Pego ya Kopano ya Kabinete ya la 15 Moranang 2015

1. Mpherefere wa bjale wa tlhaselo ya Bafaladi

1.1 Kabinete e kgala ka bogale ditiro tša bjale tša dikgaruru kgahlanong le bafaladi. Ka se sebaka, Kabinete e rata go romela mantšu a yona a kwelobohloko go ba malapa a bao ba lahlegetšwego ke maphelo a bona le pholo ya ka pela go bao ba gobetšego. Ga go na palo ya kgakanego goba pefelo ye e ka lokafatšago ditlhaselo tše le thopelo ya mabenkele. Mola go elwa hloko dingongorego tše di laeditšwego ke badudi, dikgaruru kgahlanong le motho yo mongwe di ka se tsoge di rarolotše dingongorego tše. Boemong bja seo, di laetša bobe go rena bjalo ka batho, ka go ba kgahlanong le melawana le metheo ya temokrasi ya rena. Afrika Borwa e lwele kgahlanong le bokoloniale le Kgethologanyo ka thušo ya magagešo a mangwe a maAfrika gore botho bjohle ka kontinenteng ya rena bo hlomphiwe le go swarwa ka seriti.

1.2 Khuetšo ya ditlhaselo tše e na le ditlamorago tše mpe tše kgolo go ekonoming ya rena, leago la rena le go dikamano tša sepolotiki tša rena le kontinente le lefase. Dikhamphani tša Afrika Borwa tšeo di laolago dikgwebo tše di atlegago ka kontinenteng tšeo di thušago go ba le seabe go letseno le go thekgo ya ekonomi ya rena le tšona di ka ba le bothata bjo bo bjalo. Kgauswinyana mo, badiragatši ba Afrika Borwa bao ba bego ba swanetše go laetša bokgoni bja bona ka ntle ga mellwane ya naga ya rena, go swana le BigNuz go la Zimbabwe, Kelly Khumalo le Casper go la London, dikhonsata tša bona di phumutšwe ka lebaka la ditlhaselo tše. Bontši bja badudi bao ba ithekgilego ka mabenkele ao e lego a bafaladi go hwetša marotho le potoro a bona bjale ba kgakaganegong.

Lehono, maAfrika Borwa a ipshina ka naga ye e lokologilego, yeo e fihleletšwego ka seabe sa Dinaga tša go balega tša Afrika. Mogale wa rena, mohu Mopresidente Oliver Tambo o be a filwe madulo mengwaga ya go batamela ye 30 go la Zambia le maAfrika Borwa a mangwe a mantši ao a phetšego botšhabelo. Dinaga tše dingwe tša Afrika, ga se di fe magagaborena madulo fela, gape di ba file methopo gomme tše dingwe di lefile ga bohloko le go lahlegelwa ke badudi ba tšona lebakeng la go fihlelela temokrasi ga Afrika Borwa. Afrika Borwa e ka se tsoge e phamošitšwe tseleng ya go tšwetšapele pono ya Thekgo ya Afrika bjalo ka ge e akareditšwe ka gare ga Lenanethero la Kopano ya Afrika la 2063, yeo e sa lego e tšwetšwa pele ke bagologolo ba rena Kwame Nkrumah, Nnamdi Azikiwe, Mwalimu Julius Nyerere le Nelson Mandela.

Mopresidente Jacob Zuma o file Ditona tša Seboka sa Toka, Thibelo ya Bosenyi le Tšhireletšo mmogo le Ditona e lego ya Kgoro ya Tlhabollo ya Dikgwebopotlana, ya Kgoro ya Kgwebišano le Intasteri le ya Kgoro ya Tlhabollo ya Leago mošomo wa go boledišana le maloko a maleba go hwetša tharollo. Ditona gape di filwe mošomo wa go šomana le maemo a motheo a leago le ekonomi ao a bonalago e le sebakwa sa ditlhaselo tše, gore taba ye e kgone go rarollwa go ya go ile ka botlalo. Mopresidente gape o tsebišitše magato ao a tšerwego ke Lebotho la Mašole a Tšhireletšo a Afrika Borwa go tliša taolo go mellwane ya rena.

Kabinete e ipiletša go ditšhaba ka moka, mekgatlo le batho go šomišana kgahlanong le ditlhaselo tše. Afrika Borwa ga se naga ya dikgaruru gomme ka go realo batho ba se ba kae ba ka se dumelelwe go hlolela naga mpherefere. Dikgaruru ga se nke e be tharollo ya mathata ka gare ga setšhaba sefe goba sefe ebile di ka se tsoge di dirile bjalo ka Afrika Borwa. E sego ka leina la rena!

2. Dihlwadieme

2.1 Kabinete e amogetše sephetho ka bolaodi bja yunibesithi sa go tloša sehlwaseeme sa Rhodes ka khamphaseng ya Yunibesithi ya Kapa. Afrika Borwa mo mengwagasomeng ye mebedi ya mafelelo e gatetše pele ka go kgonthišiša gore dika tša rena tša histori di laetša palo ya merafe ya naga ya rena le kwano ya rena ya temokrasi. Efela, Kabinete e amogetše gore leeto la go tloša dika tše di sa thabišego tša histori le maina ka gare ga naga ya rena ga se le sepetšwe ka lebelo le le lekanego. Kabinete e laeditše le go hlohleletša poledišano ya bjale ye e nabilego yeo e thomilego ka ga phetogo ka gare ga setšhaba sa rena, go laetša gore phetogo ga se e sepele ka lebelo le le lekanego re kwešiša dikgakanego tša baithuti. Ka go realo re ba hlohleletša go latela ditshepedišo bjalo ka ge di hlalošitšwe ka gare ga melao ya rena.

2.2 Kabinete e ipiletša go maAfrika Borwa go kgatha tema ka ditshepedišong tše di tšwelago pele tšeo di etilwego pele ke Kgoro ya Bokgabo le Setšo ka ga bohwa le kago ya setšhaba. MaAfrika Borwa a gopotšwa gore Molao wa Methopo ya Bohwa ya Bosetšhaba wa 1999 o hlaloša ditshepedišo tša poledišano tšeo di swanelago go latelwa ge go tlošwa le/goba go hudušwa sehlwaseeme.

3. Ketelo ya Semmušo ya Zimbabwe

3.1 Kabinete e amogela ketelo ye e atlegilego ya semmušo ya Zimbabwe ye e etilwego pele ke Mopresidente Robert Gabriel Mugabe. Afrika Borwa le Zimbabwe, di na le histori ye telele ya boleloko bja selete le ditlemano tša setšo. Batho ba Zimbabwe ba kgathile tema ye bohlokwa ya histori ka go thekga ntwa ya tokologo ka Afrika Borwa.

Ketelo e godiša dikamano tša dinaga tše pedi ka tlhomo ya Khomišene ya Dinaga tše Pedi le go saenela dikwano tše tharo le Dimemorantamo tša Kwano (di-MoU) tše pedi.

• Kwano ka ga Tlhomo ya Khomišene ya Dinaga tše Pedi e godiša poledišano ya rena ya dinaga tše pedi ye e beakantšwego go fihla maemong a godimo ka go kopana ga Dihlogo tša Dinaga tše pedi gore di sekaseke kgatelopele ka ga dikwano tša tšhomišano tša dinaga pedi tše di kwanetšwego.
• Kwano ya Tšhomišano ka ga Taolo ya Methopo ya Meetse le tlhomo le go šoma ga Khomišene ya Mohlakanelwa ya Meetse e tla oketša tšhomišano go peakanyo ya methopo ya meetse, tlhabollo le taolo ka moya wa kwešišano le kholego. Dinaga ka bobedi di tla šomišana tirong ya dinyakišišo go kwešiša bokgoni bja methopo ya meetse bja mafelo a bokgoketšo bja meetse a dinoka go la Zimbabwe go abela Repabliki ya Afrika Borwa meetse; le go šomišana tlhomong ya diprotšeke tša meetse, tšeo di tlogo ba le ditlaleletšo go ya ka tlholo ya mešomo, phetogo ya ekonomi le tlhabollo le phetišetšo ya mabokgoni.
• Kwano Mabapi le Thušo ya go Kwanelwa gare ga Ditshepedišo tša Makgetho e bea motheo wa go hloma lefelo la mollwane fao go khumanwang ditirelo kamoka lefelong le tee. Se ke mmotlolo wa boditšhabatšhaba wa tekanetšo wo o bapatšwago ke Mokgatlo wa Lefase wa Makgetho. Nepo ke go kgontšha mebušo ye mebedi go neeletšana ka tshedimošo, go thekgana ka thušo ya sethekniki, le tlhokomedišo, diketelo le dinyakišišo mmogo le go šomišana go ya kaonafatšong ya bokgoni bja ditshepedišo.
• MoU ka ga Dipoledišano tša Sediplomate o tla hloma mokgwa wa dipoledišano tša ka mehla tša sediplomate ka ga ditaba tša ka Afrika le ditaba tše dingwe tše di nago le kgahlego dinageng ka bobedi. Maikemišetšo a magolo a MoU wo ke go hloma mokgwa wa dipoledišano tša ka mehla tša sediplomate ka ga ditaba tša go matlafatša dikamano tša dinaga tše pedi, tšhireletšo le tšhomišano ka Afrika.
• MoU ka ga Tšhomišano ya Kgwebišano o ikemišetša go aba sefala sa gore dinaga tše pedi di boledišane le go abelana boitemogelo bja go thekga tlhabollo ya ekonomi. Dinaga tše pedi di kwane go šomišana ka kgodišo ya kgwebišano, tharollo ya mathata a kgwebišano le kago ya bokgoni bja sethekniki ka makaleng ao a hlaotšwego le ditlhabollo tša mabokgoni ka kakaretšo.

4. Yunibesithi ya Disaense tša Maphelo ya Sefako Makgatho (SMU)

4.1 Kabinete e amogela thakgolo ya SMU ka Mopresidente Jacob Zuma ka Ga-Rankuwa go la Gauteng ka la 14 Moranang 2015. Yunibesithi ye, yeo e akaretšago khamphase ya pele ya MEDUNSA yeo e bego e le ya Yunibesithi ya Limpopo, e thomile ngwaga wa yona wa mathomo wa thuto ka 2015 ka baithuti ba 5 000.

Tlhomo ya Yunibesithi ya Sefako Makgatho e aba sebaka se se botse go fetiša sa tlhabollo le tlhahlo ya moloko wo moswa wa diprofešenale tša maphelo tšeo di tlago ba le khuetšo ye botse go maphelo le mekgwa ya boiphedišo go bontši bja maAfrika Borwa ao a sa ntšego a phaelwa thoko ke bohloki le go se kgone go fihlelela ditirelo tša maphelo. SMU ke yunibesithi ya maphelo ya mathomo ye e ikemetšego ka noši ya go hlongwa ka mo nageng. Mmušo o tla tšwela pele go beeletša thutong le tlhabollong ya mabokgoni bjalo ka kgato ye bohlokwa ya go ya go kgolo ya ekonomi le tlhabollo.

5. Beke ya Bosetšhaba ya Go Šetša ya Imbizo

5.1 Kabinete e laeditše tebogo ya yona go maAfrika Borwa ka moka ao a tlilego ka bontši go kgathatema ka dipoledišanong thwii le baemedi ba setšhaba nakong ya Beke ya Bosetšhaba ya Go Šetša ya Imbizo ka kgwekgwe ye “Mmogo re Tšwetša pele Afrika Borwa”. Se ke taetšo ya temokrasi ye e golago fao badudi ba kgathago tema ka mafolofolo ka diprotšekeng tše di ikemišeditšego go rweša mmušo maikarabelo bjalo ka ge go šišintšwe ka gare ga Leanotlhabollo la Bosetšhaba. Baetapele ba sepolotiki ba kopane le ditšhaba le go hlatholla ditsebišo tše di dirilwego ke Mopresidente Jacob Zuma nakong ya Polelo ya Maemo a Setšhaba ya 2015.

5.2 Imbizo gape e file baetapele ba sepolotiki monyetla wa go tsebiša mananeo a mmušo a go kaonafatša kabo ya ditirelo le go theeletša ditlhohlo tše ditšhaba di lebanego natšo. Ditiragalo tša go feta tše 70 tša di-Imbizo di swerwe go tloga ka la 07 Moranang go fihla ka la 12 Moranang 2015. Ditiragalo di feleletše ka la 12 Moranang, ka “Lontše ya Imbizo” yeo e bego e swerwe sammaletee ke baetapele ba bararo ba sepolotiki ka diprofenseng tše tharo.

6. Diphetho tše Bohlokwa tša Kabinete

6.1 Kabinete e amogela dipoelo tša nyakišišo ye e dirilwego ka ga dingongorego le dipotšišo tše 161 091 tše di amogetšwego ke Mogala wa tšhoganetšo wa Mopresidente go tloga mola o thomago go šoma go fihla mafelelong a Hlakola 2013. Nyakišišo e utulotše mohuta wa dingongorego wo o begilwego ke badudi, e hlaotše dikgwekgwe tše di tšwelelago le ditaba tša mašomelo go kgabaganya mmušo. Dikutullo di hlaotše palo ya ditaba tše di belaetšago badudi tšeo di tlwaelegilego go kgabaganya mmušo.

Dikutullo tša nyakišišo di tla thuša dikgoro go kwešiša bokaone ditaba tše di nyakwago ke ditšhaba, le tshedimošo ya maleba ye e nyakwago ke ditšhaba. Magato a a tla kaonafatša ka fao re šomelago ditšhaba.

6.2 Kabinete e amogetše pego ya tsebišo ka ga tshekatsheko ya tefo ya baaba ditirelo ka matšatši a 30 go tloga go kamogelo ya lenanetheko la nnete. Kabinete e amogetše kgatelopele ye e dirilwego, eupša e laeditše dihlobaelo ka ga tše dingwe tša dikgoro tšeo di sa ntšego di lebane le ditlhohlo.

Tshekatsheko ya papetšo ya Dikgoro tša Bosetšhaba gare ga Pherekgong go fihla ka Diphalane 2013 le Pherekgong go fihla ka Dipahalane 2014 e laeditše kaonafalo ya 39% go palo ya gare ya mananetheko a a lefilwego ka fase ga matšatši a le 30 mmogo le kaonafalo ya 32% go palo ya gare ya mananetheko a a lefilwego ka morago ga matšatši a le 30.

Dikgoro tša bosetšhaba di begile mananetheko a 155 572 a go lekana R3,8 bilione ao a lefetšwego setee ka morago ga matšatši a 30, mananetheko a 62 887 a go lekana R2,1 bilione ao a šaletšego morago ka matšatši a 30 ga se a lefelwe.
Dikgoro tša diprofense mo lebakeng la go swana le la dikgoro tša bosetšhaba di laetša kaonafalo ye nnyane ya 5% ka palo ya gare ya mananetheko a a lefilwego pele go fela matšatši a 30. Diprofense di begile mananetheko a 241 332 a lekanang R13,4 bilione ao a lefilwego ka morago ga matšatši a 30 le mananetheko a 356 079 a go lekana R21,8 bilione ao a šaletšego morago ka matšatši a 30 ga se a lefelwe.
Se ke poelomorago ya 52% ka palo ya gare ya go balelwa go ao a šaletšego matšatši a ka godimo a 30 ebile e le ao a sego a lefelwa.

Go thuša dikgoro tšeo di sa ntšego di goga boima, kabinete e amogetše tlhomo ya yuniti ya go ikgetha ka gare ga Kgoro ya Peakanyo, Tekodišišo le Tshekatsheko ya Phethagatšo ya Mošomo go šala morago dikgoro tše di tšwelago pele go goga boima. Yuniti e tla šomišana le Kgoro ya Bosetšhaba ya Matlotlo le Kgoro ya Ditirelo tša Setšhaba le Taolo.

Godimo ga fao, mogala wa tšhoganetšo wa bosetšhaba o tla tsebagatšwa woo o tlago ba gona go baaba ditirego go bega ditiragalo tša tefo ye e ditelegago. Se se tla fetišetšwa go kgoro ya maleba le dikarabo di tla bewa.

6.3 Kabinete e amogetše pego ka ga Phethagatšo ya Tshekatsheko ya Papatšo ya Thomelontle le Thušo ya Peeletšo (EMIA) ya Lenaneo la Putseletšo gape e amogetše phetolo ya bolaodi le peakanyo ya kaonafatšo ka Kgoro ya Kgwebišano le Intasteri. Se se bopile karolo ya Lenaneo la Bosetšhaba la Tshekatsheko la 2013/14 go sekaseka bokgoni bja Lenaneo thekgong ya batšweletši ba Afrika Borwa le baromelantle.

EMIA e thušitše dikgwebo tše 6 766 tša go romelantle go kgabaganya diprofense ka moka le go lefa dikleimi tša palomoka ya boleng bja R510 milione go tloga ka 2009/10 go fihla ka 2012/13. Dikgwebo tše di thekgwago tše di hlotše mešomo ye 24 802. Nyakišišo ya bakgathatema ba EMIA e bontšha gore tšhomišo ye ntšhi ya diputseletšo tša EMIA ke Batho ba ba bego ba sena Menyetla go ya ka Histori le difeme tše beng ba tšona e lego basadi.

6.4 Kabinete e amogetše gore sengwalwa sa Tokomane ya Pholisi ya Bosetšhaba ya Kempolo e gatišwe ka gare ga Kuranta ya Mmušo gore bontši bja setšhaba bo e sekaseke. Maikemišetšo a yona ke go kaonafatša bokgoni taolong ya go kempola, go kaonafatša thulaganyo le tšhomišano ya diprofense le go beakanya leswa Boto ya Bosetšhaba ya Kempolo bjalo ka molaodi wo a šomanago kudu le go kempola go go sego molaong.

6.5 Kabinete e amogetše kgatišo ya sengwalwa sa Pholisi ya Bjala gore bontši bja setšhaba se e sekaseke. Sengwalwa sa Pholisi ya Bjala se tla kaonafatša bokgoni bja go laola thekišo ya bjala le go thibela thekišo ye e sego molaong. Magareng a ditaba tše dingwe, ditšhišinyo di šomana le khuetšo ya leago le ekonomi ya bjala le ditshenyegelo tše dingwe tša tirišompe ya dinotagi le phetogo ka intastering ya bjala.

6.6 Kabinete e tsebišitšwe ka dipoelo tša tshekatsheko ya taetšo ya Kgodišo ya Digotlane ya ka Pela fao ditshekatsheko tše di feleletšego di diretšwego Kreiti ya R le magato a phepo ya bana ba ka fase ga mengwage ye mehlano.

Kabinete e amogetše tšweletšo ya Lenaneo la Bosetšhaba la Phepo le le Kopantšwego, yeo e šomanago le phepo ka botlalo, go akaretšwa pele ga lebaka la boimana, matšatši a mathomo a 1 000 a bophelo, kgodišo ya digotlane ya ka pele le Kreiti ya R. Lenaneo la kaonafatšo go tšwa go tshekatsheko ya “Khuetšo ya Tsebagatšo ya Kreiti ya R ka ga Dipoelo tša go Ithuta” e gatelela go kaonafatša boleng go bana ba go hloka le ka diprofenseng tše di sa šomego botse. Se se akaretša tlhahlo le tlhabollo ya barutiši ba Kreiti R le kelo hloko ya go thwalwa mošomong ya batho ba ba nago le lengwalo la thuto la setifikeiti sa godingwana (maemo a NQF a bo 5) bakeng sa morero wo.

7. Melaokakanywa

7.1 Kabinete e amogetše tokollo ya Molaokakanywa wa Inšorense wa 2015 gore setšhaba se o sekaseke.
Molaokaknywa o sepetšana le Leanotlhabollo la Bosetšhaba, o kgonthišiša go ba gona ga lekala la inšorense le le laolwago ga botse le go ema botse, le la go godiša tielelo ya ditšhelete yeo e tlago thekga kgolo ya ekonomi ye e swarelelago ka go phethagatša ditekanetšo tša go phethega go tše di lego godingwana tšeo di tšweleditšwego ka lebaka la mathata a ekonomi a 2008. E phethagatša tlhamo ye e phethegago ye mpsha ya lekala la inšorense.

Mokgwa wa Kelo ya Phuhlamo le Taolo o nyaka go tsebagatša mokgwa wo moswa, wa go thewa godimo ga kotsi le ponelopele ya go se phuhlame ka go bapetša dinyakwa tša khepetlele le dikotsi tša motheo tša mošireletši. Gape o fa mošireletši diputseletšo go amogela dithulusi tša tlhokomelo ya dikotsi le taolo tše e lego tša maemo a godimo le go feta. Magato a a nyaka go kgonthišiša tšhireletšo ye kaone ya bengdipholisi le baholegi le go kgatha tema tielelong ya ditšhelete.

7.2 Kabinete e amogetše kgatišo ya sengwalwa sa Molaokakanywaphetošwa wa Senthara ya Bohlodi bja Matlotlo wa 2014 gore setšhaba se dire ditshwayotshwayo. Molaokakanywaphetošwa o šišinya diphetogo go Molao wa Senthara ya Bohlodi bja Matlotlo (Molao wa 38 wa 2001). Se ke go šomana le ditšhošetšo go tielelo ya mokgwa wa rena wa matlotlo tše di hlolwago ke phihlo ya tšhelete le thekgo ya botšhošetši ka ditšhelete ka go kgonthišiša tatelo ya magato a boditšhabatšhaba le ditekanetšo, ka gare ga tlhako ya molao wa Afrika Borwa.

8. Maemo a Kabinete ka ga Merero ye e lego Ditabeng Seemong sa bjale

8.1 Kabinete e laeditše hlobaelo ka koketšo ye kgolo go mahu a tseleng lebakeng la maikhutšo a Lehu la Morena, ye e bilego le dikotsi tše 208 tšeo di feletšego ka mahu a 287, ge go bapetšwa le nomoro ya ngwagola ya mahu, yeo e emego go mahu a 193 go tšwa dikotsing tše 148.
Polokego tseleng ke maikarabelo a maAfrika Borwa ka moka gomme katlego ya masolo a rena a polokego tseleng e laolwa ke bašomiši ba rena ka moka ba tsela ge ba phetha karolo ya bona. Baotledi ba swanetše go latela melao ya tsela, ba se ba nwa bjala mme morago ba otlela, ba otlele lebelo la maleba le go kgonthišiša gore difatanaga tša bona di loketše tsela.

8.2 Legatong la batho ba Afrika Borwa, Kabinete, e romela mantsu a yona a kwelobohloko go mmušo le batho ba Repabliki ya Kenya, kudu malapa a batšwasehlabelo bao ba hlokofetšego ditlhaselong tša sehlogo tša Yunibesithi Kholeše ya Garissa ka la 2 Moranang 2015.
Kabinete e kgala gotee le Mopresidente Jacob Zuma tiro ye ya go tšhoša gomme e bušeletša gore Afrika Borwa e thekga Kenya le maiteko a setšhaba sa boditšhabatšhaba a tlholo ya khutšo, peo fase ya marumo, temokrasi le kago ya naga go la Somalia.

8.4 Kabinete e lebogiša batho ba Nigeria ge ba sepeditše dikgetho ka khutšo, phatlalatša, botshepegi, tokologo le toka ka la 28 Hlakola 2015, bjalo ka ge Khomišene ya Dikgetho ya Bosetšhaba ye e Ikemetšego ya Nigeria e laeditše. Legatong la maAfrika Borwa, Kabinete e lebogiša Mogenerala Muhammad Buhari ka go kgethwa ga gagwe bjalo ka Mopresidente wa Repabliki ya Federale ya Nigeria.

8.5 Kabinete e lebogiša Marlene van Niekerk ge a bile moAfrika Borwa wa mathomo wa go hlaolwa lenaneong la Sefoka sa Boditšhabatšhaba sa Man Booker. O kgethetšwe diphihlelelo tša bophelo ka moka tše di botse ka dingwalo tša nonwane, go akaretšwa dingwalo tša go swana le Triomf le Agaat. Gape o amogetše Sefoka sa Ikhamanga ka 2011 ka “seabe sa gagwe sa kgopolo ye kaone go fetiša go bokgabo bja dingwalo le setšo”.

9. Ditiragalo tše di tlago

9.1 Kabinete e laeditše gore Mopresidente Jacob Zuma o tla araba dipotšišo ka Palamenteng ka Labone, 16 Moranang 2015.

9.2 Kabinete e amogela Ketelo ya Mopresidente Jacob Zuma ya semmušo go ya Jakarta go la Indonesia, go tloga ka la 19 go fihla ka la 21 Moranang 2015, yeo e tlago sekaseka maemo a dikamano tša dinaga tše pedi go kgonthišiša phethagatšo ya ‘Leano la mešomo’ la mengwaga ye mehlano, bjalo ka ge go ahlaahlilwe ke mahlakore a mabedi go la Pretoria ka Dibatsela 2014.
Mopresidente Jacob Zuma gape o tla tsenela Samiti ya Ašia-Afrika gare ga 22 go ya go 23 Moranang go la Jakarta, yeo e tlogo matlafatša tšhomišano gare ga Dinaga tša Borwa bja Lefase go ya go kgolo ya leago le ekonomi go dilete ka bobedi.
Ketelo e tla felela ka Segopotšo sa Khonferentshe ya 1955 ya Bandung sa bo60 le Segopotšo sa bo10 sa Tšhomišano ye Mpsha ya Maano ya Ašia-Afrika ka la 24 Moranang 2015, seo se tlogo swarelwa ka Bandung go la West Java. E be e le Bandung fao baetapele ba mokgatlo wa rena, e lego Moses Kotane le Maulvi Cachalia ba tsebagaditšego melawana ya go se kgetholle ka semorafe le boitaolo go lenanethero la lefase.

9.3 Kabinete e ipiletša go setšhaba sa maAfrika Borwa go tsenela meketeko ya Kgwedi ya Tokologo, yeo e tlogo tsebagatša ngwagasome wa boraro wa naga wa tokologo ka go godiša seriti sa batho le go tšwetšapele lenanethero la bosetšhaba la tlwaelo go ya go kago ya Afrika Borwa ye e kopanego le ye e atlegago.
Moketeko wa rena wa bosetšhaba o tla feleletša ka Letšatši la Tokologo la 27 Moranang 2015 ka fase ga kgwekgwe ye: “Go keteka mathomo a Ngwagasome wa Boraro wa Tokologo ya rena ka Kakgofišo ya Phetogo ya Ekonomi ka Lebelo”.
MaAfrika Borwa gape a gopotšwa ka maikgafo a mantši ao a dirilwego ke magagešo le basadi ntweng kgahlanong le pušo ye šoro ya kgethollo gore re kgone go isphina ka tokologo ye re nago le yona lehono.
Go hlompha maAfrika Borwa ao a kgathilego tema tšwetšongpele ya temokrasi ya rena, Mopresidente Jacob Zuma ka Letšatši la Tokologo o tla aba Difoka tša Bosetšhaba moletlong go la Union Buildings. Kabinete e romela ditebogišo tša yona go baamogedi ka moka ebile e leboga seabe sa bona.

9.4 Kabinete e amogetše gore Afrika Borwa e tla ba monggae wa Kopano ya Tlwaelo ya bo25 ya Kopano ya Afrika ka Kgorong ya Dikamano tša Boditšhabatšhaba le Tšhomišano le Senthareng ya Dikopano tša Boditšhabatšhaba ya Sandton go la Johannesburg, go tloga ka la 7-15 Phupu 2015. Afrika Borwa e dumetše go ba monggage morago ga gore Repabliki ya Chad e ikgogele morago.

Maikemišetšo magolo a samiti e tla ba go sekaseka kgatelopele ye e dirilwego ka phihlelelo ya maikemišetšo a kontinente, ka nepišo ye itšeng ka ga kgwekgwe ya 2015 ye e rego: “Ngwaga wa Matlafatšo ya Basadi le Tlhabollo go ya Lenanetherong la Afrika la 2063”. Ditaba tše dingwe tša bohlokwa e tla ba seemo sa khuetšo le tšhireletšo ka Afrika, go thibela Bolwetši bja Birase ya Ebola le khuetšo ya leago le ekonomi ka kontinenteng, methopo ye mengwe ya thekgo ya ditšhelete ya Kopano ya Afrika, kamogelo ya Lenaneo la Phethagatšo ya Mengwaga ye Lesome ya Mathomo ya Lenanethero la Kopano ya Afrika 2063 le phetošo ya Ditšhabakopano go Segopotšo sa yona sa bo70.

10. Bao ba thwetšwego mošomong
Batho ka moka bao ba thwetšwego mešomong mangwalo a bona a dithuto a tla tiišetšwa le go netefaletšwa ka maleba

10.1 Ngaka Diane Cecile Parker bjalo ka Motlatšamolaodipharephare: Thuto ya Yunibesithi ka Kgorong ya Thuto le Tlhahlo tša Godingwana.

10.2 Morena Abel Makalene Mawela, bjalo ka Molaodimogolo yo e sego wa Phethišo go Boto ya Koporase ya Dikoloto tša Thomelontle.

10.3 Morena Tefetso Bernard Phitsane bjalo ka moleloko yo e sego wa phethišo wa Boto ya Etšentshi ya Ditimela tša Banamedi ya Afrika Borwa.

10.4 Boto ye e Ikemetšego ya Taolo ya Bahlakiši ba Dipuku:
a) Mohumagadi Lise Keech;
b) Morena Abel Dlamini;
c) Morena Thiru Pillay;
d) Morena Zola Luxolo Fihlani;
e) Mohumagadi Amanda Lethukuthula Mazibuko;
f) Mohumagadi Noluphumzo Leonora Noxaka;
g) Mohumagadi Rene Aloise Kenosi (o thwetšwe gape);
h) Morena Alexander Van der Watt (o thwetšwe gape); le
i) Morena Michael Sass (o thwetšwe gape).

10.5 Lekgotla la Afrika Borwa ka ga Dikamano tša Boditšhabatšhaba (SACOIR):
a) Moprofesa Maxi Schoeman (Dithuto tše kgolwane);
b) Moprofesa Anthoni Van Nieuwkerk (Dithuto tše kgolwane);
c) Ngaka Siphamandla Zondi (Dithuto tše kgolwane);
d) Moprofesa Shamil Jeppie (Dithuto tše kgolwane);
e) Moprofesa Sekgothe Mokgoatsana (Dithuto tše kgolwane);
f) Mohumagadi Chichi Maponya (Kgwebo);
g) Mohumagadi Danisa Baloyi (Kgwebo);
h) Ngaka Thandi Cynthia Ndlovu (Kgwebo);
i) Mohumagadi Nonhlanhla Mjoli-Mncube (Kgwebo);
j) Morena Billy Masetlha (Kgwebo);
k) Morena Dennis George (Mekgatlo ya Bašomi);
l) Morena Joel Mfingwana (Mekgatlo ya Bašomi);
m) Ngaka Somadoda Fikeni (Kemedi ya Badudi);
n) Mogenerale Moyo Mudau (Kemedi ya Badudi);
o) Morena Aziz Pahad (Kemedi ya Badudi);
p) Morena Tshepo Mashiane (Kemedi ya Badudi);
q) Motseta Griffiths Mandlenkosi Memela (Kemedi ya Badudi);
r) Morena Jimmy Gotyana (Kemedi ya Badudi); le
s) Morena Kenny Morolong (Kemedi ya Badudi).

10.6 Khomišene ya Tirelo ya Sešole sa Tšhireletšo:
a) Mohumagadi Sebina Hlapolosa;
b) Moprofesa Malegapuru William Makgoba; le
c) Morena Joseph Maselele Jongile.

10.7 Morena Kevin Wakeford bjalo ka Mohlankedimogolophethiši wa Koparase ya Dibetša ya Afrika Borwa.

10.8 Moprofesa Ntomb’fikile Mazibuko bjalo ka Modulasetulophethiši wa Lekgotla la Lekala la Taolo ya Intasteri ya Tšhireletšo ya Poraebete.

Dipotšišo: Mohumagadi Phumla Williams (Seboleledi sa Kabinete sa Motšwaoswere)
Cell: 083 501 0139