabinete e laeditše go swabišwa le go makatšwa ke merwalanwa ya dipilisi tša di-antiretroviral (ARV) le dihlare tše dingwe tšei di hweditšwego mahlenkgeng a pese gomme e se na le mangwalo a maleba a tumelelo ya go rwala dihlare. Dinyakišišo tšeo di tletšego di thomilwe, gomme makala a phethagatšo ya molao le ona a tšea kotsi ye bjalo ka kgonagalo ya tshepetšo ya dihlare ka bofora. Bohodu bja dihlare, kudu tša di-ARV, bo nyenyefatša ntwa kgahlanong le HIV.
2.2.4. Kabinete e ipiletša go batho ba dinaga tša ka ntlegore e be baeng ba go ba le maitshwaro a mabotse ka Afrika Borwa gomme e gopotša batho bohle gore go bile le maitapišo a mantši go emiša tshwaro ya go se kgahliše kgahlanong le batho ba dinaga tše dingwe ka dikliniking tša ka mo nageng. Ka madimabe, bohlatse bjoo bo bontšhago bohodu bja go hloka dihlong bja dihlare go tšwa dikliniking tša mmušo ga bo thuše maitapišo a go bušetša dilo madulong gore batho ba dinaga tše dingwe ba hwetše thušo ka makaleng a maphelo a setšhaba.
2.2.5. Kabinete e rometše mantšu a ditebogo go Mmušo wa Profense ya Limpopo ge o arabetše ka potlako tabeng ya go alafa bao ba gobetšego gape le go hwetša mašaledi a bao ba hlokofetšego.
3. TŠA MAPHELO
3.1. Ntwa Kgahlanong le HIV le Aids
3.1.1. Kabinete etsebišitšwe mabapi le kabo yeo e šišintšwego ya seokobatši sa go thibela HIV e lego lenacapavir, yeo e beetšwego go tlo lokollwa ka kgwedi ya Hlakola goba ya Moranang ka 2026. Lenacapavir ke seokobatši se seswa sa go thibela HIV seo se tlo swarelelago nako ye telele, seo se fago tšhireletšo nako ya go lekana dikgwedi tše tshela, gomme se hlabelwa gabedi fela ka ngwaga. Kabo ya mathomo e tla šetša dilete tše 23 tšeo di nago le palo ya godimo ya HIV go phatlalala le diprofense tše tshela, gomme yona e nepišitše go dikliniki tše 360 tša setšhaba tšeo di šomago gabotse ka dileteng tšeo.
3.1.2. Kabo yeo e tlo tšwela pele go matlafatša ntwa ya mmušo kgahlanong le HIV le Aids, gape le nepo ya rena ya go fokotša diphetetšo tša HIV gore di theogele go 0.1% ka ngwaga wa 2032.
4. DIKAMANO TŠA BODITŠHABATŠHABA
4.1. Mmušo wa Amerika o dumelela LEANO LA KGOKAGANO LA PEPFAR bakeng sa Afrika Borwa
4.1.1. Kabinete e amogetše go dumelelwa ga Leano la Kgokagano la PEPFAR (PBP) bakeng sa Afrika Borwa la US$115 milione sebaka sa dikgwedi tše tshela go tloga ka la 1 Diphalane 2025 go fihla ka la 31 Hlakola 2026.
4.1.2. PBP ye e diretšwe go netefatša gore go ba le kabo ya ditirelo tša go amana le HIV tšeo di sa kgaotšego ka Afrika Borwa ka go thekga tirelo ya go amana le HIV/Aids yeo e tšwelago pele le go bea pele dihlokwa tše itšego tša naga gape le seabe sa go boloka maphelo.
4.1.3. Kabinete e lebogile mmušo wa Amerika ka boikgafo bja wona bja go thekga le go tiiša kgatelopele ka ntweng kgahlanong le HIV/Aids.
4.2. Maeto a semmušo a Mopresidente ka Ireland le Belgium
4.2.1. Maeto ao Mopresidente Cyril Ramaphosa a sa tšwago go a tšea go ya nageng ya Ireland ka la 8 Diphalane 2025 le Belgium ka la 9 Diphalane 2025 a tiišeleditše le go feta dikamano tša Afrika Borwa tša boditšhabatšhaba gomme a ba a bula dibaka tše diswa tša kgwebišano le dipeeletšo.
4.2.2. Nakong ya ge a le Belgium, Mopresidente Ramaphosa o ile a kgatha tema ka Foramong ya Makgoratsela ya Lefase ka toropongkgolo ya Brussels go tloga ka la 9 go fihla ka la 10 Diphalane 2025, moo Peeletšo ya Seboka ya Mokgoratsela wa Lefase ya go ja €11.5 bilione (R229 bilione) go ya go Afrika Borwa e ilego ya tsebišwa ke Mopresidente wa Khomišene ya Yuropa. Seboka se se itlama go oketša dipeeletšo tša Yuropa ka mo nageng ka R173 bilione ka go Phetolelo ya Mohlagase wa go Hlweka, R24 bilione gi didirišwa tša mohlagase wo, R20 bilione ka go infrastraktšha le kgokagano, le R6 bilione ya go hlola tshepetšo ya dihlare go tloga ge e dirwa go fihla ge e šomišwa.
4.2.3. Kabinete e amogetše seboka se sa dipeeletšo gape le seabe seo se tlo bago le sona go kgolo ya ekonomi, tlholo ya mešomo, dikgwebo tša ka mo nageng le tlhabollo ya infrastraktšha
4.3. Matšatši a 40 go ya go G20
4.3.1. Go balelwa ga matšatši ao a šetšego go ya go Samiti ya Baetapele ba G20 go thomile ka mafolofolo, ka matšatši a ka godimo ga 40 ao a šetšego pele e ka swarwa ka kgwedi ya Dibatsela ka Afrika Borwa.
4.3.2. Mopresidente Cyril Ramaphosa o ile a dira ditekolo ka sebele ka Labohlano la 10 Diphalane 2025 mo Senthareny ya Dipontšho ya NASREC go yo bona boitokišetšo bja lefelo leo.
4.3.3. Mmušo wa Profense ya Gauteng, o thekgilwe ke Ofisi ya Mopresidente, le wona o dira dikopano tša ditekolo tša beke le beke tša infrastraktšha go lekola boitokišetšo le mo go ka bego go hlaela gomme go hloka go lokišwa.
B. Diphetho tša Kabinete
5. Leano leo le Kopantšwego Didirišwa leo le Feletšego (IRP 2025)
5.1. Kabinete a dumeletše kakanywa yeo e feletšego ya Leano la Didirišwa leo le Kopantšwego (IRP 2025) leo e lego leano la nako ye telele leo le hlamilwego go hlaloša motswako wa mohlagase wa naga, leo le beilego šedi go tekatekanyo ya kabo le nyakego mola le hlokometše le seabe go tikologo gape le theko ya mohlagase. Pholisi ya mafelelo yeo e adilwego pele ga Kabinete e emetše peeletšo ya R2.23 thirilione yeo e tlo hlalošago kopanyo ya enetši ya Afrika Borwa wa ka moso.
5.2. Leano le le nepile go fokotša seabe sa mohlagase go tikologo ka go fokotša ditšweletšo tša muši tša lefase le tša ka mo nageng. Lona le šeditše go šogana le mathata ao a hlokago go rarollwa ka potlako a maatla a mohlagase gape le go loga maano a dinepo tša nako ye telele, bjale ka go fihlelela lekala la mohlagase leo le sa tšweletšago muši le gatee pele ngwaga wa 2025 o fela. IRP 2025 ke kaonafatšo ya IRP 2023 yeo e dumeletšwego ke Kabinete.
6. Pholisi ya Dikgokagano tša Mmušo ya 2025
6.1. Kabinete e dumeletše diphetošo go Pholisi ya Dikgokagano tša Mmušo ya 2018 go ya go Pholisi ya Dikgokagano tša Mmušo ya 2025.
6.2. Pholisi ye e arabela go diphetogo ka tikologong ya dikgokagano, gomme e netefatša gore setšhaba se sedimošwa ka botlalo ka go kgokaganya dikgokagano tša mmušo go netefatša gore di a kwagala, ga di na mapheko ebile di aba tshedimošo ya mmušo ka nako, ka maleba ebile ka phihlelelego.
6.3. Pholisi ye, yeo e sepelelanago le MTDP 2025 – 2029, e ama magoro ka moka a mararo a mmušo go balwa le bommaditsela le makala a ona. Ka maemo a Mmušo wa Botee wa Bosetšhaba, pholisi ye e tlo hlahla go kwagala ga melaetša, kudu go merero ya go amana le pholisi ya mmušo le kgahlegelo ya bosetšhaba.
7. Leano la Kakanyo ya Bogare ya Boitsebo bja Bosetšhaba le Peakanyoleswa ya Maemo a Naga
7.1. Kabinete e ile ya thabišwa ke dipoelo tša gonabjale tša dinyakišišo tša seriti sa boitsebo bja bosetšhaba tšeo di dirilwego ke Brand SA.
7.2. Kabinete e dumeletše Leano la Peakanyoleswa ya Maemo a Naga leo le hlalošago tšhišinyo ya modu wa boleng bja Boitsebo bja Bosetšhaba.
7.3. Leano le le hlamilwe go kgokagano yeo e kopantšwego, dipoledišano tšeo di nepišitšwego go batšeakarolo, le melaetša yeo e lego thwii le naga go netefatša gore go na le go sepelelana go kgabaganya mebaraka ya go fapafapana.
7.4. Brand SA e tla thoma go tsebagatša le go phethagatša Leano le.
C. Melaokakanywa
1. Molaokakanywa ye e mpshafditšwego ya Sešole wa 2025
1.1. Kabinete e dumeletše go išwa ga Molaokakanywa wo o mpshafaditšwego wa Sešole wa 2025 Palamenteng. Maikemišetšo a magolo a Molaokakanywa wo ke go fetoša dikarolwana tše itšego gore di sepelelane le kahlolo ya Kgorotsheko ya Molaotheo ya molato magareng ga O’Brien N.O le Tona ya Sešole le Bomahlwaadibona ba Sešole le Ba Bangwe ya 2024.
1.2. Molato woo o mabapi le boikemo bja dikgorotsheko tša sešole, kudu dikgorotsheko tše pedi tša mašole tša mathomo tšeo di hlomilwego ka fase ga Molao wa Magatokgalemo a Tlaleletšo a Sešole wa 1999, Kgorotsheko ya Moahlodi wa Sešole le Kgorotsheko ya Moahlodimogolo wa Sešole. Diphetošo tše di tla šogana le go se sepelelane moo go lego gona gomme go hlagišitšwego ke kgorotsheko ya godimo.
2. Molaokakanywa wo o mpshafaditšwego wa Magatokgalemo a Tlaleletšo a Sešole wa 2025
2.1. Kabinete e dumeletše go išwa ga Molaokakanywa wo o phetošwa wa Magatokgalemo a Tlaleletšo a Sešole wa 2025 Palamenteng.
2.2. Diphetošo tše di nepile gape go šogana le dikarolwana tše itšego gore di sepelelane le kahlolo ya Kgorotsheko ya Molaotheo ya molato magareng ga O’Brien N.O le Tona ya Sešole le Bomahlwaadibona ba Sešole le Ba Bangwe ya 2024.
2.3. Molato woo o mabapi le boikemelo bja dikgorotsheko tša sešole, kudu dikgorotsheko tše pedi tša mašole tša mathomo tšeo di hlomilwego kafase ga Molao wa Magatokgalemo a Tlaleletšo a Sešole wa 1999, Kgorotsheko ya Moahlodi wa Sešole le Kgorotsheko ya Moahlodimogolo wa Sešole.
3. Go gogelwa morago ga go šogwa ga Molaokakanywa wa Taolo ya Dikepe tša Kgwebo wa 2023
3.1. Kabinete e dumeletše go gogelwa morago go tšwa Palamenteng ga Molaokakanywa wa Dikepe tša Kgwebo wa 2023 go dumelela Kgoro ya Dinamelwa go feleletša tshepedišo ya Nedlac.
3.2. Molaokakanywa wo o fetoša Molao wa Dikepe tša Kgwebo wa 1951 go kgontšha pono ya mmušo yeo e nepilego go tsošološa karolo ya dikepe ya lekala la dinamelwa tša ka meetseng yeo e nepilego go kaonafatša go kgatha tema ga wona kgolong ya ekonomi.
D. Bao ba thwetšwego mešomong
Batho ka moka bao ba thwetšwego mešomong mangwalo a bona a thuto a tla kgonthišišwa le go tiišeletšwa ka mekgwa ya maleba.
1. Morena Bongani Sayidini bjalo ka Mohlankedimogolophethiši wa Mokgatlo wa Dipetroleamo ya Afrika Borwa.
2. Mohumagadi Ditebogo Barbara Kgomo bjalo ka Mohlankedimogolophethiši wa Taolo ya Nyuklea ya Setšhaba.
3. Morena Makhahlele Richard Manzini bjalo ka Mohlankedimogolo wa Dipeeletšo ka go Mokgatlo wa Tlhabollo ya Dikgwebopotlana le Ditšhelete (SEDFA).
4. Morena Molatlhegi Kgauwe bjalo ka Mohlankedimogolo wa Ditšhelete ka SEDFA.
5. Mohumagadi Xoliswa Daku bjalo ka leloko la Boto ya Koporase ya Inšorense ya Sekoloto sa Diromelwantle ya Afrika Borwa.
6. Morena Christoffel Johannes Lotter go yo šomela Boto ya Taolo ya Maemakepe a Afrika Borwa.
7. Maloko a Boto ya Tirišano ya Enetši ya Nyuklea ya Afrika Borwa
i. Morena David Nicholls (Modulasetulo).
ii. Ngaka Vuyo Mthethwa (Motlatšamodulasetulo);
iii. Ngaka Derik Wolvaart;
iv. Ngaka Khensani Xivuri;
v. Morena Ismail Lambat;
vi. Ngaka Pulane Molokwane;
vii. Morena Eugene Julies; le
viii. Mohumagadi Phumelele Dlungwane
8. Balaodi go Boto ya Eskom Holdings SOC Ltd
i. Ngaka Busisiwe Vilakazi
ii. Morena Lwazi Goqwana
iii. Morena Clive Le Roux
iv. Ngaka Andrew Barendse
v. Ngaka Dimakatso Matshoga
vi. Ngaka Kgaogelo Chiloane
vii. Mme Sharmila Govind
viii. Ngaka Vuyo Peach
ix. Ngaka Tsakani Mthombeni
x. Mohumagadi Bajabulile Tshabalala
xi. Morena Tshokolo Nchocho
9. Go thwalwa ga maloko a tlaleletšo a nakwana a boto ya Etšensi ya Tirelo le Phihlelelo ya Lefase ya Afrika Borwa
i. Morena Busani Ngcaweni;
ii. Mohumagadi Yolisa Kedama;
iii. Mohumagadi Carmen Cupido; le
iv. Mohumagadi Rachel Kalidass.
10. Balaodibagolo ba Boto ya Mokgatlo wa Dinamelwa tša Tsela tša go Tshela Mellwane ya Naga (C-BRTA)
i. Morena Kevin van der Merwe (o thwetšwe leswa) – Modulasetulo
ii. Moadfokeiti Adila Chowan (o thwetšwe leswa)
iii. Mohumagdi Loyiso Kula (o thwetšwe leswa) – Motlatšamodulasetulo
iv. Mohumagadi Keitumetse Mahlangu
v. Mohumagadi Yongama Pamla-Dhludhlu
vi. Ngaka Dineo Penelope Mathibedi
vii. Mohumagadi Zandile Kabini
viii. Morena Randall Howard
ix. Morena Dave Jackson Moswane
E. Ditsebišo go Kabinete
1. Pego ya Nyakišišo ya Go Šitwa ga Lefelo la go Lota Mašaledi a Moepo la Jagersfontein
1.1. Kabinete e ile ya tsebišwa ka dipoelo tša nyakišišo ya sethekniki ya go šitwa ga Lefelo la go Lota Mašaledi a Moepo la Jagersfontein leo le hlotšego masetlapelo a magolo go toropo ya Jagersfontein ka Freistata. Tona ya Meetse le Kelelatšhila, Mohumagadi Pemmy Majodina o tla lokolla pego yeo go ya setšhabeng.
1.2. Kabinete e thabišitšwe ke gore dipharwamelato di thomile gomme bao ba latofatšwago ba tšweletše pele ga kgorotsheko ya Mmasetrata wa Jagersfontein ka la 11 Lewedi 2025.
2. Lekala la makhura le gase la Afrika Borwa
2.1. Kabinete e amogetše tša gonabjaleka ga kgatelopele ya lekala la makhura le gase la Afrika Borwa. Naga ye e tloga e gatela pele ge go etla tšhomišong ka botlalo ya didirišwa tša gase bakeng sa tšweletšo ya mohlagase le merero ya go amana le dibešeletši, gomme maswika a yona a letsopatlapa ka Karoo Basin a akanywa go ba a ka ba bogolo bja dikhupikifiti tša go ka ba dithirilione tše 200 tša didirišwa tša gase. Naga ye e nyaka go potlakiša go epša ka mebarakeng ya ka nageng le ya ntle ga naga go bulela bokgoni bjo bo tletšego bja didirišwa tša yona tša makhura le gase.
2.2. Go epa le tšweletšo ye e tšwelago pele e akaretša Protšeke ya Gase ya Virginia ka Freistata, Protšeke ya Gase ka Volksrust, Mpumalanga le Protšeke ya Gase ya Metheini yeo e tšwago Malahleng ka Lephalale, Limpopo. Diprotšeke tše di na le didirišwa tša palo ye ntši tša gase ya tlhago le heliamo. Tona ya Boreahlapi, Dithokgwa le Tikologo o phethile Melawana ya Gase ya Letsopatlapa gomme yona e tla tšwelela ka kuranteng ya mmušo pele kgwedi ya Diphalane 2025 e fela. Melawana ye e tlo tla ka tlhako go bea melawana ya go laola dikotsi tša tikologo le polokego tšeo di amanago le go gogwa ga makhura le gase.
3. Maemo ka Sudan le ketelo ya semmušo ya Motlatšapresidente go ya Sudan Borwa
3.1. Kabinete e kgadile ntwa yeo e tšwelago pele ka Sudan yeo e dirilego gore go bolawe batho bao ba ka bago 60 moo ba 17 ba bona e lego bana, ke madira a Rapid Support Forces (RSF) ka la 9 Diphalane 2025 go la El Fasher yeo e lego motsemošate wa Dafur Leboa ka Sudan.
3.2. Kabinete e lemogile ka pelaelo gore go fihla gonabjale, diketekete tša batho di tšwela pele go thikwa ke madira ka El Fasher yeo bjale e lego lefelo la ditlhaselo tša go se kgethe motho ka RSF, tšeo di feteletšago le go feta masetlapelo a magolo go batho.
3.3. Ka go le lengwe, Kabinete e amogetše go tiišwa ga tšhomišano ka dikarolong tša tšhireletšo, bohlodi, le go hlongwa ga komitikopanelo ya ekonomi magareng ga Sudan Borwa le Sudan. Kabinete e tšea tiišo ye ya dikamano go ba ye bohlokwa kudu bakeng sa kaonafalo go boematia le tšhireletšo ya selete.
3.4. Bjale ka ge Afrika Borwa e le mothekgi wa khutšo, Kabinete e amogetše go akaretšwa ga ketelo ya semmušo ye e atlegilego ka Motlatšapresidente Paul Mashatile go ya Juba ka Sudan Borwa maemong a gagwe bjale ka Moemedi yo a Ikgethilego wa Mopresidente go Sudan Borwa. Ketelo ye ya semmušo e be e šeditše thakgololeswa ya phethagatšo ya Tumelelano ya Khutšo yeo e Mpshafaditšwego yeo e sa lego e emišwa.
4. Leano la Khutšo la Mopresidente Trump la Israele le Palestina gape le Go Boa ga Balweladitokelo tša batho ba Global Sumud Flotilla
4.1. Kabinete e amogetše go saenwa ga Leano la Khutšo la Mopresidente Trump la Israele le Palestina leo le kgorago tsela ya go fediša ntwa ya masetlapelo ka Gaza. Phihlelelo ye e sepelelana le boikgafo bja Afrika Borwa go khutšo, toka le tokologo lefaseng bja nako ye telele bakeng sa batho ba Palestina.
4.2. Kabinete e tšwela pele go hlohleletša mahlakore ka moka go hlompha magato a dipoledišano ao a fihleletšwego gape le go latela tshepedišo ya go tšea botse ebile yeo e akaretšago bohle ya sepolotiki yeo e tlo fedišago masetlapelo go batho gape le go thibela tahlegelo ya maphelo go ya pele.
4.3. Kabinete e tšwetše pele ya amogela go thoma ga phethagatšo ya Legato la 1 la Leano la Khutšo ka go lokollwa ga baswarwabothopša ba Isiraele gore go lokollwe le bagolegwa ba sepolotiki ba Palestina.
4.4. Mmušo wa Afrika Borwa o tšwela pele go ipiletša go bao ba šwahletšego Gaza le mebotwana ye mengwe ya Palestina gore ba tšwe fao.
4.5. Kabinete e amogetše gape le go boa ka polokego ga balweladitokelo tša batho ba Maafrika Borwa ba ba tshela bao ba kgathilego tema ka go Global Sumud Flotilla yeo e lego morero woo o nepilego go iša dijo le dihlare ka Gaza. Kabinete e ipiletša gore go bewe marumo fase, go be le phihlelelo ya dilo tše bohlokwa ntle le tšhitišo gape le go ntšhwa ga batho ka polokego ka mafelong ao a amilwego ke ntwa.
5. Tšeo di diregago tša sepolotiki ka Ripabliki ya Madagascar
5.1. Kabinete e lemogile ka pelaelo dikgaruru tša sepolotiki ka Ripabliking ya Madagascar, fao go bilego le go lobja ga maphelo le tshenyo ya thoto.
5.2. Kabinete e ipiletša gore go be le khutšo gape le gore batho ka moka / batšeakarolo ka moka ba nyake tharollo ya khutšo ya pharela ye ka mokgwa wo o tšweletšago pele dikokwane tša temokrasi le molao.
F. Ditiragalo tšeo di sa tlago
1. Kgwedi ya Dinamelwa
1.1 Bjale ka ge Diphalane e le Kgwedi ya Dinamelwa, Afrika Borwa e keteka karolo ye bohlokwa ya dinamelwa ge go etla go sepetšeng ekonomi ya rena le go aga maphelo a rena tšatši ka tšatši. Bjale ka ge kgwedi e le gare e kgatlampana, moketeko wo wa ngwaga le ngwaga o bonagatša go tia ga infrastraktšha ya rena ya dinamelwa go kgabaganya difofane, dikepe, dinamelwa tša bohle le ditsela.
1.2 Dipeeletšo tša rena ka lekaleng la dinamelwa di hlohleletša kgolo ya ekonomi le tlholo ya mešomo. Dikaonafatšo tša ditimela, ditsela le dinamelwa tša bohle di fetoša ka moo Maafrika Borwa a fihlelelago mafelo a mošomo, dikolo le maphelo a boitapološo ka gona, gomme se se tšweletšapele kgokagano ye kaonekaone le dibaka.
1.3 Selo seo se ilego sa ikgetha ka Kgwedi ya Dinamelwa e bile Beke ya Difatanaga ya Afrika Borwa yeo e bilego gona go tloga ka la 1 go fihla ka la 3 Diphalane 2025 ka Nelson Mandela Bay. Tiragalo ye ya go ikgetha e ile ya kopantšha baetapele ba intasteri, babeeletši, batšweletši ba didirišwa le di-SMME go thoma dipoledišano ka ga go potlakiša dipeeletšo, tlhabollo ya mabokgoni le intasteri yeo e akaretšago bohle go kgabaganya mmasepala wo wa setoropo le profense, gomme se se tšweletša pele boikgafo bja Afrika Borwa go bokamoso bja dinamelwa bjo bo atlegilego ebile bo lekalekanago.
2. Samiti ya Bošupa ya Toka ya Leago
2.1. Mopresidente Cyril Ramaphosa o tla tsenela Samiti ya Bošupa ya Toka ya Leago Yunibesithing ya Stellenbosch ka la 17 Diphalane 2025, yeo e tlo swarwago ka fase ga moeno wo: “Toka ya Leago, Tšhireletšo ya Dijo le Khutšo: Ditsela tša go Iša go Tekatekano, Botee, Boswareledi le Kgotlelelo ya Klaemete”.
2.2. Samiti ye e tlo kopantšha bahlami ba dipholisi, bahlami ba melao, mekgatlo ya dipolotiki, boahlodi, baetapele ba setšo le ba ditumelo, setšhaba le dirutegi go hlama poledišano ya maemo a godimo mabapi le tšhireletšo ya dijo bjalo ka leswika la motheo bakeng sa toka ya leago, tekatekano le tlhabollo yeo e swarelelago.
2.3. Samiti ye e nepile go potlakiša kgatelopele yeo e išago go Nepo ya Bobedi ya Tlhabollo ye e Swarelelago (Go Fediša Tlala) gape le Lenaneo la AU la 2063. Yona e sepelelana gape le Leano la Tlhabollo la Bosetšhaba la Afrika Borwa la 2030, leo le beago pele phedišo ya tlala le phokotšo ya go se lekalekane.
3. Samiti ya Afrika ya 2025
3.1. Samiti ya Afrika ka Financial Times e tla swarelwa ka London magareng ga la 21 le 22 Diphalane 2025 ka fase ga moeno wo: “Afrika ka Lefaseng leo le Fetogago”.
3.2. Samiti ye e tlo kopantšha dihlogo tša mebušo, ditona, baetapele ba tša kgwebo, bahlankedi le ditheo tša ditšhelete, le bahlami go bona ka fao dinaga tša Afrika di ka kgonago go retološa dikamano tša boditšhabatšhaba, go šomiša ka botlalo ditheknolotši tša titšithale le mpshafatšo, go tiiša kgwebišano ya mo kontinenteng gape le go goketša dipeeletšo tšeo di swarelelago.
3.3. Samiti ye e fana ka sefala ya go loutša lentšu la Afrika ka dipoledišanong tša boditšhabatšhaba, go hlola ditšhomišanommogo le go betla bokamoso bjoo bo itheilego ka kgotlelelo le kgolo yeo e akaretšago bohle.
4. Ditlhahlobo tša Marematlou
4.1. Kabinete e lakaleditše Barutwana ba Marematlou ba 2025 mahlatse le mahlogonolo e le ge ba itokišetša go ngwala ditlhahlobo tša Marematlou tšeo di tlo thomago ka la 21 Diphalane 2025 gomme tša phethwa ka la 27 Dibatsela 2025.
4.2. Mmušo o leboga boikgafo bja barutiši, batswadi le bahlokomedi bao thekgo ya bona ya go se fele e fago barutwana boitshepo bja go atlega.
4.3. Kabinete e ipiletša go batswadi le bahlokomedi gore ba tšwele pele ba kgatha tema ka go hlohleletša barutwana, gape ebile ba netefatša gore ba ba le tikologo yeo e ba thekgago ebile e ba loketšego ge ba ithuta ebile ba itokiša ba le ka gae.
G. Melaetša
1. Matshediso
Kabinete e iša matshidiso go batho le mmušo:
- Tonakgolo ya Peleng ya Kenya (2008 – 2013), Morena Raila Odinga. O šomile gape bjale ka Moemedi yo a Phagamego wa Kopano ya Afrika ka tša Tlhabollo ya Infrastraktšha(2018 – 2023). Radipolotiki wa nako ye telele gape e bile e le leloko la Palamente ka nageng ya Kenya.
Kabinete e iša matshidiso go bagwera le ba lapa la:
- Tona ya peleng gape ebile e be e le Motseta wa Afrika Borwa ka nageng ya Fora, Morena Nathi Mthethwa yo a šomilego ka Kabineteng mengwaga ye 15 ka Kgorong ya Dipapadi, Bokgabo le Setšo le ka go ya Maphodisa. O bapetše gape karolo ye bohlokwa ka ntweng ya tokologo ya Afrika Borwa. Ka go lemoga tirelo ya gagwe ya botswerere go naga ya gaborena le batho ba yona, Mopresidente Ramaphosa o mo abetše Polokoe ya Semmušo ya go Ikgetha ya Legoro la 2.
2. Ditebogišo
Kabinete e lebogiša le go lakaletša tše botse go:
- Profesa Peter Mutharika ge a thopile dikgetho ka dikgethongkakaretšo tša Ripabliki ya Malawi, ya ba ya mo dumela katlego e le ge a itokišetša go tšea maikarabelo a a magolo ao a a fiwago ke batho ba Malawi. Afrika Borwa e tloga e letetše go tšwela pele ka tšhomišano ya yona le mmušo wa Profesa Mutharika, le go šoma mmogo go matlafatša dikamano tša segwera tša nako ye telele gape le botee magareng ga dinaga tše tše pedi.
- Profesa Priya Soma-Pillay ge a kgethilwe bjalo ka Motlatšapresidente wa Mokgatlo wa Boditšhabatšhaba wa Dingaka tša Malwetši a Basadi le Pelegišo (FIGO) nakong ya Kopano ya Kakaretšo ya FIGO ya 2025 ka Motsekapa.
- Afrika Borwa e lemogilwe ka maitapišo a yona a tlholompsha a go lwa le mmele wo montši gape le malwetši a go se fetele, moo e filwego Sefoka sa Sehlophatšhomo sa Mokgatlo wa Bositšhabatšhaba sa Ditšhabakopano Kopano ya Bolesome ya Ngwaga le Ngwaga ya Sehlophatšhomo ka New York, USA. Temogo ye e gatelela boetapele bja Afrika Borwa ge go etla tabeng ya go šogana le go ba le mmele wo montši gape le malwetši ao a sa fetelego, gomme se e dira gore e be ketapele go ditšhaba tše dingwe gore di e latele ka ntweng kgahlanong le malwetši ao a ka thibelwago.
- Ofisi ya Mošireletši wa Setšhaba wa Afrika Borwa (PPSA) ge e fetša mengwaga ye 30. PPSA e bapetše karolo ye bohlokwa ge go etla go phethagatšeng dikokwane, bophatlalatša le pušo ye botse tša temokrasi.
- Sehlapha sa Di-Springbok ka diphenyo tša sona tša go latelana Diphadišanong tša Rugby. Sehlopha se se bontšhitše kgotlelelo, mabokgoni le kopano leboelela sefaleng sa lefase.
- Sehlopha sa kgwele ya maoto sa ba ka fase ga mengwaga ye 20, seo se tsebegago ka la Amajita, ge se fihleletše legato la dihlopha tše 16 go Sebjana sa Lefase sa FIFA sa ba ka Fase ga Mengwaga ye 20 ka nageng ya Chile.
Dinyakišišo:
Morena Sandile Nene – Seboleledi sa Mmušo sa Motšwaoswere
Mogala: 083 712 2316
