A. DITABA TŠEO DI AMAGO BADUDI
1. Mokgwa wa Kakaretšo wa go Laola Bofaladi ka Afrika Borwa
1.1 Kabinete e lebogile Maafrika Borwa ao a ilego a tšea karolo megwantong ya khutšo kgahlanong le bafaladi bao ba se nago mangwalo gomme e retile Masolo ao a Kopanetšwego a Bosetšhaba le Dibopego tša Mahlale (NatJOINTS) ka go phethagatša megwanto ya khutšo ka la 30 Phupu 2026.
1.2 Kabinete e retile gape mošomo wa Komiti ya Magareng ga Ditona tša Dikgoro tša go Fapafapana ka fase ga bodulasetulo bja Tona ya Toka le Tlhabollo ya Molaotheo, Mohumagadi Mmamoloko Kubayi, ka mošomo o mobotse kudu wa go phethagatša Mokgwa wa Kakaretšo wa go laola bofaladi bjalo ka ge o tsebišitšwe ke Mopresidente Ramaphosa ka la 7 Phupu 2026.
1.3 Kabinete e amogetše tsebišo ka ga tshedimosetšo ya dikokwane tše hlano tša Mokgwa o Aakaretšago, kgatelopele ya mošomo ka fase ga kokwane ya phethagatšo ya Molao e akaretša tše di latelago:
1.3.1 Go oketšwa ga ditlhahlobo tša mešomo dikhamphaning tšeo di thwalago bafaladi bao a sego molaong, ka fase ga tlhahlo ya Batlatšatona ba Mešomo le Bašomi (Morena Jomo Sibiya), Merero ya Selegae (Morena Njabulo Nzuza) le Maphodisa (Ngaka Polly Boshielo).
1.3.2 Go netefatša go bušetšwa gae ka peakanyo le molao ka go hlongwa gape ga Kgorotsheko ya go Ikgetha ya Bafaladi ka Durban (yeo e bego e šoma go šogana le go bušetša morago bafaladi moo go bego go dirwa ka Sherwood, Durban), Kgorotsheko ya Bafaladi moBoemafofaneng bja Boditšhabatšhaba bja OR Tambo, le go tsošološwa ga Senthara ya Go Bušetša Bafaladi Gae ya Lindela ka Krugersdorp.
1.3.3 Magatoa ka pejana a go thekga mananeo a go bušetša batho gae go netefatša gore go bušetšwa gae ga bona go direga ka tsela ye e rulagantšwego le ka seriti. Se se dirile gore IMC e hlome ka lebelo senthara ya nakwana ya go bušetša batho gae ka Musina, e le go netefatša tirišo ye e šomago gabotse ka fase ga maemo a seriti le botho. Ka tsela ye, Kabinete e ile ya leboga mekgatlo ye e se nago poelo ya go swana le Gift of the Givers, Ashraful Aid le Mahlasela Foundation.
1.3.4 Go tloga ka la 7 Phupu 2026, Bolaodi bja Taolo ya Mellwane bo thibetše bafaladi ba bantši bao ba sego molaong bao ba bego ba leka go tsenaka mo nageng ka tsela ye e sego molaong, bona ba akaretša bafaladi bao ba sego molaong, batho bao ba sa nyakegego ka mo nageng le bao ba ganetšwago ka lebaka la go hloka ditokumente tša maeto tšeo di sa obamelego molao.
1.3.5 NATJOINTS e hlalošitše ka botlalo ka ga melato ya bosenyi yeo e butšwego kgahlanong le bosenyi go akaretšwa go hlakahlakantšha setšhaba le melato ya bosenyi bja go amana le go hlogohla yeo e begilwego, basenyi bao ba golegilwego, le melato ye e lego pele ga kgorotsheko le yeo e sa dutšego e nyakišišwa.
1.4 Ka Labone, la 02 Mosegamanye 2026, maloko a mangwe a IMC a ile a dira tlhahlobo mollwaneng wa Limpopo-Zimbabwe, e le go kwešiša bogolo bja mošomo wa lefapha mabapi le kaonafatšo ya mananeokgoparara.
2. Go šoma gabotse ga Bafana Bafana mo Phadišanong ya Sebjana saLefase ya FIFA ya 2026
2.1 Kabinete e kopane le setšhaba go lebogiša Bafana Bafana ka go šoma gabotse ga bona Phadišanong ya Sebjana sa Lefase ya FIFA ya 2026, moo sehlopha se ilego sa fihlelela Legato la dihlopha tše 32 tša mafelelo lekga mathomo go tloga mola Afrika Borwa e tsenelago Sebjana sa Lefase sa 1998.
2.2 Bafana Bafana gape ba ile ba bontcha kgwele ya maoto ya go kgahliša kgahlanong le Canada ka legatong la ba-32 moo ba ilego ba fenywa ka tsela ye e nyamišago ka go lahlegelwa ka nako ya tlaleletšo. Naga ya rena e ikgantšha kudu ka bašemane ba rena bao ba bontšhitšego gore ba ka phenkgišana le dihlopha tša bokgoni mo lefaseng ka bophara.
2.3 Re a leboga Afrika Borwa, ka kamogelo ya borutho go bašemane ba rena(Bafana Bafana).
EKONOMI:
EKONOMI:
1. Afrika Borwa e Bontšhitše Kaonafalo ye Botse mo Tekanyong ya Phadišano ya Lefase
1.1 Kabinete e amogetše kaonafalo ye kgolo ya Afrika Borwa mabapi le phenkgišano ya lefase bjale ka ge go tšweleditšwe ka Pegong ya Ngwaga ka Ngwaga ya Lefase (WCY) yeo e re beilego go maemo a 54 ge go bapetšwa le a 64 ka 2025.
1.2 Pego e lokolotšwe ka Phupu 2026 ke Setheo sa Taolo ya Tlhabollo (IMD) ka tirišano le Productivity SA, e laeditše gore Afrika Borwa e kaonafetše ka mafelo a 10 go tloga maemong a yona a peleng.
1.3 Maemo ao a kaonefetšego a godišwa ke tšwelopele mo bokgoning bja mmušo, boitshepo go kgolo ya kgwebo le taolo ye e kaonafaditšwego ya mananeokgoparara, gomme se se gatelela khuetšo ya diphetogo tše di tšwelago pele tša go matlafatša phethagatšo ya ekonomi le pušo.
2. Samiti ya Mananeokgoparara ya Afrika Borwa e Matlafatša Lesolo la Naga la Dipeeletšo tša Mmušo
2.1 Kabinete e retile go swarwa ka katlego ga Samiti ya Mananeokgoparara le Pontšho go tloga ka la 9 go fihla ka la 11 Phupu 2026 mo Gallagher Convention Centre ka Johannesburg, yeo e abilego sefala se bohlokwa go godiša ditirišano, go goketša dipeeletšo le go potlakiša phethagatšo ya diprotšeke tša peakanyo ya mananeokgoparara.
2.2 Dipoledišano di be di lebišitše go go katološa ditirišano tša mmušo le praebete, go kaonafatša dinetweke tša tshepedišo ya dithoto, le go matlafatša mananeokgoparara a dinamelwa, meetse, le a titšitalego thekga kgolo le tlhabollo ya ekonomi. Masolo a a Mananeokgoparara a huetša boikgafo bjo bo tsebišitšwego ke Mopresidente Cyril Ramaphosa ka Polelo ya Maemo a Setšhaba ya 2026, yeo e hlalošitšego lenaneo le legolo la kgolo ye e hlahlwago ke mananeokgoparara, ka tšhelete ya go feta R1 trilione go mananeokgoparara a mmušo mo kotareng ya magareng.
DIKAMANO TŠA BODITŠHABATŠHABA
1. Samiti ya SACU: Go matlafatša Kopanyo ya Dilete
1.1 Kabinete e retile katlego ya Samiti ya bo-9 ya Seboka sa Dinaga tšaBorwa bja Afrika (SACU) ya Baetapele goba Dihlogo tša Mebušo, yeo e swerwego ka la 26 Phupu 2026.Ye nngwe ya dipoelo e tše kgolo tša Samiti ebile e le yeo e tsamaišanago le mokgwa wo o lekotšwego leswa wa SACU, dinaga tše di lego maloko di tiišeditše boitlamo bja tšona go SACU bjalo ka mothopo wa go sepetša kopanyo ya ekonomi ya dilete, intasteri le phapantšho ya ekonomi, kgwebišano le peeletšoya tsenelanoo ya dilete ye e katološitšwego, tumelelano ya dipholisi le tlhabollo ya ekonomi ya go swarelela. Tlhabollo ya intaseteri e dula e le morero wo bohlokwa lenaneong la tlhabollo la SACU.
2. Go tšwetša pele dikamano tše di logetšwego maano le naga yaChina
2.1 Motlatšamopresidente Paul Mashatile o phethile leeto la gagwe la mošomo ka katlego go la China ka la 20 go fihla ka 26 Phupu 2026, leo maikemišetšo a lona e bego e le go matlafatša go iša pele dikamano tša ekonomi le go katološa dibaka tša peeletšo le tirišano ya diintasteri. Nakong ya ketelo, o swere kopano ya mahlakore a mabedi le Mohlomphegi Morena Han Zheng, Motlatšamopresidente wa Repabliki ya Batho ba China, go boledišana ka ditaba dikgahlego tša go swana le go matlafatša go ya pele dikamano tša diekonomi tša mahlakore a mabedi.
2.2 Nakong ya ketelo, Motlatšamopresidente Mashatile o kgathile tema go Pontšho ya Bone ya go Reka le go Rekiša ya China, moo a thekgilego maemo a Afrika Borwa bjalo ka matseno a dinaga tša Afrika tšeo di lego Borwa bja Afrika go tša kgwebišano, dipeeletšo le tirišano ya diintasteri. Dikamano tše di matlafaditšwego go letetšwe gore di goketše dipeeletšo tše di oketšegilego , go katološadibaka tša dikgwebo tša ka mo nageng le go thekga kgolo ya ekonomi ya kakaretšo yeo e hlolago mešomo.
A. DIPHETHO TŠA KABINETE
1. Seakanywa sa Pholisi ya Tšhireletšego ya Direkwa tša Petroleamo
1.1. Kabinete e dumeletše phatlalatšo ya Seakanywa sa Pholisi ya Direkwa tša Petroleamo gore setšhaba se e sekaseke.
1.2. Maikemišetšo a pholisi ke go matlafatša tšhireletšego ya enetši ya Afrika Borwa le go fokotša khuetšo ya ekonomi ya mathata a go reka le go rekiša, yeo e hlaotšego dikarolo tšeo di nyakago šedi, go akaretša nyakegoo ya go matlafatša dipeakanyo tša dišere le go oketša bokgoni bja kaonafatšo ya ka mo nageng.
1.3. Pholisi e akanya mmotlolo wa dišere wo o kopanego woo Khamphani ya Petroleamo ya Bosetšhaba ya Afrika Borwa (SANPC) e tla swarelelago dipolokelo tše bohlokwa tša go lekana matšatši 60 a palomoka ya dithoto tša go tšwa ka ntle go bobedi oli ye tala; le ditšweletšwa tša petroleamo tše di hlwekišitšwego, ka koketšego ya dikarolo go ya go matšatši a 90 mo nakong ye telele. Pholisi e tla kgatha tema go šireletša tšhireletšego ya enetši ya setšhaba, go kaonafatša maatla kgahlanong le mathata a go reka le go rekiša a dinaga tša lefase le go thekga kgolo ya ekonomi ya go swarelela.
2. Tlhako ya Mohlakanelwa Kgokaganyo ya Leago
2.1. Kabinete e dumeletše Tlhako ya Mohlakanelwa ya Kgokaganyo ya Leago (ISFF) bjalo ka sedirišwa sa pholisi ya setšhaba ye e tlamago go laola le go hloma go tšea karolo ga setšhaba go kabo ya mananeokgoparara go ralala le makala ka moka a mmušo, dikgwebo tša mmušo le bakgathatema ba tlhabollo ya mananeokgoparara.
2.2. Maikemišetšo a tlhako ke go šogana le megwanto ya setšhaba, go šitišwa ga diprotšeke, go senya ka boomo, go ditegela le dikotsi tša tšhireletšego ka go go godiša go kgatha tema ga ditšhaba mo go beakantšwego mo leboong la protšeke ya mananeokgoparara, ka gona ba matlafatša tshepo ya setšhaba, go phedišana ga setšhaba le tšhireletšo ya dipeeletšo tša mananeokgoparara.
2.3. ISFF e tsebagatša mokgwa wa seprofešene wa go laolwa go kgokaganyo ya leago, go akaretša tumelelo ya Bakgokaganyi ba Leago, dipeakanyo tša mmušo tša go kwagala, tekolo le tlhahlobo tše maatla, le mokgwa wo o theilwego go kotsi go laola dikotsi tše di amanago le setšhaba.
3. Pego ya Thekgo ya Ditšhelete ya Sehlophatšhomo sa ditona ka saense, theknolotši le tlhabollo (STI)
3.1. Kabinete e dumeletše go lokollwa ga Pego ya Thekgo ya Ditšhelete ya Saense, Theknolotši le Tlhabollo gore setšhaba se swayeswaye.
3.2. Pego e gatelela tlhokego ya Afrika Borwa go efoga go ithekga kudu ka thekgo ya ditšhelete go tšwa dinageng tše dingwe le go aga bokgoni bja go thekga ka ditšhelete bja ka mo nageng go fediša matšhošetši ao a lebišitšwego go mananeo a dinyakišišo a naga go šireletšaboikemo bja saense bja Afrika Borwa.
4. Tshepedišo ya Tumelelo ya Tlhabollo ya Setšhaba sa Borwa bja Afrika (SADC) ka Diintasteri
4.1. Kabinete e dumeletše go išwa ga Tshepedišo ya SADC ka Diintasteri Palamenteng gore e dumelelwe. Tshepedišo ye ke tumelelano ya dilete ya go tlama ya semolao yeo maikemišetšo a yona e lego go hlabolla tšeo di theilwego go intasteri ya phadišano ya lefase ka moka ya go fapana, ya tšwelotšopele go phatlalala le Borwa bja Afrika. Nepo ya yona ke go godiša tshwarelelo le kakaretšo ya kgolo ya ekonomi.
4.2. Tumelelo ya Afrika Borwa ka Tshepedišo ye e tla ba le seabe sa gore e be maatla gape e šome gabotse ge re kgatha tema go go nepiša go ekonomi ya selete le tlhabollo ya diintasteri le go godiša phetogo go tloga go go romela ntle ditšweletšwa tše ditala go ya go go romela ntle ditšweletšwa tša boleng bja godimo tšeo di dirilwego.
5. Tumelelo ya Tumelelano ka ga Pabalelo le Tšhomišo ya go Swaralela ya Diphedi tša go Fapafapana tša ka Mawatleng Mafelong ao a lego ka ntle ga Taolo ya Bosetšhaba
5.1. Kabinete e dumeletše go išwa ga Tumelelano ka ga Pabalelo le Tšhomišo ya go Swaralela ya Diphedi tša go Fapafapana tša ka Mawatleng Mafelong ao a lego ka ntle ga Taolo ya Bosetšhaba(Tumelelano ya BBNJ) Palamenteng gore e dumelelwe. E tsebega gape ka High Seas Treaty, Tumelelano ye ke sedirišwa sa go tlama sa semolao sa Ditšhabakopano seo e diretšwego go hlohleletša pabalelo ya diphedi tša go fapafapana tša ka mawatleng ka meetseng a boditšhabatšhaba.
5.2. Afrika Borwa e kgathile tema ye kgolo ka go rerišana ka Tumelelano ka fase ga Kopano ya Ditšhabakopano ka Molao wa Mawatle. Go letetšwe gore Tumelelano ya BBNJ e matlafatše taolo ya mawatle a lefase ka go kaonafatša tirišano ya boditšhabatšhaba ka taolo ya tirišano le tshwaralelo ya methopo ya mawatle mo meetseng a boditšhabatšhaba.
B. MELAOKAKANYWA
1. Molaokakanywa wa Phetošo ya Melao ya Taolo ya Tikologo ya Bosetšhaba (NEMLA), wa 2026
1.1. Kabinete e dumeletše phatlalatšo ya Molaokakanywa wa NEMLA, wa 2026 gore setšhaba se swayeswaye. Molaokakanywa o nyaka go fetola Molao wa Taolo ya Tikologo wa Setšhaba, wa 1998 (Molao wa 107 wa 1998), go maatlafatša kobamelo ya tikologo le phethagatšo ka go matlafatša bahlahlobi ba tikologo go tšweletša ditsebišo tša phethagatšo le go kgontšha mebasepala go ntšha ditaelo tšakgahlanong le go gataka melao ya tikologo.
1.2. Molaokakanywa o tsebagatša gape lenaneo la kotlo la taolo go molao wa tikologo ya setšhaba ya Afrika. Se se tla tlaleletša dikiletšo tša bosenyi tša gonabjale ka go fa molao wa go ema legato kotlo ya bosenyi ya go tshela melao ga melato ye mennyane, ya kgontšha phethagatšo ya go šoma kudu mola o efoga dititelego le dikotsi tša go se tshepe ke setšhaba tšeo di amanago le ditshepedišo tša bosenyi.
2. Molaokakanywa wo o Mpshafaditšwego wa Ngwadišo ya Bongthoto le Mananeo a go Rekotiwa ka mokgwa wa Elektroniki
2.1. Kabinete e dumeletše go išwa Palamenteng ga Molaokakanywa wo o Mpshafaditšwego wa Ngwadišo ya Bongthoto le Mananeo a go Rekotiwa ka mokgwa wa Elektroniki. Molaokakanywa o nyaka go fetola Molao wa Ngwadišo ya Bongthoto wa Elektroniki (Molao wa 19 wa 2019), Molao wa Ngwadišo ya Bongthoto (Molao wa 47 wa 1937) le Molao wa Dithaetlele tša Karolo (Molao wa 95 wa 1986) go mpshafatša tlhako ya molao wo o laolago ngwadišo ya bongthoto le mananeo a go rekotiwa.
2.2. Molaokakanywa o godiša maikemišetšo a ekonomi ya kakaretšo le go kaonafatša tšhireletšego ya go ipha naga. Dimpshafatšo tše di akantšwego bontši ke tša sethekniki ka sebopego sa tšona gomme maikemišetšo a tšona ke go matlafatša tšhireletšego ya thaetlele le go kaonafatša taolo ya naga le ditokelo tša thoto go hola bengnaga le beng ba maleba.
C. DITSEBIŠO TŠA KABINETE
1. Kakanyo ya Bohlodi bja Setšhaba (NIE), Dilo tše Bohlokwa tšaBohlodi bja Setšhaba (diNIP) le leano la phethagatšo la NIE
1.1 Kabinete e tsebišitšwe ka Khansele ya Tšhireletšego ya Setšhaba ya 2026/27 yeo e dumeletšego Dikakanyo tša Bohlodi bja Setšhaba, dilo tše bohlokwa tša bohlodi bja setšhaba le go gopodišiša ka leano la phethagatšo la kakanyo ya bohlodi bja setšhaba.
1.2 Kabinete e lemogile gore dihlongwa tša bohlodi bja setšhaba a tšwela pele go ba le kgatelopele go phethagatšo ya Dikakanyo tša Bohlodibja Setšhaba.
1.3 Go tše bohlokwa tšeo di lego ka ntle ga taolo ya dihlongwa tšaBohlodi bja Setšhaba, Kabinete e akantše ka leano la phethagatšo ya NIE leo le gatelelago, gare ga tše dingwe:
1.3.1 Go matlafatša tlhahlobo ya mošomo go kgonthiša kobamelo ya melao ya mošomo ya Afrika Borwa,
1.3.2 Ditaolo tše di tiišeleditšwego letsogo tša diekonomi tša ka mo nageng le go ba bongthoto mo go lego ka lehlakoreng la badudi go sepelelana le karolo ya 22 ya Molaotheo, go gatelelwa go laolwa ga mabenkele diphaza, le dikgwebo tše dingwe tše dinnyane gape e sego tša semmušo go kgonthiša go ba mongthoto wa mohola le go kgatha tema ga badudi.
1.3.3 Go itirela enetši ya mohlagase le tšhireletšego ya dijo go lebeletšwe methopo le didirišwa tša tlhago tšanaga ya Afrika Borwa, le
1.3.4 Phetogo ya leratadima le maatla go akaretša go šogana le El Niño ye maatla.
1.4 Mo nakong ye e tlago, le ka maele a dihlongwa tša Bohlodi tša Setšhaba, Tona ka Ofising ya Mopresidente o tla lokolla Dikakanyo le Dilo tše Bohlokwa tša Bohlodi tša Setšhaba tša 2020-2021
2. Tsebišo ya Maele ya Khomišene ya Ditirelo tša Setšhaba ka ga go kgatha tema ga bašomi ba mmušo ka mo go dihlopha tša thuto ya mekgatlo ya dipolotiki le go kgatha tema go gongwe
2.1 Kabinete e lemogile Tsebišo ya Maele ya PSC ka ga go kgatha tema ga bašomi ba mmušo ka mo go dihlopha tša thuto ya mekgatlo ya dipolotiki le mešongwana ye mengwe gomme e kgopetše PSC go nyakišiša ka botlalo ka mekgwa ka moka go thekga maloko a Palamente go ipeakanyetša dihlopha tša thuto.
2.2 Nako ya dipolotiki ya Afrika Borwa e theilwe go lenaneo la kemelo ye e amanago ya mekgatlo ya dipolotiki ka tsela yeo Palamente e beakantšwego ka dipoledišano tša mekgatlo. Mekgatlo ya dipolotiki ka gare ga palamente ke moka e ya ipeakanya ka tsela yeo e kgontšhago go šoma gabotse - mekgatlo ye mengwe e beakanya dipoledišano tša bona ka dihlopha tša go ithuta.
2.3 Kakanyo ye e phošagetšego ya Tsebišo ya Maele ke gore bahlankedibagolo ba kgatha tema go dihlopha tša thuto ka taelo ya Ditona le Batlatšatona.
2.4 Bahlankedibagolo ba laletšwa go gape ba swanetše go kgatha tema go dihlopha tša thuto go fa tshedimošo ya sethekniki go matlafatša Maloko a Palamente go ba le taolo le bokgoni bjo bo kaonafetšego bja go rweša Taolophethiši maikarabelo.
2.5 Kabinete e dumetše go šoma ka mokgwa wa go Fetišetšana Tshedimošo gabotse go šoma ka Ditlhahli go go kgathatema ga bahlankedibagolo go Dihlopha tša Thuto le mekgwa ye e amango ya mekgatlo ya dipolotiki.
3. Mpshafatšo ya Dikgwebo tša Mmušo (SOE)
3.1 Kabinete e amogetše pego ya tšwelopele ka ga phethagatšo ya mpshafatšo yeo maikemišetšo a yona e lego go matlafatša dikgwebo tša mmušo (diSOE) go kgonthiša gore di šoma gabotse.
3.2 Tšwelopele ye e tšwelago pele ya go sepetša phethagatšo ya lenaneo la mpshafatšo ya SOE, le akaretša mananeo a magolo ao a nepišago go matlafatša mmušo, a kaonafatša go swarelela le go oketša maikarabelo go phatlalala le diSOE. Lenaneo le legolo ke Molaokakanywa wa Dikgwebo tša Mmušo tša Bosetšhaba, tšeo di abago go thongwa ga lekala la gare la go sepediša dimpshafatšo tša SOE, ditirišo tša taolo tša go swana le ditlhahli tša megolo, le go thekga phethagatšo ye e kaonafaditšwego go phatlalala le potfolio ya SOE.
3.3 Ka Tlhako ya Tekolo ya Phethagatšo ya SOE, phethagatšo ya Šetulo ya 2 ya bo 72, Šetulo ya 3A le Šetulu ya 3B di sekasekilwe nakong ya ngwaga wa ditšhelete ya 2025/26. Tshekatsheko e utollotše ditlhohlo tša taolo tše mmalwa tšeo di nyakago magato a go rarolla seemo se ao a lebantšwego.
3.4 Tlhako e dula e le sedirišwa se bohlokwa sa go matlafatša pušo, ya kaonafatša taolo le go godiša phethagatšo ya mokgatlo go phatlalala le Dikgwebo tša Mmušo (diSOE) ka tekolo ya peakanyo, go bega le ditshepedišo tša taolo ya phethagatšo.
3.5 Go tlaleletša dimpshafatšo tše ke tshepetšo ya peakanyoleswa le tšhutišo ya diSOE, go aga mošomo wa Khansele ya Dikgwebo tša Mmušo tša Mopresidente, yeo e išitšego ditšhišinyo tša yona go Mopresidente ka Moranang 2024.
4. Protšeke ya Phihlelelo ya Thekgo ya Thuto le Ditirelo tša Bana le Baswa bao ba Phelago ka Bogolofadi ka Afrika Borwa
4.1 Kabinete e lemogile ka dipego tše pedi tšeo di dirilwego ke Kgoro ya Basadi, Baswa le Batho bao ba Phelago ka Bogolofadi, tšeo dilekolago sekgoba gare ga dipholisi tša thuto tša kakaretšo tša Afrika Borwa le bophelo bja tšatši ka tšatši bja bana le baswa bao ba phelago ka bogolofadi. E dirilwe gare ga Diphalane 2022 le Hlakola 2024, protšeke ye e akaretša pego ya magomo le pego ya nyakišišo yeo e lekotšego ditirelo tša thekgo ya thuto tša gonabjale gomme ya lekola magato ao a hlaotšwego ao a ka phethagatšwago go šogana le seemo se go kaonafatša dipoelo tša go ithuta le go ruta. Kabinete e kgonthišitše gape boikgafo bja Afrika Borwa bja go aga lenaneo le le tee la thuto leo le akaretšago batho ka moka leo le abago dinyakwa tša bana le baswa bao ba phelago ka bogolofadi.
4.2 Ditšhišinyo tša motheo di akaretša go fetola molao wa thuto goba go phethagatša melawana go ya ka Molao wa Dikolo wa Afrika Borwa go phethagatša tokelo ya thuto ya go lekalekana, tekatekano le thuto ya boleng ya bana le baswa bao ba phelago ka bogolofadi. Dipego tše di šišinya gape gore ditheo tša thuto ya godimo di tsebagatše thutwana tša kgapeletšo tšeo di akaretšago bohle gape tša batho bao ba nago le dinyakwa tša go ikgetha tša baithuti bao bao ba ithutelago borutiši. Dipego tše tše pedi di hwetšagala go www.dwypd.gov.za
5. Ditšhišinyo tša Khomišene ya Nnete le Poelano (TRC)
5.1 Kabinete e amogetše le go amogela tsebišo ya ngwaga le ngwaga ye e dumeletšwego ke Palamente ka ga phethagatšo ya ditšhišinyo tša TRC. Ka Phupu 2003, Palamente e dumeletše go lliša batšwasehlabelo ba TRC bao ba utollotšwego. Se se akareditše tefo ya mafelelo ya gatee ya R30 000, dikholego tša kalafo le mekgwa ye mengwe ya thušo ya leago, maswao le digopotšo, le thobamatswalo ya setšhaba bjalo ka karolo ya go fodiša dintho tša nako ya go feta.
5.2 Kabinete e lemogile tšwelopele mo go phethagatšeng magato a, go akaretša kgonthišo ya melawana ka Mopresidente ya go laola tefo ya gatee ya motho ka noši, go epolla mašaledi, go boloka gape mašaledi le go boloka batšwasehlabelo ka leswao la tlhompho; le thušo ya dintlo. Kakanywa ya melawana ye e sa šetšego yeo e amango le maphelo le thobamatswalo ya setšhaba e legatong la mafelelo.
5.3 Go tlaleletša, batšwasehlabelo ba TRC bao ba utollotšwego ba 17 455 go ba 21 676 bao ba dirilego dikgopelo tša go fiwa tšhelete ya gateeya motho ka noši ba amogetše thušo ya R30 000. Palomoka ye e lefilwego ya tefo ya mafelelo ya gatee e ka ba R500 milione. Go kgonthiša gore baholegi ka moka bao ba nago le maswanedi ba amogela thekgo yeo ba swanetšego go e hwetša, ka la 9 Phupu 2026, tsebišo ya kakaretšo e phatlaladitšwe mo Kuranteng ya Mmušo e ipiletša go batšwasehlabelo ba TRC bao ba utollotšwego, goba ba malapa a bona, bao ba se ba hlwago ba dira dikgopelo tša tefo go itšweletša le go kgopela R30 000 ya tefo ya gatee.
D. BAO BA THWETŠWEGO MEŠOMONG
Batho ka moka bao ba thwetšwego mešomong mangwalo a bona a thuto a tla kgonthišišwa le go tiišeletšwa ka mekgwa ya maleba.
1. Ngaka Tshepo Mokoka bjalo ka Mohlankedimogolophethiši wa Sehlopha wa Central Energy Fund.
2. Mohumagadi Lindokuhle Nzoyi bjalo ka Mohlankedimogolophethiši waAmatola Water
3. Ngaka Michael Masiapato bjalo ka Mokhomišinare wa Mokgatlo wa Taolo ya Mellwane (koketšo ya nako ya ka ofising).
4. Ngaka Musa Furumele bjalo ka Moemedimogolo wa Afrika Borwa go Khomišene ya Lesotho Highlands Water le Mohumagadi Nelly Dineo Ndumo bjalo ka moemedi wa go ema legato.
5. Go kgethwa ga Modulasetulo le leloko la Boto ya Khomišene ya National Lotteries:
a. Morena King Tembinkosi Bonakele (modulasetulo); le
b. Mohumagdi Mpho Sonia Mosing
6. Go kgethwa ga Maloko a Boto ya Khansele ya Maphelo le Polokego ya Maepo
a. Morena David Msiza (Modulasetulo);
b. Morena Xolile Mbonambi (Kgoro ya Methopo ya Meepo le Petroleamo);
c. Ngaka Dipalesa Mokoboto (DMPR);
d. Morena Mthokozisi A. Zondi (DMPR);
e. Morena Ndivhudza Mahwasane (DMPR);
f. Mohumagadi Naledi Tsipane (NUM);
g. Mohumagadi Melanie Roy (NUMSA);
h. Morena Nico Van Rooyen (UASA);
i. Morena Johan du Toit Boning (Solidarity);
j. Morena Joshua Thabang Setlhake (AMCU);
k. Morena Dushendra Naidoo (Khansele ya Diminerala ya Afrika Borwa);
l. Ngaka Amu Modau (Methopo ya Vadante);
m. Morena TW Sepetla (Harmony Gold);
n. Morena Ronaldt Mafoko (Overlooked Group); le
o. Morena Letisha van den Berg (ASPASA)
p. Mohumagadi Constance Kekana (leloko la go ema legato);
q. Morena Thabo Ngwenya (leloko la go ema legato);
r. Morena Masibulele Naki (leloko la go ema legato) (NUM)
s. Morena Enock Manyoni (leloko la go ema legato); (NUMSA)
t. Morena Johnny White (leloko la go ema legato); (UASA)
u. Morena Jacobus Johannes De Wet Blaauw (leloko la go ema legato);(Solidarity)
v. Morena D. Gabriel Nkosi (leloko la go ema legato); (AMCU)
w. Ngaka Thuthula Balfour (leloko la go ema legato); (Khansele ya Diminerala ya Afrika Borwa)
x. Morena Modise Ronald Mothlamme (leloko la go ema legato)’ (Harmony Gold) le
y. Ngaka Kelvin Naidoo (leloko la go ema legato) (Vlaterra Platinum)
E. DITIRAGALO TŠEO DI SA TLAGO
1. Kgwedi ya Mandela
1.1 Afrika Borwa e tla re ka Mosegamanye ya gopola Kgwedi ya Mandela ka fase ga morero “Go sa le ka matsogong a rena go lwantšha bohloki le go se lekalekane’. Kabinete e ipiletša go Maafrika Borwa ka moka go aba nako le maitapišo a bona nakong ya Kgwedi ya Mandela le ka Letšatši la Boditšhabatšhaba la Nelson Mandela ka la 18 Mosegamanye 2026, go thuša go aga Afrika Borwa yeo e šomelago Maafrika Borwa.
2. Kgwedi ya Saense ya Bosetšhaba
2.1 Mosegamanye ke Kgwedi ya Saense ya Bosetšhaba, yeo e tla thakgogago ka la 4 Mosegamanye 2026 mo Phakeng ya Saense le Theknolotši ya Borwa bja Gauteng bja Yunibesithi ya Theknolotši ya Vaal go la Sebokeng ka fase ga morero wo “Saense, Theknolotši le Tšweletšopele ke tša bohle”.
2.2 Meketeko ya kgwedi ka moka ya saense e ikemišeditše go aga setšhaba seo se tsebago saense seo se ka dirago dikgopolo tša saense, theknolotši le tšwelotšopele. E nyaka go godiša setšhaba sa boitshepo ka go saense, borasaense, le ditheo tša saense.
F. MELAETŠA
1. Matshidiso
Kabinete e iša matshediso go bagwera le ba lapa la:
• Konokono ya jazz ya Afrika Borwa Abdullah Ibrahim, yoo e bego e le yo mongwe wa batho bao ba huetšago jazz ya lefase, yoo a bilego le mošomo wa go makatša go feta mengwagasome ye šupago. O tla gopolwa bjalo ka yo mongwe wa borramino ba go ketekwa le motseta wa setšo.
• Badudi ba babedi ba Mozambique le o tee wa Malawi bao ba lobilego maphelo a bona mo mathomong a megwanto kgahlanong le bafaladi bao ba sego molaong.
2. Ditebogišo
Kabinete e lebogiša le go lakaletša tše botse go:
Kabinete e lebogiša le go lakaletša tše botse go:
• Tona ya Mešomo le Bašomi, Nomakhosazana Meth ka go kgethwa bjalo ka Motlatšamodulasetulo wa Sehlopha sa Bathwadi le Dihlopha tša Bašomi ba Mokgatlo wa Bašomi wa Boditšhabatšhaba (ILO) ka la 12 Phupu 2026.
• Kagiso Rabada, ka go šoma gabotse nakong ya Indian Premier League 2026, moo a bonagetšego bjalo ka baola wa maemo a godimo gomme a thopa Purple Cap ya maemo a godimo.
• Moraloki wa khrikhethe Temba Bavuma yoo a hlaotšwego gare ga Batho bao ba nago le Khuetšo ye Kgolo mo Dipapading tša TIME100 tša 2026, tlhompho ya bohlokwa yeo e abilwego ke phatlalatšo ya lefase ya TIME Magazine.
• Bayanda Walaza, ka go thopa lebelo la banna la 100m mo Ostrava Golden Spike ka Czechia, ka go tshela mothaladi wa go phetha ka metsotswana ye makatšago 9.94.
• Akani Simbine ka go thopa lebelo la Banna la 100m mo Dipapading tša FBK ka Netherlands ka nako ya metsotswana ye 10.08.
• Prudence Sekgodiso ka go ba mosadi wa mathomo wa Moafrika Borwa wa go thopa metale wa gauta mo Difokeng tša ka Gare tša Diathletiki tša Lefase, go latela phenyo ya gagwe ka Nanjing, China.
• Proteas Women ka go phagamišetša folaga ya naga godimo gomme ba fihlelela seka-makgaolakgang a Sefoka sa Lefase sa Basadi sa T20, moya wa bona, maikemišetšo le mošomo wo mobotse mo nakong ya thonamente ka moka, le ge ba fentšwe ke England ka Labone la 02 Mosegamanye 2026.
• Junior Springboks ka go fenya Uruguay 104 – 7 ka diphadišano tša bona tša go bula tša Difoka tša Lefase tša World Rugby Junior kaGeorgia.
• Bradley Nkoana, ka go tsenela sehlopha sa maemo a godimo ka go ba Moafrika Borwa wa bo 12 go tloša lepheko la metsotswana ye 10 ka 100m.
• George Kusche le Gerda Steyn ka go thopa Comrade Marathon wa banna le basadi wa 2026 ka go latelana. Kusche o phethile “up run”ka roba nako ya rekoto ya histori ya 05:15:56, mola Steyn a hweditše thaetle ya gagwe ya bohlano ka rekoto ya up-run ya 05:44:53.
Kabinete e leboga tema ye e kgathilwego ke banna le basadi ba dipapadi ba Afrika Borwa bao tšwelago pele go thekga setšhaba seo se thekgilego ka leswao la naga ye, ba re gopotša gore bathobaso le bathobašweu, re NAGA YE TEE, RE KOPANE KA GO FAPANA GA RENA.
E lokolotšwe legatong la Kabinete ke:
Tona ka Kantorong ya Mopresidente, Mohumagadi Khumbutzo Ntshavheni
Dipotšišo:
Dikgokagano tša Mmušo le Lenaneo la Tshedimošo (GCIS)
Dikgokaganyo: Mohumagadi Nomonde Mnukwa, Molaodipharephare wa Motšwaoswere
Letšatšikgwedi: 3 Mosegamanye 2026
Selefouno: 083 653 7485
www.gcis.gov.za; www.gov.za
Issued by
More on
