Tlolisa ikoloyakho

Okuphathelene nokutlolisa ikoloyakho

Nayibe umnikazi wekoloyi etja, elisegeni nanyana eyakhiwe kabutjha, kufanele uyitlolise ezikweni lokutlolisa iinkoloyi elisemthethweni ukwenzelela bona ufumane isitifikedi sokutlolisa. Nayibe ikoloyi le uyithenga ngemalimboleko, ubunikazi bayo buzokuje bungebekampani ekugalime imali. Ngemva kokobana sele itlolisiwe ngebizo lakho ikhutjhelwe umthelo, uzakunikelwa wona bona uwunamathisele ekoloyini yakho.

Kufanele utlolise bewufumane umthelo wekoloyi esikhathini esiphakathi kwamalanga ama-21 ngemva kokobana ubunikazi bekoloyi butjhugululelwe ebizweni lakho. Nayibe awuyitlolisi, uzakuhlawuliswa ngemali. Ukutloliswa kwekoloyi kurekhodwa eZikweni lezemiSebenzi yeRherho leLwazi lezeenThuthi leliZwe (i-eNatis)

Ukutloliswa kwekoloyakho kuphelelwa kukuba semthethweni nayibe:

• isitlankana somthelo wekoloyi asikavuselelwa isikhathi esidlula eminyakeni emine.
• ikoloyi yabandakanyeka engozini begodu yamenyezelwa njengengakalungeli ukutjhayelwa nanyana ukusetjenziswa unomphela. 
• uyithengisile ikoloyi (utjhugulule ubunikazi).
• wemukwe ikoloyi isikhathi esingaphezu kwamalanga ama-31. 
• sekukhutjhwe isitifikedi sokusula ikoloyi eencwadini zomthetho.

Okufanele ukwenze

Tlolisa ikoloyi etja

1. Ukuze utlolise ikoloyi etja, vakatjhela iziko lokutlolisa iinkoloyi elisemthethweni uphethe imitlolo elandelako:
   • uMazisi wakho
   • Ubufakazi besiphande sakho seposo nesalapho uhlala khona, isb: incwadi  yokubhadela igezi namanzi kwamasipaladi namkha incwadi obhadela ngayo ifowuni yangekhaya. Nayibe incwadi yobufakazi le ayisisebizweni lakho, umnikazi wayo kufuze bona enze isifungo esitloliweko  la afakazela khona ukuthi nangambala uhlala esiphandeni ositjhoko, bese incwadi yesifungo leyo iqobotjhelwa namkha inanyathiselwa encwadini yobufakazi bendawo ohlala kiyo. 
   • isitifiketi somkhiqizi wekoloyi esimumethe yoke imininingwana efaneleko yekoloyi 
   • isitifikedi sokulungela kwekoloyi ukukhamba endleleni, nayibe ikoloyi imhlobo omkhulu [nanyana ikoloyi ingaphasi kweRherho leenThuthi eziKulu zeNdleleni (i-RTQS)].
2. Zalisa Iforomo leSibawo sokuTlolisa nokuKhutjhelwa iLayisensi yeKoloyi (i-RLV).

Tlolisa ikoloyi elisegeni

1. Ukuze utlolise ikoloyi elisegeni (ekhe yasetjenziswa), umthengisi kufanele athome ngokuzalisa bekathumele iforomo leSaziso sokuTjhugulula ubuNikazi/ukuThengiswa kweKoloyi (i-NCO), elisisaziso sokobana ubunikazi bekoloyi budluliselwe ebizweni lomunye umuntu.
2. Vakatjhela iziko lokutlolisa iinkoloyi elisemthethweni uphethe imitlolo elandelako :
   • uMazisi wakho
   • isitifikedi sokutloliswa kwekoloyi (esisebizweni lomthengisi wekoloyi) 
   • isitifikedi sokulungela kwekoloyi ukutjhayelwa eendleleni zomphakathi, nayibe isitifikedi esikhona sesidlulelwe malanga ama-60  
   • ubufakazi bokuthengwa kwekoloyi 
   • ilayisensi yekoloyi esemthethweni (wenze isiqiniseko sokobana iimbadela zomthelo wekoloyi zijame kuhle).

3. Zalisa iforomo lesiBawo sokuTlolisa nokuKhutjhelwa iLayisensi yeKoloyi (i-RLV).

Tlolisa ikoloyi eyakhiwe ngokuhlanganisa iingcenye ezihlukileko zeenkoloyi ezinye

1. Ukuze utlolise ikoloyi ebunjwe ngeengcenye ezihlukileko zeenkoloyi ezinye, vakatjhela iziko lokutlolisa iinkoloyi elisemthethweni langekhenu  uphethe imitlolo elandelako:
   • uMazisi.
   • i-afidavidi eqinisekisa bona iingcenye ekubunjwe ngazo ikoloyizithethwe kuphi begodu kwenziweni ngekoloyi leyo (iforomo i-SOA).
   • umtlolo wemapholiseni wokuhlambulula umuntu ezenzweni zobulelesi (iforomo i-RPC). 
   • umtlolo wemapholiseni oqinisekisa ubuqu bomuntu (iforomo i-RPI). 
   • isitifikedi sokusula ukutloliswa kwekoloyi (nayibe ukutloliswa kwekoloyi kwesulwa). 
   • isitifikedi sesimedo sobudisi bekoloyi. 
   • ubufakazi bobunikazi.
   • incwadi egunyazako yeziko lomthetho (nayikhona).
2. Iziko lesizo lesifunda lizokuthumela imininingwana yekoloyi erherhweni le-eNatis.
   • Yenza isibawo sokukhutjhelwa umtlolo wemapholiseni wokuhlambulula umuntu ezenzweni zobulelesi (iforomo RPC) bese ulithumele
   • Ikoloyi kufanele ihlolelwe ukobana isebujameni obulungele indlela nanyana njani.
3. Zalisa iforomo lesiBawo sokuTlolisa nokuKhutjhelwa iLayisensi yeKoloyi  (i-RLV).

Tlolisa ikoloyi etjhugululwe ukubumbeka

1. Ukuze utlolise ikoloyi etjhugululwe ukubumbeka, vakatjhela iziko lokutlolisa iinkoloyi elisemthethweni langekhenu  uphethe imitlolo elandelako:
   • uMazisi
   • i-afidavidi eqinisekisa bona iingcenye ekubunjwe ngazo ikoloyi zithethwe kuphi begodu kwenziweni ngekoloyi leyo (iforomo i-SOA).
   • umtlolo wokuhlambulula umuntu ezenzweni zobulelesi (iforomo i-RPC).
   • umtlolo wemapholiseni oqinisekisa ubuqu bomuntu (iforomo i-RPI).
   • isitifikedi sokusula ukutloliswa kwekoloyi (nayibe ukutloliswa kwekoloyi kwesulwa).
   • isitifikedi sesimedo sobudisi bekoloyi.
   • ubufakazi bobunikazi.
   • isitifikedi sokulungela kwekoloyi ukutjhayelwa eendleleni zomphakathi.
   • incwadi egunyazako yeziko lomthetho (nayikhona).
   • Isitifikedi sokukhiqizwa kwekoloyi nanyana isitifikedi sokutlolisa sangaphambilini nanyana i-afidavidi nayibe isitifikedi sokutlolisa asitholakali.
2. Zalisa iforomo lesiBawo sokuTlolisa nokuKhutjhelwa iLayisensi yeKoloyi (i-RLV).

Isikhathi esibekiweko

Isibawo sakho sizakuthunyelwa ezikweni lesizo lesifunda.

Ukukhutjhwa kwemininingwana yokutloliswa kwekoloyi kungathatha pheze amalanga ambalwa. Umfakisibawo uzakuthintwa ngabatlolisa iinkoloyi lokha imininingwana yekoloyi sele igadangiswe erherhweni.

Kubiza malini

Fumana ilwazi  mayelana neendleko ezikweni lokutlolisa iinkoloyi elisemthethweni langekhenu.

Amaforomo ekufanele uwazalise

Amaforomo afumaneka ezikweni lokutlolisa iinkoloyi elisemthethweni nanyana ungawakhupha kubunzinzolwazi be-eNatis.

Ungathintana nobani