A. Merero ye Bohlokwa Seemong sa Bjale
1. Dipoledišano tša Bosetšhaba
1.1 Mengwagangwaga ye 70 ya Lengwalo la Tokologo
1.1.1 Ka letšatši le, mengwaga ye 70 ya go feta. Ka la 26 Phupu, 1955, baemedi ba ka godimo ga ba 3 000 ba tšwago ditlogong tše di fapa-fapanego tša merafo le tša leago ba ile ba bokana Kliptown, Johannesburg bakeng sa go akanya ka Afrika Borwa yeo ba e nyakago, yeo e lego ya pušo ka batho, yeo e se nago kgethollo ya morafo le yeo e theilwego melaong ya motheo ya tekatekano, toka setšhabeng, ditokelo tša botho le katlego ya ikonomi ya mohlakanelwa.
1.1.2 Lengwalo la Tokologo e be e le mafelelo a lesolo le legolo la batho ka moka leo le akaretšago mekgatlo ya go lwantšha kgethollo ya semorafe le badudi ba setlwaedi, bao ba bego ba kgobokantšwe ka tlase ga leswao la African National Congress, ba nagana ka dihlologelo tša bona tša mohlakanelwa tša Afrika Borwa ye e lokologilego le ya toka.
1.1.3 Lengwalo la Tokologo ke tokomane ya motheo ya Molaotheo wa Afrika Borwa ya ka morago ga mmušo wa Kgethollo, gomme e sa na le mohola ka go šogašogana le go se lekalekane wo o sa šaletšego ga setšhaba le ikonomi tšeo di sa dutšego di le gona ka mo nageng ya rena.
1.2 Kopano ya Setšhaba go ya go Dipoledišano tša Setšhaba
1.2.1 Mengwaga ye 70 ka morago ga go amogelwa ga Lengwalo la Tokologo le go lemoga gore ditlhohlo tšeo naga ya rena e sa lebanego le tšona di nyaka go tsenya letsogo ga rena ka moka, MaAfrika Borwa go tšwa mahlakoreng ka moka a bophelo a mengwa go tla go tšea karolo ka go Poledišano ya Bosetšhaba yeo e tla laetšago bokamoso bja Afrika Borwa yeo re e nyakago. Go swana le go amogelwa ga Lengwalo la Tokologo, Dipoledišano tša Bosetšhaba di tla latela tshepetšo ya ditherišano ye e tseneletšego go akaretšwa le maemong a dilete le a diprofense.
1.2.2 Kabinete e lemogile dipelaelo tša setšhaba mabapi le tekanyetšokabo ye e phopholeditšwego ya Poledišano ya Bosetšhaba gomme e nyaka go hlaloša gore tekanyetšokabo yeo e šišintšwego ga se ya feta pele go ditshepedišo tša mmušo tša go dira tekanyetšokabo goba go lebelelwa ke Komiti ya Ditona (IMC) yeo e etilwego pele ke Motlatšamopresidente, Paul Mashatile. Kabinete e lemoga ka botlalo ka mafokodi a bjale a ditšhelete tša mmušo gomme e laetše IMC go netefatša gore go ba le šedi ye kgolo ge Dipoledišano tša Bosetšhaba di fiwa thekgo ya ditšhelete.
2. Ikonomi
2.1 Leanokgolo la Afrika Borwa la Enetši ya go Mpshafatšega
2.1.1 Kabinete e amogela go thakgolwa ga Leanokgolo la Afrika Borwa la Enetši ya go Mpshafatšega (SAREM) go hlohleletša tšweletšo ya selegae, tlhabollo ya mabokgoni le go hloma mešomo ka nageng. SAREM yeo e dumeletšwego ke Kabinete ka Hlakola ngwageng wo, e ikemišeditše go thekga nyakego ya ka mo nageng ya enetši ya go mpshafatšega le go hlohleletša tlhabollo ya diintasteri mola go netefatšwa phetogo ya enetši ya go se tšee lehlakore.
2.2 Tumelelano ya Kadimo ya go Lekana US$1.5 bilione ya go Phethagatša Pholisi ya Tlhabollo
2.2.1 Kabinete e ile ya tsebišwa ka ga Tumelelano ya Kadimo ya go lekana US$1,5 ya go phethagatša Pholisi ya Tlhabollo yeo e saennwego magareng ga mmušo wa Afrika Borwa le Panka ya Lefase yeo e tlago šomišwa go netefatša kgolo ya ikonomi ye e akaretšago le go hloma mešomo. Kadimo ye e dumelelana le melao ya motheo ya Kgoro ya Matlotlo ya Setšhaba yeo e bopago karolo ya matsapa a mmušo a motlalanaga a go tsenya tirišong diphetogo tša sebopego gomme e tla dirišwa go bula dikgoba tše bohlokwa tša mananeokgoparara, kudukudu ka mafapheng a mohlagase le a dinamelwa tša go tsamaiša dithoto.
2.2.2 Thekgo ya kadimo e theilwe godimo ga dikokwane tše tharo tša diphetošo tša sebopego: go kaonafatša tšhireletšo ya enetši, go kaonafatša bokgoni le phadišano ya ditirelo tša dinamelwa tša dithoto le go thekga phetogo ya Afrika Borwa go ya go ikonomi ye e nago le khabone ya fase, yeo e lego boikokotlelo bja morero wo mmušo o beilego pele wa kgolo ya go akaretša bohle le go hloma mešomo.
2.3 Go Fihla ga Meento ya Bolwetši bja Tlhako le Molomo
2.3.1 Kabinete e amogela go fihla ga meento yeo e nyakegago kudu, yeo e tšwago Botswana, go lwantšha go phulega ga bolwetši bja tlhako le molomo (FMD) dikarolong tše dingwe tša naga.
2.3.2 Meento e a abja le go fiwa ka ntle le tefo go mafelo ao a amegilego, kudukudu kua KwaZulu-Natal (KZN) le Kapa Bohlabela le dipolaseng tše dingwe diprofenseng tšeo bolwetši bo lemogilwego go tšona. Sehlopha sa bobedi sa morwalo wa meento se otarilwe le Setheo sa Meento sa Botswana.
3. Dikamano tša Boditšhabatšhaba
3.1. Samiti ya G7
3.1.1. Mopresidente Cyril Ramaphosa o ile a ba gona Khonferenseng ya Sehlopha sa Dinaga tše Šupago (G7), gomme Afrika Borwa e lebelela G7 bjalo ka modirišani wa go logelwa maano. Mopresidente Ramaphosa o dirišitše monyetla wa G7 go hlohleletša tšhomišano ye kgolo magareng ga G7 le G20 le go hlohleletša thekgo ya diphetošo ka dihlongweng tša boditšhabatšhaba tša pušo ya lefase bjalo ka Khansele ya Tšhireletšego ya UN le tshepedišo ya tša ditšhelete ya lefase ka bophara. Go kgatha tema ga Mopresidente go G7 go bontšha gabotse gore Afrika Borwa ga e na le boemo bja pholisi ya go lwantšha Bodikela, eupša re ikemišeditše go šoma le mang le mang go phegelela dikgahlego tša bosetšhaba tša Afrika Borwa le go tšwetša pele Lenaneo la Afrika.
3.2 Ketelo ya Mošomo go ya Russia
3.2.1 Motlatšamopresidente Paul Mashatile o feditše ketelo ya gagwe ya mošomo go Russia, moo a khathilego tema go Foramo ya bo-28 ya 2025 ya Ikonomi ya Boditšhabatšhaba ya St. Petersburg (SPIEF ’25).
3.2.2 Ketelo e be e lebišitšwe go matlafatša tirišano ya ikonomi magareng ga dinaga tše pedi ka mafapheng a go swana le temo, dinamelwa, mohlagase le meepo, gammogo le saense le theknolotši.
3.3 Thulano ya Isiraele le Iran
3.3.1 Kabinete e tshwenyegile kudu ka go oketšega ga dintwa magareng ga Isiraele le Repabliki ya Islam ya Iran, gotee le ditlhaselo tša difofane ka America (USA). Ditlhaselo tše di tšwelago pele tša dinaga ka bobedi di bakile tahlegelo ya maphelo, dikgobalo le tshenyo ya dithoto.
3.3.2 Kabinete e dira boipiletšo bja gore go fokotšwe ka tšhoganetšo dikgaruru, boitshwaro le go latela ka botlalo molao wa boditšhabatšhaba ke mahlakore ka moka go thibela tlaišego ye nngwe gape ya batho. Kabinete gape e ipiletša go Amerika, Isiraele le Iran go swara dipoledišano tša go agiša le go fa Ditšhabakopano sebaka sa go eta pele tharollo ya khutšo ya dithulano, go akaretša le go lekola le go netefatša maemo a Iran a go ikgobokeletša mahumo a minerale wa uranium, gammogo le bokgoni bja yona bja nyuklea ka bophara.
3.3.3 Lefase le ka se kgone go dumelela go ripaganywa ga naga Iran ka diripa tša go se laolege, ka baka la bontši bjo bo feteletšego bja badudi ba yona, le methopo ya yona ya diminerale. Bjalo ka kontinente, rena Afrika re sa dutše re tlaišwa ke ditlamorago tša go ripaganywa ga naga ya Libya ka diripa tša go se laolege mengwaga ye lesomenne ka morago ga phetogo ya mmušo wa Libya, Afrika e tlaišwa ke go oketšega ga matšhošetši kontinenteng ao a amanago le go ripagnywa ga naga yeo ka diripa le go hloka taolo ga Libya.
3.3.4 Re nyaka khutšo ya lefase ka bophara gomme re swanetše go katanela go rarolla diphapano ka khutšo.
3.4 Matshwenyego Mabapi le Maemo ao a Mpefalago a Haiti.
3.4.1 Kabinete e tshwenyegile ka go mpefala ga maemo a Haiti gomme e tiišetša gore go nyakega mokgwa wa mahlakore a mantši go matlafatša pušo, go kaonafatša go phethagatša molao le go tšwetša pele tlhabollo ya ikonomi ka tirišano ya dilete le ya boditšhabatšhaba ka go bea dikgahlego tša Haiti pele.
3.5 Kahlolo ya Kgorokgolo ya Tsheko ya Pretoria ya Thibelo ya Poloko ya Mopresidente wa Boselela wa Zambia yo a Hlokofetšego, Morena Edgar Lungu
3.5.1 Kabinete e lemogile kahlolo ya Kgorokgolo ya Tsheko ya Pretoria yeo e thibelago poloko ya mohu Mopresidente Lungu ka Afrika Borwa ka morago ga kwano ya mahlakore ka bobedi.
3.5.2 Kabinete e hlohleletša bobedi ba lapa la Lungu le mmušo wa Zambia go šomiša sebaka se se filwego ke Kgorokgolo ya Tsheko go kopana go netefatša poloko ya seriti ya lehu la Mopresidente go ya ka tlhompho yeo e swanetšego Mopresidente wa Naga.
3.6 Go Gogela Morago ga SAMIDRC go tšwa Bohlabatšatši bja DRC
3.6.1 Kabinete e ile ya tsebišwa ka ga go fihla ka dikgaokgao ga Lebotho la Mašole a Bosetšhaba a Afrika Borwa (SANDF) go tšwa ka bohlabela bja Democratic Republic of Congo (DRC) ka morago ga sephetho sa SADC sa go fediša magato a SAMIDRC a go lamola.
3.6.2 Mašole ao a ka bago 1 718 a SANDF ga bjale a fihlile ka nageng, gomme a mangwe a letetšwe go fihla dibekeng tše mmalwa tše di tlago.
3.6.3 Kabinete e ile ya tiišetša gape boikgafo bja Afrika Borwa bjo bo tšwelago pele bja go tliša khutšo, go tliša taolo le katlego ka seleteng sa Afrika Borwa gomme ya reta maitekelo a madira a SANDF a go thuša gore go rene moya wa khutšo, tšhireletšego le taolo ka DRC.
4. Toka le Thibelo ya Bosenyi
4.1. Polokego le Tšhireletšego
4.1.1. Mmušo o amogela kgatelopele yeo e dirwago go lwantšheng bosenyi ka maiteko a bjalo ka Lesolo la Shanela le Lesolo la Vala Umgodi. Bagononelwa ba ka bago 239 ba ile ba golegwa nageng ka bophara magareng ga la 1 le la 15 Phupu 2025 ka Lesolo la Vala Umgodi. Bagononelwa ba ile ba golegwa ka baka la melato yeo e tswalanago le go epša ka tsela yeo e sego ya molao le melato e mengwe ye e fapafapanego yeo e akaretšago go leka go bolaya, go ba le sethunya seo se se nago lengwalo la tumelelo, go ba le ditaamane tšeo di sa šongwago, go ba le dithuthupi ka tsela yeo e sego ya molao le go roba Molao wa Bofaladi wa 2002.
4.1.2. Lesolo la Vala Umgodi, go tloga ge le thongwa ka Manthole 2023, le dirile gore go golegwe bagononelwa ba go feta 27 000 le go thopša ga dibetša tša go feta 600, tšeo di akaretšago dithunya tše e sego tša makgonthe (dithunya tša go bapadiša) le dikolo tše 16 000.
4.1.3. Magareng ga la 16 Phupu le la 22 Phupu 2025, Tirelo ya Maphodisa ya Afrika Borwa (SAPS) ka go diriša Lesolo la Shanela, e golegile bagononelwa ba 15 372. Tše dingwe tša ditlhaselo tše bohlokwa di akareditše batho ba 2 400 bao ba bego ba nyakwa bao ba bego ba kgokagane le bosenyi bjo bogolo le bja bošoro (polao, go leka go bolaya, go kata le bohodu); ba 159 ba golegilwe ka baka la polao; ba 100 ba golegilwe ka baka la go kata; ba 1 173 ba golegilwe ka baka la tlhaselo ka maikemišetšo a go baka kgobalo ye šoro ya mmele; ba 2 602 ka baka la go ba le diokobatši le ba 64 ka baka la dikoloi tšeo di thopilwego goba tšeo di utswitšwego.
4.1.4. Kabinete gape e amogetše kahlolo ya banna ba babedi go ba bane bao ba hweditšwego ba le molato wa polao yeo e rerilwego ya Nosipho ''Nomdundu'' Mafani wa mengwaga ye 23 wa kua KwaNokuthula, yo a bego a na le bogole bja monagano. Bobedi bja bona, e lego Mboneli Msila le Monde Tshemese, ba ile ba ahlolelwa bophelo ka moka kgolegong ka baka la go loga maano a go dira polao le ka polao yeo ba e dirilego gore ba hwetše tšhelete yeo e tswalanago le ditefo tša pholisi ya poloko tša go fihla R600 000.
4.1.5. Phenkgišano kgahlanong le Dikgaruru tša Bong le Polao ya Basadi - Kabinete e laetše Kgoro ya Tlhabollo ya Leago go akgofiša go rungwa ga Molaokakanywa wa Thušo ya Batšwasehlabelo go matlafatša phenkgišano kgahlanong le GBVF.
5. Tlhabollo ya Leago le ya Batho
5.1. Kaonafalo Mafuleng
5.1.1. Kabinete e ile ya tsebišwa ka ga matsapa ao a tšwelago go kaonafala ka morago ga masetlapelo a mafula ka Kapa Bohlabela le KwaZulu-Natal. Maemong a bosetšhaba, Komiti ya Setšhaba ya Mohlakanelwa ya Tshepedišo ya Meetsefula, le Komiti ya Ditona ya Taolo ya Dikotsi e ile ya thongwa gomme ya kopana ka makga a mmalwa go lekola seemo le go tšea sephetho sa gore e ka thekga diprofense tšeo di amegilego bjang.
5.1.2. Senthara ya Bosetšhaba ya Taolo ya Dikotsi tša Tlhago le mafelo a maleba a profense le a mmasepala a taolo ya dikotsi tša tlhago, le yona e tšwela pele go fana ka dipego mabapi le ditekolo le magato a go thuša seemong seo.
5.1.3. Selo sa pele seo se swanetšego go dirwa ke go nea madulo a tšhoganetšo le ditlabakelo tša tlhakodišo tšeo di nyakegago go ditšhaba tšeo di amilwego ke seemo se le gore seemo se se kaonafale. Mošomo o tšwela pele gape go bušetša sekeng ditirelo tša motheo tše bjalo ka meetse, tlhwekišo le mohlagase. Se se akaretša go kgonthiša gore bao ba amegilego ba hwetša ditokomane tša boitsebišo le ditifikeiti tša nakwana tša boitsebišo gore ba kgone go hwetša ditirelo tša bohlokwa. Phetleko ya tshenyo ya dintlo le meago ya motheo le leano la go aga ka leswa e gare e ya dirwa. Ge e feditšwe, e tla dira gore go kgonege go lokišetša lenaneo le le feletšego la pušetšosekeng.
5.2 Boemo bjo bo sa Kgahlišego bja Boso
5.2.1 Tirelo ya Afrika Borwa ya Boso e lemošitše gore go letetšwe gore phefo e tonyago e matla e tla wela naga maabane, ka Laboraro, 25 Phupu 2025, ka dikarolong tša ka borwa-bodikela bja Afrika Borwa.
5.2.2 Go na le kgonagalo ya pula ye ntši le kotsi ya mafula mafelong ao a itšego a ka bodikela bja Kapa Bodikela, kudukudu ka mafelong ao a lego fase le ao a nago le didreini tša go fokola ka Laboraro go fihla ka Labone, 25 le 26 Phupu 2025. Diphefo tše matla le tše tšutlago ka gare ga naga di ka baka tshenyo ye itšego meagong le go tumola mehlare. Godimo ga moo, maemo a go tonya go fihla go a go tonya kudu a ka letelwa, gammogo le go wa ga lehlwa mo dithabeng tša ka bodikela tša Kapa Bodikela, go phatlalala go ya ka borwa-bodikela bja ka gare ga Kapa Leboa.
5.2.3 Go letetšwe diphefo tše matla le tše ka bago tše senyago dikarolong tše dintši tša Kapa Bohlabela ka Labone, 26 Phupu 2025, gotee le go fokotšega ga dithemperetšha mosegare.
6. Pušo
6.1. Tšwelopele ya Sehlopha sa Mošomo sa Mopresidente sa eThekwini
6.1.1. Kabinete e ile ya tsebišwa ka mošomo wa Sehlopha sa Mošomo sa Mopresidente sa eThekwini. Tšwelopele e lemogilwe mabapi le meetse le tlhwekišo. Thekgo ya ditšhelete ya go lekana R378 milione e kgonthišeditšwe go thuša go fokotša tahlegelo ye kgolo ya meetse, yeo e diregago ka nako ye tee le phokotšo ya 30% ya go šalela morago ga go lokiša meela le go lokiša diphaephe tša meetse.
6.1.2. Maeto a ka mo nageng le ona a kaonafala, ka go hlatloga ka 33% ngwaga ka ngwaga gomme a na le seabe sa ka godimo ga R17.4 bilione ka go ikonomi. Baeti ba go tšwa dinageng tša ka ntle le bona ba ile ba oketšega ka 9,8%, ba tliša R3,3 bilione tikologong ya eThekwini.
B. Ditshedimošetšo go Kabinete
1. Kgatelopele ya Tiragatšo ya Magato a Mopresidente go Ditšhišinyo tša Khomišene ya go Goga Mmušo ka Nko
1.1. Kabinete e ile ya tsebišwa ka kgatelopele ye kgolo yeo e dirilwego mabapi le go phethagatša ditšhišinyo tša Khomišene ya go goga Mmušo ka Nko. Dilo tše bohlokwa di akareditše tše:
1.1.1. Kgoboketšo ya dithoto tše di amanago le go Gogwa ka Mmušo ka Nko go okeditšwe go tloga go R2.9 bilione ka Diphalane 2022 go ya go R11 bilione ka Hlakola 2025.
1.1.2. Diphetošo tše kgolo tšeo di akaretšago go dirwa ga melao e seswai e mefsa yeo e swaraganago le bomenetša, thekišo, ditirelo tša bohlodi le boikarabelo bja dikhamphani.
1.1.3. Dinyakišišo tša bosenyi le ditshekišo: melato ye mene ya khomišene ya mabapi le go Gogwa ga Mmušo ka Nko e phethilwe ka moka ka dikahlolo tša molato; melato ye mengwe ye 11 yeo e akaretšago batho ba tlhago ba 51 le dikhamphani tše 27 e ngwadišitšwe kgorong ya tsheko.
1.1.4. Magato a bokgoni le a taolo: Kgoro ya peleng ya Dikgwebo tša Setšhaba e ile ya iša balaodi ba 71 ba Dikgwebo tša Mmušo go Khomišene ya Dikhamphani le ya Maloka a Boikgopolelo (CIPC) ka baka la ditshepedišo tša go se lefele tšhelete tšeo di feleleditšego ka melato e senyane ya dikgorotsheko yeo e lego gona.
1.1.5. Boikarabelo bja Kgwebo: CIPC e phethile go lekola dihlongwa tše 10 tša lekala la poraebete tšeo di akaretšwago ka go Pego ya go Goga Mmušo ka Nko, ka dinyakišišo tše tshela tšeo di tšwelago pele le ditšhupetšo tše seswai tše mpsha tša SIU tšeo di hlahlobjago.
1.1.6. Kgoro ya Matlotlo ya Setšhaba e ile ya fana ka thibelo ya mengwaga ye 10 (2022-2032) go Bain & Co. mabapi le go dira kgwebo le mmušo, e lego seo Bain e se lwantšhago kgorong ya tsheko.
1.1.7. Diphetošo tše di fapafapanego go thibela go gogwa ga mmušo ka nko di a dirwa mola tše dingwe di dirilwe, gare ga tšeo di dirilwego ke:
1.1.7.1. Go hlongwa ga Bolaodi bja Dinyakišišo kgahlanong le Bomenetša bjo bo thomilego go šoma ka la 19 Phato 2024.
1.1.7.2. Tlhako ya Bosetšhaba ya go Lebiša go Tiragatšo ya go Hloma Bokgoni ka Lefapheng la Mmušo e dumeletšwe ke Kabinete ka Diphalane 2022.
1.1.7.3. Khansele ya Boeletši ya Bosetšhaba ya go Lwantšha Bomenetša e phethile dinyakišišo ka ga ditšhišinyo tša peakanyoleswa ya setheo sa Khomišene ya mabapi le go Gogwa ga Mmušo ka Nko.
2. Ditokišetšo tša Kopano ya G20
2.1. G20 (Dikopano)
Kabinete e amogetše tshedimošo ka ga mošomo wo o tšwelago pele ge naga e itokišetša go swara Samiti ya Baetapele ba G20, ka ge dikopano tše mmalwa di tšwela pele go ba gona.
2.1.1. Go itokišetša go ba moamogedi wa Kopano ya Y20 ya Afrika Borwa mafelelong a ngwaga wo ka tlase ga taolo ya Afrika Borwa ya Bopresidente bja G20. Kopano ya pele ga Kopano ya Y20 ya Afrika Borwa yeo e kgobokeditšego baemedi go tšwa go dinaga tšeo e lego maloko a G20 le go feta, go thoma dipoledišano ka ga maemo a pholisi le go fa tsebišo ya Y20, e ile ya swarwa go tloga ka la 18 - 19 Phupu 2025.
2.1.2. Kopano ye tee ya Sehlopha sa Mošomo sa Boraro: Kgolo ya Ikonomi ya go Akaretša, go Hlongwa ga Diintasteri, Thwalo le go Fokotša go se Lekalekane yeo se bego e swerwe go tloga ka la 18 go fihla ka la 19 Phupu 2025, e ile sa ahlaahla go hlama ditlhako tša go nyalelana ga dipholisi tša ikonomi ka bophara, tša makala, tša mmaraka wa mešomo, tša tšhireletšo ya leago le tša tikologo ka morago ga maikemišetšo a mohlakanelwa a go hloma mešomo e nago le seriti le go fokotša go se lekalekane.
2.1.3. Khonferentshe ya T20 ya Afrika Borwa ya Paka ya Magareng e swerwe go tloga ka la 19 go fihla ka la 20 Phupu 2025, e ile ya lekola kgatelopele ya dihlopha tše hlano tša mošomo, ya tiiša tšhomišano magareng ga dilete le go lokiša dipoelo tša pholisi pele ga Kopano ya Baetapele ba G20.
2.1.4. Kopano ya mathomo ya Kgwerano ya Matlafatšo ya G20 yeo e bego e swerwe go tloga ka la 20 go fihla ka 21 Phupu 2025, e ile ya ahlaahla Ditheo tšeo di Logetšwego Maano Kgwerano ya Matlafatšo ya G20 tša boetapele bja basadi, thekgo ya kgwebo le tlhabollo ya ikonomi ye e swarelelago.
2.1.5. Kopano ya SAI20 yeo e bego e le kopano ya bahlakišipharephare ba dinaga tšeo e lego maloko a G20 yeo e bego e swaretšwe kua Johannesburg go tloga ka la 24 go fihla ka la 25 Phupu 2025, e ahlaahlile ditaba tše di amanago le ponagatšo le boikarabelo taolong ya ditšhelete tša setšhaba.
2.2. Kabinete gape e amogetše tshedimošo ka ga dikopano tša Tshepedišo ya Boitukišo bja Baemedi ba Dinaga tšeo di bego di sa tšwa go swarwa, gammogo le matsapa a go beakanya le go itokiša ao a dirwago go ditherišano tše di tlago tša ditokomane le ditsebagatšo tša Dipoelo tša Ditona tša G20. Kabinete e ile ya tsebišwa gore dikopano tše 69 di šetše di swerwe go fihla ga bjale, go tšwa go dikopano tše 132 tšeo di rulagantšwego tša semmušo tša G20.
2.2.1. Seboka sa boraro sa Baemedi ba Dinaga ba G20 se swarwa kua Sun City go tloga ka la 25 go fihla ka la 27 Phupu 2025 gomme go letetšwe gore se hwetše ditshwaotshwao go tšwa go Dihlophatšhomo tša Boitukišo bja tša Ditšhelete, go lekola boitlamo le dinepo tša G20 le go ahlaahla ditsela tša go netefatša gore G20 e kgona go sepediša magato a lefase ka bophara go mathata.
C. Diphetho tša Kabinete
1. Go Kopanywa ga Enetši le Mafapha a Diintasteri go Tsošološa Phadišano ya Diintasteri tša Matlapa a go bopa Tšhipi tša Afrika Borwa
1.1. Kabinete e ile ya tsebišwa ka ga ditlamorago tša ikonomi setšhabeng tša go tšwela pele ga go fokotšega ga intasteri ya matlapa a go bopa tšhipi le tlhokego ya ka pela ya bonamodi bja mmušo le intasteri go thibela go phuhlama ga intasteri.
1.2. Kabinete e dumeletše gore Kgoro ya Mohlagase le Enetši e feleletše tumelelano ya mmušo le intasteri ya go beakanya gape metšhelo go thekga lekala la matlapa a go bopa tšhipi, gammogo le go bušetša sekeng intasteri ya Afrika Borwa le bokgoni bja go tšwela batho mohola ka lefapheng le.
1.3. Kabinete e dumeletše go bewa ga chrome ore ka tlase ga taolo ya thomelontle, yeo e tla nyakago gore thomelontle e hwetše tumelelo go tšwa go Khomišene ya Tsamaišo ya Dithekišetšano tša Boditšhabatšhaba (ITAC), le
1.4. Kabinete e dumeletše maikemišetšo a go hlabolla motšhelo wa thomelontle ya chrome ore le go katološa tlhako/melawana ya go hlohleletša ya metšhene ya go tološa ya Mafelo a Moswananoši a Ikonomi (SEZ).
2. Leano le Legolo la Ikonomi ya Matlakala (WEMP)
2.1 Kabinete e dumeletše phatlalatšo ya Leano le Legolo la Ikonomi ya Matlakala (WEMP) gore le phethagatšwe. Leano le legolo le lebišitše go fokotšweng ga ditlakala, go di diriša gape le go hwetša gape - kudukudu bakeng sa ditlakala tša go phuthela. Nepo ya lona ke go oketša ka botlalo seabe sa ikonomi ya ditlakala go ikonomi ya naga ka bophara; mola le fokotša ditlamorago tša tikologo le tša maphelo tša dikhemikhale le ditlakala ka tikologong.
2.2 Leano le le šišinya magato ae mmalwa ao a tla bulelago le go godiša dibaka tša ikonomi ka gare ga ditshepedišotatelano tša ikonomi ya ditlakala, magareng ga tše dingwe, ka go oketša diromelwantle le go hloma mešomo. Mešomo ye e ka bago ye 60 000 ya lebakanyana e thekgilwe nageng ka bophara ka go kgatha tema ga bao ba kgoboketšago ditlakala go kgoboketšeng ditlakala, go di hlopha le go di diriša gape bjalo ka pampiri, polastiki le galase. Go letetšwe gore mešomo ya tlaleletšo yeo e hlolwago e tla hola basadi, baswa le batho bao ba nago le bogole.
D. Melaokakanywa
1. Molaokakanywaphetošwa wa 2025 wa Ditirelo tša Maphodisa a Afrika Borwa (SAPS)
1.1 Kabinete e dumeletše Palamenteng tlhagišo ya seakanywa Molaokakanywaphetošwa sa SAPS. Molaokakanywa wo o ikemišeditše go fetola Molao wa SAPS wa 1995 go hloma tlhako ya molao ya maphodisa yeo e thušago go lwantšha bosenyi ka katlego le ka bokgoni. Molaokakanywaphetošwa o netefatša gore o sepelelana le Molaotheo wa Afrika Borwa wa 1996, Leanotlhabollo la Bosetšhaba la 2030, Sengwalwa sa Makgoraditsela sa 2016 ka ga Hlapetšo ya Sephodisa, Sengwalwa sa Makgoraditsela sa 2016 ka ga Polokego le Tšhireletšego, Pholisi ya Hlapetšo ya Setšhaba le Pholisi ya Tirelo ye tee ya Maphodisa.
E. Bao ba Thwetšwego Mešomong
Batho ka moka bao ba thwetšwego mešomong mangwalo a bona a thuto a tlo tiišetletšwa le go netefaletšwa ka tsela ye maleba:
1. Moadbokeiti Mikateko Joyce Maluleke bjalo ka Molaodipharephare wa Kgoro ya Basadi, Baswa le Batho bao ba sego ba Itekanela Mmeleng (katološo ya kontraka ka dikgwedi tše 5).
2. Ntate Brian Monakali bjalo ka Mohlankediphethišimogolwane wa Bolaodi bja Polokego ya Ditimela.
3. Lekgotla la Ditirelo tša Sephethephethe sa Lefaufau le Dinamelwa
Mme Doris Dondur go tlatša sekgoba sa Lekgotla.
4. Boto ya Bahlokomedi ya Setlamo sa Tlhabollo se se Ikemetšego
(a) Mme Zimbini Hill;
(b) Mme Lerato Makgothatso Kumalo;
(c) Profesara Stella Motlhago Bvuma;
(d) Ntate Wayne Stewart Manthe;
(e) Ngaka Deenadayalen Konar;
(f) Ntate Neil Jensen;
(g) Mme Sekadi Phayane – Shakhane;
(h) Mme Thobile Buhlebethu Maloka;
(i) Profesara Raymond Nkando; le
(j) Mme Bongekile Zulu.
5. Maloko a Lekgotla la Koporasi ya Tlhabollo ya Diintasteri (IDC)
(a) Ngaka Gloria Tomatoe Serobe (Modulasetulo);
(b) Ntate Reon Barnard;
(c) Ntate Sam Bhembe;
(d) Mme Tanya Reeva Cohen;
(e) Mme Ayanda Dlodlo;
(f) Ngaka Nomusa Dube-Ncube;
(g) Ngaka Keitumetse Mothibeli; le
(h) Ngaka Sydney Mufamadi.
Ditirgalo ka Kakaretšo le Ditiragalo tše di Tlago
6.1 Go Thwalwa ga Baswa
6.1.1 Ge re tswalela meketeko ya Dikgwedi tša Bafsa, Kabinete e tiišeditše boipiletšo bja Mopresidente Cyril Ramaphosa go dikgwebo le dihlongwa tše dingwe tša lekala la setšhaba go diriša SAYouth.mobi go fana ka ditsela tše di tšwelago pele tša bafsa go ikhweletša meputso le go ithuta.
6.1.2 Ga bjale go na le bafsa ba ka godimo ga 4,7 milione bao ba ngwadišitšwego go SAYouth.mobi le go dathapeisi ya ditirelo tša thwalo ya Kgoro ya tša Mešomo le tša Bašomi. Ka yona mekgwa ye, bafsa ba ile ba thušwa go fihlelela dibaka tša go hwetša tšhelete tše di fetago 1,6 milione.
6.1.3 Kabinete e ipiletša go dikgwebo go thuša bafsa ka go ba nea dibaka tša mešomo le go beeletša thutong le tlhabollong ya mabokgoni.
F. Melaetša
1. Mahloko
Kabinete e lebiša mahloko a yona go bagwera le malapa a:
a) Morena Sinethemba Mpambane, Motlatša Motlatšamohlankedi wa Yunibesithi ya Walter Sisulu yo a ilego a thuntšhwa le go bolawa ka koloing ya gagwe ka lefelong la yunibesithi ya Nkululekweni.
b) Moreti wa dipapadi yo a tumilego le mohlagiši, Phumlani Msibi, yo a bego a tumile ka go botšiša potšišo ya gagwe e tumilego ya "thoughts please" ge a be a dira dipoledišano tša gagwe tša ka morago ga papadi ya kgwele ya maoto.
c) Moletši wa porompeta le moletši wa flugelhorn Fezile ''Feya'' Faku, yo a bilego le mošomo wo o tumilego wo o akareditšego dikontinente tše hlano le yo a ilego a dirišana le bomahlwaadibona ba go swana le Abdullah Ibrahim le Bheki Mseleku.
2. Ditebogišo
Kabinete e lebogiša le go lakaletša tše botse go:
a) Di-Proteas ka go fenya Australia ka go makgaolakgang a Sebjana sa Lefase sa Teko gomme ka go realo ba thopa sefoka sa maemo a godimo sa Sebjana sa Lefase sa Teko sa ICC. Phenyo ya bona ye kgolo kgahlanong le mathata ka moka e tlišitše lethabo setšhabeng sa rena gomme ya bontšha maatla a dipapadi a go kopanya le go hlola phedišano setšhabeng le go aga setšhaba.
b) Laura Seethal wa go tsebja kudu ka Tyla, ka go swara Difoka tša Nickelodeon Kids Choice Awards tša 2025 le go ba moopedi wa mathomo wa moAfrika go thopa sefoka sa ''Naletšana ya Mamoratwa ya Mmino wa Boditšhabatšhaba'' kua Difokeng tša Nickelodeon Kids Choice tšeo di bego di swaretšwe kua Amerika.
c) Sebapadi sa thelebiše sa mahlwaadibona Leleti Khumalo le motšweletši wa difilimi Anant Singh, yo a thopilego Sefoka sa Golden Nymph sa maemo a godimo sehlopheng sa "Special Creation" ka filimi ya Don't Give Up kua Festibaleng ya bo-64 ya Thelebišene ya Monte-Carlo. Filimi ye e hlahlwa ke Darrell James Roodt.
d) Prudence Sekgodiso, yo e bilego nkgwete ya lefase ya ka dipapadi tša go bapalelwa ka gare ga ntlo, yo a šomilego ka bothakga kudu kgweding ya Phupu. Ka la 15 Phupu 2025, o ile a thopa maemo a boraro ka 800m ya basadi ka go tatelano ya Diamond Leagues ka Stockholm, Sweden. Ka la 24 Phupu 2025 o ile a kitima ka lebelo le le kaone la gagwe go fenya 800m ya basadi ka Ostrava Golden Spike ka Repabliking ya Czech.
Ge re keteka mengwaga ye 70 ya Lengwalo la Tokologo, re rata go gopotša bohle gore "Afrika Borwa ke ya batho ka moka bao ba dulago go yona, ba baso le ba bašweu" - Lengwalo la Tokologo.
Dinyakišišo:
Mme Nomonde Mnukwa – Seboleledi sa Mmušo sa Motšwaoswere
Mogala: 083 653 7485
