A. Ezingundabamlonyeni
1. Ubulungiswa, Ukukhandelwa Kobulelesi Nokuvikeleka
1.1. IKomitjhini YePhenyo YeJaji UMadlanga
1.1.1. IKhabinethi ikuthokozele ukubekwa kweKomitjhini yeJaji uMadlanga ezakuPhenya ngobuLelesi, ngokuCabhela kwePolitiki nobuKhohlakali eHlelweni lezomThethobulungiswa kunye nekugazedweni kwemiLayelo yokuSebenza kwayo.
1.1.2. Ukuvulwa kweKomitjhini le kufakazela ukuzibophelela kukaMengameli ekusebenziseni amahlelo wezomthethosisekelo ekuphenyeni mbala ngezwangobatjho yokwenza izinto eziphambene nokulunga, nokusekela isithunzi seenjamiso zelizwe lethu, nokwakha ithemba emphakathini kunye nokumbeka umlandu umuntu owephula imithetho yelizwe lekhethu.
1.2. Ukukhandelwa Nokulwa Nobulelesi
1.2.1. IKhabinethi ithokozele ukuqiniswa kwesandla samapholisa ngejima i-Operation Shanela 2 lapho kubotjhwe abasolwa abangaphezulu kwee-17 000 elizweni lokeli ukusukela nakama-27 kuVelabahlinze nomhla wesi-02 kuRhoboyi 2025. Balinganiselwa ee-2 911 abasolwa abafunekako ababotjhelwe imilandu emimbi nekhambisana nenturhu, enjengokubulala, nokulinga ukubulala, ukwemuka abantu iinkoloyi, ukukata, ukugqekeza nokudlelezela emakhaya/emzini nemabhizinisini, kwathi abanye abasolwa abayi-1 763 babotjhelwa ukuGasela, ukuKhubaza Kumbi emzimbeni (i-GBH).
1.2.2. IKhabinethi ibuye yakuthokozela nokubotjhwa kwabanye abama-550 abasolwa ngemilandu yokumayina ngokungasimthetho emayini endala e-Barberton, eMpumalanga njengengcenye ye-Operation Vala Umgodi, yabe yezwa/yabikelwa nokuthi banikelwe ibheyila.
B. Ezibikelwe IKhabinethi
1. IsiVumelwano Se-Ajenda Yokukhulumisana Ne-United States of America
1.1. IKhabinethi ibikelwe ngezamva nje ngesiVumelwano se-Ajenda yokuKhulumisana ne-United States of America (i-USA), malungana nomthelo wama-30% ekulindeleke bona iSewula Afrika ithome ukuwutheliswa epahleni erhwebelana ngayo namazwe wangaphandle, ukusukela nakali--07 kuRhoboyi 2025; lokhu-ke kulindeleke bonyana kwenzeke ngombandela wokuthi umthelo lo uzakubuyekezwa amazwe amabili la nakaqeda ukuvumelana.
1.2. IKhabinethi isifakazele isibopho saborhlumende sokufuna bebathole iinsombululo ezihle nezizakubambelela ngokuphikelela ngokukhulumisana ne-USA, sekubalwa nemikhulumiswano emalungana nePalestina.
1.3. Njengoba kuzwakele nge-Ofisi kaMengameli, uMengameli Cyril Ramaphosa ukhe wafowunela uMengameli we-USA u-Donald Trump izolo ekuseni njengengcenye yokuqinisa imizamo yeSewula Afrika yokukhulumisana ngeemvumelwano zokurhwebelana.
1.4. Imizamo karhulumende solo isaqale ekukhuliseni umnotho ngomnqopho wokuhlenga nokuvula imisebenzi emitjha, sekubalwa nokwahlukaniswa nokuqiniswa kokuhlanganiswa kwemisebenzi yomlandelande wethungelelwano lokusabalalisa ipahla ephasini loke, njengoba ilizwe lekhethu lisebenzela ukwandisa ipahla eliyithengisela e-Asia, i-Europe, i-Middle East, kunye ne-Afrika yoke, kuqothelwe ukuphakamisa amandla womnotho welizwe lekhethu wokuthambela ubujamo bezinto.
1.5. Malungana namabubulo acatjhazelwa kukhuphuka komthelo wokurhwebelana, urhulumende uqale ngehlangothini lokufunwa kwepahla emabubulweni athintekako nemagadangweni aqothelweko ukuqinisekisa ubunzinzo bamabubulo nokuvikeleka kwemisebenzi. Lapha-ke sitjho lokhu:
1.5.1. Ukuvulwa kweZiko eliSekela imiSebenzi yokuThengisela amazwe wangaphandle, elizakuba yindawo yokuthintana yeenkhampani ezithintekako.
1.5.2. Amagadango wokusiza iinkhampani ukuginya umthelo okhuphukileko bekusimeleliswe namandla wokuthambela ubujamo bezinto kwesikhathi eside, namaqhinga wokukhula wokuvikela imisebenzi namandla wokukhiqiza eSewula Afrika.
1.5.3. IsiKhwama seNdawo sokuSiza ngeeMali (i-LSF) eenkhampanini ezithelwe macaphazelo kobana zifake isandla sokusiza emzameni welizwe loke.
1.5.4. IHlelo lokuThengisela amaZwe wangaPhandle nelokuSekela iPhaliswano (i-ECSP), elizakufaka hlangana nemali yokusekela indawo yokusebenzela ibhizinisi neentlabagelo zakhona, ezizakwethula umthwalo weendingo kwesikhatjhana esifitjhani ukuyokufika esikhathini esiphakathi naphakathi kiwo woke amabubulo.
1.5.5. Ukusebenzisana nomNyango wezemiSebenzi eQatjhelwako ngamagadango wokuphungula ukulahleka kwemisebenzi ebekungaba khona, ngokusebenzisa amathulusi akhona njenganje ngaphakathi kweenjamiso zawo ezingalungiselwa ukuqalana neentjhijilo zanje.
1.5.6. Ngemva kokubonisana neKomitjhini yezePhaliswano, kuvulwe isiQhema sabaThengiselingaphandle abaKhethelwe ngeQadi kobanyana bazokusiza ukusebenzisana nokuhlanganiswa kwemisebenzi yabaphalisanako. Uzakumenyezelwa ngekupheleni kweveke le umtlamo wabaKhethelwe ngeQadi kobanyana ihlelweli lizokuqedwa msinyana. Imininingwana malungana nalokhu izakufumaneka ku-https://www.thedtic.gov.za
2. IsiVumelwano SokuRhwebelana NokuSiselana Hlangana KweSewula Afrika Ne-China Ngomnyaka Wee-2025-2029
2.1 UmNyango wezeRhwebo, zamaBubulo nezePhaliswano (i-dtic), ngokubonisana neenhlangano zamabubulo nemikhandlu yezokuthengiselwa kwamazwe wangaphandle uhlanganise umtlolo wezeRhwebo namaSiso hlangana kweSewula Afrika ne-China (2025-2029) njengesendlalelo sokukhulumisana ne-China ngezomnotho.
2.2 Umtlolo lo ukhuluma ngerhwebo, amasiso, ukuthuthukiswa kwamabubulo kunye nokuthuthukiswa kwamakghonofundwa. (a) NgezeRhwebo: Amaqalontanzi lapha kurhwebelana ngeKhulu lemihlobo yepahla engephambili, ukwakhiwa kwendawo yasafuthi yokukhangisela ipahla yeSewula Afrika e-China, nokuzwana ngokulungiswa kweendaba zokulawula. (b). NgezamaSiso NokuThuthukiswa KwamaBubulo: Amaqalontanzi lapha kuthengisela isimbi, namatayera, iinkoloyi, ukukhiqizwa kwamabhethri, iinsetjenziswa zamakhemisi nezokwelapha, umkhiqizo wesiporweni neentimeleni kunye nomnotho wethungelelwanohlanganiso. (c). Isigaba Sokuthuthukiswa Kwamakghonofundwa: Siqale amakghonofundwa akhambisana namakoro esele akhonjiwe amaqalontanzi wakhona afaka hlangana nokulungiswa nokutjhejwa ngemva kobana ipahla seyithengiselwe lapho ithengiswe khona.
2.3 Umtlolo lo-ke uboniswe norhulumende wabaNtu beRiphabhligi ye-China (i-PRC) ngesikhathi sevakatjho lomsebenzi leSekela likaMengameli u-Paul Mashatile e-China, elenzeke ukusukela nakali-14 ukuyokufika nakali-18 kuVelabahlinze 2025. ISekela likaMengameli lapha likhulumisene namabhizinisi neenjamiso zombuso eziqakathekileko, labe lahlanganyela neTjhewini yezamaSiso nezeThungelelwano lomLandelande wokuSatjalaliswa kwePahla hlangana kweSewula Afrika ne-China (i-CISCE), lapho avule khona ngokusemthethweni iKundla yokuBukisela iPahla yeSewula Afrika (i-South African National Pavilion) yokunzinzisa ilizwe lekhethu njengesango lokudlulela e-Sub-Saharan Africa ngezerhwebo, zamasiso kunye nangokusebenzisana ngezamabubulo.
3. IKulumiswano YesiZwe – IKhonferensi Yokuthoma Yokubonisana Yelizweloke
3.1. IKhabinethi yemukele yabe yaqala umbiko ngendima esele yenziwe ngamalungiselelo wokubamba iKhonferensi yokuthoma yeKulumiswano yesiZwe, ezokuthatha amalanga amathathu ukusukela ngomhla we-15 ukuyokufika kumhla we-17 kuRhoboyi 2025 e-UNISA (ePitori).
3.2. NgeKhonferensi yokuthoma le kunqotjhwe ukukhwezelela ukuvumelana ngeendaba ekumele kukhulunywe ngazo kileKulumo YesiZwe esahlelelwako, elungiselelwa ukuthi ifake woke amaSewula Afrika, emagumbini womane welizwe leSewula Afrika, ngaphandle kokukhetha muntu nanyana kungaba ngayiphi indlela; kilekulumo yokuhlanganisa imibono yesitjhaba soke kuyokuhlathululwa inembombono yelizwe lekhethu ema-30 weminyaka ezako ukusukela nje. IKulumiswano YesiZwe le ihlelelwe ukuthi ibanjwe emawadini azii-13 400, ngaphandle kweminye imikhulumiswano ezii-50 000 ezabe idoswa phambili zizakhamuzi eenyangeni ezili-12 ezizako, ukusukela mhlana kubanjwa iKhonferensi yokuthoma.
3.3. Igadangweli selidose ikareko ekulu khulu, njengombana sezingaphezulu kwama-737 iinhlangano ezivela emakorweni angaphezulu kwama-30 esele zizitlolisele ukuhlanganyela nabanye kilekhonferensi yeKulumiswano YesiZwe; lokhu-ke kutjengisa itjisakalo ekulu yamaSewula Afrika yokuzakhela ingomuso.
3.4. IKhabinethi ifakaze ngobutjha bona iKulumiswano YesiZwe le akusikundla yokucocisana nje kwaphela, kodwana iyindlela enamandla khulu yokusikimela ukuthatha amagadango afaneleko – ngaleyindlela-ke kwakheke isisekelo sokuqalelelwa komuntu woke nokubumbanisa iSewula Afrika ngcono.
4. IHlelo Lokutjhugulula Umkhawulo Wekhabhoni (i-CBAM)
4.1. IKhabinethi ibikelwe ngendima esele yenziwe yokuthola umehluko esele wenzekile nge-CBAM emnothweni weSewula Afrika, sekubalwa nemakorweni/nemikhiqizweni eyembeswe ma-CBAM. IKhabinethi ivumile ukuqala amagadango alinganiseke kuhle nemilayezo eveza iindingo zethu zetuthuko, irhuluphelwethu sisitjhaba, umphumela wokukhula komnotho kunye nokuzibophelela ekuthathweni kwamagadango wokulungisa imiraro yetlayimethi.
4.2. IKhabinethi ibuye yavumela nokuphunyeleliswa kwehlelo likarhulumende elimagatjagatja elizakuthwalwa yi-dtic, ngokubambisana namaziko wefundo ephakemeko, nekoro yangeqadi kunye neenhlangano zabasebenzi, basizane umsebenzi ngamahlelo wokuqeda irhasi esilaphazako ngamandla angakghonakala. Basebenzise namathuba weenkundla zokusebenzisana ngamahlangothi amabili, nangamahlangothimanengi, nangezinye iinkundla ezikhona ukukhwezelela nokukhuthazela ukutjhabalalisa i-CBAM.
5. ImiBiko Yokusebenza Eyethulwa Kabili Ngomnyaka
5.1. IKhabinethi ithole yabe yaqala imiBiko yeNdima eYenziweko eyeThulwa kaBili ngomNyaka, malungana nokuphunyeleliswa kweHlelo lokuKhibelela iTuthuko lomnyaka wee-2024 – 2029 (i-MTDP) ukusukela ngoSewula 2024 ukuyokufika kuNtaka 2025.
5.2. I-MTDP iveza ngokuzeleko amaqalontanzi aqakathekileko amukelwe nguRhulumende weBumbano (i-GNU) wesikhathi esithoma emnyakeni wee-2024 – 2029; wona-ke ngila: (i). Ukukhula komnotho nokuvuleka kwemisebenzi ngokuqalelela umuntu woke, (ii). Ukuphungulwa komtlhago nokulwa nokuphakama kweendleko zokuphila kunye (iii). nokwakha umbuso okghonako nothuthukako.
5.3. UNgqongqotjhe wezokuHlela, zokuTjheja nokuHlunga, naboSihlalo beHlanganyela yeKhabinethi bazokwethula umbiko opheleleko ngendaba le ngeLesibili womhla we-12 kuRhoboyi 2025.
6. Zamva Nje Ze-G20
6.1. Seyibanjiwe imihlangano esemthethweni ye-G20 elinganiselwa kema-80 keli-132 ehlelelwe ukubanjwa.
6.2. Ithomile nemikhulumiswano yemitlolo/yeememezelo nemiphumela yezinga eliphezulu ekhambisana nemiPhumela yaboNgqonqgotjhe.
6.3. ISewula Afrika ithome ihlelo lokuBuyekezwa kweeNdleko zeMali yokusikimisa umSebenzi, ekuligadango eliqakathekileko lokwakha ihlelo leemali elingcono lephasi loke elinikela amazwe asathuthukako ithuba lokusisa kumthangalasisekelo, zokutjhejwa kwepilo, zefundo nezokuthambela ubujamo betlayimethi.
6.4. Zoke iinQhema zemiKhulumiswano ezaZiwako ze-G20 seziwethule amahlelo namaqalontanzi wazo. I-US izwakalise ukuthi iyabuya, ibuya ngokupheleleko ukuzokuhlanganyela nabanengi emihlanganweni ye-G20, ngitjho nanyana izakwenza lokho ezingeni leSekela likaNgqongqotjhe wezangaPhandle nje.
6.5. Imihlangano elandelako nasi ibanjwe ngoVelabahlinze:
6.5.1. Umhlangano wesiNe we-G20 wamaSekela waboNgqongqotjhe bezeeMali namaSekela wabaPhathi bamaBulungelomali amaKhulu ubanjwe nakali-14 namhlana ali-15 kuVelabahlinze 2025, wakhulumisana: (i) ngokuBeka iLihlo emaBhanga wezokuThuthukisa amaHlangothimanengi nangomThetho wokweThula okwenzeka emabhanga. (ii) ngokuSekelwa ngeeMali komSebenzi wokuLingisa ukuLwa nesiFo eseHle saRhagala (iii) ngezamva nje zemiKhulumiswaneni yeenKolodo zamazwe aziJameleko.
6.5.2. Umhlangano wamaSekela weeMakethe ezisaKhulako nemiNotho esaThuthukako (ama-EMDE) ophakamise ukuthi iSewula Afrika iragele phambili ngokubiza imihlangano ye-EMDE njengelunga le-G20 Troika ngomnyaka ozako.
6.5.3. Umhlangano wesiThathu waboNgqongqotjhe bezeeMali nabaPhathi bamaBulungeloMali amaKhulu ngomhla we-17 nomhla we-18 kuVelabahlinze 2025 lapho kukhulunyisenwe khona (i) ngomtlamo wehlelo leemali elinamandla lamazwe ngamazwe nelithambela okunengi, (ii) ngomthangalasisekelo (iii) ngokutheliswa kwabantu emazweni ngamazwe (iv) ngeenqabo eziqabela ukukhula nokuthuthuka e-Afrika (v) ngeemali ezibambelelako kunye (vi) nangeendaba/nemiraro yekoro yeemali kunye nokuqalelelwa ngeemali.
6.5.4. Umhlangano we-G20 wesiThathu wezeCwephetjhe wokuHlomisa abaNtu abaSikazi (i-EWWG) obanjwe ukusukela mhlana ama-02 ukuya nakama-03 kuVelabahlinze 2025, bewuqalene nokuphakamisa ikulumiswano yephasi loke nokusebenzisana ngezokulingana kobulili kunye nokuhlonyiswa kwabantu abasikazi, khulukhulu manqophana nokulimuka, nokuphungula nokuhlela ngobutjha umsebenzi wokutjheja ongabhadelelwako.
6.5.5. Umhlangano wesiThathu wezeFundo obanjwe ukusukela nakama-02-03 kuVelabahlinze 2025 bewuqalelele: (i) isidingo esirhabako sokuqatjha abotitjhere abaneleko kobanyana bazokwanda bebaqalelele boke abantu abathola ifundo, kukhuphuke nezinga nokulinganiseka kwefundo namathuba wokufunda ipilo yoke kibo boke abantu. Umhlangano ubuye wakhulumisana ngomtlamo we-G20 weSaziso saboNgqongqotjhe bezeFundo.
6.5.6. UmHlangano wesiHlanu wesiQhema sezePilo obanjwe ukusukela nakabu-08 ukuya nakali-09 kuVelabahlinze 2025 obewuqale ukuqinisa ukuvikeleka kwezepilo ephasini emisebenzini enjengokulungela ukuqalana nezifo ezehla zirhagale nokuzithathela amagadango afaneleko, kunye nesidingo sokusekelwa ngeemali kwemisebenzi yezepilo nokutholakala kwethekhnoloji etja kezokwelapha njengemijovo yobuLwele besiFuba (i-TB).
6.5.7. UmHlangano wesiThathu wesiQhema esiKhulumisana ngokuPhungulwa kobuNgozi beHlekelele ubanjwe ukusukela nakabuli-09 ukuya nakali-10 kuVelabahlinze 2025 bewuqalene neentjhijilo ezilikhuni zokuLawulwa kobuNgozi, wabe wabelana ngelwazi, ngamahlelo/ngamaqhinga nangekambiso ephambili ekuphunguleni ubungozi behlekelele.
6.5.8. UmHlangano wesiNe wesiQhema somSebenzi 1: Ukukhula komNotho ngokuqalelela umuntu woke, ukwandiswa kwamaBubulo, ukwandiswa kwemisebenzi nokuphungulwa kokutjhiyana ngendima obewubanjwe nakali--09 ukuya nakali-10 kuVelabahlinze 2025 – bewuqale amaqhinga ekungakhwezelelwa ngawo ukukhula okuqalelelako, imisebenzi nokuphungulwa kokutjhiyana ngendima.
6.5.9. Umhlangano wesiBili weTlayimethi nokuBambelela kweBhoduluko obanjwe usuka nakali-14 ukuya nakali-18 kuVelabahlinze 2025 bewuqalene nepilo yakho koke okuphilako ephasini, nekulondeni ekumele kulondwe, ukutjhuguluka kwetlayimethi, ukonakala komhlaba, isomiso, ukulawulwa kwamakhemikhali nakho koke okulahlwako, ikhwalithi yommoya amalwandle, neendawo ezimagega namalwandle.
6.5.10. Umhlangano wesiNe wezeTuthuko obanjwe nakama-21ukuya nakama-23 kuVelabahinze 2025 obewuqale ukubeka izinga eliphezulu lekambisolawulo yepahla namasiso wabantu, ukungezelelwa kwemali yemisebenzi yetuthuko, nokwakhiwa kwethungelelwano lokuphepha komphakathi emuntwini ngamunye ngamunye.
7. IHlelo Lokulungisa Zamanzi EGiyani (Isiyingi se-Mopani, e-Limpopo)
7.1. IKhabinethi ibikelwe ngendima yomsebenzi weHlelo lokuLungisa zaManzi eGiyani.
7.2. IHlelo LokuLungisa ZaManzi E-Giyani lapho kwakhiwa khona umthangalasisekelo wamaphayiphu wamanzi ozokuba liliqha elima-325 wamakhilomitha osuka e-Giyani WTW lapho kuzakuba khona neenlulu zamanzi ezizakuphakela amanzi emathresdeni ama-55 we-Giyani namaphethelo. Indima yomsebenzi esele wenziwe bekube nje ima-90.23%. Okuseleko ebunengini balendima ema-90% esele iphelile kulingwa kwamandla womfutho amanzi aphuma ngawo. Umsebenzi lo kulindeleke bona uqedwe ngoKhukhulamungu 2025 .
7.3. IsiGaba 1 SamaThresde We-Giyani Ama-55 lapha kufakwe khona ithungelelwano lamaphayiphu wamanzi, kilo ekubalwa nokufakelwa kwamamitha wamanzi emakhaya ngamakhaya/emizini emathresdeni ama-24 kama-55. Kilephrojekthi sekuphele amathresde ama-23 kama-24 ngethungelelwano lamaphayiphu wamanzi nokufakelwa kwamanzi emizini. Kusele ithresde i-Risinga, yona ezakuqedelelwa ekupheleni kwakaVelabahlinze 2025. IsiGaba 2a, esitjho ithungelelwano lamaphayiphu nokufakelwa kwamamitha wamanzi emizini emathresdeni ali-15, sizakuqedelelwa emnyakeni weemali we-2025/26 bese kuthi isiGaba 2b (amathresde ali-16) siqedelelwe ekupheleni komnyaka wokuKhitjelelwa kweSabelo seeMali.
7.4. Ukuphakanyiswa kwe-Giyani WTW ukusukela ku-30MI/d ukuyokufika ku-40MI/d nokwakhiwa ngobunengana kwamadamu ukwenzelela ukuthi kube namanzi aneleko emathresdeni weGiyani ama-55 kusese yinto esahlelwako, ezakuphunyeleliswa ngekota yesithathu yalomnyaka weemali ophezulu, nasele iqedelelwe i-IRS. Kwethenjwa bona lokhu kuzabe kungokokuphela ukuthi umnyango ufake isandla e-Giyani ngomnqopho wokwenza ubungcono bokutholakala kwamanzi emathresdeni namadrobha ama-55.
7.5. Lendima ilandela amagadango aqakathekileko akhe athathwa ngesikhathi esidluileko, ekubalwa hlangana nawo nalokhu:
7.5.1. IPhayiphu LaManzi Akhamba Ngobunengi Le-Nandoni-Nsami (I-Nandoni-Nsami Bulk Pipeline) – elima-40.5km wephayiphu lamanzi angakatsengwa elisuka eDamini i-Nandoni e-Vhembe, lithelele amanzi emseleni ose-Xikukwani, agcine adlulele edamini lobunzinziso e-Giyani WTS ethome ukusebenza nakama--03 kuSihlabantangana 2023, laqedwa ngoNobayeni 2023, kanti-ke njenganje lithelela iGiyani WTW ngamanzi angakatsengwa ayi-15MI/d. Magega nomuda lo kunephayiphu elisetjenziweko eliyi-.58 eliphelela KwaMsani (Greater Malamulele ngaphasi kukaMasipala i-Collins Chabane, nalo elaqedwa ngoNobayeni 2023.
7.5.2. Uqedwe ngoMgwengweni 2024 umsebenzi wokuvuselelwa kwe-Giyani WTW kobanyana ibuyele emandleni wayo wekanyeni wokuveza i-30MI/d, ebesele yehlele ku13-17MI/d.
7.6. Iindleko zamaphrojekthi aqediweko la zilinganiselwa kumabhiliyoni asithandathu wamaRanda (R6 billion), esekelwe ngeemali mNyango wezaManzi nokuHlwengisa (i-DWS).
8. Ukusebenzisana KweSewula Afrika ne-Nigeria Ekorweni Ye-Oli Nerhasi
8.1. IKhabinethi ibikelwe ngemiphumela yevakatjho lomsebenzi e-Nigeria likaNgqongqotjhe uGwede Mantashe lapho bekukhulunyisanwa khona ngokusebenzisana ekorweni yezeemayini, nekorweni ye-oli neyerhasi, njengengcenye yeKomitjhini yobuBili bamaZwe, iSewula Afrika ne-Nigeria (i-BNC).
8.2. I-Nigeria ifuna ukuthuthukisa ikoro yeemayini ngokuthungatha nokukhiqiza izenjiwa zayo ezinothe khulu, isebenzise ngokupheleleko ithuba lokuthola ilimuko leSewula Afrika elinabileko eemayini.
8.3. ISewula Afrika inerhuluphelo yokuthola i-oli nerhasi yetlelezi ye-petroleum (i-LPG) e-Nigeria, ibe ifunde nelimukweni elinabileko le-Nigeria lokuthungatha nokukhiqiza i-oli nerhasi.
8.4. IKhabinethi ibikelwe ngokuzibophelela kwe-Nigeria ekuqedeleleni isivumelwano sokuthengisela iSewula Afrika i-oli ehlaza esizakwenza iSewula Afrika ikghone ukuthola lezizenjiwa bunqopha njengombuso nangobutsengelo beenkhampani zangeqadi; lesisivumelwano-ke kuqalwe ukuthi siqedelelwe ngekupheleni kwakaRhoboyi 2025.
9. Ukwenziwa Ngcono Kokuphunyeleliswa Kwamatjhuguluko Ekorweni Yezokuthutha Nobuthobothobo Bokuhlelelwa Komsebenzi
9.1. IKhabinethi ivumele ukudluliselwa ePalamende kwehlelo lokukhethwa kweBhodi yabaLawuli enqophe ukwelusa umLawuli womNotho wezokuThutha (i-TER) eendabeni zayo zokuhlela ngamaqhinga ukuqinisekisa ukuthi kunelawulo elihle ekusebenzeni nakezeemali. IBhodi ye-TER izakuqinisekisa ukuthi ikambisolawulo yezomnotho wezokuthutha iyakhambisana kiyo yoke imihlobo yeenthuthi neendawo eziyisebenzisako ezinjengeenteyitjhi zemikhumbi, isiporo, iindlela, nemitlhala yaboflayi namadoyelo wabo. IBhodi izakusebenzela ukulungiswa kwemithetholawulo ekukhuthazeni ukubekwa kwentengo elungileko ngomnqopho oqakathekileko wokuvikela abasebenzisi nokukhuthaza iphaliswano. Ukukhethwa kwebhodi le kuzakuqinisekisa ukuthi amandla womthetho wepalamende asebenza afike ekugcineni kwamazinga aphakemeko womthetho wokuziphatha newokuphunyeleliswa kwezenzelwa.
9.2. Ukukhethwa kweBhodi kuqakathekile ekusungulweni nekusebenzeni kwe-TER njengelinye lamaqalontanzi karhulumende lokusekela iminqopho yokwenza amatjhuguluko, wona “azakwenza umsebenzi wenzeke lula ngokulungeleleka nokuhleleka kwamahlelo wokulawula, imvumo yokusebenza ngemitjhini nezinye iindlela zokusebenza, kuphunguleke iindleko zokuthobela imilayelo,” begodu kuzakwenza kube nesiqiniseko sokuthi umthethokambiso uthini, nakho okuzakusiza nokubiza amasiso afunekako la, khulukhulu ekorweni yezokuthutha.
9.3. I-TER izakuqinisekisa ukuthi imithetho esetjenziswako ilungile hlangana kwakarhulumende neenjamiso zekoro yangeqadi. Izakusebenzela intengo elungileko ngaleyindlela kukhandeleke ukukhuphuka kwentengo butjhwileni kezokuthutha, ngakho-ke nabakhweli bangalimali ngemali yokukhwela. Lokhu kuzakusiza abadobha phasi nabasebenzi, ubunengi babo abathembele eenthuthini zomphakathi. Lokhu-ke kuzakuba lisizo ekuphunguleni imali abayisebenzisele iinthuthi ngenyanga. Lokho-ke godu kubenza bandelwe yimali esala eenkhwameni zabo, bazokukghona ukugcina nezinye iindleko.
9.4. IBhodi ye-TER kuzakufuneka iqinisekise ukuthi baphathwa kuhle abantu bangeqadi abazakufakwa ehlelweni lethungelelwano lesiporweni/leentimela elingaphasi kuka-Transnet, bekukhuthazwe nobunikazipahla okuzakwenza ukubekwa kwentengo kuhlale kulindelekile, ngaleyindlela namasiso nabasisi babe nethemba elingcono. Lokhu kuzakusiza amaqhinga weminqopho yamahlelo kaRhulumende yokuthuthukisa umnotho neyokuvula imisebenzi, lapho imisebenzi eminengi izakuvuleka khona ekorweni yezokuthutha.
9.5. Lizakukphumelela ihlelo lokususa umthwalo endleleni uye esiporweni/esitimeleni, njengoba iinkhamphani zizakutjhidisa umthwalo omkhulu onjengamalahle namakhontheyina uye esiporweni/esitimeleni, ngaleyindlela kuphunguke umthwalo ophazamisa ibhoduluko, zilondeke ngcono iindlela zethu, kuphunguke isiminyaminya eendleleni zethu, kunciphe ngitjho neengozi ezenzeka eendleleni. Nayenza umsebenzi wayo ekumele ithembeke kiwo, iBhodi le izakwenza isiqiniseko sokuthi inzinziswa kuhle indlela yayo yokulawula kiyo yoke imihlobo yeenthuthi.
C. Iinqunto ZeKhabinethi
1. Ukungena/Ukwamukeleka Esivumelwaneni Se-Afreximbank
1.1. IKhabinethi ivumele ukungena kweSewula Afrika esiVumelwaneni se-Afreximbank Establishment kobana ithole ubulunga obupheleleko, ivule isango elipheleleko lamathulusi werhwebo namasiso we-Afreximbank, neendawo zokusekela ngeemali, nokusebenzisana ngamahlelo kusekelwa amaqalontanzi wezetuthuthuko elizweni lekhethweli ne-Afrika yoke.
1.2. ISewula Afrika, ngeHlangano yezeTjhorensi yeenKolodo zePahla ethengiselwa amazwe wangaphandle, [i-Export Credit Insurance Corporation (i-ECIC)] izakudlulela esigabeni seZinga A sobunikazi bamatjhere, ezakunikela ilizwe lekhethweli umsebenzi onamandla ehlelweni lokulawula, lapho kubalwa khona namandla wokukhomba indlela, newokuyelelisa ngejamo lesakheko nokuqatjhwa kwabarholi.
1.3. Ngokungena kwayo esivumelwaneni nokuba lilunga elizijameleko, urhulumende weSewula Afrika uvula ikghono le-Afreximbank lokuqinisa amandla wokuthengisela amazwe wangaphandle neweemali zesizo lamasiso ngokusekela ngeemali, ngepahla nangezenzelwa eziza eenkhamphanini zeSewula Afrika, amabhanga weSewula Afrika, kunye neenjamiso zombuso weSewula Afrika, ngalokho-ke isekele ukuthengiselwa kwamazwe wangaphandle nokuvuselelwa kokwakhiwa kwamabubulo emnothweni weSewula Afrika.
1.4. Ngaphezu kwalokho, ubulunga obuzijameleko buvula isango lokulanyulelwa yibhanga le, kanengi elisetjenziselwa ukusiza amanye amazwe we-Afrika amalunga webhanga le nawo neenhlangano zawo zangeqadi, neemali zamazwe ngamazwe, nemirarweni yezomnotho kunye nepolitikini elawulwa bujamo belizwe.
2. Ihlelo Lesabelo Seemali LomNyaka wee-2026 (ikambisolawulo, ikombandlela nekhalenda)
2.1. IKhabinethi iqale isiphakamiso sokubuyekezwa kwesabelo seemali esinqophe ukwakha ihlelo lokwabiwa kweemali elisekela iminqopho yezetuthuko yeSewula Afrika ukube ngahlanye kuvikelwa amandla wokubambelela kweemali, yavumela neKambisolawulo yeSabelo seeMali somNyaka wee-2024 – 2029, neKombandlela ye-MTEF yeRherho leKhalenda yomNyaka wee-2026.
2.2. IKambisolawulo yeSabelo seeMali somNyaka wee-2024-2029
2.2.1. URhulumende kumele abeke ihlelo elinamandla neliqalelelako ukuthola isivumelwano ekuzakuthonywa ngaso kamanye amaqalontanzi wesabelo seemali abaliweko:
a. umthetholawulo womnyaka weemali
b. ihlelo lomthelo
c. ukubhadelwa kweenkolodo
d. amasiso aqakathekileko womthangalasisekelo
e. amaqalontanzi aqakathekileko wokusetjenziswa kwemali nemisebenzi ekumele iphungulelwe imali, kunye
f. namagadango wokukhulisa umnotho.
2.2.2. Iinqunto Zesabelo Seemali Ezisekelwe Bufakazi, Eziqalelela Imiphumela, Nezisekelwe Ngemininingwana:
(a) Ihlelo lesabelo seemali linye elihlangeneko, elipheleleko, nelikhanyelako eliHlukanisela iNgeniso kiyo yoke imikhakha karhulumende.
(b) Ukusekela isigaba 214 somThethosisekelo lapho ihlelo lokwaba iimali kumele liqalelele ngokupheleleko amandla anikelweko namandla womnyaka weemali zombuso kiyo yoke imikhakha karhulumende.
2.2.3. Ukuhlela okulungelelweko, ukube amaqalontanzi nokwaba isabelo seemali ekubalwa kikho nokuthomanisa imikhulumiswano yomrholo wabasebenzi bembusweni nehlelo lesabelo seemali.
2.2.4. Iinqunto zesabelo seemali kumele zibe nethemba lengomuso, zikhumbulele isikhathi sokukhibelela isabelo seemali. Ngalokho-ke i-MTEF kumele ibe lithulusi lokuthoma lokuthomanisa amaqalontanzi womthethokambiso namaqhinga wehlelo leemali zombuso.
2.2.5. Umsebenzi wesabelo seemali kumele uhleleke, ubekelwe isikhathi ozakukhanjiswa ngaso, ulawulwe nanga mithetho, ngalokho-ke iKhalenda yeSabelo seeMali kumele ibeke iinkhathi kesinye nesinye isigaba, ukusukela ekubekweni kwamaqalontanzi ukuya ekuvunyelweni libandla lesibethamthetho.
2.2.6. Iinqunto zesabelo seemali kumele zilandelane ngamananeko bezihlonitjhwe njengengcenye yokuphumelela kwamandla wehlelo lokwabiwa kweemali.
2.2.7. Iinjamiso ezithatha iinqunto zesabelo seemali kumele zibe namandla azazenza zisebenze, zibambisane kezikwenzako, bezenze umsebenzi ngesikhathi.
2.2.8. Ihlelo lokwabiwa kweemali kumele likhuthaze ukwaba ngendlela ezakwenza umsebenzi wenzeke, yanele nemali ezakwenza umsebenzi loyo, nakwenziwa imisebenzi ekumele yenzelwe umphakathi.
2.2.9. Ihlelo lokwaba iimali kumele lisekele indlela yokuthatha iinqunto evumela ukuzisebenzela ngokwahluka kweenjamiso.
2.3 IKombandlela ye-MTEF ifakazela ukuzibophelela kukarhulumende ehlelweni lokwabiwa kweemali elikhamba ngomthetho, nelenzelwa emkhanyweni nelihlelwe ngendlela elungileko esekela iminqopho yesikhathi eside namaqalontanzi wokuthuthukisa weSewula Afrika.
3. Umtlamo Wesibili WomThamo Ofakwa YiSewula Afrika Emizameni Yokurhobhisa Amandla Wokutjhugulukatjhuguluka KweTlayimethi (i-NDC) Njengoba Kusitjho IsiVumelwano Se-Paris
3.1. IKhabinethi ivumele ukumenyezelwa kwe-NDC kobana kubonisanwe ngayo.
3.2. I-NDC yesibili iphakamisa ukuthi kuqothelwe ukuthi nakufika umnyaka wee-2035, ukube sekuphungulwa irhasi ethunyiswako nge-320 – 380 mt CO2 eq.
3.3. Ukuqedelelwa kwe-NDC yesibili kuqinisa iinthembiso zamazwe ngamazwe zokuzibophelela kweSewula Afrika malungana namacaphazela wokutjhuguluka kwetlayimethi ephasini nokuphunguleka kokusilaphaza kweembaseli, ngomnqopho wokuphungula ikhabhoni emnothweni nemphakathini. I-NDC izakutholakala naku- https://www.dffe.gov.za
3.4. Urhulumende wenze icozululo lelizwe lekhethu ngeendlela ezingaba khona zokuthunyisa i-GHG bekube mnyaka wee-2035, kunye necozululo leembopho zomthetho eSewula Afrika ngaphasi kwesiVumelwano se-Paris nencwadi yomthetholawulo, namandla wokuba nomthamo wamandla wegezi evuselelekako womnyaka wee-2035, neHlelo LokuPhunyeleliswa kweQhinga leGezi kunye neHlelo eliLungelelweko lemiThombo yaMandla.
4. Umbiko Ngemikhulumiswano YaboNgqonqgotjhe – Amadayimani Wemvelo: Iintjhijilo Namathuba (mhla wama-30 KuVelabahlinze 2025)
4.1. Ibubulo ledayimani eSewula Afrika liqakatheke khulu ebubulweni ledayimani nelamajuwelari ephasini loke, begodu linendima eqakatheke khulu emnothweni welizwe. Nokho-ke ibubulo ledayimani ephasini solo lisaqalene neentjhijilo ezibudisi ngenca yamanye amaphuzu womnotho, ngalokho-ke iKhabinethi ivumele umNyango wezeNjiwa ne-Petroleum ukuthi nawo ungene eemvumelwaneni zamazwe ngamazwe ezenza aborhulumende abakhiqiza idayimani babe sebujameni obungcono bokukhuthaza nokumaketha idayimani yemvelo ephasini loke. Ukuthi lokhu kuphumelele, iKhabinethi ibuye yavumela ibubulo ledayimani likhombele bona ifake iphesente linye (1%) emalini eliyenza ngomnyaka munye, eyenziwa ngokuthengisa idayimani ehlaza, ukusekela umsebenzi wokumaketha idayimani yamambala ebuya eSewula Afrika, kobanyana kuzokukhula umnotho kuvulwe nemisebenzi.
5. Ukususwa KomThethomlingwa We-SAA SOC Limited ERhelweni Lemithetho Esadidiyelwako ePalamende
5.1. IKhabinethi ivumele isibawo sokwendlala isibawo sokubuyiswa komThethomlingwa wezaboFlayi beSewula Afrika (i-SAA) Soc. Limited erhelweni lemithethomlingwa esadidiyelwako ePalamende.
5.2. IsiVumelwano sokuThengisa nokuThenga nokusulwa komThetho 5 we-SAA womnyaka wee-2007, kube mbandela wokuthi umNyango wezamaBhizinisi womBuso ongasekho kwakumele ugcine lesisivumelwano. UmThethomlingwa lo wethulwa ePalamende nakama-25 kuTjhirhweni 2024; kodwana-ke nokho kwathi nakali-14 kuNtaka 2024, kwamenyezelwa ukuthi sesiphelisiwe isivumelwanesi, ngenca yokufadalala kwemikhulumiswano hlangana neenqhema ezazikhulumisana. Ngenca yalokho, ukubulawa kwesivumelwaneso kwenza ukuthi yoke imibandela ebeyisasele, hlangana nokhunye ukucinywa komThetho 5 wee-2007 we-SAA ingasaphumeleliseki, ngalokho-ke kwase kwenziwa isibawo sokuthi utsonyulwe uphume erhelweni lePalamende umThethomlingwa lo.
D. ImiThethomlingwa
1. UmThethomlingwa WokuTjhugulula UmThetho WezaManzi
1.1. IKhabinethi ivumele ukudluliselwa ePalamende komThethomlingwa wokuTjhugulula umThetho wezaManzi. UmThethomlingwa lo unqophe ukuqinisa ukulawulwa kwemisebenzi eyenziwa ngamanzi ube wenze nobungcono bokuthobela umThetho wezaManzi womnyaka we-1997 (umThetho 108 womnyaka we-1997).
1.2. Amatjhuguluko emThethweni wezaManzi lo aletha amatjhuguluko wokulungisa ukungahlukaniseki kwemisebenzi kamasipala neemPhathimandla zemiSebenzi yaManzi (i-WSA) nabaPhakeli baManzi (i-WSP), ngokuletha umkhanyo omkhudlwana malungana nomsebenzi owenziwa sijamiso ngasinye kilezi, kulungiswe nokungasebenzi kuhle kwama-WSP ngokufaka ifuneko ekumele igcinelwe umthetho othi ama-WSA angakhetha ama-WSP anelayisense ewavumela ukusebenza, efuna umnikazi wayo abe nobuncani belwazi obubekelwe isilinganiso, ekhutjhwa mNyango wezaManzi nokuHlwengisa.
1.3. Amatjhuguluko la azakubuye alungise netlhayelo esele ibonakele kilekoro, ekubalwa hlangana nayo nokufakwa kwemilandu yokungathobeli imilayelo, isilinganiso samazinga wokungena kwabasizi endabeni elungiswako kunye nobuncani bamazinga wokusebenza kwabaphakeli bamanzi, ekumele bona asetjenziswe ziimphathimandla zamanzi.
2. UmThethomlingwa OTjhugulula UmThetho WezaManzi
2.1. IKhabinethi ivumele ukudluliselwa ePalamende komThethomlingwa oTjhugulula umThetho wezaManzi. UmThethomlingwa lo utjhugulula umThetho wezaManzi we-1998 (umThetho 36 we-1998). Amatjhuguluko la azakwenza ubungcono bemithetholawulo abe enze nesiqiniseko sokuthi imithombo yamanzi yelizwe lekhethu ilawulwa kuhle, ivikeleke ibe ilondwe kuhle. UmThethomlingwa lo godu uphakamisa nokuthi kucithwe ukutjhigama kweenkhathi ezidlulileko malungana nokwabiwa kwamanzi, kanti godu ubuye usekele nesiGaba sama-27 somThethosisekelo weRiphabhligi yeSewula Afrika we-1996, ngokuba neendinyana eziqinisa ukuvikeleka kwemithombo yamanzi.
3. UmTlamo Otjhugulula UmThethomlingwa WezabaNtwana
3.1. IKhabinethi ivumele ukukhutjhelwa emphakathini komthethomlingwa kobanyana umphakathi uphefumule ngomtlamo womThethomlingwa oTjhugulula umThetho wezabaNtwana. UmThethomlingwa lo (umThetho 38 wee-2025) unqophe ukukhibelela nokuqinisa umThethomlingwa wezabaNtwana womnyaka wee-2005 osebenza njenganje; amatjhuguluko azakuqalelela itlhayelo ekhona emThethweni, njengetlhayelo ekhona ekutjhejweni kwabantwana, nemahlelweni wokuvikeleka ngeendlela ezinengi, ekukhandelekeni, ekusikimeleni umraro kusese nesikhathi, umthetho wePalamende, ezinye iindlela zokunikela abantwana itjhejo, ukubuyiselwa ebujameni bekanyeni nesizo lokutjhejwa ngemva kwesikhathi. UmThethomlingwa lo godu unqophe nokuqinisa iindlela zokuqinisa isandla sokuvikeleka kwabantwana enturhwini, ekukhahlunyezweni, ekuliselelweni kunye nekucatjhazweni.
E. Ukuqatjhwa
Koke ukuqatjhwa kulawulwa kufakazeleka kweencwadi zefundo ezikhambisana nomsebenzi umuntu aqatjhelwe wona kunye nokuhlanjululwa kwebizo lomuntu okufaneleko.
1. UDorh. Cynthia Ntombifuthi Khumalo oqatjhelwe isikhundla sokuba mNqophisi Zombelele emNyangweni wezemiDlalo, zobuGwali/zobuKghwari nezamaSiko.
2. UDorh. Sipho Ngomane oqatjhelwe isikhundla sokuba liSekela lomNqophisi Zombelele (i-DDG): iPhiko lokuPhathwa kweHlangano emNyangweni wezeVakatjhobukelo.
3. UMm. uYanga Ntombizodidi Tantsi oqatjhelwe isikhundla sokuba ngu-DDG: Amabhizinisi weHlanganyela eLungelelweko nezokuThuthukiswa kwamaBhizinisi amaNcancani emNyangweni wezokuThuthukiswa kwamaBhizinisi amaNcani.
4. UNom. Vuyisa Africa Dayile oqatjhelwe isikhundla sokuba ngu-DDG: UmThethokambiso weKoro nezeRhubhululo emNyangweni wezokuThuthukiswa kwamaBhizinisi amaNcani.
5. UDorh. Nonhlanhla Ignatia Ndlovu oqatjhelwe isikhundla sokuba ngu-DDG: HIV/AIDS, TB ne-MCWH emNyangweni wezePilo.
6. Ukuqatjhwa Kwamalunga Karhulumende WeBhodi Yesikhwama Samagontraga ITirisano Construction Fund Board
a. UPhrof. Wellington Didibhuku Thwala;
b. UMm. u-Allyson Lawless;
c. UDorh. Msizi Reginald Myeza; kunye
d. noMm. uZukiswa Kimani.
7. Ukuqatjhwa Kwamalunga WeBhodi YesiKhwama Sokwakha (I-National Housing Finance Corporation Board)
(a) UNom. Khalid Desmond Golding (uSihlalo);
(b) UMm. uBalungile Siphumelele Dlungwane;
(c) UNom. Thulani Siyabonga Mabaso;
(d) UMm. u-Jacqueline Ramatsimele Maisela;
(e) UMm. u-Ayesha Seedat;
(f) UMm. u-Alison Hickey -Tshangana;
(g) UMm. uNomzamo Babhekile Hlengiwe Khumalo;
(h) U-Adv. Mthokozisi Daluxolo Xulu;
(i) UMm. uTshepiso Florah Kobile;
(j) UNom. Velile Cecil Dube;
(k) UMm. uNoluthando Khulukazi Mashologu; kunye
(l) noNom. Satish Roopa.
8. Ukuqatjhelwa Kweenkhundla Zomsebenzi EBhodini Yabahloli Bemisebenzi Yomphakathi
(a) UMm. uBusisiwe Nwabisa Nzo (uSihlalo);
(b) UMm. u-Sarah Madinoge Letsie;
(c) UMm. u-Moganambal Karen Muthen; no-
(d) Nom. Mduduzi Orville Sikhumbuzo Zungu.
9. Ukuqatjhelwa Kweenkhundla Zomsebenzi EBhodini Elawula Zokutholakala Nokuthengiswa Kwezindlu
(a) UMm. u-Mmanare Evylyn Mamabolo;
(b) UMm. u-Merriam Mapule G. Mashiteng;
(c) UNom. Leshabe Samuel Rampedi; kunye
(d) no-Nom. Thomas Khorommbi Sigidi.
10. Ukuqatjhelwa Kwesikhundla EBhodini YezokuThuthukiswa Komsebenzi Wokwakhiwa Nokutholakala Kwezindlu
(a) UNom. Malesela Phineas Sebatjana.
11. Ukuqatjhwa Kwamalunga WeBhodi YeHlangano YezaboFlayi (i-SAA)
(a) UMm. uSedzani Faith Mudau (uSihlalo);
(b) UMm. u-Fathima Gany (iSekela likaSihlalo);
(c) UNom. Theunis Potgieter;
(d) UNom. Mongezi India;
(e) UNom. Dennis Thokozani Dlomo;
(f) UMm. u-Pamela Bulelwa Yako;
(g) UMm. uBongiwe Pityi;
(h) UDorh. Salome Chiloane-Nwabueze;
(i) UDorh. Prittish Dala;
(j) UNom. Lisa Mangcu;
(k) UMm. uBongiwe Mbovu;
(l) UMm. uSiphumelele Dlungwane;
(m) U-Adv. Johannes Collen Weapond
(n) UPhrof. John Lamola esikhundleni sokuba mPhathi oyiHloko (i-CEO)
(o) UMm. u-Lindsay Olitzky esikhundleni sokuba mPhathi weeMali (i-CFO)
12. Ukuqatjhwa Kwabanqophisi Ababeke ilihlo Ebhodini ELawula UmNotho WezokuThutha (i-TER) (Ukuqatjhwa kweBhodi ye-TER kuyingcenye yokuphumelelisa amatjhuguluko ekorweni yezokuthutha neentlabagelo zakhona).
(a) UMm.u-Ethel Teljeure (uSihlalo);
(b) UMm. u-Balebebetje Zondi;
(c) UMm. u-Fathima Bibi Sheik;
(d) UNom. Lucky Thekisho;
(e) UNom. Vincent Blennies; kunye
(f) noNom. Ravindra Nair.
13. Abanqophisi Ababeke Ilihlo EBhodini YesiKhatjhana YesiKhwama Semali Yeengozi ZeNdlela (i-RAF)
(a) UNom. Kenneth Brown (uSihlalo)
(b) UMm. uNonhlanhla Mabusela-Aikhuere (iSekela likaSihlalo).
(c) UMm. uNtswaki Kutumela;
(d) UMm. u-Innocentia Mmule Pule;
(e) UNom. Richard Dyantyi;
(f) UNom. Mpontshane Afred Mkhipheni;
(g) UNom. Neeshan Balton;
(h) UMm. u-Alfredina (Ntina) Themba
F. Iminyanya Ezako
1. ILanga Labomma
1.1 UMengameli Cyril Ramaphosa uzokuthwala ilizwe esikhumbuzweni seLanga laboMma lomnyaka wee-2025 mhla ali-09 kuRhoboyi 2025 e-Nkowankowa Stadium, ese-Tzaneen, e-Limpopo. Isikhumbuzo sanonyaka sibanjwa ngommongondaba othi: “Sakha Iminotho Ezijameleko Ezuzisa Abantu Boke”, othomana nesiKhundla seSewula Afrika sokuba nguSihlalo we-G20 nokuzibophelela kwayo kukambisolawulo yokuZwelana, ukuLinganiseka kunye nokuBambelela.
1.2 Ihlelo lanonyaka ligandelela ukuphakamisa ukungena kwabomma eenkhundleni zoburholi nepilweni yezomnotho, sikhuthazela ukuqalelelwa kezeemali, silwe neNturhu eQothele bobuLili obuThileko nokuBulawa kwabaNtu abaSikazi (i-GBVF) njengesiqabo esikhulu esiqabela ukuhlonyiswa kwabantu abasikazi.
1.3 INyanga yaboMma ayisikuthokozela nokuhlonipha amandla wabomma nesandla ababe naso ngakho koke ukwahluka kwabo kwaphela, kodwana ibuye godu ibe sikhathi sokukhwezelela ukuthathwa kwegadango lokuqinisekisa ukuthi abomma bafakwa ngokupheleleko nangokulinganako emisebenzini yoke yokwakha ingomuso leSewula Afrika.
2. Imbizo Yokusikimisa Ijima Le-JCPS Lokulimukisa Nokukhandela I-GBVF
2.1 IHlanganisela yezomThethobulungiswa, ukuKhandelwa kobuLelesi kunye nokuVikeleka (i-JCPS) izokubamba imbizo yokuphandlulula nge-GBVF, mhla abu-08 kuRhoboyi 2025 Ga-Kgapane, e-Limpopo.
2.2 Imbizo yokuphandlulula le izakuhlanganisa iminyango karhulumende, iinhlangano zomphakathi, abarholi bendabuko nomphakathi wendawo bazokuphakamisa iphandlululo baqinise nependulo ebuya emphakathini ngekhwekhwe le-GBVF.
3 Umhlangano Wezamasiso E-Afrika
3.1 IKhabinethi ivumile ukuthi iSewula Afrika isingathe umhlangano weenkhulu wezamanzi nezamasiso (i-African Union Water Investment Summit) eKapa ukusukela nakali-13–15 kuRhoboyi 2025. Umhlangano lo uzokuhlanganisa iinKhulu zomBuso nezaboRhulumende, aboNgqongqotjhe bezaManzi be-Afrika, imibuso emalunga we-G20, abasisi, ikoro yangeqadi, ababethimthetho, iimfundiswa, iinhlangano zamazwe ngamazwe kunye namakoro akhambisana nalokhu kobanyana kuzokubonisanwa ngeentjhijilo ezikhona ngokufumaneka kwamanzi, iimali ezisekela umthangalasisekelo kunye namasiso ekhonthinenthini.
3.2 Umhlangano lo uthonyaniswe nomnqopho we-G20 wokwandisa ikhwalithi nomthamo weemali ezisekela imisebenzi yetlayimethi eya emazweni asathuthukako ngokukhwezelela amasiso wokuvikelwa kwamanzi nokuthambela ubujamo bezinto kunye nehlelo lokuhlwengisa elibambelelako. Omunye wemiphumela yomhlangano lo kuzakuba kusungula amagadango wokubusa kuhle, zeemali, idatha nekghono lamandla ekorweni yezamanzi, khulukhulu ukukhwezelela amasiso azokuvala isikhala sokusekelwa ngeemali esibonakele ngeHlelo lamaSiso eManzini e-Afrika (i-Africa Water Investment Programme), ebuye yaziwe nangokuthi yi “Mind the Gap, Invest in Water Campaign.” Ngaphezu kwalokho umhlangano lo uzakubukisa ngamaphrojekthi esele alinde abasisi abangafaka imalabo, basise kilelihlelo.
4. Ukuvulwa Kobutsengelo Bamanzi I-Rand Water Zuikerbosch Water Purification Works
4.1. UMengameli Cyril Ramaphosa uzokuvula ubutsengelo bamanzi i-Rand Water Zuikerbosch Water Purification Works, hlanu kwe-Vereeniging nakabu-08 kuRhoboyi 2025. Lobubutsengelo bamanzi ngobukhulu nobuphezulu khulu ngethekhnoloji e-Afrika yoke, kanti-ke bunqophe ukungezelela busiza i-Rand Water ngomsebenzi wokuphakela amanzi, bebusize nekuqaleleleni ihlelo lokuphakelwa kwamanzi e-Gauteng.
5. Imilayezo
5.1. Silila Imbiko
IKhabinethi iyililela imbiko imindeni nabangani balaba abalandelako:
- Urhulumende we-Nigeria nabantu bakhe ngokukhothama kukaMengameli wangaphambilini u-Muhammadu Buhari. Uburholi bukaMengameli Buhari kwaqinisa itjhebiswano lamazwe amabili la, basiza nekukhuleni nekuthuthukeni kwamazwe we-Afrika kanyekanye nangokulingana.
- UMm. u-Tracy Brown, obekamtjhutjhisi wekhotho yesifunda, eKhotho kaMarhistrada e-New Brighton eGqeberha, obulewe ngesihluku phambi kwakwakhe. Ukubulawa kwakhe kukusahlela ukusebenza komthetho nemizamo yethu engaphelelwako yokubamba izelelesi zizokuphendulela ukwenza kwazo.
- Umbikiindaba owaziwako obekaMhleli oPhetheko ephephandabeni i-Sowetan, u-Pearl Sebolao, umsebenzakhe wobubikiindaba ongaphezulu kweminyaka ema-20.
- Umakekere nosomahlaya womlingisi u-Meme Ditshego, umsebenzakhe orhanyazelako omsebenzise ethelevitjhinini, ethiyetha nakumafilimu.
- Usomabhizinisi wendumela, umtlami nomkhambisani ongomunye wabasunguli belebuli eyathumba yelakanisa abonongorwana befetjhini i-Sun Goddes, uVanya Mangaliso, yena owafaka ilembatho lendabuko leSewula Afrika efetjhinini.
- Urhulumende we-Ghana, ngengozi yokuwa kwakaflayi obekakhweze iimphathimandla zikarhulumende eziimbadlwana.
1. Siyabathokozisa
IKhabinethi ithokozise yabe yezwakalisa neemfiselabuhle zayo:
- EJajini eliKhulu u-Dunstan Mlambo okhethelwe isikhundla seSekela leJaji eliKhulu leRiphabhligi yeSewula Afrika. Phambilini iJaji uMlambo wayeliJaji eliKhulu leKhotho ePhakemeko ye-Gauteng, kanti-ke soke isikhathi bekasolo ajame asimelele ekolelwenakhe yokuzijamela kwebandla lamajaji, nekutholakaleni kwesizo lomthetho kunye nekwenziweni kwamatjhuguluko ehlelweni lezomthetho.
- KuDorh. Mafu Rakometsi, ongu-CEO yomKhandlu kaMalusi ngokuqatjhelwa kwakhe isikhundla sokuba nguMengameli we-International Association for Education Assessment.
- Esiqhemeni i-Team South Africa ngokudlala kwayo kuhle kangaka emidlalweni i-2025 FISU World University Games, eJarimani. I-Team SA iqede imidlalo ineemendlela ezili-19, ezisithandathu zazo ngezeGolide, zihlanu zazo ngezeSiliva ezibunane zazo ngezeThusi:
a. UBayanda Walaza uthumbe igolide ku-100m naku-200m.
b. Ekorweni yabaduna emidlalweni yokumukezana yebanga le-4x100m, beSewula Afrika (uBayanda Walaza, u-Retsidisitswe Mlenga, u-Kyle Zinn, noMthi Mthimkhulu) bathumbe isiiva.
c. U-Lythe Pillay uthumbe igolide ebangeni lamadoda lama-400m.
d. U-Aiden Smith uthumbe igolide emdlalweni wabaduna wokujikijela i-shot put ngokusika kwakhe ikundla emzameni wakhe wesithandathu newokugcina.
e. U-Pieter Coetze uthumbe zimbili iimendlela zegolide ebangeni lama-50m nele-100m ye-backstroke. Ubuye wathumba igolide neemendlela zesiliva ku-World Aquatic e-Singapore.
- Esiqhemeni i-Team South Africa ngokudlala kwayo kuhle okubabazekako emidlalweni i-2025 African U18 ne-U20 Championships kuma-Athletic ebeyidlalelwa e-Abeokuta, e-Nigeria. I-Team SA ithumbe imendlela yegolide, neyesiliva neyethusi emakorweni ahlukahlukileko.
- KuZakithi Nene ngokuthumba kwakhe unongorwana wethusi ephaliswaneni lama-400m e-London Diamond League.
- Ku-Retshidisitswe Mlenga ngokuthumba kwakhe i-World Championship ebangeni le-100m e-Austria.
- Ku-South Africa U20 (i-Junior Springboks) ngokuthumba kwayo i-World Rugby U20 Championship e-Rovigo, e-Italy.
- Ku-Aldrict Potgieter ngokuthola kwakhe unongorwana wokuthoma we-PGA asese neminyaka ema-20 kwaphela, ngokuthumba kwakhe i-2025 Rocket Classic e-Detroit Golf Club e-USA.
- Ku-South African Cricket Legends ngokuthumba kwayo amafayinali we-World Championship of Legends e-Birmingham, e-England.
- Ku-Redhill School ngokwenza kwakhe umlando ngokuba mSewula Afrika wokuthoma ukuthumba iphaliswano le-U17 World Schools Netball Cup.
- EmNyangweni weeNdaba weHlangano eRhatjha ngoMmoya eSewula Afrika – i-SABC – njengoba bewuhlanganisa ama-75 weminyaka wavulwa lomnyango, usolo usarhatjhela abantu iindaba.
- KuSewula Afrika ngokufakazelwa ukuthi iyindawo lapho kuyokudlalelwa khona imidlalo yeGalufu i-2026 LIV Golf Tournament, ekumdlalo omkhulu ozokudlalelwa e-Gauteng, eSewula Afrika, kokuthoma emlandweni, mhla ama-26 kuMrhayili 2026.
Imibuzo ingathunyelwa:
kuMm. uNomonde Mnukwa – umJaphethe womKhulumeli kaRhulumende.
INomboro yeselifowuni: 083 653 7485.
