A. Merero ye Bohlokwa Seemong sa Bjale
1. Kgolo ya tša boeti, go oketšwa ga difofane le mekgwa ya polokego ka go tša boeti
1.1 Kabinete e amogetše go šoma gabotse kudu ga lekala la boeti leo, go ya ka Pego ya Boeti ya Boditšhabatšhaba ya Afrika Borwa, le bilego le baeti ba 989 329 ka Moranang 2026. Ye ke kgolo ye kgolo kudu ya kgwedi ka kgwedi ya go feta ya ngwaga wo o fetilego ye e sa lego ya bonwa, gomme e netefatša leboelela ponagalo yeo e tiilego ya Afrika Borwa bjalo ka lefelo leo le ratwago la boeti.
1.2 Go dira gore seemo se se dule se tiile, mmušo o tšwela pele go oketša kgokagano ya difofane ya boditšhabatšhaba. Nakong yeo e sa tšwago go feta, khamphani ya difofane ya LATAM e ile ya tšea sephetho sa go tsebagatša go tlo ba gona ga difofane tše tharo ka beke tša go tlo fofa magareng ga São Paulo le Cape Town tšeo di tlo thomago ka Mosegamanye 2026 go na le ka nako yeo e bego beilwe mathomong ya Lewedi 2026. Go tlaleletša seo, ka la 24 Phupu 2026, khamphani ya difofane ya Air Europa e tsebagaditše tsela ya thwii ya difofane ya magareng ga Madrid le Johannesburg, yeo e tlo matlafatšago kgokagano le Yuropa mmogo le go thekga kgolo go phatlalala le makala a boeti le boamogelabaeng.
1.3 Go oketšega ga baeti go tla nakong ya go begwa ga go theoga ga dipalopalo tša bosenyi ka magorong a bohlokwa, le go šoma ka lebelo ga lekala la phethagatšo ya molao go rarolla melato ya bosenyi.
2. Go Šoma ka Gabotse ga Telkom ka tša Ditšhelete le Tshepedišo
2.1 Kabinete e lebogišitše Telkom, yeo e lego khamphani yeo mmušo o nago le dišere tše ntši go yona, ge e šomile gabotse ka tša ditšhelete le tshepedišo mo ngwageng wa ditšhelete wo o fedilego ka la 31 Hlakola 2026. Mo nakong ye, mešomo ya Telkom e ile ya thekga di-SMME tše 362 ka dibaka tša go reka ka go akaretša tša go ja R539 milione, ya thekga go hlolwa ga mešomo ye 74 114 ka lenaneo la tlhabollo ya di-SMME; baswa ba 1 524 ba ile ba hlahlwa ka boithutelamošomo ga ICT. Telkom e ile ya ba ya fihlelela bakgathatema ba go feta dimilione tše pedi.
2.2 Mmušo o tla fiwa R559 milione ya mašokotšo (go sa balwe mašokotšo go ditheo tše dingwe tšeo mmušo o lego mong wa tšona). Letseno le la tlaleletšo le tlo thuša go thekga dilo tše bohlokwa tše di nabilego tša mmušo tša tlhabollo le maikgafo a kabo ya ditirelo ya setšhaba.
2.3 Kabinete e ile ya lemoga gape le karolo yeo khamphani ye e e bapalago tabeng ya go fokotša tlhokego ya dikgokagano tša titšithale le go thekga tlhabollo ya ekonomi ye e akaretšago bohle, gomme e na le tshepo ya gore Telkom, ka fase ga boetapele bja Mohlankedimogolophethiši wa Sehlopha, Morena Serame Taukobong le Boto ya Balaodi, e tla dula e kgotleletše mo nakong ye ye boima go tša ekonomi.
3. Ntwa ya tšhomišanommogo kgahlanong le tshepedišo ya diokobatši tšeo di sego molaong mmogo le digongwana tša bosenyi
3.1 Kabinete e retile Bolaodi bja Taolo ya Mellwane, DiHawks, mafapha a SAPS K9 le makala a mangwe ka moka a phethagatšo ya molao ao a kgathilego tema ka lesolong leo le bego le sepetšwa ke tša bohlodi go tanya morwalo wa diokobatši tša go ja tšhelete ya go batamela R1 bilione Mollwaneng wa Beitbridge.
3.2 Mošomo wo wa tšhomišanommogo wa la 27 Mopitlo 2026 o ile wa dira gore go emišwe lori yeo e bego e etšwa Zimbabwe gomme e etla ka Afrika Borwa. Diphuruphutšo tše di tseneletšego di ile tša dira gore go hwetšwe diokobatši tša mohuta wa methaqualone yeo e tsebegago kudu ka la ABBA ya boima bja dikramo tša go ka ba 713 000, gomme yona e dirišwa go tšweletša diokobatši tša Mandrax.
3.3 Godimo ga fao, Kabinete e retile ba Tirelo ya Maphodisa a Afrika Borwa ge ba kgonne go swara bagononelwa ba 11, go balwa le badudi ba Mexico ba bane, go latela go utollwa ga laporotori ya go tšweletša diokobatši ya dimilionemilione tša diranta ka polaseng ya ka Swartruggens ka Profenseng ya Leboa Bodikela.
4. Afrika Borwa e thekga ntwa ya kontinente kgahlanong le Ebola
4.1 Kabinete e thekga tshepišo ya naga ye ya tšhelete ya go fihla go US$5 milione yeo e e tladitšego go $319 milione yeo e lego ya boitokišetšo bja kontinente le leano la karabelo go latela go phulega ga Ebola yeo e kekilego go phatlalala le naga ya Democratic Republic of the Congo le Uganda.
4.2 Le ge e le gore go phulega fa go goeleditšwe ke Mokgatlo wa Maphelo wa Lefase bjalo ka seemo sa tšhoganetšo sa boditšhabatšhaba, ga go na lebaka gonabjale la gore batho ba thome go tšhogaka Afrika Borwa. Ebola ga se bolwetši bjo bo hwetšagalago ka Afrika Borwa, gomme phetetšo ya yona go tloga mothong go ya go yo mongwe e direga ge motho a ka kgoma diela tša ditšwammeleng tša motho yo a fetetšwego.
5. Khomišene ya Dinaga tše Pedi tša Afrika Borwa le Botswana
5.1 Afrika Borwa le Botswana di phethile ka katlego Khomišene ya Dinaga tše Pedi (BNC) nakong yeo Mopresidente Cyril Ramaphosa a bego a etetše ka Botswana ketelong ya semmušo.
5.2 BNC e gateletše leboelela dikamano tše di tiilego ebile tša histori magareng ga dinaga tše tše pedi mola e tšwetšapele tšhomišano ka dikarolong tše bohlokwa tše bjalo ka saense, theknolotši, bohlami, kgwebišano, boeti le tlhabollo ya selete.
5.3 BNC e ile ya fihla sehloeng ka go saenwa ga ditokomane tša tirišano tše nne tše diswa tša dinaga tše tše pedi tšeo di nepilego go tšwetšapele kgolo ya ekonomi ye e swarelelago mmogo le kopantšho ya selete, gomme tšona di tlaleletša ditokumente tša tirišano tša semolao tše 28 tšeo di lego gare di phethagatšwa.
5.4 Ditokumente tše diswa tše nne tša tirišano ya mebušo ya dinaga tše tše pedi ke: Memorantamo wa Tumelelano (MoA) mabapi le Taolo yeo e Kopanetšwego ya Boleng bja Meetse le Diphoofolo le Dimela tša ka Meetseng tšeo di Šwahlelago Meetse ao a Hlwekilego ka Lehlakoreng leo le Phagamego la Molapo wa Noka ya Lebepe; Tumelelano mabapi le Tšhomišano ka Lekaleng la Enetši; le Memorantamo wa Tumelelano (MoA) mabapi le Tšhomišano ka Lekaleng la Ditirelo tša Tshokollo le Dikgolego.
6. Ketelo ya semmušo ya Mopresidente wa Kenya ka mo nageng
6.1 Mopresidente Cyril Ramaphosa o ile a amogela Mopresidente William Ruto wa Repabliki ya Kenya yo a lego ketelong ya semmušo ka Afrika Borwa go tloga ka la 3 go fihla ka la 5 Phupu 2026 ka taletšo ya Mopresidente Ramaphosa.
6.2 Ketelo ye ya semmušo e tšwetšapele kgwebišano, dipeeletšo le tšhomišano ka ditumelelano tše tshela (6) tšeo di saennwego go la Union Buildings ka Tshwane.
6.3 Dimemorantamo tša Ditumelelano tšeo di saennwego di mabapi le Nolofatšo ya Kgwebišano ka Tšhomišano ka Dikarolong tša Tshepelelano, Taolo ya Sethekniki, Tekolo ya Tshepelelano ka Mekgwa le Maitshwaro, Tumelelo ya Semmušo, Metherolotši; Tšhomišano ya Mešomo ya Lewatleng le Thwalo ya Merwalo ka Dikepe; Thuto le Tlhahlo ya Sethekniki le Seprofešenale; Tšwetšopele ya Tšhomišanommogo ka tša Tekatekano ya Bong le Matlafatšo ya Basadi; Bokgabo, Setšo le Bohwa; le Dipapadi le Boitapološo.
6.4 Ketelo ye ya Semmušo e be e akaretša le Foramo ya Dikgwebo yeo e bego e bopša ke makala a praebete ka Afrika Borwa le ka Kenya, moo bakgathatema ba ilego ba abelana tshedimošo le maitemogelo ka tša kgwebo gape le go nyaka dibaka tša go kaonafatša kgwebišano le dipeeletšo.
7. Ketelo ya mošomo ya Motlatšamopresidente ya tša kgwebo le sepolotiki ka India
7.1 Motlatšamopresidente Shipokosa Paulus Mashatile o ile a tšea leeto la go ya ka New Delhi, India.
7.2 Ketelo ye e ile ya matlafatša tšhomišano ka diforamong tša mebušo tše bjalo ka UN, BRICS le G20, le go kaonafatša tšhomišano ka tša kgwebišano, dipeeletšo, diphatišišo, phetišetšo ya theknolotši, mola go le gare go thekgwa dikgwebopotlana.
7.3 Motlatšamopresidente o ile a ba le kopano ya dipoledišano le Motlatšamopresidente C.P. Radhakrishnan, a ba a etela Mohumagadi Droupadi Murmu, e lego Mopresidente wa Repabliki ya India.
B. Diphetho tša Kabinete
1. Tsela yeo e nago le dintlha ka moka ya go laola bofaladi ka Afrika Borwa
1.1 Kabinete e amogetše le go dumelela tsela yeo e nago le dintlha ka moka mabapi le bofaladi ka Afrika Borwa, yeo e hlamilwego ke Komiti ya Ditona ya mabapi le Bofaladi, gomme e dumeletšwe gape ke Pego ya Naga ya Magato a Bosetšhaba (NAP) ya mabapi le Bofaladi ka Afrika Borwa.
1.2 Mopresidente o tla bolela le setšhaba ka taba ye.
2. Leano leo le Mpshafaditšwego la Tlhabollo ya Diintasteri (IDS)
2.1 Kabinete e dumeletše Leano leo le Mpshafaditšwego la Tlhabollo ya Diintasteri gore le phethagatšwe. Leano le, leo le hlamilwego ka ditherišano tšeo di tseneletšego, le šetšane le go fetola ekonomi ya Afrika Borwa go ba yeo e beilego šedi go mašeleng, leago le tikologo gape ebile e akaretšago bohle. Leano le le sepelelana le ditlapele tša pholisi ya Mmušo wa Bošupa gomme le thekgilwe ke dikokwane tše tharo go sepetša kgolo le phetošo ya diintasteri, e lego go fediša khapone, go fetola dilo go ba tša titšithale, le go kgatha tema ka makaleng a go fapafapana.
2.2 IDS e bea pele makala ao a lego bohlokwa go phetolelaintastering, go balwa le tšhireletšo ya diintasteri tše bohlokwa tše bjalo ka ya tšhipi, difatanaga, tšweletšontši le meepo. E tšwetšapele gape le go gola ka moso ga dikarolo tšeo di akaretšago phetošo ya ditšweletšwa tša temo go ba dijo, makhura, bjalobjalo, ekonomi ya titšithale le ekonomi ya dilo tša tlhago. Go tlaleletša seo, leano le le nepile makala ao a nago le kgonagalo ye kgolo ya go godiša ekonomi le go hlola mešomo, kudu bakeng sa baswa, go balwa le boeti le ditirelo tša kgwebo tša lefase.
2.3 IDS e letetšwe gore e hlole mešomo ye diketekete ngwaga ka ngwaga, ka go šetša kudu tlhabollo ya mabokgoni le go lokišetša batho bao ba sa šomego go tsena ka makaleng ao a nyakwago kudu a bjalo ka enetši ya go tšweletšwa ka dilo tša tlhago le tšweletšontši. Komiti ya Ditona, yeo modulasetulo wa yona e lego Mopresidente, e tla hlokomela phethagatšo ya leano le go netefatša gore le a diragala ebile le ba le seabe.
2.4 Tokumente yeo e feleletšego e gona wepsaeteng ya dtic go: www.thedtic.gov.za.
3. Go tswalelwa ga Protšeke ya Kaonafatšo ya Ditsela tša Maphefo tša Gauteng (GFIP)
3.1 Kabinete e dumetše gore SANRAL e phethagatše go tswalelwa ga GFIP go akaretša le tharollo ya maleba ya molato wa kgorotsheko wa OUTA, go šogana le melato efe goba efe yeo e sa šetšego, le go tswalelwa ga merero ka moka ya go amana le sekoloto sa kgale sa di-e-toll.
3.2 Se se latela sephetho sa mmušo sa go fediša lenaneo la dikgorwana tša go lefelwa tša di-etoll go GFIP yeo e diragetšego ka la 12 Moranang 2024.
3.3 Kabinete e etše hloko maele go tšwa go SANRAL a gore go phumolwe sekoloto seo se kolotwago ke badiriši ba tsela bao ba sego ba lefa, gape le gore Kgoro ya Matlotlo ya Bosetšhaba e tla lefela sekoloto se, gape le gore badiriši ba tsela bao ba lefetšego di-e-toll ba ka se ke ba bušetšwa tšhelete ya bona ka ge molao o be o re ba lefe ka nako yeo.
4 Dipego tša gabedi ka ngwaga tša kgatelopele mabapi le Tlhako ya Togamaano ya Seripagareng sa Ngwaga wa Ditšhelete
4.1 Kabinete e amogetše le go ela hloko dipego tša gabedi ka ngwaga tša kgatelopele ya mabapi le phethagatšo ya Leano la Tlhabollo la Seripagareng sa Ngwaga wa Ditšhelete (MTDP) ka nako ya go tloga ka Diphalane 2025 go fihla ka Hlakola 2026. Dipego tše di tla ka tebeleloleswa ya ka moo kgoro e šomago, kgahlanong le ditlapele tša mmušo tša bosetšhaba, gomme di bonagatša diphihlelelo tše bohlokwa, kgatelopele yeo e dirilwego mmogo le ditlhohlo tša phethagatšo.
4.2 Kabinete e ela hloko kgatelopele ye kgolo ka phethagatšong ya MTDP go phatlalala le ditlapele tše bohlokwa.
4.3 Tona ya Peakanyo, Peoleihlo le Tekolo, mmogo le Baduladitulo ba Magoro a Kabinete, o tla dira tsebišo mabapi le tshedimošo ye nngwe gape ya ka ga dipego tša kgatelopele tša gabedi ka ngwaga tša nako ya go tloga go Diphalane 2025 go fihla go Hlakola 2026. GCIS e tla fana ka dintlha tša tsebišo yeo.
5 Go gogelwa morago ga Pholisi yeo e sa Thadilwego ya Mahlale a Theknolotši ya Sekhomphutha (AI)
5.1 Kabinete e dumeletše go gogelwa morago ga pholisi yeo e sa thadilwego ya AI yeo e bego e phatlaladitšwe go hwetša ditshwayatshwayo go tšwa go setšhaba ka kgwedi ya Hlakola 2026. Go gogelwa morago mo go tla hlola sebaka sa gore pholisi ye ya AI e lebelelwe leswa go netefatša gore e fihlelela dinepo tšeo e ikemišeditšego go di fihlelela gomme ebile e hlola melawana ya bosetšhaba ya mabapi le go šomiša AI ka tsela ya maleba.
C. Molaokakanywa
1. Molaokakanywa wa 2026 wa Go Phumolwa ga Melao ye e Itšego ya Toka ya Pele ga 1994
1.1. Kabinete e dumeletše go romelwa Palamenteng ga Molaokakanywa wa 2026 wa Go Phumolwa ga Melao ye e Itšego ya Toka ya Pele ga 1994 gore o yo šogwa go ya pele. Molaokakanywa wo o nyaka go lebelela leswa le go phumola melao yeo e se sa nago mošomo ya nako ya bokoloneale le ya nako ya mmušo wa kgethollo yeo e se sa sepelelanago le dikokwane tša Molaotheo wa temokrasi gape ebile e se sa nago mohola.
1.2. Ge o se no šogwa ke Palamente, Molaokakanywa wo o tlo phumola melao ye 149 ya nakong ya mmušo wa kgethollo yeo e sa lego gare šomišwa le go phethagatšwa le nakong ye ya mmušo wa temokrasi. Kgoro ya Toka le Tlhabollo ya Molaotheo e šetše e thomile go šomana le melao ya toka ya nakong ya kgethollo gore e phumolwe.
D. Ditsebišo tša Kabinete
1. Go Swarwa ga Samiti ya SADC ya 2026
1.1. Kabinete e filwe tshedimošo ya gonabjale ya mabapi le boitokišo bja Afrika Borwa bja go swara Samiti ya Mokgatlo wa Tlhabollo ya Borwa bja Afrika (SADC) go tloga ka la 16 go fihla ka la 17 Phato 2026. Samiti ye e tla ba go thoma ga Afrika Borwa go ba Modulasetulo wa SADC lebaka la dikgwedi tše 12. Kopano ya Ditona tša Merero ya Dinagadišele tša SADC e ile ya swarwa go tloga ka la 22 go fihla ka la 24 Mopitlo 2026 ka Skukuza, Mpumalanga, moo dikemedi di sekasekilego maano a go matlafatša tšhomišano ka seleteng.
1.2. Kopano yeo e ile ya bolela ka dihlogotaba tša dikarolo tše hlano e lego Thekgo ya Mašeleng go Kopantšho ya Selete, Dipeeletšo, Taolo ya Sekoloto sa Setšhaba le Peakanyetšo ya Lekgetho la ka Nageng, Phetolelaintastering, Tshepetšo ya Ditšweletšwa go Tloga ge di Dirwa go ya ge di Šomišwa, le Kgwebišano; Mananeokgoparara, Dinamelwa le Borwalathoto le Tokologo ya Mosepelo ya Batho, Dithoto le Ditirelo; Didirišwa tša Enetši, Makhura le Kgase le Diminerale; le Temo, Ditšweletšwa le Didirišwa tše Bohlokwa tša Temo, Boabaditirelo le Dithoto, Mebaraka le Tšhireletšo ya Dijo, le mekgwa yeo e beilwego pele ebile e hlaotšwego ya bakeng sa go tšea magato mmogo.
1.3. Go swara samiti ya SADC le go tšea maemo a Bodulasetulo go bohlokwa ka ge go tlo kgontšha Afrika Borwa go eta pele phetošo ya ekonomi ya selete, go tšwetšapele phetelolelaintastering, le go matlafatša kopantšho ya bobedi dipolotiki le ekonomi.
2. Pego ya Ngwaga le ya Kotara ya Mathomo ya Bolaodi bja Bosetšhaba bja Dibetša (NCACC)
2.1 Kabinete e amogetše pego ya ngwaga ya NCACC ya 2025 mmogo le ya kotara ya mathomo ya 2026 ya mabapi le tshepetšo yeo e dumeletšwego ya dibetša.
2.2 Mo ngwageng wo o fedilego ka Manthole 2025, NCACC e fetišitše ditumelelo tša diromelwantle tša dibetša le didirišwa tša sešole tša go ja R10 bilione, disetifikeiti tše 197 tša boingwadišo, le ditumelelo tše 183 tša dikontraka tša go fihla go R41 bilione.
2.3 Ditumelelo tša diromelwakanageng tša dibetša le didirišwa tša sešole e bile tše 366 gomme tša ja R269 milione, mola Ditumelelo tša Diromelwantle tša Dithoto le Didirišwa tša Sešole tše 132 tšeo di jago R600 milione di ile tša fetišwa nakong ya pego yeo. Afrika Borwa e amogetše diromelwakanageng tša didirišwa tša go ja R269 milione.
2.4 Pego ye e tšwela pele go hlaloša gore ka 2025 go bile le koketšego ya 5% tša dikhamphani tšeo di ngwadišitšwego ge di bapetšwa le ka 2024.
3 Peakanyoleswa ya Mellwane ya Dikgorotsheko
3.1 Kabinete e ile ya tsebišwa ka ga mošomo woo o dirilwego tabeng ya go beakanya mellwane ya dikgorotsheko tša Magoro a Kgorotsheko ya Godimo le go thekga phethagatšo ya dikeletšo tša ka pela tša Komiti ya Peakanyoleswa ya Mellwane ya Dikgorotsheko mabapi le dikgorotsheko tša selete tša bomaseterata le tša ka tlase ga tša selete tšeo go tšona makalamagolo le makala a selegae a Magoro a Kgorotsheko ya Godimo a tla phethagatšago mešomo ya ona. Se se dirwa ka maikemišetšo a go fihlelela toka gomme gape se thekga tsela ya kgato ka kgato ya go oketša palo ya bašomi ba tša toka go šogana le mathata a tlhaelelo ya bašomi ka lekaleng la toka, mmogo le go hlongwa ga makala a selegae a tlaleletšo ka magorong ao a hlaotšwego.
3.2 Tona Kubayi o tla hlaloša dintlha ka botlalo mabapi le taba ye bekeng yeo e tlago. GCIS e tla hlaloša dintlha tša tsebišo.
E. Bao ba thwetšwego mešomong
Batho ka moka bao ba thwetšwego mešomong mangwalo a bona a thuto a tla kgonthišišwa le go tiišeletšwa ka mekgwa ya maleba.
1. Morena Bongikhaya Dayimani bjalo ka Molaodipharephare wa Kgoro ya Peakanyoleswa ya Naga le Tlhabollo ya Metsemagae
2. Mohumagadi Gcobisa Joyce Soci bjalo ka Motlatša-Molaodipharephare (DDG) wa Tša Tshepedišo ka Kgorong ya Dikgokagano le Ditheknolotši tša Titšithale
3. Morena Dick Andries Sono bjalo ka DDG wa Infrastraktšha le Ditheknolotši tša Titšithale ka Kgorong ya Dikgokagano le Ditheknolotši tša Titšithale
4. Mohumagadi Jeanette Morwane Mmatsiate bjalo ka DDG wa Bobegaditaba le Tlhamo ya Diteng ka Kgorong ya Dikgokagano le Ditheknolotši tša Titšithale
5. Boto ya Koporase ya Inšorense ya Dikoloto tša Diromelwantle ya Afrika Borwa
a. Morena Sipho Bhanisi bjalo ka moemedi wa Kgoro ya Matlotlo ya Bosetšhaba.
6. Go thwalwa ga maloko a tlaleletšo go Khansele ya tša Kgahlanong le go Phatlalala ga Dibetša tša Go Hlola Tshenyo ye Ntši
a. Motseta Tebogo Seokolo; (Motlatšamodulasetulo ebile e le moemedi wa DIRCO); le
b. Ngaka Praise Sibuyi (Moemedi wa Mokgatlo wa Bohlodi ya Mmušo).
7. Go thwalwa ga Boto ya Poso ya Afrika Borwa
c. Mohumagadi Regina Sizakele Madlala (Modulasetulo);
d. Mohumagadi Margaret Mosibudi Phiri (Motlatšamodulasetulo);
e. Morena Vuyo Mafata;
f. Mohumagadi Tanya van Meelis;
g. Mohumagadi Mantombi Lekhuleni;
h. Moatbokata Mthokozisi Daluxolo Xulu;
i. Ngaka Mduduzi Justice Kennedy Bophela;
j. Morena Charley Fred Chain;
k. Morena David Mangena; le
l. Morena Khonanjalo Buthelezi.
F. Ditiragalo tšeo di sa tlago
1. Go Tsebagatšwa ga Kabo ya Lenacapavir
1.1 Mopresidente Ramaphosa, a farafarilwe ke Tona ya Maphelo, Ngaka Aaron Motsoaledi, o tla tsebagatša kabo ya Lenacapavir yeo e lego tšhwaana ya tlholompsha ya go thibela HIV yeo e dulago mmeleng nako ye telele gomme e hlabjago gabedi ka ngwaga.
1.2 Tšhwaana ye e oketša mekgwa ya go fapafapana ya go thibela HIV, kudu go batho bao ba nago le bothata bja go nwa pilisi ya PrEP tšatši ka tšatši. Kabo ye ke karolo ya leano la Afrika Borwa la go thibela HIV leo le nepilego go fokotša diphetetšo tše diswa le go kaonafatša boleng bja bophelo.
1.3 Tsebagatšo ye e tlo diragala ka Labohlano la 5 Phupu 2026 Lepatlelong la Lilian Ngoyi ka Secunda, Mpumalanga.
2. Kgwedi ya Baswa
2.1 Kgweding ye Afrika Borwa e keteka ngwaga wa bo-50 wa Megwanto ya Baswa ya Soweto ya 1976, e lego segopotšo se maatla sa baswa ba borena bao ba ilego ba ba batšwasehlabelo ge ba be ba lwela tokologo, toka le tekatekano.
2.2 Go hlompha bohwa bja Baithuti ba 1976, Kgwedi ya Baswa e tla ketekwa ka tlase ga moeno wo, “RESET@50 – Bokamoso bo a go Bitša”. Ka go keteka phihlelelo ye, mmušo o tla lokolla lenaneo la ngwaga ka moka leo le nepilego go kopantšha ntwa ya tokologo le matlafatšo ya baswa ya sebjalebjale. Lenaneo le le tlo šetšana kudukudu le thuto yeo e lekalekanago, kgathotema ka ekonoming yeo e akaretšago bohle, tlhabollo ya mabokgoni le go ba modudi wa ka mo nageng wa mafolofolo.
2.3 Kabinete e ipiletša go makala ka moka a setšhaba go šomišana le mmušo ka ditharollo tšeo di tšwetšagopele taba ya go hlolela baswa mešomo, go matlafatša go ba beng ba dikgwebo le go tsošološa kholofelo go baswa. Ka maitapišo a a tšhomišanommogo, setšhaba se tla tšwela pele go matlafatša kgathotema ya baswa ka go ageng setšhaba le phetošong ya ekonomi.
3. Re Keteka Diphihlelelo tša Tokologo
3.1 Mmušo o tla tsebagatša Lesolo la Diphihlelelo tša Tokologo ka tlase ga moeno wo o rego “Re Hlompha tšeo di Fetilego, Re Tliša Bokamoso” ka la 18 Phupu 2026 go la Union Buildings.
3.2 Kabinete e tla thekga go tsebagatšwa ga meketeko ya Segopotšo sa Ngwaga wa bo-70 wa Mogwanto wa Basadi wa 1956 woo e lego karolo ya ditiragalo tša bosetšhaba tša Diphihlelelo tša Tokologo, gomme se e tlo ba go thoma ga lenaneo la bosetšhaba la ditiragalo tšeo di gopolago mogwanto wa Basadi woo o dirilego histori wa 1956.
4. Tšhelete ya tšhipi ya segopotšo
4.1 Kabinete e dumeletše ditlhamo tše diswa tša bokamorago bja tšhelete ya tšhipi ya segopotšo yeo e lokolotšwego ke Panka ya Risefe ya Afrika Borwa (SARB) ka 2026 ka tlase ga moeno wa thuto. Tšhelete ye e akaretša ya R2 yeo e laetšago segopotšo sa ngwaga wa bo-125 wa go aloga yunibesithing ga molwelatokologo, Charlotte Maxeke yo a bilego mosadi wa mathomo wa mothomoso wa Moafrika Borwa wa go hwetša tikrii ya yunibesithi.
4.2 Tšhelete ya di-R2 tša tšhipi ya segopotšo le yona e tla lokollwa ke SARB e le segopotšo sa ngwaga wa bo-50 wa Megwanto ya Baithuti ya 1976, e le segopotšo sa mengwaga ye 30 ya Molaotheo wa Afrika Borwa, gape ebile e le segopotšo sa mengwaga ye 70 ya Mogwanto wa Basadi wa 1956 go ya Union Buildings. Godimo ga fao, tšhelete ya tšhipi ya di-R5 e tla ba le dika tšeo di lego godimo ga ya di R2. Digopotšo tše di bonagatša karolo yeo thuto e e bapalago mo go tšwetšengpele dikokwane tša Molaotheo le go hlohleletša kgathotema ya leago le ekonomi ye e akaretšago bohle.
5. Mafelelo a Beke a Go Ingwadišetša go tlo Kgetha Dikgethong tša Mmušo wa Selegae tša 2026
5.1 Kabinete e gopotša batho ka moka bao ba nago le maloka a go kgetha go ingwadišetša Dikgetho tšeo di Tlago tša Mmušo wa Selegae tšeo di tlo swarwago ka la 4 Dibatsela 2026.
5.2 Mafelelo a beke a mathomo a go ingwadišetša dikgetho a tlo ba gona ka Mokibelo wa la 20 Phupu 2026 le ka Lamorena la 21 Phupu 2026 lefelong la kgauswi la go ingwadišetša go kgetha GOBA ka go etela registertovote.elections.org.za, GOBA batho ba ka etela diofisi tša Khomišene ya Dikgetho tša kgauswi le bona nakong ya diiri tša mošomo.
5.3 Badudi ba gopotšwa gore ba ka kgona go kgetha fela moo ba ingwadišitšego gona gomme ebile ba ka kgona go hwetša lefelo leo ba ingwadišitšego go lona go maps.elections.org.za/vsfinder.
5.4 Kabinete e ipiletša go baswa kudu gore ba kgathe tema ka mafolofolo tabeng ya go bopa bokamoso bja ditšhaba tša bobona ka go kgatha tema ka dikgethong.
6. Dikarata tša SASSA
6.1 Kabinete e hlohleletša batho ka moka bao ba hwetšago mphiwafela gomme ba šomiša Karata ya Gauta ya SASSA go hwetša Dikarata tše diswa tše Ntsho tša Postbank pele letšatši la mafelelo la 31 Phato 2026 le fihla.
6.2 Go hwetša karata ye mpsha ga go lefelwe gomme go ka dirwa mafelong a ditirelo tša Postbank ao a lego ka mabenkeleng ao a kgathago tema naga ka bopahara.
Melaetša
1. Matshediso
Kabinete e iša matshediso go bagwera le ba lapa la:
• Raditaba wa go hlomphega, Baldwin Ndaba yoo mošomo wa gagwe wa go ikgetha o tšweletšego dikgatišong tša go fapafapana mengwaga ye mentši. Yena o tla gopolwa ka lerato leo a bego a na le lona go naga ya rena, boprofešenale bja gagwe mmogo le go ikgafela nnete.
• Ma Griet Margaret Messelaar, mmagokgoši wa Mošate wa Griqua yoo a hlokofetšego a na le mengwaga ye 106. Yena o tlo gopolwa bjalo ka molwedi wa polelo le bohwa bja seGriqua, mmogo le seriti le bohlale bja gagwe bjo bogolo.
• Dina le Morena Ernst Marais, balekani bao ba ilego ba bolawa ka KNP, gomme e reta SAPS le makala a mangwe a phethagatšo ya molao ge ba kgonne go golega bagononelwa ba dipolao tše ka lebelo.
2. Ditebogišo
Kabinete e lebogiša le go lakaletša tše botse go:
• Sehlopha sa bosetšhaba sa Kgwele ya maoto, Bafana Bafana ge ba yo emela naga ye diphadišanong tša Mogopo wa Lefase wa FIFA wa 2026 ka Amerika. Kabinete e lakaletša sehlopha gore se tie, se kopane se be se atlege dipapading tšeo tša lefase. Dirang gore setšhaba se ikgantšhe ka lena!
• Sehlopha sa Mamelodi Sundowns (Masandawana, Kabo Yellow) ge se bile bathopi ba diphadišano tša CAF tša 2026. Sehlopha se se dirile gore naga ye e ikgantšhe maemong a kontinente ge se ile sa ipontšha leboelela gore ke dinkgwete tša nnete tša kgwele ya maoto ka Afrika.
• Sehlopha sa Orlando Pirates (The Bucaneers, Zimnyama Ngenkani) ge se bile bafenyi ba lliki ya PSL ya 2026.
• Kgaphampshikela ya Moafrika Borwa, DJ Black Coffee ge a kgonne go diragatša lefelong leo le bego le tletše wa go falala la The O2 Arena la go kgona go rwala batho ba 20 000, gomme se se mo dirile gore e be DJ ya mathomo go tšwa Afrika go fihlelela se. Black Coffee mmogo le bangwekayena ba di-DJ ka Afrika Borwa ba thušitše go phagamiša mmino wa Afrika Borwa lefaseng ka bophara le go o fihliša go batheeletši ba boditšhabatšhaba, gomme o šetše a kile a diragatša mafelong a maemo a godimo a bjalo ka Ibiza, Coachella le Madison Square Garden.
Dipotšišo:
Dikgokagano tša Mmušo le Lenaneo la Tshedimošo (GCIS)
Dikgokaganyo: Mohumagadi Nomonde Mnukwa, Molaodipharephare wa Motšwaoswere
Mogala: 083 653 7485
