1. Diphetho tše Bohlokwa tša Kabinete
1.1. Kabinete e dumeletše kgatišo ya sengwalwa sa Pholisi ya Bosetšhaba ya Dinamelwa tša Baithuti gore setšhaba se dire ditshwayotshwayo ka gare ga Kuranta ya Mmušo matšatšing a 21.
Pholisi e kaonafatša phihlelelo ya thuto ya boleng ka go aba dinamelwa tša baithuti tše di bolokegilego, tše di nago le seriti, tše di šomago gabotse, tše di kopantšhwego le go swarelela, kudu ditšhabebg tša dinagamagae fao ditlhohlo tša dinamelwa di thibelago phihlelelo ya thuto.
Pholisi e bolela ka ditlhohlo tša sekgoba le peakanyo leswa ya ditshepedišo tšeo di huetšago boleng bja dinamelwa tša setšhaba. Gape e bolela ka mokgwa wa peakanyo ye e kopantšwego le maemo a go swana a taolo.
Phethagatšo ya pholisi ye e tla aba tikologo ya dinamelwa ye e bolokegilego le ye e šireletšegilego go baithuti ka thekgo le tšhomišano ya makala a tiišetšo ya molao.
1.2. Kabinete e dumeletše Taelo ka ga Tlhabollo ya Kgapeletšo, Matšatši a Tlhahlo a Kgapeletšo le Dinyakwa tša Fase tša Botseno go maemo a Tirelo ya Taolo ya Godimo bjalo ka ge go laeditšwe go ya ka Karolo ya 3(2) ya Molao wa Tirelo ya Setšhaba wa 1994.
Se se godiša tlhabollo ya bokgoni gore go latelwe maikemišetšo a Leanotlhabollo la Bosetšhaba (NDP) bja go aga mmušo wo o hlabologago le wo o nago le bokgoni bja go hola kabo ye e kaonafetšego ya tirelo.
Taelo ye ke leano la tlhabollo ya bokgoni la lebaka le le telelele bjo bo tlago oketša boleng bja methopo ya bomotho yeo e lego bohlokwa go bokgoni bja mmušo bja go phethagatša thomo ya ona.
Dikgoro ka moka ka gare ga Tirelo ya Setšhaba di tla nyakega gore di amogele mokgwa wo o sa fetogego go godiša tlhabollo ya bokgoni bja kgapeletšo le bja maleba ka gare ga Tirelo ya Bolaodi bja Godimo.
1.3. Kabinete e dumeletše Kgoro ya Tekolo le Tshekatsheko ya Mošomo go ala sengwalwa sa Tokomane ya Poledišano ka ga Melawana le Mekgwa ya Tekolo le Tshekatsheko ya Mošomo go Komiti ya Potefolio ya Palamente ka ga Tshepedišo ya Tirelo ya Setšhaba le Tekolo le Tshekatsheko ya Peakanyo.
Tokomane e šišinya sehlopha sa melawana le mokgwa wa motheo go Kgoro ya Tekolo le Tshekatsheko ya Mošomo (M&E) yeo e ikemišeditšego go felelela ka kaonafalo ye e tšwelago pele mošomong wa mmušo le thwalo ye e oketšegilego ya maikarabelo. Maikemišetšo a yona a magolo ke go dira gore go be le kwano go maikemišetšo a M&E, le ka fao a swanelago go phethagatšwa.
Se se kgatha tema go phethagatšo ya NDP malepi le go aga mmušo wo a hlabologago le wo o nago le bokgoni gape le go godiša bodudi bjo bo nago le mafolofolo le boetapele bja go tia. Bokgoni bja M&E ke karolo ye bohlokwa kudu ya bokgoni bja bolaodi bjo bo nyakegago bakeng sa mmušo wo o hlabologago le wo o nago le bokgoni.
1.4. Kabinete e dumeletše maemo a poledišano a Afrika Borwa a Pabalelo ya Mohuta wa Khudušo ya Diphoofolo tša Lešoka (CMS COP11) yeo e tlogo swarelwa Quinto go la Ecuador, go tloga ka la 4 go fihla ka la 9 Dibatsela 2014.
Go kgatha tema ga Afrika Borwa ka mafolofolo kgatong ya go šogana le ditlhohlo tša klaemete le pabalelo ya tlhago le mohuta wo o amegago o theilwe godimo ga molalwana wa tshwarelelo ya tikologo le tlhabollo ye e e swarelelago, gomme o sepelelana le dinyakwa tša Karolo ya 24 ya Molaokakanywa wa Ditokelo.
1.5. Kabinete e dumeletše taelo ya poledišano yeo e tlago šoma bjalo ka motheo wa karolo ya Afrika Borwa tulong ya bo20 ya Khonferentshe ya Batšeakarolo ba UNFCCC (COP 20), le Khonferentshe ya bo10 ya Batšeakarolo ye e tlogo ba bjalo ka kopano ya Batšeakarolo ba Kwano ya Kyoto (CMP 10), go tloga ka la 1 go fihla ka la 12 Manthole 2014 go la Lima kua Peru.
Maemo a Afrika Borwa a sepelelana le kgahlego ya bosetšhaba ya naga, le dikhuetšo tša go tšea karolo ga Afrika Borwa bjo bo tšwelago pele ka dipoledišanong tša phetogo ya klaemete ya boditšhabatšhaba bjalo ka ge go laeditšwe ka gare ga NDP.
1.6. Kabinete e dumeletše go romelwa ga Kwano ya Motsekapa ya 2012 ka ga phethagatšo ya mabaka a Kwano ya Torremolinos ya 1993 ya go amana le Kopano ya Boditšhabatšhaba ya Polokego ya Dikepe tša Boreahlapi, 1977 gore e kgonthišišwe ke Palamente.
Kopano ya Torremolinos le Kwano ya yona ya 1993 di laetša maemo a polokego, go swana le ditlabakelo tša go boloka bophelo, kgokagano ya radio, tšhireletšo ya mollo, go tsenywa ga mohlagase le metšhene, le dinyakwa tše itšeng tša dikepe tše di reago dihlapi lewatleng tša dimetara tše 24 le go feta.
Mokgwa wo wa polokego ya boditšhabatšhaba wo o tlemago o tla thuša go kaonafatša maemo a polokego go fokotša palo ya dipolao ka lewatleng, tše di akanyetšwago go 24 000 ka ngwaga lefaseng ka bophara. Dikepe tša Afrika Borwa di tla laolwa ke mabaka a kwano ge di le ka meetseng a Mmušo wo o lego karolo ya kwano ya Torremolinos ya 1993.
Se se sepelelana le maikemišetšo a Operation Phakisa a go tšweletša tlhako ya institšhušene ya taolo ya sekgoba sa Afrika Borwa sa lewatle, a go kaonafatša tšhireletšo ya mawatle a Afrika Borwa, go dikologa diekhoseseteme tše di lego kotsing kudu, le go šogana le tlhaelelo ya mabokgoni, magareng a tše dingwe.
1.7. Kabinete e dumeletše Afrika Borwa go kwana le Kopano ya Boditšhabatšhaba ka ga Maemo a Tlhahlo, Tiišetšo le Tlhokomelo ya Bašomi ba Dikepe tša Boreahlapi, 1995 (STCW-F).
Se ke maiteko a mathomo a go hloma maemo a tlhahlo a kgapeletšo a boditšhabatšhaba bakeng sa dihlopha tša dikepe tše di reago dihlapi lewatleng tša dimetara tše 24 goba go feta ka botelele. Se se tla kaonafatša polokego ya bophelo le thoto lewatleng, le go thibela tšhilafatšo ya tikologo ya meetse a lewatle ka intastering ya boreahlapi.
Nakong ya go feta, mabaka a a oketšegilego a tirelo ya lewatle a be a bonwa bjalo ka tsela ya go hwetša boitemogelo le bokgoni bja maleba. Mokgwa wo wa tlhahlo ya mošomong ga se o tšweletše poelo ya boleng ya bokgoni bja sehlopha.
Mokgwa wo o moswa o agilwe go ama kopantšho ya tlhahlo ya boitemogelo ye e fokoditšwego le thuto ye e beakantšwego botse le go kaonafatšwa go oketša tsebo. Se se tla kgontšha barei ba dihlapi go gatela pele ge nako e ntše e sepela go tloga go dikepe tše nnyane go ya go dikepe tše kgolo tša go rea dihlapi gomme mafelelong dikepe tša kgwebišano maemong a boditšhabatšhaba.
1.8. Kabinete e amogetše meakanyetšo ya dikhoine tša segopotšo ye e latelago ka Khamphani ya Afrika Borwa ya Minte, go phatlalatšwa ka gare ga Kuranta ya Mmušo.
a) Molokeloke wa Dikhoine tša Prothiya: “Bophelo bja Mogale: NR Mandela”
b) Molokeloke wa Dikhoine tša Tlhago: “Batsomi ba Bošego – Phukubje ya Mokokotlo wo Moso”
c) Molokeloke wa Dikhoine tša Gauta tša R1: “Digagabi tsa Afrika Borwa – Kwena ya Naele”
d) Molokeloke wa Dikhoine tša Gauta tša R2: “Protšeke ya UNESCO: Motho le Tikologo”
e) Molokeloke wa Dikhoine tša Silibere tša Tiki le Kgare: “Ditimela tša Afrika Borwa”; le
f) Molokeloke wa Dikhoine tša Silibere tša Kgonthe: “Mafelo ao a Šireleditšwego a Mawatle a Afrika Borwa”
1.9. Kabinete e tsebišitšwe ka Peakanyoleswa ya Dilete tša Maseterata le Ditikologo tša Boahlodi tša Dikarolo le Ditulo tša Selegae tša Kgorotsheko ya Godimo ya Afrika Borwa.
Protšeke ya peakanoleswa ya dikgorotsheko e bušetša morago bohwa bja tlhokego ya tekano le ya toka. E bopa lenaneo leo le tlogo hlahla dikgoro ka moka tše di amegago, makala a phethagatšo ya molao le diinstitšhušene tša toka go thekga ditshepedišo tša tšona ka tshwanelo.
Ditšhaba tše di bego di gateletšwe peleng tša go dula dipušoselegaeng tša maloba, mebušo ye e bego e ipuša le metsemagaeng bjale di tla holega go tšwa go dipoelo tša tshepetšo ya peakanyoleswa. Ditšhaba tše di tla kgona go fihlelela dikgorotsheko ka ditefišo tše di fokoditšwego.
Go fihlelela toka, go a nyakega go matlafatša ditikologo tša kgale tša boahlodi tša dikgorotsheko ka moka tša mehleng ya kgethollo, go akaretšwa tlhamo ya tšona le sebopego. Tshepetšo ya matlafatšo e kgonthišiša gore go na le kabo ye e lekanago ya dikgorotsheko ka mo nageng, go oketša phihlelelo ya dikgorotsheko, yeo e lego tokelo ya motheo wa botho wo o laeditšwego ka gare ga Karolo ya 34 Molaokakanywa wa Ditokelo ka gare ga Molaotheo.
2. Melaokakanywa
2.1. Kabinete e amogetše tsebišo ya Maintenance Amendment Bill (Molaokakanywaphetošwa wa Sapoto) wa 2014 ka Palamenteng.
Molaokakanywa o fetola Molao wa Sapoto wa 1998 (Molao wa 99 wa 1998) go kaonafatša mokgwa wa sapoto le go oketša phihlelelo ya toka ka basadi le bana.
Diphetošo di fokotša ditlhohlo, tša semolao le tša tshepedišo, tše di lemogwago ke baamogedi ba sapoto, bao bontši bja bona e lego basadi le bana.
Se se kopana thwii le dithakete tša bohlokwa tša NDP ka ga phetošo ya ekonomi le tšhireletšo ya leago.
A mangwe a mabaka a Molaokakanywaphetošwa a akaretša: go thibela gore batho ba go se lefele sapoto ba se tšwele pele go fiwa dikoloto mola ba kolota tšhelete ya sapoto, ka go gapeletša barekiši ba diselefounu go fa dikgorotsheko tša sapoto tshedimošo ya kgokagano ya ba ba swanelago go tla go ikarabela le batho ba go se lefele sapotoge kgorotsheko e kgotsofetše gore maiteko ka moka a go kwagala a go hwetša fao ba lego goba ga se a atlege, le go dira gore motho yo a tšwetšego ke taelo ya sapoto a lefe tšhelete ya sapoto ye e šaletšego morago.
2.2. Kabinete e amogetše go romelwa Palamenteng ga Agrément South Africa Bill (Molaokakanywa wa Kwano wa Afrika Borwa) le Memorantamo ka ga Maikemišetšo a Molaokakanywa.
Tlhomo ya Kwano ya Afrika Borwa, bjalo ka ge e šišintšwe ka gare ga Molaokakanywa wa Kwano wa Afrika Borwa wa 2014 go tla tšea karolo kagong ya lekala la kago le le fetogago le go ba le boithomelo leo le tlogo ba le khuetšo ye botse go tlholo ya mešomo mola e tšea karolo dipeakanyong tša Mmušo tša mananeokgoparara.
Mohola wa tlaleletšo o tla akaretša ka bophara go tloga go dinyakišišo go ya go boithomelo, ditiro tša tšweletšo tše di oketšegilego, tlholo ya mešomo le phedišo ya bohloki.
2.3. Kabinete e amogetše tsebišo ya sengwalwa sa Auditing Profession Amendment Bill (Molaokakanywaphetošwa wa Profešene ya Tlhakišo ya Dipuku).
Molaokakanywaphetošwa o šišinya diphetošo go Molao wa Profešene ya Tlhakišo ya Dipuku wa 2005, go laola baithuti ba tlhakišo ya dipuku le go lokiša ditšhupetšo go Molao wa Dikhamphani wa 1973 gore Molao wa Profešene wa Tlhakišo ya Dipuku o sepelelane le Molao wa Dikhamphani wa 2008 (Molao wa bo 71 wa 2008).
Maikemišetšo ke go bea balekodi ba dipuku ba ba lego ka fase ga tlhahlo (balekudi ba dipuku ba baithuti), pele ga ngwadišo, ka fase ga Molao wa Profešene ya Bolekudi bja Dipuku wa 2005 gore ba laolwe ke Boto ya Taolo ya Balekudi ba Dipuku ye e Ikemetšego, go swana le ka fao balekudi ba dipuku ba ba ngwadišitšwego ba laolwago, le go dira diphetogo tše bohlokwa tše di nyakwago ke Molao wa Dikhamphani wa 2008. Se gape se tla šireletša setšhaba mošomong wo o dirilwego ke molekudi wa dipuku yo a lego ka fase ga tlhahlo.
2.4. Kabinete e amogetše tsebišo ya Defence Laws Repeal and Amendment Bill (Molaokakanywaphetošo le Phedišo ya Melao ya Tšhireletšo) wa 2014 ka Palamenteng.
Ye e nyaka go phumula le go fetola melao ye itšeng ya tšhireletšo yeo e tšewago go ba ya kgale le ye e sa šomego bjalo ka ge e hlaotšwe ke Khomišene ya Mpshafatšo ya Molao ya Afrika Borwa.
Khomišene e laetšwe go dira tekolo ya dipuku ya molao ka moka wa Afrika Borwa go eletša ka ga phumulo ya mabaka a kgale, a go se nyakege goba go se be molaong. Molaokakanywa o ikemišetša go phetha mošomo wo ka gare ga tikologo ya tšhireletšo.
Molaokakanywa o šišinya phumulo ya melao ye 16 yeo e lego ya kgale gomme e tšwela pele go šišinya phetošo ya Molao o motee, woo o sa latelego Karolo ya 9 ya Molaotheo (lefokwana la tekano). Se se tla dira gore melao ya tšhireletšo e sepelelane le ditšo tša bjale tša molaotheo ka go ntšha mabaka a kgethollo ka pukung ya molao.
3. Phethagatšo ya Mananeo a Bohlokwa a Mmušo
3.1 Kabinete e keteka le maAfrika Borwa moketeko wa Letšatši la Tokologo ya Bobegaditaba ka la 19 Diphalane 2014 leo Mopresidente Jacob Zuma a bego a kopane le babegaditaba le barulaganyi ba bomahlwaadibona bjalo ka karolo ya go keteka mengwaga ye 20 ya tokologo ya bobegaditaba ka Afrika Borwa. Letšatši la Tokologo ya Bobegaditaba ke la keteko ya tokologo ya polelo ya bobegaditaba yeo e tiišeleditšwego ka gare ga molaotheo wa rena.
3.2 Mopresidente Zuma, a felegeditšwe ke maloko a Kabinete, Tonakgolo ya KwaZulu-Natal le Malekgotlaphethiši a Profense ba swere Imbizo ya Mopresidente ka Mebasepaleng wa Msunduzi le wa uMgungundlovu ka la 30 Lewedi 2014.
Bjalo ka kgokagano ye e tšwelago pele le ye e lebantšhago ditšhaba tša maAfrika Borwa, Mopresidente Jacob Zuma o tla swara lesolo la Siyahlola la Mopresidente go la Giyani kua Limpopo ka la 31 Diphalane 2014.
3.3 Kabinete e amogela pego ya kgatelopele ka ga phethagatšo ya Kwano ya Tlhako ya Intasteri ya Meepo ye e Swarelelago ya go alwa foramong ya Bosetšhaba ya dipoledišano tša Lekala la Meepo.
Foramo e laetša boikgafo bja tšhomišano ya batšeakarolo ka moka go bokamoso bja meepo ka Afrika Borwa, le go tlholo le tlhokomelo ya tekanetšo ye e lekanago gare ga dinyakwa tša ekonomi le leago le maikemišetšo a peeletšo.
Kabinete e amogela go ikgafa leboelela ga batšeakarolo go Kwano ya Tlhako ya Intasteri ya Meepo ye e Swarelelago le khwetšong ya ditharollo tša go ya go ile ditlhohlong tše intasteri e lebanego natšo.
3.4 Kabinete e amogela tsebišo ya Mopresidente Jacob Zuma ka ga kgatelo pele ye e dirilwego ka Operation Phakisa go bula bokgoni bja ekonomi ya mawatle a Afrika Borwa ka mokgwa wa go swarelela.
Lenaneo la kabo ka Mopresidente Jacob Zuma le kgauswi le go laetša dipoelo tše di botse tša ekonomi ya lewatle, yeo e kago tsenya R177 bilione go tšweletšo ya rena ya ka gare ga naga ka kakaretšo le go hlola mešomo ya ka godingwana ga milione o motee.
Protšeke ya bobedi ya Operation Phakisa e thomile ka la 13 Diphalane 2014 gomme e tla šetša dikliniki tše di šomago botse ka mokgweng wa rena wa maphelo. Dihlophatšhomo mo lebakeng la dibeke tše tshela di tla nyakišiša lekala le go tšweletša mananeo a kabo ao a tlogo lokollelwa setšhaba ge di phethilwe.
3.5 Kabinete e amogetše Pego ya Pholisi ya Tekanyetšo ya Lebaka la Magareng (MTBPS), yeo e abago kakaretšo ya tlhako ya ditshenyegelo yeo ditekanyetšo tša profense le tša bosetšhaba di lokišwago ka gare ga yona.
Kabinete e amogela magato a a tsebišitšwego ka gare ga MTBPS go thibela tšhomišo ya tšhelete ka gare ga Tirelo ya Setšhaba.
Kabinete e tiišeletša maAfrika Borwa gape gore le ge klaemete ye ya ekonomi ye boima e tla tšwela pele go thekga mananeo a yona a leago ka ditšhelete, dipeeletšo tša mananeokgoparara le diputseletšo go thekga diintasteri tše bohlokwa.
4. Maemo a Kabinete ka ga Merero ye e lego Ditabeng Seemong sa Bjale
4.1. Kabinete e amogela magato ao a beilwego ke Kgoro ya Enetši go kaonafatša tšhireletšo ya enetši ya naga, go fihlelela dinyakwa tša ekonomi le go hlola mešomo ye e nyakegago kudu. Tshaeno ya dikwano tša dikamano tša go kgabaganya mebušo tša nuklea ke kgato ya maleba go ya tšhireletšong ya dinyakwa tša enetši tša naga.
Dikwano tše di saennwego di tlaleletša sehlopha sa baabi ba nyutleliara bao naga e tlago kgetha go tšwa go bona bakeng sa lenaneo la theko ya nyutleliara le go laetša phihlelelo ye nngwe kgatong ya naga ya go bea pele tšhireletšo ya enetši.
Tshepetšo ye e batametša naga ka kgato e tee kgauswi le go aloga go tšwa go polante ye e lego gona ya enetši ya nyutleliara go la Koeberg go ya go intasteri ya nyutleliara ye e akaretšago go feta le go kgona go ipha thekgo yeo e letetšego go aba 9.6 GW ya mohlagase go keriti ya bosetšhaba.
NDP e gafela naga go nyakišiša dikgetho tša enetši ka moka tše di lego gona go šireletša kabo ya rena ya ka moso ya enetši. Kabinete tshepo gore motswako wa enetši wa Afrika Borwa woo – o akaretšago enetši ya malahla, letšatši, moya, meetse, gase le nyutleliara – o tla kgonthišiša mothopo wa go tshepega wa mohlagase go fihlelela dinyakwa tša kgolo ya naga, go dumelela tekanetšo gare ga methopo ya enetši le go re thuša go fihlelela dithakete tša rena tša phokotšo ya khapone.
4.2. Kabinete e amogela le go lebogiša batšeakarolo ka moka kgatong ya go bula gape Palamente ya Lesotho beke ya go feta go sepelelana le Pego ya Thušo ya Maseru ye e sepeditšwego ke Motlatšamopresidente Cyril Ramaphosa.
4.3. Kabinete e boeletša gore Afrika Borwa e beile magato a maleba go thibela Ebola go phatlalala ka nageng.
Tlhokomelo ya mabopo a botseno ka moka e matlafaditšwe go hlaola malwetši a kokwanatlhoko ya tobo ye kgolo ya madi, kudu Ebola. Mmušo gape o hlomile sehlopha sa bosetšhaba sa tlhakodišo go letela bolwetši gomme dipetlele tše 11 di lokišitšwe bjalo ka disentha tša kalafo ya Ebola.
Kabinete e thekga maiteko ka Mokgatlo wa Lefase wa Maphelo ka go hloma disentha tša Ebola le go matlafatša bokgoni bja diteko tša laporatori, go lota mohlala, thuto ya setšhaba, dipoloko tše di bolokegilego le tlhokomelo ya maphelo ye e sego ya Ebola ka Bodikela bja Afrika.
Kabinete gape e ipiletša go batho le dikgwebo lefaseng ka bophara go thuša ka Sekhwama sa Tlhakodišo ya Ebola seo se hlomilwego go thuša dinaga ka moka tša Bodikela bja Afrika tše di amegilego ntweng kgahlanong le bolwetši bjo bo kotsi bjo.
4.4. Kabinete e amogela go swarwa ga batho ba tshela ba ba amantšhwago le bohodu bja megala bjo bo hlotšego tlhokego ya meetse ka dikarolong tša Gauteng. Batho ba e be e le karolo ya sehlopha sa basenyi seo go kwagalago gore maphodisa a se šwalalantše ka go se tswalelela ka kgolegong. Kabinete e laeditše kgopolo ya gore bohodu bja megala le ditiro tša go amana nabjo – dikhurumelo tša melete ya kelelatšhila, diporo tša leporogo, dipala tša mohlagase, magora, bjalobjalo bo swana le tshenyo ya ka boomo ya lenaneo la naga la mananeokgoparara. Mmušo o tla kgonthišiša gore batho ba swarelwago go ba lemegala ye e utswitšwego ba tla lebana le dikotlo tše boima tše di fiwago ke molao. Mmušo o amilwe ke taba ye gomme o ka se diege go tšea kgato ye e swanetšego kudu go lwantšha bothata bjo.
4.5 Kgwebišano le Peeletšo tša Afrika Borwa (TISA), karolo ya Kgoro ya Kgwebišano le Intasteri (dti), beke ya go feta e amogetše sefoka Khonferentsheng ya Ditšhabakopano Foramong ya Peeletšo ya Lefase ya Kgwebišano le Tlhabollo go la Geneva bakeng sa kgodišo ya peeletšo ye e swarelelago. Se e be e le sa mošomo wo o dirilwego ke TISA thekgong ya tlhomo ya polante ya Indonesia ya Unilever go la Ethekwini, yeo e butšwego ke Tona ya Kgwebišano le Intasteri nakong ya ge Afrika Borwa e be e swere kopano ya COP 17.
4.6 Kabinete e amogetše tshedimošo ya bjalebjale ka ga phuhlamo ya moago go la Nigeria. Pego ya ka thoko e tla fiwa morago ga kopano ye.
5. Ditiragalo tše di tlago
5.1. Mopresidente Jacob Zuma o tla fa polelokgolo ya pulo ka fase ga kgwekgwe ye “Lefase Bjalo ka wo Mongwe wa Mebaraka e Megolo ye e Thomago go Gola”, Khoferentsheng ya innovaBRICS & Beyond go la London ka la 27 Diphalane 2014.
Khonferentshe e kgoboketša baetapele ba mmušo le dikgwebo ka ditshepedišo goba kgahlego ya mebaraka ye e thomago go gola, go nyakišiša le go ahlahla menyetla ya peeletšo le ditlhohlo ka gare ga mebaraka ye.
Kabinete e amogela Khonferentshe ya innovaBRICS & Beyond bjalo ka monyetla wa go bapatša Afrika Borwa bjalo ka lefelo la peeletšo go dikgwebo tše di theilwego United Kingdom le mebaraka ye mengwe ye e thomago go gola.
5.2 Mopresidente Zuma o tla amogela Mopresidente Pierre Nkurunziza wa Burundi ka la 4 Dibatsela go la Motsekapa. Ketelo e tla tiišetša kamano ya dinaga tše pedi ye e lego gona ya go tia le Burundi le go tšwetša pele kgwebišano ya ditšweletšwa tša go swana ka kontinenteng.
5.3 Kgoro ya Meetse le Kelelatšhila, ka tšhomišano le Lekgotla la Afrika la Ditona ka ga Meetse (AMCOW), Khomišene ya Dinyakišišo tša Meetse tša Afrika Borwa, SADC le Basadi ba Tšhomišano ya Meetse, e tla swara Khonferentshe ya Bong, Meetse le Tlhabollo go la East London go tloga ka la 3 go fihla ka la 7 Dibatsela 2014 ka fase ga kgwekgwe ye: “Bong, Meetse le Tlhabollo – kamano ye e sego ya šomišwa”.
Lenanethero la khonferentshe le tla dirwa ke Pholisi le Leano la Tlwaelo ya Bong ya AMCOW ka Lekaleng la Meetse ka Afrika, leo le nago le maikemišetšo a šupa ao a šeditšego go pholisi, methopo, nyakišišo ya leano, kago ya bokgoni, tšhomišano le tekolo le tshekatsheko, go fihlela maikemišetšo a kakaretšo boleng bja bong ka gare ga pholisi ya meetse.
5.4 Kabinete e lakaletša baithuti ka moka mahlatse ge ba itokišetša ditlhahlobo tša mafelelo a ngwaga. Ditlhahlobo tše ke sekala sa mohola ya magato a tsenogare a thuto ya rena go swana le Dikelo tša Bosetšhaba tša Ngwaga ka Ngwaga (ANA) le Setatamente sa Pholisi ya Kelo le Kharikhulamo (CAPS).
Kabinete e amogela tiišetšo ya Umalusi ya gore naga e itokišitše go sepetša ditlhahlobo tša Marematlou gare ga la 27 Diphalane le ka la 28 Dibatsela 2014.
Batswadi, bahlokomedi le ditšhaba ka moka ba hlohleletšwa go thekga baithuti ge ba itokišetša ditlhahlobo tša bona.
Gape kabinete e lakaletša mphato wa marematlou wa 2014 mahlatse ditlhahlobong tša bona tše di tlago. Kabinete gape e hlohleletša batswadi le bahlokomedi go thekga Dikgetho tša Makgotlataolo a Dikolo tša 2015 go tloga ka la 6 go fihla ka la 28 Hlakola 2015 ka go ba bonkgetheng goba ka go kgetha.
5.5 Kabinete e ipiletša go maAfrika Borwa ka moka go thekga Kgwedi ya Bosetšhaba ya Lesolo la Ditokelo tša Bagolofadi gare ga 3 Dibatsela le 3 Manthole 2014 ka fase ga kgwekgwe ye: “Go keteka mengwaga ye 20 ya ditokelo tša bagolofadi ka gare ga Temokrasi ya rena”.
Go tloga ka 1994 re dirile dikgato tše kgolo tšwetšopeleng ya ditokelo le boleng bja bophelo bja bagolofadi ka molao, dipholisi le magato a tsenogare a leago. Go ya ka Tekodišišo ya Mengwaga ye Masopedi go tloga ka 1994 – 2014, Kantoro ka ga Maemo a Bagolofadi e hlomilwe, Leano la Bosetšhaba la Bagolofadi le le Kopantšwego le amogetšwe, gwa abiwa tlhokomelo ya maphelo ya mahala, gomme thušo ya leago le thuto ya go akaretša di fiwa bagolofadi.
NDP e gafela go dira go feta bjalo ka setšhaba go oketša phihlelelo ya ditirelo, kudu ka thuto ya boleng le mešomo ya bagolofadi.
5.6 Ka moya wa Kgwedi ya Dinamelwa, Kabinete e ipiletša go bašomiši ka moka ba tsela go hlokomela kudu ditseleng tša rena ka go hlokomela magomo a lebelo le go kgonthišiša gore dikoloi di loketše tsela. Mmušo o ipiletša go basepela ka maoto go šomiša ditsela ka tlhokomelo le gore bašomiši ka moka ba tsela ba hlomphane.
6. Bao ba thwetšwego mešomong
6.1. Kabinete e amogetše go thwalwa mošomong ga batho ba ba latelago go Boto ya Setheo sa Bosetšhaba sa Dinyakišišo:
a) Moprofesa Mala Singh (o thwetšwe gape);
b) Moprofesa Mamokgethi Phakeng;
c) Moprofesa Ari Sitas;
d) Moatbokheiti Louisa Zondo;
e) Moprofesa Tinyiko Maluleke;
f) Ngaka Vathiswa Papu-Zamxaka;
g) Mohumagadi Gail Campbell
h) Morena Mashangu Lubisi
i) Moprofesa Errol Tyobeka (o thwetšwe gape);
j) Moprofesa Sunil Maharaj (o thwetšwe gape)
k) Ngaka Peter Clayton (o thwetšwe gape);
l) Moprofesa Loyiso Nongxa (Modulasetulo);
m) Mohumagadi Joanne Yawitch; le
n) Moprofesa Murray Leibbrandt (o thwetšwe gape).
6.2. Kabinete e amogetše go thwalwa mošomong ga batho ba ba latelago go Boto ya Ditlhatlhobo tša Tokelo
a) Mohumagadi Elena Mihail Zdravkova;
b) Moprofesa Christiena Maria van der Bank (o thwetšwe gape);
c) Mohumagadi Shanaaz Tiry (o thwetšwe gape);
d) Mohumagadi Sandra Clelland (o thwetšwe gape); le
e) Morena Paul Sibisi (o thwetšwe gape).
6.3. Kabinete e amogetše go thwalwa mošomong ga Maloko a Lekgotla go Lekgotla la Dikhamphani
a) Moprofesa Kasturi Moodaliyar;
b) Moatbokheiti Lizelle Dominique Haskins;
c) Morena Mmoledi Fairhope Malokane; le
d) Morena Peter John Veldhuizen.
6.4. Kabinete e amogetše go thwalwa mošomong ga batho ba ba latelago go Boto ya Lekala la Afrika Borwa la Difofane tša Setšhaba
a) Morena Smunda Mokoena (Modulasetulo);
b) Moprofesa Ntombizozuko Dyani-Mhango;
c) Majoro-Mogenerala Nhlanhla Lucky Job Ngema;
d) Mohumagadi Lizeka Dlephu;
e) Moatbokheiti Roshan Dehal (o thwetšwe gape);
f) Mohumagadi Doris Dondur (o thwetšwe gape); le
g) Morena Mongezi India.
6.5. Kabinete e amogetše go thwalwa mošomong ga batho ba ba latelago ba Bahlokomedi ba Terasete ba e sego ba Phethiši go Boto ya Sekhwama sa Bosetšhaba sa Matlafatšo.
a) Morena R Garach;
b) Morena A Raiz;
c) Mohumagadi Z Ntlangula;
d) Mohumagadi N Mosala;
e) Mohumagadi A Makwetla; le
f) Mohumagadi J Williams.
6.6. Kabinete e amogetše go thwalwa mošomong ga Morena Fundisile Mketeni bjalo ka Mohlankedimogolo Phethiši (CEO) ya Mašoka a Diphoofolo a Bosetšhaba a Afrika Borwa (SANParks) ka konteraka ya mengwaga ye mehlano (5).
6.7. Kabinete e katološitše konteraka ya Mohumagadi Thuli Radebe bjalo ka CEO ya Sentha ya Boithomelo ya Tirelo ya Setšhaba (CPSI) ka mengwaga ye mengwe ye meraro (3).
6.8. Kabinete e amogetše go thwalwa mošomong ga Mohumagadi Lakela Kaunda bjalo ka Mohlankedimogolo wa Ditshepedišo ka Ofising ya Mopresidente.
Dipotšišo: Morena Donald Liphoko
Mogala: 082 901 0766
