Pego ya Kopano ya Kabinete ya la 2 Hlakola 2016

 

1.1. Kabinete e amogetše Polelo ya Kabo ya Ditekanyetšo tša 2016 ka Tona ya Ditšhelete Pravin Gordhan ka la 24 Dibokwane 2016. Ditekanyetšo tše di laeditšwe go ganelela ga rena, boikgafo le go kgona ga rena ga go rarolla mathata ka pela ge re dutše re loga maano mo lebakeng le le sa kgahlišego la ekonomi go tloga mo nakong ye e sa tšwago go feta. 

 

Ditekanyetšo tše di arabela seo naga e se hlokago ebile di hlama boitshepo ka ekonoming ka go bea naga gore e lebe kgolong ya ekonomi ya seriti, ya go ya go ile le ye e kgonagalago ya go akaretša bohle.

 

Kabinete e tšwela pele go amogela magato ao a tšerwego a go fokotša tshenyegelo ebile e ikgafa go šoma mmogo le mafapha ka moka ka nepo ya go tsenya letsogo ka go lesolo la bosetšhaba ka go tsenya tirišong maikemišetšo ao a beilwego ke ditekanyetšo.

 

1.2. Kabinete e amogela go tsebagatšwa semmušo ga Seboka sa Mopresidente sa Bagaši ba ditaba (PPC) ka Mopresidente Jacob Zuma. PPC e tla bopša ke barulaganyi ba ditaba tša sepolotiki, bagaši ba ditaba tša sepolotiki bao ba lego fao ditaba di lego gona, bagaši ba ditaba tša sepolotiki le bagaši ba ditaba tša ekonomi bao ba dumeletšwego go gaša ditaba tša Kantoro ya Mopresidente dinakong ka moka le go ya go ile. 

 

Maikemišetšo a PPC ke go aba phihlelelo ya tshedimošo ka ba kgašo ka fao go kaonafetšego. Gape e tla kaonafatša phihlelelo ya ba kgašo go Mopresidente le go Kantoro ya Mopresidente, ka nepo ya go netefatša gore bagaši ba ditaba le bona ba hwetša tshedimošo ya peleng le ditshepedišo go maatlafatša kwešišo ya bona le go bega ditaba ga bona. Maloko a Seboka sa bagaši ba ditaba le bona ba tla hwetša tshedimošo go tšwa go Motlatšamopresidente le go tšwa go Tona efe goba efe yeo Mopresidente a mo kgopelago go bolela ka ga mananeo a bohlokwa setšhabeng.

 

1.3. Kabinete e laeditše tebogo go seabe seo Afrika Borwa e se dirilego go tliša khutšo ka Burundi, go sepelelana le boikgafo bja rena go melaotshepetšo ya dinaga tša ka ntle go netefatša gore re ba le khonthinente ya khutšo le yeo e sa tekatekego. 

 

E tšwetše pele go amogela dipoelo tša Poledišano ye e akaretšago bohle ka ga mathata a Burundi ye e swerwego nakong ya ge baromiwa ba maemo a godimo ba Dihlogo tša Dinaga le tša Mebušo ba Mokgatlo wa Seboka sa Afrika (AU) ba etetše Bujumbura ka Burundi, bao ba bego ba etilwe pele ke Mopresidente Zuma. 

 

1.4. Kabinete e amogela go thwalwa ga Mopresidente Zuma ke Mongwaledipharephare wa Mokgatlo wa Dinagakopano (UN) Ban Ki-moon, go ba modulasetulo mmogo le Mopresidente François Hollande wa Repabliki ya France ka go Khomišene ya Maemo a Godimo ka ga Maphelo, Mešong le Kgolo ya Ekonomi. Se ga se la mathomo fao Mopresidente Zuma a ile a thwalwa ke mokgatlo wa lefase go dira mošomo maemong a lefaseng ka bophara. Go thwalwa fa ga Mopresidente ke temogo ya boetapele bjo bokaone kudu bjo bo laeditšwego ke Mopresidente maemong a Boditšhabatšhaba.

 

Khomišene ye e tla hlohleletša go hlangwa ga dibaka tše diswa tša mešomo ka lefapheng la maphelo go ralala dinaga ka moka, kudukudu ka dinageng tše di sego tša hlabologa. Se gape se maatlafatša go tsenywa tirišong ga Lenaneo la 2030 la Tlhabollo ya Go ya go ile, leo le tlago dira ka fao go kgonagalago go rarolla ditlhohlo tše tharo e lego tlhokego ya mešomo, bohloki le tlhokego ya tekatekano.

 

1.5. Kabinete e amogelwa go tsebagatšwa semmušo ga Dinyakišišo tša Bosetšhaba ka ga Setšhaba tša 2016 ka Mamelodi, Pretoria ka Tona ka Kantorong ya Moresidente Jeff Radebe le Radipalopalopharephare Pali Lehohla. Dinyakišišo tša ngwaga wo di dirwa ka fase ga morero wa: “Afrika Borwa ye ke e tsebago, legae leo ke le kwešišago” gomme di nepišitše malapa a go feta a 1,5 milione – e lego tša godimodimo go fihla mo lebakeng le ge di bapetšwa le tšeo di swerwego mo mengwageng ye mehlano ye e fetilego tše di dirilego dinyakišišo go malapa a 300 000 fela. Dinyakišišo tše di tla dirwa ka Moranang gomme dipoelo di tla hwetšagala mafelelong a Phupu 2016.

 

1.6. Kabinete e tshwenywa ke pego ye e hlagišitšwego ke Mokgatlo wa Lefase wa Maphelo (WHO) le Mokgatlo wa Tirišano le Tlhabollo ya Ekonomi ka ga Dinyakišišo tša Mebaraka ya Maphelo tšeo di bego di etilwe pele ke Moahlodi Sandile Ngcobo. Dipego di laetša gore Afrika Borwa e aba ditirelo tša kalafo tša go tura kudu ge e bapetšwa le dinaga tše dingwe. Kabinete e tla emela sephetho sa dinyakišišo tše pele ga ge e ka fa pego ka ga taba ye.

 

 

2.1. Kabinete e dumeletše go phatlalatšwa ga Leano leo le Thadilwego la go Rarolla Tšhilafatšo ya Moya ka Ditšhabeng tše di Tletšego ka Batho tše di Hwetšago Moputso wa Fase ka Afrika Borwa gore setšhaba se fe ditshwaotshwao ka ga sona. Leano le le nyaka go fa mokgwa wo o nepišitšego wa maikemišetšo wa go rarolla maemo a godimo a tšhilafatšo ya moya ka ditšhabeng tše dingwe tšeo di tletšego ka batho tše di hwetšago moputso wa fase.  Le fa mokgwa wo o kopantšwego wa go tsenya tirišong masolo a go fokotša go beša dikgong ka malapeng. Tsenogare ye ke go netefatša gore mafapha a a obamela Melawana ya Bosetšhaba ya Boleng bja Moya Tikologong. Leano le le nepišitšwego le tla thekga leano la bjale la bosetšhaba go rarolla tšhilafatšo ya moya ka mo nageng. 

 

2.2. Kabinete e dumeletše go swara mmogo ga Khonferentshe ya bo 21 ya Boditšhabatšhaba ka ga AIDS (AIDS 2016) magareng ga mmušo le Mokgatlo wa Boditšhabatšhaba wa AIDS ka International Convention Centre (ICC) ka Durban go tloga ka la 18 go fihla ka la 22 Mosegamanye 2016. Go swarwa ga khonferentshe ye go tla tšwetša pele phetolo ya naga ye mabapi le HIV le bolwetši bja mafahla mola ka go le lengwe go lebeletšwe kudu ye nngwe ya ditlhohlo tše bohlokwa kudu ka Afrika Borwa, ka seleteng le lefaseng. 

 

Khonferentshe ye e tla fa sefala seo go sona banyakišiši go ralala lefase ka bophara ba tlago abelana ditšwelopele tša mahlale tša moragorago ka mo lefapheng le, go ithuta ka ga maitemogelo a bona le go hlama maano a go tšwetša pele mekgwa ka moka ya masolo a rena ka moka a go alafa le go thibela HIV.

 

 

3.1. Kabinete e dumeletše go romelwa ga Molaokakanywaphetošwa wa Bosetšhaba wa Dinamelwa tša Nageng wa 2015 ka Palamenteng, wo o fetošago Molao wa Bosetšhaba wa Dinamelwa tša Nageng, wa 2009 (Molao wa 5 wa 2009). Diphetošo go Molao wa Bosetšhaba wa Dinamelwa tša Nageng wa 2009 di tla tšwetša pele tshepedišo ya go fetoša le go beakanya leswa lenaneo la bosetšhaba la dinamelwa tša nageng. Se se tla tsenya letsogo go tirelo ya dinamelwa tša setšhaba ye e bolokegilego, ya go fihlelelega, ya go šoma gabotse le ya go hloka mathata.

 

Molaokakanywa wo o hlagiša ditlhabollo tše diswa ka lefapheng la dinamelwa tša setšhaba. Molaokakanywa wo o fa tlhahlo ka go, gareng ga tše dingwe, dinamelwa tše e sego difatanaga; ditirelo tša dinamelwa tša go šomiša dikhomphutha le go fa dinamelwa tša setšhaba leina le tirelo yeo di e sepedišago. O fa gape tlhathollo ya taolo ka ga maatla ao a filwego le ka ga melawana ya mabapi le go aba dilaesentshe tša go sepetša dinamelwa tša setšhaba.

 

Molaokakanywa wo o kgontšha gape go tsenywa tirišong ga Mananeo ao a Kopantšwego a Dinamelwa tša Setšhaba ebile o bopa karolo ya Leano la Mananeokgoparara a Bosetšhaba le Protšeke ya 7 ye e Kopantšwego ya Togamaano, ye e nepišitšego go šomiša tlhabollo ye e kgokagantšwego ya mananeo a dinamelwa ao a kopantšwego a metsesetoropong go hloma ditoropokgolo bjalo ka metheo ya kgolo. 

 

 

4.1. Mopresidente Zuma o tla tšea Leeto la semmušo la go leba Repabliking ya Bofeterale ya Nigeria go tloga ka la 8 go fihla ka la 9 Hlakola 2016. Ketelo ye ya Semmušo e tla maatlafatša dikamano tše di lego gona tša Dinaga tše ka bobedi le go tšwetša pele kgwebišano ya ka gare ga selete. 

 

4.2. Kgwedi ya Ditokelo tša Botho ka Hlakola 2016 e tla ketekwa ka fase ga morero wa: “Afrika Borwa e kopane kgahlanong le semorafe.” Kgoro ya Bokgabo le Setšo e hlomile Lenaneo la kgwedi ka moka leo le akaretšago molokoloko wa dingangišano ka ga go šoma mmogo go aga setšhaba se se hlokago semorafe, sa go se kgethologanye go ya ka bong, se se lekalekanago le sa temokrasi.  

 

Kabinete e laletša MaAfrika Borwa go fa ditshwaotshwao ka ga Leanotiro la Bosetšhaba la go lwantšha Semorafe, Kgethologanyo ya Semorafe, Lehloyo la Batšwantle le Go hloka Kgotlelelano mo go amegago (2016-2021) pele la 30 Phupu 2016 le dikela. Leano le le fa motheo wa molawana wa setšhaba wa kgahlanong le kgethologanyo ya semorafe wo o tlago thuša go phethagatša ditlamego tša rena tša boditšhabatšhaba tša ditokelo tša botho.

 

4.3. Dingangišano ka ga Twantšho ya Diokobatši magareng ga Russia le Afrika ka ICC ka Durban go tloga ka la 8 go fihla ka la 9 Hlakola 2016 di fa sefala sa go maatlafatša Leanolegolo la Bosetšhaba ka ga Diokobatši (2013-2017).

 

Ntwa kgahlanong le diokobatši tše di sego molaong e sepelelana le Leanotlhabollo la Bosetšhaba (NDP) gomme ngangišano e ka fase ga tshepedišo ya AU go šala morago ditlamego go latela Dikwano tša maleba tša UN le tša Dinaga tše di fapafapanego tša mabapi le Bosenyi bjo bo Rulagantšwego, tša Leanotiro la AU ka ga Taolo ya Diokobatši (2013-2017) le tša BRICS (Brazil, Russia, India, China le Afrika Borwa) resolutions.

 

Khonferentshe ye ke kopano ya ka moragonyana go latela Dingangišano ka ga Twantšho ya Diokobatši magareng ga Russia le Afrika, yeo e ikemišeditšego go hlagiša maemo ao a kopantšwego a ka fao baetapele ba lefase ba nyakago go lwantšha bothata bja diokobatši. Se se tla hlagišwa ka Kopanongkakaretšo ye e Kgethegilego ya UN ka Moranang 2016.

 

4.4. Mmušo – ka tirišano le Bongwaledi bja Dinaga tša Commonwealth, Yunibesithi ya Afrika Borwa (UNISA) le Setheo sa Tlhabollo ya Bafsa sa Bosetšhaba – o tla ba monggae wa Khonferentshe ya bobedi ya Dinaga tša Commonwealth ka ga Mošomo wa Bafsa ka khamphaseng ya UNISA ka Pretoria go tloga ka la 8 go fihla ka la 10 Hlakola 2016. Khonferentshe ye e swarwa ka fase ga morero wa: “Re rerišana le Bafsa Go Aga Setšhaba: Mošomo wa Bafsa bao ba Šomago” gomme e tla sekaseka leswa mošomo wo o kgathago ke bafsa go hlabolleng dinaga tša bona.

 

 

5.1. Kabinete e bušeletša molaetša wo o filwego ke Mopresidente Zuma ka ga tlhokego ya go hlompha dihlongwa le ditshepedišo tše di hlomilwego go latela Molaotheo wa Repabliki ya Afrika Borwa wa 1996 le molao. Mopresidente Zuma o šomana le taba ya Mokhomišenare wa Tirelo ya Metšhelo ya Afrika Borwa le Tona ya Ditšhelete ka go diriša ditshepedišo tše di nepagetšego a šomiša ditaelo tše di nepagetšego tša molao. 

 

Mopresidente o hloma magato go rarolla mathata a ka boikarabelo le ka khutšo gore bohle ba holege. Kabinete e ipiletša go batho ka moka bao ba nago le kgahlego mo tabeng ye go goba maswafo gomme ba emele thoko, gomme ba dumelele taba ye e rarollwe ka go šomiša ditshepedišo tše di nepagetšego.

 

5.2. Kabinete e ipiletša go MaAfrika Borwa ka moka go ingwadišetša Dikgetho tša Mebušoselegae tša 2016 ka la 5 le la 6 Hlakola 2016. Go fapana le dikgetho tša bosetšhaba, dikgetho tša mebušoselegae di nyaka gore o ingwadiše go wate ye o dulago go yona.

 

Go bohlokwa go ba le Pukwana ya Boitsebišo (ID) – bobedi Pukwana ya Boitsebišo e talamorogo ya dipakhoute le Karata ya Boitsebišo di tla amogelwa – le go lekola ge eba o ingwadišitše, nomoro ya wate le lefelo leo seteše sa go boutela se lego gona. Dikantoro tša Kgoro ya Merero ya Selegae ka moka di tla bulwa go tloga ka iri ya seswai mesong go fihla ka iri ya bohlano mathapama ka la 5 le la 6 Hlakola 2016, gomme se se sepelelana le diiri tša mošomo tša Khomišene ya Dikgetho ya go Ikema (IEC) mo matšatšing a mabedi.

 

Kabinete e ipiletša go bakgethi ba bafsa le bao e lego la mathomo ba tlo bouta go ingwadišetša go bouta. Ka go bouta o tšere kgato ya go dira gore lentšu la gago le theeletšwe ge go tšewa diphetho tše di go amago le setšhaba sa geno. Mmušo wa selegae o ka diatleng tša gago!

 

5.3. Kabinete e kgalema ditšhupetšo tša baithuti tša dikgaruru, tšeo di šitišitšego dithuto ka diyunibesithing tše dingwe gomme tša feletša ka go senywa ga dithoto. Ditšhupetšo tše di hlokiša baithuti bao ba nago le maswanedi a go ithuta sebaka sa go tšwetša pele dithuto tša bona gomme di šitiša tokelo ya bona go thuto ya godingwana. Mmušo o butše ditshepedišo tša dipoledišano le bakgathatema ka moka ba thuto ya godingwana gore go boledišanwe le gore go ngangišanwe. Se se feleditše ka go bušetša seemo sekeng le go tšwetša pele ditherišano le setšhaba ka diyunibesithing tša rena tšeo di nyakago go hwetša ditharollo tša ditlhohlo tša lebaka la magareng go fihla go tša lebaka le letelele tšeo di amanago le phetošo ya lefapha le ka ge go hlalošitšwe ka go ditharollo tša Samiti ya Phetošo ya Thuto ya Godimo ya 2015. 

 

Kabinete e thekga maitapišo ao a dirwago ke ditheo tša tirišo ya molao go netefatša gore seemo sa go ithuta se bušetšwa sekeng, le gore thoto le ditokelo tša batho di a šireletšwa. Molao o bohlokwa gomme o swanetše go obamelwa ka dinako ka moka. Pušetšosekeng ya seemo le go hloka dikgaruru di swanetše go boela ka diyunibesithing tša rena gore mananeo a thuto a tšwele pele mola ka go le lengwe ditlhohlo tša lebaka la magareng go fihla go tša lebaka le letelele di a rorollwa.     

 

Kabinete e retile baithuti bao ba tšwetšego pele go kopana kgahlanong le semorafe le tswantšho ya go tshwenya bathobašweu, e lego mohlala wo o laetšago gore ka moka re ka šoma mmogo go aga go kgatelopele le go diphihlelelo tše di re dirilego ka lefapheng la thuto ya godimo ge re be re lokišetša ngwaga wo wa dithuto. Re swanetše go šireletša kgatelopele yeo gomme re dumelele toka go bušetšwa sekeng le go tšwetšwa pele ka diyunibesithing tša rena ka moka.

 

Kabinete e ipiletša gape go bakgathatema ka moka go šoma mmogo gore diyunibesithi tša rena di be baetapele ba ditherišano tše di akaretšago mang le mang le phetošo. 

 

5.4. Kabinete e lemoga go kopanywa fao go šišintšwego ga dikhamphani tša go tšweletšwa mapotlelo tšeo di direlwago Khamphani ya Coca Cola ka Afrika Borwa. Kabinete e lemoga gore taba ye e tla theeletšwa pele ga Kgorotsheko ya Diphadišano. Kabinete e tšweletša tlhobaboroko ya yona ka ga tahlegelo ya mešomo ye e šišintšwego le go fokotšwa ga mešomo ka dikgwebišanong tša go kopanywa ga dikhamphani. Ka lebaka la maemo a godimo a tlhokego ya mešomo, Kabinete e ipiletša go dikhamphani go netefatša gore mešomo ga e lahlege le gore maemo a magareng a mešomo a tšwetšwa pele.

 

5.5. Kbinete e lebogiša Motseta wa Afrika Borwa go Mokgatlo wa Lefase wa Kgwebišano (WTO), Morena Xavier Carim, yo a kgethilwego go ba modulasetulo wa Sehlongwa sa Tharollo ya Dithulano sa Lekgotlakakaretšo la WTO. Lekgotlakakaretšo ke setheo sa godimodimo sa go tšea diphetho sa WTO gareng ga Khonferentshe ya Ditona. Go thwalwa ga Motseta Carim ka go le lengwe ke temogo ya tema ye bohlokwa yeo Afrika Borwa e e kgathago ka go WTO ebile gape ka go le lengwe ke taetšo go bokgoni bja Motseta Carim.

 

5.6. Kabinete e lemogile go tsebagatša ga Barclays PLC ka ga maikemišetšo a yona a go fokotša 62.3 persente ya dišere tša yon aka go Barclays Africa Group Limited (BAGL) mo mengwageng ye e tlago ye mebedi go ya go ye meraro. Barclays PLC, kudukudu mohlankedimogolophethiši, o boledišane le bobedi Kgoro ya Ditšhelete ya Bosetšhaba le Panka ya Resefe ya Afrika Borwa ka dipoledišanong tša phatlalatša, gomme re amogela boikgafo bja khamphani ye go phethagatša leano la yona le leswa ka tsela yeo e tlago fokotša seabe go diekonomi tšeo BAGL e šomago ka go tšona. Panka ya Resefe ya Afrika Borwa e tla šomišana le Barclays PLC le BAGL go netefatša gore dikotsi tše di ka kgonagalago ka lebaka la kgwebišano ye di fokotšwe le gore magato a maleba a tla tšewa go laola dikelo tša matlotlo tše di bakilwego ke kgwebišano ye. 

 

5.7. Kabinete e reta batho ka moka bao ba fihlilego go makgaolakgang le bathopasefoka ba Difoka tša Barutiši tša Bosetšhaba tše di swerwego ka la 27 Dibokwane 2016. Barutišo ba ba ikgafilego ba iša naga ya rena pele ka go netefatša gore diphapošithuto tša bona di tšweletša baithuti bao ba hlohleleditšwego bao ba tlago tsenya letsogo ka tlhabollong ya Afrika Borwa.

 

5.8. Kabinete e lebogiša Market Theatre ka Johannesburg ge e keteka mengwaga ye 40 go tloga mola e bago gona. Ka nakong ya kgethologanyo theetha ye e bile leswao la Ntwa kgahlanong le kgethologanyo ka go anega kanegelo ya nnete ya Afrika Borwa.

 

5.9. Kabinete e lebogiša morutiši wa mmino, Morena Chad Hendricks, go tšwa Retreat ka Cape Flats ge a thopile Phadišano ya Baopediši ya maemo a godimo ya Len van Zyl ka Cape Town. Sefoka sa gagwe se akaretša tšhelete ya dithuto tša dikgwedi tše tharo ka United States fao Morena Hendricks a tlago ithuta ka Philadelphia Orchestra gomme o tla hlahlwa ke Moprofesara wa go hlomphega Victor Yampolsky ka Chicago.

 

5.10. Kabinete e lebogiša motšweletši wa difilimi, Morena Anant Singh, ge a abetšwe sefoka sa maemo a boraro ka ga filimi ya gagwe ya Shepherds and Butchers ka Difokeng tša Panorama Audience Award tša Filimi ye e sa Anegego Dinnete tša Bophelo ka Moletlong wa Difilimi wa Boditšhabatšhaba wo o bego o swerwe ka Berlin. Ye ke phihlelelo ye kgolo ka ge filimi ye e phadišane le difilimi tše dingwe tše 51 go tšwa ka dinageng tše 33.

 

 

Batho ka moka bao ba thwetšwego mešomong mangwalo a bona a dithuto a tla tiišetšwa le go netefaletšwa.

 

6.1. Katološo ya konteraka ya Morena Lionel October bjalo ka Molaodipharephare (DG) ka Kgorong ya Kgwebišano le Diintasteri, mo lebakeng la mengwaga ye mehlano. 

 

6.2. Go thwalwa ga Ngaka Mantlhake J Maboya bjalo ka Motlatšamolaodipharephare (DDG): Melaotshepetšo le Tlhokomedišišo ya Mananeothuto ka Kgorong ya Thuto ya Motheo.

 

6.3. Go thwalwa ga Mohumagadi Shamilla Chettiar bjalo ka Motlatšamolaodipharephare: Ditirelo tša Melaotshepetšo le Tsebo ka Kgorong ya Boeti.

 

6.4. Go thwalwa ga Morena Mbulelo Tshangana bjalo ka DG ka Kgorong ya Madulo a Batho.

 

6.5. Go thwalwa leswa ga Morena Kutoane Obed Kutoane bjalo ka Mohlankedimogolophethiši wa Export Credit Insurance Corporation of South Africa SOC Limited.

 

6.6. Go thwalwa ga Morena Vuyo Mafata bjalo ka Mokhomišenare wa Ditefelo: Sekhwama sa Ditefelo ka Kgorong ya Bašomi.

 

6.7. Bao ba thwetšwego go Phanele ya Taolo ya Dišere Dikhamphaning mo mengwageng ye mehlano:

a) Mohumagadi Neo Phakama Dongwana (Modulasetulo);

b) Moprofesara Stephanie Marie Luiz (Motlatšamodulasetulo);

c) Moprofesara Shirley Zinn (leloko la phanele);

d) Moatbokheiti Rory Voller (leloko le le rometšwego);

e) Mohumagadi Wendy Ndlovu (leloko le le rometšwego);

f) Mohumagadi Annalie de Bruyn (leloko le le rometšwego); le

g) Morena Nano Abram Matlala (leloko la phanele).

 

6.8. Bao ba thwetšwego go Lekgotla la Koporase ya Enetši ya Nyutleleara ya Afrika Borwa mo lebakeng la mengwaga ye meraro:

a) Morena Nqaba Ngcobo;

b) Ngaka Namane Magau;

c) Ngaka Xolani Mkhwanazi;

d) Ngaka Alex Smanga Tsela;

e) Mohumagadi Rosemary Mosia;

f) Ngaka Kelvin Kemm (Modulasetulo);

g) Morena Zibusise Comfort Ngidi;

h) Mohumagadi Pamela Bosman; le

i) Morwa wa kgoši Kennedy Tshivhase.

 

Dipotšišo:
Mohumagadi Phumla Williams (Seboleledi sa Kabinete sa Motšwaoswere)

Mogala: 083 501 0139