A. Ditaba tšeo di amago badudi
1. Maphelo
1.1. Afrika Borwa e tšwela pele go bontšha bokgoni bjo bogolo go tša maphelo le saense lefaseng ka bophara ka go šogana le ditiragalo tša Hantavirus
1.1.1. Kabinete e lebogišitše Setheo sa Setšhaba sa Malwetši a go Fetela (NICD) ka boemo bja sona bja bokgoni ka go phekola ditiragalo tše pedi tša Hantavirus mo diiring tše 24 tša go amogelwa ga balwetši ka bookelong bja Gauteng.
1.1.2. Kabinete e tšebišitšwe ka maemo ao a dirilego gore balwetši ba amogelwe bookelong bja ka Afrika Borwa go tšwa sekepeng sa MV Hondius.
1.1.3. Kabinete gape e lebogile Kgoro ya Maphelo ka lebelo le bokgoni bja go šogana le go hwetša batho bao ba kopanego le balwetši ba Hantavirus pele phekolo e dirwa.
1.1.4. Kabinete e rata go tloša letšhogo lefe goba lefe la go phulega ga leuba le lengwe ka lebaka la go ba le magotlo mo mebasepaleng ye mengwe, borasaense ba re kgonthišeditše gore Hantavirus ga e hwetšagale go magotlo afe goba afe ka Afrika Borwa goba kontinenteng ya Afrika.
1.1 Tšhelete ya thekgo ya Biovac ya go lekana R1.5 bilione ya go kgontšha bokgoni bja go tšweletša moento ka Afrika Borwa
1.1.1 Kabinete e amogetše tšhelete ya thekgo ya go lekana R1,5 bilione magareng ga Biovac le European Investment Bank (EIB) Group go thoma lefelo la tšweletšo ya meento ye mentši la mathomo ka Afrika go tloga mathomong go fihla mafelelong.
1.1.2 Lefelo le, leo le beetšwego go phethwa ka 2028, le tla tšweletša meento ya go nwewa ya kholera, ke moka la katološa go tšweletša meento ya polio, nyumonia, le themo. Ge le šetše le šoma ka botlalo, lefelo le tla ba le bokgoni bja go tšweletša dihlare tše 40 milione ka ngwaga, la matlafatša kudu maatla a maphelo a Afrika le tšhireletšego ya theko ya dithoto.
1.1.3 Protšeke ye gape e letetšwe go hlola mešomo ye e fetago 340 ya batho ba ba nago le bokgoni le mešomo ye e sego ya thwii ye e ka bago 7000, mola e godiša phetišetšo ya theknolotši, boithomelo le maatlafatšo ya maphelo ya nako ye telele go phatlalala le kontinente.
1.2 Bolwetši bja Tlhako le Molomo
1.2.1 Kabinete e amogetše tšwelopele ka lenaneo la go hlabela moo palomoka ya dikgomo tše 2.59 milione e hlabetšwego kgahlanong le bolwetši Tlhako le Molomo (FMD) go fihlela lehono.
1.2.2 Kabinete e lemogile go fihla ga dihlare tša FMD tše dimilione tše pedi go tšwa Türkiye, bjalo ka karalo ya seripa sa mathomo sa dihlare tše dimilione tše tshelelago tšeo di otilwego. Kgoro ya Temo e aba meento go diprofense ka go šomiša mmotlolo wa kabo yeo e theilwego go saense yeo e laolwago ke seemo sa go ba kotsing ga diphoofolo le data ya tšona.
1.2.3 Dihlare tše dingwe tša dimilione tše hlano di otilwe go tšwa Argentina ka Ditšweletšwa tša Diphedi tša Onderstepoort.
2 Ekonomi
2.1 Mmušo o tšwela pele go tsena ka bogare go fokotša ditshenyegelo tša godimo tša theko ya makhura a difatanaga
2.1.1 Kabinete e tšwela pele go tsena ka bogare go fokotša ditshenyegelo tša godimo tša theko ya makhura a difatanaga ka lebaka la ntwa ye e tšwelago pele ya US/Israel ka Iran yeo gape e hueditšego selete sa Gulf.
2.1.2 Kabinete e thekgile thušo ya motšhelo wa makhura a difatanaga wa R17.2 bilione bjalo ka ge e tsebišitšwe ke Tona ya Matlotlo woo o tla šomago dikgwedi tše tharo (3) go tloga ka Moranang – Phupu 2026 gomme Sehlophatšhomo sa Ditona se tšwela pele go sekaseka magatotharollo a mangwe go fokotša khuetšo ya makhura a difatanaga le tlhaelelo ya menontšha go Maafrika Borwa.
2.1.3 Kabinete e laetše Tona ya Methopo ya Diminerale le Petroleamo a thekgwa ke Tona ya Dikamano tša Boditšhabatšhaba le Tirišano, go sepediša magato a SADC go netefatša tšhireletšego ya makhura a difatanaga le menontšha le kabo mo seleteng.
3 Dikamano tša Boditšhabatšhaba
3.1 Katlego ye kgolo ka fase Karolo ya ll ya Protšeke ya Meetse ya Dithaba tša Lesotho – Leporogo la Senqu
3.1.1 Thakgolo ya Leporogo la Senqu ka Mokhotlong Mmušong wa Lesotho, e emela katlego ye kgolo ka fase ga Protšeke ya Meetse ya Dithaba tša Lesotho. Leporogo le leswa le tla kgonthiša phihlelelo yeo e sa šitišwego go Mokhotlong, Sani Pass, le mafelo a kgauswi.
3.1.2 Protšeke ye e kgathile tema ye kgolo go kaonafatšo ya ekonomi ya Lesotho, gomme Afrika Borwa e aga makgolo a dikilometara tša ditsela go kaonafatša phihlelelo go mafelo a matamo a kgole le go aba ditefo tša letseno tša go ka lekana R3,8 bilione ngwaga ka ngwaga go letlotlo la naga ka fase ga Protšeke ya Meetse ya Dithaba tša Lesotho.
3.1.3 Protšeke ya Meetse ya Dithaba tša Lesotho e netefatša gore Gauteng e na le phihlelelo ya meetse a mantši ka lenaneo la Meetse la Vaal, mola Lesotho le tšweletša mohlagase wa go fehlwa ka meetse le go aba tšhomišo ya meetse a go hlweka, nošetšo, boreahlapi, le tlhohleletšo ya boeti.
3.2 Ketelo ya Mošomo ya Spain e tiišetšwa go ba molekani yo bohlokwa
3.2.1 Kabinete e amogela ketelo ya semmušo yeo e atlegilego ya Mopresidente Cyril Ramaphosa ka Spain, yeo e dirilego gore go be le maikgafo a €2.1 bilione go phetogelo ya Afrika Borwa go mohlagase wa go tsošološwa go magoro a haedrotšene ya tlhago, difatanaga tša go sepela ka mohlagase, enetši ya go mpshafatšega le mananeokgoparara ka kabo ya mohlagase nageng ka bophara.
3.2.2 Ka 2025, palomoka ya kgwebo magareng ga Afrika Borwa le Spain e fihlile €2.8 billione, gomme thomelo go ya Spain ya oketšega go fihla go €1.3 bilione. Go tlaleletša, dikhamphani tša go feta 150 tša Spain gonabjale di šoma ka mo Afrika Borwa, di thekga mešomo ye e fetago 20,000 go ralala le mafapha go thoma ka enetši ya go mpshafatšega le mananeokgoparara go fihla go ditirelo tša ditšhelete theknolotši le boeti.
4. Polokego le Tšhireletšego
4.1 Ditlhohlo tša Bofaladi
4.1.1 Kabinete e kgala ka bogale go phatlalatšwa ga dibidio tša maaka le diswantšho tša maaka ba bolela gore go na le ditlhaselo tša badudi ba dinaga tša ka ntle ka Afrika Borwa. Dibidio le diswantšho tše tša maaka ga se tša maaka fela, eupša di ikemišeditše go senya leina le maemo a mabotse a Afrika Borwa lefaseng le go goboša seriti se se botse sa Afrika Borwa maemong a boditšhabatšhaba le go nyatšiša matsapa a Afrika Borwa a go fihlelela lenaneothero la Afrika ye kaonafetšego.
4.1.2 Maafrika Borwa ba na le tokelo ya go ipelaetša kgahlanong le tlhohlo ya bafaladi bao ba sego molaong bao ba tlago ka bontši, eupša dikgaruru tšeo di amanago le maipelaetšo ao ga di amogelege gomme bahlankedi ba phethagatšo ya molao ba swanetše go šogana le bathomi ba dikgaruru tšeo.
4.1.3 Kabinete e kgala ka bogale maiteko bojato a go gapa ka dikgoka dingongerego tša nnete tša Maafrika Borwa mabapi le hlokego ye e lego godimo ya mešomo, le dibaka tše dinnyane tša ekonomi ka go kalatša Maafrika Borwa go hlakahlakanya naga go akaretša go beakanya dihlaselo go badudi ba dinaga tša ka ntle le ditlhaselo tša merafe ye mengwe.
4.1.4 Kabinete e boeleditše gore go na le mošomo wo o tšwelago pele wa go rarolla bothata bja bafaladi bao ba sego molaong wo o akaretšago go matlafatša taolo ya mellwane ka mošomo wa BMA, go potlakiša go bušetša bafaladi bao gae, go rarolla bosenyi ka gare ga ditšhaba tša bafaladi, le go šireletša mešomo le dibaka tša Maafrika Borwa.
4.1.5 Mabapi le dibaka tša Maafrika Borwa, Kabinete e laetše Kgoro ya Mošomo le Bašomi go matlafatša ditlhahlobo tša mafelo a mošomo go netefatša go obamela melao ya mošomo go Makaleng ao a lego kotsing go swana le mafelo a dijo le marobalo, dipolase, go otlela dilori, le kago go tše dingwe.
4.1.6 Kabinete gape e laetše mebasepala go netefatša gore e phethagatša melao ya mmasepala, ka go bea pele melao ya mmasepala ya go amana le tša kgwebo. Maafrika Borwa le bona ba swanetše go kgatha tema ya bona ka go iletša go hiriša dilaesense tša dikgwebo tša bona.
4.1.7 Mo legatong la pholisi, Sengwalwa se se Fetlekilwego sa Makgoraditsela ka Bafaladi se bolela ka ditšhitišo tša melao ya bafaladi ya gonabjale, ka go tsebagatša dipeakanyetšo t ditaelo tša motheo wa naga ya polokego ya mathomo, go iša disenthara tša go amogela bafaladi kgauswi le mollwane, le karolo ya go kgontšha Dikgoro tše maleba go hlaola dikgwebo tše di itšego, mešomo ya bokgoni, le dikgwebo tšeo e lego fela tša Maafrika Borwa le bafaladi.
B. Diphetho tša Kabinete
1. Sengwalwa se se Fetlekilwego sa Makgoraditselasa Mmušo wa Selegae wa 2026
1.1. Kabinete e dumeletše go phatlalatšwa ka kuranteng ya mmušo Kakanywa ye e Fetlekilwego ya Makgoraditsela ya Mmušo wa Selegae gore go boledišanwe le setšhaba ka yona. Sengwalwa sa Makgoraditsela se se Fetlekilwego ke karolo ya diphetogo tša mmušo wa selegae tšeo di ikemišeditšego go beakanya mmušo wa selegae go bopa lenaneo la mmušo wa selegae la sebjalebjale, leo le matlafaditšwego gomme le nago le bokgoni bja go aba ditirelo tša go swarelela.
1.2. Go sekasekwa ga Sengwalwa se sa Makgoraditsela go thomilwe go netefatša gore tlhako ya pholisi ya mmušo wa selegae e dula e arabela go ditlhabollo tša gonabjale le tše di tšwelago pele, ekonomi, sebaka le dinnete tša tikologo. Merero ye ye bohlokwa ye tlago pele ye e hlaotšwego ke setlwaedi sa ditheo ka mebasepaleng, boetapele bja sepolotiki le go akaretšwa ga maikarabelo, tshepedišo ya tirišano ya magareng ga makala a mmušo, go ama badudi, diphetogo tša ditšhelete le tša ekonomi, le boetapele bja setšo.
1.3. Kakanywa ye ya Sengwalwa sa Makgoraditsela se se Fetlekilwego e amogela mokgwa wa go phethagatša ka dikgato le ka go latelana go netefatša phetogo ya go kwagala le go swarelela ka mmušo wa selegae. Kakanywa ye e lemoga gore maitapišo a phetogo a kua morago a fela a folotša legatong la phethagatšo, ka lebaka la go se ele hloko go lekana ga go latelelana le taolo ya phetogo. Bjalo ka kgato ya mathomo ya phetogo, Kakanywa ye e Fetlekilwego ya Makgoraditsela e šišinya go thewa ga Bolaodi bja Taolo ya Phetogo ya Mmušo wa Selegae bjo bo beetšwego nako.
2. Mokgwa wa Nako ye Telele wa Tlhabollo ya Madira a SANDF
2.1. Kabinete e dumeletše Mokgwa wa Nako ye Telele wa Tlhabollo ya Madira le Kgopolo ya Peakanyo ya SANDF le ditokumente tše Bohlokwa tš Pholisi tše di šikago le yona.
2.2. Ka morago ga mengwaga ye mentši ya go se hwetše tshepo ya ditšhelete, difala tša kgale le tlhabollo ya bokgoni bjo bo se nago methopo ya maleba, SANDF e hlomile mokgwa wa tlhabollo ya madira woo o beakantšwego go ya ka maswao ao a hlalositšwego ka go leano la "Leeto go ya go tše Dikgolo"
2.3. Mokgwa wo o kgokaganya mpshafatšo ya tšhireletšo le tlhabollo ya Setšhaba, tielelo ya selete, le kgolo ya ekonomi go hlola Madira a Tšhireletšo a maatla a bokgoni bja go šogana le bobedi tša mo gae e lego ditlhohlo tša gonabjale le matšhošetši a nako ye telele.
3. Mengwaga ye 70 ya Ntwa ya Basadi le Matlafatšo: Leswao la Matlafatšo ya Basadi go Ekonomi ya Leago
3.1. Bjalo ka karolo ya boikgafo bja matlafatšo ya basadi ya go kwagala bjalo ka naga e keteka mengwaga ye 70 go tloga mola Basadi ba Ipelaetšago ka 1956, Kabinete e dumeletše phethagatšo ya Leswao la Matlafatšo ya Basadi go Ekonomi ya Leago bjalo ka kelo ya mošomo ya ngwaga ka ngwaga go lekola le go latišiša tšwelopele go matlafatšo ya basadi go ekonomi ya leago mo nakong ye itšego.
3.2. Leswao le šogana le tlhokego ya magato ao a lekanyeditšwego a matlafatšo ya ekonomi ya leago ya basadi le go kgatha tema go dihlongwa tša go tšea diphetho ka Afrika Borwa. Mo karolong ya leago, Leswao le tla nepiša go maphelo le thuto; mo karolong ya ekonomi, Leswao le tla nepiša go mmaraka wa bašomi le methopo, gomme go lekala la go tšea diphetho. Leswao le tla nepiša go lekala la mmušo le go tšea diphetho le go lekala la praebete la go tšea diphetho.
3.3. Motheo wa Leswao la Matlafatšo ya Basadi go Ekonomi ya Leago o bontšha go tšea diphetho mo lekaleng la mmušo bjalo ka sebopego seo se tšweletšago tša maemo a godimo go lebeletšwe matlafatšo ya basadi mola mmaraka wa bašomi le dibopego tša methopo di tšweletša maemo a fase. Magoro a taetšo ye e lego fase a akaretša difeme tše beng ba tšona e lego basadi, dišere tša Bahlankediphethiši ba basadi bao ba lego lenaneong la JSE, khumanego ya dikoloto, le go šoma mešomo ya mabokgoni a godimo.
4. Mengwaga ye 70 ya Ntwa ya Basadi le Matlafatšo: Pego ya Botshelela ya Nako le Nako ya Phethagatšo ya Kopano ya go Fediša Mekgwa ka Moka ya Kgethollo kgahlanong le Basadi
4.1. Kabinete e dumeletše Pego ya Botshelela ya Nako le Nako ya Afrika Borwa ya phethagatšo ya Kopano ya go Fediša Mekgwa ka Moka ya Kgethollo Kgahlanong le Basadi (CEDAW).
4.2. Pego e fa tšwelopele yeo e dirilwego ke Afrika Borwa mo go matlafatšeng molaotheo, pholisi ya molao le tlhako ya ditheo go tekatekano ya bong, matlafatšo ya basadi le tekatekano ya motheo. Tšwelopele e akaretša:
- Phethagatšo ya Peakanyo ye e Arabelago Dinyakwa tša Bong, Tekanyetšo, Tlhokomelo, Tekolo le Tlhako ya Tlhakišo.
- Leano la Mokgwa wa Setšhaba go GBVF ya 2019,
- Mananeo a matlafatšo a ekonomi,
4.3 Go dira setlwaedi go bong go lekala la mmušo le boemedi bja basadi go boetapele le go tšea diphetho. Le ge go na le tšwelopele ye bohlokwa, Afrika Borwa e sa tšwelapele go šoma go šogana le ditlhohlo tše di ganelago tša sebopego le tša phethagatšo tšeo di akaretšago palo ya godimo ya basadi ba go se šome, bothata bja dikgaruru tšeo di theilwego go bong le dipolao tša basadi le bana, phetolelo ye e fokolago ya go hwetša thuto go dipoelo tša mošomo, le go tsenya setlwaedi sa bong go lekala la praebete.
C. Ditsebišo tša Kabinete
1. Go Lokiša Mmušo wa Selegae: Pego ya Tšwelopele ya Phethagatšo ya Kotara ya 2 ya Ngwaga wa Ditšhelete wa 2025/26 mabapi le Phethagatšo ya Maano a Hwetša Ditšhelete go Mebasepala ka fase ga Tsenogare ya Bosetšhaba
1.1 Kabinete e amogetše tsebišo ya phethagatšo ya Maano a go Hwetša Ditšhelete (diFRP) go mebasepala ye mene (4) yeo e beilwego ka fase ga tsenogare ya bosetšhaba go ya ka Karolo ya 139 (7) ya Molaotheo, e lego mebasepala ya selegae ya Lekwa, Enoch Mgijima le Ditsobotla, le Mmasepalamogolo wa Mangaung. Tšwelopele ya phethagatšo ya diFRP ya go hwetša phetogo ya phethagatšo ya ditšhelete le phethagatšo ya kabo ya ditirelo go mebasepala ye ke mathata, ntle le Ditsobotla.
1.2 Kabinete e lemogile gore ka mebasepaleng ye e meraro (3), phethagatšo ya FRP e eme felo gotee go Karolo ya 1 yeo e bego e swanetše goba e fedile ka dikgwedi tše 12 go tloga mola FRP e dumelelwago. Ngongerego ye kgolo ke go se phethagatšwe ga mešongwana ye nago le ditlamorago go tša ditšhelete, kaonafatšo ye e bonagalago ya ditaetši tša ditšhelete le go lekalekana ga tšona, le ditaolo tša go se šome gabotse go ditaetši tša ditshenyegelo tšeo e dirago gore go be le dikaonafatšo tše di bonagalago go kabo ya ditirelo.
1.3 Kabinete e dumeletše go swarwa ga mebasepala ye mene ka fase ga ditsenogare tša bosetšhaba go ya ka Karolo ya 139(7) ye e balwago le Karolo ya 139(5)(a) ya Molaotheo. Kabinete e dumeletše gore magato a dirwe go gapeletša mebasepala yeo e nago le mathata a ditšhelete go tsenela Ditumelelano tša Kabelano ya Ditšweletšwa go makalakgwebo a go swana le Eskom go ba yona e abago mohlagase le go kgoboketša matlotlo.
2. Tlhomamišo ya Lefelo la Ekonomi la go Ikgetha la Fetakgomo Tubatse leo le akantšwego, Profenseng ya Limpopo
2.1 Kabinete ba tsebišitšwe le go thekga maikemišetšo a Tona ya Kgwebo, Intasteri le Phadišano go hloma Lefelo la Ekonomi la go Ikgetha la Fetakgomo Tubatse (FTSEZ) leo le lego Seleteng sa Sekhukhune, Profenseng ya Limpopo.
2.2 FTSEZ ke karolo ya bohlokwa ya Leano la Tlhabollo la Limpopo yeo e ikemišeditšego go godiša tlhabollo ya diintasteri, go hlohleletša kgolo ya ekonomi, le go hlola mešomo ka go goketša dipeeletšo ka meepong, go holega dimineraleng, enetši, temo, le makala a difatanaga. FTSEZ e tla phethagatšwa ka dikgato tše tharo.
3. Dibaka tša Ekonomi tše di Kgonagalago tša Afrika Borwa ka Lefelo la Kgwebo la go Lokologa la Kontinente ya Afrika (AfCFTA)
3.1 Kabinete e tsebišitšwe ka dibaka tša ekonomi tša Afrika Borwa go kontinente ka moka AfCFTA. AfCFTA e hlama ye nngwe ya mmaraka o tee ka monwana wo mogolo wa lefase wa batho ba go feta 1.3 bilione ka bontši le GDP ye e kopantšwego ya go feta US$3.4 trilione.
3.2 Tumelelano ya AfCFTA ye kgolo e aba dibaka tša mokgwa go bulela kgonagalo ya ekonomi, go katološa mebaraka ya go iša ntle, go matlafatša magato a kabo le tatelano ya diintasteri, go godiša peeletšo, le go sepetša kgolo ya go swarelela.
3.3 Go tloga ge Afrika Borwa e thakgotše kgwebo ka fase ga maemo a kgetho a AfCFTA go tloga ka Pherekgong 2024 go fihla ka Dibokwane 2026, kgwebo e oketšegile go fihla go R2.6 bilione go akaretša mehuta ye e fapanego ya ditšweletšwa tša go swana le didirišwa tša meepo, didirišwa tša mohlagase, dijo, diaparo, diplasitiki le metšhene ya mohlagase.
4. Kabo ya Meetse a go Hlweka a Hammanskraal
4.1 Kabinete e amogetše pego ya tšwelopele ya Protšeke ya Meetse a go Hlweka ya Hammanskraal yeo e phethagatšwago ke Magalies Water ka fase ga Kgoro ya Meetse le Tlhwekišo le Mmasepala wa Toropokgolo ya Tshwane. Ge go fela, protšeke e tla aba meetse a go nwewa go malapa a ka bago 47 550, go šomela badudi ba go ka ba 180 679.
4.2 Kabinete e lemogile gore dimmotšulo tše nne ka moka tša karolo ya Protšeke yeo e abjago ka fase ga Magalies Water di agilwe le go lekwa, go kgontšha lenaneo go tšweletša go fihla go 50 ML ya meetse a hlwekilego ka letšatši.
4.3 Tona ya Meetse le Tlhwekišo o tla re mo bekeng a lekola protšeke go kgonthiša go lebelelwa ga mošomo wo o ka bago o šaletše morago ka Mmasepala wa Toropokgolo ya Tshwane go kgonthiša phihlelelo ya go felelela go meetse go badudi ba Hammanskraal.
4.4 Kgoro gape e tsebišitše Kabinete ka tšwelopele ya go thibolla diprotšeke tša meetse tšeo di thibanego le maemo a dikoloto tša mmasepala go diboto tša meetse, tšeo di ka beago kotsi ye kgolo go tšhireletšego ya meetse le go tshepetšo ya ya ditšhelete ya diboto tše. Tshedimošetšo ka botlalo ya ditaba tše e tla dirwa ka morago ga WaterCom.
5. Kabo ya mohlagase e dula e bolokegile ka go tia gomme kgaotšo ya mohlagase e kgauswi le go ba selo sa maloba
5.1 Kabinete e amogetše Maemo a Mohlagase a Marega ao a abilwego ke Eskom, yeo e laeditšego gore dibaka ke tše dinnyane tša gore go be le kgaotšo ya mohlagase gare ga Moranang le Phato, se se dira phetogo ye bohlokwa leetong la taolo ya mohlagase wa naga ya rena.
5.2 Kabinete e amogela gape go šogana le phokotšo ya mohlagase gomme badirelwa ba 352 968 ga ba sa angwa ke phokotšo ya mohlagase ka dinako tša sephethephethe. Phokotšo ya mohlagase ga e sa le gona ka Kapa Leboa le Kapa Bodikela, gomme phokotšo ya mohlagase e tla fedišwa Diprofenseng tše hlano (5) ka 2026 gomme ke fela Gauteng le KwaZulu-Natal tšeo ditlhohlo tša tšona tša phokotšo ya mohlagase di tla fedišwago ka 2027.
D. Melaokakanywa
1. Molaokakanywa wo o Mpshafaditšwego wa Molao wa Bana, wa 2026
1.1. Kabinete e dumeletše go romelwa ga Molaokakanywa wo o Mpsafaditšwego wa Molao wa Bana wa 2026 go Palamente.
1.2. Molaokakanywa wo o Mpshafaditšwego wa Molao wa Bana o kopanya mmogoa diripa tša mananeo a tlhabollo ya bomapimpana le melawana yeo e laolwago ka fase ga Kgaolo ya 5 ya Molao ke balaodi ba go fapafapana go kopanya molao wa ECD ka fase ga Kgaolo 6 ya Molaokakanywa wo o Mpshafaditšwego ka fase ga maikarabelo a tee a Kgoro ya Thuto ya Motheo. Molaokakanywa wo o Mpshafaditšwego o tsebiša tshepetšo ya go ngwadiša ye tee ya disenthara tša ECD le sehlopha se tee sa Ditlwaedi le Maemo a Lenaneo la ECD.
2. Molaokakanywa wo o Mpshafaditšwego wa Mohlagase wa Nyuklea wo o Akantšwego, wa 2025
2.1. Kabinete e dumeletše go phatlalatšwa ga Molaokakanywa wo o Mpshafaditšwego wa Mohlagase wa Nyuklea wo o Akantšwego, wa 2025
2.2. Molaokakanywa wo o akantšwego o mpshafatša Molao wa Mohlagase wa Nyuklea wa 1999 wo o fago tlhako ya molao ya go kgatha tema ga Afrika Borwa go kgwebišano ya boditšhabatšhaba ka didirišwa tša nyuklea le theknolotši.
2.3. Molaokakanywa o šogana le mafokodi a taolo ao a tlišitšwego ke ditlhabollo tšeo di hlolegilego lefaseng le ka bophara ka gae le ka ntle ga naga mabapi le nyuklea, ka go mpshafatša mareo, go beakanya Molao le maemo a boditšhabatšhaba, le go matlafatša diphošo tša didirišwa tša nyuklea, dithoto, le mešongwana ye e amanago le tšona go phatlalala le tatelano ya mešongwana.
3. Melawana ya Kago ya Bosetšhaba le Molaokakanywa wo o Mpshafaditšwego wa Maemo a go Aga wa 2026
3.1. Kabinete e dumeletše Melawana ya Kago ya Bosetšhaba le Molaokakanywa wo o Mpshafaditšwego wa Maemo a go Aga wa 2026 gore setšhaba se fe ditshwayotshwayo tša sona. Maikemišetšo a Molaokakanywa ke go hlohleletša go lekana ga molao ka gare ga bolaodi bja mebasepala le go netefatša mekgwa ya kago ye e bolokegilego ka gare ga saense ye botse ya kago, mošomo wo mobotse, le didirišwa tša boleng.
3.2. Molaokakanywa o arabela dingongorego mabapi le ditlhohlo tša go amana le kgopelo ya go se gate ka mošito o tee le go hlatholla Molao.
E. Bao ba thwetšwego mešomong
Batho ka moka bao ba thwetšwego mešomong mangwalo a bona a thuto a tla kgonthišišwa le go tiišeletšwa ka mekgwa ya maleba
- Morena Otsile Maseng bjalo ka Mohlankedimogolophethiši (CEO) wa Taolo ya Dikoloto ya Setšhaba
- Mohumagadi Linda Seroka bjalo ka CEO ya Tirišano ya Inšorense ya Dikoloto ya Thomelontle ya Afrika Borwa.
- Morena Marcus Selepe bjalo ka CEO ya Mokgatlo wa Taolo ya Kgoboketšo ya Meetse ya Limpopo-Olifants.
- Go thwalwa ga balaodibagolo Botong ya Lepelle Northern Water
a. Ngaka Ndweleni Fredirick Mphephu (Modulasetulo le go thwalwa leswa);
b. Morena Motalane Dewet Monakedi (Motlatšamodulasetulo);
c. Mohumagadi Ayesha Hamad Laher;
d. Mohumagadi Christine Morongoe Ramphele;
e. Morena Makone Mack Magoele;
f. Mohumagadi Tsakane Zwane;
g. Mohumagadi Stephinah Mudau;
h. Moatbokeiti. Lufuno Tokyo Nevondwe;
i. Profesa Tebogo Mashifana;
j. Profesa Mabel Mphahlele-Makgwane; le
k. Morena Ashley Latchu.
- Go thwalwa ga balaodibagolo Botong ya Mokgatlo wa Infrastraktšha ya Mothopo wa Meetse wa Setšhaba
a. Morena Ramateu Johannes Monyokolo (Modulasetulo);
b. Mohumagadi Precious Nompumelelo Sibiya (Motlatšamodulasetulo);
c. Mohumagadi Barbara Schreiner;
d. Morena Simphiwe Khondlo;
e. Morena Gregory Nigel Joseph White;
f. Morena Nicholas van Rensburg Rabie; le
g. Mohumagadi Mankone Mabataung Ntsaba.
- Go thwalwa ga Boto ya Taolo ya Mokgatlo wa Taolo ya Kgoboketšo ya Meetse wa Breede-Olifants
a. Morena Bongani Mnisi (Modulasetulo);
b. Mohumagadi Marli Slabber (Motlatšamodulasetulo);
c. Mohumagadi Eurica Scholtz;
d. Morena Trevor Abrahams;
e. Profesa Jakobus Andries du Plessis;
f. Mohumagadi Natasha Davis – Wolmarans;
g. Morena Jan Pienaar;
h. Morena Kobus Nicolas Steenkamp;
i. Mohumagadi Hlobisile Mbali Mngadi; le
j. Mohumagadi Tswarelo Gratitude Mokoena.
- Go thwalwa ga Boto ya Mokgatlo wa Theknolotši ya Tshedimošo ya Mmušo
a. Profesa Stella Bvuma (Modulasetulo);
b. Moatbokeiti Colin Weapond;
c. Mohumagadi Zimbini Hill;
d. Mohumagadi Siphumelele Dlungwane;
e. Morena Rendani Ramabulana;
f. Mohumagadi Nalini Maharaj;
g. Morena Protas Phili;
h. Mohumagadi Willie Vukela (moemedi wa DPSA); le
i. Morena William Mathebula (moemedi wa Matlotlo a Setšhaba)
- Khansele ya Mokgatlo wa Boditšhabatšhaba wa Dikgokgano tša Megala (ITU)
a) Kabinete e dumeletše gore Afrika Borwa e tsenele go kgethwa gape go ITU mo Seleteng sa D (Afrika) bakeng sa nako ya 2027–2030. Dikgetho di tla tšewa ka Khonferenseng ya Ditherišanoya ITU go tloga ka la 9 go ya go la 27 Dibatsela 2026. Go ba gona ga Afrika Borwa mo Khanseleng ya ITU, gammogo le ditšhaba tše dingwe tša Afrika, go netefatša gore lefase la Afrika le na le lentšu le le tiilego mo taolelong ya boditšhabatšhaba ya ICT.
E. Ditiragalo le Dikhonferense
9. Indaba ya Boeti ya Afrika
a) Indaba ya Boeti ya Afrika ya 2026 e tla swarwa go tloga ka la 11–14 Mopitlo 2026 mo Senthareng ya Dikopano ya Inkosi Albert Luthuli (Durban ICC) ka KwaZulu-Natal.
b) Indaba ye e tla swarwa ka nako yeo go nago le koketšego ya baeti ba maleba ba boditšhabatšhaba. Ka Hlakola ngwageng wo, baeti ba 911 962 ba kgethile Afrika Borwa, koketšego ya 12,5% ge go bapetšwa le nako ya go swana ya 2025.
c) Se se latela sehla sa baeti sa 2025 seo se bilego godimo kudu ka baeti ba 10.5 milione. Go tloga ka Pherekgong go fihla ka Hlakola 2026, Afrika Borwa e šetše e rekotile baeti ba 2 910 029 ba maleba ba go tsena ka nageng.
d) Go tlhabollo ye e amanago le yona, Afrika Borwa e tiišeditše maemo a yona bjalo ka hapo difofane ya ketapele ya Afrika ka morago ga tlhahlobo ya tšhireletšego ka Mokgatlo wa Difofane tša Segae tša Boditšhabatšhaba e lego mokgatlo wa Ditšhabakopano wo o šomago fela ka difofane.
10. Diphenyo tša Lesolo la Tokologo
a) Ngwaga wo o laetša go fihlelelwa ga tatelano ya diphenyo tše bohlokwa leetong la temokrasi la Afrika Borwa wo o tla ketekwago ka diphenyo tša Lesolo la Tokologo, leo le tla thakgolwago go la Union Buildings ka Mopitlo 2026 ka fase ga morero: "Go Thabela mo re Tšwago Gona le Itokosetša Bokamoso."
b) Diphenyo tše di akaretša segopotšo sa bo30 sa go amogela Molaotheo; segopotšo sa bo50 sa dikhuduego tša baswa ba 1976; segopotšo sa bo70 sa masolo a go ganana le dipukwana tša boitsebišo; le segopotšo sa bo60 ya go tlošwa ka kgang go tšwa go District Six.
c) Mmogo, dinako tše tše bohlokwa di tšweletša tsela ye telele ye e sepetšwego go hwetša temokrasi le tokologo, mola le re gopotša gore, go sa lebelelwe tšwelopele ye botse, leeto le santše tšwela pele go moloko wa gona bjale.
11. Khonferense ya Bobedi ya Boditšhabatšhaba ya Afrika Borwa ya Go Ikgetha ya Ekonomi ya Mananeokgoparara le Dipeeletšo
a) Kabinete e dumeletše go swara Khonferense ya Bobedi ya Boditšhabatšhaba ya Afrika Borwa ya Go ikgetha ya Ekonomi le ya Mananeokgoparara go tloga ka la 16 go fihla ka la 17 Mosegamanye 2026 ka KwaZulu-Natal.
b) Khonferense e tla kopanya babeeletši ba maemo a godimo ba mo gae le ba boditšhabatšhaba gomme e tla šoma bjalo ka sefala seo go sona dikgopolo le ditharollo tša boikgopolelo di šišinywago go nolofatša le go aga Dilete tša Ekonomi tša Go ikgetha, gammogo le go netefatša peeletšo ka Afrika Borwa.
c) Afrika Borwa e neelane ka diSEZ tše 12 ka tše senyane tše di dirišwago gonabjale gomme diSEZ tše gabjale di šomago ka botlalo di dirišwa ke babeeletši ba 224 bao ba di šomišago ka peeletšo ye e golelago godimo ya boleng bja R31.7 bilione le mešomo ye 28, 821 ye e hlotšwego.
12. Kgwedi ya Tšhireletšo ya Bana
a) Kgwedi ya Tšhireletšo ya Bana e ketekwa ngwaga le ngwaga go fana ka temošo ya ditokelo tša bana le tlhokego ya go ba šireletša go dikotsi. Nakong ye, dikgoro tša mmušo tša motheo gammogo le ditirelo tša tšhireletšo ya bana le mekgatlo ye mentši ya setšhaba e tla matlafatša matsapa a go hlohleletša le go rapa mafapha ka moka a setšhaba go šireletša bana, go šogašogana le mafokodi a setšhaba ao a tšwelago pele le go tiiša letsogo fao go nyakegago tlhabollo ye e šetšanego le bothata bjo fela le magato a mangwe a go rarolla seemo se.
b) Kabinete e ipiletša go maloko ka moka go šoma mmogo bjalo ka ngatana ye tee go šireletša ditokelo tša bana, go etiša pele go phela gabotse ga bona le go thekga tlhabollo ya bona ka kakaretšo.
13. Kgwedi ya Afrika
a) Afrika Borwa e tla kopana le dinaga tše dingwe tša kontinente go keteka Kgwedi ya Afrika le Letšatši la Afrika ka la 25 Mopitlo 2026. Kgwedi ye ke sebaka sa go godiša botee, go matlafatša tirišano ya dielete le go tiišetša morero wo swanago wa Afrika. Nako ye go ketekwa le go tsinkelelwa ga boitšhupo bja rena, bohwa le ka fao go boledišanwago ka gona go ya ka setšo. Gape e ipiletša go Maafrika ka moka go šoma mmogo go kgontšha tlhabollo le tšwelopele ya kontinente.
b) Ge re gopola Kgwedi ya Afrika, re lemoga dikatlego tša rena ge re lekola tšwelopele ye e dirilwego go lemoga pono ya Lenaneothero la Kopano ya Afrika ya 2063 ya Afrika ye e kopanego le ya katlego.
14. Malabohlona a Kgwele ya Maoto
c) Kabinete e ipiletša go setšhaba go thekga Bafana Bafana leetong la bona la go ya Sebjaneng sa Lefase sa FIFA sa 2026 ka go apara mmala wa botalamorogo le gauta ka Malabohlona go matlafatša moya wa bo setšhaba le boikgantšho.
F. Ditsebišo
1. Difoka tša Bosetšhaba tša Mopresidente tša MSME le Ditirišano
1.1 Kgoro ya Tlhabollo ya Dikgwebo tše Dinnyane e mpshafaditše MSME tša Mopresidente tša Setšhaba le Difoka tša Ditirišano go akaretša leoto la profense le magoro a itšego a lekala go kaonafatša temogo, go akaretša, le ditlamorago.
1.2 Leoto la profense la Difoka tše di mpshafaditšwego go thoma ka Mosegamanye le magoro ao a mpshafaditšwego ke:
a. MSME ya Ngwaga mo Lefapheng la Temo
b. MSME ya Ditirelo tša Matlotlo ya Ngwaga
c. MSME ya Ngwaga ka Ekonomi ya Titšitale, Theknolotši, le Kaonafatšo
d. MSME ya lekala la Tšweletšo ya Ngwaga
e. MSME ya Ekonomi ya go Swarelela ya Ngwaga
f. MSME ye e etilwego pele ke Baswa ya Ngwaga
g. MSME ye e etilwego Pele ke Basadi ya Ngwaga
h. DiMSME tša Ngwaga tša Batho bao ba Phelago ka Bogole
i. Tirišano ya Ngwaga
2. Dikgetho tša 2026 tša Mmušo wa Selegae
2.1 Ka ge Mopresidente Ramaphosa a tsebišitše gore Dikgetho tša Mmušo wa Selegae di tla swarwa ka la 4 Dibatsela 2026, Kabinete e ipiletša go bakgethi bao ba nago le maswanedi go ingwadiša goba go mpshafatša tshedimošo ya bona ba šomiša phothale ya onlaene ya semmušo ya IEC – https://registertovote.elections.org.za yeo e hwetšagalago bošego le mosegare. Badudi ba ka ya gape ofising ya IEC ya selegae go ingwadišetša go kgetha, gomme bao ba dirilego dikgopelo tša diID ba gopotšwa go ya go di tšea go Kgoro ya Merero ya Segae.
2.2 E sego bjalo, baagi ba ka ingwadiša nakong ya mafelelo a beke a go ngwadiša ka la 20 le 21 Phupo 2026, mo setišing sa go kgetha seo ba ikemišeditše go kgetha gona ka letšatši la dikgetho..
H. Melaetša
1. Matshidiso
Kabinete e iša matshidiso go bagwera le ba lapa la:
a. Cynthia Shange, naletšana ya setšo, yo a kgathilego tema ye kgolo go filimi le thelebišene ya Afrika Borwa, a hwetša ditlhompho tše dikgolo, go akaretšwa Difoka tša Phihlelelo tša Bophelo ka Moka, go lemoga khuetšo ya gagwe ye kgolo go intasteri ya boithabišo ya gae.
b. Albert Mazibuko, yo a thomilego mmogo sehlopha sa go tsebega sa Ladysmith Black Mambazo, seo se hweditšego Difoka tše hlano tša Grammy le go kgatha tema albamong ya Paul Simon ya 1986 ya go bitšwa Graceland.
c. Setsebi sa go hlomphega sa opera sa Afrika Borwa, Mimi Coertse, yo e bego e le yo mongwe wa baemedi ba bagolo ba setšo sa Afrika Borwa le yo mongwe wa mantšu ao a tumilego a opera ya naga. O hlohleleditše merolo ya baopedi, badiragatši, le badiragatši ba baswa, gomme bohwa bja gagwe bo tla dula bo bopa mmino le setšo sa Afrika Borwa go merolo ye e tlago.
d. Moahlodi Mopresidente yo a rotšego mošomo Achmat Naeem Jappie yo a hlokafetšego a na le mengwaga ye 70. O šomile bjalo ka Motlatšamoahlodi wa Mopresidente ke moka ka morago ya ba Moahlodi Mopresidente wa Karolo ya KwaZulu-Natal ya Kgorokgolo ya Tsheko, gammogo le tirelo ya gagwe bjalo ka Moahlodi wa motšwaoswere wa Kgorotsheko ya Molaotheo le Kgorotsheko ya Boipiletšo ya Bašomi.
e. MMC Thumeka Bikwana, MMC wa ditirelo tša tirišano mmasepaleng wa selete wa Chris Hani, yo re kwelego gore o bolailwe ka la 6 Mopitlo 2026.
2. Ditebogišo
Afrika Borwa e na le mabopo a makaone go a feta ka moka lefaseng
a. Afrika Borwa e tšwela pele go dula e le naga ye e tumilego ka boeti lefaseng ka moka ka Pego ya Mabopo a Lefase ya 2026 ka setsebi sa boeti sa boditšhabatšhaba sa Travelbag seo se lemogilego mabopo a mabedi a naga mo lenaneong le le hlomphegago kudu la lefase ka bophara.
b. Lebopo la Boulders ka Motsekapa le lemogilwe semmušo bjalo ka lebopo la mathomo lefaseng ka moka, la latelwa ke la bobedi leo le lego kgauswi le lona e lego Lebopo la Cape of Good Hope. Maemo a gatelela boipiletšo bja boditšhabatšhaba bjo bo sa felego bohwa bja tlhago bja rena le maatla a lekala la rena la boeti.
Kabinete e lebogiša le go lakaletša tše botse go:
- Ngaka Naledi Pandor ka go thwalwa bjalo ka Mokhanseliri wa Yunibesithi ya Nelson Mandela. Molwela tokologo wa go hlomphega, serutegi le mohlankedi wa setšhaba, Ngaka Pandor o bontšhitše boikgabo bja bophelo ka moka go thuto yeo e thušitšego go aga Afrika Borwa ya temokrasi le naga ya leago.
- Blitzboks, ka go thopa thaetlele ya bona ya mathomo ya Hong Kong Sevens ka morago ga go fenya Argentina 35-7 go makgaolakgang mo Lepatlelong la Kai Tak.
- Sehlopha sa relei sa banna sa Afrika Borwa ka go thopa dimetale tša selibere go makgaolakgang a 4x100m le 4x400m go Direlei tša Diatletiki tša Lefase ka Gaborone.
Dipotšišo:
Dikgokagano tša Mmušo le Lenaneo la Tshedimošo (GCIS)
Ikgokaganye le: Mohumagadi Nomonde Mnukwa, Molaodipharephare wa Motšwaoswere
Selefouno: 083 6537485
www.gcis.gov.za; www.gov.za
#GovZAUpdates
