A. DITABA TŠEO DI AMAGO BADUDI
1. Kabinete e kgalema ka bogale go hlatloga ga ditiragalo tša dikgaruru tša bong le dipolao tša basadi le bana
1.1. Kabinete e kopana le setšhaba go kgalemela ka bogale dikgaruru tša bong le dipolao tša basadi le bana (GBVF) gomme e llela maphelo a basadi ba senyane bao ba bolailwego sehlogo dikarolong tše di fapanego tša Mmasepala wa Ekurhuleni, Gauteng. Palo e oketšegile go fihla go 13.
1.2. Kabinete e amogela go swarwa ga bagononelwa ba bane mabapi le dipolao tše tharo. Bagononelwa ba sa le kgolegong morago ga go ganetšwa ka peile morago ga go tšwelela ga bona kgorong ya tsheko.
1.3. Kabinete e thekga taelo ya Mopresidente Ramaphosa go Sehlopha sa Dinyakišišo sa Makala a Mantši seo se eteletšwego pele ke Tirelo ya Maphodisa a Afrika Borwa go swara le go sekiša ka pela basenyi bao ba amegago dipolaong tše. Sehlopha se se mohlaleng wa batho ba mmalwa bao ba ka bago le seabe dipolaong tše.
1.4. Go hlatloga ga ditiragalo tša GBV – kudukudu dipolao tša basadi le bana tšeo e lego polao ya mosadi ka boomo ke motho yo a lego kgauswi le yena – e swanetše go hlohleletša magato a setšhaba go šireletša basadi ke banna, malapa, ditšhaba le setšhaba ka kakaretšo.
1.5. Ka go swana, ba phethagatšo ya molao ba swanetše go netefatša gore bao ba ba rwelego maikarabelo a go bolaya basadi ba a hwetšwa gomme ba lebane le ditlamorago tša molao ka botlalo; ka ge melao yeo e fetošitšwe go netefatša gore bosenyi bja GBVF bo fedišwa ka bogale.
1.6. Mmušo o tla tšwela pele go dira tšohle tšeo di lego matleng a wona go tšwetša pele tšhireletšo le boiketlo bja basadi le bana ditšhabeng tša rena. Ka moka, banna le basadi, a re emeng ka maoto re be kgahlanong le dikgaruru gomme re kgathe tema ya rena go fediša leuba la GBVF.
1.7. Kabinete e tšwela pele go ipiletša go mang goba mang yo a nago le tshedimošo ka ga bosenyi go bo bega maphodiseng, leletša nomoro ya go se lefelwe ya go Fediša Bosenyi go 086 00 10111 goba Mogala wa Tšhoganetšo wa Diiri tše 24 wa Senthara ya Taolo ya GBV go 0800 428 428.
2. Kopano ya BRICS
2.1. Kabinete e amogetše Kopano ya bo 18 ya BRICS yeo e swerwego ka katlego ka New Delhi, India go tloga ka la 12 go fihla ka la 13 Lewedi 2026, ka fase ga morero wa: “Go Hlohleletša Kgotlelelo, Boitlhamelo, Tirišano le Tšhireletšego”. Kopano e tiišeditše gape le boikgafo bja seboka se sa dinaga go tshepedišo ya boditšhabatšhaba ye e akaretšago bohle le ye e emelago le tirišano ye e tšwetšego pele ka kgwebišano le dipeeletšo; ditirišano tša tšhelete ya ka mo nageng le ditefelo tša go tshela mellwane; thušo ya ditšhelete ya infrastraktšha ka Panka ye Mpsha ya Tlhabollo; tšhomišanommogo ya ditšithale; tlhabollo ya go ya go ile; go kgotlelela klaemete le tšhireletšego ya dijo.
2.2. Go Afrika Borwa, dipoelo tša kopano ye di bohlokwa ka ge di thekga maikemišetšo a naga a go akgofiša tlhabollo ya diintasteri, go oketša khumanego ya dithekišo mebarakeng, go gokagoketša dipeeletšo le go hlohleletša tlaleletšo ya boleng go diminerale tše bohlokwa. Dilo tše di beilwego pele di ka matlafatša tšweletšo ya ka mo nageng, tša hlola dibaka go dikgwebo le bahlomi ba dikgwebo, tša thekga tlholego ya mešomo le go netefatša gore boleng bjo bo rotogetšego godimo bo hwetšwa go tšwa methopong ya tlhago ya naga.
3. Ekonomi
3.1. Batšweletši ba dienywa tša tšheri ba Afrika Borwa ba atlegile kgwebišanong ya bona le mmaraka wa China
3.1.1. Kabinete e thabetše gore batšweletši ba dienywa tša tšheri ba Afrika Borwa ba kgonne go fihlelela mmaraka wa China lekga la mathomo ka morago ga go saenwa ga prothokholo ya go kgona go fihlelela mmaraka magareng ga Afrika Borwa le China ka la 8 Lewedi 2026. Prothokholo ye e saennwe ke Tona ya Temo, Morena Willie Aucamp le moemedi go tšwa go Taolokakaretšo ya Merero ya Mollwane wa China nakong ya Kopano ya bo 9 ya Bohlweki le Bohlweki bja Dimela ka Beijing.
3.1.2. Tumelelano ye e bula dibaka tša gore batšweletši ba Afrika Borwa ba fihlelele ye wo mongwe wa mebaraka ye megolo ya dienywa tša tšheri lefaseng. China e rometše ka mo Afrika Borwa ditone tše di ka bago 586 900 tša dienywa tša tšheri tšeo di nago le boleng bja US$3.3 bilione (e ka bago R52.8 bilione) ka 2025. Go bulwa ga mmaraka go letetšwe go hlohleletša dipeeletšo ka tšweletšong ya dienywa tša tšheri le go hlola mešomo ye meswa ye e ka bago 600.
3.1.3. Tlhabollo ye e bopa karolo ya maitapišo ao a nabilego a go katološa diromelwantle tša temo tša Afrika Borwa le go dira gore mebaraka ya boditšhabatšhaba e be ye e fapafapanego. E sepelelana gape le go tsenywa tirišong ga sekema sa China sa go se lefiše ditšweletšwa tša Afrika Borwa tšeo di nago le maswanedi, moo gothomilego go šoma ka la 1 Mopitlo 2026.
4. Go bala matšatši ao a šetšego pele ga Dikgetho tša Mebasepala tša 2026
4.1. Kabinete e hlohleletša bakgethi ka moka bao ba nago le maswanedi bao ditokumente tša bona tša boitsebišo di timetšego goba di senyegilego go dira tše dingwe ka pela ka mo go kgonegago pele ga Dikgetho tša Mebasepala ka la 4 Dibatsela 2026. Badudi ba ka etela ofisi ya Merero ya Selegae goba ye nngwe goba ye nngwe ya dipanka tša go feta 450 tšeo di tšeago karolo go dira dikgopelo tša ditokumente tša boitsebišo.
4.2. Dikgopelo tša dikgetho tše di kgethegilego di butšwe gomme di tla tswalela ka la 12 Diphalane 2026 ka 17:00. Kgetho ya go ikgetha e dumelela bakgethi bao ba nago le maswanedi, bao ba ngwadišitšwego bao ba sa kgonego go kgetha ditišeng tša bona tša go kgetha ka letšatši la dikgetho go kgetha pele ga nako. Dikgetho tša go ikgetha di buletšwe bakgethi bao ba golofetšego, baimana, batšofadi le batho bao ba ka se kgonego go kgetha ka lebaka la go swara ke tša mošomo.
4.3. Kabinete e hlohleletša Maafrika Borwa ka moka, kudukudu baswa le bakgethi ba mathomo, go šomiša tokelo ya bona ya go kgetha. Kgetho ye nngwe le ye nngwe e bohlokwa ebile e thuša go boloka temokrasi ya rena ye e tiilego.
4.4. Kabinete e ipiletša go mekgatlo ya dipolotiki le bonkgetheng bao ba ikemego bao ba tšeago karolo dikgethong tše di tlago gore ka mehla ba thekge Molao wa Maitshwaro wa Dikgetho le go kgona go kgotlelelana dipolotiking.
5. Ditokišetšo tša mafelelo tša ditlhahlobo tša Marematlou tša 2026
5.1. Kabinete e lakaletša baithuti ka moka mahlatse ge ba itokišeletša ditlhahlobo tša Marematlou ngwageng wo wa 2026, tšeo di thomago ka la 13 Diphalane 2026. Mo seripeng se sa mafelelo, dikolo di šetšane le go dira poeletšo ya mošomo wa ka diphaphošing ye e beakantšwego le go aba thekgo ya tlaleletšo ya thuto go netefatša gore barutwana ba itokišeditše ka mo go lekanego.
5.2. Kabinete e dira boipiletšo go batswadi le bahlokomedi go bea leihlo kgatelopele ya barutwana tlhokomelong ya bona le go hlola tikologo ya thekgo yeo go yona ba ka beago šedi dithutong tša bona. Barutwana ba hlohleletšwa go hlama lenaneo la thuto la kgonthe le go nyaka tlhahlo go barutiši goba barutwana ka bona ge ba se na bonnete ka mošomo wa bona wa sekolo. Ge wena goba morutwana wa Marematlou yo a lego ka fase ga tlhokomelo ya gago o ikwa o imetšwe, thušo ya go se lefelwe ya profešenale e hwetšagala diiri tše 24 go tšwa go Sehlopha sa Kgatelelo ya Kgopolo le go Tshwenyega sa Afrika Borwa go 0800 12 13 14.
6. Go itokišetša le go arabela boemo bja leratadima bjo bošoro
6.1. Mmušo o tšwela pele go lekola maemo a boso a šoro go ralala le naga. Phetogo ya klaemete e na le seabe go oketšegeng ga kgafetšakgafetša le bogale bja ditiragalo tše šoro tša boso. Balaodi ba diprofense le ba mebasepala ba swanetše go dula ba phafogile kudu, ba matlafatše go itokišetša le go netefatša gore maano a go arabela magato a tšhoganetšo a tsenywa tirišong moo go nyakegago.
6.2. Ditšhaba di hlohleletšwa go hlokomela ditemošo tšeo di ntšhitšwego ke Tirelo ya Boemo bja Leratadima ya Afrika Borwa le go latela tlhahlo ya balaodi ba taolo ya masetlapelo – kudukudu mafelong ao a lego kotsing ya mafula, diphefo tše maatla, sefako le maemo a mangwe a kotsi.
B. DIPHETHO TŠA KABINETE
1. White Paper ye e Mpshafaditšwego ya Mafelelo ka Mmušo wa Selegae, 2026
1.1 Kabinete e amogetše White Paper ye e Mpshafaditšwego ya Mafelelo ka Mmušo wa Selegae, 2026gore e šomišwe go hlahla diphetogo le tsošološo ya tshepedišo ya mmušo wa selegae. Tshekatsheko ya White Paper e dirilwe ka lebaka la ditlhohlo tše di tšwelago pele tša pušo, diinstitušene, ditšhelete le kabo ya ditirelo tšeo di lebanego le mebasepala.
1.2. White Paper e arabela ka go matlafatša phethagatšo, boikarabelo, kwano ya diinstitušene le go tšwela pele ga tshepedišo ya ditšhelete.
1.3. Kabinete gape e thekga go hlongwa ga Sehlopha sa Taolo ya Phetogo sa nako ye e beilwego le lenaneo la phethagatšo leo le kgokagantšwego la kgato ka kgato la mmušo ka moka, leo le tla etwago pele ke Kgoro ya Pušo ya Tirišano ya Makala a Mmušo, Kantoro ya Mopresidente le Matlotlo a Bosetšhaba go hlohleletša phethagatšo ya diphetogo.
2. Karoganyo ya Bolaodi bja Bosetšhaba bja Maemakepe bja Transnet (TNPA) le mpshafatšo ye e nabilego ya dinamelwa le dithulaganyo
2.1. Kabinete e amogetše tshedimošo ka ga phethagatšo ya diphetogo tša dinamelwa le dithulaganyo tša dithoto tšeo di lebantšwego le go kaonafatša tšhomišo ya tšhepedišo, botshepegi bja infrastraktšha le bokgoni bja tshepedišo ya dithoto le dithulaganyo tša Afrika Borwa.
2.2. Kabinete e thekga go aroganywa ga Bolaodi bja Maemakepe bja Transnet (TNPA) gore bo šome bjalo ka khamphani ye e ikemetšego yeo e lego ya mmušo ka go lebanya.
2.3. Kabinete e amogetše gore TNPA e nyakišiše kgonagalo ya modirišani wa tekano ye nnyane yo a tšwago go ye nngwe ya dihlongwa tša ditšhelete tša tlhabollo (DFIs) tša naga.
2.4. Melawana yeo karoganyo e tlago go phethagatšwa ka yona e akaretša tefelo ya toka go Transnet go ya ka tekanyetšo ya boleng bja TNPA yeo e dirilwego ka go ikemela; go tšwela pele ga ditšhelete ka lebaka le letelele; kabo ya toka ya dikoloto go Sehlopha sa Transnet le TNPA; tšhireletšo ya bašomi le bareki; go boloka beng le taolo ya mmušo ya infrastraktšha ya maemakepe a setšhaba; le go kaonafatša bokgoni bja dipeeletšo le tlhabollo ya infrastraktšha.
3. Tiišetšo ya Tumelelano ya Kgatelelo ya Ditiro tše di sego Molaong tše di Amanago le Difofane tša Setšhaba tša Boditšhabatšhaba le Prothokholo ya Tlaleletšo go Tumelelano ya Kgatelelo ya go Tšea Difofane ka tsela yeo e sego Molaong
3.1. Kabinete e amogetše go romelwa ga Tumelelano ya go Thibela Ditiro tše di sego Molaong tšeo di Amanago le Difofane tša Setšhaba le Prothokholo ya Tlaleletšo ya Tumelelano ya go Thibela go Tšeelwa ga Difofane ka Matla Palamenteng gore di tiišišwe.
3.2. Tumelelano ye e matlafatša tlhako ya molao ya boditšhabatšhaba ya go lwantšha ditšhošetšo tše di tšwelelago go difofane tša setšhaba le go godiša tšhireletšo ya difofane tša lefase ka bophara.
3.3. Kopano ye gape e dira gore gare ga tše dingwe, tšhomišo ya difofane tša setšhaba go baka lehu, dikgobalo tše šoro mmeleng goba tshenyo ye kgolo e be bosenyi; tšhomišo ya difofane bjalo ka dibetša; go lokollwa ga dilo tša tlhago, dikhemikhale goba tša nyuklea go tšwa goba kgahlanong le difofane; le ditlhaselo tša inthanete kgahlanong le dinolofatši tša go sepetša difofane.
4. Tlhako ya Pholisi ya Bosetšhaba ya Kgopotšo ya Bohwa
4.1. Kabinete e dumeletše Tlhako ya Pholisi ya Bosetšhaba ya Kgopotšo ya Bohwa go aba tlhako ye e rulagantšwego ya peakanyo, taolo le phethagatšo ya diprotšeke tša go gopola bohwa go ralala le makala ka moka a mmušo.
4.2. Pholisi e tšwetša pele mekgwa ya go ya go ile le ye e sa bitšego kudu ya go gopola mola e matlafatša kgokagano ya leago, go aga setšhaba, poelano le boitsebišo bja bosetšhaba bjo bo abelanwago.
4.3. E tla kaonafatša gape kgokaganyo, boikarabelo le go tšwela pele ga lebaka le letelele ga diprotšeke tša bohwa.
5. Bodulasetulo bja Afrika Borwa bja Foramo ya Dipoledišano ya India, Brazil, Afrika Borwa (IBSA) go tloga ka 2026 go fihla ka 2027
5.1. Kabinete e amogetše dilo tše di tlago pele le ditšweletšwa tša bodulasetulo bja Afrika Borwa bja Foramo ya Poledišano ya India, Brazil, Afrika Borwa (IBSA) go tloga ka 2026 go fihla ka 2027 ka fase ga morero wa: "Khutšo, Katlego le Tlhabollo".
5.2. Bodulasetulo bja Afrika Borwa bo tla nepiša go matlafatša tirišano ya Borwa le Borwa, go godiša kgwebišano, dipeeletšo le tirišano ya intasteri mola e tšwetša pele tlhabollo ya go ya go ile go akaretšwa ka dikarolong tša enetši, boitlhamelo le theknolotši, mola go matlafatša dikamano tša magareng ga batho ka dipapadi le setšo.
6. Pego ya Mmušo wa Mokgatlo go Komiti ya Ditsebi tša Afrika ka ga Ditokelo le Boiketlo bja Bana (ACERWC)
6.1. Kabinete e dumeletše go romelwa ga Pego ya Mokgahlo wa Mmušo wa Afrika Borwa go Komiti ya Ditsebi tša Afrika ka ga Ditokelo le Boiketlo bja Bana (ACERWC).
6.2. Afrika Borwa e tšweleditše pego ya yona ya bobedi ya nako le nako ka Mopitlo 2023 gomme pego ya gonabjale e swanetše go fiwa mafelelong a Lewedi 2026. Pego e hlaloša magato a molao, a komiti ye le a pholisi ao a tšerwego go šireletša le go tšwetša pele ditokelo tša bana le ditharollo tšeo di phethagaditšwego go šogana le diphetho tša mafelelo tšeo di dirilwego ke komiti pegong ya 2023.
C. DITSEBIŠO TŠA KABINETE
1. Pego ya Tshekatsheko ka ga Merero ya Tlhabollo ye e Kopantšwego le Leano la Mohlala wa Tlhabollo ya Selete go tšwa go pono ya Bong, Bafsa le Bogolofadi
1.1. Kabinete e amogetše pego ya tshekatsheko ka ga Pego ya Tshekatsheko ka ga Merero ya Tlhabollo ye e Kopantšwego le Mohlala wa Tlhabollo ya dilete (DDM) ya thulaganyo ye tee go tšwa go kgopolo ya Bong, Bafsa le Bogolofadi.
1.2. Tshekatsheko ya Merero ya thulaganyo ye tee ya DDM e utolla gore peakanyo ya infrastraktšha go ralala le dilete ga e rarolle ka mo go lekanego dilo tše di tlago pele tša basadi, baswa le batho bao ba golofetšego kudukudu ge di sekasekwa go lebeletšwe mmono wa go bona dipoelo.
1.3. Tshekatsheko gape e utolla gape gore ditsenogare tša go šoganago le GBVF le tlaišo ya thobalano a dula a hlaelela le go se lekalekane go ralala le mebasepala.
1.4. Kabinete e thekgile phethagatšo ya ditšhišinyo tše di dumeletšwego ka dikgoro tša maleba tša bosetšhaba le tša profense ka go lekola kgatelopele ye e tšwelago pele ka Kgoro ya Basadi, Baswa le Batho bao ba Phelago ka Bogolofadi.
2. Ditlamorago tša El Niño tšhireletšegong ya meetse
2.1. Kabinete e amogetše pego ka ga ditlamorago tše di ka bago gona tša El Niño ye e letetšwego ya 2026/27 ka ga tšhireletšego ya meetse le magato ao a phethagatšwago go fokotša dikotsi tše di amanago le yona.
2.2. Kabinete e naganišišitše gore maemo a El Niño ao a letetšwego a ka se bee kotsi ye kgolo fela go hwetšagaleng ga methopo ya meetse eupša gape e tla ama gampe lefapha la temo le tšhireletšego ya dijo go akaretšwa le makala a mangwe a ekonomi ao a nyakago meetse kudu, ka ditlamorago go ditshenyegelo tša bophelo tšeo di šetšego di le godimo le maphelo a Maafrika Borwa.
2.3. Mmušo o matlafatša go itokišetša komelelo le magato a mangwe a mangwe a go kgona go bea seemo se ka fase ga taolo go šireletša setšhaba kgahlanong le ditlamorago tše mpe. Sehlopha sa sethekniki sa magareng ga mafapha sa ditsebi se šetše se šoma go tla ka magato ao a kopantšwego a mohlakanelwa.
2.4. Kabinete e hlohleleditše Maafrika Borwa ka moka go šomiša meetse ka maikarabelo le go thekga maitapišo a pabalelo ya meetse go fokotša kgatelelo go ditshepedišo tša kabo ya meetse ka sehla sa selemo.
D. MELAOKAKANYWA
1. Molaokakanywa wa Taolo ya Intasteri ya Sebaka wa Afrika Borwa, wa 2026
1.1. Kabinete e dumeletše phatlalatšo ya Molaokakanywa wa Taolo ya Intasteri ya Sebaka, 2026 gore setšhaba se sware ditshwayotshwayo. Molaokakanywa wo o nyaka go phumola Molao wa Merero ya Sebaka wo o fetilwego ke nako wa 1993 le go hloma tlhako ya taolo ya sebjalebjale go laola intasteri ya sebaka ya Afrika Borwa. Molaokakanywa wo o tla sepelelana le tlhako ya taolo ya sebaka sa Afrika Borwa le maemo le ditlamo tša boditšhabatšhaba tše di hlabologago. E tla thekga gape boipušo bja Afrika Borwa go tšwa go dinaga tše dingwe le bao ba šomago ka tšona ka go hwetša data ya sebaka ye e nyakegago kudu go tšeeng diphetho tša pholisi tša ka pela bakeng sa ditsenogare tša mmušo, mola e matlafatša go tshepagala ga naga bjalo ka modiriši yo a nago le maikarabelo wa sebakeng. E rarolla gape diphapano ka go tsenywa ga ditlamo tša kwano ya boditšhabatšhaba ya sebaka ka gare ga molao wa ka nageng.
1.2. Molao wo o šišintšwego o tla laola mediro ya sebaka sa kgwebo ye e tšwelelago; e matlafatše tlhokomelo ya lekala la sebaka; e fane ka dinyakwa tša maikarabelo le inšorense; le go netefatša kobamelo ya ditlamo tša boditšhabatšhaba tša Afrika Borwa. E tla hlola gape tikologo ye e loketšego dipeeletšo, boitlhamelo, nyakišišo le tlhabollo ya mabokgoni; mola e thekga kgolo ya bokgoni bja sebaka sa selegae le dibaka tša kgwebo.
2. Molaokakanywa wa Ditefelo tša Malwetši a Mošomong ka Meepong ye e Laolwago le Mešomo ye e Laolwago, wa 2025
2.1. Kabinete e dumeletše phatlalatšo ya Molaokakanywa wa Ditefelo tša Malwetši a Mešomong ka Meepong ye e Laolwago le Mešomong ye e Laolwago, 2025 gore setšhaba se swayeswaye.
2.2. Molaokakanywa wo o nyaka go phumola Molao wa 1973 wa Malwetši a Mošomong ka Meepong le Mešomong wo o fetilwego ke nako le go hloma tshepedišo ya sebjalebjale, ye e šomago gabotse le ye e fihlelelwago ya taolo ya diputseletšo tša malwetši a mošomong ka lekaleng la meepo.
2.3. Molao wo o šišintšwego o tla matlafatša go hlaola, go latišiša, kelo ya kalafo le tefo ya bašomi ba meepong ba gonabjale le ba peleng bao ba lemogilwego ba na le malwetši a mošomong ao a ka lefelwago, mola o kaonafatša phihlelelo ya dikholego le ditirelo tše di amanago le yona go bašomi bao ba amegilego le bao ba ithekgilego ka bona.
2.4. Molaokakanywa wo o tšwela pele go hlagiša go hlongwa ga Bolaodi bja Diputseletšo tša Meepo le Mešomo bjo bo laolwago ke mmušo, bjo bo tlago ba le maikarabelo a go laola dikleimi, ditefelo tša diputseletšo le ditirelo tša thekgo tše di amanago le tšona, ka go realo go godiša boikarabelo le kabo ya ditirelo ka gare ga tshepedišo ya diputseletšo.
E. BAO BA THWETŠWEGO MEŠOMONG
Batho ka moka bao ba thwetšwego mešomong mangwalo a bona a thuto a tlo kgonthišišwa le go tiišeletšwa ka mekgwa ya maleba..
1. Morena Zane-Udien Dangor bjalo ka Molaodipharephare Kgorong ya Dikamano tša Boditšhabatšhaba le Tirišano (kontraka e okeditšwe).
2. Ngaka Sean Douglas Phillips bjalo ka Molaodipharephare wa Kgoro ya Meetse le Tlhwekišo (kontraka e okeditšwe).
3. Morena Milingoni Fhulufhelo Lloyd Nedohe bjalo ka Molaodipharephare go Dikgokagano tša Mmušo le Lenaneo la Tshedimošo (GCIS).
4. Mohumagadi Avril Halstead bjalo ka Motlatšamolaodipharephare: Taolo ya Thoto le Boikarabelo go Matlotlo a Bosetšhaba.
5. Mohumagadi Thandazile Francisca Mnguni bjalo ka Motlatšamolaodipharephare: Lenaneo la Mešomo ya Setšhaba ka Kgorong ya Tirišano ya Makala a Mmušo.
6. Mohumagadi Sibongile Mpofu bjalo ka Motlatšamolaodipharephare: Ditirelo tša Thekgo ya Kgoro ka Kgorong ya Tirišano ya Makala a Mmušo.
7. Ngaka Nontsikelelo Ingrid Manzini-Matebula bjalo ka Motlatšamolaodipharephare: Tekolo, Phetleko, Diphatišišo le Tshepedišo ka Kgorong ya Basadi, Baswa le Batho bao ba Phelago ka Bogolofadi.
8. Mohumagadi Tirhane Alinah Fosi bjalo ka CEO ya Mešomo ya Dikgatišo tša Mmušo.
9. Morena Johannes Makgokolla Moholola bjalo ka CEO ya Ditirelo tša Dinamelwa tša Lefaufau le Tshepetšo tša Tšona.
10. Morena Siphamandla Mthethwa bjalo ka CEO ya Khamphani ya Maemafofane ya Afrika Borwa (ACSA).
11. Morena Waseem Carrim bjalo ka CEO ya Sekhwama sa Dikotsi tša Ditseleng (RAF).
12. Morena Alford Sifiso Nsibande bjalo ka CEO ya Trasete ye e Ikemego ya Tlhabollo.
13. Go thwalwa leswa ga Modulasetulo wa Boto ya Eskom:
Ngaka Mteto Nyati.
14. Go thwalwa ga maloko a Khansele ya Boto ya Geosaense
a. Morena Kelepile Dintwe (o thwetšwe leboelela ebile ke modulasetulo);
b. Ngaka Mayshree Singh (o thwetšwe leboelela);
c. Ngaka Siyanda Mngadi (o thwetšwe leboelela);
d. Mohumagadi Thobeka Njozela (o thwetšwe leboelela);
e. Ngaka Mdu Zakwe;
f. Morena Lindelani Mudau (Moemedi wa Kgoro ya Minerale le Methopo ya Petroleamo);
g. Ngaka Patience Gwaze (Moemedi wa Kgoro ya Kagodithokgwa, Boreatlhapi le Tikologo);
h. Mohumagadi Millicent Solomons; le
i. Morena Musa Mabuza (Mohlankedi wa Tlaleletšo).
15. Go thwalwa ga Boto ya Tirišano ya Thekgo ya Ditšhelete tša Meepo tša Dinyakišišo tša Afrika
a. Morena Bernad Swanepoel (o thwetšwe leboelela ebile ke modulasetulo);
b. Morena Mzwandile Masondo (o thwetšwe leboelela);
c. Mohumagadi Pamella Mhlarhi;
d. Morena Samuel Molefi;
e. Ngaka Ntombifuthi Nxumalo;
f. Morena Bonga Makhanya;
g. Moatbokata Vhongani Masondo; le
h. Morena Masibulele Phesa.
16. Go thwalwa ga maloko a Boto ya Panka ya Tlhabollo ya Borwa bja Afrika
a. Morena Bongani Nqwabana (o thwetšwe leboelela);
b. Ngaka Petrus Matji (o thwetšwe leboelela);
c. Mohumagadi Disebo Moephuli (o thwetšwe leboelela);
d. Morena Joel Netshitenzhe (o thwetšwe leboelela);
e. Ngaka Chantal Naidoo (o thwetšwe leboelela);
f. Profesa Edgar Pieterse (o thwetšwe leboelela t);
g. Moatbokata Jonathan Muthige (o thwetšwe leboelela);
h. Morena Barry Hore (o thwetšwe leboelela); le
i. Mohumagadi Mametja Moshe.
17. Go thwalwa ga maloko a Boto ya Bosetšhaba ya go Iteka Mahlatse
a. Ngaka Makgathatso Charlotte Chana Pilane-Majake (Modulasetulo);
b. Morena Kganki Matabane (Motlatšamodulasetulo);
c. Mohumagadi Chuma Fani;
d. Mohumagadi Zoleka Gloria Bula;
e. Mohumagadi Silochini Pillay;
f. Morena Milton Ntwana (Moemedi wa Maphodisa);
g. Mohumagadi Niklasina Maria Kruger (Moemedi wa Kgoro ya Kgwebišano, Intasteri le Phenkgišano);
h. Morena Khayalethu Ntimbela (Moemedi wa Matlotlo a Bosetšhaba); le
i. Mohumagadi Sizakele Magangoe (Moemedi wa Kgoro ya Tlhabollo ya Leago).
18. Go thwalwa ga maloko a Boto ya Tirišano ya Tlhabollo ya Diintasteri.
a. Morena Mabotha Authur Moloto;
b. Mohumagadi Dinao Modirwadi Lerutla;
c. Mohumagadi Victoria Ngwenya;
d. Moatbokata Fana Joe Nalane;
e. Ngaka Boitshoko Ntshabele;
f. Morena Kgathatso Tlhakudi;
g. Morena William Solomon Steenkamp; le
h. Moatbokata Thandi Orleyn (o thwetšwe leboelela).
19. Go thwalwa ga maloko a Boto ya Rand Water
a. Morena Gcinumzi Qotywa (Modulasetulo);
b. Mohumagadi Phindile Mbanjwa (Motlatšamodulasetulo);
c. Mohumagadi Ayanda Noah;
d. Morena Luvuyo Ntoyi;
e. Mohumagadi Lethabo Mashamaite;
f. Morena Oliver Josie;
g. Ngaka Mosidi Makgae;
h. Ngaka Rethabile Melamu;
i. Mohumagadi Ayanda Mafuleka; le
j. Mohumagadi Moleboge Bothlale Lekwane.
20. Go thwalwa ga maloko a Khansele a Boto ya Difilimi le Dikgatišo
a. Profesa Siyasanga Tyali (Modulasetulo);
b. Mohumagadi Dhladhla Nxele (Motlatšamodulasetulo);
c. Moatbokata Lindelwa Ndziba;
d. Mohumagadi Ditaba Lucy Maraka;
e. Mohumagadi Zandile Gail Mpungose;
f. Ngaka Phosa Jan Mashangoane;
g. Mohumagadi Miriann Maartens;
h. Ngaka Seithati Maria Motebang; le
i. Mohumagadi Melanie Roy
21. Go thwalwa ga maloko a Lekgotla la Boeletši ka Kgorong ya Tlhabollo ya Dikgwepotlana
a. Profesa Vusi Gumede;
b. Ngaka Jabulile Msimango-Galawe;
c. Ngaka Nomfundo Mcoyi-Zondo;
d. Mohumagadi Juliet Miyabo;
e. Morena Sifiso Skenjana;
f. Morena Jacob Gcwili;
g. Morena John Jeffrey;
h. Mohlomphegimogolo Ngaka Kgosi Gaboilelwe;
i. Morena Siyabulela Xuza; le
j. Morena Anthony Frank Julies
22. Go Thwalwa ga Maloko ao e Sego Balaodi go Boto ya Balaodibagolo ya Tirišano ya Peeletšo ya Mmušo (PIC)
a. Ngaka Mugwena John Maluleke;
b. Mohumagadi Lindiwe Martha Motshwane;
c. Morena Reuben Mpono Maleka; le
d. Mohumagadi Bulelwa Mabasa.
F. DITIRAGALO LE DIKHONFERENSE
1. Kgwedi ya Dinamelwa
1.1. Afrika Borwa e tla keteka Kgwedi ya Dinamelwa go ralala le Diphalane. Kgwedi ye e ikemišeditše go tšwetša pele maitapišo a polokego ya mebileng le go laetša mehola ya ekonomi le ya leago ya tshepedišo ya dinamelwa ye e šomago gabotse. E fana gape sebaka sa go mpshafatša setšhaba ka ga kgatelopele ya go aga leswa infrastraktšha ya dinamelwa ya naga.
2. Kgwedi ya Tšhireletšo ya Inthaneteng
2.1. Afrika Borwa e tla keteka Kgwedi ya Temošo ya Tšhireletšo ya Inthanete ka Diphalane go godiša temošo le go tšwetša pele polokego ya titšithale le go kgotlelela. Maloko a setšhaba a hlohleletšwa go dula a phafogile, go itlwaetša boitshwaro bja inthanete bja maikarabelo le go matlafatša tsebo ya bona ya go bala le go ngwala ya titšithale go itšhireletša, tshedimošo ya bona ya motho ka noši le didirišwa tša bona go ditšhošetšo tša inthanete.
3. Kopano ya bo 136 ya Maloko a Kgokaganyo ya Mafelo mo Nageng ye e Buletšwego bohle
3.1. Afrika Borwa e tla swara Kopano ya Maloko ya bo 136 ya Kgokaganyo ya Mafelo a mo Nageng ye e Buletšwego bohle (OGC) ka Motsekapa go tloga ka la 12 go fihla ka la 15 Diphalane 2026, e lego lekga la mathomo ge tiragalo ye ya maemo a godimo ya lefase ka bophara ya geospašiale e tla swarwa ka Afrika.
3.2. OGC e kopanya baetapele ba mmušo, mekgatlo ya mebepe, banyakišiši, dikhamphani tša theknolotši, ditsebi tša maemo, bahlami le bahlami go tšwa go ralala le Afrika le lefaseng ka bophara go dirišana ka ga bokamoso bja theknolotši ya geospašiale le tirišano.
3.3. Go swara tiragalo ye go tla maatlafatša maemo a Afrika Borwa bjalo ka moetapele wa taolo ya tshedimošo ya geospatial, go tšwetša pele go amogelwa ga maemo a boditšhabatšhaba le go godiša tirišano go ralala le Afrika le setšhaba sa lefase ka bophara sa geospatial.
4. Kopano ya bo-15 ya Ditšhabakopano ka Thibelo ya Bosenyi le Toka ya Bosenyi (Kopano ya Bosenyi))
4.1. Afrika Borwa e kgatha tema Kopanong ya bo-15 ya Ditšhabakopano ka Thibelo ya Bosenyi le Toka ya Bosenyi, yeo e swarwago United Arab Emirates go tloga ka la 26 Lewedi go fihla ka la 1 Diphalane 2026.
4.2. Kopano ye e tla hlahloba ditsela tšeo dinaga tša lefase di arabelago ka tšona ditlhohlong tša bosenyi tšeo di fetogago, go akaretša le tšeo di bakwago ke tšwelopele ya theknolotši, mola e kgothaletša tirišano ya boditšhabatšhaba le go matlafatša ditshepedišo tša toka ya bosenyi.
4.3. Kopano ye e nea Afrika Borwa sefala sa bohlokwa sa go tsenya letsogo le go holwa ke tlhabollo ya molao le pholisi ya boditšhabatšhaba, go abelana ka maitemogelo a naga le mekgwa ye mebotse, le go tšwetša pele taolo ya molao le tlhabollo ya go ya go ile.
4.4. Samiti ya Afrika ya 2026 ya Haedrotšene ya Tlhago
Kabinete e amogetše Samiti ye e Atlegilego ya Haedrotšene ya Tlhago ya Afrika ya 2026 yeo e swerwego Motsekapa go tloga ka la 15 go fihla ka la 16 Lewedi 2026, ka fase ga morero wo: “Go Tšwetša Lekala la Afrika la Haedrotšene ya Tlhago go tloga go PowerPoint go fihla go Gigawatts.” Seboka se ahlaahlile tšwelopele ya phethagatšo ya diprotšeke, ditšhelete, infrastraktšha le tlhabollo ya intasteri mo Afrika Borwa le go ralala le kontinente. Mo Afrika Borwa, ditlhabollo tše di bopa karolo ya Leanokakaretšo la Methopo, yeo e lego leano le legolo la dipeeletšo bakeng sa kabo ya mohlagase, leo le lebišitšwego go motswako wa methopo ya mohlagase wo o leka-lekanego le wo o tšweletšago khapone ya fase. Seboka se ile sa fana gape ka tshedimošo ya kaonafatšo mabapi le sehlopha sa mathomo sa diprotšeke tša haedrotšene ya tlhago.
Tše di akaretša Protšeke ya Makhura a Sefofane ao a Tšweletšwago ka Mokgwa wa go Tšwela Pele ka Mohlagase ya Phelan Green Group kua Boemakepe bja Saldanha. Phelan e neetše US$100 milione gomme go letetšwe gore kago e thome ka kotara ya mathomo ya 2027. Diprotšeke tše dingwe tša sehlopha sa mathomo di akaretša Protšeke ya Ammonia ya Tlhago ya Coega ka Kapa Bohlabela, yeo e phethilego mošomo wa mathomo wa go itokišetša; Protšeke ya Tšhipi yeo e Fokotšwago ka go lebanya ka Haedrotšene ya Saldanha lebopong la Bodikela, yeo e lego legatong la pele ga tekolo ya kgonagalo; Prieska Power Reserve ka Kapa Leboa, e lego protšeke ya ammonia ya tlhago yeo gonabjale e lego legatong la tlhabollo; Green e-Fuels Producers Green Methanol Corridor, yeo nepo ya yona e lego nyakego ya Yuropa gomme e lego legatong la pele ga tekolo ya kgonagalo; le Protšeke ya Ditharollo tša Haedrotšene ya Tlhago, yeo e nepilego kudu mmarakeng wa Afrika Borwa gomme e phethile tlhamo ya yona ya boentšenere bja mathomong.
G. Ditiragalo tša go thuntšha tšeo di diregilego ka morago ga Kopano ya Kabinete.
1. Go thuntšhwa ga Wedela, Carletonville, West Rand, Gauteng
1.1 Mmušo o romela matshidiso go malapa le bagwera ba bahlaselwa ba 18 bao ba bolailwego ka thabenengya Wedela, Carletonville, ka West Rand, moo banna ba seswai bao ba sego ba hlaolwa ba ilego ba thuntšha batho bao ba bego ba le ka thabeneng.
1.2 Batho ba 17 ba ile ba bolawa lefelong la tiragalo gomme motho yo mongwe o ile a hlokagala ka morago ka baka la dintho tša go thuntšhwa. Batho ba bangwe ba 18 ba ile ba gobala gomme ba išwa bookelelong. Ba bahlano ba boemong bjo bo hlobaetšago.
1.3 Ke ba bane fela ba bao ba hlokofetšego bao ba šetšego ba hlaotšwe, gomme mmušo o hlohleletša batho go lekola gore ba leloko bao ba dulago lefelong leo ba bolokegile le go bega batho bao ba timetšego maphodiseng.
1.4 Dikoloi tše pedi di ile tša fišwa gomme gwa utswiwa diselefouno. Maphodisa a mohlalengg wa babelaelwa ba seswai bao ba kgokaganywago le ditiragalo tše tša go thuntšha.
2. Ditiragalo tša go thuntšhana, Motsekapa
2.1 Mmušo o romela matshidiso go malapa le bagwera ba bahlaselwa ba 10 bao ba bolailwego Lwandle, Kapa ka Mokibelo mantšiboa, moo bahlaselwa ba bahlano ba ilego ba hlokofala ka yona nako yeo gomme ba bangwe ba hlokofala ge ba le tseleng ya go išwa bookelong.
Dihlopha tša dinyakišišo tša mafapha a go fapafapana di šetše di le gona go kgonthišetša gore badirabosenyi bjo ba swarwe le go lebana le molao.
H. MELAETŠA
1. Mahloko
• Kabinete e iša matshediso go bagwera le ba lapa la:Morena Enos Mafokate, moetleladipere yo a tumilego wa boditšhabatšhaba le sebapadi sa mathomo sa mothomoso go ba mmapodi wa dipere. E be e le gape mothei wa Senthara ya go Otlela dipere ya Soweto, sekolo sa go mootledi wa dipere, gomme e le moamogedi wa Sefoka sa Phihlelelo ya Bophelo ka Moka go Difoka tša Dipapadi tša Afrika Borwa.
• Malapa a bao ba hlokofetšego kotsing ya tsela ya N1 kua Kapa Bodikela, yeo e amilego maphelo a batho ba 21; le kotsing ya go thulana ga dikoloi tseleng ya ditefišo ya N17 kua Mpumalanga, yeo e amilego maphelo a batho ba seswai.
• Morena Owen Ndlovu, yo e bego e le mmoleledi wa dipapadi wa peleng wa SABC le molwela ditokelo tša mmino, yo a bego a rata kudu intasteri ya boithabišo, bobegaditaba le dipapadi, le go lwela ditokelo tša borammino.
• Mootledi wa mabelo, Morena Robert Wolk, yo mongwe wa baphenkgišani ba dipapadi tša mabelo a dikoloi bao ba atlegilego kudu Afrika Borwa, yo a bilego le mošomo wo o tšerego mengwaga ye nyakilego go ba ye 30. E be e le Konokono ya SA Formula Volkswagen ka 2013, konokono ya Formula 1600 ka 2015, konokono ya SA GTC mengwageng ya go latelana ya 2021 le 2022, le Konokono ya SA Touring Cars ka 2024.
2. Ditebogišo
• Kabinete e lebogiša le go lakaletša tše botse go:Sehlopha sa Springbok ka go thopa tatelano ya Rugby’s Greatest Rivalry kgahlanong le All Blacks, le Siya Kolisi ka go ba molaodi wa Springbok yo a atlegilego kudu ka diphenyo tše 56 tša diteko.
• Mamelodi Sundowns ka go thopa FIFA African–Asian Pacific Cup ka morago ga go fenya dikonokono tša Asia, Al-Ahli, ka dino tše 2-1.
• Morena Bayanda Walaza ka go thopa lebelo la banna la dimithara tše 100 Kopanong ya Boditšhabatšhaba ya Rovereto, moo a robilego rekoto ya metsotswana e 9,91. Gape o fentše lebelo la dimithara tše 100 Kopanong ya Dipapadi tša Lebelo ya Serbia kua Smederevo, Serbia..
• Morena Sinesipho Dambile ka go fetša a le boemong bja bobedi mafelelong a lebelo la banna la dimithara tše 200 go makgaolakgang a Diamond League kua Brussels.
• Morena Xola Magwaza ka go ba Moafrika Borwa wa mathomo wa go thopa sefoka sa Natural Universe Open go International Natural Bodybuilding Association/Professional Natural Bodybuilding Association Natural Universe kua Singapore.
• Kyalami Grand Prix Circuit ka go kgethwa go swara Michelin 24H Series ya maemo a godimo go tloga ka la 8 go fihla ka la 10 Pherekgong 2027, e lego tiragalo ya bohlokwa historing ka ge sefoka se se tla be se thoma go swarwa kontinenteng ya Afrika. Tiragalo ye e tla akaretša lebelo le le thata la diiri tše 24 la kgotlelelo lebaleng la mabelo leo le tumilego nageng kua Midrand.
• Sehlopha sa bosadi sa kgwele ya matsogo sa Afrika Borwa, SPAR Proteas, ka go fetša e le bafenyi ba bobedi go 2026 Africa Netball Cup yeo e swaretšwego Kenya.
• Sehlopha sa banna sa kgwele ya matsogo sa Afrika Borwa, Protea Warriors, ka go šireletša sefoka sa sona sa kontinente go 2026 Africa Netball Cup yeo e swaretšwego Kenya.
• Proteas ka go fenya Australia papading ya bobedi ya letšatši le tee le tee kua DP World Wanderers Stadium le go thopa tatelano ya dipapadi tše tharo ka go eta pele ka 2-0.
• Ramatswele wa Afrika Borwa, Morena Ricardo Malajika, ka go thopa Sefoka sa Lefase sa WBC Super Flyweight kua Tokyo, Japane.
• Afrika Borwa ka go thopa metale wa silibere go tša Tlhokomelo ya Difofane go Phadišano ya World Skills 2026 kua Shanghai, Repabliki ya Batho ya China. Naga e emetšwe ke baithuti ba 29 bao ba bego ba phadišana ka mabokgoni a 27, ba na le bao ba phadišanago le bona ba e ka bago ba 1 400 go tšwa dinageng tša ka godimo ga tše 90.
• Sehlopha sa setšhaba sa kgwele ya maoto sa Afrika Borwa sa ka fase ga mengwaga ye 20, Amajita, ka go thopa COSAFA U20 Championship le go ba le maswanedi ka nako e tee go Confederation of African Football (CAF).
• Bafana Bafana, sehlopha sa setšhaba sa kgwele ya maoto, ka phenyo ya sona ya 2-1 kgahlanong le Equatorial Guinea..
E ntšhitšwe legatong la Kabinete ke:
Tona Kantorong ya Mopresidente, Mohumagadi Khumbudzo Ntshavheni
Dikgokagano tša Mmušo le Lenaneo la Tshedimošo (GCIS)
Dikgokaganyo: Mohumagadi Nomonde Mnukwa: Molaodipharephare wa Motšwaoswere
Selefouno: 083 653 7485
