Ge e le gore o gobetše, wa fetelwa ke bolwetši goba wa hlokofala o le mošomong, wena goba bao o ba hlokometšego ba ka dira kleimi go tšwa go Sekhwama sa Phumulamegokgo.
Sekhwama se lefa tšhelete ya phumulamegokgo go bašomi ba go ya go ile le ba lebakanyana, batho bao ba fiwago tlhahlo le baithutelamošomo wa matsogo bao ba gobetšego goba ba fetetšwego ke bolwetši ka nako ya ge ba le mošomong gomme ba lahlegelwa ke megolo ya bona ka lebaka la seo.
O ka dira kleimi ge fela e le gore o:
- thwetšwe go ya go ile
- mošomi wa ka gae yo a šomago a dula ka ntlong goba a thwetšwe ka lefelong le bjalo ka la kgwebo
- moithutelamošomo wa matsogo goba mošomi wa polase yo a fiwago tlhahlo
- mošomi yo a lefšago ke etšensi ya bašomi.
O ka se dire kleimi ge e le gore o:
- mošomi wa ka lapeng yo a thwetšwego ka legaeng la praefete
- leloko la Mašole la Go ya go ile la Sešole sa Tšhireletšo ya Bosetšhaba ya Afrika Borwa ka nako ya ge o le mošomong wa go širelatša Repabliki go ya ka karolo ya 1 ya Molao wa Tšhireletšo wa 1957
- leloko la Ditirelo tša Maphodisa a Afrika Borwa ge o le mošomong wa go šireletša Repabliki go ya ka karolo ya 1 ya Molao wa Tšhireletšo, wa 1957
- mošomi yo a sa šomego ka tlase ga taolo ya mongmošomo, mohlala, yo a šomago ka tlase ga konteraka. Bašomi bao ba šomago ka tlase ga motho yo a swerego konteraka ba a šireletšwa.
- mong wa setswalle sa motsamaiši wa lefelo le tee
- mošomi yo a šomilego ka ntle ga Afrika Borwa lebaka la go feta dikgwedi tše 12 ntle le go tsenela tumelelano le Molaodipharephare wa Kgoro ya Bašomi
- o bonwe molato wa go hloka maitshwaro ka boomo, ntle le ge e le gore o golofetše kudu goba o hlokofetše.
Hlokomela: Ge e le gore wena bjalo ka mošomi, o hlokofala ka bolwetši bjo bo sepelelanago le mošomo goba kgobalo, bao o ba hlokomelago ba ka dira kleimi go tšwa sekhwameng se.
Phumulamegokgo e ka se ke ya lefša ge e le gore:
- o begile kotsi go mongmošomo ka morago ga dikgwedi tša go feta tše lesomepedi ka morago ga kotsi goba lehu, goba ka morago ga ge bolwetši bo utulutšwe
- o sa ya mošomong lebaka la matšatši a mararo goba ka fase, ge e le gore Sekhwama se tla lefa fela tša kalafo
- kotsi e hlotšwe ke go hloka hlokomelo ga gago goba go dira diphošo (ntle le ge e le gore o golofetše kudu goba o hlokofetše kotsing, gona Sekhwama se tla lefa phumulamegokgo)
- o gana ntle le mabaka goba o tlogela kalafo ka bowena.
Hwetša dintlha ka botlalo mabapi le go dira kleimi ya dikgobalole malwetši a ge o le mošomong goba o ikopanye le ba Sekhwama sa Phumulamegokgo.
