Khumbelo ya ḽaisentsi ya mugudi

Ngaha ha u ita khumbelo ya ṱhanziela ya mugudi

Ḽaisentsi ya mugudi i vha tendela u reila vha tshi khou lavheleswa nga mureili a re na ḽaisentsi. Arali tshiendedzi tshi tshi ṱoḓa ḽaisentsi ya phurofeshinaḽa, mureili a re na ḽaisentsi u fanela u vha a na ḽaisentsi ya phurofeshinaḽa.

Ḽaisentsi ya mugudi ndi ḽaisentsi ine ya khwaṱhisedza uri vha na nḓivho ya mutheo ya tshiendedzi na milayo ya badani. Ḽaisentsi ya mugudi i shuma lwa miṅwedzi ya 24 fhedzi nahone a i engedzedzwi.

Hu na ḽaisentsi dza mugudi dzo fhambanaho dzine dza ṋetshedzwa kha zwiendedzi zwo fhambanaho:

• Khoudu ya 1: He ndi ya thuthuthu i re na kugoloi kana i si na kugoloi nga thungo, thuthuthu ya malinga mararu kana ya maṋa. Vha fanela u vha vha na miṅwaha ya 16 kana u fhira nga ḓuvha ḽa musi vha tshi ita ndingo uri vha tendelwe u ita khumbelo ya arali nzhini ya thuthuthu i sa fhiri 125 cc na miṅwaha ya 18 kana u fhira arali i tshi fhira 125 cc.
• Khoudu ya 2: Hei ndi ya thuthuthu, ya dovha ya katela tshibisana, bisi kana goloi ya u hwala thundu, zwi re na tshileme tshi sa fhiri 3 500kg. Vha fanela u vha vha na miṅwaha ya 17 kana u fhira nga ḓuvha ḽa u ita ndingo uri vha tendelwe u ita ndingo.
• Khoudu ya 3: Hei ndi ya tshiendedzi tshi re na tshileme tshi sa fhiri 3 500kg. Vha fanela u vha vha na miṅwaha ya 18 kana u fhira nga ḓuvha ḽa u ita ndingo uri vha tendelwe u ita ndingo.

Zwine vha tea u ita

1. U ita khumbelo vha fanela u tou ya kha Senthara ya u Linga Vhareili ya tsinisa na havho (Driver Licensing Testing Centre (DLTC) u ita nzudzanyo.
2. U buka ḓuvha ḽa ndingo na u khawṱhisedza u buka, vha fanela u ṋetshedza zwitevhelaho:
   • basa/ḽiṅwalo ḽa vhuṋe(ID)
   • zwifanyiso zwivhili zwa basa zwa muvhala mutswu na mutshena
   • mbadelo dza u buka.
3. Kha vha ḓadze fomo ya khumbelo ya ṱhanziela ya mugudi (LL1), ine ya wanala kha DLTC.
4. Vha ḓo ita ndingo dza maṱo kha senthara ya u linga kana, vha nga ya kha dokotela wa maṱo a re na ndalukano na u isa fomo senthara ya ndingo.
5. Vha fanela u vha vha na nḓivho ya fhasi ya goloi na tswayo dza badani musi vha sa athu u ita ndingo. Zwenezwo vha fanela u guda tswayo dza badani, ndaulo ya goloi vha sa athu u ita ndingo.
6. Nga ḓuvha ḽa u ita ndingo vha fanela u ḓa na zwitevhelaho:
   • rasithi ya u buka u khwaṱhisedza nzudzanyo
   • ID yavho
7. Arali vha phasa ndingo vha fanela u badela mbadelo dza u rengulula.

Tshifhingambekanywa

Ṱhanziela ya mugudi i ṋetshedzwa ḓuvha ḽeneḽo arali vho phasa.

Zwi ita vhugai

Kha vha kwame ofisi yavho yapo ya ḽaisentsi u vhudzisa mutengo.

Fomo dzi no tea u ḓadzwa

• Fomo ya khumbelo ya ḽaisentsi ya mugudi (LL1)
• Muhumbeli a re na miṅwaha ya 65 kana u fhira u fanela u vha na fomo ya ṱhanziela ya zwa Mutakalo (MC).

Hedzi fomo dzi wanala kha senthara iṅwe na iṅwe ya ndingo na kha eNatis.

Vha kwama inyi