A. Merero ye Bohlokwa Seemong sa Bjale
1. Go aga maatla le kgotlelelo yaekonomi
1.1. Mmušo le kgwebo di tiiša tirišano go potlakiša kgolo ya ekonomi le tlholo ya mešomo
1.1.1. Kabinete e amogetše go thakgolwa ga Legato la 3 la Tirišano ya Mmušo le Kgwebo go hlohleletša kgolo, go goketša peeletšo le go hlola mešomo ye milione o tee ka 2030.
1.1.2. Legato la 3 le itheile go dikatlego tša ditirišano tša Legato la 1 le le la 2 ka makaleng a bohlokwa. Dikatlego tša Legato la 2 di akaretša go fedišwa ga kgaotšo ya mohlagase, dikaonafatšo tša mokgwatšhomo wa ditimela le maemakepe; Go phumolwa ga Afrika Borwa lenaneong la FATF la dinaga tšeo di sa šomišego tšhelete gabotse, le go kaonafatšwa ga tekanyo ya Dikoloto ke S&P le Fitch.
1.1.3. Legato la 3 le tla godiša dikaonafatšo, la matlafatša boitshepo bja babeeletši le go katološa dibaka tša ekonomi go Maafrika Borwa ka moka. Ka dinepišo tše bohlokwa ka koketšong ya maatla a mohlagase, go oketša palo ya bogolo bja merwalo, go bulela dipeeletšo tše dikgolo, le go kaonafatša go tla ga baeti ba boditšhabatšhaba ka 2027.
1.2. Afrika Borwa e itokišetša moento wo moswa wa thiibii
1.2.1. Kabinete e tsebišitšwe ka tšwelopele yeo e bilego gona ge go etla go moento wo moswa wa thiibii (TB) woo gonabjale o lego ditekong tša Legato la 3, leo le ka kgathago tema ye kgolo phedišong ya TB bjalo ka matšhošetši go tša maphelo setšhabeng.
1.2.2. Kabinete e lemogile gore mmušo o ipeakanyetša go ngwadišwa le go tsebišwa ga moento ge diteko di ka bontšha gore go na le katlego.
Kabinete e amogetše gape le tumelelano le Serum Institute ya India go tšweletša meento ya TB gore e phatlalatšwe lefaseng ka moka, gomme seo se tla matlafatša bokgoni bja Afrika Borwa bja go tšweletša moento, sa thekga tšweletšopele le go kgatha tema go kgolo ya ekonomi le tlholo ya mešomo.
1.3. Go thea motheo go bokamoso bja mohlagase wo o kgotlelelago: Mokgwatšhomo wa Tšweletšo wa Eskom
1.3.1. Eskomo e fetile maikemišetšo a yona a bohlokwa ka lenaneo la yona la go feditša phokotšo ya mohlagase ka go fihlelela maemo a phokotšo ya mohlagase mo diprofenseng tše šupa pele ga ge nepo ya Diphalane 2026 e fihla. Bareki ba e ka bago 1.2 milione ba bušeditšwe maemong a kabo ye e tlwaelegilego ya mohlagase, gomme seo se fokoditše kabo ya bareki bao ba amilwego go ya go 6.8% ya bareki ba ka mehla ba Eskom
1.3.2. Se sengwe gape, Eskom e fokoditše kudu go itshepela go tesele, moo ditshenyagelo di ilego fase ka go feta 83% ngwaga ka ngwaga go tloga go R5.92 bilione go fihla go R992 milione mo nakong ye e ka bapetšwago, bjalo ka tšhomišo ya Thebaene ya Gase ya Moya e fokotšegile kudu go tloga go 8.67% go ya go 1.10%.
1.3.3. Phokotšo ye kgolo go tšhomišo ya tesele e tšweletša dikaonafatšo tša go swarelela tša mokgwatšhomo wa sehlopha sa dinamelwa gape le lenaneo la mohlagase la go kgotlelela, la go šoma gabotse gape le maatla. Gonabjale Afrika Borwa e na le matšatši a 467 a go latelana go se na kgaotšo ya mohlagase e sa le go tloga ka la 16 Mopitlo 2025, e aba mohlagase wa go tshepagala go malapa le dikgwebo le go thekga tlhabollo ya ekonomi ka bophara.
1.3.4. Kabinete e amogetše kaonafalo ye e tšwelago pele go mokgwatšhomo wa Eskom moo Ntlha ya go ba Gona ga Mohlagase e fihlelelago maemo a godimodimo e sa le go tloga ka 2020, e bontšhago tšweletšo ye e tshepegago ya mohlagase. Kaonafatšo ye ya go swarelela e bušitše dimekawate tše e ka bago 6 100 tša maatla a tšweletšo ya mohlagase go kriti, mola go tima ga mohlagase moo go se a beakanywago go fokotšegile ka 40% ngwaga ka ngwaga.
1.3.5. Kabinete e ipiletša go Maafrika Borwa go romela ditshwayotshwayo ka Kakanywa ya Pholisi ya Theko ya Mohlagase ye e Mpshafaditšwego yeo gonabjale e buletšwego setšhaba gore se swayeswaye ka yona. Maikemišetšo a ditshepedišo tša pholisi ye e akantšwego ke go fokotša theko ya mohlagase mola ka go le lengwe e swarelela ditheko tša kabo ya go lekana le ditirelo tšeo e di abago le go šireletša malapa ao a hlokago le makala a ekonomi a bohlokwa.
1.4. Simphosiamo ya Bohlano ya Tlhabollo ya Mananeokgoparara a go Swarelela ya Afrika Borwa
1.4.1. Kabinete e amogetše ge Afrika Borwa e swere ka katlego Simphosiamo ya Bohlano ya Tlhabollo ya Mananeokgoparara a go Swarelela ya Afrika Borwa (SIDSSA) ka Motsekapa.
1.4.2. Kabinete e amogetše gape go hlaolwa ga diprotšeke tša mananeokgoparara tše 263 tša boleng bja R1.99 trilione go phatlalala le magato a go fapafapana a tlhabollo le phethagatšo.
1.4.3. Mo dikgweding tše 18 tša go feta, diprotšeke tše 37 tša boleng bja R69 bilione di phethilwe, gomme di thekga kgolo ya ekonomi le tlholo ya mešomo.
1.5. Molao wa Dibaka le Kgolo ya Afrika
1.5.1. Kabinete e amogetše go katološwa ga Molao wa Dibaka le Kgolo ya Afrika (AGOA), woo o sa swareletšego phihlelelo ya go ikgetha ya ditšweletšwa tša Afrika Borwa tša maleba go mmaraka wa Amerika (USA). Katološo ye, yeo e tla felago ka la 31 Manthole 2028, e fa kgonthišo go batšweletši le baromelantle, e thekga go fapafapana ga mmaraka, diromelwantle tše di oketšegilego le ditirišano tša kgwebo le peeletšo tša go tsenelela le USA.
1.6. Tumelelano ya dienywa tša senamune le India
1.6.1. Kabinete e amogetše tumelelano gare ga Afrika Borwa le India go katološa dikgetho tša go tšidifatšwa ga diromelwantle tša dienywa tša senamune tše foreše tša Afrika Borwa, go latela ditherišano tša mengwaga ye e batamelago ye lesome. Tumelelano ye e tla fa batšweletši ba dienywa tša senamune sebaka sa go sepela le mabaka a phetogophetogo ye kgolo ya thwalo ya merwalo le go thekga koketšego ya diromelwantle ka India yeo e lego wo mongwe wa mebaraka ye megolo gape ye e golago ka lebelo lefaseng.
1.6.2. Bjalo ka moromelantle wo mogolo wa bobedi lefaseng wa dienywa tša senamune ka ditone tše 2.9 milione tša dienywa tša senamune tšeo di rometšwego ntle ka 2025 gomme tša dira letseno la US$2.1-bilione, intasteri ya dienywa tša senamune ya Afrika Borwa e thekga mešomo ye bohlokwa go phatlalala le tšweletšo go tloga go bjaleng go ya go rekišeng. Phihlelelo ya mmaraka ye e katološitšwego e tla matlafatša kgolo ya lekala, kgonagalo ya thomelantle le tlholo ya mešomo
1.7. Go kaonafatša bophenkgišani bja Afrika Borwa bjalo ka lefelo la boeti, kgwebo le peeletšo
1.7.1. Kabinete e amogetše go thakgolwa ga sefala sa Tumelelo ya Mosepelo ya Elektroniki ya Afrika Borwa (ETA) bjalo ka karolo ya phetogo ya titšithale ya lenaneo la visa le bofaladi.
1.7.2. ETA e ema legatong la ditshepedišo tša visa tša manyuale ka lenaneo la titšithale la lebelo, la go šoma gabotse.
1.7.3. Ka go tsenya kgonthišo ya payometriki le theknolotši ya sebjalebjale, ETA e tla matlafatša tšhireletšo ya mellwane, ya kaonafatša taolo ya bofaladi le go kaonafatša bophenkgišani bja Afrika Borwa bjalo ka lefelo la boeti, kgwebo le peeletšo.
2. Go aga dikamano tša boditšhabatšhaba tše maatla
2.1. Afrika Borwa e swere Samiti ya SADC ya bo 46 ka katlego
2.1.1. Kabinete e amogetše go swarwa ka katlego ga Samiti ya SADC ya bo 46 ka Durban yeo go yona Afrika Borwa e thomilego ka Bodulasetulo bja yona ka fase ga morero wo: Phetolelaintastering yeo e Kgotlelelago, e Swarelelago ebile e Akaretšago Bohle ka Phetošo ya Tlhabollo ya Mananeokgoparara, Temo le Diminerale tše Bohlokwa ka nepo ya go nyaka Lefase la Toka”.
2.1.2. Samiti e amogetše le go dumelela dipego ka ga: phethagatšo ya Leano la Tlhabollo ya Togamaano ya Mošupatsela wa Selete (RISDP) la 2020 – 2030, leo le theilwego go maitapišo ao a tšwelago pele mo go kaonafatšeng khutšo, tšhireletšo, le mokgwatšhomo wa ekonomi, maphelo, le mananeokgoparara; tšwelopele go tlhabollo ya Tsela ya Ekonomi ya Leboa-Borwa (NSEC), go thongwa ga lenaneo la Dipeeletšo la NSEC, le Setheo sa Taolo ya Tsela; le tlhokego ya go hlaola bonnyane diprotšeke/dikarolo tše tharo (03) tša khuetšo ya godimo tšeo go swanetšwego go bolelwa ka tšona ka kopano ya go latela ya Khansele ya Ditona.
2.1.3. Afrika Borwa e tšere sebaka sa go tsebiša Samiti ka taolo ya bofaladi ka mo nageng le tlhokego ya go swara dipoledišano tša SADC ka taba ye go akaretša dintlha tša gore ke eng seo se tlošago bafaladi ka dinageng tša bona le go kgeregela ka Afrika Borwa le go ama ditaba tša tšhireletšo.
2.2. Kopano ya Bone ya Khomišene ya Dinaga tše Pedi tša Afrika Borwa le Zimbabwe
2.2.1. Kabinete e retile katlego ya Kopano ya Bone ya Khomišene ya Dinaga tše Pedi tša Afrika Borwa le Zimbabwe, yeo e sekasekilego tirišano ya dinaga tše tše pedi le go matlafatša dikamano gare ga tšona.
2.2.2. Kabinete e lemogile gore Zimbabwe e sa dutše e le ye nngwe ya badirišani ba bagolo ba kgwebišano le Afrika Borwa ka Afrika, moo kgwebišano ya dinaga tše tše pedi e fihleletšego R81 bilione ka 2025.
2.2.3. Kopano ya Bone e phethile ditumelelano tša tirišano tše tshela tše diswa, go akaretša Memorantamo wa Tumelelano (MoU) ka phethišetšano ya bagolegwa bao ba filwego kotlo go tloga nageng yeo ba golegilwego go yona go išwa dikgolegong tša nageng ya bobona. Ditumelelano tša tlaleletšo di go: dikamano tša boditšhabatšhaba, temo, bokgabo le setšo, le matlafatšo ya basadi e tla godiša gape kopanyo ya selete le phetogo ya ekonomi.
3. Lenaneo la go Buša Mašaledi a Bao ba Boloketšwego Dinageng Dišele
3.1. Legato la Angola la Lenaneo la go Buša Mašaledi a Bao ba Boloketšwego Dinageng Dišele
3.1.1. Kabinete e amogetše go thakgolwa ga legato la Angola la Lenaneo la go Buša Mašaledi a Bao ba Boloketšwego Dinageng Dišele go utolla le go buša mašaledi a Maafrika Borwa bao ba hlokofaletšego dinageng dišele nakong ya ntwa ya tokologo, bjalo ka karolo ya Leano la Go Buša Mašaledi a Bao ba Boloketšwego Dinageng Dišele la Mengwaga ye Mehlano.
3.1.2. Kabinete e lemogile gore Angola e na le palo ya godimo ya Maafrika Borwa ao a hlokofetšego a le dinageng dišele, gomme go na le kgonagalo ya mabitla a 400 ao a hlaotšwego.
3.1.3. Kabinete e ipiletša go malapa ao baratiwa ba bona ba hlokofetšego, ba timeletšego goba ba bolokilwego ka Angola nakong ya ntwa ya tokologo go ngwadiša le Mokgatlo wa Methopo ya Bohwa wa Afrika Borwa (SAHRA) mo phothaleng ya Go Buša Mašaledi a Bao ba Boloketšwego Dinageng Dišele go https://www.sahra.org.za/exile-repatriation/.
3.1.4. Malapa ao a nyakago thušo a ka ngwadiša gape diofising tša SAHRA, Freedom Park, diofising tša Kgoro ya Dipapadi, Bokgabo le Setšo ya ka diprofenseng le ka ditheong tša bomahlwaadibona ba sešole.
3.2. Afrika Borwa e bušetša morago mašaledi a batho ba Namibia le bagale ba tokologo bao ba boloketšwego ka Afrika Borwa
3.2.1. Kabinete e amogetše go bušetšwa morago ga mašaledi a batho ba Namibia ba 86, go akaretšwa bagale ba tokologo Festus Nehale le Simon Niilenge, bao ba hlokofetšego ba le kgolegong ka morago ga go romelwa kgolegong ya Robben Island.
3.2.2. Mašaledi a, ao a tlošitšwego Namibia mengwaga ya go feta ye lekgolo yeo e fetilego gomme a dirwa diteko tša go hloka botho tša nako ya bokoloneale, a tla bolokwa leswa Dirapeng tša Bagale tša Namibia.
3.2.3. Kabinete e amogetše go bušetšwa morago ga mašaledi bjalo ka taba ye bohlokwa ya toka ya go phošolla diphošo tšeo di dirilwego nakong ya kgatelelo yeo e hlomphago bagale ba ntwa ya tokologo le gore ditlogolo tša bona di hwetše khutšo meboyeng.
B. Diphetho tša Kabinete
1. Mpshafatšo ya Diathekele tša Tumelelano ya Panka ya Boditšhabatšhaba ya Kagoleswa le Tlhabollo
1.1. Kabinete a dumeletše go išwa Palamenteng ga mpshafatšo ye e akantšwego go Diathekele tša Tumelelano ya Panka ya Boditšhabatšhaba ya Kagoleswa le Tlhabollo (IBRD) go kaonafatša bokgoni bja panka bja go adimiša tšhelete le go thekga ditlapele tša tlhabollo ya selete le lefase.
1.2. Phetošo ye ke karolo ya lenaneo leo le nabilego la mpshafatšo ya Dipanka tša Tlhabollo tša Boditšhabatšhaba leo le dumeletšwego ke G20 go matlafatša bokgoni bja ditšhelete le go kgona go sepela le diphetogo ga diMDB.
1.3. Tumelelosemmušo ka Afrika Borwa e tla thekga ditlapele tša tlhabollo ya naga ka go kaonafatša phihlelelo go thušo ya ditšhelete ka ditswala tša fase gore go be le tlhabollo ya go swarelela.
2. Dipego tša Ngwaga le Ngwaga tša 2025/26 ka ga phethagatšo ya Molaophetošwa wa Molao wa Bosenyi (Melato ya Thobalano le Ditaba tšeo di amanago le yona) wa 2007.
2.1. Kabinete e dumeletše go išwa Palamenteng ga Dipego tša Ngwaga le Ngwaga tša 2025/26 ka ga phethagatšo ya Molaophetošwa wa Molao wa Bosenyi (Melato ya Thobalano le Ditaba tšeo di Amanago le Yona) wa 2007.
2.2. Kabinete e tšweleditše matshwenyego ka ga dipalopalo tšeo di sa lego godimo malebana le go kata le melato ye mengwe ya thobalano ka mo Pegong le ge go bile le ditsenogare tša mmušo tše ntši, gomme ya laela gore go be le matlafatšo ya mananeo a dikarolontši ka fase ga Leano la Peakanyo ya Setšhaba ka ga Dikgaruru tšeo di Theilwego go Bong le Dipolao tša Bana le Basadi.
2.3. Go matlafatša karabelo ye e laolwago go melato ya thobalano, lenaneo la taolo ya toka, maphelo, tlhabollo ya leago le makala a thuto, go matlafatša thibelo, thekgo ya batšwasehlabelo, go rweša basenyi maikarabelo le tšhireletšo ya dihlopha tšeo di lego kotsing.
3. Dipego tša Ngwaga le Ngwaga tša 2025/26 ka ga phethagatšo ya Molao wa Toka wa Bana wa 2008 (Molao wa bo75 wa 2008)
3.1. Kabinete e dumeletše go išwa Palamenteng ga Dipego tša Ngwaga le Ngwaga tša 2025/26 ka ga phethagatšo ya Molao wa Toka wa Bana wa 2008 (Molao wa bo75 wa 2008): 1 Moranang 2025 – 31 Hlakola 2026.
3.2. Kabinete e laetše gore go šongwe ka maatla go matlafatša mokgwa wo o laolwago go thibela melato ya bana.
C. Ditsebišo tša Kabinete
1. Phethagatšo ya Mokgwa wa Kaonafatšo ya go Šoma Gabotse ga Mebasepala
1.1. Kabinete e tsebišitšwe ka tšwelopele yeo e dirilwego ke Komiti ya Ditona tša Dikgoro tše Dintši (IMC) ka ga Mokgwa wa Kaonafatšo ya go Šoma Gabotse ga Mebasepala ka go šogana le ditlhohlo go mebasepala ya mathata.
1.2. Tsenogare e katološitšwe go tloga go mebasepala ye 10 go ya go ye 38 gomme e nepiša mo go kaonafatšeng go swarelela ga ditšhelete, taolo, kabo ya ditirelo, dipoelo tša tlhakišo le bokgoni bja institušene.
1.3. IMC e thekga gape phethagatšo ya ditsenogare tša molaotheo moo mekgwa ya thekgo yeo e lego gona e se ya fihlelelago dipoelo tšeo di nyakegago.
2. Kaonafatšo ya mananeokgoparara a mellwane
2.1. Kabinete e dumeletše Leano la Kaonafatšo ya Mananeokgoparara a Mellwane (2026-2030) go matlafatša le go mpshafatša mananeokgoparara a mellwane ya Afrika Borwa bjalo ka karolo ya mokgwa wa taolo ya bofaladi wa kakaretšo wa mmušo.
2.2. Leano le tla phethagatšwa go phatlalala le diprofense tšeo di nago le mellwane tše šupa gomme di tla kaonafatša tšhireletšo ya mellwane, katlego ya go lekolwa, dinako tša go arabela go šoma, polokego ya bašomi, go hlokomela infrastraktšha le taolo ya mebušo ye mentši, mola e thibela mesepelo yeo e sego molaong gare ga dinaga tše pedi.
3. Boitokišetšo bja Dikgetho tša Mmušo wa Selegae tša 2026
3.1. Kabinete e tsebišitšwe ka ga boitokišetšo bja Dikgetho tša Mmušo wa Selegae (diLGE) tša 2026 gomme ya lemoga tšwelopele yeo e dirilwego go lebilwe go dikgetho tšeo di tlo swarwago ka la 4 Dibatsela 2026.
3.2. Kabinete e lemogile gore mekgwa ya go laola go phatlalala le makala a mmušo wa bosetšhaba, profense le selegae a lokile go thekga tshepetšo ya dikgetho ya go lokologa, ya toka, ya go tshepega gape ya khutšo. Kabinete e amogetše mekgwa ye e tšwelago go matlafatša go kgatha tema ga bakgethi, go lwantšha tshedimošo ya maaka le go kgonthiša go lokela go šoma; le go hlohleletša Maafrika Borwa ka moka ao a nago le maswanedi go kgatha tema tshepetšong ya temokrasi ka go phethagatša tokelo ya bona ya go kgetha.
3.3. Kabinete e kgadile ka bogale go bolawa ga kgauswanyane ka makhanselara gomme ya leboga baphethagatši ba molao go arabela ka lebelo go hwetša basenyi ba dira bosenyi bjo bjo bobe.
3.4. Kabinete e ipiletša go Maafrika Borwa ka moka go ba le kgotlelelano dipolotiking, ba gane matšhošetši, dikgarurur le maitshwaro afe goba sfe ao a nyatšgo seriti sa tshepetšo ya dikgetho ge naga e itokišetša Dikgetho tša Mmušo wa Selegae tša 2026 ka la 4 Dibatsela 2026.
4. Tsebišo ya Tirišano ya Meetse
4.1. Kabinete e amogetše tšebišo ka ga mošomo wa Ofisi ya Tirišano ya Meetse (WPO), yeo e thekgago mebasepala go matlafatša kabo ya tirelo ya meetse ka tirišano le lekala la praebete.
4.2. Ka fase ga Lenaneo la Meetse la go Hloka Letseno, WPO e thušitše Mmasepala wa eThekwini go boloka R379 milione mo mengwageng ye tshela go fokotša tahlegelo ya meetse gomme e thekga eThekwini le Toropokgolo ya Tshwane ka phethagatšo.
4.3. Ka fase ga Lenaneo la Go Šomiša Meetse Gape, mebasepala ye 34 e phethile tekolo ya kotsi ya klaemete, mola US$235 milione e bolokilwe go tšwa go Sekhwama sa Klaemete ya go Hlweka go kaonafatša diprotšeke tša go šomiša meetse gape.
4.4. WPO e dira kopano le thekgo ya ditšhelete ya kelelatšhila go thekga ditheknolotši tša kelelatšhila ya go se be le disoretše mo mekhukhung le dikolong.
4.5. Ka fase ga Lenaneo la Tlhwekišo ya Meetse a Lewatle, go išitšwe tšhišinyo go Toropokgolo ya Motsekapa go thekga tlhwekišo ya Paarden Eiland protšeke ya tirišano ya mmušo le praebete.
D. Melaokakanywa
1. Molaokakanywaphetošwa wa Dithoto tša Kgale wa 2026
1.1. Kabinete e dumeletše phatlalatšo ya Molaokakanywaphetošwa wa Dithoto tša Kgale, wa 2026 gore setšhaba se swayeswaye. Molaokakanywa wo o nyaka go matlafatša taolo ya lekal la dithoto tša kgale le go tswalela dibaka tša taolo go lwantšha dithoto tša go utswiwa, tshenyo ya mananeokgoparara, bohodu bja dikheipolo le thekišo ya metale wa kgale ka tsela yeo e sego molaong.
2. Molaokakanywaphetošwa wa Bohodu bja Leruo wa 2026
2.1. Kabinete e dumeletše go phatlalatšwa ga Molaokakanywaphetošwa wa Bohodu bja Leruo, wa 2026 gore setšhaba se swayeswaye. Molaokakanywa wo o nyaka go matlafatša magato a go thibela, go nyakišiša le go otla mahodu a leruo, wa kaonafatša taolo ya bong le taolo ya leruo, le go kaonafatša tšhireletšo ya lekala la temo.
3. Molaokakanywa wa Maitshwaro a Malokophethiši wa 2026
3.1. Kabinete e dumeletše go phatlalatšwa ga Molaokakanywa wa Maitshwaro a Malokophethiši gore setšhaba se swayeswaye. Molaokakanywa wo o fetoša Molao wa Maitshwaro a Malokophethiši wa 1998 go matlafatša maemo a maitshwaro le go rwala maikarabelo, go hlaloša ka botlalo mošomo wa Mošireletši wa Setšhaba, le go kaonafatša taolo ya thulano ya dikgahlego le tšhomišobošaedi ya ofisi ya setšhaba.
E. Bao ba thwetšwego mešomong
Batho ka moka bao ba thwetšwego mešomong mangwalo a bona a thuto a tla kgonthišišwa le go tiišeletšwa ka mekgwa ya maleba.
1. Ngaka Thembisile Lynette Xulu bjalo Molaodipharephare ka go Kgoro ya Bosetšhaba ya Maphelo
2. Mohumagadi Blikis Omar bjalo ka Motlatšamolaodipharephare wa Diphatišišo tša Pholisi le Melao ka go Kgoro ya Moeletši wa Badudi wa Tirelo ya Maphodisa.
3. Mohumagadi Prudence Madiba bjalo ka Mohlankedimogolophethiši wa Setheo sa Tlhabollo ya Enetši ya Bosetšhaba ya Afrika Borwa.
4. Mohumagadi Babalwa Mapisa bjalo ka Mohlankedimogolo wa Ditšhelete wa Koporase ya Bosetšhaba ya Thekgo ya Ditšhelete tša Go Reka Dintlo.
5. Go thwalwa ga maloko ao e sego malokophethiši go Boto ya Balaodi ba Koporase ya Taolo ya Dinamelwa tša Tseleng
a. Mohumagadi Nomusa Mufamadi (Modulasetulo);
b. Mohumagadi Lerato Magalo (o thwetšwe gape);
c. Mohumagadi Lindani Agness Mncwango;
d. Morena Tshepiso Poho;
e. Mohumagadi Nomkhita Mona;
f. Morena Gift van Staden;
g. Mohumagadi Malebo Matolong; le
h. Ngaka Mpostol Mashinini.
6. Go thwalwa ga maloko a taolo a nakwana a Setheotaolo sa Enetši sa Bosetšhaba sa Afrika Borwa
a. Morena Sijabulile Makhathini;
b. Morena Dharamraj Brijlal; le
c. Mohumagadi Nompucuko Nontombana
7. Go thwalwa gape ga Modulasetulo le Motlatšamodulasetulo le Molaodimogolo o tee go Boto ya Setheo sa Dilahlwa tše Kotsi sa Bosetšhaba
a. Ngaka Lemao Dorah Modise (o thwetšwe gape ebile ke Modulasetulo);
b. Ngaka Wolsey Barnard (o thwetšwe gape ebile ke Motlatšamodulasetulo); le
c. Morena Ashley Latchu
8. Morena Graham Ian Wood bjalo ka Modulasetulo wa Boto ya Boeti ya Afrika Borwa.
F. Ditiragalo le Dikhonferense
1.1. Samiti ya BRICS ya bo18
1.1.1. 1.1.1. Mopresidente Cyril Ramaphosa o tla eta pele kemedi ya Afrika Borwa go ya Samiting ya BRICS ya bo18 ka India ka la 12 le 13 Lewedi 2026 ka fase ga morero wo: Go Agela Kgotlelelo, Bohlami, Tirišano le Tshwarelelo”.
1.1.2. 1.1.2. Samiti ye e tla fa Afrika Borwa sebaka sa go tšweletšapele ditlapele tša yona tša bosetšhaba mmogo le tša Afrika, mola e le gare e matlafatša tirišano, kgwebišano, peeletšo le tlhabollo ya go swarelela ka go BRICS.
1.2. Kopano ya Ngwaga le Ngwaga ya Dipoledišano tša Sehlopha sa Panka ya Lefase (WBG) le Sekhwama sa Ditšhelete sa Boditšhabatšhaba (IMF) ka 2027
1.2.1. Kabinete e dumeletše go swarelwa ka Afrika Borwa ga Kopano ya Ngwaga le Ngwaga ya Dipoledišano tša Sehlopha sa Panka ya Lefase (WBG) le Sekhwama sa Ditšhelete sa Boditšhabatšhaba (IMF) ka 2027 bjalo ka maemo a yona a Bodulasetulo bja Dipoledišano tša Afrika. Kopano ye e tla fa sefala sa go kaonafatša dilo tše bohlokwa tša tlhabollo ya Afrika, ya matlafatša lentšu la kontinente ka go taolo ya ditšhelete tša lefase, le go huetša boetapele bja Afrika Borwa bja Dipoledišano tša Afrika le maitemogelo go tšwa go Bopresidente bja G20 go kaonafatša ditlapele tše di itšego tša Afrika le kopano le WBG le IMF.
1.3. Kopano ya Go Ikgetha ya Foramo ya Ekonomi ya Lefase
1.3.1. Kabinete e dumeletše go swarelwa ka Afrika Borwa ga Kopano ya Go Ikgetha ya Foramo ya Ekonomi ya Lefase (WEF) ka Motsekapa go tloga ka la 27 go fihla ka la 31 Hlakola 2028, gomme e tlo ba e le la mathomo WEF Spring Davos e swarelwa ka mo nageng, moo e tlo fago sebaka sa go godiša peeletšo, kwebišano, tirišano ya ekonomi le tlhabollo ya go swarelela.
1.4. Samiti ya Haetrotšene ya Go Hlweka ya Afrika ya 2026
1.4.1. Kabinete e dumeletše go swarwa ga Samiti ya Haetrotšene ya Go Hlweka ya Afrika ya bobedi ka Motsekapa go tloga ka la 15 go fihla ka la 16 Lewedi 2026 go kaonafatša ekonomi ya haetrotšene ya go hlweka ka tirišano gare ga mebušo, babeeletši le badirišani ba intasteri.
1.4.2. Samiti ye e tla thekga maikemišetšo a Afrika Borwa ka haetrotšene ya go hlweka ka go godiša tlhabollo ya diintasteri, peeletšo, phetišetšo ya theknolotši, tlhabollo ya mabokgoni le phihlelelo ya mebaraka ya haetrotšene ya go hlweka yeo e sa thomago.
1.5. Khonferense ya Boditšhabatšhaba ya Phihlelelo ya Toka go Batho ka Moka
1.5.1. Kabinete e dumeletše go swarelwa ka Afrika Borwa ga Khonferense ya Boditšhabatšhaba ya Phihlelelo ya Toka go Batho ka Moka le go arabela go Diphetogo tšeo di Tšwelelago, ka fase ga morero wo: Go Matlafatša Mananeo a Toka ao a Theilwego go Batho: Go Tiiša Temokrasi”. Khonferense ye e tla swarelwa Sun City Convention Centre ka Leboa Bodikela go tloga ka la 11 go fihla ka la 13 Dibatsela 2026.
1.5.2. Yona e tla kopanya Ditona tša Toka go tšwa seleteng sa SADC, BRICS, Germany, Spain, Canada, Netherlands, Kopano ya Yuropa, Ditšhabakopano le Kenya, gammogo le ditsebi tša molao, dirutegi, setšhaba le bakgathatema ba bangwe. Khonferense e tla fa sefala sa go lekola ditlhabollo tše diswa, go abelana mekgwatšhomo ye mekaonekaone, go matlafatša ditirišano le go tla ka maele ao a kgonago go phethagatšwa go kaonafatša phihlelelo ya toka seleteng le lefaseng ka moka.
1.6. Masolo le Digopotšo tša Bosetšhaba tša Lewedi
1.6.1. Kabinete e lemogile gore Lewedi e tla lemogwa bjalo ka Kgwedi ya Boeti, Kgwedi ya Bohwa le Kgwedi ya Tirelo ya Setšhaba. Kgwedi ya Boeti, ka fase ga morero wa “Go Godiša Lekala la Boeti la Afrika Borwa Nakong ya Titšithale”, e hlohleletša Maafrika Borwa go tšea maeto a go ya mafelong a ka mo nakeng ka lesolo la Sho’t Left le go šomiša dibaka tša go tšea maeto tša go se bitše tšhelete ye ntši.
1.6.2. Kgwedi ya Bohwa, yeo e ketekwago ka fase ga morero wa “Go Keteka Bohwa bja Rena bja Go Phela: Go Matlafatša Dikgokaganyo tšeo di Re Kopanyago Mmogo” e keteka ditšo tša go fapafapana tša Afrika Borwa, meeno le bohwa bja go phela, mola e hlohleletša kopano ya leago le go leboga go fapafapana ga ditšo tša rena tša go huma tša naga y arena.
1.6.3. Kgwedi ya Tirelo ya Setšhaba e gopola tema yeo e kgathwago ke bašomi ba mmušo go tlhabollo le kabo ya ditirelo, mola e godiša seprofešenale, maikarabelo, bohlami le bokgoni go phatlalala le Tirelo ya Setšhaba.
1.6.4. Kabinete e hlohleletša Maafrika Borwa ka moka go kgatha tema go mešomo yeo e dirago gore go be le temogo le go keteka dikokwane, batho le ditheo tšeo di kgathago tema go aga naga le tšwelopele ya leago.
1.7. Letšatši la Segopotšo sa Bosetšhaba la SAPS
1.7.1. SAPS e tla swara Letšatši la Segopotšo la Bosetšhaba ka Lamorena la 6 Lewedi 2026, go hlompha maloko ka moka a SAPS ao a lobilego maphelo a le mošomong gare ga la 1 Moranang 2025 le la 31 Hlakola 2026. Tiragalo ye e tla swarelwa SAPS Memorial mo Union Buildings ka Pretoria.
G. Melaetša
1. Matshedišo
Kabinete e rometše matshedišo go bagwera le ba lapa la:
• Moahlodi Fikile Eunice Mokgohloa, yo a šomilego gabotse go taolo ya toka ka mo nageng. O hlokofetše a šoma Kgorotshekongkgolo ya Boipobolo.
• Mmušo le batho ba Zimbabwe go latela tahlegelo ya maphelo ka kotsi ya sekepe ka Lake Kariba;
• Mmušo le batho ba Democratic Republic of Congo go latela mahu a batho ba 2000 ka lebaka la baerase ya Ebola ka bohlabela bja DRC.
• Tlotlo Tsheka, mongwadi wa mengwaga ye šupa, mothadi ebile e le mohlohleletši wa tša go bala le go ngwala, mophatlalatši wa dipuku tše tharo, o hlokofetše ge a feleletša sengwalwa sa gagwe sa bone;
• Molaodi wa Sehlopha sa Bafana Bafana wa Maloba Morena Sipho Nkumane, yo a tsebegago ka go kgatha tema ga gagwe go kgwele ya maoto ya Afrika Borwa; le
• Mothopasefoka wa Lefase wa Dintwa tša Matswele makga a mabedi, Morena Zolani Tete, yoo a tla gopolwago go dintwa tša matswele tša Afrika Borwa.
2. Ditebogišo
Kabinete e lebogiša le go lakaletša tše botse go:
• Lenaneo la Dikgokagano le Tshedimošo ya Mmušo (GCIS), ka go amogela Sefoka sa Leswao la Lekala la Setšhaba go lemoga boetapele bja yona, tshepetšo ya setheo le go kgatha tema go tirelo ya setšhaba le phetogo ya setšhaba.
• Morena Siyabulela Duda wa GCIS, yoo a thupilego maemo a bobedi legorong la Diswantšho tša Difoka tša Bobegaditaba tša SADC tša 2026, le Morena Seakga Relebogile Tladi wa Sputnik Radio Africa, yoo a amogetšego sefoka sa bobedi ka legorong la Radio. Difoka tše di lemoga bokgoni bja bobegaditaba le tema yeo e kgathwago go godiša kopanyo ya selete, tlhabollo le tirišano ka SADC.
• Lekala la dipapadi la Afrika Borwa ka dikatlego tše dikgolo tšeo di lemogilwego go Difoka tša Dipapadi tša Afrika Borwa tša 2026:
o Morena Akani Simbine ka go thopa sefoka sa Naledi ya Dipapadi ya Ngwaga;
o Mohumagadi Prudence Sekgodiso ka go thopa sefoka sa Mmadipapadi wa Ngwaga;
o Morena Pieter Coetze ka go thopa sefoka sa Radipapadi wa Ngwaga;
o Morena Bayanda Walaza yo a amogetšego sefoka sa Naledi ya Dipapadi ya Baswa/Ba bannyane; le
o Sehlopha sa Kherikhethe sa Teko sa Banna sa diProtea ka go thopa sefoka sa Sehlopha sa Ngwaga.
• Banyana Banyana, ka go fetela pele go Thonamente ya Dipapadi tša Basadi tša FIFA le go swarelela tshepo ya go fihlelela maloka a go yo bapala Dipapading tša Sebjana sa Basadi sa Lefase ka 2027;
• Sehlopha sa Basadi sa Hoki sa Bosetšhaba sa Afrika Borwa, ka go hwetša phenyo ya bona ya mathomo go Dipapading tša Sebjana sa Lefase sa Hoki tša FIH tša 2026;
• Linani Potwana, yoo ka mengwaga ye tshela a thopilego sefoka sa Phadišano ya IPA All-Star ka Wuhan, China, a phadišana kgahlanong le bakgathatema go tšwa go dinaga tša go feta 40; le
• Baamogedi ba Difoka tša Saense tša 2026 tša Basadi ba Afrika Borwa (SAWiSA), ka tema yeo ba e kgathilego go godiša lenaneo la saense, theknolotši le bohlami la Afrika Borwa.
Dipotšišo:
Tshepetšo ya Dikgokagano le Tshedimošo ya Mmušo (GCIS)
Dikgokaganyo: Terry Vandayar, Molaodipharephare wa Motšwaoswere
Selefouno: 082 444 9092
