A. Ditaba tšeo di Amago Badudi
1. Ekonomi
1.1. Afrika Borwa: Lefelo la Mmamoratwa la Dipeeletšo
1.1.1. Kabinete e tšweledi dikgopolo tša dipeeletšo tše dibotse tšeo di tšwago go diketelo tša mošomo tša Mopresidente Cyril Ramaphosa le Motlatšamopresidente Paul Mashatile ka New York ka USA le London ka United Kingdom (UK), ka tsela yeo.
1.1.2. Lenaneo la Mopresidente, mo magomong a Kopano ya Kakaretšo ya Ditšhabakopano (UNGA) ya bo 79, e akareditše dibaka tša go godiša Afrika Borwa bjalo ka lefelo la dipeeletšo la kgetho go swana le go la ka polelong ya gagwe go New York Stock Exchange – lefelo la go reka le go rekiša dišere le legolo go feta ka moka lefaseng ka boleng bja tolara mmarakeng.
1.1.3. Mo leetong ka gagwe la lesolo la dipeeletšo ka UK le Ireland motlatšamopresidente o boletše le London Stock Exchane (LSE) ka ga tlhokego ya go oketša dipeeletšo tša bona ka Afrika Borwa. LSE e bile lefelo la go reka le go rekiša dišere le bohlokwa kudu ka Yuropa go tloga ka 2023.
1.1.4. Bobedi Mopresidente Ramaphosa le Motlatšamopresidente Mashatile, le baromiwa bao ba ba feleseditšego, ba boletše dilo tše bohlokwa tša Mmušo wa Kopanelo wa Setšhaba, moo se bohlokwa seo se lego godimo e lego go fihlelela kgolo ya ekonomi ya kakaretšo le tlholo ya mešomo, le mananeo ao a amanago le yona ao a lego gona go fihlelela dilo tše bohlokwa tšeo di beakantšwego. Ba bontšhitše gape mošomo wo o thomilego ka mananeo a dikaonafatšo tša sebopego go hlola maemo a makaone a dipeeletšo. Lenaneo la dikaonafatšo tša sebopego le kgokganywa ka Operation Vulindlela ke Ofisi ya Mopresidente le Matlotlo a Setšhaba.
1.2. Karolo ya Bobedi ya Tirišano ya Kgwebo ya Mmušo
1.2.1. Kabinete e amogela thakgolo ya Karolo ya bobedi ya Tirišano ya Kgwebo ya Mmušo yeo maikemišetšo a yona e lego go phethagatša ditsenogare tše bohlokwa go phatlalala le mafelo a bohlokwa ao a kgethilwego go potlakiša tsela ya naga go kgolo ya ekonomi ya kakaretšo le tlholo ya mešomo, ka peeletšo ye e oketšegago le phethagatšo ya lebelo ya dikaonafatšo, go kaonafatša karabelo ya setšhaba.
1.2.2. Go šoma go thekga ditsenogare tša mmušo, Bahlankedibagolophethišo (di-CEO) ba go feta 130 ba dikgwebo tša Afrika Borwa ba beakanya didirišwa, go akaretša bokgoni bja go šogana le bothata bja kgaotšo ya mohlagase bjoo gonabjale e lego selo sa maloba, ba thekga phethagatšo ya Mmepe wa Tsela wa Tefamorwalo le Dilotšistiki, Kaonafatšao ya Visa, le twantšho kgahlanong le bosenyi le bomenetša mo Karolong ya mathomo.
1.3. Dikaonafatšo tša Visa di Tsentšwe Kuranteng ya Mmušo
1.3.1. Kabinete e amogela go tsenywa kuranteng ya mmušo ga molao wa visa ye mpsha ya Afrika Borwa bjalo ka kgato ya motheo mo go goketšeng mabokgoni le dipeeletšo tša ditšhabatšhaba, go godiša boeti le go hlola mešomo.
1.3.2. ona ya Merero ya Selege, Ngaka Leon Schreiber, o tsentše dikaonafatšo kuranteng ya mmušo, seo ke katlego ka fase ga Operation Vulindlela.
1.4. Phethagatšo ya Melao ya Bašomi
1.4.1. Kabinete e retile maitapišo a tekolo ya mohlakanelwa ye e matlafaditšwego yeo e etilwego pele ke Kgoro ya Thwalo le Bašomi (DEL) go kgonthiša gore bengmošomo ba obamela dinyakwa tša kalatšo.
1.4.2. Go tloga mola Taolo ya Bošupa e thomago, DEL e ntšhitše dikotlo tša go feta R10 milione go bengmošomo bao ba sa latelego molao mo intastering ya dijo le marobalo bao ba tšwelago pele go thwala bafaladi bao ba se nago mangwalo. Ditekolo tše di swana le tšeo di dirilwego go intasteri ya dilori go kgonthiša gore bengmošomo ba latela dinyakwa tša Molao wa Maemo a Motheo a Thwalo, wa 1997, (Molao wa 75 wa 1997).
1.4.3. Tekolo e utolla gape ditiragalo tša go se obamele Melao ya Bašomi yeo e akaretšago go lefela megolo ya fase, go ntšha tšhelete mo go sego molaong, le magato ao a sego maleba a maphelo le tšhireletšo mo mošomong.
1.5. Sekema sa Kimollo sa Nakwana sa Mongmošomo le Mošomi (TERS)
1.5.1. Kabinete e amogela koketšo ya tekanyetšo ya TERS go tloga go R400 milione go fihla go R2.4 bilione mo ngwageng wo wa ditšhelete.
1.5.2. Koketšo ke karolo ya karabelo ye botse ya mmušo go thuša go boloka mešomo ka go thuša dikhamphani tšeo di ikhwetšago di lego mathateng a ditšhelete ka lebaka la maemo a ekonomi a bothata ka gona wa fokotša go fokotšwa ga bašomi mošomong.
2. Ntwa Kgahlanong le Bosenyi le Bomenetša
2.1. Bosenyi
2.1.1. Kabinete e tshela ka mare dipolao tša batho ba 18 ka Lusikisiki le balekodi ba setšhaba ba tshela ka Qumbu ka Kapa Bohlabela mo methuntšhong ya batho ka bontši.
2.1.2. Kabinete e amogela go thwala ka lebelo ga sehlopha sa ditsebi tša phethagatšo ya molao go nyakišiša ditiragalo tše tša go thuntšha, seo mošomo wa sona o šetšego o na le dipoelo tše dibotse, moo mogonelelwa o tee yo a lebantšhwago thwii le polao ya batho ba 18 ka Lusikisiki a šetšego a tšweletše kgorong ya tsheko.
2.1.3. Kabinete e amogela dikatlego masolo a ditsebi ao a dirilwego mafelong a Verulam le High-Flats ka KwaZulu-Natal. Mo lesolong ka Verulam, maphodisa a hlohlile konokono le mogonelelwa yoo a nyakwago kudu go bontši bja ditlhaselo tša Dikoloi tša go Sepetša Tšhelete ka KwaZulu-Natal. Mogonelelwa o bolailwe mo mothuntšhanong le ka morago ga go thuntšha maphodisa. Gape, bagonelelwa ba babedi mo molatong wa polao ya batho ba šupa ka High-Flats ba bolailwe mothuntšhanong le maphodisa.
2.1.4. Kabinete e hlohleditšwe ke katlego ye e tšwelago pele ya Operation Shanela. Mo bekeng ya go feta, bagonelelwa ba go feta 10 000 ba golegilwe ka melato ya go fapafapana, go swana le go bolaya, go kata, go swara dithunya tšeo di sego molaong, go hlasela dikgwebo batho ba go rekiša diokobatši ka go swara khokheini mo maemakepeng le maemofofaneng a rena.
2.1.5. Kabinete e reta gape lesolo la mohlakanelwa ka Limpopo leo le dirilego gore go utollwe laporotori ya diokobatši ka Lebowakgomo, moo diokobatši tša boleng bja R4 milione di thopilwego gomme bagonelelwa ba bararo ba swarwa.
2.2. Ntwa Kgahlanong le Bomenetša
2.2.1. Kabinete e amogela go swarwa ga balaodibagolo ba feme ya boentšenere ba tshela bao ba latofatšwago ka boradia le bomenetša bja thentara ya lenaneo la Matlafatšo ya Ekonomi ya Bathobaso ya R400 milione mo Eskom le Sasol.
2.3. Dikgaruru tšeo di Hlolwago ke Bong le Dipolao tša Basadi le Bana (GBVF)
2.3.1. Mohlala wo o dirilwego wa go romela kgolegong mokati wa batho ba bantši yo a bonwego molato Nkosinathi Phakathi go maphalelo a 42 ke Kgorokgolotsheko ya Gauteng e romela temošo ye maatla go basenyi ba GBVF gore naga ya rena e ka se swarwe bothopša ke ditiro tša bona tše dimpe.
2.3.2. Kabinete e ipiletša go Maafrika Borwa go bega basenyi ka moka ba bosenyi bja GBVF goba mohuta ofe goba ofe ba dikgaruru kgahlanong le batho bao ba lego kotsing – ngwana, motšofadi goba motho yo a phelago ka bogolofadi – go maphodisa a selegae goba go leletša nomoro ya go se lefelwe ya Thibelo ya Bosenyi ya: 086 00 10111.
3. Taolo
3.1. Mo go phethagatšeng boikgafo bjo bo dirilwego nakong ya Polelo ya Kgetho ya Tekanetšo ya Mopresidente bja go šoma le mebušo ya profense le ya selegae go šogana le ditlhohlo tša kabo ya ditirelo, Mopresidente Ramaphosa o tla eta pele baromiwa ba maloko a palamente go boledišana le Ditonakgolo le Maloko a Dikomitiphethiši tša Diprofense.
3.2. Ketelo ya mathomo e tla ba ya go ya Limpopo ka Labohlano, 1 Dibatsela 2024.
4. Tšhireletšo ya Leago
4.1. Maemo a Boso a Mabe
4.1.1. Kabinete e hlohleleditše Maafrika Borwa go dula ba ntšhitše mahlo dinameng gomme ba latele ditemošo tša boso go tšwa go Ditirelo tša Boso tša Afrika Borwa. Naga e tšwela pele go itemogela maemo a boso a mabe go tloga go go wa ga kapoko ga go se tlwaelege, mafula, dipula tša madimo, diphefo tša go senya le maphoto a phišo go ya go dipoelo tša phetogo ya klaemete. Ditemošo tša boso di bolelwa go phatlalala le difala tša bobegaditaba ka moka, go akaretša le ditiši tša radio tša setšhaba.
4.1.2. Kabinete e tla re kgauswanyana ya amogela Peakanyo ya Karabelo ya Taolo ya Masetlapelo ye e Kopantšwego yeo e tla akaretšago kaonafatšo go akaretša go thekga ka ditšhelete go kaonafatša masetlapelo.
4.2. Foramo ya Ditoropong ya Bosetšhaba ya Afrika Borwa ya Mathomo ka Tikologo ya Lefase le Lenaneo la Ditoropong
4.2.1. Dikgoro tša Bodulo bja Batho, le Taolo ya Tirišano le Merero ya Setšo, Netweke ya Ditoropokgolo tša Afrika Borwa le Lenaneo la Bodulo bja Batho la UN (Tikologo ya UN) e swere Foramo ya Ditoropong ya Bosetšhaba ya Afrika Borwa ya Mathomo ka Tikologo ya Lefase le Lenaneo la Ditoropong, le Pholisi ya Ditoropong ya Afrika Borwa. Foramo e kopane le badirišani ba leago ba bohlokwa go šogana le ditlhohlo le dibaka tša taolo tša go hudugela ka lebelo ga batho ditoropong ka Afrika Borwa.
4.2.2. Foramo e gateletše bohlokwa bja peakanyo ya go laola go hudugela ditoropong ka lebelo ka maemo a go arabela ditaetšo tše dingwe tše dikgolo go swana le phetogo ya klaemete, go fetoga fetoga go gobotse le theknolotši.
4.3. Go Bušwa ga Mašaledi a Balwela Tokologo ba Afrika Borwa
4.3.1. Kabinete e amogela go bušwa ga mašaledi a balwela tokologo ba rena bao ba boloketšwego ge ba le dinageng tša ka ntle Zimbabwe le Zambia. Go bušwa ga mašaledi a bona nageng ya Afrika Borwa yeo e lokologilego ya temokrasi ke temogo ke Tlhalošo ya Molaotheo wa Repabliki ya Afrika Borwa wa 1996, woo o re laelago go ‘go fodiša dikarogano tša nako ya go feta le go hlola setšhaba seo se theilwego go maitshwaro a temokrasi, toka ya leago le ditokelo tša batho tša motheo.’
4.3.2. Lenaneo le ke karolo ya Protšeke ya go Buša Mašaledi ao a Lego ka Dinageng tša Ka ntle, yeo maikemišetšo a yona e lego go hlompha digopotšo tša bao ba lwetšego tokologo le toka, le gore mmušo o hlomphe le go boloka bohwa bja bao ba gafilego maphelo a bona gore naga e lokologe.
4.3.3. Afrika Borwa e tla dula e leboga kopano ya boditšhabatšhaba ya dinaga ka moka tšeo di filego balwela tokologo bodulo, thekgo le mafelo a mafelelo a go khutša.
4.4. Dipapadi
4.4.1. Kabinete e ipiletša go Maafrika borwa go bontšha thekgo ya bona go moswaradino wa Mamelodi Sundowns le Bafana Bafana Ronwen Williams, yo a kgethilwego bjalo ka yo mongwe wa baswaradino ba lesome ba bakaone go feta ka moka mo lefaseng mo difokeng tša Ballon d’OR tša Sefoka sa Yachine, ka go kgetha go https://www.lequipe.fr/en/special/selection/ballon-dor-2024/section/the…
4.4.2. Williams ke moraloki wa mathomo wa Afrika Borwa wa go kgethwa Sefokeng sa Yachine mo difokeng tša d’Or. Kgatišo ya bo 68 ya moletlo wa difoka e tla ba gona ka la 28 Diphalane 2024. Go fihla mo, re ka kgetha Williams ka bobedi Seisemane le Sefora.
5. Merero ya Boditšhabatšhaba
5.1. Sephetho sa UNGA go Israele/Palestina
5.1.1. Kabinete e amogela tharollo ya hostori ya UNGA yeo e kgonthišago go thopa Bohlabela bja Jerusalema, Panka ya Bodikela le Gaza bjalo ka moo go sego molaong, gomme e dumeletše go tlošwa go felelela ga bafaladi le mašole a Israele ka botlalo.
5.1.2. Sephetho se ga se bohlokwa fela go molato wa Afrika Borwa mo Kgorotshekong ya Boditšhabatšhaba ya Toka (ICJ) eupša dinaga tšeo di hlabollogago go swana le Spain, Belgium le Japan di kopane le dinaga tše dintši tša Borwa bja lefase go thekga sephetho.
5.2. Leeto la Mošomo go Motsemošate wa Lesotho
5.2.1. Kabinete e lemogile Ketelo ya Mošomo ya Mopresidente Ramaphosa ka Motsemošate wa Lesotho ka Labohlano, 4 Diphalane 2024, ka taleletšo Mohlomphegi Kgoši Letsie III. Nakong ya ketelo, Mopresidente o tsenetše Letšatši la Boikemo la Lesotho le Moketeko wa Ngwagakgolo wa bo 58, a fa gape polelo nakong ya meketeko go hlompha bohwa bja go huma bja Setšhaba sa Basotho.
5.3. Thulano ye e Tšwelago Pele ya Sudan
5.3.1. Kabinete e lemogile go gola ga thulano ka Sudan gomme e ipiletša go batho ka moka ba Sudan go latela ditlhahli tša AU le Taolo ya Boditšhabatšhaba ka ga Tlhabollo go fediša thulano. Afrika Borwa e lokile go aba bokgoni bja yona go thuša mekgatlo, batšeakarolo le bakgathatema ba bangwe go šoma mmogo go hwetša tharollo ya khutšo ya go ya go ile ka Sudan.
B. Ditsebišo go Kabinete
1. Pego ya go Phethwa ga Ditlhakišo tša Mokgwa wa go Phela wa Ditirelo tša Taolokgolo (SMS)
1.1. Kabinete e tsebišitšwe ka tšwelopele ka go phethwa Dikutollo tša elektroniki ka maloko a SMS gomme ya leboga tšwelopele ye e akaretšago go obamela ka botlalo ka 147 godimo ga palomoka ya 160 ya dikgoro tša bosetšhaba le diprofense, gomme ya lemoga dinyakišišo tšeo di tšwelago pele go maloko ao a sa obamelego molao.
1.2. Kabinete e hlohleletša Kgoro ya Ditirelo tša Setšhaba le Taolo go naganišiša ka go phaelota katološo ya lenaneo la Kutollo ya elektroniki go mebasepala.
2. Pego ka ga go Hlongwa ga Rejistara ya Gare ya Taolo go Phatlalala le Dikarolo tše Tharo tša Mmušo
2.1. Kabinete e amogetše tsebišo ka ga tšwelopele ka go hlongwa ga Rejistara ya Gare ya Taolo go phatlalala le dikarolo tše tharo tša mmušo gomme e thekga kakanyo ya go kopanya Rejistara ya Gare ya Taolo le lenaneo la PERSAL la mmušo le lenaneo la go lefela bašomi ba mebušo ya selegae, go ba le kgokagano le go kalatšwa ga bahlankedi bao ba amegago, bao ba tlogetšego mošomo le bao ba rakilwego mošomong.
C. Diphetho tša Kabinete
Melaokakanywa
1. Molaokakanywa wa Khamphani ya Petroleamo ya Bosetšhaba ya Afrika Borwa wo o Akantšwego (SANPC)
1.1. Kabinete e dumeletše go tlišwa ga Molaokakanywa wa SANPC wa 2024 Palamenteng. Molaokakanywa o aba go hlongwa ga khamphani ya mmušo, e tšweletša mohola go sephetho sa Kabinete sa 10 Phupu 2020 go kopanya PetroSA, Khampani ya Tlhabollo ya Gase ya Afrika Borwa (iGas) le Peakanyo ya Mokgatlo wa Thušo ya Petrole.
1.2. Bokgoni bja go hlwekiša bja gae ka Afrika Borwa e swara ka bophara ke Dikhamphani tša Oli tša Boditšhabatšhaba (di-IOC), yeo e hlolago tšhireletšo ya petrole ya diela ka ge di-IOC di tswalela difeme. Molaokakanywa wo o akantšwego o bea SANPC bjalo ka mothekgi wa bosetšhaba wo a tla swarago ditokelo tša tekolo ya oli le gase ka boyona le go swara dišere ka mokgwa wa mmušo wa go swara ditokelo tše di swerwego tša praebete.
2. Kakanyo ya Molaokakanywa wa Ditšweletšwa tša Petroleamo wa 2024
2.1. Kabinete e dumeletše phatlalatšo ya Molaokakanywa ya Ditšweletšwa tša Petroleamo gore setšhaba se swayeswaye. Nepo ya Molaokakanywa wo ke go kgonthiša tšhireletšo ya ditšweletšwa tša petroleamo le ka tatelano tlhabollo ya lekala la ditšweletšwa tša petroleamo, go akaretša tsebagatšo ya ditšweletšwa tša sebjalebjale tša go hlweka le dikarolo tša go mpshafatšwa tšeo di tla kaonafatšago methopo ya go fapafapana ya enetši.
2.2. Molaokakanywa o tla thekga dilo tše bohlokwa tša mmušo go phetogo ya ekonomi le tlholo ya mešomo mo taolong ya lekala la ditšweletšwa tša petroleamo la Afrika Borwa gape o tla šogana le matshwenyego a mmalwa ao a tšweleditšwego malebana le taolo ya Molao wa Ditšweletšwa tša Petroleamo, wa 1997 (Molao wa 120 wa 1997).
3. Molaokakanywa wo o Mpshafaditšwego wa Tšhireletšo le Maphelo a Meepo
3.1. Kabinete e dumeletše go tlišwa ga kakanywa ya Molaokakanywa wo o Mpshafaditšwego wa Tšhireletšo le Maphelo a Meepo Palamenteng.
3.2. Molaokakanywa wo o akantšwego o nyaka go mpshafatša Molao wa Tšhireletšo le Maphelo a Meepo, wa 1996 (Molao wa 29 wa 1996) ka go mpshafatša ditshepedišo tša taolo, go matlafatša dinyakwa tša phethagatšo, go matlafatša bosenyi le dikotlo, le go mpshafatša dikotlo tše di itšego.
3.3. Molaokakanywa wo o akantšwego, gare ga tše dingwe, o kgonthiša gore maemo a maphelo le tšhireletšo a phethagatšwa ka tshwanelo, a dirišwa le go kaonafatšwa meepong, ka gona a fokotša mahu, dikgobalo le malwetši a mošomong.
D. Bao ba Thwetšwego Mešomong
Batho ka moka bao ba thwetšwego mešomong mangwalo a bona a dithuto a tla tiišetšwa le go netefatšwa ka maleba.
1. Morena Nkululeko Lwazi Mahlangu bjalo ka Motlatšamolaodimogolo-pharephare: Taolo, Dikotsi le Phethagatšo mo Kgorong ya Mešomo ya Setšhaba le Infrastraktšha.
2. Go thwalwa ga maloko go boto ya Mokgatlo wa Kgoboketšo ya Meetse a Limpopo-Olifants:
(a) Moathebokate Thato Goodness Moeeng (Modulasetulo);
(b) Morena Nandha Govender (Motlatšamodulasetulo);
(c) Morena Francois Joubert;
(d) Mohumagadi Phathutshedzo Mudzanani;
(e) Ngaka Vhahangwele Bologo Akwinekomi;
(f) Morena Nkhangweni Lawrence Rambau;
(g) Morena Dikgole Timothy Seroka;
(h) Moathebokate Reinette Mary Rosey; le
(i) Moathebokate Elanie Broekman.
E. Ditiragalo tše di Tlago
1. Kgwedi ya Dinamelwa
1.1. Ngwaga wo ke matswalo a bo 19 a Kgwedi ya Dinamelwa ya Diphalane ka fase ga morero: “Go dira tše dintši mmogo”. Moletlo o tla nepiša go bontšheng infrastraktšha le tšwelopele dikaonafalo tšeo di tšwelago pele mo ditirelong tša setšhaba ka tirišano le bakgathatema ka moka.
1.2. Tšwelopele ye kgolo e dirilwe mo tikologong ya dikepe go tloga mola go hlongwago Phapoši ya Ntwa ya Transnet, ka phethagatšo ya tsela ya sekepe le diphethagatšo tša maemakepe.
1.3. Mmušo o tla bontšha gape diprotšeke tša kago ya ditsela tše bohlokwa, go akaretša dimpshafatšo tša N2/N3 ka KwaZulu-Natal le Tsela ya Moloto, yeo e kgokaganyago diprofense tša Gauteng, Mpumalanga le Limpopo.
1.4. Mokgatlo wa Ditimela tša Banamedi wa Afrika Borwa le wona o dirile tšwelopele ye kgolo ka go bula ditsela tše bohlokwa go akaretša Tsela ya Germiston-Katlehong-Kwesine, yeo e lego karolong ya tekolo, le Tsela ya Gare ya Motsekapa, yeo e beakanyeditšwego go phethwa mafelelong a ngwaga wa ditšhelete.
2. Kgwedi ya Tlhabollo ya Leago
2.1. Diphalane ke gape Kgwedi ya Tlhabollo ya Leago gomme mmušo o ikemišeditše go hlola temošo ya Potfolio ya Ditirelo tša Kgoro ya Tlhabollo ya Leago.
2.2. Mo kgweding, go tla ba le diketelo tša setšhaba go dikarolo tša go fapafapana go phatlalala le naga go kgokaganya ditšhaba le ditirelo tša leago, mananeo a kaonafatšo le go thoma dipoledišano tša setšhaba, mananeo a peakanyo le thekgo go kaonafatša boleng bja bophelo bja ditšhaba tšeo di amegilego.
3. Khonferense ya Ngwaga le Ngwaga ya Dikanegelo ka Histori ya Setšhaba
3.1. Afrika Borwa e swara Khonferense ya Ngwaga le Ngwaga ya Dikanegelo ka Histori ya Setšhaba go tloga ka la 7 go fihla ka la 11 Diphalane ka Ulundi, KwaZulu-Natal.
3.2. Mo khonferenseng ya ngwaga wo, šedi ya go ikgetha e tla fiwa go dikarolo tša segopotšo sa setšhaba tšeo di sa ngwalwago, go bolokwa le go šireletšwa mo bolotadingwalweng bja setšhaba le bja diprofense.
4. Kgwedi ya Temogo ya Maphelo a Monagano
4.1. Diphalane ke Kgwedi ya Temogo ya Maphelo a Monagano, yeo maikemišetšo a yona e lego go ruta setšhaba ka maphelo a monagano le go ba hlohleletša go hlokomela maphelo a monagano. Re hlohleletša Maafrika Borwa go nyaka thušo le thekgo le go hlompha bao ba tshwenywago ke malwetši a monagano.
5. Samiti ya Brazil, Russia, India, China le Afrika Borwa (BRICS)
5.1. Mopresidente Ramaphosa o tla tsenela Samiti ya BRICS ya 2024 ka Kazan, ka Russia go tloga ka la 22 go fihla ka la 24 Diphalane 2024.
5.2. Samiti ya bo 16 ka fase ga morero: “Go Matlafatša Dikamano tša Toka go Tlhabolla le go Šireletša Lefase”, go tla bolelwa ka ditaba tša kgwebo, ditaba tša dipolotiki tša lefase le go hlabolla tirišano gare ga maloko a dinaga.
6. Letšatši la Tokologo la Bobegaditaba
6.1. Ka Mokibelo, 19 Diphalane 2024, Afrika Borwa e tla lemoga Letšatši la Tokologo ya Bobegaditaba go swaya ditiragalo tša la 19 Diphalane 1977 (Laboraro le Leso) leo le ileditšego mekgatlo ya Mekgatlo ya Temogo ya Bathobaso ye 19 le dikuranta tše pedi. Afrika Borwa ya temokrasi e dirile tšwelopele ye kgolo go kaonafatša tokologo ya boraditaba le tokologo ya go ihlagiša. Tokelo ya tokologo ya go ihlagiša e ngwadilwe ka Molaotheo wa Afrika Borwa
7. Imbizo ya Mopresidente ya Mmotlolo wa Tlhabollo ya Dilete (DDM)
7.1. Mopresidente Ramaphosa o tla eta pele Imbizo ya Mopresidente ya DDM go ya Umgababa mo Mmasepalengmogolo wa eThekwini ka Kwa-Zulu-Natal ka Labohlano, 8 Dibatsela 2024.
7.2. Kabinete e ipiletša go badudi ba Umgababa le dikarolo tša kgauswi le yona go ba gona imbizong le go bolela le baemedi ba bona ba setšhaba ka ditharollo tša ditlhohlo mo ditšhabeng tša tšona, le go hwetša mekgwa ya go kaonafatša kabo ya ditirelo.
8. Ditlhahlobo tša Setifikeiti sa Godimo sa Setšhaba (NSC)
8.1. Kabinete e lakaletša Mphato wa 2024 tše dibotse ka go thoma ga ditlhahlobo tša bona tša marematlou ka la 21 Diphalane 2024, gomme e ipiletša go batswadi le bahlokomedi go thekga barutwana nakong ye ye boima ya leeto la bona la thuto.
8.2. NSC e dula e na le mohola, gomme e bula dikgetho tše mmalwa tša go kgahliša go baswa ba rena.
G. Melaetša
1. Ditebogišo
Kabinete e lebogiša le go lakaletša tše dibotse go:
• Sehlopha sa Molao sa Afrika Borwa mo ICJ ka go abelwa Sefoka sa Bone sa Steve Biko/Frantz Fanon sa Tokologo ya Saekolotši. Sefoka ke sa mošomo wa bona go thekga Tumelelano ya Thibelo le Kotlo ya Bosenyi bja Dipolao tša Gaza. Maloko a sehlopha ke:
John Dugard SC; Adila Hassim SC; Tembeka Ngcukaitobi SC; Blinne Ní Ghrálaigh KC, Max du Plessis SC, Vaughan Lowe KC, Tshidiso Ramogale, Sarah Pudifin-Jones le Lerato Zikalala.
• Diprofesa Salim Abdool Karim le Quarraisha Abdool, ka go thopa Sefoka se bohlokwa sa Lasker sa tirelo ya setšhaba go lemoga nyakišišo ya bona ye mpsha ya go boloka maphelo ya HIV.
Relebogile Maloma, morutwana yo bogale wa Kreiti ya boraro yo a dirago khemoterapi le morutiši wa gagwe, Mohumagadi Nqobile Mbatha, go amogela ka kopanelo Sefoka sa Tona sa go Ikgetha sa #MyTeacher ka kanegelo ya bona ya go hlohleletša. Le ge a be a lwantšhana le kankere, Relebogile, mmogo le thekgo ye e sa šikinyegego ya Mohumagadi Mbatha, o kgonne go tšwetša mošomo wa gagwe wa sekolo pele ge a le bookelong. Mohumagadi Mbatha o kgonthišitše gore Relebogile ga a šalele morago, a mo thuša go dula a kgokagane le dithutwana tša gagwe le barutwana ka yena. Ka maitapišo a gagwe a go makatša, Relebogile ga se a ba sebakeng se tee le bona, eupša o šomile gabotse go feta, a fetša ka go ba moithuti wa godimo go ba lesome ka phapošing – tše ka moka a di dira malaong a gagwe a bookelo. Kanegelo ya bona ke bohlatse bjo maatla bja khuetšo ya phetogo ya go kwelobohloko le boikgafo mo go ruteng, le go fetogafetoga ga moya wa botho.
• Mohumagadi Melisa Carol Du Plessis (Bokgoni bja go Ruta Kreiti ya R R);
• Mohumagadi Bonisiwe Happiness Maphumulo (Bokgoni bja go Ruta Sekolong sa Praemari);
• Mohumagadi Nthabiseng Mavis Mateba (Bokgoni bja go Ruta Mabokgoni a Bophelo, Kreiti ya 1-6);
• Mohumagadi Koliwe Doris Mbatha (Bokgoni bja Boetapele Sekolong sa Praemari);
• Morena Thapelo Jacob Mthimkhulu (Bokgoni bja go Ruta Sekolong sa Sekontari);
• Mohumagadi Rose Martha De Jonker (Bokgoni bja Boetapele Sekolong sa Sekontari);
• Morena Tiisetso Daniel Chaka (Bokgoni bja go Ruta Dinyakwa tša go Ikgetha);
• Morena Mbongiseni Cyril Dlamini (Bokgoni bja Boetapele go Dinyakwa tša go Ikgetha),
• Morena Itumeleng Esau Jr Komane (Bokgoni ka go Ruta le go Ithuta Theknolotši ye e Kaonafaditšwego);
• Mohumagadi Maserole Mojela (Bokgoni bja go Ruta Disaense tša Tlhago);
• Mohumagadi Motlatso Lucia Maake (Bokgoni bja go Ruta Fisika);
• Morena Ethon Alexander (Bokgono bja go Ruta Mmetse. GET);
• Morena Sithembiso Eugene Mahlalela (Bokgoni bja go ruta Mmetse, FET);
• Morena Derek Swart (Sefoka sa Bophelo ka Moka sa Kader Asmal); le
• Mohumagadi Ntombozuko Mkizwana (Sefoka sa Morutiši o Mokaone wa Bosetšhaba).
• Springboks, sehlopha sa rena sa rugby, ka go thopa ga bona go maatla kgahlanong le Argentina le go rwešwa korone ya Dinkgwete tša Rugby tša 2024.
• Sehlopha sa Kgwele ya Maoto sa Banna ba Mengwaga ya ka Fase ga 20, seo se tsebegago ka Amajita, ka go rwešwa korone ya TotalEnergies CAF ya ba ka Fase ga 20 ya Dinkgwete tša Africa Cup of Nations, le go ba le maswanedi a phadišano ya 2025 U-20 Africa Cup of Nations.
• Papadi ya Difatanaga ya Afrika Borwa, go hwetša Bonkgwete bjo boswa bja tiragalo ya Lefase ya Rally-Raid (W2RC), yeo e tla diregago ka Afrika Borwa ka 2025.
• Zoalize Jansen van Rensburg, ka go rweša korone ya Mohumagatšana wa Lefase wa Afrika Borwa wa 2024. Zoalize o na le mengwaga ye 18 gomme o tla emela naga mo Phadišanong ya Bomasebotsana bja Lefase bja bo 72 ka Dibokwane 2025.
• Bathopasefoka ba magoro a go fapana a tlhomamišo ya SAICA ya Afrika Borwa go Difoka tša Australia. Sefoka sa CEO se ile go Manana Johnson ka mohlala wa gagwe wa meleng ya go fapafapana mo dikarolong tša kago ya setšhaba, Ubuntu, khuetšo ya leago le go akaretša baswa.
2. Matshidiso
• Kabinete e iša matshidiso go Mmušo le batho ba Democratic Republic of Congo ka morago ga masetlapelo a kotsi ya sekepe sa Lake Kivu ka Mokibelo, 5 Diphalane, seo se bolailego batho.
Kabinete e iša matshidiso go bagwera le malapa a:
• Motsebalegi Pastor Ray McCauley, mothomi wa Rhema Bible Church le Modulasetulommogo wa maloba wa Khansele ya Ditumelontši tša Setšhaba tša Afrika Borwa.
• Moahlodi wa Maloba Willem Heath – yo e bilego modulasetulo wa Khomišene ya Dinyakišišo ya Heath ya bomenetša, boradia le taolompe ka Kapa Bohlabela, gape e bile hlogo ya Lekala la Dinyakišišo la go Ikgetha go tloga ka 1997 go fihla ka 2001.
• Naletšana ya Mmino wa Sedumedi Solomon Molokoane, yoo a tsebegago kudu ka leina la sefaleng la ‘Solly Moholo’, yoo a re filego hlohleletšo, pholo le boithabišo ka mmino wa gagwe.
• Siphiwe ‘General GTZ’ Sibisi, yo e bego e le leloko le le šetšego la sehlopha sa Kwaito sa Chiskop, seo se ralokilego karolo ya bohlokwa go hlabolleng mmino wa Kwaito ka mo nageng.
3. Tsebišo ya Setšhaba
a. Kabinete e ipiletša go batho ka moka go šomiša meetse ka tsheketšo ka ge Afrika Borwa e dula e le naga ya go hloka meetse gomme gonabjale re itemogela tlhokego ya meetse. Kudu, re hlohleletša badudi ba Gauteng le KwaZulu-Natal, moo legato la pele le legato la bobedi la kiletšo ya meetse le dirišwago, go latela dikiletšo tše di beilwego.
b. Meetse ke bophelo, a šomiše ka maikarabelo.
E lokolotšwe ke: Dikgokagano tša Mmušo le Lenaneo la Tshedimošo (GCIS)
Dipotšišo: Mohumagadi Nomonde Mnukwa – Seboleledi sa Motšwaoswere sa Mmušo
Selefouno: 083 653 7485
