A. Ditaba tšeo di amago badudi
1. Ekonomi
1.1. Mararankodi a Ditimela tša Merwalo a Bosetšhaba
1.1.1. Kabinete e amogetše tsebišo ka Molaodi wa Infrastraktšha ya Ditimela tša Transnet (karolo ya Transnet) ya Dikhamphani tše diswa tša go Sepetša Ditimela (di-TOC). Tlhabollo ye ye kgolo ka go Leano la Borwalathoto le Taolo ya Borwalathoto gape le phethagatšo ya Pholisi ya Ditimela ya Afrika Borwa, ke seka sa kgatelopele ye kgolo ka go tšweletšopele ya diphetošo tša sebopego se se hlathilwego tšeo di lego bohlokwa ge go etla go bulelweng ga tlhabollo ya ekonomi.
1.1.2. Go fihlelelwa ga mararankodi a diporo tša ditimela ke batho ba bangwe ntle le bao ba a šomišago ka mehla go tla kaonafatša tšhomišo ya mararankodi a gomme seo sa oketša go šoma gabotse ga ditimela; go fokotša ditshenyagalelo tša go šomiša diporo ka go akaretša badiriši ba bangwe gape ba diporo; go oketša letseno leo le tlo thušago ka dipeeletšo tša tlhokomelo le go fetolela sebjalebjaleng ga mararankodi a diporo; le go fokotša ditshenyagalelo tše dingwe tša go rwalwa ga merwalo ka ditimela, gape le go kaonafatša phenkgišano lekaleng la ditimela.
1.1.3. Dikabo tša mathomo, go palomoka ya ditsela tše 41 tša ditimela le dikgorwana tše tshela, di ka mo go latelago:
(a) Kgorwana ya Leboa: batseni ba baswa ba tshela, ditsela tše 15 tša diporo tša go sepetša malahla le khroumo.
(b) Kgorwana ya Tšhipi: motseni yo tee yo moswa, tsela ye tee ya seporo sa go sepetša morwalo wa tšhipi.
(c) Kgorwana ya Kapa: batseni ba babedi ba baswa, ditsela tše pedi tša diporo tša go sepetša mankanese.
(d) Kgorwana ya Leboa Bohlabela: batseni ba tshela ba baswa, ditsela tše 16 tša diporo tša tshepetšo ya malahla, khroumo, maknethaete, makhura a dinamelwa, dikhontheina.
(e) Kgorwana ya Gare: motseni yo tee yo moswa, ditsela tše pedi tša diporo tša go sepetša malahla, dikhontheina (mankanese).
(f) Kgorwana ya Dikhontheina: batseni ba bane ba baswa, ditsela tše hlano tša diporo tša go sepetša dikhontheina, malahla le swikiri.
1.1.4 Molaodi wa Infrastraktšha ya Ditimela a Transnet (TRIM) o akanya gore Dikhamphani tše diswa tša Go Sepetša Ditimela (di-TOC) di tla rwala merwalo ya ditone tša dimilione tše 20 tša tlaleletšo ngwaga ka ngwaga go tloga ka ngwaga wa ditšhelete wa 2026/27. Se se tla oketša palo ya merwalo yeo e ukangwago ke Thwalo ya Merwalo ka Ditimela ya Transnet (TFR) gomme ya tšea karolo nepong ya Mmušo ya go oketša merwalo yeo e rwalwago ka ditimela go fihla go ditone tše dimilione tše 250 ka ngwaga pele ngwaga wa 2029 o fela.
1.1.5 Taba ye ke karolo ya kgatelopele yeo Transnet e e fihlelelago gore e be kgwebo yeo e šomago gabotse ebile e sepelago le mabaka.
1.2 Peeletšo ye Mpsha ya Meepo
1.2.1 Kabinete e amogetše go bulwa ga protšeke ya Qala Shallows ka ba West Wits Mining Ltd mo Witwatersrand Basin ka peeletšo ya $90 milione. Wo ke moepo wa mathomo wa ka tlase ga mmu wa gauta ka Afrika Borwa mo mengwageng e 15. Peeletšo ye ke seka sa tshepo ye mpsha ya kgonagalo ya diprotšeke tše mpsha tša gauta gomme e buša tshepo ya gore Afrika Borwa ke naga yeo e ka kgethwago ge go etla peeletšong ya tša meepo. Ka mošomo woo o beetšwego go tlo thoma ka 2026, ekonomi ya Afrika Borwa e tla thušega kudu ka mešomo ye meswa, tlhabollo ya mabokgoni, le tlhabollo ya ekonomi.
1.3 Matlafatšo ya Basadi Ekonoming
1.1.3 Kabinete e amogetše tirišano ya peakanyo ya lekala la setšhaba le la praebete magareng ga Kgoro ya Basadi, Baswa le Bagolofadi le Standard Bank of South Africa.. Tirišano ye e tla tšwetšapele matlafatšo ya basadi gomme e akaretša le peeletšo ya US$10 milione go Sekhwama sa Khuetšo ya Basadi ba Afrika.
1.1.4 Sekhwama sa Khuetšo ya Basadi ba Afrika se tla thekga basadi bao e lego balaodi ba dikhwama bao ba nago le dikgwebo ka Afrika ka nepo ya go šogana le sekgoba seo se lego gona sa thekgo ya mašeleng yeo e hlaelago ka US$42 bilione yeo basadi ba go ba le dikgwebo ba itemogelago yona ka kontinenteng ya Afrika.
B. Diphetho tša Kabinete
1. Go Swarwa ga Sebjana sa Lefase sa Khrikhethe sa ICC sa 2027
1.1. Kabinete e amogetše tsebišo mabapi le sephetho sa Lekgotla la Boditšhabatšhaba la Khrikhethe (ICC) go fa Afrika Borwa ditokelo tša go swara Sebjana sa Lefase sa Khrikhethe ka 2027. Ye ke kgonthišo ye nngwe ya Afrika Borwa maemong a boditšhabatšhaba bjalo ka naga yeo e lego monggae gape ebile e le legae la dipapadi le boithabišo.
1.2. Afrika Borwa e na le histori ya go kgahliša kudu ya go swara ditiragalo tša dipapadi tša lefase tša katlefo, gomme e kile ya swara dipapadi tša sebjana sa lefase sa kgwele ya maoto tša mathomothomo mobung wa Afrika ka 2010, gape le Sebjana sa Lefase sa Khrikhethe ka 2001. Ditiragalo tše tša dipapadi di bile bohlokwa kudu go diprotšeke tše kgolo kudu tša tlhabollo ya infrastraktšha ka mo nageng.
1.3. Bjale ka peleng, ditokišetšo tša Sebjana sa Lefase sa Khrikhethe sa 2027 di tla kgatha tema tlhabollong ya ekonomi ya naga ka kaonafatšo ya infrastraktšha le kgolo ya boeti.
2. Maiteko a Afrika Borwa a go Swara Diphadišano tša Formula One Grand Prix ka Kyalami go tloga ka 2027
2.1. Kabinete e dumeletše kgopelo ya Maiteko a go swara diphadišano tša Formula One Grand Prix ka Kyalami mengwaga ya go lekana e meraro go tloga ka 2027.
2.2. Maiteko a a thekgilwe ka ditšhelete ke lekala la praebete la go tshepega gomme ge a ka atlega a tla tliša tlholo ya mešomo le tlhabollo ya ekonomi.
2.3. Go no fiwa sebaka fela sa go iteka go swara diphadišano tša maemo a godimo tša Formula One Grand Prix ke bohlatse bja go laetša Afrika Borwa bjalo ka motšeakarolo yo bohlokwa lefaseng gape le go ba le tshepo go naga ye.
3. Tlhako ya Pholisi ya Ditirelo tša Tlhabollo ya Thekgo ya Dikgwebo le Dikgwebo tše Diswa (IBDS)
3.1. Kabinete e dumeletše go phatlalatšwa ga Tlhako ya Pholisi ya IBDS gore setšhaba se fane ka ditshwayatshwayo ka yona. Yona e etilwe pele ke Kgoro ya Tlhabollo ya Dikgwebopotlana gore e tle ka diphetošo tša peomelao bakeng sa lefase la dikgwebopotlana ka go hlaloša ka botlalo dikarolo tšeo batšeakarolo ba go fapafapana ba di bapalago gape le go tšweletšapele maitekelo ao a kgokaganego.
3.2. Se se bopa karolo ya Leanolegolo leo le Kopantšwego la Bosetšhaba la Tlhabollo ya Dikgwebopotlana, leo le šomago bjalo ka tlhako ya mošupatsela bakeng sa batšeakarolo ka moka bao ba kgathago tema ka go potlakišeng kgolo ya Dikgwebo tše Nnyane le tša Magareng (di-MSME) ka mananeo, ditšweletšwa le ditirelo tšeo di bonalago. Dinepo tše bohlokwa tša se di akaretša go kaonafatša boleng le maemo a ditirelo tša tlhabollo ya dikgwebo, go netefatša gore thekgo e fihlelelega bokaone bakeng sa di-MSME, kudu ka metsesetoropong le metsemagaeng, gape le go hlohleletša boithomelo le le go ba le kgwebo.
3.3. Tlhako ye e bea botlhahli le thekgo ya dikgwebo tše diswa gare ga tlhabollo le thekgo ya di-MSME bakeng sa dikgwebopotlana. Dithekgo tša dikgwebo tše diswa di bapala karolo ye bohlokwa ka go kaonafatšeng kgolo ya dikgwebo tšeo di sa thomago ka go di fa thekgo ya go lebana kgwebo thwii go ya ka mohuta wa yona, didirišwa le tikologo ya go šomela ya maleba gore kgwebo e swarelele lebaka le letelele.
4. Leano la Thwalo ya Merwalo ka Difofane la Afrika Borwa
4.1. Kabinete e dumeletše go phatlalatšwa ga sethalwa sa Leano la Thwalo ya Merwalo ka Difofane la Afrika Borwa gore setšhaba se fane ka ditshwayatshwayo ka lona.
4.2. Leano le le nepile go šogana le ditlhohlo tša gonabjale tše bjalo ka dikgorwana tša go sepetša merwalo tšeo di sa kgokaganago gape le mapheko a magolo go tsentšho ya merwalo, gape le go kaonafatša phenkgišano le dikgokagano tša infrastraktšha le mebaraka e mengwe. Godimo ga fao, leano le le tlo hola baromelantle ga naga, baromela ka gare ga naga le dikhamphani tša thwalo ya merwalo ka go tšweletšapele kgolo ya ekonomi le go nolofatša kgwebišano lefaseng ka mararankodi ao a kopantšwego a thwalo ya merwalo ka difofane.
5. Tsenogare ya Mmušo wa Bosetšhaba ka Mmasepaleng wa Selegae wa Ditsobotla
5.1. Kabinete e amogetše tša gonabjale ka maemo a Mmasepala wa Selegae wa Ditsobotla ka Leboa Bodikela.
5.2. Gore dilo di boele sekeng ka mmasepaleng, Kabinete e dumeletše gore Ditsobotla e bewe ka fase ga taolo go ya ka karolo 139(7) ya Molaotheo wa Ripabliki ya Afrika Borwa wa 1996. Tsenogare ye e dirwa go ya le ka Molao wa Taolo ya Ditšhelete tša Mebasepala wa 2003.
5.3. Leano la Tsošološo le tla hlongwa ka fase ga boetapele bja Kgoro ya Pušotirišano le Merero ya Setšo le Kgoro ya Matlotlo ya Bosetšhaba. Godimo ga fao, Kgoro ya Pušotirišano le Merero ya Setšo e tla kgokaganya dibopego tša Dikamano tša Gare ga Mebušo go nolofatša tsošološo ya mešomo ya tshepedišo go thuša mmasepala wo go phethagatša taelo ya wona ya theramelao. Sehlophatšhomo sa Tšhomišano ka tša Tshepedišo se tla bea šedi gape go mediro ya bosenyi yeo e dikologilego mmasepala.
C. Melaokakanywa
1. Molaokakanywa wo o Mpshafaditšwego wa Institute ya Thuto ya tša Boahlodi ya Afrika Borwa (SAJEI)
1.1. Kabinete e dumeletše go išwa ga Molaokakanywa wa SAJEI Palamenteng gore o lebelelwe go ya pele. Maikemišetšomagolo a Molaokakanywa wo ke go fetoša Molao wa SAJEI wa gonabjale wa 2008 gore go fihlelelwe peakanyoleswa ye e hlokegago ya mokgwatšhomo wa gonabjale wa pušo ya Institute se.
1.2. Molao wo o hlomile Institute yeo gore e fane ka thuto le tlhahlo go bahlankedi ba boahlodi gore go tšweletšwepele boikemo, go se tšee lehlakore le go šoma ka go phethagala ga dikgorotsheko. Peakanyoleswa ye e letetšwego e akaretša go thwalwa ga Dini le tlhalošo ye e hlakilego ya go thwalwa ga, gape le mešomo ya, Molaodi wa Institute.
2. Molaokakanywa wa Dilaesense tša Dikgwebo wa 2025
2.1. Kabinete e tšeetše hlogong le go dumelela go phatlalatšwa ga Molaokakanywa wa Dilaesense tša Dikgwebo gore setšhaba se fane ka ditshwayatshwayo ka wona.
2.2. Nepo ya Molaokakanywa wo ke go fetoša Molao wa Dikgwebo wa 1991, gomme diphetošo di nyaka go hloma tlhako ya sebjalebjale ebile ye e šomago ka go phethagala ya go fa dikgwebo dilaesense, yeo e tšweletšago pele kgolo ya ekonomi le go šoma gabotse ga peomelao, mmogo le go šireletša kgathotema ya Maafrika Borwa ka lekaleng leo e sego la semmušo.
D. Bao ba Thwetšwego Mešomomong
Batho ka moka bao ba thwetšwego mešomong mangwalo a bona a thuto a tla kgonthišišwa le go tiišeletšwa ka mekgwa ya maleba.
1. Morena Burton Vincent Cambell bjale ka Motlatšamolaodipharephare wa Tlhabollo ya Boitapološo le Tšweletšopele ya Dipapadi ka Kgorong ya Dipapadi, Bokgabo le Setšo.
2. Mohumagadi Lorraine Naidoo bjale ka Hlogophethiši ya Taolo ya Boabaditirelo le Dithoto ka Kgorong ya Mešomo le Infrastraktšha ya Setšhaba.
3. Morena Dennis Mqadi bjale ka CEO ya Taolo ya Tšhireletšo ya Diphedi tša ka Meetseng ya Afrika Borwa.
4. Morena Shonisani Munzhedzi (go oketšwa ga kontraka) bjale ka Mohlankediphethiši wa Institute ya Bosetšhaba ya Diphedi tša go Fapafapana ya Afrika Borwa (SANBI).
5. Balaodiphethiši ba Selete ba Lekala la Tšhireletšo ya Leago la Afrika Borwa (SASSA)
a. Mohumagadi Mmapula Constance Pheeha (Limpopo)
b. Mohumagadi Karabelo Ellie Mojanaga (Kapa Leboa)
c. Mohumagadi Nkele Ntlhe (Freistata)
6. Balaodibagolo bao e sego Malokophethiši a Boto ya Koporase ya Dipeeletšo tša Setšhaba (PIC) (Khamphani ya Mmušo)
a. Mohumagadi Dorothy Kobe;
b. Morena Stephen Boikanyo;
c. Mohumagadi Rethabile Nkosi;
d. Morena Mpumelelo Maseko;
e. Ngaka Mugwena Maluleke (Moemedi wa SADTU ebile a thwalwa leboelela);
f. Mohumagadi Lindiwe Motshwane (Moemedi wa SADTU );
g. Morena Matimba Shiburi (Moemedi wa PSA);
h. Mohumagadi Lerato Makwetla (Moemedi wa GEPF);
i. Mohumagadi Nosiphiwo Balfour (Moemedi wa GEPF); le
j. Mohumagadi Lindy Bodewig (Moemedi wa Kgoro ya Matlotlo ya Bosetšhaba).
7. Balaodibagolo bao e sego Malokophethiši a Boto ya Panka ya Tlhabollo ya Naga le Temo (Land Bank)
a. Profesa Johann Frederick Kirsten (o thwetšwe leboelela);
b. Mohumagadi Egashnee Pillay (o thwetšwe leboelela);
c. Morena Mabotha Arthur Moloto;
d. Mohumagadi Phumzile Hazel Maseko;
e. Mohumagadi Simthandile Ford;
f. Mohumagadi TF Matlala;
g. Morena Mcebisi Skwatsha; le
h. Mohumagadi Xikongomelo Maluleke.
8. Maloko a Boto ya Productivity South Africa (Productivity SA):
a. Mohumagadi Zola Baba Tshefu (Modulasetulo);
b. Mohumagadi Beverly Jack (Moemedi wa Dikgwebo tše di Beakantšwego);
c. Morena Gilly Dlamini (Moemedi wa Dikgwebo tše di Beakantšwego);
d. Morena Godfrey M. Selematsela (Moemedi wa Dikgwebo tše di Beakantšwego);
e. Morena Thabo Mmoneri (Moemedi wa Dikgwebo tše di Beakantšwego);
f. Mohumagadi Sinah M.R. Mosehla (Moemedi wa DTIC); le
g. Mohumagadi Nolukholo F. N. Sigaba (Moemedi wa DEL).
E. Ditsebišo tša Kabinete
1. Legato la Bobedi (2) la Protšeke ya Meetse ya Lesotho Highlands
1.1. Kabinete e amogetše tsebišo ka ga kgatelopele yeo e lego gona ya phethagatšo ya Legato la Bobedi la Protšeke ya Meetse ya Lesotho Highlands. Protšeke ye, ge e se no phethwa, e tlo netefatša gore go ba le tšhireletšo ya meetse Profenseng ya Gauteng.
1.2. Go phethwa ga protšeke ye go beetšwe gore go diragale mafelelong a 2029, ka kgatelopele ya go agwa ga bobedi Letamo la Polihali le Thanele ya Phetišetšo ya Polihali-Katse.
1.3. Go thoma go tšwa ga meetse ka letamong go letetšwe go thoma ka 2028 go kgontšha Kgoro ya Meetse le Kelelatšhila go dumelela Rand Water go thoma go goga meetse a mantši go tšwa Nokeng ya Vaal go a abela mebasepala ya Gauteng pele ngwaga wa 2028 o fela.
2. G20
2.1. Kabinete e amogetše tsebišo mabapi le dipeakanyo tša G20 le go amogela go tsebagatšwa ga Sehlophatšhomo sa Nakwana sa Ditsebi sa G20 ka Mopresidente Cyril Ramaphosa. Sehlophatšhomo sa Nakwana sa Ditsebi sa G20 se tla lekola go se lekalekane ga matlotlo a lefase le seabe sa gona go kgolo ya ekonomi, bohloki le ditumelelano tša lefase. Lesolo le, leo e lego la mathomo la mohuta wa lona la G20, le sepelelana le boikgafo bja Afrika Borwa bja go šomiša Bopresidente bja G20 go šogana le mathata ao a amago dinaga tša go ba le letseno la fase bjalo ka go se lekalekane moo go golelago pele gape le dikoloto tše ntši. Sehlophatšhomo sa Nakwana sa Ditsebi sa G20 se tla alela baetapele ba lefase ba G20 pego ya mathomothomo ya mabapi le go se lekalekane lefaseng Samiting ya Baetapele ba G20 ka Afrika Borwa ka Dibatsela 2025.
2.2. Samiti ya Baetape ba G20 e gare e a batamela. Afrika Borwa e tšwela pele go swara le go kgokaganya dikopano tša ditokišetšo le go amogelwa ga ditshepišo ka Dihlophatšhomo le dihlophana tša mešongwana ye itšego. Dikopano tše latelago tša ditokišetšo tša Samiti ya G20 di ile tša swarwa mo dibekeng di se kae tše di fetilego:
2.2.1. Kopano ya Botshela ya Sehlophatšhomo sa tša Maphelo e swerwe ka marangrang a inthanete go tloga ka la 1 go fihla ka la 2 Lewedi 2025, gomme yona e be e sekaseka matlafatšo ya mananeo a maphelo lefaseng gape le go itokišetša ditlhohlo tša ka moso.
2.2.2. Kopano ya Boraro ya Sehlophatšhomo sa Nakwana sa Bobedi sa mabapi le Tšhireletšo ya Dijo e swerwe go tloga ka la 1 go fihla ka la 3 Lewedi 2025 go la Egepeta go šogana le dipoelokgolo tša Sehlophatšhomo sa Nakwana sa tša Tshireletšo ya Dijo sa G20 le go sekaseka Setatamente sa Ditona sa mabapi le tšhireletšo ya dijo lefaseng, seo se letetšwego go tlo amogelwa nakong ya Kopano ya Ditona yeo e tlo swarelwago ka Afrika Borwa ka la 19 Lewedi 2025.
3. Kopano ya Ditona ya Dikgwebo tše Nnyane le tša Magareng (di-SME) tša Lefase
3.1. Kabinete e amogetše pego mabapi le kopano ya Ditona ya Lefase ya di-SME yeo e bego e swerwe ka tšhomišano le Senthara ya Boditšhabatšhaba ya Kgwebišano (ITC) le StartUp20 ka Johannesburg go tloga ka la 21 go fihla ka la 24 Mosegamanye 2025. Kopano ye e bile bjalo ka sefala se bohlokwa sa go hloma ditšhomišanommogo le go tla ka lenaneo la tšhomišano leo le nepilego go potlakiša Dikgwebo tše Nnyane le tša Magareng (di-SME) gore di be le bokamoso bjo bo swarelelago, bjo bo akaretšago bohle ebile bo atlegilego.
3.2. Ditshekatsheko di be di le mabapi le dihlogotaba tše bohlokwa tše bjalo ka go kaonafatša phihlelelo ya ditšhelete, go tšweletšapele phetošo ya titšitale le go nolofatša diphetogo tša tšhomišo ya dilo tša tlhago go tšweletša enetši ka lekaleng la di-SME. Tiragalo ye e gokeditše bakgathatema ba 750 go tšwa dinageng tše 66 (Ditona le Batlatšatona ba 52).
4. Dipoelo tša Samiti ya Meetse ya Afrika ya Mathomo yeo e bego e Swaretšwe ka Motsekapa go tloga ka la 13 go fihla ka la 15 Phato 2025
4.1. Kabinete e amogetše tsebišo mabapi le dipoelo tša Samiti ya Meetse ya Afrika ya Mathomo yeo e bego e swaretšwe ka Motsekapa go tloga ka la 13 go fihla ka la 15 Phato 2025, yeo e butšwego semmušo ke Mopresidente Cyril Ramaphosa. Samiti ye, yeo e bego e swerwe ka thekgo ya Samiti ya Kopano ya Afrika le Phanele ya Maemo a Godimo ya tša Dipeeletšo tša Meetse bakeng sa Afrika, e bontšhitše diprotšeke tše 80 tša meetse le kelelatšhila tša go tliša letseno go tšwa dinageng tše 38, go balwa le tše 36 go tšwa ka Afrika Borwa. Poelo ye bohlokwa e bile go tsebagatšwa ga Lekgotla la Tebelelo ya Lefase ka tša Dipeeletšo ka Meetse, e lego lesolo la Dipoelo tša G20 leo le nepilego go phagamiša dipeeletšo ka meetse maemong a boditšhabatšhaba. Samiti ye e kgonne go hwetša ditshepišo tša tšhelete ya go fihla US$12 bilione, yeo e dirago gore go be le kgatelopele ye kgolo yeo e nepilego go tswalela sekgoba se segolo sa dipeeletšo ka meetse sa ngwaga ka ngwaga fao go hlokegago US$30 bilione.
4.2. Samiti ye e sepelelana le dilo tše bohlokwa tša rena tša bosetšhaba bjale ka ge di adilwe ka go MTDP, NDP le Pono ya Meetse ya AU gomme dipoelo tšona di thekga boetapele bja Afrika Borwa go beakanya tšhireletšo ya meetse mo kontinenteng le tlhabollo ya infrastraktšha.ya
5. Kgwedi ya Tirelo ya Setšhaba ye e Kopantšwego (IPSM)
5.1. Kabinete e amogetše tsebišo mabapi le phethagatšo ya lenaneo la Peošedi ya Tirelo ya Setšhaba ye e Kopantšwego la go phatlalala le mmušo ebile la ngwaga ka moka go tloga ka 2025 go fihla ka 2026 leo le tlo tsebagatšwago ka Lewedi 2025 bjalo ka sefala seo se bopaganego gabotse ya go tšweletšapele boprofešenale le go buša tshepo ya setšhaba go mmušo.
5.2. Lenaneo la Tirelo ya Setšhaba ye e Kopantšwego le šoma bjalo ka sefala sa go lemoga le go bontšha bokgoni bja lekala la setšhaba le go rweša dipataka bašomi ba mmušo bao ba šomelago setšhaba ka boikgantšho le bokgoni. Lona le ketekwa ka fase ga moeno wo “Go dira gore Tirelo ya Setšhaba e be ya Seprofešenale le go Buša Tshepo le go Tsošološa Boitshepo go Mmušo”.
5.3. Lenaneo le le ithekgile ka dikokwane tše hlano tša togamaano tšeo di akaretšago go bonagala ga Taolophethiši ka ditšhabeng, go araba mathata ao a tlišwago, boprofešenale le maitshwaro a setho a bašomi ba mmušo, tshepo le go kgatha tema ga badudi.
5.4. Kabinete e thekgile gape le go hlongwa ga Foramo ya Dikamano tša Magareng ga Mebušo yeo e kgokaganyago tšhupamabaka ya ngwaga ka ngwaga ya mešomo ya IPSM gape le go tšweletšapele tšhomišano ya magareng ga mebušo.
F. Ditiragalo tšeo di sa tlago
6. Ketelo ya Mopresidente ka Profenseng ya Leboa Bodikela
6.1. Mopresidente Cyril Ramaphosa le Kabinete ba tla etela ka Profenseng ya Leboa Bodikela ka la 12 Lewedi 2025 ka Rustenburg. Ketelo ye ke karolo ya lesolo la Mopresidente la go matlafatša thekgo go mebušo ya diprofense le go kaonafatša kgokagano ka maitekelo a go bulela kgolo ya ekonomi ya diprofense le go kaonafatša kabo ya ditirelo. Ye ke ketelo ya bohlano ya mohuta wo go Taolophethiši ya Profense.
7. Ketelo ya Tekolo ya Motlatšamopresidente Paul Mashatile ka Kapa Bodikela
7.1. Motlatšapresidente Paul Mashatile o na le ketelo ya tekolo ka Profenseng ya Kapa Bodikela go tloga ka la 04 go fihla ka la 06 Lewedi 2025 ka Seleteng sa Overberg go yo bontšha maitekelo a mmušo a go potlakiša Lenaneo la Peakanyoleswa ya Naga. Motlatšamopresidente o tla eta pele le lesolo la Clean Cities and Towns Motsesetoropong wa Zwelihle ka Mmasepaleng wa Selegae wa Overstrand, bjale ka karolo ya go hlohleletša tikologo ya magaeng le ya setoropong ye e phetšego gabotse ebile e swarelelago.
8. Samiti ya Tebeleloleswa ya Diparola ya Afrika Borwa
8.1. Kgoro ya Ditirelo tša Tshokollo e tla swara Samiti ya Tshekatsheko ya Diparola ya Afrika Borwa ka la 22 le 23 Lewedi 2025 ka Pretoria.
8.2. Samiti ye e tlo swarwa ka Beke ya Ditshokollo yeo e beilego šedi go tema yeo e kgathwago ke kgoro ge go etla tshokollong le go boetšwa setšhabeng ga bagolegwa. Samiti ye e tla kopantšha ditsebi, bašomi le batšeakarolo go sekaseka dikatlego, ditlhohlo le mekgwa ya gonabjale ya lenaneo la diparola.
9. Meketeko ya Bosetšhaba
9.1. Ditiragalo tše di latelago di tla ketekwa mo kgweding ya Lewedi: Kgwedi ya Bohwa, Kgwedi ya Boeti, Letšatši la Segopotšo la Bosetšhaba la SAPS le Kgwedi ya Tirelo ya Setšhaba ye e Kopantšwego.
9.2. Mo meketekong ya Kgwedi ya Bohwa, Afrika Borwa e lemoga le go keteka setšo se se humilego, bohwa le ditlwaelo tša setšhaba sa gaborena sa go fapafapana. Moeno wa ngwaga wo ke “Lebelela leswa Diinstitute tša Rena tša Bohwa bakeng sa Nako ye Mpsha”. Motlatšamopresidente Paul Mashatile o tla eta pele meketeko ya Letšatši la Bohwa yeo e tlo bago ka la 24 Lewedi 2025 Lepatlelong la Bridgton ka Oudtshoorn, ka Kapa Bodikela.
9.3. Kgwedi ya Boeti e ketekwa ka fase ga moeno wo: “Boeti le Boeti bjo bo Swarelelago”, woo o ketekago setšo se se humilego, bohwa le maitemogelo a go eta a ka Afrika Borwa. Kgwedi ya Boeti e bea šedi ya yona go bohlokwa bja intasteri ye ge go etla matlafatšong ya setšhaba le tlholong ya mešomo. E tšwela pele go hlohleletša Maafrika Borwa go etela mafelo a ka gare ga naga le go bona dilo tšeo naga e nago le tšona (#Sho’t Left).
9.4. Letšatši la Segopotšo la Bosetšhaba la SAPS le ketekwa ka Lamorena la mathomo la Lewedi ngwaga wo mongwe le wo mongwe e le ge setšhaba se gopola banna le basadi ba Tirelo ya Maphodisa a Afrika Borwa bao ba lobilego maphelo a bona ba le mošomong – ba lefilego ka maphelo a bona ba direla le go šireletša Maafrika Borwa. Kabinete e ipiletša go batho ka moka go thekga maphodisa ge ba le gare ba dira mošomo wa bona wa bothata wa go netefatša gore Afrika Borwa e ba ye e bolokegilego ebile e se nago bosenyi.
G. Melaetša
1. Matshediso
Kabinete e iša matshidiso go bagwera le malapa a:
- Modulasetulo wa peleng wa NCOP ebile e le Motseta wa Afrika Borwa ka nageng ya Kenya, Morena Mninwa Johannes Mahlangu yoo a bego a tsebega kudu ka la “MJ”, gape ebile e le yo mongwe wa batho ba mathomo bao ba kgethilwego go ba maloko a Palamente ka 1994. Yena e be e le karolo ya sehlopha seo se thadilego molaotheo, a ba a emela Afrika Borwa ka bokgoni maemong a boditšhabatšhaba.
- Tshidi Madia, raditaba le mogaši yo hlwahlwa, yoo a bilego seka sa seriti le lentšu la go emela batho. Yena o be a retwa kudu ka bobegaditaba bja gagwe bjo bo hlwekilego, go ikgafela nnete, go se tšee lehlakore, go se dikologe seolo gape le go rata naga ya gabo.
- Mahlwaaadibona wa sebapadi sa ditiragatšo gape ebile e le kgaphampshikela ya moanegadikanegelo, Nandi Nyembe, yoo a bego a tlwaetšwe go bitšwa ka la Mam’ Nandi, yoo mošomo wa gagwe wa bodiragatši o fetago mengwaga ye masomehlano.
- Mahlwaadibona wa mmino wa jazz, ‘Bra’ Stompie Manana yoo porompeta ya gagwe e bego e rwele morethetho wa dipelo tša Maafrika Borwa go tšwa mebileng ya Sophiatown go ya sefaleng sa lefase, yoo a bilego yo mongwe wa baletšaporompeta le mohuta wa porompeta wa go bitšwa flugelhorn ba go hlomphega.
- Molwelatokologo gape ekile ya ba moeletši wa tša tšhireletšo wa Nelson Mandela, Morena Neil de Beer yoo a kgathilego tema ye kgolo historing le dipolotiking tša naga ya gaborena ka dikarolo tša go fapafapana tšeo a di bapetšego ka ditheong tša go fapafapana.
- Rakgwebo ebile e le mothomi wa bjala bja mathomo bja go tuma bjoo bo hlotšwego ke bathobaso e lego Soweto Gold Beer, Morena Ndumiso Madlala.
2. Ditebogišo
Kabinete e lebogiša le go lakaletša tše botse go:
- Akani Simbine ge a tšwele maemo a bobedi lebelong la dimetara tše 100 Makgaolakganyeng a Diamond League a 2025 ka Zurich.
- Jo-Ane du Plessis ge a tšwele maemo a boraro papading ya tšabelini Makgaolakganyeng a Diamond League a 2025 ka Zurich.
- Thriston Lawrence ge a thopile maemo a pele Thonamenteng ya Kolofo ya Omega European Masters ka Switzerland lekga la bobedi mo mengwageng ye mene.
- Basadi ba Di-Springbok ge ba fihleletše dikotafaenale tša Sebjana sa Lefase sa Rugby la mathomothomo historing ya bona, gomme ebile e ba lakeletša mahlatse le mahlogonolo ge ba tla be ba lebane le sehlopha sa naga ya Fora ka Lamorena la 7 Lewedi 2025.
- Scorpion Kings ge ba kgonne go rekiša dithekethe ka moka tša khonsate ya bona ya “Betway Presents Scorpion kings live with friends” ka la 29 Phato, yeo e tsenetšwego ke balatedi ba bona ba go roba rekoto ba 50,000.
Dinyakišišo:
Mohumagadi Nomonde Mnukwa
Seboleledi sa Mmušo sa Motšwaoswere
Mogala: 083 653 7485
