A. DITABA TŠEO DI AMAGO BADUDI
1. Tielelo ya Ekonomi e a Bonagala
1.1. Phethagatšo ya Ditirelo tša Ditimela tša Transnet (TFR) – Kotara ya Mathomo
1.1.1. Nakong ya kotara ya mathomo ya ngwaga wa ditšhelete wa 2026/27, Ditirelo tša Ditimela tša Transnet (TFR) di bile le phethagatšo ye e kaonafetšego ya rekoto ya 4.4% mengwaga ya go latelana. TFR e phethile kotara e kgonne go feleletša ditone tše dimilione tše 42,0 ge di bapetšwa le tša 40,2 tša ngwaga wo o fetilego.
1.1.2. Seo se swanetšego go lemogwa ke gore TFR e fihleletše phethagatšo ye ele ge go bile le tsebagatšo ya go tswalelwa ga matšatši a 11 a ge go lokišwa ka Diporong tša go Sepetša Tšhipi. Le ge go le bjalo, TFT e ile ya kgona go sepetša dithoto tše ntši, gomme seo se laetša kaonafalo ye kgolo ka go šomeng ka go phethagala le ka bokgoni.
1.2. Dipeeletšo ka Lekaleng la Difatanaga
1.2.1. Kabinete e amogetše peeletšo ya Toyota South Africa Motors ya R10.4 bilione polanteng ya yona ya Prospecton ka eThekwini go tšweletša moloko wa bosenyane wa Hilux. Peeletšo ye e matlafatša lekala la tšweletšontši ya difatanaga, e thekga mešomo ye 27,000 go phatlalala le netweke ya baabi, gomme e lota mešomo ya thwii ya go aga difatanaga ya go feta 4,300 – e lego mešomo ya bašomi bao ba šomago thwii ka polanteng ya Toyota ya Prospecton.
1.2.2. Tsentšho ye ya mašeleng a mantši e sepela mmogo le go rekwa le go mpshafatšwa ga polante ya go aga difatanaga tša Nissan ya Rosslyn ka Gauteng ke ba Chery Group. Ba Chery Group ba tsebišitše gore ba tlo tšweletša difatanaga tša Chery, Jaecoo le Jetour polanteng yeo ba tšogo e reka ya Rosslyn.
1.2.3. Tšweletšo ya mathomo e beetšwe go tlo thoma magareng ga ngwaga wa 2027, moo elego gore mošomo wa tshepedišo o tlo oketša ngwageng wa go latela go fihlelela tšweletšo ya difatanaga tše 15 000 ka ngwaga.
1.2.4. Go reka polante ye ga Chery go boloka mešomo ye 692 ya tšweletšontši gomme go lebeletšwe gore palo ye e gole go fihlelela dibaka tša thwii le tšeo e sego tša thwii tša go batamela 3,000 go phatlalala le makala a borwalathoto, boentšenere, boabaditirelo le dithoto, le ditirelo tša thekgo.
1.2.5. Ditshepišo tše tša nako ye telele di tiiša le maemo a Afrika Borwa bjalo ka lefelo la tšweletšontši la dithomelontle la go tšea gabotse ka seleteng.
1.3. Tebeleloleswa ya Kgolo ya go ya Godimo ya IMF
1.3.1. Kabinete e amogetše tebelelopele yeo e mpshafaditšwego ya ikonomi ka botlotla ya Sekhwama sa Ditšhelete sa Boditšhabatšhaba (IMF) yeo e mpshafaditšego kgolo ya palomoka ya boleng bja ditšweletšwa le ditirelo tša naga (GDP) go fihla go 1.1%. Kabinete e etše hloko gore tokišo ye ye botse e bonagatša ekonomi yeo e sa tekatekego ya ka nageng, yeo e tšwelago pele go laetša kgotlelelo.
1.3.2. Le ge mpshafatšo ya kgolo ya ekonomi ya Afrika Borwa e le ye re ka no rego e a iteka, e bonagatša boitshepo bjo bo golago bja maitapišo a go tsošološa ekonomi ya naga le ge go bile le kgolo ya go fokola ya ekonomi ya lefase le dithulano tša sepolotiki ka Bohlabela bja Gare.
1.4. Phethagatšo ya Legato la Bobedi la Sekema sa Titšithale sa Mongmošomo yo a Botegago (TES)
1.4.1. Kabinete e amogela tsebagatšosemmušo ya Legato la Bobedi la Sekema sa Titšithale sa Mongmošomo yo a Botegago (TES) go potlakiša go šogwa ga dibisa bakeng sa bengmošomo bao ba netefaditšwego le go bea tšhireletšo ya bosetšhaba le ditaolo tša bofaladi maemong a go fokola. Bengmošomo bao ba nago le maloka ba letetšwe go laetša dipeeletšo tša go bonala ka mo nageng, ba bee pele taba ya go thwala badudi ba ka Afrika Borwa le badudi ba go ya go ile bao ba sa belegelwago ka mo nageng, ba beeletše ka tlhabollong ya mabokgoni a batho ba ka mo nageng, le go sepelelana le makalaa bohlokwa a ekonomi.
1.4.2. Phothale yeo e diretšwego se ya onlaene bakeng sa Legato la Bobedi la TES - "Home Affairs @ home" ke karolo ya leano leo le nabilego la titšithale la mmušo. Mo nakong ye nngwe phothale ye ya titšithale e tla fetoga go ba lenaneo la Elektroniki la Tumelelelo ya go Eta (ETA).
1.4.3. Bengmošomo bao ba nago le maswanedi ba laletšwa go romela Ditaetšo tša Kgahlego (EOI) magareng ga la 20 Mosegamanye le 4 Lewedi 2026.
2. Re aga Diekonomi tše di Tiilego tša Selete (SADC)
2.1. Afrika Borwa e itokišitše go tlo swara Samiti ya SADC
2.1.1. Kabinete e netefaleditšwe ka boitokišetšo bja Afrika Borwa bja go tlo swara Samiti ya go Tlwaelega ya Dihlogo tša Dinaga le Mebušo ya Mokgatlo wa Tlhabollo ya Borwa bja Afrika (SADC) go tloga ka la 16 go fihla ka la 17 Phato 2026 go la Durban International Convention Centre ka Durban.
2.1.2. Bjalo ka karolo ya mediro yeo e lebilego go Samiti ya ADC, Afrika Borwa e tlo swara Beke ya Tlhabollo ya Diintasteri ya SADC go tloga ka la 27 go fihla ka la 31 Mosegamanye 2026 go la Durban International Convention Centre ka KwaZulu-Natal. Tiragalo ye e kopantšha bahlami ba dipholisi, baetapele ba dikgwebo, babeeletši, dirutegi, banyakišiši le makala a mašeleng a tlhabollo go tšwa seleteng ka bophara le go tšwela ka ntle ga sona go tšwetšapele tlhabollo ya diintaseteri.
2.1.3. Beke ya Tlhabollo ya Diintasteri ya SADC e thekga Leano le Mošupatsela wa Tlhabollo ya Diintasteri ya SADC (2015–2063), yeo e ithekgilego ka dikokwane tše tharo: tlhabollo ya diintasteri, phenkgišani le kopantšho ya selete.
2.1.4. Šedi ya ngwaga wo e akaretša tlhabollo ya tshepetšo ya tšweletšo ka moka ya selete ka go tša go šogwa ga ditšweletšwa tša temo, dikhemese, ditšweletšwa tša go rekišwa, le go hlatswa diminerale tše bohlokwa, mmogo le tlhabollo ya infrastraktšha ka go tša enetši, dinamelwa, borwalathoto, meetse le ICT.
2.2. Phokotšo ya ditshenyagalelo tša ditefelo tša kgwebišano ka gare ga SADC
2.2.1. Kabinete e lebogišitše Panka ya Risefe ya Afrika Borwa ka katološo ya lenaneo la go lefela la SADC Real-Time Gross Settlement (SADC-RTGS) ka go akaretša tšhelete ya Kwanza ya Angola go ba ya bobedi ya kgwebišano ka morago ga Ranta ya Afrika Borwa.
2.2.2. Lenaneo la SADC-RTGS le nepile go fokotša ditshenyagalelo tša ditefelo tša ditumelano tša kgwebišano bakeng sa kgwebišano ya dinaga tšeo di lego ka seleteng ka go nolofatša Tšhomišo ya ditšhelete tša dinaga tša selete se e sepetšwa ke Panka ya Risefe ya Afrika Borwa legatong la dipanka tša gare tša SADC tšeo di kgathago tema.
2.2.3. Go akaretšwa ga Kwanza ya Angola bjalo ka tšhelete yeo e šomišwago go lefela dikgwebišano ka lenaneong la SADC-RTGS ke seka sa phihlelelo ye kgolo ya go tšwetšapele kgolo ya ekonomi ya selete ka phokotšo ya ditshenyagalelo tša ditefelo tša ditswala.
2.3. Khomišene ya Tšhomišano Magareng ga Afrika Borwa le Namibia
2.3.1. Kabinete e amogetše go phethwa ka Katlego ga Khomišene ya Bone ya Tšhomišano Magareng ga Afrika Borwa le Namibia (BNC) yeo e bego e swaretšwe Pretoria ka la 17 Mosegamanye 2026, gomme baduladitulo ba yona e le Mopresidente wa Namibia, Ngaka Netumbo Nandi-Ndaitwah le Mopresidente Cyril Ramaphosa.
2.3.2. Khomišene ye ya Tšhomišano ya dinaga tše tše pedi e tiišeleditše leswa tlhago ya dikamano tša peakanyo le go tšwetšapele tšhomišano magareng ga dinaga tše tše pedi ka makaleng a bohlokwa. Se bohlokwa le go feta ke go ikgafela go šomišana ka sekgauswi ka tabeng ya go epolla le go šomiša methopo ya tlhago yeo e tlo thekgago tlhabollo ya ikonomi le kgolo ka dinageng ka bobedi.
2.3.3. Dipresidente tše tše pedi di amogetše go saenwa ga ditumelelano le ditokumente tša boitlamo tše šupa tša tšhomišano ya mebušo ya tšona.
2.4. Thušo ya mašeleng a tšhoganetšo a go ka ba $13 milione go matlafatša maitapišo a go laola baerase ya Ebola ka Afrika.
2.4.1. Kabinete e amogetše go dumelelwa ga $13 milione (Ditolara tša Amerika) ya thušo ya mašeleng ya tšhoganetšo go tšwa go Sehlopha sa Panka ya Tlhabollo ya Afrika (AfDB) go matlafatša maitapišo a go laola go phulega ga baerase ya Ebola ka Democratic Republic of Congo (DRC), Uganda, le South Sudan ka go phethagatša dikarabelo tša tšhoganetšo tša bosetšhaba, go thibela go phatlalala ga baerase le go fokotša mahu le malwetši ka ditšhabeng tšeo di amegilego le go ba kotsing kudu.
2.4.2. Thekgo ye ya mašeleng e latela boipiletšo ka Mopresidente Cyril Ramaphosa maemong a gagwe bjalo ka Mohlankedi wa tša Thibelo , Boitokišetšo le Karabelo ya Mauba (PPPR), gore go be le botee bja Maafrika, thušo ya ka pela ya go hlakodiša batho, le dipeeletšo tšeo di oketšegilego ka bohlaming bja tša maphelo bjo bo etilwego pele ke Afrika.
3. Ga go lefelo la go phala gae; MaAfrika Borwa ao a boago gae a tla dula a amogelegile
3.1. Kabinete e etše hloko mabarebare a gore Maafrika Borwa a bathobašweu bao ba ilego ba kgetha go yo dula ka Amerika (USA) ka fase ga mabaka a maaka a gore bathobašweu ba a bolawa ka Afrika Borwa, ba ganeditšwe ka dibisa ka nageng yeo.
3.2. Kabinete e bušeleditše gore Maafrika Borwa, go se na gore ba wela mokgatlong ofe wa dipolotiki, ba tla dula ba dumeletšwe ka mo nageng ntle le go tšhaba go otlwa ka tša sepolotiki le go gatelelwa go ya le ka melao ya Afrika Borwa.
3.3. Kabinete e etše hloko gore Afrika Borwa e sa lebagane le ditlhotlo tše ntši tša leago le ekonomi tšeo di amago Maafrika Borwa ka moka, go sa lebelelwe morafe le bong. Ditlhohlo tše go swanetše go šoganwe le tšona ka maitapišo a tšhomišanommogo (a Maafrika Borwa ka moka) ao a akaretšago mmušo, mekgatlo ya dipolotiki, mekgatlo ya bašomi, dikgwebo, mekgatlo ya setšhaba le batho ka moka ba ka Afrika Borwa. Maitapišo a a tšhomišanommogo a swanetše a lemoge seabe seo se tšwelago pele sa bohwa bja mmušo wa kgethollo le tlhokego ya go phošolla kgatelelo ya peleng.
3.4. Kabinete e ipiletša go Maafrika Borwa ka moka go tšwela pele go ganetša bao ba nyakago go bušetša tokologo ya rena morago ka go hlohleletša semorafe go ikgafa leswa nepong ya go aga Afrika Borwa yeo e kopanego, ya go hloka semorafe ebile yeo e atlegilego.
4. Sehla sa Marega sa Dikoma sa 2026
4.1. Kabinete e laeditše pelaelo ye kgolo mabapi le tahlegelo ya maphelo le ditiragalo tše dingwe tša go se kgahliše tšeo di begilwego nakong ya Sehla sa Marega sa Dikoma sa 2026.
4.2. Kabinete e rometše mantšu a tlhobošo go malapa a badikana ba 47 bao ba lobilego maphelo a bona nakong ya Sehla sa Marega sa Dikoma sa 2026 gomme ya lakaletša bao ba gobetšego goba ba folago gore ba fole ka pela.
4.3. Kabinete e tšwetše pele ya amogela karabelo ya ka pela ya makala a phethagatšo ya molao go netefatša gore bao ba tshelago molao wa dikoma ba rwešwa maikarabelo. Go fihla gonabjale, go bile le melato ye 161 yeo e butšwego, moo go golegilwego batho ba 41. Godimo ga fao, dikoma tše 42 tšeo di sego molaong di ile tša tswalelwa, gomme badikana ba 181 ba hlakodišwa, mola ba 93 ba le maokelong.
B. DIPHETHO TŠA KABINETE
1. Go oketšwa ga nako ya go šoma ga laesense ya go otlela go tloga go mengwaga ye mehlano (5) go ya go ye lesome (10)
1.1. Kabinete e dumeletše go oketšwa ga nako ya go šoma ya dilaesense bakeng sa Dikhoutu tša A, A1, B le EB go tloga go mengwaga ye mehlano (5) go ya go ye lesome (10). Nako ya go mpshafatša laesense e tla ama fela difatanaga tše dinnyane. Dinamelwa tše dikgolo le dinamelwa tša bohle di tla no tšwela pele go latela melao ya gonabjale ya mengwaga ye mebedi le ye mehlano ya go mpshafatša, mola Diphemiti tša Baotledi ba Profešenale le tšona di tlo no tšwela pele ka mpshafatšo ya mengwaga ye mebedi.
1.2. Phetogo ye e sepelelana le mekgwatšhomo ye mekaone ya boditšhabatšhaba, e kaonafatša go šoma gabotse ga tša tshepedišo, e fokotša dimphafatšo tša kgafetšakgafetša tša dilaesense bakeng sa boradifatanaga le go fokotša kgatelelo yeo se se beago lenaneo la dilaesense ka fase ga yona.
1.3. Phethagatšo ya nako yeo e okeditšwego ya mpshafatšo ya dilaesense e nyaka diphetošo tša melao. Ka go realo, boradifatanaga ba swanetše ba tšwele pele go mpshafatša dilaesense tša go otlela ka mokgwa wa gonabjale go fihlela ge molao wo moswa o thoma go šoma.
2. Pholisi yeo e Mpshafaditšwego ya Ditheko tša Mohlagase
2.1. Kabinete e dumeletše go phatlalatšwa ga Pholisi yeo e Mpshafaditšwego ya Ditheko tša Mohlagase gore e sekasekwe ke setšhaba. Pholisi ye e mpshafatša Pholisi ya Ditheko tša Mohlagase ya 2008 go bonagatša diphetogo ka intasetering ya kabo ya mohlagase, go akaretša diphetošo tša mmaraka tšeo di rotogago go tšwa go karoganyo ya Eskom le phethagatšo ya Molaophetošwa wa Taolo ya Mohlagase wa 2024.
2.2. Pholisi ye e matlafatša tlhako ya taolo yeo e laolago ditheko le ditharifi tša mohlagase, gomme e dumelela go ba phatlalatša ga ditharifi ka go aroganywa ga ditharifi go phatlalala le tšweletšo, tshepetšo, phatlalatšo le go rekišwa ga mohlagase, gomme ka go realo e kopanyago dipeakanyo tša taolo bakeng sa ditheko tša mohlagase go phatlalala le magato a go fapafapana a ditheko magareng ga batšweletši, barekiši, Khamphani ya Bosetšhaba ya Tshepetšo ya Mohlagase ya Afrika Borwa (NTCSA), le baabi. E hloma gape le tlhako yeo ka yona magato a a tlo kgontšhwago le go laolwa ke NERSA.
2.3. Pholisi ye e thekga go tsebagatšwa ga ditharifi tšeo di bonagatšago ditshenyagalelo mola e le gare e šireletša badiriši bao ba imelwago mmogo le makala a bohlokwa a ekonomi.
3. Pampiri ya Maemo a Phetogo ya Mmaraka a Lekala la Mohlagase ye e Akantšwego
3.1. Kabinete e dumeletše go phatlalatšwa ga Pampiri ya Maemo a Phetogo ya Mmaraka a Lekala la Mohlagase ye e Akantšwego gore setšhaba se fane ka dikakanyo ka yona. Pampiri ye ya semmušo e tla ka tlhako ya go hlahla phetogo ya Afrika Borwa ya go tloga go lenaneo la mohlagase leo taolo ya lona ye ntši e lego ka fase ga mmušo, go ya go mmaraka wa mohlagase wo o phenkgišanago, go ya le ka Molaophetošwa wa Taolo ya Mohlagase wa 2024 le Leanotiro la Enetši.
3.2. Diphetogo tšeo di šišintšwego di nyaka go kaonafatša tšhireletšo ya enetši le go botega ga yona ka go fokotša go itshepela go moabi o tee wa mohlagase gape le go kgontšha kgathotema ye kgolo ka tšweletšong ya mohlagase le kgwebišano. Diphetogo tše di nepile gape go gokagoketša dipeeletšo ka infrastraktšha ya tšweletšo, tshepetšo le kabo ya mohlagase, go thekga tlholo ya mešomo le kgolo ya ekonomi, le go fokotša ditshenyagalelo tša mohlagase ge nako e dutše e sepela.
4. Leano la Bosetšhaba leo le Mpshafaditšwego la Polokego Ditseleng (NRSS) la 2026–2030
4.1. Kabinete e dumeletše NRSS 2026–2030 yeo e mpshafaditšwego. Leano le, leo le mpshafaditšwego, le oketša go tšwa go NRSS 2016–2030 yeo e e ilego ya dumelelwa go šoma go fokotša dikotsi ditseleng le go sepelelana le lenaneo la Ditšhabakopano la Ngwagasome wa Magato bakeng sa Polokego Ditseleng le Leano la Bosetšhaba la Tlhabollo.
4.2. Tebeleloleswa ye e gapeleditšwe ke ditlhohlo tšeo di tšwelago pele tšeo di akaretšago phethagatšo yeo e fokolago ya melao ya ditsela, bothata bja bomenetša le phethagatšo yeo e sa kopanago go phatlalala le magoro ka moka a mmušo.
4.3. NRSS yeo e mpshafaditšwego e tšwetšapele lenaneo la phetošo leo le nabilego leo le itheilego ka phethagatšo ya molao yeo e etilwego pele ke tša mahlale, go se dumelele bomenetša le gatee, mananeo ao a šomago ka titšithale le pušo le kgokagano yeo e matlafetšego. Yona e thekga dinepo tša polokego ditseleng tša lefase le nepo ya Taolo ya Bošupa go fokotša dikotsi tša ditsela ka 45% ka 2029.
5. Tlhako ya Peakanyo ya Ditirelo tša Meetse le Kelelatšhila ye e Akantšwego
5.1. Kabinete e dumeletše go phatlalatšwa ga Tlhako ya Peakanyo ya Ditirelo tša Meetse le Kelelatšhila ye e Akantšwego gore setšhaba se swayeswaye ka yona nako ya matšatši a 60.
5.2. Tlhako yeo e mpshafaditšwego e hlaloša dinepo tšeo di beilwego, e arabela go ditlhotlo le diphetogo tšeo di tšwelelago, gomme e nyalantšha lekala le le ditlapele tša bosetšhaba le mekgwatšhomo ye mekaonekaone lefaseng ka bophara. Yona e gatelela kgotlelelo ya klaemete, kopantšho ya tikologo, tshwarelelo ya ditšhelete, mafokodi ao a lego gona ka metsesetoropong le metsemagaeng, phetošo ya titšithale le peakanyo le phethagatšo ya lekala yeo e kaonafetšego.
5.3. Leano le le ikemišeditše go matlafatša pušo ya lekala, go kaonafatša peakanyo le phethagatšo, le go thekga kabo ya ditirelo tša meetse le kelelatšhila yeo e swarelelago, e tshepagalago ebile e lekanago bohle bakeng sa Maafrika Borwa ka moka.
C. MELAOKAKANYWA
1. Molaokakanywa wo o Mpshafaditšwego wa Dibopego tša tša Mebasepala wa 2026
1.1. Kabinete e dumeletše go išwa ga Molaokakanywa wo o Mpshafaditšwego wa Dibopego tša Mebasepala: Mmušo wa Selegae Palamenteng. Molaokakanywa wo, wo o tlwaetšego go bitšwa “Molawana wa Tlhakanelo”, o nyaka go tla ka tlhako ye e tiilego ya melao bakeng sa go hlongwa ga mebušo ya tlhakanelo le go hloma mekgwa ya go fokotša ditlhohlo tša go amana le tlhakanelo ka mmušong wa selegae.
1.2. Kabinete mathomong e ile ya dumelela go phatlalatšwa ga Molaokakanywa wo gore setšhaba se swayeswaye ka wona mathomong a ngwaga wa 2024. Go latela ditherišano tšeo di tseneletšego le dikaonafatšo tše dingwe gape tša semolao, Molaokakanywa wo bjale o romelwa Palamenteng gore o yo šogašogwa. Diphetošo tšeo di šišintšwego di nyaka go tšwetšapele pušotlhakanelo yeo e sa tekatekego ebile e rwalago maikarabelo, go fokotšago go tekateka ga tša sepolotiki le go thekga kabo ya ditirelo go setšhaba yeo e sa šitišegego.
2. Molaokakanywa wo o Mpshafaditšwego wa Melao ya Dikgetho wa 2026
2.1 Kabinete e dumeletše go tsebagatšwa ga Molaokakanywa wo o Mpshafaditšwego wa Melao ya Dikgetho wa 2026 Palamenteng. Molaokakanywa wo o fetoša Molao wa Khomišene ya Dikgetho wa 1996; Molao wa Dikgetho wa 1998; le Molao wa Dikgetho wa Mebasepala wa Mmušo wa Selegae wa 2000, e le ge go itokišetšwa Dikgetho tša Mmušo wa Selegae tša 2026. Diphetošo tše di nepile go netefatša gore go ba le go sepelelana le go matlafatša tlhako ya melao ya dikgetho, go kaonafatša tshepedišo le taolo ya dikgetho le go thekga maitshwaro a dikgetho tšeo di lokologilego, di sa tšeego lehlakore ebile di nago le nnete.
3. Molaokakanywa wa Maanomabe, Go Hlohleletša le go Hlohlola ka Maikemišetšo a go Dira Bosenyi wa 2026
3.1. Kabinete e dumeletše go tsebagatšwa ga Molaokakanywa wa Maonomabe, Go Hlohleletša le go Hlohlola ka Maikemišetšo a go Dira Bosenyi wa 2026 ka Palamenteng. Molaokakanywa wo o phumola Molao wo o šetšego o fetilwe ke nako wa Dikopano tša go Hlola Mpherefere wa 1956, gomme o fetoša tlhako ya semolao bakeng sa go otla batho bao ba logago maanomabe, bahlohleletšago goba ba hlohlolago go thakgoga ga melato ya bosenyi. Wona o tsena legatong la ditumelelo tšeo di sa sepelelanego le Molaotheo gomme o sepelelantšha molao le tshepedišo ya gonabjale ya semolaotheo, mola o le gare o matlafatša bokgoni bja Mmušo bja go šogana le maitshwaro ao a hlohleletšago goba a sepetšago phethagatšo ya molato wa bosenyi.
4. Molaokakanywa wo o Mpshafaditšwego wa Melaokakaretšo (ya Meepo) wa 2026
4.1. Kabinete e dumeletše go phatlalatšwa ga Molaokakanywa wo o Mpshafaditšwego wa Melaokakaretšo (ya Meepo) wa 2026 gore setšhaba se fane ka dikakanyo ka wona. Molaokakanywa wo o nyaka go matlafatša tlhako ya melao go lwa le meepo yeo e sego molaong le ditiro tša go amana le yona tšeo di tšwelago pele go bea kotsing polokego ya setšhaba, tlhabollo ya ekonomi le taolo yeo e swarelelago ya methopo ya diminerale tša naga. Wona o šišinya diphetošo go Molao wa Tshepedišo ya tša Bosenyi wa 1977; Molao wa Ditaamane wa 1986; Molao wa Tlhabollo ya Diminerale le Methopo ya Petroliamo wa 2002; le Molao wa Dimetale tše Dibotse wa 2005. Diphetošo tše di akaretša le mekgwa ya go dira gore go kgatha tema meepong yeo e sego molaong le ditiro tša go amana le gona e be molato wa bosenyi.
5. Molaokakanywa wa Taolo ya Ditraste wa 2026
5.1. Kabinete e dumeletše go phatlalatšwa ga Molaokakanywa wa Taolo ya Ditraste wa 2026 gore setšhaba se fane ka dikakanyo ka wona. Molaokakanywa wo o nyaka go fetola tlhako ya tša molao gore e be ya sebjalebjale bakeng sa Ditraste ka go ntšha Molao wo o fetilwego ke nako wa Taolo ya Thoto a Ditraste. O nepile gape go matlafatša thwalo ya maikarabelo le tatelomolao, go kaonafatša karolo ya peoleihlo ya Mmaseterata wa Kgorotsheko ya Godimo le go fana ka tšhireletšo ye kgolo go baholegi.
6. Molaokakanywa wo o Mpshafaditšwego wa Mokgwatšhomo wa Semolao wa 2026
7. Kabinete e dumeletše go phatlalatšwa ga Molaokakanywa wo o Mpshafaditšwego wa Mokgwatšhomo wa Semolao wa 2026 gore setšhaba se fane ka dikakanyo ka wona. Molaokakanywa wo o nyaka go nyalantšha dibopego tša tshepedišo ya lekala la tša molao mola o le gare o tšwetšapele phetošo. O tsebagatša gape le diphetogo tša sebopego go Sekhwama sa Potego ya Bašomi ba tša Molao go matlafatša tshwarelelo ditšhelete le go kaonafatša tšhireletšo ya setšhaba. Molaokakanywa wo o tšwela pele go šišinya diphetošo tša ditumelelo tša go fapafapana tša Molao wa Mokgwatšhomo wa tša Molao go thekga tlhabollo le kaonafatšo ya mabokgoni a bašomi ba tša molao, go kaonafatša phihlelelo ya profešene ya tša molao, go tšwetšapele phihlelelo ya toka le go šogana le ditlhohlo tšeo di bonalago tšeo di hlagilego nakong ya phethagatšo ya Molao wo.
8. Molaokakanywa wo o Mpshafaditšwego wa Melaokakaretšo ya Ditšhelete wa 2026
8.1. Kabinete e dumeletše go tsebagatšwa ga Molaokakanywa wo o Mpshafditšwego wa Melaokakaretšo ya Ditšhelete wa 2026 ka Palamenteng. Molaokakanywa wo o šišinya gore go be le diphetošo ka go Molao wa Taolo ya Lekala la Ditšhelete wa 2017 (Molao wa bo 9 wa 2017), le Molao wa Setšhaba wa Go Reka ka go Akaretša wa 2024 (Molao wa bo 28 wa 2024).
8.2. Molaokakanywa wo o šišinya gore go tsenywe kgaolo ye mpsha ka go Molao wa Taolo ya Lekala la Ditšhelete go thekga diphetošo tša ka gare ga naga tšeo di nepilego go matlafatša pušo le taolo ya melawana ya semmušo ya taolo ya ditšhelete. O šišinya gape le diphetošo go karolo 68 ya Molao wa Setšhaba wa Go Reka ka go Akaretša go thekga diphetošo tšeo di tšwelago pele tšeo di nepilego go matlafatša ditlhako tša taolo ya ditšhelete le go reka ka go akaretša, go kaonafatša peoleihlo, le go tšwetšapele netefaletšo ya taolo, tša Afrika Borwa.
D. DITSEBIŠO TŠA KABINETE
1. Dikimollo tša mmušo go netefatša gore go ba le kabo yeo e tshepagalago ya meetse a boleng go Maafrika Borwa ka moka.
1.1 . Kabinete e amogetše go lokollwa ga Leanotiro la Bosetšhaba la Meetse leo le hlalošago dikimollo tša togamaano go netefatša gore go ba le kabo ya meetse a boleng yeo e tshepagalago go Maafrika Borwa ka moka mola le le gare le šogana le modu wa ditlhohlo tša kabo ya meetse ka mo nageng. Leano le le hlamilwe ke Komiti ya Bosetšhaba ya Mathata a Meetse yeo modulasetulo wa yona e lego Mopresidente Cyril Ramaphosa ka ditherišano le magoro a mararo a mmušo go balwa le Mokgatlo wa Mmušo wa Selegae wa Afrika Borwa (SALGA).
1.2 .Kabinete e retile go tsebagatšwa ga Lenaneo la Bosetšhaba la Potlakišo ya Phihlelelo ya Meetse leo le tsebagaditšwego ka Letšatši la Boditšhabatšhaba la Nelson Mandela ka la 18 Mosegamanye mmogo le kabo ya dikema tša kabo ya meetse tšeo di ikemego, tšeo di akaretšago meetse a go borwa le mafelo a go hlatswa meetse go oketša phihlelelo ya meetse a boleng ka ditšhabeng tšeo di sa hlankelwego gabotse ka Gauteng, KwaZulu-Natal le Kapa Bohlabela. Dikimollo tše tše 67 tša meetse a go tšwa ka fase ga mabu di letetšwe go hola batho bao e ka bago ba 125 986 go phatlala le diprofense tše tše tharo, ka dikgato tše dingwe gape tša phethagatšo tšeo di beetšwego kgwedi ya Diphalane 2026 le Moranang 2027.
1.3 Diprotšeke tše di emela legato la mathomo la Lenaneo la Bosetšhaba la Potlakišo ya Phihlelelo ya Meetse leo le phethagatšwago ka Diboto tša Meetse ka fase ga Molao wa Ditirelo tša Meetse. Tšhelete ya go feta R200 milione e beetšwe Legato la Mathomo la lenaneo le, leo le kopanyago go bora meetse, tlhabollo ya meetse a ka fase ga mabu, tšhireletšo ya methopo ya meetse, go kgoboketša meetse a pula le tsošološo ya infrastraktšha ao a šetšego a le gona a meetse go oketša phihlelelo ya meetse a go nwa.
1.4 Bjalo ka karolo ya lenaneo la dipeeletšo ka infrastraktšha a setšhaba, mmušo mathomong a ngwaga wo o ile wa aba R156 bilione go infrastraktšha a meetse le kelelatšhila ya mengwaga ye meraro ye e tlago. Peeletšo ye e tlo thekga go oketšwa le go hlokomelwa ga infrastraktšha a meetse, go kaonafatša tshepagalo ya meetse, le go šogana le ditlhotlo tša meetse le kelelatšhila tšeo di amago ditšhaba.
2. Tšebišo kgatelopele go phethagatšo ya tsela yeo e kopantšwego ya bakeng sa go laola bofaladi ka Afrika Borwa
2.1 Kabinete e amogetše tsebišo ya phethagatšo ya tsela yeo e kopantšwego ya bakeng sa go netefatša gore bofaladi bja ka mehla ka Afrika Borwa go ya le ka leano la ditlha tše hlano leo le tsebagaditšwego ke Mopresidente Cyril Ramaphosa go ya le ka mo go latelago:
2.1.1 Go fihla ka la 23 Mosegamanye 2026, ditiragalo tše 205 tša go amana le tshelomolao ya melao ya bofaladi le ya go amana nayo di ile tša begwa le go ngwadišwa bjalo ka melato ya bosenyi, gomme palo ye e gotše go tloga go ya 103 yeo e begilwego ka beke ya mathomo ya Mosegamanye 2026.
2.1.2 Palomoka ya batho ba 354 ba ile ba golegwa, moo Profense ya Freistata e ngwadišitšego palo ya godimodimo ya go golegwa ga batho ba 174, gomme go tšwa mo palong ye, melato ye 107 e šetše e sekwa ka kgorotshekong
2.1.3 Go tloga ka la 1 Moranang 2026 go fihla mafelelong a Phupu 2026, dikgorotsheko di phethile melato ye 28 736 ya go amana le bofaladi, kudu bja go bušetšwa ga batho dinageng tša bobona
2.1.4 Magareng ga la 14 Phupu le la 24 Mosegamanye 2026, badudi ba dinagadišele ba 68 327 bao ba sego molaong ba ile ba bušetšwa gae ka tshepedišo yeo e kgokaganego ya makala a phethagatšo ya molao. Go palo ye ya 68 327, 81% ya batho bao ke ba go tšwa Malawi, 16 % ke ba go tšwa Zimbabwe gomme 3% e le ba go tšwa Mozambique
2.1.5 Kabo ya Tumelelo ya Moeti ya Elektroniki (“ETA”) mmogo le Lenaneo leo le Kaonafaditšwego la Taolo ya Mosepelo di šetše di šoma ka Maemafofaneng a Boditšhabatšhaba a OR Tambo, Lanseria, King Shaka le Cape Town
2.2 Senthara ya Nakwana ya Pušetšo ya Batho Gae ya Musina e tla fokotšwa go tloga go sekgoba sa go kgona go rwala batho ba 20 000 go ya go sa go rwala batho ba 1500.
3. Pego ya Ngwaga ya bo-26 ya Khomišene ya Tekatekano Mošomong (CEE)
3.1 Kabinete e amogetše le go ela hloko Pego ya Ngwaga ya bo 26 ya Khomišene ya Tekatekano Mošomong (CEE) ya 2025/26. Pego ye e lota mohlala wa diphetošo le tatelomolao ya Molao wa Tekatekano Mošomong ya mafelo a mošomo.
3.2 Pego ya Ngwaga ya bo 26 ya CEE e bonagatša go se lekalekane ka tatelano ya maemo ka bašoming, fao go nago le tlhakahlakano ge go etla go merafe le bong maemong a bolaodibogolo ka lekaleng la praebete.
3.3 Morafe wa Bathobašweu le wa Maindia e tšwela pele go ba yeo e nago le batho ba bantši maemong a bolaodibogolo, fao e nago le 57.1% le 12.2% ka go latelana. Maemong a bolaodibogolo bašomi ba Bathobašweu ba fihla go 44.1% gomme ba Maindia ba fihla go 12.5%. Bašomi ba Bathobaso le Bammala ba tšwela pele go tlala kudu maemong a fasana le a batho bao ba se nago mabokgoni a mošomo, mola palo ya bašomi bao ba phelago ka bogolofadi e tšea fela 1.3% ya palomoka ya bašomi.
3.4 Pego ye e ela hloko le koketšego ya palo ya bašomi ba Bathobaso ba diprofešenale, maemong a bolaodi bja magareng, a sethekniki seo se nago le mabokgoni le maemong a bolaodi bja fase yeo e fihlago go 52.0%, gomme ya ela hloko le palo ya bašomi ba go tšwa dinageng dišele ya go fihla go 3.1% maemong ka moka, gomme e belaetšwa ke palo yeo maemong a mabokgoni a mannyane le maemong a go hloka mabokgoni ao e ka nogo ba e le tshelomolao ya Molao wa Ditirelo tša Mešomo wo o bolelago gore bašomi ba swanetše ba ikgotsofatše gore ga go na batho ba bangwe ka mo Afrika Borwa bao ba nago le mabokgoni a maleba a go tsena sekgobeng sa mošomo pele ba ka thwala modudi wa dinagadišele.
3.5 Mmušo o tla tšwela pele go šomiša dikutullo tše go bea leihlo phetošo, go tšwetšapele boemedi bjo bo lekalekanago le go hlahla mekgwa ya phošollo go phatlalala le mmaraka wa bašomi.
4. Seabe sa laesense ya Tšhomišo ya infrastraktšha ya titšithale a maphotomoya
4.1 Kabinete e lemogile pego ya mabapi le seabe sa dilaesense tša maphotomoya a radio go infrastraktšha ya titšithale le dikgokagano ka Afrika Borwa. Kabo ya dilaesense tša maphotomoya ao a nyakwago kudu go tšweleditšepele phihlelelo ya inthanete, mokgwatšhomo wa netweke wo o kaonafetšego gape le dipeeletšo tšeo di thekgilwego ka infrastraktšha ya titšithale.
4.2 Kabinete e laeditše pelaelo ya gore basepediši ba tša dikgokagano tša kgole ga se ba hlwa ba kgotsofatša ditshepišo tša bona tša leago tšeo di amanago le kabo ya maphotomoya. Mmušo o beile nepo ya go kgokaganya diinstitute tša setšhaba tše 21 878 ka ngwaga wa 2029, gomme tšona di akaretša dikolo tše 16 139, mafelo a tša maphelo a 4 232, makgobapuku a 570 le mešate ye 937. Go fihla ka kgwedi ya Moranang 2026, basepediši ba dikgokagano tša kgole ba kgokagantše fela ditheo tša setšhaba tše 5 295 go tšwa go tšeo ba dirilego ditshepišo go tšona.
E. BAO BA THWETŠWEGO MEŠOMONG
Batho ka moka bao ba thwetšwego mešomong mangwalo a bona a thuto a tla kgonthišišwa le go tiišeletšwa ka mekgwa ya maleba.
1. Morena Nkosikhona Sydney Mbatha bjalo ka Mohlankedimogolophethiši wa Etšensi ya Tlhabollo ya Dikgwebopotlana ka Mašeleng.
2. Mohumagadi Vangile Petronella Nene bjalo ka Motlatšamolaodimogolopharephare wa Ditirelo tša Seprofešenale ka Kgorong ya Mešomo ya Setšhaba le Infrastraktšha.
3. Mohumagadi Beryl Ferguson bjalo ka Modulasetulo wa Boto ya Diphaka tša Bosetšhaba tša Afrika Borwa.
4. Go thwalwa ga Maloko ao e sego a Bolaodiphethiši go Boto ya Balaodi ba Koporase ya Dipeeletšo ya Setšhaba (PIC) Soc. Limited
(a) Morena Seiso Joel Mohai – Motlatšatona wa Kgoro ya tša Peakanyo, Peoleihlo le Tekolo bjalo ka Modulasetulo
(b) Mohumagadi Patience N.Z. Nqeto
(c) Mohumagadi Lebogang R. Mokgabudi
(d) Moatbokata Gatlelane Ouma Rasethaba
(e) Mohumagadi Vivien McMenamin
(f) Mohumagadi Bajabulile Swazi Tshabalala
(g) Morena Itani Mafune
(h) Mohumagadi Moipone Ramoipone – Moemedi wa Kgoro ya Matlotlo ya Bosetšhaba
Go thwala mo go nepile go šogana le ditlhotlo tšeo di lego gona gabjale tša taolo. Tona ya Ditšhelete o tla tšwela pele go sepetša diphetogo tša PIC bjale ka ge go eleditše Khomišene ya Moahlodi Mpati ka ditherišano le Kabinete.
5. Go thwalwa ga Boto ya Khansele ya Theknolotši ya Diminerale (MINTEK)
a. Ngaka Thibedi Ramontja (Modulasetulo) (o thwetšwe leswa);
b. Mohumagadi Azwindini Thomani (o thwetšwe leswa);
c. Ngaka Takalani Madzivhandila(o thwetšwe leswa);
d. Morena Luvuyo Keyise;
e. Ngaka Faranna Boodrham;
f. Ngaka Palesa Ramashala;
g. Mohumagadi Lerato Hilda Dikgole;
h. Ngaka Sandile Ncanana;
i. Mme Nondumiso Ngonyama; le
j. Ngaka Avela Majavu (o thwetšwe leswa)
k. Morena Kagiso Menoe (Kgoro ya Diminerale le Didirišwa tša Petroliamo)
F. DITIRAGALO LE DIKHONFERENSE
1. DITIRAGALO TŠEO DI SA TLAGO
1.1 Pontšho ya tša Difofane tša Kgwebo le tša Sešole ya Afrika ya 2026
1.1.1 Kabinete e dumeletše go swarwa ga Pontšho ya tša Difofane tša Kgwebo le tša Sešole ya Afrika ya bo 13 ya 2026 ka fase ga moeno wo, “Tsela ya go Tsena ka Afrika ya Tšhomišano ya Difofane tša Sešole le tša Kgwebo”, yeo e tlo swarelwago Boemafofaneng bja Waterkloof ka Tshwane go tloga ka la 16 go fihla ka la 20 Lewedi 2026.
1.1.2 Pontšho ye e letetšwe go gokagoketša ba bontši ba go feta 300 go tšwa lefaseng ka bophara, dikemedi tša semmušo go tšwa dinageng tša go feta tše 50 gape le baeng ba go feta 30 000 ba tša kgwebišano. Tiragalo ye e tlo bontšha le dikaonafalo ka lekaleng la difofane le la sešole
1.2 Simphosiamo ya Tlhabollo ya Infrastraktšha yeo e Swarelelago ya 2026
1.2.1 Kabinete e etše hloko gore Afrika Borwa e tlo swara Simphosiamo sa Afrika Borwa ya Tlhabollo ya Infrastraktšha yeo e Swarelelago (SIDSSA) ya 2026 go tloga ka la 23 go fihla ka la 25 Phato 2026. Tiragalo ye e letetšwe go gokagoketša dikemedi tše 700.
1.2.2 Simphosiamo ye e tlo kgobokantšha babeeletši, ditheo tša ditirelo tša ditšhelete, bahlamadipholisi, ditsebi tša boramaano, le bašomišani ba bangwe ba bohlokwa go tšwetšapele lenaneo la dipeeletšo ka infrastraktšha la Afrika Borwan le go bontšha kgatelopele phethagatšong ya Leano la Bosetšhaba la Infrastraktšha la 2050.
1.2.3 SIDSSA 2026 e tlo tsebiša diprotšeke tše seswai tša godimo tšeo di beilwego pele tšeo dikgethilwego ka fase ga Bid Window 2 bakeng sa peakanyetšo ya protšeke le thekgo ya sethekniki, go lokolla kgatišo ya boraro ya Puku ya tša Go Aga, go tsebiša ka tša gabjale mabapi le Diprotšeke tšeo di Kopantšwego tša Togamaano (di-SIP), go bontšha ditlhabollo tše bohlokwa tša dipholisi le taolo, le go bonagatša ditšhomišano tša togamaano ya infrastraktšha tšeo di nepilego go bea Afrika Borwa bjalo ka lefelo leo le di gogago pele ka tša tlhabollo ya infrastraktšha le thekgo ya mašeleng kontinenteng ya Afrika.
1.3 Kgwedi ya Basadi: Segopotšo sa Ngwaga wa bo 70 wa Mogwanto wa Basadi wa 1956
1.3.1 Ka la 9 Phato 2026, Afrika Borwa e tla keteka ngwaga wa histori wa bo 70 wa Mogwanto wa Basadi wa 1956 moo basadi ba go feta 20 000 ba ilego ba gwantela Union Buildings go yo ipelaetša kgahlanong le Melao ya Dipasa le Molao wa Mafelo a Setoropo. Segopotšo se sa maemo se tla ketekwa ka fase ga moeno wa bosetšhaba wa: “Basadi bao ba Matlafetšego ba Matlafatša Setšhaba.”
1.3.2 Kabinete e boletše leboelela gore mogwanto wa basadi ba go ba le sebete ba 1956 o kgathile tema tšwetšongpele ya go akaretšwa ga basadi ka Palamenteng, mmušong, lekaleng la praebetele setšhabeng, gomme seo sa laetša tekatekano le ditokelo tša semolaotheo ka Afrika Borwa ya temokrasi. Ge e le gare e hlompha kgotlelelo ya basadi baka mo nageng, Kabinete e ile ya gatelela leswa boikgafo bja mmušo bjo bo sa tekatekeng bja go šireletša le go tšwetšapele ditokelo tša basadi le go tiiša mošomo wa mabapi le go fediša Dikgaruru Kgahlanong le Bong le Polao ya Basadi (GBVF), go fediša taba ya go se akaretše bohle ikonoming, le go netefatša gore didirišwa tše bohlokwa di fihlelelwa ke bohle.
1.3.3 Kabinete e gateletše gore segopotšo se se bopa karolo ya kokwanekgolo ya Diphihlelelo tše Bohlokwa tša Lesolo la Tokologo tšeo di nabilego, tšeo di hlohleletšwago ke moeno wo o akaretšago wa: “Re hlompha tšeo di fetilego, re phethagatša Bokamoso.” Mo kgweding ya Basadi ka moka, mmušo o tlo eta pele difala tša motlalanaga go hlompha boineelo bja basadi ba ntwa ya tokologo mola ebile o gatelela bohlokwa bja karolo yeo e bapalwago ke basadi lehono.
2 DIKHONFERENSE TŠEO DI SWERWEGO
2.1 Khonferense le Dipontšho tša Ditimela ya Afrika ya bo 26
2.1.1 Afrika Borwa e ile ya swara Khonferense le Dipontšho tša tša Ditimela ya Afrika ya bo 26 ka la 7 le 8 Mosegamanye 2026 ka Johannesburg.
2.1.2 Khonferense ye e ile ya lemoga kgatelopele yeo e dirilwego ka tabeng ya go tsošološa ditirelo tša ditimela tša go rwala batho, ka maeto a go feta a dimilione tše 100 ka ngwaga go fihla mafelelong a Hlakola 2026, gomme le diporo tša mafelo a bohlokwa tše 35 go tše 40 di boetše di a šoma. Mmušo o tšwela pele go ikgafela go tsošološa ditirelo tša ditimela tšeo di bolokegilego, di tshepegago ebile di sa bitšego tšhelete ye ntši, ka nepo ya go fihlelela maeto a ditimela a dimilione tše 600 ge ngwaga wa 2030 o fihla.
3 DITSEBIŠO
3.1 Go ngwadišwa ga manyalo a setšo ao a nago le maloka
3.1.1 Kabinete e gopotša batho ka moka gore letšatši la 31 Phato 2026 ke la mafelelo la go ngwadiša manyalo a setšo ao a nago le maloka a go ngwadišwa mo nakong ya boingwadišo yeo e beilwego ke Tona ya Merero ya Selegae.
3.1.2 Nako ya go ingwadiša yeo e ikgethilego, go tloga ka la 1 Lewedi 2024 go fihla ka la 31 Phato 2026, e ile ya tsebagatšwago go kgontšha batho bao ba nyalanego ka manyalo a setšo ao a bego a sa ngwadišwa mo nakong yeo e beilwego gore ba ngwadiše manyalo a bona. Se se akaretša le manyalo a setšo ao a bilego gona pele ga ge Molao wa Temogo ya Manyalo a Setšo o thoma go šoma ka Dibatsela 2000, mmogo le manyalo ao a diragetšego morago ga moo ao a bego a se a ngwadišwa nakong yeo e beilwego.
3.1.3 Kabinete e ipiletša go batho ka moka bao ba hlokago tshedimošo ka botlalo mabapi le tshepedišo ya boingwadišo goba ditokumente tšeo di nyakegago gore ba etele ofisi ya Merero ya Selegae ya kgauswi le bona.
3.2 Mafelelo a Beke a Nako ya Mafelelo ya go Ingwadišetša Dikgetho
3.2.1 Kabinete e ipiletša go batho ka moka bao ba nago le maloka a go kgetha gore ba šomiše mafelelo a beke a nako ya mafelelo ya go ingwadišetša dikgetho, ao a lego ka la 1 le 2 Phato 2026, gore ba ingwadišetše go tlo bouta Dikgethong tša Mebušoselegae tša 2026. Batho bao ba nago le maloka a go kgetha ba hlohleletšwa go šomiša sebaka se sa mafelelo go ingwadiša goba go mpshafatša tshedimošo ya bona ya boingwadišo. Ditišo tša go kgetha di tla bula go tloga ka 08h00 go fihla ka 17h00 naga ka bophara. Batho bao ba nago le maloka a go kgetha ba ka ingwadiša gape goba go mpshafatša tshedimošo ya bona nako efe goba efe phothaleng ya IEC ya onlaene yeo e šomago bošego le mosegare, tšatši le lengwe le le lengwe, go https://registertovote.elections.org.za.
3.2.2 Kabinete e ipiletša go Maafrika Borwa ka moka, kudu a baswa le bao elego mathomo ba tlo kgetha, gore ba phethagatše tokelo ya bona ya go kgetha. Temokrasi ya rena e itheile go thato ya batho, gomme kgetho ya gago e bohlokwa katlegong ya temokrasi yeo e šomago gabotse. Ka go phethagatša tokelo ya rena ya go kgetha le go netefatša bokamoso bjo bokaone bakeng sa bohle, re gopola mengwaga ya go ikgafa le go lwela tokologo yeo e fihleletšwego ga boima.
G. MELAETŠA
1. Matshediso
Kabinete e iša matshediso go bagwera le ba lapa la:
• Mmapalagare wa Bafana Bafana le Mamelodi Sundowns, Jayden Adams (Grootman) yo ilego a tlišetša naga lethabo ka go bapala ka bokgwari dipapading tša gagwe gape le dipapading tša Mogopo wa Lefase wa FIFA tša 2026.
• Mmapadi wa peleng wa Sehlopha sa Afrika Borwa Sa Rugby sa ba Mengwaga ya ka fasde ga ye 18, Luqobo Makwedini, yo e bego e le radipapadi wa bokgoni yo a tlišeditšego ba bantši lethabo ka go šoma ka thata le go ikgafa ga gagwe ka lepatlelong la dipapadi.
• Modiragatši wa mahlwaadibona, Seputla Sebogodi yo a tlogetšego bohwa bja go tšea gabotse bjale ka yo mongwe wa badiragatši ba go ba le talente ebile ba go hlomphega ka Afrika Borwa, moo e bilego sebapadi sa thelebišene le sefala mengwagangwaga.
• Mahlwaadibona wa molwelatokologo, Shantavothie “Shanthie” Naidoo Tweedie yoo boineelo le boikgafo bja gagwe bja bophelo ka moka bo thušitšego Afrika Borwa leetong la yona la go fihlelela tokologo. Bjale ka molwelatokologo kgahlanong le mmušo wa kgethollo, o ile a lebagana le dinako tše boima moo a ilego a golegwa, go balwa le go bewa ka phapošing ya leswiswi a le tee ka fase ga Molao wa Borabele mmogo le dikiletšo. O kile a tšhaba ka nageng gomme a yo dula United Kingdom go tloga ka 1972 go fihla ka 1991.
• Bettina Wyngaard, Moafrika Borwa yo e bego e le ramolao gomme morago a ba mongwadi le molweladitokelo yoo a tsebegago kudu ka dipadi tša gagwe tša polelo ya Afrikaans mmogo le go lwela ditokelo tša basadi.
2. Ditebogišo
• Kabinete e lebogiša le go lakaletša tše botse go:Sehlopha sa Afrika Borwa ge se ile sa bea naga ye maemong a godimo Dipapading tša Commonwealth go la Glasgow. Go fihla gonabjale, Afrika Borwa e šetše e thopile dimetale tše 22: tše tshela tša gauta, tše seswai tša silibere, le tše seswai tša porontshe.
Dimetale tša gauta
• Pieter Coetze - ka lebelong la go rutha la banna la backstroke la dimitara tše 200.
• Pieter Coetze - ka lebelong la go rutha la banna la backstroke la dimitara tše 50.
• Pieter Coetze - ka lebelong la go rutha la banna la backstroke la dimitara tše 100.
• Nathan Hendrick - ka lebelong la go rutha la banna la freestyle la S13 la dimitara tše 100.
• Lara van Niekerk - ka lebelong la go rutha la basadi la backstroke la dimitara tše 50.
• Christian Sadie – ka lebelong la go rutha la banna la freestyle la S17 la dimitara tše 50.
Dimetale tša silibere
• Erin Gallagher - ka lebelong la go rutha la basadi la butterfly la dimitara tše 50.
• Christian Sadie – ka lebelong la banna la dimitara tše 50
• Aimee Canny - ka lebelong la go rutha la basadi la backstroke la dimitara tše 100.
• Michael Houlie - ka lebelong la go rutha la banna la breaststroke la dimitara tše 50.
• Nathan Hendricks - ka lebelong la go rutha la banna la freestyle la S13 la dimitara tše 50.
• Danika Vyncke - ka lebelong la go rutha la basadi la freestyle la S13 la dimitara tše 50.
• Aimee Canny - ka lebelong la go rutha la basadi la individual medle la dimitara tše 200.
• Pieter Coetzé, Michael Houlie, Erin Gallagher, Aimee Canny - ka lebelong la go rutha leo le kopantšwego la 4x100m la medley relay.
• Kaylene Corbett – ka lebelong la go rutha la basadi la backstroke la dimitara tše 200.
Dimetale tša porontshe
• Erin Gallagher - ka lebelong la go rutha la basadi la butterfly la dimitara tše 100.
• Ruard van Renen - ka lebelong la go rutha la banna la backstroke la dimitara tše 50.
• Ruard van Renen – ka lebelong la go rutha la banna la backstroke la dimitara tše 100.
• Olivia Nel - ka lebelong la go rutha la basadi la backstroke la dimitara tše 100.
• Aimee Canny, Rebecca Meder, Erin Gallagher, Olivia Nel - ka lebelong la go rutha la basadi la 4x100m la freestyle relay.
• Pieter Coetze, Guy Brooks, Ruard van Renen, Chad le Clos - ka lebelong la go rutha la banna la 4x100m la freestyle relay.
• Pieter Coetzé, Michael Houlie, Chad le Clos, Ruard van Renen – ka lebelong la banna la go rutha la 4x100m medley relay. Chad Le Clos o bile radipapadi yo a atlegilego go feta boradipapadi bohle ka historing ya Dipapadi tša Commonwealth ka go fihlelela dimetale tše 21 morago ga thuša Afrika Borwa go hwetša metale wa porontshe ka lebelong la go rutha la 4x100 medley relay.
• Olivia Nel, Aimee Canny, Erin Gallagher, Rebeca Meder – ka lebelong la go rutha la basadi la 4x100m la medley relay.
• Sehlopha sa di-Springboks ge se thopile dipapadi tša sona tša Nations Championship le go ba maemong a pele lliking ka dintlha tše ntši.
• Sehlopha sa di-Junior Springboks ge se thopile Dipapadi tša World Rugby tša ba mengwaga ya ka tlase ga ye 20 go la Tbilisi, Georgia.
• Dricus Du Plessis ge a fentše Kamaru Usman ka papading ye kgolo ka Dipapading tša go lwa tša Ultimate Fighting Championship (UFC) go la Oklahoma City.
• Bayanda Walaza ge a ile a bapala ka bokgoni dipapading tša TIPOS P-T-S Meeting ka Slovakia, moo a thopilego lebelo la banna la dimitara tše 100 ka metsoswana ye 9.89 moo a bilego Moafrika Borwa wa bone go fetša lebelo ka nako ya ka tlase ga metsoswana ye 9.90.
• Sehlopha sa Afrika Borwa sa kgwele ya maoto sa basadi Banyana Banyana, ge se phadišana dipapading tša Women's Africa Cup of Nations ka Morocco gomme re ba lakaletša mahlatse le mahlogonolo papading ya bona ya bobedi kgahlanong le Ivory Coast ka Labohlano la 31 Mosegamanye 2026.
• Yunibesithi ya Witwatersrand (Wits) ge e dutše maemong a pele ka Afrika, go ya ka dikelo tša Ditekanyetšo tša Senthara ya Diyunibesithi tša Lefase (CWUR) tša 2026. Maemo a a bea Wits gape le ka go 1% ya diinstitušene tša thuto tša maemo a godimo lefaseng, moo e bilego maemong a bo 200 go tšwa go ditheo tše 21,000 tšeo di lekotšwego lefaseng ka bophara.
• Yunibesithi ya Cape Town (UCT) ge hweditše maemo a bo 102 lefaseng ka bophara ka dikelong tša Tekanyetšo ya Khuetšo ya Tshwarelelo ya Thuto ya Godimo ya Times tša 2026, gape le go fihlelela maemo a senyane go maemo a godimo a diinstitušene tše 100 go phatlalala le Dinepo tša Tlhabollo ye e Swarelelago (di-SDG) tša UN.
• Lubanzi Dube wa mengwaga ye 12 ge a bile Moafrika Borwa wa mathomo wa mothomoso go thopa Diphadišanong tša World Startup Forum Championship ka Switzerland. Lubanzi, yo a bego a phadišana le bahlami ba bangwe ba 400 go tšwa lefaseng ka bophara, o thopile sefoka ka sehlangwa sa gagwe sa moswananoši sa SolEase yeo e hlametšwego go šogana le ditlhohlo tša maphelo a maoto. Phihlelelo ye ya gagwe ga se ya bea fela Afrika Borwa maemong a godimo lefaseng, efela e hlohleleditše le Maafrika a baswa go latela tša saense, theknolotši le boipereki.
• Sehlopha sa Afrika Borwa ge se tšwele maemong a bone Diphadišanong tša World Spelling Bee ka Shanghai, China, fao Mbulelo Tolom yo a lego ka Mphatong wa 7 a fihleletšego maemo a botshelela e le ge a phadišana le barutwana ba go tšwa ka mephatong ya ka godimo.
Dipotšišo:
Dikgokagano tša Mmušo le Lenaneo la Tshedimošo (GCIS)
Dikgokaganyo: Mohumagadi Nomonde Mnukwa, Molaodipharephare wa Motšwaoswere
Mogala: 083 653 7485
