1. Phethagatšo ya Mananeo a Bohlokwa a Mmušo
1.1. Kabinete e amogela thakgolo ya Operation Phakisa 2: Go oketša Bokgoni bja Maleba bja Dikliniki le Lenaneo la Tlhokomelo. Se se latela Operation Phakisa 1 ye e lebantšego go tšwetšopele ya go bulela bokgoni bja ekonomi ya mawatle a Afrika Borwa. Operation Phakisa 2 le nyaka go kaonafatša boleng bja tlhokomelo ye e abjago ke mafelo a Tlhokomelo ya Maphelo a Motheo a 3 500, a go bopša ke dikliniki tša mmušo le Disentha tša Setšhaba tša Maphelo. Dipoelo tše di letetšwego di akaretša phetošo ya dikliniki tše di lego gona le Disentha tša Setšhaba tša Maphelo go di dira disentha tša bokgoni, tšeo di tlogo šomišwa ke maAfrika Borwa ka moka, ka lebaka la boleng bja ditirelo tše di matlafaditšwego tše di tlago di aba.
1.2. Kabinete e lebogiša bathopi ba Difoka tša Batho Pele tša Bokgoni, tšeo di bego di swerwe ka la 14 Dibatsela 2014. Difoka tše di tiišetša mošomo wa profešenale le go amogela bokgoni ka tirelong ya setšhaba.
1.3. Kabinete e laeditše gore Tona ya Dipapadi le Boithabišo, Fikile Mbalula o tla swara kabo ya Difoka tša Afrika Borwa tša Dipapadi tša 2014 kua Sentheng ya Dikopano ya Sandton ka la 30 Dibatsela 2014. Kabinete e hlohleletša maAfrika Borwa ao a ratago dipapadi go ba karolo ya Difoka tša Afrika Borwa tša Dipapadi ka go boutela Naletšana ya Dipapadi ya Ngwaga. Tshedimošo e hwetšwa go www.sasportsawards.com.
1.4. Kabinete e lebogiša dihlopha tša rena tša bosetšhaba tša dipapadi, Bafana Bafana, Springboks le Proteas ge di emišeditše folaga godimo ka dipapalo tša bona tše di botse mo mafelelong a beke le go dira gore Afrika Borwa e ikgantšhe. Go hlaolwa ga leina la Morena AB de Villiers bjalo ka Sebapadi sa Kherikhethe ya Boditšhabatšhaba ya Letšatši le Tee (ODI) sa Ngwaga sa Mokgatlo wa Boditšhabatšhaba wa Kherikhethe bakeng sa go fihlelela mekitimo ye 7 000 ya ODI, go a retega.
1.5. Kabinete e amogela thakgolo ya tirelo ya Dinamelwa tša Pese ya go Phakiša (BRT) ya A Re Yeng go la Tshwane, tšeo di thomilego go šoma go tloga ka Mošupologo, 17 Dibatsela 2014. A Re Yeng, go swana le ditirelo tše dingwe tša BRT go dikologa naga, e bopa karolo ya mararankodi a go beakanywa a dinamelwa tša setšhaba ao a tlago kaonafatša maphelo a banamedi ka go ba fa senamela sa sebjalebjale sa go phakiša, bolokega, lefelega le boiketlo. Kago ya ditirelo tše e bopa karolo ya lenaneo la thakgolo ya mananeokgoparara a mmušo, ao a ikemišetšago go tšweletša mananeokgoparara a maemo a godimo lefaseng ka Afrika Borwa, mola a hlola mešomo.
2. Diphetho tše bohlokwa tša kabinete
2.1. Kabinete e amogetše phethagatšo ya lenaneo la kakaretšo go kgonthišiša tatelo ya dipholisi le melawana ye e lego gona ya taolo ya theko ya ka gare ga naga. Se se akaretša tshepedišo ya peakanyo ya pholisi go sekaseka le go matlafatša Molao wa Tlhako ya Pholisi ye e Ikgethilego ya Theko, go katološetša Lenaneohlabollo la Baabatirelo ba Bokgoni go Dikhamphani ka moka tše di laolwago ke mmušo tše di lego bohlokwa le go matlafatša melawana ya kgoro (kudu tšhatha ya meepo) go kgonagatša theko ya selegae.
Se ke sedirišwa se maatla sa kago ya intasteri seo se tlago oketša phadišano ya intasteri maemong a bosetšhaba, go kgontšha tlhabollo ya bokgoni bjo boswa bja intasteri ya bosetšhaba le theknolotši, oketša thomelontle le go fihlelela matlafatšo ye e tseneletšego ya ekonomi ya bathobaso.
2.2. Kabinete e bolelletšwe ka Samiti ya Mopresidente ya Pušoselegae, gomme e amogetše Lenaneo la Poelomorago go tša Motheo la Mmušo wa Selegae, leo le theilwego godimo ga go aga lekala la mmušo wa selegae le le ikarabelago, hlokomelago le go araba. Lenaneo la Poelomorago go tša Motheo le tla šetša peakanyo le ditshepedišo tša mebasepala ka moka ka ga kabo ye botse ya ditirelo tša masepala tša motheo le kgokagano ya ka mehla le badudi. Maikemišetšo ke go tloga go maikemišetšo go ya go modiro.
Dikaonafalo mošomong wa mebasepala e tla kaonafatša maemo a lephelo a maAfrika Borwa ka moka ao a phelago ka go šoma botse ga mebasepala go phela maphelo a seriti.
Go tloga ka 1994, mmušo wa selegae o bile lefelo la motheo la kabo ya ditirelo.
Mola go bile le kgatelopeleo ye botse kabong ya meetse, mohlagase, kelelatšhila le kgolelelo ya matlakala maemong a selegae, ka mafelong ao kabo ye e fokolago ya ditirelo re swanela go bea batho le dihlobaelo tša bona pele. Se se nyaka gore re tlogele kabo ya ditirelo ya kgale ya godimo go ya fase re ye go setšo sa Batho Pele le go šomela ditšhaba. Se bohlokwa go mokgwa wo wo moswa ke mokgwa wo o begwago go ona, le go ba le maikarabelo a mošomo.
2.3. Kabinete e amogetše thomelo ya Pego ya Tshedišomo ya Bjale ya Sengwagapedi ka ga Diphokotšo tša Kedišo ya Afrika Borwa, go akaretšwa Lenaneopalo la Mafelelo la Bosetšhaba la Gasetšhireletšo (GHG), go Kopano ya Tlhako ya Ditšhabakopano ka ga Phetogo ya Klaemete (UNFCCC). E fa kakaretšo le tshekatsheko ya profaele ya dikedišo tša GHG ya Afrika Borwa le diketapele tse bohlokwa tša phetogo ka dikedišong. Gape e gatelela sehlopha sa kakaretšo sa magato a phetošo ya klaemete bjalo ka karolo ya phetogo go ya go ekonomi ya khapone ya fase.
Tše di akaretša go hlaloša dipoelo tša phokotšo ya kedišo ye e nyakwago; go godiša boithomelo le peeletšo ka go enetši ye e tsošološegago; go hlohleletša bokgoni bja enetši; go aga mokgwa wa bosetšhaba wa kgoboketšo ya datha ya gasetšhireletšo; le didirišwa tše dingwe tša go swana le Motšhelo wa Khapone. Gape se se bopa karolo ya tlemo ya pego ya boditšhabatšhaba ya Afrika Borwa ka fase ga Kwano ya UNFCCC.
2.4. Kabinete e amogetše tlhomo ya sehlophatšhomo sa go akaretša dikgoro tša go fapana ka fase ga Sehlopha sa Boditšhabatšhaba sa Tšhomišano, Kgwebišano le Tšhireletšo go lekola phethagatšo ya Kwano ya Tshepedišo ya Kgwebišano ya Mokgatlo wa Lefase wa Kgwebišano (WTO).
Maemo a Afrika Borwa ke a go šomišana le dinaga tše dingwe tša Afrika go kgonthišiša gore kamogelo le phethagatšso ya Kwano ya Tshepedišo ya Kgwebišano ga e nyake gore dinaga tša Afrika di amogele ditlemo tše di se nago bokgoni bja go di kgotsofatša gomme seo se di lebantšha le ditlhohlo tša semolao. Mola a Afrika Borwa e dula e ikgafetše go dipoledišano tša dinagantši ka fase ga Tikologo ya Doha , maemo a rena ke go nyaka poelo yeo e bolokago sekgoba sa rena go tšwetša pele dipholisi tšeo di thekgago tlhabollo ya intasteri le mešomo yeo e lego ntlhakgolo ya maikemišetšo ao a laeditšwego ka gare ga Lenaneohlabollo la Bosetšhaba (NDP).
Afrika Borwa e tiišeditše bohlokwa bja mekgwa ye e akaretšago le ye e lego ya dinagantši ka botlalo go dira mošomo wa WTO bjalo ka ge o swanela dipoelo tše di lekanago, tše di lekaneditšwego tšeo di kgotsofatšago dikgahlego tša Maloko ka moka.
2.5. Kabinete e tsebišitšwe ka ga Maraka wa Setšhaba wa Bohlabela le Borwa bja Afrika – Setšhaba sa Bohlabela bja Afrika – Kwano ya Kgwebišano ya Mahala ya Seboka sa Boraro ya Setšhaba sa Tlhabollo ya Borwa bja Afrika (COMESA-EAC-SADC) (TFTA) gomme gape e amogetše maemo a Afrika Borwa ka ga TFTA. Kgato ya Seboka sa Boraro ke protšeke ye bohlokwa ye e etilwego pele ke Afrika ye maikemišetšo a yona e lego go godiša diekonomi tša sekala, go dira gore go be phadišano, phapantšho, go hlohletšamolokeloke wa dikgwebo tša selete, peeletšo le kgwebišano ya ka gare ga selete le peeletšo, mananeokgoparara a go kgabaganya mellwane.
Afrika Borwa e tsenela dipoledišano bjalo ka karolo ya Yunione ya Borwa bja Afrika ya Metšhelo (SACU) yeo e tsenelago dipoledišano bjalo ka setheo setee. Dinaga tša Seboka sa Boraro di kopantše palomoka ya boleng bja ditšweletšwa tša naga mo ngwageng go ba US$1.2 trilione le batho ye e kopantšwego ya go batamela batho ba dimilione tše 626 milione, tše di emalago seripa sa ka godimonyana sa palomoka ya batho ya Afrika le ekonomi. Kopantšho ya selete go aga mebaraka ye megolo ya kgolo ye e akgofisitšwego le ye e swarelelago ka Afrika ke kgato ye bohlokwa ya go fenya bohwa bja sekoloniale bja mebaraka ye mennyane ya Afrika ye e arogantšwego.
2.6. Kabinete e tsebišitšwe ka ga ditšhišinyo tša samiti ya G20 ya Brisbane tša mokgwa wa go phegelela kudu, tšeneletša le go kgona go laola lekala la matlotlo. Se se kgatha tema go seemo sa go se fetoge le tielelo ya matlotlo ye e tšwelago pele ya mokgwa wa matlotlo wa selegae le wa lefase ka bophara. Go latela Mathata a Ekonomi a Lefase ka Bophara a 2008, Baetapele ba G20 ba ikgafetše go phetogo ya motheo go mokgwa wa matlotlo wa lefase ka bophara. Maikemišetšo a bona ke go kopantšha mabaka ao a bakilego mathata a lefase ka bophara le go aga methopo ya go swarelela le go feta, ye e bolokegilego ya matlotlo go kgotsofatša bokaone dinyakwa tša ekonomi ya makgonthe.
Mo mengwageng ye mehlano ya go feta, G20 e lebante go šoganeng le mabaka ao a bakilego mathata, ka go matlafatša ditekanetšo tša boditšhabatšhaba go aga diinstitšhušene tša matlotlo tse di tieletšego le go feta le mebaraka ye e tielego le go feta. Samiti ya Brisbane e feditše kgato ya mathomo ya tsošološo ya ekonomi, gomme go tšwela pele Boto ya Tiišo ya Matlotlo e tla fetola tebantšho ya yona go ya go fokotša dikotsi le mafokodi a maswa a a fetogago ka mehla. Afrika Borwaa e tla tswela pele go kgatha tem aka gare ga Boto ya Tiišo ya Matlotlo le diforamo tša taolo tše di amegago tšeo di šomago go godiša mokgwa wo o theilwego godimo ga tshepagalelano le tšhomišano tšeo di lego bohlokwa go hlokomedišiša mokgwa wa matlotlo wa lefase ka bophara wo o bulegilego woo o kago fihlela maikemišetšo a G20 a kgolo ye e lekanetšego, ya go tia le go swarelela.
2.7. Kabinete e amogetše le go dumelela ditharollo tša kopano ya Lekgotla la Mopresidente la Peakanyo (PCC) le le bego le swerwe ka la 18 Hlakola 2014, bakeng sa phethagatšo. Ditharolo tše bohlokwa di akaretša:
(a) tshepelelano le phethagatšo ya NDP go laetša kgatelopele ye e dirilwego ke lekala la mmušo la selegae phethagatšong ya NDP. Dikgoro tša bosetšhaba tša mmušo, Kgomišene ya Bosetšhaba ya Peakanyo le diprofense go kgonthišiša gore dipeakanyo tša masepala di sepelelana le NDP le dipeakanyo tše dingwe tša bosetšhaba;
(b) go šomana le dinyakwa tša bokgoni tša maemo a mararo a mmušo go thekga mebasepela go phethagatša dithomo tša wona;
(c) phihlelelo ya lebelo ya mmušo wa selegae wo o fetogago le go šomana le mapheko ao a amanago le go fihlelela pušo ya masepala ye botse ye e lekanago, šomana le ditlhohlo tše di amanago le dipatrone tša sekgoba sa kgethollo ka ditoropong le ditoropongkgolo.
2.8. Kabinete e tsebišitšwe ka ga ditokišetšo tša Dikgetho tša Mebasepala tša 2016 gomme e amogetše tlhomo ya Sehlophatšhomo sa Ditona tša Dikgoro le Sehlophatšhomo sa Sethekniki ka ga Dikgetho tša Mebasepala. Gape kabinete e amogetše thomelo ya phetošo go Molao wa Dibopego tša masepala: Pušoselegae wa 1998 (Molao wa 117 wa 1998) Palamenteng, gore Mopresidente (peleng e be e le Tona) go bea letšatšikgwedi la dikgetho tša makgotla a mebasepala ka moka. Dikgetho tša mebasepala tša 2016 e tla ba dikgetho tša bone go tloga mola re tsenago ka gare ga temokrasi gomme ditokišetšo tše di šetšego di gatetše pele di kgonthišiša gore dikgetho tše di a atlega go no swana le tše di fetilego.
3. Melaokakanywa
3.1. Kabinete e amogetše thomelo ya Molaokakanywaphetošwa (Melato ya Thobalano le Ditaba tša go Amana Nao) wa Molao wa Bosenyi Palamenteng. Molaokakanywa o bolela ka dikahlolo tše pedi tša go se swane tša Kgorotsheko ya Molaotheo, ka go fetola dikarolo tše di amegago tša Molao wa Phetošo (Melato ya Thobalano le Ditaba tša go Amana Nao) wa Molao wa Bosenyi wa 2007, go lokiša maemo a bjale a a sa kgotsofatšego go ya ka molaotheo. Maikemišetšo a magolo a dikarolo tša 15 le 16 tša Molao, ebago go šireletša bana ba ba lego kotsing kgahlanong le tlaišo ya thobalano ka batho ba bagolo, di sa ntše di sa angwe ke diphetošo tše di šišintšwego.
Phetošo ye e šišintšwego ya dikarolo tša 50 le 51 tša Molao di ikemišetša go phethagatša molao wa go re dikgahlego tše kaone tša bana di bohlokwa kudu ditabeng ka moka tša go ba ama.
3.2. Kabinete e amogetše tsebišo ya Molaokakanywaphetošwa wa Ditabana tša Boahlodi wa 2014 Palamenteng. Molaokakanywa o fetola Melao ya go balega, ye e laolwago ke Kgoro ya Toka le Tlhabollo ya Molaotheo, go šomana le ditlhohlo tša sethekniki le tša tirišo, ka kgopolo ya go kaonafatša boikarabelo le bokgoni bja mokgatlo.
3.3. Kabinete e amogetše tsebišo ya sengwalwa sa Molaokakanywapetošwa wa Dipanka wa 2014 ka Palamenteng. Phetošo go Molao wa Dipanka wa 1990 (Molao wa 94 wa 1990) go oketša bohlokomedi bja dipanka go dira gore lekala la matlotlo le bolokege le go šireletša babei. Go hlohleletšeng mošito wa mokgwa go panka go bohlokwa go thea taolo le tlhokomelo ya dipanka godimo ga ditekanetšo tša boditšhabatšhaba le tshepedišo ye kaone.
Molaokakanywa o nyaka go oketša maatla a mohlokomedi wa panka mola e le ka fase ga bohlokomedi ka:
(a) go aba tsela ye nngwe ya tsošo ya panka ka gare ga setheo se se lego gona sa kgwebišano,
(b) go sepetša phetišetšo ya kgwebo ka moka goba karolo ya panka go setheo se se hlahlamago go latela phetišetšo ka fase ga karolo ya 54 ya Moao wa Panka; le
(c) go sepetša phethagatšo ya dikgato tša ka godimo ka mohlokomedi.
4. Maemo a Kabinete Ditabeng tša Bjale
4.1. Kabinete e leboga tšhomišano gare ga mmušo, lekala la setšhaba le thuto kgodišong ya thuto ya baswa le matlafatšo, tšeo di dirilego gore go thakgolwe Thusanani Foundation ka Mopresidente Jacob Zuma. Mokgatlo wa go dire poelo wa go etwa pele ke baswa o tla tswalela sekgala sa tshedimošo ya thuto gare ga baithuti ba dikolo tše di phagamego tša dinagamagaeng le balekani ba bona ba dinagasetoropong, woo ka go le lengwe o tlogo kaonafatša mošomo wa thuto. Diskolašipi tše pedi tša thuto, Pixley ka Isaka Seme Scholarship Fund le Johnstone Mfanafuthi Makhatini International Scholarship Fund di tla thakgolwa.
4.2. Kabinete e thabišitšwe ke go fihla ga ditopo tša bahu ba maAfrika Borwa bao ba bolailwego phuhlamomg ya moago go la Lagos, Nigeria ka la 12 Lewedi 2014.
Kabinete e leboga maiteko a mešegofela a bao ba kgathilego tema tshepedišong ya pušo ya ditopo gomme e leboga tšhomišano ye e amogetšwego go tšwa go bahlankedi go la Nigeria ka go akgofiša tshepedišo ye e filwego go ya ka mathata a yona.
Mmušo o tšwela pele go thekga malapa a a amegilego gomme o tshepha gore se se tla ba thuša go fihlelela mafelelo. Re tla matlafatša maiteko a go kgonthišiša gore ditopo tša maAfrika Borwa a 11 ao a sa swanelago ke go hlaolwa go la Nigeria, a bušwa gae ka ponyo le leihlo. Kabinete e laetša tebogo ya yona go maAfrika Borwa ka moka bakeng sa go kopana nakong ye ye boima.
Kabinete e romela mantšu a yona a kwelobohloko go lapa la Dennis Furhri yoo a hlokofetšego mola a romilwe bjalo ka karolo ya pušo ya ditopo tša bahu a maAfrika Borwa ao a hlokofetšego ge kereke e phuhlama go la Nigeria ka la 12 Lewedi 2014. Afrika Borwa e lobile mošomedi wa mmušo yoo a nago le boikgafo le boineelo.
4.3. Kabinete e amogela go thwalwa ga sehlopha sa go ikemela sa go nyakišiša ditiro tša bosenyi tše di begilwego ke bahlankedi ba bjale le ba maloba ba Tirelo ya Afrika Borwa ya Motšhelo (SARS) gomme e hlohleletša maloko a setšhaba go dumelela sehlopha sebaka sa go fetša dinyakišišo tša sona.
Dikgato tše ga di a swanela go tloša rekoto ye e laeditšwego ya SARS bjalo ka setheo sa setšhaba se e lego mmotlolo seo se kgonthišišago gore naga e na le matlotlo go gore e kgone go fihlelela maikgafo a yona a go fapana a ekonomi le leago.
4.4. Kabinete e amogela kopano gare ga boto ya Tirelo ya Afrika Borwa ya Difofane, Tona ya Dikgwebo tša Mmušo Lynne Brown le Tona ya Matlotlo Nhlanhla Nene go boledišana ka tšwetšopele ya khamphani ya difofane gomme ba letetše gore kgato ye e fihlelele dipoelo tše di botse tša senamelwa sa bosetšhaba sa moyeng le go e bušetša tseleng ya go dira poelo le pušo ye botse.
4.5. Cabinet Kabinete e thekga phetolo ya Kgoro ya Bosetšhaba ya Matlotlo ya go re sephetho sa Moody sa go fokotša maemo a kelo ya dikoloto ya kereiti ya peeletšo ya Afrika Borwa go “Baa2 / P-2” go tswa go “Baa1 / P-2” le go boeletša maemo a dikoloto go ya go kgwahlelelogo tšwa go tekateko, e tla nakong ya lebaka la kgolo ya go nanya ya ekonomi.
Kabinete e boeletša gore Tlhako ya Maano ya Lebaka la Magareng e šetše e bea pele diprotšeke tša go hlohleletša kgolo go swana le diprotšeke tše kgolo ka diporo, enetši le maemakepe ao a tlogo thekga peeletšo. Tebantšho ka gare ga lebaka la magareng e tla ba phakišišong ya diphetogo tša sebopego tšeo di tšwelago pele ka se sebaka gomme tšeo khuetšo ya tsona e tlago thekga kgolo ya ekonomi.
4.6. Kabinete e tšhošitšwe le go nyamišwa ke maitshwaro a go se be botse a maloko a mangwe a Palamente. Maitshwaro a bjalo a kgahlanong le moya o mobotse wa ntwa ya rena ya tokologo gomme e fapoga leetong le re le tšeerego mo Mengwageng ya rena ye 20 ya Tokologo.
Seriti sa Palamente bjalo ka institšhušene ya temokrasi se swanetše go šireletšwa le go hlokomelwa ke maolko ka moka. Maitshwaro a go se laolege a khupetša go ba le maikarabelo go maAfrika Borwa ka moka gomme go tloša karolo ya Palamente ya go thekga maitshwaro le melawana ye e laeditšwego ka gare ga Molaotheo.
5. Ditiragalo tše di tlago
5.1. Mopresidente Jacob zuma o tla tsenela kopano ya Komišene ya Ditšhabapedi ya Afrika Borwa le Botswana (BNC) go la Gaborone, Botswana ka la 20 Dibatsela 2014. BNC e dula e le sebaka sa bohlokwa sa go matlafatša dikamano tša dinaga tše pedi le tšhomošano.
5.2. Mopresidente Zuma o tla amogela Mopresidente wa Palestina Mahmoud Abbas go la Pretoria go tloga ka la 26 go fihla ka la 27 Dibatsela 2014. Ketelo ye e tla thewa godimo ga dikamano tša botho, tša go tia gare ga Afrika Borwa le Palestina, tšeo di thomilego ntweng ya tokologo. Dinaga tše tše pedi di šetša go dikamano gare ga Afrika Borwa le Palestina, Tshepedišo ya Khutšo Bohlabelagare le ka fao Afrika Borwa e ka tswelago pele go thusa go ntwa ya Palestina ya tokologo le go itšeela diphetho.
5.3. Motlatšamopresidente Cyril Ramaphosa o tla tsenela samiti ya Turkey ya 2 ye e tlago swarelwa Malabo, Equatorial Guinea ka la 21 Dibatsela, 2014. Morero wa Samiti ke go sekaseka kgatelopele ye e dirilwego ke “Peakanyo ya Mohlakanelwa ya Phethagatšo ya Tšhomišano ya Afrika-Turkey ya 2010-2014”. Tšhomišano ye e kgatha tema hlabollong ya Afrika go ya ka maikemišetšo a a beilwego ke Lenanethero la Ditšhabakopano la 2063.
Motlatšamopresidente Cyril Ramaphosa, bjalo ka modulasetulo wa Lekgotla la Afrika Borwa la Bosetšhaba la EITSE (SANAC), o tla keteka Letšatši la Lefase la EITSE ka la 1 Manthole 2014 go la Virginia, Lejweleputswa, ka Foreistata ka fase ga kgwekgwe ye: “Lefela la Dihlong le Kgethollo”. Afrika Borwa e dirile kgatelopele ye kgolo ka go šoma go ya phihlelelong ya diphegello tša Peakanyo ya Bosetšhaba ya Maano ya HIV le EITSE, TB le Malwetši a go fetla ka thobalano 2012 – 2016. Go hloka mahlatse, dihlong le kgethollo di phethagatšo ye e atlegago ya leano le gomme e kgathile tema tšhomišong ya fase ya ditirelo tša go thibela HIV.
Kabinete e ipiletša ditšhabeng ka moka go thekga, hlokomela le go amogela bao ba phelago ka HIV le EITSE. Maafrika Borwa ka moka a hlohleletšwa go šomiša thobalano ye e bolokegilego, go dira diteko tša HIV bonnyane gatee ka ngwaga gore ba dire diphetho tša maleba ka ga magato a thibelo, kalafo, tlhokomelo le thekgo; le gore banna le bašemane ba šomiše ditirelo tša lebollo la banna la sebjalebjale.
5.4. The Kgoro ya Mereo ya Tikologo e tla kgatha tema ka tulong ya 20 ya Khonferentshe ya Dinagamaloko (COP 20) le tulo ya 10 ya Khonferentshe yaDinagamaloko ye e lego bjalo ka Kopano ya Kwano ya Kyoto Protocol (CPM10), e tlago swelwa go la Lima, Peru go tloga ka la 1 go fihla ka la 12 Manthole 2014. Khonferentshe ya Lima ya Phetogo ya Klaemete e bohlokwa bakeng sa sephetho se se atlegilego sa poledišano ya kwano ya 2015. Maemo a amogetšwego a Afrika Borwa dipoeldišanong a sepelelana le kgahlego ya bosetšhaba ya naga le NDP.
5.5. Kgoro ya Bosetšhaba ya Bokgabo le Setšo, le Kgoro ya Profense ya Gauteng ya Dipapadi le Boithabišo di tla swara tikologo ya bobedi ya Letšatsi la Dipapadi le Setšo la Nelson Mandela kua Union Buildings, Pretoria ka la 22 Dibatsela 2014 ka fase ga kgwekgwe ye: KOPANANG: Monna wo Motee, Setšhaba se Setee, Moketeko o Motee.
Kabinete e hlohleletša maAfrika Borwa go kgathatema ka dipapading tša setšhaba le mediro ya setšo ka ge bobedi di na le maatla a go kopantšha maAfrika Borwa ka moka. Tiragalo gape ke sebaka sa go leboga maitshwaro a Mopresidente wa maloba Nelson Mandela le go laetša ditsela tšeo re kago tšwela pele ka bohwa bjo ka tšona.
5.6. Kabinete e amogetše segopotšo sa Matšatši a 16 a Ntwa ao a laetšago segopotšo sa mengwaga ye 16 ya lesolo, go thoma ka la 25 Dibatsela go fihla ka la 10 Manthole. Kgwekgwe ya ngwaga wo ke “Nkakaretše, Mmogo re tšwetša pele Afrika Borwa ya khutšo. Ka kgwekgwe ye, lesolo la 2014 le ikemešetša go tšwela pele go tšweletša temošo go tšhireletšo ya basadi le bana. Kgwekgwe gape e lebantšha kudu go kuauwetšong ya banna bjalo ka bašomišane ka lesolong le go gana leuba le.
6. Bao ba thwetšwego mošomong
Kabinete e amogetše go thwalwa mošomong ga batho ba ba latelago:
6.1. Morena Thobile Maxin Lamati o thwetšwe bjalo ka Molaodipharephare ka Kgorong ya Bašomi.
6.2. Mohumagadi Nthabiseng Bernadette Makhatha o thwetšwe mošomong bjalo ka Motlatšamolaodipharephare: Mekgwa le Ditekanetšo ka Lekaleng la Afrika Borwa la Dipalopalo.
6.3. Maloko a e sego a Phethišo go Boto ya Etšentshi ya Melato ya Sepethephethe sa Tsela.
a) Mohumagadi Nomini Elizabeth Rapoo (o thwetšwe gape bjalo ka Modulasetulo),
b) Mohumagadi Nomusa Zethu Qunta;
c) Profesa Tebogo Job Mokgoro;
d) Morena Bryan Shuan Chaplog;
e) Morena Benedict Matinise; le
f) Ramolao Xolisile Khanyile.
6.4. Morena Lefadi Lucas Makibinyane o thwetšwe mošomong bjalo ka Mohlankediphethiši wa Amatola Water.
6.5. Boto ya Balaodi ya Khamphani ya Mokgatlo wa Inšorense ya Dikotsi tša Go Ikgetha ya Afrika Borwa.
a) Morena Mohamed Adam Samie (o thwetšwe gape bjalo ka Modulasetulo);
b) Morena Ranti Mothapo (Motlatšamodulasetulo); le
c) Morena Stephanus Hermanus Schoeman.
Dipotšišo:
Morena Donald Liphoko
Kgokagano: 082 901 0766
