1. U thomiwa ha mbekanyamushumo dza ndeme dza muvhuso
1.1. Khabinethe yo ṱanganedza Tshipitshi tsha Mugaganyagwama 2016 tshe tsha kumedzwa nga Minisita wa zwa Masheleni Vho Pravin Gordhan nga ḽa 24 Luhuhi 2016. Mugaganyagwama uyu u sumbedza u konḓelela hashu, u ḓikumedzela na u kona zwenezwi ri khou lingedza u wana nḓila kha nyimele mmbi ya ikonomi kha ḓivhazwakale ya zwino.
Mugaganyagwama u fhindula zwine shango ḽa khou ṱoḓa zwone nahone u vusa fulufhelo kha ikonomi nga u vhea shango kha nḓila ya nyaluwo ya ikonomi i katelaho nahone ine ya nga fulufhelwa.
Khabinethe i isa phanḓa u ṱanganedza tsheo yavhuḓi ya maga a ndango ya tshumiso ya masheleni nahone i fulufhedzisa u shumisana na sekhithara dzoṱhe kha u shela mulenzhe kha nungo dza vhoṱhe dza lushaka u itela u thoma zwe zwa fulufhedziswa nga mugaganyagwama.
1.2. Khabinethe yo ṱanganedza u rwelwa ṱari ha Presidential Press Corps (PPC) nga Muphuresidennde Vho Jacob Zuma. PPC i ḓo vhumbwa nga vhaedithi vha polotiki, vhavhigi vha polotiki, vhoramafhungo vha polotiki na vhoramafhungo vha ikonomi vhe vha akhiredithiwa uri vha vha vhige Ofisi ya Muphuresidennde lwa tshoṱhe nahone tshifhinga tshoṱhe.
Ndivho ya PPC ndi u ṋetshedza khwiniso ya tswikelelo ya mafhungo nga vha nyanḓadzamafhungo. I ḓo dovha hafhu ya khwinisa tswikelelo nga vha nyanḓadzamafhungo kha Muphuresidennde na Ofisi ya Muphuresidennde, u itela uri vhoramafhungo vha wane mafhungo a siangane na maitele a u khwaṱhisa kupfesesele kwavho na kuvhigele kwavho. Miraḓo ya mabambiri i ḓo wana mazwiwa u bva kha Muthusa Muphuresidennde kana Minisita ufhio na ufhio ane Muphuresidennde vha mu ramba u kumedza mbekanyamushumo dza ndeme dza lushaka.
1.3. Khabinethe yo tahisa u ṱanganedza hayo u shela mulenzhe ho itwaho nga Afrika Tshipembe kha mvusuludzo ya mulalo ngei Burundi, zwi tshi tshimbilelana na u ḓikumedzela kha mbekanyamaitele ya nnḓa u itela uri hu vhe na mulalo na vhudziki kha dzhango ḽashu.
Yo isa phanḓa nga u ṱanganedza mvelelo dza Nyambedzano dzi katelaho vhoṱhe dza Burundi dze dza farwa tshifhingani tsha madalo a vhurumelwa ha nṱhesa ha Vharangaphanḓa vha Mashango na Mivhuso ngei Bujumbura kha ḽa Burundi he ha vha ho rangwa phanḓa nga Muphuresidennde Vho Zuma.
1.4. Khabinethe yo ṱanganedza u tholwa ha Muphuresidennde Vho Zuma nga Muṅwaleli Guṱe Vho Ban Ki-moon vha Vhuthihi ha Dzitshakha (UN), u vha muthusa mudzulatshidulo wa Khomishini ya Nṱhesa nga ha Mishumo ya zwa Mutakalo na Nyaluwo ya Ikonomi vha tshi thusana na Muphuresidennde Vho François Hollande vha Riphabuliki ya France. Izwi a si lwa u thoma he Muphuresidennde Vho Zuma vha tholwa nga dzangano ḽa ḽifhasi u ita mushumo kha vhugalatenga ha ḽifhasi. U nangwa uhu hu sumbedza u dzhielwa nṱha ha vhurangaphanḓa vhune ha khou itwa nga Muphuresidennde washu kha luvhanḓe lwa dzitshakha.
Khomishini i ḓo ṱuṱula u sikwa ha zwikhala zwa mishumo zwiswa kha sekithara ya zwa mutakalo mashangoni oṱhe, zwihulusa mashango a so ngo bvelelaho. Izwi zwi dovha hafhu u khwaṱhisa u thomiwa ha Adzhenda 20130 ya Mveledziso i Vhuedzaho, ine ya ḓo thusa vhukuma kha u tandulula khaedu tharu dza tshaeho ya mishumo, vhushai na u sa eḓana.
1.5. Khabinethe yo ṱanganedza u rwelwa ṱari ha Saveyi ya Tshitshavha ya Lushaka 2016 ngei Mamelodi, Pretoria nga Minisita ofisini ya Muphuresidennde Vho Jeff Radebe na Radzimbalombalo-Gute Vho Pali Lehohla. Saveyi ya ṋaṅwaha i khou itwa fhasi ha thero: “Afrika Tshipembe ḽine nda ḽi ḓivha, haya hune nda hu pfesesa” nahone yo pika miṱa i fhiraho 1.5 miḽioni – tshivhalo tsha nṱhesa u swika zwino hu tshi vhambedzwa na saveyi yo farwaho miṅwaha miṱanu yo fhiraho ye ya shumisa miṱa ya 300 000 fhedzi. Saveyi i ḓo itwa nga Lambamai nahone mvelelo dzi ḓo vha hone mafheleloni a ṅwedzi wa Fulwi 2016.
1.6. Khabinethe i dzhiela nṱha nga mbilaelo muvhigo wo kumedzwaho nga Dzangano ḽa Mutakalo ḽa Ḽifhasi na Dzangano ḽa Mveledziso na Tshumisano ya Ikonomi kha Mbudziso dza Maraga nga zwa Mutakalo yo rangwaho phanḓa nga Justice Sandile Ngcobo. Mivhigo i sumbedza uri Afrika Tshipembe ḽi ṋetshedza tshumelo ya zwa mutakalo i ḓuresaho musi ḽi tshi vhambedzwa na maṅwe mashango. Khabinethe i ḓo imela mafhedziselo a ṱhoḓisiso phanḓa ha musi i tshi amba nga ha fhungo iḽi.
2. Tsheo dza ndeme dza Khabinethe
2.1. Khabinethe yo tendela u gandiswa ha Mvetamveto ya Maano a u Tandulula Tshikafhadzo ya Muya fhethu Zwitshavhani zwo Ḓalesaho Vhathu vha Mbuelo ya Fhasi zwa Afrika Tshipembe u itela vhupfiwa ha vhathu. Maano a lingedza u ṋetshedza u maga o ḓiimisela o sedzesaho kha u tandulula tshikafhadzo yo hulelaho kha vhuṅwe vhupo ha zwitshavha zwo ḓalesaho vhathu vha mbuelo ya fhasi. I ṋetshedza maga o pfananywaho kha u thoma nungo dza u fhungudza u fhisa zwivhaswa miṱani. U dzhenelela uhu ndi u itela u vhona uri fhethu afha hu tevhedzela Zwitandadi zwa Khwaḽithi ya Muya Hoṱhehoṱhe zwa Lushaka. Maano aya o sedzesaho a ḓo tikedza maano a lushaka a re hone u tandulula tshikafhadzo ya muya shangoni lashu.
2.2. Khabinethe yo tendela u vha muthusa ṋemuṱa wa Muṱangano wa AIDS wa Dzitshakha wa vhumbili (AIDS 2016) vhukati ha muvhuso na Dzangano ḽa AIDS ḽa Dzitshakha ngei Sentharani ya Miṱangano ya Dzitshakha kha ḽa Durban u bva nga ḽa 18 u ya kha ḽa 22 Fulwana 2016. U vha ṋemuṱa wa muṱangano zwi ḓo thusa shango ḽashu kha nungo dzalo kha mafhungo a HIV na Lufhiha ngeno zwi na masiandoitwa kha iṅwe khaedu nthihi Afrika Tshipembe, kha dzingu na kha ḽifhasi.
Muṱangano uyu u ḓo ṋea vhaṱoḓisisi u bva ḽifhasini ḽoṱhe luvhanḓe lwa u kovhana mvelaphanḓa dza zwino dza sainthifiki kha sia iḽi, u guda vhukoni ha vhaṅwe na u bveledza maano a u isa phanḓa zwithu zwoṱhe zwa nungo dzo ṱanganelanaho kha u lafha na u thivhela HIV.
3. Milayotibe
3.1. Khabinethe yo tendela u kumedzwa ha Mulayotibe wa Khwiniso wa Vhuendi ha Shangoni ha Lushaka wa 2015 Phalamenndeni, une wa khwinisa Mulayo wa Vhuendi ha Shangoni wa Lushaka wa 2009, (Mulayo 5 wa 2009). Khwiniso iyi ya Mulayo wa Vhuendi ha Shangoni wa Lushaka wa 2009 i ḓo isa phanḓa maitele a u lugisa na u fhatulula sisiteme ya vhuendi ha shangoni ha lushaka. Izwi zwi so shela mulenzhe kha u tsireledzea, u swikelelea, vhukhwine na vhuḓi ha tshumelo ya vhuendi ha tshitshavha.
Mulayotibe u ṋea mveledziso ntswa kha sekithara ya vhuendi ya tshitshavha. Mulayotibe u ṋetshedza ngeletshedzo kha, vhukati ha zwiṅwe, vhuendi ha nyito dza vhathu; tshumelo ya zwiendedzi zwi vhidzwaho nga sisiteme ya zwishumiswa zwa eḽekiṱhironiki na ṅwalwa ha vhuendi ha tshitshavha. U dovha hafhu wa ṋea u bvisela khagala ndangulo kha maanḓa na ndango kha u bviswa ha ṱhanziela dza vhashumisi vha vhuendi ha tshitshavha.
Mulayotibe uyu u do konisa phaḓaladzo ya Vhuṱumani ha Vhuendi ha Tshitshavha ho Ṱanganelanaho nahone u vha tshipiḓa tsha Pulane ya Themamveledziso ya Lushaka na Thandela 7 ya Maano o Ṱanganelanaho, ane a sedza kha u shumisa mveledziso yo pfananywaho ya dziḓoroboni na vhuṱumani ha vhuendi ho ṱanganelanaho u fhaṱa ḓorobo sa nzhini dza nyaluwo.
4. Mitambo ine ya khou ḓa
4.1. Muphuresidennde Vho Zuma vha ḓo ya Madaloni a Muvhuso kha Riphabuliki ya Federala ya Nigeria u bva nga ḽa 8 u ya kha ḽa 9 Ṱhafamuhwe 2016. Madalo a Muvhuso a ḓo khwaṱhisa nyambedzano dza vhavhili dzi re hone na u isa phanḓa mbambadzo vhukati ha dzingu.
4.2. Ṅwedzi wa Pfanelo dza Vhathu nga Ṱhafamuhwe 2016 u ḓo pembelelwa fhasi ha thero: “Afrika Tshipembe ḽo vhumbana ḽi lwaho na tshiṱalula.” Muhasho wa Vhutsila na Mvelele wo dzula wo lugisela mbekanyamushumo ya ṅwedzi woṱhe ine ya katela mutevhe wa nyambedzano nga ha u shumisana u fhaṱa tshitshavha tshi sa ṱaluli nga muvhala, mbeu, tshi eḓanaho nahone tsha dimokirasi.
Khabinethe i ramba MaAfrika Tshipembe u ṋea vhupfiwa nga ha Pulane ya Nyito ya Lushaka u lwa na Tshiṱalula, Khethululo nga Muvhala, U lwa na vhabvannḓa na u sa Konḓelelana hu re Vhushaka nazwo (2016-2021) phanḓa ha ḽa 30 Fulwi 2016. Pulane i ṋetshedza ṅwongo wa mbekanyamaitele ya tshitshavha ya u lwa na khethululo nga muvhala ine ya ḓo thusa kha u ombedzela zwipikwa zwashu zwa pfanelo dza vhathu dza dzitshakha.
4.3. Nyambedzano ya u Lwa na Zwidzidzivhadzi ya Afrika-Russia ngei ICC ngei Durban u bva nga ḽa 8 u swika ḽa 9 Ṱhafamuhwe 2016 i ṋea luvhanḓe lwa u khwaṱhisa Pulane Khulu ya Zwidzidzivhadzi ya Lushaka (2013-2017).
Nndwa ya u lwa na zwidzidzivhadzi i tshimbilelana na Pulane ya Mveledziso ya Lushaka nahone nyambedzano dzi fhasi ha AU kha u linga u swikelela zwipikwa u ya nga Buthano ḽa Vhugevhenga ho Dzudzanywaho vhu Pfukaho mikano na Zwidzidzivhadzi nga UN, Ndangulo ya Zwidzidzivhadzi kha Pulane ya Nyito ya AU (2013-2017) na tsheo dza BRICS (Brazil, Russia, India, China na Afrika Tshipembe).
Muṱangano uyu ndi dzulo ḽi no khou tou dovha ḽa Nyambedzano ya u Lwa na Zwidzidzivhadzi ya Afrika-Russia, dzine dza vha na ndivho ya u kumedza maimo o ṱanganelanaho nga ha uri vharangaphanḓa vha ḽifhasi vha khou lingedza u lwa hani na thaidzo ya zwidzidzivhadzi ya dzitshakha. Izwi zwi ḓo dzinginywa ngei kha Dzulo ḽa Buthano ḽa Guṱe ḽa UN nga Lambamai 2016.
4.4. Muvhuso – u kha vhufarakani na Ofisi ya Muṅwaleli ya Mashango a mulanganelano, Yunivesithi ya Afrika Tshipembe (UNISA) na Zhendedzi ḽa Mveledziso ya Vhaswa ḽa Lushaka – vha ḓo vha ṋemuṱa wa Muṱangano wa mashango a Mulanganelano wa Vhuvhili nga ha Mishumo ya Vhaswa ngei kha khamphasi ya UNISA NGEI Pretoria u bva nga ḽa 8 u swika ḽa 10 Ṱhafamuhwe 2016. Muṱangano u ḓo farwa fhasi ha thero: “Nyambedzano na Vhaswa nga ha u Fhaṱa Lushaka: Mushumo wa Mishumi wa Muswa” nahone vha ḓo ṱhaṱhuvha hafhu mushumo wa vhagudisi vha mishumo ya vhaswa na vhaakhademi kha nyambedzano na vhaswa nga ha mveledziso ya mashango avho.
5. Maimo a khabinethe kha mafhungo a ndeme a mupo
5.1. Khabinethe i khwaṱhisedza mulaedza nga Muphuresidennde Vho Zuma nga ha ṱhoḓea ya u ṱhonifha zwiimiswa na maitele o sikwaho u ya nga Ndayotewa ya Riphabuḽiki ya Afrika Tshipembe ya 1996 na mulayo. Muphuresidennde Vho Zuma vha khou shuma na fhungo ḽa Minisita wa Masheleni na Khomishinari wa Tshumelo ya Mbuelo ya Afrika Tshipembe nga nḓila dzo teaho vha tshi khou shumisa maga o teaho a mulayoni.
Muphuresidennde vho khou lugisa maga o teaho u tandulula mafhungo nga vhuḓifhinduleli nahone zwavhuḓi u itela mbuelo ya vhoṱhe. Khabinethe i ita khuwelelo kha vhoṱhe vha re na dzangalelo uri vha dzike na u ḓibvisa, nahone vha ṋee mafhungo aya tshikhala uri a tandululee vha tshi shumisa nḓila dzo teaho.
5.2. Khabinethe i ita khuwelelo kha MaAfrika Tshipembe vhoṱhe uri vha ḓiṅwalisele Khetho dza Muvhuso Dzapo dza 2016 nga ḽa 5 na ḽa 6 Ṱhafamuhwe 2016. Vhunga zwo fhambana na khetho dza lushaka, khetho dza muvhuso dzapo dzi ṱoḓa uri vhaṅwalise kha wadi ine vha dzula khayo.
Ndi zwa ndeme u vha na Ḽiṅwalo ḽa Vhuṋe (ID) – ID dala ya bakhoudu na ID ya garaṱa dzi ḓo ṱanganedzwa – na u ṱola maimo avho a u ḓiṅwalisela, nomboro ya wadi na vhupo ha tshiṱitshi tsha u khethela. Ofisi dzoṱhe dza Muhasho wa Muno dzi ḓo vula u bva nga 08:00 u swika nga 17:00 nga ḽa 5 na ḽa 6 Ṱhafamuhwe 2016, zwine zwa khou tshimbilelana na awara dza mushumo wa Khomishini ya Khetho yo Ḓiimisaho lwa maḓuvha mavhili.
Khabinethe i ita khuwelelo kha vhaswa vhothe na vhakhethi lwa u thoma uri vha ḓiṅwalisele u khetha. Nga u khetha vha vha vho dzhia ḽiga kha u ita uri ipfi ḽavho ḽi pfiwe kha tsheo dzine dza vha kwama na u kwama tshitshavha tshavho. Muvhuso wapo u zwanḓani zwavho!
5.3. Khabinethe i sasaladza migwalabo ya matshudeni i re pfudzungule, ye ya khakhisa u guda kha dziṅwe dza dziyunivesithi nahone ya vhanga u kwashekwanywa ha ndaka. Migwalabo iyi i khakhisa matshudeni kha tshifhinga tshavho tsha u isa pfunzo dzavho phanḓa nahone i na masiandoitwa kha pfanelo dzavho dza pfunzo ya nṱha. Muvhuso wo vula nḓila dza vhudavhidzani na vhathu vhoṱhe vhakwameaho kha pfunzo ya nṱha uri hu vhe na khaseledzo na nyambedzano. Izwi zwo ita uri hu vhe na vhuedzedzwa ha nyimele na u ṱuṱuwedza matshilisano yunivesithi dzashu ane a lingedza u wana thandululo kha khaedu dza tshifhinga tsha vhukati na dza tshifhinga tshilapfu dzi re na vhuṱumani na u khwinisa sekithara sa zwo ṱalutshedzwaho kha tsheo dza 2015 dza Samithi ya u Khwinisa Pfunzo ya Nṱha.
Khabinethe i tikedza nungo dza mazhendedzi a mulayo u vhona uri u guda hu khou vhuelela ngonani, na uri ndaka na pfanelo dza vhathu zwo tsireledzea. Mulayo ndi wa ndeme nahone u fanela u tevhelwa tshifhinga tshoṱhe. U vhuelela ngonani na vhudziki zwi fanela u itea yunivesithi dzashu u itela uri mbekanyamushumo dza akhademi dzi bvele phanḓa ngeno khaedu dza tshifhinga tsha vhukati na dza tshifhinga tshilapfu dzi tshi khou tandululwa.
Khabinethe i vhandela zwanḓa matshudeni vhe vha ima vho khwaṱha vha tshi lwa na khethululo na u lwa na vhatshena vha tshi tikedza nndwa yavho, zwine zwa sumbedza u vha tsumbo ya uri ri nga shumisana u fhaṱa kha mvelaphanḓa na mbuelo yo itwaho kha sekithara ya pfunzo ya nṱha kha u lugisela ṅwaha uno wa akhademi. Ri fanela u tsireledza mvelaphanḓa na u tendela vhudziki kha yunivesithi dzashu.
Khabinethe i ita khuwelelo hafhu kha vhathu vhoṱhe vha kwameaho uri vha shumisane u itela uri yunivesithi dzashu dzi vhe vharangaphanḓa vha nyambedzano dza vhoṱhe na khwiniso.
5.4. Khabinethe i dzhiela nṱha mukumedzo wa u ṱangana ha mashumele a u panga maboḓeloni mararu a Khamphani ya Coca Cola Afrika Tshipembe. Khabinethe i dzhiela nṱha uri mafhungo aya a ḓo pfiwa phanḓa ha Ndango ya Miṱaṱisano. Khabinethe yo ṱahisa mbilaelo dzayo kha mukumedzo uyu vhunga hu tshi ḓo vha na ndozwo ya mishumo na u fhungudzea ha mishumo kha thengiselano i vhangwaho nga u ṱangana uhu. Ho sedzwa maimo a nṱha a ṱhahelelo ya mishumo, Khabinethe i ita khuwelelo kha dzikhamphani uri dzi vhone uri mishumo a i lozwea nahone maimo a ṱhanganyelo ya mishumo ha khou kwamea.
5.5. Khabinethe i fhululedza Muambasada wa Afrika Tshipembe kha Dzangano ḽa Mbambadzo ḽa Ḽifhasi (WTO), Vho Xavier Carim, vhe vha nangwa u vha mudzulatshidulo wa Dzangano ḽa Nzudzanyo ya Khuḓano ḽa Khoro Guṱe ya WTO. Khoro Guṱe ndi tshipiḓa tsha nṱhesa tsha u dzhia tsheo tsha WTO vhukati ha Muṱangano wa Dziminisita. U nangwa ha Muambasada Vho Carim zwi dovha zwa vha tshipiḓa tsha mushumo wa ndeme une Afrika Tshipembe ḽa ita kha WTO nahone hafhu ndi tshipiḓa tsha vhuṱanzi kha vhukoni ha Muambasada Vho Carim.
5.6. Khabinethe yo dzhiela nṱha nḓivhadzo ya itwaho nga PLC ya Barclays ya u ḓiimisela hayo u fhungudza mikovhe yayo nga 62.3 wa phesenthe kha Barclays Africa Group Limited (BAGL) miṅwahani mivhili u ya kha miraru. PLC ya Barclays, zwihulusa CEO, o ambedzana na Vhufaragwama ha Lushaka na Bannga ya Mbulungelo kha nyambedzano, nahone i ṱanganedza u ḓikumedzela ha khamphani iyi u thoma maano ayo maswa nga nḓila ine ya fhungudza masiandoitwa kha ikonomi ine BAGL ya shuma khayo. Bannga ya Mbulungelo i ḓo shumisana na Barclays PLC na BAGL u vhona uri khonadzeo ya khombo iṅwe na iṅwe u bva kha thengiselano a dzi nga vhavhi nahone maga o teaho a ḓo dzhiwa u langa u tshimbidza masheleni u itela vhubindudzi zwine zwo vhangwa nga thengiselano.
5.7. Khabinethe i vulela muṅadzi vhoṱhe vhe vha swika kha makhaulakhani na vhawini vha Pfufho dza u Funza dza Lushaka dze dza farwa nga ḽa 27 Luhuhi 2016. Vhadededzi avha vho ḓiimiselaho vha bveledza shango ḽashu phanḓa nga u vhona uri kiḽasirumu dzavho dzi bveledza vhagudi vho ṱuṱuwedzeaho vhane vha ḓo shela mulenzhe kha mvelaphanḓa ya Afrika Tshipembe.
5.8. Khabinethe i fhululedza Market Theatre ngei Johannesburg kha u pembelela miṅwaha yayo ya 40 i hone. Nga tshifhinga tsha muvhuso wa tshiṱalula ṱhietha yo vha tshiga tsha Nndwa nga u amba nga mafhungo a vhukuma a Afrika Tshipembe.
5.9. Khabinethe i fhululedza mudededzi wa muzika, Vho Chad Hendricks, u bva ngei Retreat ngei Cape Flats kha u kunda kha Muṱaṱisano wa Vhalangakwairi wa nṱha wa Len van Zyl kha ḽa Cape Town. Pfufho yavho i katela basari ya miṅwedzi miraru ine ngayo Vho Hendricks vha ḓo guda kha Orchestra ya Philadelphia nahone vha pfumbudzwa nga Muphurofesa a ḓivheaho Victor Yampolsky ngei Chicago.
5.10. Khabinethe i fhululedza mubveledzi wa fiḽimu, Vho Anant Singh, kha u wana vhuimo ha vhuraru kha fiḽimu Shepherds and Butchers kha Pfufho dza Vhaṱaleli vha Panorama kha Fiḽimu ya Fikishini ngei Ḓikitani ḽa Fiḽimu ya Dzitshakha ya Berlin. Izwi zwo swikelelwaho ndi zwihulu vhukuma vhunga fiḽimu yo vha i khou ṱaṱisana na dziṅwe fiḽimu dza 51 u bva mashangoni a 33.
6. Vhathu vho tholwaho
U tholwa hoṱhe hu ḓo thoma ha khwaṱhisedzwa nga ndalukanyo dzavho na u sedzwa arali vhe si na milandu
6.1. U engedzwa ha konṱiraka ya Vho Mr Lionel October sa Mulanguli-Guṱe (DG) Muhashoni wa Mbambadzo na Nḓowetshumo, lwa tshifhinga tsha miṅwaha miṱanu.
6.2. U tholwa ha Dr Mantlhake J Maboya sa Muthusa DG (DDG): Mbekanyamaitele ya Kharikhulamu na Tsedzuluso Muhashoni wa Pfunzo ya Mutheo.
6.3. U tholwa ha Vho Shamilla Chettiar sa DDG: Tshumelo ya Nḓivho na Mbekanyamaitele Muhashoni wa Vhuendelamashango.
6.4. U tholwa ha Vho Mbulelo Tshangana sa DG Muhashoni wa Madzulo a Vhathu.
6.5. U tholwa hafhu ha Vho Kutoane Obed Kutoane sa Muofisiri Mulangi Muhulwane wa Koporasi ya Ndindakhombo ya Zwikolodo zwa Mbambadzelaseli ya Afrika Tshipembe SOC Limited.
6.6. U tholwa ha Vho Vuyo Mafata sa Mukhomishinari wa Ndambedzo: Tshikwama tsha Ndambedzo Muhashoni wa Vhashumi.
6.7. U tholwa kha Phanele ya Ndango ya u Dzhia ndaka lwa tshifhinga tsha miṅwaha miṱanu:
a) Vho Neo Phakama Dongwana (Mudzulatshidulo);
b) Prof Stephanie Marie Luiz (Muthusa Mudzulatshidulo);
c) Prof Shirley Zinn (muraḓo wa phanele);
d) Adv Rory Voller (muraḓo o nangwaho);
e) Vho Wendy Ndlovu (muraḓo o nangwaho);
f) Vho Annalie de Bruyn (muraḓo o nangwaho); na
g) Vho Nano Abram Matlala (muraḓo wa phanele).
6.8. U tholwa kha Bodo ya Koporasi ya Fulufulu ya Nyukḽia ya Afrika Tshipembe lwa miṅwaha miraru:
a) Mr Nqaba Ngcobo;
b) Dr Namane Magau;
c) Dr Xolani Mkhwanazi;
d) Dr Alex Smanga Tsela;
e) Vho Rosemary Mosia;
f) Dr Kelvin Kemm (Mudzulatshidulo);
g) Vho Zibusise Comfort Ngidi;
h) Vho Pamela Bosman; and
i) Mukololo Vho Kennedy Tshivhase.
Mbudziso: Vho Phumla Williams (Muambeleli wa Khabinethe vho tou Farelaho)
Luṱingo: 083 501 0139
