A. Merero ye Bohlokwa Seemong sa Bjale
1. Ikonomi
1.1. Polelo ya Pholisi ya Tekanyetšo ya Peakanyo ya Mošomo wa Lebaka la Gare (MTBPS) ya 2025
1.1.1. Kabinete e amogetše Polelo ya Pholisi ya Tekanyetšo ya Peakanyo ya Mošomo wa Lebaka la Gare ya 2025 bjalo ka karolo ya go tšwela pele ka maitapišo a mmušo a go sepetša kgolo ya ikonomi, go hlola mešomo le go šogana le ditheko tša godimo.
1.1.2. MTBPS e tsebagaditše go šuta go tloga go nepo ya seemo sa paka ya infleišene go ya go infleišene ya 3%. Dikholego tša infleišene ya tlase mo maemong a letseno la motho di akaretša thibelo ya go oketšega ga ditheko, tšweletšopele ya boematia bja ditheko, bjoo bo šireletšago maatla a go reka a bareki, go thekga kabo ya letseno leo le lekalekanago, le tšhireletšo ya tšhelete ye e bolokilwego. Mo maemong a tekolo ya ikonomi ka botlotla, nepo ke go thekga boleng bja dipeeletšo le go kaonafatša boematia bja ranta, e lego dilo tšeo di lego bohlokwa tabeng ya go ba le tshepo ga babeeletši gape le go kgolo ya ikonomi. Sehlopha sa sethekniki sa Kgoro ya Matlotlo ya Bosetšhaba/Panka ya Risefe seo se tlilego ka maele a gore phetogo ye e be gona ka maemong a Pholisi ya Ditšhelete, se ile sa tšeela hlogong gape le mafokodi a go šuta fa, efela Kabinete e ile ya botšwa gore wo ke mokgwa wo mokaonekaone go naga ka nako ye.
1.1.3. MTBPS e ile ya tiišeletša leboelela boikgafo bja mmušo bja go kaonafatša kabo ya ditirelo tše bohlokwa tše bjalo ka maphelo, thuto, le tšhireletšo ya bahloki ka dimphiwafela, mola ebile o dira dipeeletšo ka mananeokgoparara a setšhaba a bjalo ka mohlagase, meetse le dinamelwa.
1.2. Sabei ya Bašomi ya Kotara e Bega gore go bile le Mešomo ye 248 000 yeo e Hlotšwego ka Kotareng ya Boraro ya 2025
1.2.1. Kabinete e amogetše Sabei ya Bašomi ya Kotara ya Setheo sa Dipalopalo sa Afrika Borwa (StatsSA) yeo e begilego gore go bile le mešomo ye 248 000 yeo e hlotšwego ka Kotara ya Boraro ya 2025, gomme se se oketša palo ya batho bao ba šomago go ya go dimilione tše 17.1, gomme palo ya bao ba hlokago mešomo e theogile ka diphesente tše 1.3 go ya go 31.9% ka kotareng yeo.
1.2.2. Ka mešomo ye mentši yeo e bilego gona ka go tša dikago, ka ditirelong tša setšhaba le leago, le ka makaleng a kgwebišano, Kabinete e thabišwa ke tlholo ya mešomo ka dikarolong tše bohlokwa tša ikonomi. Mešomo ye mentši ka go tša dikago e sepelelana le go bewa pele ga tlhabollo ya mananeokgoparara ka mmušo, yeo e thekgwago ke tekanyetšo ya mananeokgoparara ya trilione ye tee ya diranta ka ge e tsebišitšwe nakong ya Tekanyetšo ya 2025 gomme ya tiišeletšwa gape ka MTBPS ya 2025.
1.3. Baeti ba Dimilione tše 7.6 bao ba Etetšego ka Nageng Magareng ga Pherekgong le Lewedi 2025
1.3.1. Kabinete e amogetše palo ya dimilione tše 7 634 261 tša baeti ba boditšhabatšhaba bao ba etetšego ka mo nageng magareng ga Pherekgong le Lewedi 2025, gomme ye ke koketšego ya go kgahliša ya baeti ka palo ya 1 108 222 ge e bapetšwa le ka yona nako ye ka 2024, gomme se ke bohlatse bja gore Afrika Borwa ke lefelo la go ratwa ke baeti ba bantši lefaseng.
1.3.2. Mebaraka ye bohlokwa ye tiilego yeo e bilego le seabe go kgolo ye ke Bohlabela bja Gare ka 58%, palo ya ba go tšwa Yuropa e gotše ka 29%, mebaraka ye bohlokwa ka Afrika e gotše ka 28%, Amerika Leboa ka 22%, gomme Asia ka 11%.
1.4. Biovac ya Afrika Borwa e Tšweletša Moento wa Kholera – e lego wa Mathomothomo Historing ya Meento ye e Tšweleditšwego ka Afrika Borwa
1.4.1. Kabinete e lebogišitše Biovac le Kgoro ya Maphelo le ya Saense, Theknolotši le Bohlami ge ba tsebagaditše moento wa mathomo wo o tšweleditšwego ka Afrika Borwa mo historing ya naga ye.
1.4.2. Bokgoni bja Biovac bja go tšweletša moento wa kholera ka Afrika Borwa ke taetšo ya kgatelopele ya Afrika Borwa ka go tša bokhemese, saense le theknolotši, gomme e tloga maemong a go no ba mmeakanyi wa merwalwana ya meento, go swana le ka moento wa BNG, go ya go a go ba le bokgoni bja go tšweletša moento. Tšhomišano le Biovac le Lekgotla la Diphatišišo tša Saense ya Bomotho (HSRC) le CSIR e laetša bokgoni bja mmušo bja go šogana le ditlhohlo tša naga.
1.4.3. Kabinete e na le boitshepo go kgathotema ya Biovac, le bašomišani ba yona, bja gore e ka fediša malwetši ka Afrika Borwa le ka Afrika ka moso ka go tsweletša meento yeo e šetšanego le profaele ya malwetši ya kontinente ye.
2. G20
2.1. Go Šetše Matšatši a Senyane, mmogo le Boitokišetšo bja Samiti ya G20
2.1.1. Ka matšatši a senyane (9) ao a šetšego gore Samiti ya Baetapele ba G20 e swarwe ka la 22 le 23 Dibatsela 2025 ka NASREC, Johannesburg, Kabinete e na le boitshepo go boitokišetšo bja Afrika Borwa bja go tlo swara Samiti ya G20 ya mathomothomo ye e atlegilego kontinenteng ya Afrika.
2.1.2. Mmušo o itokišitše go tlo swara Samiti ya Leago ya G20 mo matšatšing a mahlano (5) go tloga ka la 18 go fihla ka la 20 Dibatsela 2025 Hoteleng ya Birchwood le Senthareng ya Dikhonferense ya OR Tambo ka Ekurhuleni.
2.1.3. E sa le go tloga mola e tšeago maemo a go ba Mopresidente wa G20, Afrika Borwa e šetše e swere dikopano tše 130 tša boitokišetšo tšeo di sa kago tša ba le mathata, gomme naga ye e šomišitše monyetla wo go kwalakwatša diprofense tša rena le go fapafapana ga tšona, gape le mafelo a boeti. Diprofense ka moka di ile tša swara ditiragalo tša boitokišetšo tša G20.
2.1.4. Maano ao a feletšego a polokego le tšhireletšo bakeng sa Samiti ya Baetapele le Samiti ya Leago a laolwa le go kgokaganywa ke ditheo tša maleba tša tšhireletšo. Mopresidente o tla sepelasepela le go bona NASREC ka Labohlano la 14 Dibatsela 2025.
2.1.5. Kopano ya boraditaba ya Maemo a Boitokišetšo bja G20 e tla swarwa ka Lamorena la 16 Dibatsela 2025 go netefaletša badudi le batšeakarolo ba lefase ka boitokišetšo bja naga ye, go balwa le diphihlelelo tšeo di bilego gona e sa le Afrika Borwa e tsorama Bopresidente bja G20 ka Dibatsela 2024.
3. Mohlagase
3.1. Kabinete e amogetše tsebišo ya Eskom ya gore Setheotaolo sa Bosetšhaba sa Nutliliere se dumeletše go katološwa ga laesense ya Koeberg Unit 2 ka mengwaga ye 20, gomme se se e kgontšha go tlo šoma go fihla ka la 9 Dibatsela 2045. Ye ke phihlelelo ye bohlokwa yeo e matlafatšago tšhireletšo ya nako ye telele ya mohlagase wa Afrika Borwa, gape ebile e bonagatša boikgafo bja Eskom go melawana ya polokego ya nutliliere ya maemo a lefase.
3.2. Kabinete e tšwetše pele ya amogela tsebišo ka Setheotaolo sa Bosetšhaba sa Enetši sa Afrika Borwa (Nersa) ya go ngwadišwa ga mafelo a tsweletšo a 181 nakong ya kotara ya bobedi ya ngwaga wa ditšhelete wa 2025/26.
3.3. Mafelo a ge a kopane a kgona go tšweletša mohlagase wa dimekawate tše 1 401, gomme a na le boleng bja dipeeletšo tšeo di ka balelwago go R30.78 bilione.
4. Tša Boditšhabatšhaba
4.1. Afrika Borwa e Kgethilwe go ba Modulasetulo wa Motšwaoswere wa SADC Samiting ya Maemo a go Ikgetha ya Dihlogo tša Dinaga tša SADC
4.1.1. Kabinete e ile ya begelwa tša gabjale mabapi le dipoelo tša Samiti ya Maemo a Go Ikgetha ya Dihlogo tša Dinaga le Mebušo tša SADC yeo e bego e swerwe ka la 7 Dibatsela, gomme gona Samiting yeo Afrika Borwa e ile ya kgethwa go ba Modulasetulo wa motšwaoswere wa SADC go fihla ka Phato 2026.
4.1.2. Bodulasetulo bja Afrika Borwa bja Motšwaoswere bja SADC go fihla ka Phato 2026 bo tla tšwela pele ka lenaneo la Madagascar leo SADC e dumelelanego ka lona la “Phetolelaintastering, Phetošo ya Temo, le Phetogo ya Enetši bakeng sa SADC ye e Kgotlelelago”.
4.1.3. Afrika Borwa e ba Modulasetulo wa motšwaoswere go latela go ikgogela morago ga Madagascar go tšwa Bodulasetulong gore e kgone go šetšana le go bušetša dilo sekeng ka nageng yeo go latela megwanto ya setšhaba yeo e sa tšwago go ba gona.
4.1.4. SADC e lebogišitše Moprofesa Peter Mutharika, Mopresidente wa Riphabliki ya Malawi; Ngaka Patrick Herminie, Mopresidente wa Riphabliki ya Seychelles; le Ngaka Samia Suluhu Hassan, Mopresidente wa Riphabliki ye e Kopanego ya Tanzania, ge ba kgethilwe dikgethong tša ka dinageng tša gabobona mo nakong ye e sa tšogo feta.
4.1.5. SADC e rometše matshedišo go malapa ao a lobilego maloko a ona nakong ya megwanto yeo e bilego gona ka Riphabliking ya Madagascar ka Lewedi mmogo le, mo nakong ye e sa tšwago go feta, ka Riphabliking ye e Kopanego ya Tanzania.
4.2. Phetišetšo ya Babonwamolato: Go Obamela Kotlo ka Afrika Borwa
4.2.1. Kabinete e begetšwe ka ga kgatelopele mabapi le dikgopelo tša phetišetšo ya babonwamolato go tšwa go Botswana le Malawi.
4.2.2. Kabinete e tiišeleditše leboelela taba ya gore batho ka moka bao ba latofatšwago ka bosenyi ba swanetše ba lebane le molao ka Afrika Borwa gomme ba rwešwe maikarabelo ka botlalo go ya le ka molao, gomme Kgoro ya Toka le Tlhabollo ya Molaotheo e ikgafile go ipobola ka ga sephetho sa kgorotsheko ya Malawi mabapi le Morena Bushiri.
B. Diphetho tša Kabinete
1. Phetošo ya Pholisi ya Boemedi bja Mmušo bja Semolao
1.1. Kabinete e dumeletše go fetošwa ga Pholisi ya Boemedi bja Mmušo bja Semolao. Nepo ya phetošo ye ke go dumelela boemedi bja semolao bja bašomi ba Mmušo, go akaretša le bašomi ba mmušo ba peleng, maloko a boahlodi le maloko a khuduthamaga go thuša mo go hlokegago, go latela phethagatšo le mokgwatšhomo wa mešomo ya bona ka maemong a bjalo.
1.2. Phetošo ye e tlo akaretša bašomi ba mmušo, maloko a boahlodi le maloko a khuduthamaga ge a biditšwe go thuša Dikhomišene tša Dinyakišišo, go latela phethagatšo le mokgwatšhomo wa mešomo ya bona bjalo ka bašomi ba mmušo, maloko a boahlodi le maloko a khuduthamaga.
2. Afrika Borwa e Thoma ka Maikemišetšo a yona a go yo Iteka go tlo ba Monggae wa Dipapadi tša Diolimpiki tša 2036 goba tša 2040
2.1. Kabinete e dumeletše Afrika Borwa go tsenela Poledišano ye e Tšwelago Pele le IOC bjalo ka karolo ya maikemišetšo a yona a go nyaka go ba monggae wa Dipapadi tša Diolimpiki tša 2036 goba tša 2040. Poledišano ye e tšwelago pele le IOC ke poledišano ya mathomo ebile ya go iteka yeo e lego bohlokwa go tšweletšapele maikemišetšo a Afrika Borwa a go nyaka go ba monggae wa Dipapadi tša Diolimpiki tša 2036 goba tša 2040.
2.2. Kabinete e na le boitshepo bja gore Afrika Borwa e itokišitše go swara Diolimpiki ka baka la mananeokgoparara ao a šetšego a le gona ka mo nageng.
3. Lenaneotiro la Bohlano la go Šomišwa ga Bana (CLPA) Bakeng sa Afrika la 2025 – 2029
3.1. Kabinete e dumeletše CLPA ya Bohlano, yeo e šomago bjalo tlhako ya bosetšhaba ya go lwa le go šomišwa ga bana. CLPA ke lesolo leo le etilwego pele ke mmušo leo le nepilego go matlafatša melao le phethagatšo, go tliša temošo setšhabeng le maitapišo a kgokagano le setšhaba go thekga bana bao ba amilwego ke tšhomišo ya bana. Ka go ithuta go tšwa magatong a peleng, legato la bohlano le nepile go kaonafatša dikimollo tšeo di kopantšwego ebile di nepišitšwego, ka go gatelela taba ya go bona ka pela mmogo le thekgo ye e feletšego bakeng sa bana bao ba lego kotsing le bao ba amegilego.
4. Go Tlošwa ga Seemo sa Tlhokomelo ya Pebble Bed Modular Reactor (PBMR)
4.1. Kabinete e dumeletše go tlošwa ga seemo sa tlhokomelo ya Pebble Bed Modular Reactor (PBMR) go dumelela Afrika Borwa go tšwela pele go hlama theknolotši ya PBMR.
4.2. Sephetho se se tla kaonafatša phišegelo ya Afrika Borwa ya go kgatha tema ka sedikong sa sebešeletši sa nutliliere gomme se tla bea naga ye maemong a go bapala karolo ka tlhabollong ya Theknolotši ya Riekthara ya Motšula ye Nnyane.
4.3. Kabinete e dumeletše gape le go fetišetšwa ga khamphani ya Pebble Bed Modular Reactor go tloga Eskom go ya NECSA.
C. Melaokakanywa
1. Molaokakanywa wa Boetapele bja Setšo le bja MaKhoi-San
1.1. Kabinete e amogetše go išwa ga Molaokakanywa wa Boetapele bja Setšo le bja MaKhoi-San wa 2025 Palamenteng. Molaokakanywa wo o arabela kahlolo ya Kgorotsheko ya Molaotheo yeo e ahlotšego ka gore Molao wa Boetapele bja Setšo le bja MaKhoi-San wa 2019 ga se wa maleba, ka baka la go hlaelela ga kgathotema ya setšhaba go wona pele o tla dumelelwa Palamenteng.
1.2. Ka 2024, Kabinete e ile ya dumelela go phatlalatšwa ga Molaokakanywa wo o mpshafaditšwego wa Boetapele bja Setšo le bja MaKhoi-San gore setšhaba se fe ditshwayatshwayo ka wona. Molaokakanywa wo o mpshafaditšwego wo o tlo fa Palamente monyetla wa go obamela kahlolo ya Kgorotsheko ya Molaotheo. Molao wa Boetapele bja Setšo le bja MaKhoi-San wa 2019 o be o tsene legatong la Molao wa Boetapele bja Setšo le Tlhako ya Pušo wa 2003.
D. Bao ba thwetšwego mešomomong
Batho ka moka bao ba thwetšwego mešomong mangwalo a bona a thuto a tla kgonthišišwa le go tiišeletšwa ka mekgwa ya maleba.
1. Morena Mashwahle Joseph Diphofa o thwetšwe bjalo ka Molaodipharephare (DG) ka Kgorong ya Merero ya Setšo (konteraka ya gagwe e mpshafaditšwe).
2. Go Thwalwa ga Balaodi bao Esego ba Phethišo go Panka ya Naga
i. Morena Basil Mpumelelo Maseko; le
ii. Mme Siphumelele Balungile Dlungwane.
3. Go Thwalwa Leswa ga Balaodi bao esego ba Phethišo go Boto ya Panka ya Tlhabollo ya Afrika Borwa
iii. Morena Kenneth Willy Brown; le
iv. Mme Dinao Modirwadi Lerutle.
4. Go Thwalwa ga Maloko a Boto ya Setheo sa Bosetšhaba sa Tlhabollo ya Enetši sa Afrika Borwa (SANEDI)
i. Morena Sicelo Goodwill Xulu (modulasetulo)
ii. Mme Nonkosi Koranteng (motlatšamodulasetulo)
iii. Moprofesa Anastassios Pouris, le
iv. Mme Octavia Matshidiso Matloa
E. Tša Gabjale go Kabinete
1. Sekhwama sa go Thuša Dikhamphani tše Nnyane tša Meepo ka Ditšhelete (JMEF)
1.1. Kabinete e filwe ditaba tša gabjale ka ga mošomo wa JMEF, go balwa le kgatelopele ka ga kabo ya ditšhelete go tšwa go Sekhwama se mmogo le maano a go fetoša JMEF gore e be sekhwama se ikemetšego. Kabinete e dumeletše JMEF ka 2022 go thekga dikgwebo tše nnyane tša meepo gore di kgone go dira mešomo ya go amana le go epa. Nakong yeo, sekhwama se se be se na le nepo ya go gokagoketša bonnyane 5% tša tšhomišo ya tšhelete ka tša meepo gore di tle ka Afrika Borwa.
1.2. E sa le go tloga mola se thomago, sekhwama se se hlomile ditheo tša pušo sa ba sa tsebagatša Pulo 1 yeo e nepilego diminerale tše bohlokwa tše bjalo ka koporo, nikhele, kerafaete, lithiamo le dimetale tšeo di sa hwetšagalego gabonolo. Nakong ya pulo ye, dikgopelo tše 119, tšeo di fihlago go R3.7 bilione ya dikgopelo tša tšhelete ya thekgo, di ile tša amogelwa. Gareng ga tšona, tše 46 di ile tša bonwa e le tšeo di lego maleba, gomme di bonagatša kgahlego ye kgolo ya babeeletši gape le go ba le kgonego ye kgolo ya go goketša dipeeletšo.
2. Kgatelopele ka ga Phethagatšo ya Mokgwa wo Mongwe wa Thekgo ya Ditšhelete Bakeng sa Phetolelasebjalebjaleng le Katološo ya Mararankodi a Mohlagase a Bosetšhaba
2.1. Kabinete e filwe tša gabjale mabapi le kgatelopele ya phethagatšo ya mokgwa wo mongwe wa thekgo ya ditšhelete bakeng sa phetolelasebjalebjaleng le katološo ya mararankodi a mohlagase a bosetšhaba, go balwa le go hlongwa ga Ofisi ye Ikemetšego ya Diprotšeke tša Tshepetšo ya Mohlagase (ITPO) yeo e lego ka Ofising ye Ikemetšego ya Batšweletši ba Mohlagase. Ka Manthole 2023, Kabinete e ile ya dumelela Lenaneo la ITP gore le kgone go dumelela kgathotema ka lekala la praebete go tlhabollo, thekgo ya mašeleng, go aga, le go sepetša mananeokgoparara a maswa a go sepetša mohlagase ka tlase ga tlhakotaolo ya phatlalatša.
2.2. Kgatelopele ye kgolo e dirilwe ka tabeng ya go šomiša mekgwa ye mengwe ya thekgo ya mašeleng bakeng sa katološo ya mananeokgoparara a go sepetša mohlagase, kudu go lebeletšwe go hlola tikologo yeo e kgontšhago Diprotšeke tše Ikemetšego tša Tshepetšo ya Mohlagase gore di šome.
2.3. Legato la 1 la Lenaneo la ITP le letetšwe go tlo bulela dikilomitara tše 1,164 tša ditsela tša mohlagase mmogo le koketšo ya maatla a ditiši tše nnyane. Dipoledišano tša mmušo le babeeletši di netefaditše gore go na le tumo ye kgolo ka mebaraka ya go nyaka go kgatha tema ka lenaneong la katološo ya mananeokgoparara a tshepetšo ya mohlagase le phetolelasebjalebjaleng. Go ngwalwa semmušo ga melawana yeo e sa thadilwego ya tshepetšo ya mohlagase ka kuranteng ya mmušo mmogo le Tumelelo ya Semolao ka Tona di bopa karolo ya kgatelopele ye.
3. Pego ka ga Dipoelo tša Ketelo ya Semmušo ya Mokgatlo wa Batšweletši ba Ditaemane ba Afrika (ADPA) ka Riphabliking ya Botswana
3.1. Kabinete e amogetše pego ya mabapi le dipoelo tša ketelo ya semmušo go ya Botswana yeo e nepilego go hlohleletša Botswana go ba leloko la Mokgatlo wa Batšweletši ba Ditaemane ba Afrika (ADPA).
3.2. ADPA e hlomilwe go tšweletšapele tšhomišano magareng ga ditšhaba tšeo di tšweletšago taemane ka Afrika, go sepelelantšha ditlhako tša tšona tša semolao, le go matlafatša khuetšommogo ya tšona ka intastering ya ditaemane lefaseng. Le ge e le gore ke ye nngwe ya batšweletšibagolo ba taemane ka Afrika, Botswana e kgethile go ba ka ntle ga ADPA e sa le e hlongwa ka 2006.
3.3. Go latela ketelo ka Tona Mantashe, Botswana e ile ya dumela go ba leloko la ADPA gomme ya kgopela Afrika Borwa go ikgokaganya le Bongwaledi bja ADPA gore e be yona e beago leihlo. Ketelo ye e ile ya tiišeletša leboelela ditšhomišano tša togamaano magareng ga Afrika Borwa le Botswana, le ka fao dinaga tše di ka holanago ka gona ka tša meepo gape le go hlabolla kontinente.
4. Ditšhomišano tša Ditumelelano tša Etšensi ya Dikabo (DDA) le Eskom
4.1. Kabinete e ile ya tsebišwa tša gabjale mabapi le DDA gomme ya thekga go phethagatšwa ga yona. DDA ke konteraka yeo go yona Eskom e lego bjale ka moemedi yo a tlo tšeago mešomo ya kabo ya mohlagase wa mebasepala, go balwa le go hlokomela, go lokiša le go kgoboketša letseno.
4.2. Se se dirwa go šogana le mathata a bjalo ka dikoloto tša mebasepala le kabo ya ditirelo ya go fokola, gomme go nepilwe go kaonafatša go botega ga mebasepala le go e thuša go kgona go laola gape mafapha a yona a mohlagase.
4.3. Ditumelelano tše ke didirišwa tše bohlokwa tša go buša tšhomišo ya tšhelete ka tshwanelo, go kaonafatša mokgwa wa go kgoboketša letseno le go bušetša kabo ya ditirelo tša mohlagase sekeng go kgabaganya mebasepala bjalo ka karolo ya taelo ya Kgoro ya Enetši le Mohlagase ya go netefatša gore go ba le intasteri ya kabo ya mohlagase yeo e botegago, e šomago phatlalatša ebile e swarelelago.
F. Ditiragalo tšeo di sa Tlago
1.1 Kgwedi ya Temošo ya Ditokelo tša Bagolofadi
1.1.1 Naga ye e keteka Kgwedi ya Temošo ya Ditokelo tša Bagolofadi (DRAM) go tloga ka la 3 Dibatsela go fihla ka la 3 Manthole ka tlase ga moeno wo: “Re thoma Ditšhomišano tša Togamaano ya Makala a go Fapafapana bakeng sa Setšhaba seo se Akaretšago le Bagolofadi.” Kgwedi ye e tla fihla sehloeng ka Letšatši la Bosetšhaba la Batho bao ba Phelago ka Bogolofadi ka la 3 Manthole. Kabinete e gata ka mošito o tee le MaAfrika Borwa ka moka go tšweletšapele temošo, kakaretšo ya bohle le tekatekano.
1.1.2 Mmušo o tšwela pele go tšweletšapele phethagatšo ya Pholisi ya Ditokelo tša Batho ba go Phela ka Bogolofadi, e le ge o tiišeletša leboelela boikgafo bja wona bja go aga setšhaba seo se akaretšago bohle, seo go sona batho ka moka bao ba nago le bogolofadi ba ipshinago ka ditokelo tša go swana le tša bohle, seriti le go kgatha tema ka mo go kwagalago.
1.1.3 Le ge e le gore kgatelopele ye kgolo e dirilwe tabeng ya go tšweletšapele ditokelo tša batho ba go phela ka bogolofadi, Kabinete e ipiletša go makala ka moka a setšhaba go bapala karolo ya ona go tlošeng mapheko ao a sa lego gona gape le go netefatša gore batho bao ba phelago ka bogolofadi ba fihlelela menyetla ye e swanago le ya bohle.
2. Letšema! Afrika Borwa e a Kopana go Fediša Dikgaruru Kgahlanong le Basadi le Bana
2.1 Ge re le gare re batamela Lesolo la Matšatši a 16 a Ntwa Kgahlanong le Dikgaruru go Basadi le Bana leo le tlo bago gona go tloga ka la 25 Dibatsela go fihla ka la 10 Manthole 2025 ka tlase ga moeno wo: “Letšema: Banna, Basadi, Bašemane le Basetsana ba šoma mmogo go fediša Dikgaruru tša go Amana le Bong le Polao ya Basadi (GBVF)”, Kabinete e tloga e tshwenyegile kudu gore le ge go na le maitapišo ao a tlemaganego ka mmušo, setšhaba le dikgwebo a go lwa le go keka ga bothata bjo, Afrika Borwa e tšwela pele go itemogela dipalo tša godimo tša GBVF.
2.2 Ge o arabela go palo ya godimo ya GBVF, mmušo, ka Moranang ngwaga wo, o ile wa tsebagatša Lenaneo la Potlakišo la Matšatši a 90 la kgahlanong le Dikgaruru tša go Amana le Bong le Polao ya Basadi (GBVF) go netefatša gore go ba le magato a ka pela ebile a kgokaganego kgahlanong le GBVF gape le go potlakiša phethagatšo ya Leano la Bosetšhaba la Togamaano mabapi le GBVF.
2.3 Lenaneo le la Matšatši a 90, leo le bego le etilwe pele ke Legoro la Toka, Thibelo ya Bosenyi le Tšhireletšo, le šogane le dikimollo tša ka pela ebile tša go kwagala go theoša go keka ga GBVF ka mo nageng. Dikimollo tšeo di akaretša go hlangwa leswa ga Komiti ya Ditona tša go Fapafapana (IMC) go netefatša gore go ba le tšhomišano ka phethagatšong ya Leano la Bosetšhaba la Togamaano mabapi le GBVF.
3. Samiti ya Bosetšhaba ya Dikago
3.1 Samiti ya Bosetšhaba ya Dikago e tla swarwa ka la 13 le 14 Dibatsela 2025 ka Gauteng, gomme e tla swarwa ke Kgoro ya Mešomo ya Setšhaba le Mananeokgoparara (DPWI) ka tšhomišano le Boto ya Tlhabollo ya Intasteri ya Dikago (CIDB).
3.2 Samiti ye e tla šetšana le ditharollo tšeo di kwagalago tša mabapi le go potlakiša diprotšeke tša go aga, go balwa le go matlafatša tšhireletšo mafelong a go aga, go sepelelantšha mananeo a go reka ka go akaretša, go kaonafatša mekgwa ya go bega, le go hlohleletša tšhomišano magareng ga lekala la setšhaba le la praebete.
G. Melaetša
1. Matshedišo
Kabinete e lebišitše matshedišo a yona go bagwera le ba lapa la:
• Mme Ntombazana Botha, molwelatokologo gomme ekile ya ba Motlatšatona ya Bokgabo le Setšo.
2. Ditebogišo
Kabinete e rometše ditebogišo le mahlatse le mahlogonolo go:
• Mme Joyce Pitso le Morena Mosotho Moepya bao ba tlo šomago bjalo ka maloko a go ya go ile a dikhomišinare tša Khomišene ya Dikgetho ya Afrika Borwa, mola Moahlodi Dhaya Pillay a tlo šoma bjalo ka leloko la nakwana. Go lebogišitšwe le Morena Mosotho Moepya ge a thwetšwe go ba modulasetulo wa Khomišene ye.
• Mme Botseetse Kgaphola ge a thopile sefoka sa go ba Mohumagatšana Afrika Borwa wa Mogolofadi.
• Sehlopha sa Bosetšhaba sa Kgwele ya Maoto sa Ba ka Tlase ga Mengwaga ye 17, Amajimbos, seo se bilego sehlopha sa mathomo sa Afrika Borwa ka dithakeng tša bona seo se kgonnego go feta legato la mathomo la dihlopha dipapading tša Sebjana sa Lefase sa FIFA sa Ba ka Tlase ga Mengwaga ye 17.
• Sehlopha sa di-Springboks ge se thopile papadi ya sona ya bobedi dipapading tša Quilter Nations Series go la France ka dino tše 32 go tše 17.
• Mokapotene wa di-Springboks, Siya Kolisi ge a fihleletše khepo ya ya go bapalela sehlopha sa di-Springboks lekga la bo 100. Yena ke sebapadi sa bosenyane historing ya di-Springboks sa go bapalela sehlopha se makga a 100. Leeto la gagwe leo le hlohleletšago ke bohlatse bja kgotlelelo le maikemišetšo.
• Mogaši wa ditaba tša boditšhabatšhaba wa Lekgotlakgašo la Afrika Borwa Sherwin Bryce-Pease le rakhamera Aaron Berbrick, ge ba thopile sefoka sa maemo a gauta sa Ricardo Ortega Memorial Prize sa Mokgatlo wa Boraditaba wa Ditšhabakopano.
• Morena Dan Marokane, Mohlankedimogolophethiši wa Sehlopha wa Eskom, ge a thopile sefoka sa go ba Moetapele wa Ngwaga wa 2025 Difokeng tša Sunday Times Top 100 Companies.
• Nigeria ge e tšwele lenaneong la mapheko la Sehlophatšhomo sa Ditiro tša Ditšhelete (FATF) go latela Afrika Borwa ge e tšwele. Se ke kgatelopele ye botse go kontinente ya Afrika ka ge e buša go botega ga Afrika ka mebarakeng ya ditšhelete ya lefase, se fokotša ditheko tša thekišetšano le go godiša tshepo go babeeletši.
E lokolotšwe ke: Tshepetšo ya Dikgokagano le Tshedimošo ya Mmušo (GCIS)
Dinyakišišo: Morena Sandile Nene – Seboleledi sa Motšwaoswere sa Mmušo
Mogala: 083 712 2316
