Kgopelo ya setifikeiti sa lenyalo

Go phethagatša semmušo le go ngwadiša manyalo a semolao, manyalo a setšo le kopantšho ya baratani ya semolao go laolwa ke Kgoro ya Merero ya Selegae. Manyalo a semolao a laolwa ke Molao wa Manyalo (wa Nomoro ya 25 wa 1961). Afrika Borwa le yona e dumela manyalo a setšo ka go šomiša Molao wa Tumelelo ya Manyalo a Setšo, wo o thomilego go šoma ka Dibatsela 2000.

Kopantšho ya baratani ya semolao, ye e ka tsenelwago ke batho ba bong bja go swana, e a dumelelwa go latela Molao wa Kopantšho ya baratani ya Semolao (2006).

Le swanetše go ngwadiša lenyalo la lena la setšo mo dikgweding tše tharo ka morago ga letšatšikgwedi la go keteka goba la go tsena ka gare ga lenyalo le go le dira gore le be molaong. Tlhalošo ya lenyalo la setšo ke gore ke leo le “rerišanwago, le ketekwago goba le phethagatšwago go ya ka ditlwaedi dife goba dife tša molao wa setšo wa setlogo sa Seafrika tše di lego gona ka Afrika Borwa”.

Le tla hwetša setifikeiti sa lenyalo ka morago ga go ngwadiša lenyalo la lena. Le ka dira kgopelo ya khopi ya setifikeiti sa lenyalo la lena ge e le gore le nyalane ka Afrika Borwa gomme ge lenyalo la lena le ngwadišitšwe. Setifikeiti sa lenyalo se šoma bjalo ka bohlatse bja gore lenyalo la lena le ngwadišitšwe ebile le molaong.

Hwetša dintlha ka botlalo mabapi le go nyalwa, manyalo ao a sa dumelelwego le mabapi le go nyala ngwana yo monnyane goba ikgokaganye le Kgoro ya Merero ya Selegae.

 

Share this page